|
|
 سنة الضلمة
|
أشار محدثنا لاحد اصحابي مجاملا له لانو معزوم عندو والله يا جنا اتا ماك كبير لكن الغربة كبرتك ساهي قبل اوانك
طوالي صاحبي عاين لي مرددا في سره بان الكلام ليك يا المنطط عينينك عشان تاني تقول علي عجزت ؟
فعدلت من جلستي وقبلت على عمك يا حاج الزول دا القلت عليهو صغير دا مولود سنة كم عليك الله ؟
فاجاب دون ان يدري بان غتس حجره مولود سنة الضلمة
امممممك
لابد من ملاحقته سريعا سنة الضلمة دي سنة كم يا حاج ؟
52
فتململنا صاحبي وتنحنح وتحكحك وبراس السبحة طقطق وتشهق وطمطق
وقال وهو يرخو من حباله الوترية كالدجاجة البطرية
يا حاج لكن انا مولود سنة الضلمة التانية .... خت لي يا جنا وش اخدر هنا بدردق
.
.
.
الكبر مالو بنخاف منو كدي
|
|
 
|
|
|
|
|
|
|
|
Re: سنة الضلمة (Re: عبدالله ود البوش)
|
سمعت بسنة الكتلة
سنة التخديرة
سنة دو
لكن سنة الضلمة دي اصلو ما سمعت بيها
فيا صاحبي ان لم يكن هناك حرج ادخل تكنك ما تدري وورينا ماهي سنة الضلمة
.
.
غايتو انا مولود سنة التخديرة ويقال سنة ام شعيفة الكتلت المرة الضيفة
والكبران حسنان
فهل صحي ان الغربة تكبر الزول قبل اوانو ؟
ام انها الايام تمر سريعا
بعض الناس يعتقد جازما بان السنين في الاغتراب ما محسوبة
وينتظر ان يعيش باقي العمر هناك في بلاده
| |
|
|
|
|
|
|
|
|
|
Re: سنة الضلمة (Re: عبدالله ود البوش)
|
Quote: غايتو انا مولود سنة التخديرة ويقال سنة ام شعيفة الكتلت المرة الضيفة
والكبران حسنان |
حبيبنا عبدالله ود البوش
كميات من الأشواق متكدسة ياخي
بالله لو في طريقة تمدنا ببعض المعلومات عن ستة (التخديرة) دي
ههههههههه ياخي بركة بالشوفه هنا
اها اخبار الجلاكسي شنو التلفون البيكونو شايلنو ناس عمنا خالد المحرب الواحد
اليوم كلو شايلو و يشخط زي المره البتنضف ليها في رز داك
| |
|
|
|
|
|
|
|
|
|
Re: سنة الضلمة (Re: امير طمبل)
|
اوووووو الولد الحريف طمبلاوي
ياخي والله شوق بلاحدود مع تحياتي للحاجة
عرفتو كيف دا عمك خالد الحرب ؟
.
.
سنة التخديرة دي قريبة يا طمبل لكن قدر ما بحثت عن سنة الضلمة المولود فيها عمك المذكور اعلاه ما عرفتها صرفا ولا عدلا
تابع معي يا حبيب فالامر يهمك ما دام تخطيت الخط الخامس
واحذر ثم احذر النطيط وقلبان الهوبة ولبس الجنز بالقاش ههههههههه وسوي ليك جلابية زي العجايز
.
.
