أقول ياقلب الزول الاسمو عصام الما لابس هدوم بتاع أخوان مصر دا هو الغتس حجرم ووداهم وراء الشمس .. ياخ دا زول شتم الامارات ماش تقوم ليهو قائمة ؟؟ حاشا وكلا والله .. من ناحية تانية الزول أب دقن طويل وبال أطول وطيبة ظاهرة في وشو بتاع برنامج ( ساعة مصرية ) ليهو يومين شابكنا البناء الهادم البناء الهادم ومقدم البرنامج يشيل ويلولح ليهو في رويسو والدكتور بتاع جريدة الشروق كاتم ضحكتو ومرات مرات كدا أقول الزول دا هسع بفكها ليهم على الهواء مباشرة .. وأنا ميت من الضحك على الدكتور بتاع الشروق الغالباهو ضحكتو .. وما عارف منو كدا العندو صلعة كبيرة وكأنو ما قاعد في البرنامج ويناقش في نفس الكلام موضوع الحلقة .. عايش في عالم تاني خاص وخوفو كلو أن الأخوان يفتحوا ليهم ثغرة نواحي سيناء ليدخل منها اليهود فيعيثوا في المحروسة خرابا ودمارا .. وفي النهاية مرسي بح بح بح .. وأنا ميت من الضحك على الدكتور بتاع الشروق الكاتم ضحكتو ودائما عندي احساس أنو الزول دا بعد شوية ح يفكها ليهم على الهواء مباشرة .. ويبوظ ليهم قعدتم . من ناحية أخري عايز أطلق صافرة انذار أو سمها تحذير لقناة الجزيرة لو عملت عداوة مع المصريين فهي حتما ستشرب ما تروي دا لو لقت ليها موية تبل بيها ريقا من أساسو .. ديل خترين .. أختر من أية حاجة تانية . لكن يعني شنو البناء الهادم دا عباس ؟؟ واتا عامل إيه يا أبو الشباب ياخ ؟
ما أن سمعت عبارة البناء الهادم القالا أبو دقن وكررا أكتر من مرة دي حتي قفز إلى تلافيف ذاكرتي ما يحدث في حوش بكري من تنظيرات وفلسفات وتذويق كلام خارم بارم أراهن انو القاعدين يقولوهو ذاتم ما فاهمين فيهو حاجة .. بس أحفظ ولصق وفكها في الجماعة وصدق نفسك وبعد شوية قول ليهم أن أرسطو بى شحمو ولحمو .
أقول قولي هذا وأدين في نفس الوقت حشد البورد بالبوستات البتتكلم عن مصر وما حدث فيها مع انو بوست واحد كان كفاية ان لم يكن كتير عليهم .. وان نسيت فلن أنسي التذكير بانني أكره السياسة واعتبرها بلاعة قذرة تطفح بكل نفاق ونتانة البشر .
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة