|
|
 Sudaneseonline Biggestloser reunion .. رمضان جانا.. وعاملين كيف؟
|
شلّة الbiggestloser...رمضان مناسبة حلوه نرجع بيها تاني... المجموعة اللزيزة الكانت في البوست القديم ساعدتني كتير عشان اعتمد عادات صحّية في حياتي.. واصل لمستوى لياقة ما حصل وصلت ليه في حياتي.. وصحيح البوست وقف، لكن تأثيره كان طوالي معاي... البوست داك بسببه نقصته total of 14 كيلو... وخلاني اكون سعيدة وشاعره بإني اكتر صحّة...
البوست كان الحلو فيه التشجيع المستمر... والمتابعة... وانه في زول بتجي تقول ليه عملته شنو ولخبطته كيف... ووصلت لياتو مستوى في رياضتك.. وطبعا الاعتراف ده في حد ذاته بخليك تشيل الهم لما تجي تدي تقريرك....
*بكري، البوست ده للربع الجاي عليك الله
|
|
  
|
|
|
|
|
|
|
 Re: Sudaneseonline Biggestloser reunion .. رمضان جانا.. وعاملين كيف؟ (Re: مريم بنت الحسين)
|
البوست الفات ساعد ناس كتير غير المجموعة الكانت active... ناس كتيرين كتبوا لي وقالوا انهم متابعيننا وانه البوست شجعّهم كتير عشان يرجعوا يقيفوا على كرعينهم.. ويحاولوا يعيشوا حياة صحّية.... البوست الفات برضه شهد قصص نجاح تخلي الواحد يبغر... اتكلمنا كتير عن الاكل الصحّي وعن الرياضة والحركة.. وعن تغيير العادات السيئة... اتكلمنا عن انه الموضوع ده مسالة تغيير شامله لطريقة حياتنا .. واننا محتاجين نأثر حتى في ناس البيت ... لفترة حاولت اغير حتى في عادات الاكل بتاعت البيت... وألقى حلول بديلة عشان تخلي اكلنا السوداني صحّي... بشوية تعديلات تضمن انه الاكل يكون مفيد، بس في نفس الوقت يكون صحّي ولزيز.... ولي فترة بحاول اكتب عن الموضوع ده هنا... بس ما لاقيه فرصه... قلت اجمع بين الموضوعين...
رمضان عادة بفكر فيه بنقصان الوزن يمكن بسبب فكرة الجوع خلال ساعات النهار، بنقوم نفتكر انها فرصة مناسبة لنقصان الوزن، المشكلة انه البحصل بعد الشهر الفضيل انه الزول بلقى نفسه زاد زيادة... ! البوست ده حيتكلم عن الموضوع ده برضه... انا ناويه استفيد من فرصة رمضان عشان الواحد ينظف الجسم بتاعه من السموم الكتيرة الفيه.. عايزين نتكلم عن فكرة الصيام من الثقافات التانية، القيمة البتكتسبها انفسنا من الصبر على الصيام معروفه لينا كلنا... لكن فكرة انه الجسم يصوم عن الاكل والشراب، واهمية التوجيه النبوي بضرورة البدء بتمره وكوب ماء لكسر الصيام، دي اعتقد محتاجين نتكلم عنها وعن فوائدها.. وان شاء الله يجونا الدكاتره ويتكلموا لينا عن الفائدة الفعلية للمارسة الدينية وعن اننا لازم نستفيد من رمضان اقصى استفادة...
*ده استدعاء للمجموعة القديمة، وترحيب بكل من يرغب في تغيير حياته... الحاجة دي ما محتاجه منكم زمن، ولو في زول مشغول في الدنيا دي الايام دي، فما بلحقني غايته... لكن قادره اباصر لي دقايق يومي ادي فيها نفسي حقّها...
| |
|
|
|
|
|
|
|
|
|
Re: Sudaneseonline Biggestloser reunion .. رمضان جانا.. وعاملين كيف؟ (Re: مريم بنت الحسين)
|
معقولة??? البوست القاه بالصدفة فى الصفحة الثانية ??