جلاكسي شنو يا زول ... مالي ومال العولق
مشيت سعلت من سعرو لقيتو بشتري بقرة ماخد هههههههههه والله صحي
| |
|
|
|
|
|
|
|
|
|
Re: سنة الضلمة (Re: عبدالله ود البوش)
|
المقدمة اعلاه هي مدخل لمعالجة كيفية أن تتصالح مع نفسك حينما يتقدم بك العمر
ان تعترف بهذه المرحلة الهامة واللذيذة جدا وتتأقلم عليها لتعيش خريف عمر ممتاز تيزة جد
| |
|
|
|
|
|
|
|
|
|
Re: سنة الضلمة (Re: امير طمبل)
|
سيادتي آنساتي سادتي
هذا البوست برعاية اللابتوب الجديد
تحت شعار
فرحانة تركب
تاني وقعتو معاي
كبر ولابتوب
خريف ابو السعن
الله اقبل حمك يا احمودي
مرورك اسعدني
خليك متابع
| |
|
|
|
|
|
|
|
|
|
Re: سنة الضلمة (Re: عبدالله ود البوش)
|
سنة ستة دي يا طمبل سنة المجاعة التي حدثت في 1906م
وكان الناس يحفروا بيت النمل عشان اشيلو عيشو الذي جمعه وخزنه
كدي شوف لي سنة الضلمة دي متين ؟ عشان نأرخ لصاحبك دا ونعمل ليه فذلكة تاريخ
بالله عامل كيف يا طمبل ؟
| |
|
|
|
|
|
|
|
|
|
Re: سنة الضلمة (Re: عبدالله ود البوش)
|
بعد هذه المقدمة الطويلة والمملة سيادتي آنساتي سادتي نود الاقلاع مباشرة لموضوع البوست
والذي عادة ما ابدأه بحكاية من حلتنا
عمنا اب سروال ومن لايعرفه سمي بذلك لانه لايلبس سروال مطلقا
لحدي ما وصل خريف عمره كل يوم يجدد عزمه بان يكون عريسا
فقد تجاوزت حالات زواجه الخمسة عشر حالة وعندو واحد وخمسين من بت لولد
فدعوني ان احكي لكم اخر حالتي زواج كمقدمة لموضوع البوست تحت شعار الاعتراف بالكبر فضيلة
| |
|
|
|
|
|
|
|
|
|
Re: سنة الضلمة (Re: عبدالله ود البوش)
|
اوووووووووو حبيبنا ود البوش
اشواق كمياااات تجارية عديييييييييييل
غايتو للضمان يوم الاحد بشد ليك سلك مع الجلكسيات دي ههههههههه
Quote: اها اخبار الجلاكسي شنو التلفون البيكونو شايلنو ناس عمنا خالد المحرب الواحد
اليوم كلو شايلو و يشخط زي المره البتنضف ليها في رز داك |
يا أمير ما تحرشني ياخ 
الزول دا لو صحت الرواية بأنه امتلك جلاكسي حتتعبوا معاهو
والله صحي()
| |
|
|
|
|
|
|
|
 Re: سنة الضلمة (Re: الامين موسى البشاري)
|
اووووووووووات بالكوم والردوم يا اللمين ود عمي موسى البشاري
والله يا حليلك ومما فت الرياض دي مسخت كلو كلو
اخر فلاش خبت وشي دا مع كمرتك ام رويس ديك
عاين جاي
واحد من جماعتنا الغبش من التكلة الفكي جادالله ومباشرة لجامعة الخرطوم كلية الهندسة معمار زمن بدخلوها الغبش لاغيرهم
صوبن وكو ليهو هدومي وجوة شنطة الحديد مع اللابري اللحمر واللبيض وفانوسو المكتوب عليه ميدن جيرمني في يدو ووعد حبايبو واهلو وشال الخرتوم
ادرع الكسكتة فوق لوري حسب الرسول ود الديش المكتوب عليهو عشا البايتات واذان الصبح قال الله واكبر مرقو من ديار ام زين شايلين البندر
ودخل الناير ود بت الضواها البركس حاملا فانوسه متبخترا متنفخ الاوداج بالبوكسن العجب امو بت الضواها
فاستنكر عليه زملاؤه للفانوس الذي بيمينه يا ود موسى
قالوا ليهو الفانوس دا داير بيهو شنو ؟ مع وجود الكهارب
قاليهم الكهربا دي اصلا ما بتقطع ؟
قالوا ليهو اصلا ما بتقطع
قاليهم كان كدي ما وقعتو معاي يا اولاد البقس
| |
|
|
|
|
|
|
|
|
|
Re: سنة الضلمة (Re: عبدالله ود البوش)
|
والله ياودالبوش اكان في زول مشتهي في الدنيا دي الاقي ،انت ده،ياخ ات زول حكاي،وعندك قدرة تمرق حراق الروح الحايم في خلقوا اليومين ديل،انت عارف حكاياتك جت شربتها وعليك امان الله علي العندي بقيت زول اطاق يسرج له المودرين ال....،المهم مع النصايب المالية الدنيا دي ما في مخرج غير الحكي،وخاصة عن رقبتي انا ده،سنة الضلمة كنت بنشل فوق عد حاج حسن في حلتنا،اشرح بنشل ما يفهمونا غلط،الوكت داك سوق المحيريبا عامر،كت بجي مع ابوي رحمة الله عليه، بعدين ات مولود قبل وله بعد سنة الجدري عبدالله اخوي ،ماقاصد حاجة حفظ مقامات بس، اديك الصحة،وانور قلبك،واملاك بالمحبة ياراجل يالطيف.
| |
|
|
|
|
|
|
|
|
|
Re: سنة الضلمة (Re: عبدالعزيز عثمان)
|
الاخ عبدالعزيز عثمان
سلام وتحية واحترام
ياخي ما خليت لي صفحة انقلب عليها كلو كلو
ولو بلدك بمشي في ضحوة وضهرية حرم لي عندك لكن طشيت في بلدا طير عجمي
واتمنى ان نلتقي في المحيربا
تعرف يا عبدالعزيز علاقتي بالمحيربا دي من فرن عمك مانزو الله ارحمو وجاي
والمساطب الفيها ستات الفول والطعمية بالشطة حاجة حبيبة دهنكلي دهنكلي ونن اتامنة ود جروب
كنا نشتري الرغيف ونبيعو بالحمير في صناديق الشاهي الكبيرة ديك
طق طق طق طري طري كان ما طري ما تشتري
الضاق لبتو باع جبتو هههههههه
.
.
سنة جدري شنو يا عبدالعزيز اتا البتزا دي حنكشت بيك ول شنو ؟
اسما سنة البرجم هههههه البرجم البرجم ياخي
ما تخاف يا عبدالعزيز بوستاتي دي زول ما بعرف نضمينا دا ما بعتب عليها كلو كلو يعني ائ قارئ هنا بعرف النشل
وبعرف عضلة العد فما تعلم كيبوردك الهوبان الفخ ساهي من طرف اياهن ناسك
.
.
اقوليك النصيحة يا عبدالعزيز ول الجنبها لاسع انا ما عارف روحي مولود متين
وقنعت من معرفة تاريخ ميلادي ظاهر وباطن
مرة سنة التخديرة ومرة سنة الكتلة ومرة سنة ميتة جدي امحمد ود عبدالمولى
لكن النجيضة اتا دخلت حنتوب قدامنا بكتير واظنك زمن محمد الامين كعورة نحن عيال احمد خالد هههههه عرفتا حاجة صاح ؟
يا اخوي سنة الضلمة البتتكلم عليها دي ما اياها المقصودة
اتا بتتكلم عن ضلمة الجزيرة
لكن الضلمة المقصودة دي ضلمة البطانة
مرورك اسعدني جدا يا عبدالعزيز
مع تحياتي وخليك متابع
| |
|
|
|
|
|
|
|
|
|
Re: سنة الضلمة (Re: عبدالله ود البوش)
|
Quote: اوووووو الولد الحريف طمبلاوي
ياخي والله شوق بلاحدود مع تحياتي للحاجة
عرفتو كيف دا عمك خالد الحرب ؟
. |
حبيبنا ود البوش
الحاجة بخير و تغريك السلام الشديد
عمنا خالد المحرب الله يطراهو بالخير من ما ترك الصقرية و الجلسات الليلية
بقي يذكرني ايام الظلامي معتز القريش عمل فيها أنصار سنة حليل ايامو اب أحمد
[
| |
|
|
|
|
|
|
|
|
|
Re: سنة الضلمة (Re: امير طمبل)
|
Quote:
يا أمير ما تحرشني ياخ
الزول دا لو صحت الرواية بأنه امتلك جلاكسي حتتعبوا معاهو
[ |
ههههههههههه يا هندسة حبيبنا ود البوشقال مشي يشتريهو لقي سعر بجيب ليهو بقرة
لكن زولك كان دقس لو خش في الجلاكسي ده كان خش معانا بهناك شاف العجب
قهقهقهقه تاني ما كان رجع الجملون السعدان
| |
|
|
|
|
|
|
|
|
|
Re: سنة الضلمة (Re: امير طمبل)
|
عمنا الحكاي ودالبوش سلامات
وحمد الله علي السلامة بعد الغياب
الطويل لكن بتنطبق عليك نظرية
غاب وجاب زي عما لينا من
جهة الصعيد ولدو غاب سنوات
في الغرب اها لمن جاء سائق
قدامو مراح ضان ماشاء الله
ليهو علال فيهو الماخد وفيهو
الدارة وفيهو السايقة اها بقي
يقول لي اولادو ان شاء الله تغيبو
غيبة موحمد ولدي والمقولة
دي عايزين نخليها غيبة ودالبوش
البتجيب بعدها كل الجمال ربنا
مايحرمنا منك ومن طلتك البهية
تسلم ياحبيب
| |
|
|
|
|
|
|
|
|
|
Re: سنة الضلمة (Re: سليمان القرشي)
|
| Quote: عمنا اب سروال ومن لايعرفه سمي بذلك لانه لايلبس سروال مطلقا |