وين اللوزرس??? وين الناس الاكاليين? و ين ناس امير و ابتهال و ود النخيل? و ين نجاة? و ولدنا غباشي? و ين صاحبنا زماااان النصري ?
وين الملايين ?
سلامات يا مريم....مشتاقين و الله. ما ح تتخيلى البوست ده مناسب معاى كيف? مواعيده فى السلك(لسه الناس فى السودان بتقول "فى السللك"?)
كانت عندى صيانة فى البيت و رحول و مشاكل. ما كان فى رياضة و لا حتى اكل صحى.
الان فضيت....مكنتى بتاعة الرياضة ختيتها فى القراش و ح اركب ليها تلفزيون قدامها....و احتمال مكيف صغير كده اذا المروحة ما كفاية. :)
و جاهزة من اليوم ان شاء الله عشان نشوف الحاصل شنو فى الدنيا دى.
شكرا على البوست...و شكلى ح استلمه
| |
|
|
|
|
|
|
|
|
|
Re: Sudaneseonline Biggestloser reunion .. رمضان جانا.. وعاملين كيف؟ (Re: أيمن محمود)
|
عاد يا سمارت الناس تعاين وتتضاير... انا قلت اكتب شويه قبل ما انادي بالاسم، لكن شكله الناس دي إلا تتجر من اضانها... اهو سمارت جات فكّت القائمة كلها.. اخير تجو بالذوق...
ألف مبروك الصيانة والرحول والهمّة العالية ;)... ما تتصوري فرّحتني كيف... فكّرت في البوست باعتبار جيّة رمضان وانه ده موسم تجديد النية بتاعت الاكل الصحّي... عشان كده قلنا نواصل من حيث ما وقفنا
انا ما وقفت رياضة نسبياً ... يمكن لي زي اسبوعين كده موقّفه، لكن لي فترة طويلة مستمرة، وده شي في حد ذاته مريح... لكن محتاجه ارتّب وضعي اكتر عشان اقدر انقص زيادة..
أيمن محمود وصل... خلاص ضمنا الدكتور الكنا بنتكلم عنّه قبيل... يا ايمن، نبدأ ليك اربعة حاجات انا بعتقد انها اساسية (في نظامي) لانه نفعت معاي جداً...
1- شراب الموية: ده الشي الوحيد الثابته فيه خلال السنتين الفاتو والمخليني اشعر انه من غيره حأرجع للحال الزمان والوزن الزمان... شراب الموية بالنسبة لي تحدي يومي بتحدى بيه نفسي، الشي الثابت اني اول ما اصحى من النوم بشرب 600 مل موية، تقريبا كوبايتين وحبّة... قبل ما اعمل اي شي لازم اشرب المويه دي... بعداك بكرر نفس الكمية على مرّتين خلال اليوم .. يعني في اليوم بشرب 600*3 مل=1800 مل... عندي كباية كبيرة سعتها 600 مل بملاه وبقوم بيها كللللللللللها... كده بضمن انه كمية الموية بتاعتي ما بتنقص.. ده غير انه لما اشرب الكوباية دي قبل اي وجبة، بلقى نفسي اكلت كمية أقل... اعتقد التحدي هنا حيكون كيف اشرب كميتي دي في رمضان في الفترة القليلة بعد الفطور
2- الشاي الاخضر: ده كنت منتظمة فيه لدرجة العواره، بعد كل وجبة بشربه وبخرم ليه زي الشاي الاحمر للشوايقة  اي شي آكله بشربه بعد شاي اخضر، يعني بمعدل كبايتين إلى تلاته في اليوم، وبالجد كنت مرتاحة... انا عارفه انه الابحاث ما conclusive حول تأثيره على نقصان الوزن، لكن قاعد يساعدني في الهضم جداً، بجيب نوع رهيب جداً معاه نعناع، لما تفتح العلبة بجيك ريحة النعناع قوية وفرش ... الشاي الاخضر بساعد برضه في انه الزول يشعر بالشبع اليوم كله... يعني البطن بتكون مليانه، اعتقد ده التأثير بتاعه معاي...