عمك أب سروال ده ذكرني يا ود البوش قصةحدثت في احدي القري المجاورة لي حلتكم
قال ليك واحد عريس يوم دخلتو فجأة كدة اكتشف انو نسي يلبس سرالو قام حكي لاصحابو
قال ليهو ياخي عادي مافي مشكلة و انت عريس قال ليهم الكلام ده كدة ما بيجي لازم نتصرف
المهم جماعتك مشو لقو ليهم دكان مطرف كدة ما لقو عندو سروال لكن عمك سيد الدكان عندو ماكينة خياطة سنجر
بس المشكلة ما عندوقماش المهم سيد الدكان قام قال ليهم انا بتصرف لقي ليهو شوال سكر كنانة فاضي قام فصل منو للعريس
سروال زي السروال و لبسو العريس تحت الجلابية و مشي تم ليلة الزواج و اخد مرتو بعد الحفلة و مشي بيها الحوش
قال ليك العريس بعد طلع الجلابية و العراقي و السروال مرتو بردلب وقعت في الواطة قدر ما رشاها بي موية فايدة مافي
شمما ريحة ما نفع المهم مشي جاب امها دخلت عليها هبشتها يمين شمال فاقت من الدوخة سألتها يا بتي مالك ؟ الحصل عليك شنو؟
بعد اسئلة كتيرة كدة قالت ليها والله يا أمي الراجل ده يوم الدخلة ملص لي سروالو لقيت مكتوب في ذكرو الوزن الصافي 50 كيلو جرام
شفت شوال السكر بتاع سيد الدكان ده عمل شتو
| |
|
|
|
|
|
|
|
|
|
Re: سنة الضلمة (Re: سليمان القرشي)
|
حبيبنا ود البوش اريتك طيب وأهلك طيبين
سنة الضلمة دي غايتو قبل كدا ما سمعت بيها ... لكن سنة الكتلة على ما أعقتد ثورة ود حبوبة وسنة التخديرة دي بتختلف من منطقة لمنطقة .. مثلا عندنا كانت 1936 وفي المناقل 1958-1961 (أظنك قاصد دي )
| |
|
|
|
|
|
|
|
|
|
Re: سنة الضلمة (Re: سليمان القرشي)
|
الحبوبه ود البوش ست النضمي في نص الحوش كااااااااااااااااااااك
غايتو انينا سنة الضربه أليلت ابا
وجينا التعوسية بنين دي بنأرخ لي حاجاتنا بي سنة الفقع وسنة السيل وسنة الجيح وسنة حمى بسيطه وسنة ساحوت بتعرفو الساحوت
موش بقوليك تاكل اكل السوسه والعافيه مدسوسه وسنة البرد وسنة التلج وسنة الهدام
تعرف التوثيق الزي ده مابتنسي كلو كلو السورييين عندهم قرية اسمها اللي شلح سروالو زولك شررررد منهم جاهوم ليك بعد تلتين سنه لقا القريه يافطتا مكتوب فوقا اللي شلح سروالو
قعد طرف قهوة وبدا يسالهم دي شنو دي الروضه تأسست بعد طيحت السروال بي كده وده سوق الجمعه بعد السروال بعشرة سنين وده المهم القرية كلها اتملت يفط سرواليه كاااااااااااااااااااك
زولك طبا كرعي واتخارج يلعن سلسفيلوم
| |
|
|
|
|
|
|
|
|
|
Re: سنة الضلمة (Re: حامد بدري)
|
سنة الضلمة دي ياها سنة ما عرس ابوي امي
غايتو كتر خير الضلمة ... والا امي كانت بارت
ياشفي الحال ما تخليك في بوشك
وابقي ود البوش صحي صحي
مالك مال النضمي اليقلب المواجع
| |
|
|
|
|
|
|
|
|
|
Re: سنة الضلمة (Re: حمزاوي)
|
يا طمبل ما خليت لينا مصران ناكل بيهو الكُرارهـ دى ياخى
لكن شوال السكر افقد القصة منطقا ومعقوليتا زمااان كان فى شوال رز بتاع دمور تخين
لكن الوزن الصافى 25 كيلو وبث 
تحيات لك ولى ود البوش وضيوفة الكرام
:
:
:
:
:
:
مع التحيات لله الزاكيات
| |
|
|
|
|
|
|
|
|
|
Re: سنة الضلمة (Re: حامد بدري)
|
وتاني تحبك نقرة يا حامد بدري وكل ما اشوفك بقوليك تحبك نقرة لحدي ما تنقر
قال حبوبة قال
.
.
.
لكن برضو بشكر مرورك رغم نقرته
تحياتي
| |
|
|
|
|
|
|
|
|
|
Re: سنة الضلمة (Re: عمر السلمة)
|
| Quote: وفي المناقل 1958-1961 (أظنك قاصد دي ) |
بس قبلك يا عمر السلمة
وعرفتك نديدي
شكرا يا عمر ولعلكم طيبين وجركم ملان عجين
تحياتي واشتياقي
| |
|
|
|
|
|
|
|
|
|
Re: سنة الضلمة (Re: الأمين كامل الأمين)
|
Quote: لكن شوال السكر افقد القصة منطقا ومعقوليتا زمااان كان فى شوال رز بتاع دمور تخين
لكن الوزن الصافى 25 كيلو وبث |
ههههههههههههههههههه تصدق فاتت علي يا محمد
كانت سبكت قصة العريس دي سبكة السنيين
ياخي نورت البوست و حبابك الف
| |
|
|
|
|
|
|
|
|
|
Re: سنة الضلمة (Re: امير طمبل)
|
حبيبنا ود البوش والضيوف .. سلام
ما عارف قصة تحديد العمر بي حدث دي خاصة بينا كسودانيين ولا عامة
انا مثلاً عندي حبوبة كانت بتقول لي انت مولود سنة كتلة طمبلباي
وعرفت لاحقا انو الزول دة كان رئيس تشادي
يعني حبوبتي كانت بتعرف سياسة دولية
بالجنبة كدة المجاعة الكانت سنة ستة أظن إنها كانت في 1306هـ في فترة المهدية (حكم الخليفة عبدالله) وهي تقريبا تكون حوالي 1890 ما 1906
| |
|
|
|
|
|
|
|
|
|
Re: سنة الضلمة (Re: عبدالله ود البوش)
|
Quote: فرحانة تركب
تاني وقعتو معاي
كبر ولابتوب
خريف ابو السعن
الله اقبل حمك يا احمودي
مرورك اسعدني
خليك متابع |
ها زول
خبرك
انت ماك كبير انت من سنة حفرو البحر علا الغربة
اها من سنة شية غبيرة ما شفناك
| |
|
|
|
|
|
|
|
|
|
Re: سنة الضلمة (Re: د.محمد حسن)
|
Quote: انت ماك كبير انت من سنة حفرو البحر علا الغربة
|
سنين الغربة ما محسوبة يا دكتور محمد حسن احسب لي لحدي 95 والباقي تكس ارجع ههههههههه
قول والله شية غبيرة القريبة دي ليها سنة
عشان كدي ما محسوبة
رمضان جاك يا جرسة ونلتقي جيب معاك الثرميس اللحمر الكبير سمح ؟
| |
|
|
|
|
|
|
|
|
|
Re: سنة الضلمة (Re: عبدالمنعم الطيب حسن)
|
اووووووو عبدالمنعم الطيب حسن يا صديق يا مبدع
Quote: فالمغترب عاوز الزمن يقيف ، ويرجع ويلقى الحلة زي ما خلاها، وطبعا دي مستجيل،
|
دا مربط فرس البوست
Quote: الباكستاني الميكانيكي الذي اتعامل معه قال ان عمره37 سنة، وعندما سالته متى جاء للسعودية قال 1400 هـ ...
|
ههههههههه كضاب ونساي
Quote: اي زول مخير في عمرو، انا غايتو عمري خمسين ؛
|
اصلو مافي زول بقول عمري اكتر من خمسين
كلو بقيف عند الخمسين
شكرا جزيلا يا حبيب للمشاركة الدسمة
تحياتي واشتياقي
| |
|
|
|
|
|
|
|
|
|
Re: سنة الضلمة (Re: مصطفى عبيد)
|
Quote: انت مولود سنة كتلة طمبلباي
|
لو الكلام دا صحيح فانك بلبل غريد
تبلباي دا مات قريب يا مصطفى اتا متأكد ولا ضرب مثل ساهي
.
.