3- السلطة الخضراء: دي ما مستمرة فيها لي زمن... اكتر وقت كنت بنقص فيه وزن كان لما كنت ماشه كويس في موضوع السلطة... كنا بنعملها بمزاج في للغدا، ويمكن السبب اني انشغلت شويه بقيت ما بلقى الوقت اظبّطها، بعملها منوّعه وبطعّمها كويس ملح وفلفل وليمون وببشر فيها جبنة بيضا.. صحيح بتزيد الكالوريز لكن بتخلي الزول ياكل منها كتير... ببدا الغدا بعشرة ملاعق من السلطة، وبعداك باكل من الاكل العادي، وبعد كل لقمة باخد تلاته لقم سلطة... كده كنت باكل في الخضار اكتر شي، وبطلّع نفسي من الطبق الرئيسي...
4-الريااااااااااااااااااااااضة.... اكتر حاجه خلتني اجبر روحي عليها اني اول ما اصحى من النوم قبل ما اطلع من اوضتي بكون لبسته لبس الرياضة كااااامل، بما فيها الكدّاره... وبكون حايمه بيهم يومي كله... اول ما ألقى فرقة، طوالي على الtreadmill... او اشغل لي فيديو بتاع زومبا او امشي انطط ما اولادي في الwii ... بالميّت كده، بلقى روحي بسبب الكدّارة انجزته شغلي في وقت اقل لاني بمشي بيها بسرعة وبنشاط... حتى لو ما عايزين تخسروا وزن، الرياضة والله مهمّة... في ناس وزنهم ما كبير وبرضه بتجيهم امراض زي السكّري والضغط والكولسترول، وكل الامراض دي ممكن التغلّب عليها بالرياضة... برضه حيكون التحدّي في رمضان، متين نتريّض.. فترة انا ونادر والاولاد ايام الجو حلو كنا بنتطلع نمشي مشاوير مكوكيه كده... عايزين نتغدى برّه نقوم نخلى السيارة ونمشي لحدي المطعم (6-8 كيلومتر من البيت) بي كرعينا... الاولاد كانو بستمتعوا شديد بالمغامرة دي.. عايزين نشتري حاجات من السوق، برضه بي كرعينا (حوالي 5 كيلومتر) محمود بي كرعينه ليلى خانم في الpushchair بتاعها...
برجع تاني
دي سلطتنا في أوجّهها... قبل ما تجيها الجبنة كمان... يممممم
| |
|
|
|
|
|
|
|
|
|
Re: Sudaneseonline Biggestloser reunion .. رمضان جانا.. وعاملين كيف؟ (Re: مريم بنت الحسين)
|
| Quote: *ده استدعاء للمجموعة القديمة، وترحيب بكل من يرغب في تغيير حياته... الحاجة دي ما محتاجه منكم زمن، ولو في زول مشغول في الدنيا دي الايام دي، فما بلحقني غايته... لكن قادره اباصر لي دقايق يومي ادي فيها نفسي حقّها... |
آحممممممم وصلنا ونبصم بالعشرة موافقين نرجع تاني ونبداء من أول....
أولا - سلامات يا بت الحسين واسمارات ، والله مشتاقون .
قولوا بسم الله إبتدينا ههه.
والله وبصراحة شديدة الزيادة حاصلة لذلك معاكم من اليوم وفعلا برنامجنا كان مفيد وانا سعيدة ب أقتراحك يا مريوم ...
نواصل .....
| |
|
|
|
|
|
|
|
|
|
Re: Sudaneseonline Biggestloser reunion .. رمضان جانا.. وعاملين كيف؟ (Re: Nagat Sid Ahmed Elshiekh)
|
ازيكم يا حلوين... كنت مشغوله اليومين الفاتو ديل، عملته حفلة لوداع د.حيدر بدوي صادق وعائلته بسبب انتقالهم من السعودية وذهباهم إلى قطر.... كانت احتفال جميل جداً
نجاة يا فرده... ياخ انت اكتر زول كان ملتزم فينا.... ودايما بتكتبي... انا سعيدة انك متحمسة تكوني معانا تاني...