Quote: بالجنبة كدة المجاعة الكانت سنة ستة أظن إنها كانت في 1306هـ في فترة المهدية (حكم الخليفة عبدالله)
وهي تقريبا تكون حوالي 1890 ما 1906 |
كلامك صاح واشكرك للتصحيح
شكرا جزيلا يا ود أخوي
تحياتي واحترامي
| |
|
|
|
|
|
|
|
|
|
Re: سنة الضلمة (Re: عبدالله ود البوش)
|
شيخ العرب عبد الله ود البوش
سلاااااااااااام ومعزة كبيرة ليك وللمتداخلين
اولا البوش دي عندنا في بادية الكبابيش هو يوم العرس او الفرح عامة
ويكون فوقو زفة وسباق هجن وخيل ودلوكة وجراري وهسيس و..........
"قصبة قورب المزروعة فوق الحوش
ووكفل الجات تردِّع في السباق والبوش
علمان الله لا قيت أم حدق عشوش
العيان كهارب والسنون كشكوش"
اها سنة الضلمة عندنا في الكبابيش إسمها سنة الضليمة يعني مصغّرة بس
وما بعرف لكن سنة الهبوب الحمرة جات فيها ضلمة وقالو أني مولود بي حولها
إنحنا برضو ناسنا بأرخوا بي "سنة الضليمة وسنة الهابور وسنة الهبوب الحمرة وسنة كتلة عيال مجرور
وسنة دمرتنا في تقرو وسنة الضبّان اللّخضر و..................
اها صاحبك البعرس كتير دي ونسا سروالو عندنا واحد جدنا معمر بلحيل
ورجل مزواج عمره حول التسعين سنة وخرَّف بقا بنسي وما زال يتزوج
اها بعد ما كبر ويقوم مارق يقدّم العجيلات والله الحميلات بنسي سروالو في البيت
بقوم بنادي وليداتو ويصيح فيهم
"ها وليد امشي أسأل أمَّاتك ديل قول ليهن سروالي نسيتو عند مني فيهن..........!
يعني ما شاء الله خرَّف وما زالت البندَّق بتضرب وسلاحو..........تمتيك.......!
عندنا برضو في البادية يوم "القيلة" او يوم الدُّخلة بعد ما يجيبو ليك العروس
عندنا عادة إسمها حل الحُزَّامة" إلا تدفع قروش حل الحزَّامة حتّان يسلموك زوجتك
عندنا واحد معمِّر وملان مال عندو إبل كتيرة قام طمَّح ليهو خطيبة واحد وعرسها
وبعد ما دخل عليها لقي نفسو خلاس ما عندو مروّة يعني سلاحو وقف قام طلقها
ورسل ليي خطيبها غنوة
"أم ديساً مكربل طالق العسَّاف
جوزاً ليكي من تالايا تب ما يخاف
الشّوف قل والراس لاف
والتور فارق البقرات صدر في صداف"
"التور عند الرجال بمرتبة "اللائي يأسن من المحيض" عند النساء
محبتي ودمت سمحا
| |
|
|
|
|
|
|
|
|
|
Re: سنة الضلمة (Re: عبيد الطيب)
|
اوووووووو الحبيب عبيد الطيب الزول الوناس
سلام ومحبة واحترام يا زول يا جميل
Quote: اولا البوش دي عندنا في بادية الكبابيش هو يوم العرس او الفرح عامة
|
هو دا بالزبط الموجود في منطقتنا
Quote: ها وليد امشي أسأل أمَّاتك ديل قول ليهن سروالي نسيتو عند مني فيهن..........!
|
ههههههههههههههههههههههههههههههههههههههههههههههههههههههههههههههههههههه
Quote: عندنا برضو في البادية يوم "القيلة" او يوم الدُّخلة بعد ما يجيبو ليك العروس
|
ليتك تكتب لنا عن هذه الليلة المحضورة واظنك تملك كل ادواتها ليتعرف عليها جيل الفنادق
والله يا عبيد الطيب اول زول كسر هذا الموروث ومشى الفندق ليوم الليلة الناس يعيروهو بالمشية دي ههههههههههه
.
.