نتكلم الليلة عن التغييرات الممكن الواحد يعملها في طريقة الاكل بتاعنا السوداني عشان يقدر ياكل بصورة اكتر صحّة... حأبدأ بي البصلة بتاعتنا لانها اساس كل الطبيخ البنعمله.... البصلة طبعا عندها مشكلتين، المشكلة الاولى انها بتتحمر في كمية من الزيت كتيرة جداً... اهم شي عندنا في طعم البصلة هو نكهته التحمير، من الحاجات الممكن نعملها اننا نستخدم البصلة المحمره والمجففه، لانه كمية الزيت فيها بتكون قليلة.... باقي البصلة ممكن نسلقها في مويه وبهارات.... بعد ما الطبخة تتسبّك، كبو ملعقتين زيت سمسم بي فوق الطبيخ بتظهر الحركة بتاعت "وش الطبيخ" وفي نفس الوقت بتدي نكهة خرفاية.... الحركة بتاعت زيت السمسم اتعلمتها من عمّة أولادي..
المره الجايه حأعمل مقارنة صحّية بين الكسرة والقراصة عشان نشوف الاحسن ياتو
*النصري وعرفناه ما حيظهر، العوض ده وين؟؟
| |
|
|
|
|
|
|
|
|
|
Re: Sudaneseonline Biggestloser reunion .. رمضان جانا.. وعاملين كيف؟ (Re: مريم بنت الحسين)
|
سلامات ياشباب
معاكم المرة دي من الداخل .. في البوست الفات كنت مشارك معاكم عن طريق ايميل النصري
ودي فرصة كويسة انو الزول يشكركم على النصائح والدعم .. طبعا النصري مافي شكر ممكن يكفيهو حقو عشان كده الافضل تخليهو كده ساكت من غير شكر :)
شكرا يامريم على فكرة شراب الموية لانها كانت فعلا مفيدة جدا بالنسبة لي
وياريت يامريم طالما عايزة تتكلمي عن العادات الغذائية تدينا انتي واسمارت وصفات خفيفة يسهل على الرجال العذاب* عملها في البيت بالذات في رمضان
* رجال عذاب يعني الوصفة لازم تكون سهلة وسريعة ومامحتاجة لي دقة او اي فنيات :)
| |
|
|
|
|
|
|
|
|
|
Re: Sudaneseonline Biggestloser reunion .. رمضان جانا.. وعاملين كيف؟ (Re: محمد عبد الماجد الصايم)
|
سلام يا بت الحسين وكل الناس المفيدين فى سودانيز
البوست بتاعكم السابق كنت بشوفه يوميا وما حصل نقرت اللنك ابدا للدخول ودة طبعا تفسيره واضح , بداهة للشعور بالذنب وعدم الرغبة فى تحمل المسئولية والالتزام بتغيير نمط الحياة , تاريخيا كنت اعانى من النحافة والهزال فى طفولتى لدرجة التعالج واستمر هذا النمط حتى الصبا والشباب , الى ان اكملت نصف دينى واعقبها بعد ذلك تغيير فى طبيعة العمل , حقيقة كنت قليل الاكل واحيانا لا اتذكر انى لم اتناول شى خلال اليوم ولكن تغير كل ذلك الى النقيض تماما ربما ساعد فى ذلك وجود شخص اخر فى حياتى , زوجتى عندما حضرت لى كانت فى غاية النحافة وما زالت ما شاء الله بعد 13 عام زواج واطفال ليست نحيفة الان ولكن معتدلة , لذلك كنت احاول تشجيعها على الاكل بتنوع الطعام والخروج دوما الى المطاعم , اضافة لذلك فقد نقلت لادارة اخرى بشركتى تعتبر نافذة التواصل بين شركتنا والشركة الاجنبية الام , ومن طبيعة العمل حضور حفلات الاستقبال التى نقيمها للزائرين او التى نحضرها فى البلدان الاخرى المضيفة مما فاقم الاوضاع سوءا, الخلاصة اضفت حوالى 30 كجم منذ ذلك الحين والمشكلة حتى الان لم التزم بتطبيق برنامج صحى جديا سوى كان رياضة او تنظيم غذائي , ولكن الايجابى فى الامر هو رغبتى فى التغيير واهتمامى بالنقاش حول هذا الامر والذى كنت اتحاشاه فى السابق
| |
|
|
|
|
|
|
|
|
|
Re: Sudaneseonline Biggestloser reunion .. رمضان جانا.. وعاملين كيف؟ (Re: مريم بنت الحسين)
|
خالد ازيك ومرحب بيك من داخل المنبر، انا ناويه انزّل وصفات بتاعت دجاج اعتقد انه حتنفع مع العزّابة، لكن المشكلة انها ما حتنفع مع رمضان... لكن حأنزلهم برضه
شراب المويه من الحاجات المهمة جداً، احنا في الخليج بشكل عام بنشرب مويه قليله لاننا بنكون في المكيفات اليوم كله، واتعودنا ما نشرب إلا نعطش... المويه اساسية في اي... الزول لو عنده اي شي بقولوا ليه اشرب سوائل كتير، وهي الشي الوحيد الكتيره بفيد (بس في حد كده معقول ما مفروض نتجاوزه، لانه في حاجه اسمها تسمم الماء بقتل عدييييييييييل)...