شكرا جزيلا اخي عبيد الطيب للاضافة الثرة والممتعة
تحياتي الحارة وتقديري الشديد واحترامي
| |
|
|
|
|
|
|
|
|
|
Re: سنة الضلمة (Re: عبدالله ود البوش)
|
تلقاك حضرتها بل ومارستها يا جلال عمر
بالله شفتا كنا مهذبين كيف حتى في المشاغلة
سنة ولا اموت انا
قاليك يا جلال اول ما جات حكاية تتي حمامكم بدي ول بعضي دي بعد ما الزمن بقى كعب شوية
عمك حبيب الله قال لبتو اسمعي هنا الليام دي الجنيات بقولوا للبنات يا تتي حمامكم بدي ول بعضي
لو في واحد قاليك كدي
قولي ليهو حمامنا بضبح جخخخخخخخخخخ
| |
|
|
|
|
|
|
|
|
|
Re: سنة الضلمة (Re: عبدالله ود البوش)
|
شيخ الشاذلي ود الشيخ يعترف بجيل سنة يا تتي الحاصل بي سببو اتي
ويورط ود عمو جلال عمر المتهرب من جيل الله لي انا من سامية
شكرا يا احباب الفسباكة الظريفين
تحياتي
| |
|
|
|
|
|
|
|
|
|
Re: سنة الضلمة (Re: حمزاوي)
|
يا خال ما تنبذ الرئيس القادم اتا قاعد وين ما سمعت ولا شنو ؟
ولبعدين ناس البندر ديل قالو طهورتم بالليذر
فما تقوم تعيد لينا سيرة ود ابتشة والقاشيت وملاح اللبن
.
.
مسكاقمي ورمضان قرب
| |
|
|
|
|
|
|
|
|
|
Re: سنة الضلمة (Re: عبدالله ود البوش)
|
حبيبنا ود البوش ... الزول السمح وأب نضماً سمح
الحكاويهو حلوّة كذا الحسوّة ... على قولة عمتي أمونة بت فكي علي الله يديها العافية ...
شوقنا كتير والله ...
أها شدوا حيلكم ساء (ساكت) ....
ود البوش جاكم المرة دي لابي توبو .... (لاب توب) ....
عمك أب سروال ذكرني بإبراهيم التشادي ..
واحد من الأخوان لما كنا في المحد (معهد الكليات التكنلوجية) ... جاب معاهو واحد تشادي وسكنو في الداخلية
أها إبراهيم التشادي ده ما كان بعرف شيتاً اسمو سروال تب .... بدرع بنطلونو ست ...
أها يوم كان ماشي أم درمان وجا يحكي : لقيت المواصلات زحمة شديد ... قمت ركبت في الباب
في شارع النيل شعرت بهوا باااااااااردة بورا البنطلون ... مديت يدي دخلت جووووووووت ...
زولك طب بنطلونو بيدو ودق للكمساري ...
تحياتي ومودتي ....
| |
|
|
|
|
|
|
|
|
|
Re: سنة الضلمة (Re: عبد الباقي الجيلي)
|
اووووووووووووووووووووووو الود اللطيف المونساتي صاحبي ودفتي عبدالباقي ود الشيخ الجيلي
ياخي مشتاقين عديل كدا
وينك يا زول اللمات دي كلها ما شفتك فيها
حقت مرغني الشايب الماعرف قلبو شوائب ما شفتك فيها
حقت محمد مدني الاسمر النبيل ما شفتك فيها
طهور ود بت الضواها ما شفتك فيهو ههههههههههه
الحكاية شنو ؟ لسع ما جمعت المليون عشان تشيل اهلك
يعني لا ونسة ولا خموس الحكاية شنو اصلو
اصلا ما بنتقال غير كدا
اها عشان تاني الزول دا ما يغالتني دا من زمن المحد الفني
من تالاي انا اصلي ما بخاف من الكبر جاتك تارة احملا اتا
.
.
عاين جاي
قلت لي جدادو سرب في الباظ ههههههههههههه والله حكاية
اسعلك الله صحي ول كَحاً بَوْ ساهي بتعرف التشكيل دا يا وِرْوِ هههههههههه
اها انقوليك الحكاية الصحي صحي دي واسع كان اتصلت حلتنا وقلت ليهو داير زول اسمو فسوة اجيبوهو ليك
في سنة اولى ابتدائي الاستاذ شم ريحة عفنة قال دا منو الخرا دا؟
واحد قال يا استاذ دا النور دا
اقيف علي حيلك يا النور
يا استاذ كان وقفت بتجلبط زيادة
مالك ؟
يا استاذ اسهلت وكنت قايلا فسوة هههههههههههههههه
ومن يومها وحتى اليوم اسمو فسوة
| |
|
|
|
|
|
|
|
|
|
Re: سنة الضلمة (Re: عبدالله ود البوش)
|
دفعتك آ مفتري؟؟؟ ...