في انتظار مشاركاتك... وطبعا طبيعة البوست ده انه ملك للجميع، ما حق زول... اي زول ممكن يمسك جانب ويناقشه
| |
|
|
|
|
|
|
|
|
|
Re: Sudaneseonline Biggestloser reunion .. رمضان جانا.. وعاملين كيف؟ (Re: احمد التجانى احمد)
|
اخونا احمد التجاني، مرحب بيك.. واهلا في الbiggest loser
تعرف، انا استملته نادر ده، زول رياضي وضعيف وبمشي الجيم تلاته مرات في الاسبوع... اشتغلته ليك عليه مكرونه وبشميل وكريمه وستيك ومشروم وبلاوي (حاكم اختك بتحب الطبيخ كمان)، بالله حسي عامل لي فضيحة، قال ليهم كله من مريم دي... في عامل تاني برضه وهو العمر ليه علاقة، الزول لا يكبر ال####bolism بتاعته بتقل، وانا ما بتكلم عن كبر شديد، مجرد الزول يدخل التلاتين خلاص.... ده بتطلب انه الزول يغير عاداته الغذائية ومستوى نشاطه... يا زول مرحب بيك معانا في النسخة الرمضانية، والتعديلات الممكن الزول يعملها عشان ينقص في رمضان على عكس العادة المعروفة عن رمضان طبعا... الناس بزيد وزنهم في رمضان!
| |
|
|
|
|
|
|
|
|
|
Re: Sudaneseonline Biggestloser reunion .. رمضان جانا.. وعاملين كيف؟ (Re: محمد عبد الماجد الصايم)
|
ود الصايم.... المشي احلى واحسن رياضة الزول يبدأ بيها... وبعداك تطوّرها.... اهم شي نخلق العادة بتاعت المشى لمدة نص ساعة في اليوم...
نزّل البرنامج ده، اسمه Nexercise... حأخت اللنك بتاعه للأيفون والجالاكسي واخوانه.... البرنامج ده ممتاز جداً، بشجع على الرياضة... ممكن تعمل مجموعة مع اصحاابك تتنافسوا على الرياضة... والله الرياضة دي بغر وحسادة عديل كده... البرنامج بنبهك لما واحد من اصحابك يتريض... وفيه ترتيب ونقاط...
ده اللنك من google play
https://play.google.com/store/apps/details?id=com.nexercise.client.android
وده اللنك من itunes
https://itunes.apple.com/us/app/nexercise-free-fitness-gps/id417348701?mt=8
| |
|
|
|
|
|
|
|
|
|
Re: Sudaneseonline Biggestloser reunion .. رمضان جانا.. وعاملين كيف؟ (Re: سيف اليزل برعي البدوي)
|
قلت حأتكلم عن الكسره والعصيدة والقراصة ومعاهم الخبز
اي زول عامل ريجيم اول حاول بفكر فيها انه يتخلص من الحاجات دي والقصة دي ما صاح تماما وما غلط برضه، بشكل عام لو فكرتو، اي شي لو احنا استهلكنا منه كتير ببقى كعب مع النظام الغذائي بتاعنا، حتى الألياف البنفتش عليها في الخضار، كتير منها بخلى الواحد عنده غازات (ولا مؤاخذه).. اي شي يزيد عن المطلوب ببقى كعب، السكر الدهون الكربوهيدرات بأنواعها... في نفس الوقت احنا محتاجين ليها وما بنقدر نستغنى عنها... اي نظام يقول ليك خلي الخبز، نظام فاشل لانه بعد شويه حترجع ليه... وده بنطبق على الكسرة والقراصة... انا حأتكلم عن الخبز والقراصة باعتبار اني عارفه انواع الدقيق البتستخدم فيهم، لكن ما عارفه دقيق الكسره هل هو مقشور ولا لا... فيا ريت حد يوضّح لينا..