عليك أمان الله بيني وبينك حولييييييين .. وقيلا تلاتة ....
علا لكن ما بيناتنا ... دفعتي تب ... شنو ليك .. قصرت معاك ....
بعدين اللمات ديل يطرشني فيهن طرش الترب ....
معليش كنت غاتس في تصحيح أوضاع وكدي ....
قلت لي كحا بو .... غايتو البو ده اظنو الهواب ... وفي رواية الهمبول ....
في ناس هنا آبعرفوه ...لكن المزعلني كان جبنا اسمو بالمصري بعرفوه ...
وأظنها كلها كدي (كحا بو) تعني .... بيني بينك كدي ... فسوة مدنقر ...
أها قصرت معاك آلحبيب ....
| |
|
|
|
|
|
|
|
|
|
Re: سنة الضلمة (Re: عبد الباقي الجيلي)
|
Quote: علا لكن ما بيناتنا ... دفعتي تب ... شنو ليك .. قصرت معاك ....
|
بركة اللعترفت بعضمة كيبورضك
كمان ما تقول اتعلمت التكبشر زي الجنيات
حمالتك علي تغيلتك كدي كُبشُرت جوووووووو اكبها ليك محل قاعد
عشان تاني ما تغالت وتقول حولين ودعولين وحلاوة حلي
اذن جيد او كما قال استاذنا عبدالله حديدة
.
.
Quote: بعدين اللمات ديل يطرشني فيهن طرش الترب ....
|
لانك ما مثقف ثقافة عالية مباري لي كباري الخرج وحديقة خنشليلة ووداي ابو حنيفة تعالي يا فطين واجري جاي يا سوسو اديتونا الليل هههههههه
كان بارتني انا بتثق لكن كان باريت كباري الخرج ديل خشمك بملي تراب وتشيل اهلك اغبش وما مثقف ههههههههههه
عليك الله ونس يا عبدالباقي لكن ختينا ونسة الخرا والفسو دي
قال فسوة مندقر قال
ونسنا ونسة مثقفة
اقوليك حاجة انا وخالد المحرب بقينا في نص الكلام نقول يلا هههههههههه
يعني مثلا عشان تتعلم الكلام المثقف
افتح اللابتوب دا يلا حمل برنامج الضان ود الضان والبطن وسيعة لي تجدع التيمان ههههههههه
| |
|
|
|
|
|
|
|
|
|
Re: سنة الضلمة (Re: عبدالله ود البوش)
|
شهور السنة القمرية حسب تصنيف ناسنا
1 - الضحية التاني
2 - الويحيد
3 - 5- الكرامات التلاتة
6 - سايق
7 - رجب
8 - قصير
9 - رمضان
10 - 11 - اللفطار اللتنين
12 - الضحية اللولى
| |
|
|
|
|
|
|
|
|
|
Re: سنة الضلمة (Re: عبدالله ود البوش)
|
حسن علي ابوقرون
هيييييييييييييع اسمك اكيف لواء بس
زمان كان عاجبني اسم اللواء قسم الله عبدالله رصاص
.
.
يا زول تاني انا بطول وين قت ليك بعد كدا تعبتو معاي لابطوبي طابو في اباطي عرقو اتخرت
واسع كان هفت لي بجيكم بالناكوس بتحت
مرات تلشغو ومرات تجيبو ملان
.
.
الكلام الدقاق داير ليهو بصارة وحرفنة في المنبر دا عشان كونو بجيك عوك عوك ولبعدين نبقى في حاو وهش والبردعة وقعت ويما زيدي الكسرة
قت لي اخير الواحد يعترف واتصالح مع نفسو يا زعمات الجنيات
غايتو انا واحد من الناس اصلو ما بدس عمري بل .... حلوة بل دي ... بل بتكوبر زيادة وراسي ابيااااااااااااض اسمو في سبجة
ومولود سنة الكتلة
كعب التسوغر وقلبان الهوبة البكسر الرقبة كع
شكرا يا الحبيب ابوقرون
| |
|
|
|
|
|
|
| |
عبدالله ود البوش
امير طمبل
احمد حمودى
الامين موسى البشاري
عبدالعزيز عثمان
سليمان القرشي
عمر السلمة
حامد بدري
محمد حمزة الحسين
مصطفى عبيد
عبدالمنعم الطيب حسن
د.محمد حسن
عبيد الطيب
عبد الباقي الجيلي
فيس بوك
تويتر
انستقرام
يوتيوب
بنتيريست