بشكل عام اي دقيق مقشور، بمعنى انه قشرته مفصولة عنه قبل ما يُطحن، ما كويس :)... ليه، لانه الدقيق الابيض اول حاجه ما مشبع، الواحد بستهلك منّه كمية كبيرة، القشرة غير فوائدها الغذائية، بتملا البطن بسبب وجود الألياف فيها، يعني ساندوتش بي خبز اسمر بشبّع في حين نفس الحجم بي خبز أبيض بكون غير كافي.. انا في البيت قاعده اعوّد اولادي على طعم الاسمر، لانه مفيد ليهم غذائياً ولانهم محتاجين من صغار يطوروا عادات صحيحة ما يجو يتورطو وهم كبار!.. طعمه للمتعوّد على الابيض باااايخ، لكن بعد فترة بتلقو انه طاعم ولزيز... عندنا هنا اشكال كتيره من الخبز الاسمر، كلهم بنجيبهم.. الاشكال جذابة والكل بحبها ... انسو الشكل البايخ داك بتاع ناس السكري وانه العيش ده حقّهم براهم..
الكلام ده بنطبق على دقيق القراصة البنستخدمه، بنجيب دقيق نصف مقشور عشان القراصة ما تكون قوية، انا بفضّل الكسرة الفطيرة وهي شكلا زي الكسره بس بتتعمل بي دقيق القراصة.. بفضلها لانها اخف من القراصة..
نتكلم المره الجايه عن الريااااااااااضة... وشاركونا بأفكاركم
| |
|
|
|
|
|
|
|
|
|
Re: Sudaneseonline Biggestloser reunion .. رمضان جانا.. وعاملين كيف؟ (Re: احمد التجانى احمد)
|
مرحب بيك يا احمد... وكل سنة وانت طيب
لو عايز رأيي، في حاجات كده ما تغيّر فيها كتير، يعني العصيدة طعمها لو عملتها بي البر ما اعتقد تنفع، برضه لانه البر ما لايوق زي الابيض، قد ما تتماسك ليك العصيدة كويس... حتى لو اتماسكت، اعتقد لانها مزاج عندك، حقو تقلل كمية الاكل منها بدل ما تغيّر فيها... دور الزبادي في العصيدة انه يديه الحموضة بتاعت العجين المخمّر، انا اعتقد انه طعم العصيدة بي زبادي قليل الدسم ممكن يطلع الذ واقرب للعصيدة العادية بتاعت العجين لانه في حموضة اكتر من الزبادي الكامل الدسم.. جربها قبل رمضان عشان ما تفطر بي شي جديد انت ما عارف طعمه كيف...
بالنسبة لتقليل الكمية، اعتقد انه احسن شي انك تعمل العصيدة نفسها صغيرة، اصغر شي ممكن تعمله فيها، وقبل ما تاكلها تشرب شوربه تكون صحّية (حأكتب عن الشوربة وكم وصفة معتمداهم لرمضان)، الشوربة في اي وقت حتى في غير رمضان من الحاجات البتملا البطن وتخليك تقلل كمية الاكل بشكل عام، لكن اهم شي ننتبه انه ما تكون فيها دهون كتيرة... بس كمان تكون لزيزه
ألف شكر على التفاعل مع البوست...
| |
|
|
|
|
|
|
|
|
|
Re: Sudaneseonline Biggestloser reunion .. رمضان جانا.. وعاملين كيف؟ (Re: يحي قباني)
|
سلام مريوم والضيوف،
رمضان اكتر شهر بزيد الوزن، أولا خلاف الأكل العصاير والسكرياااات والحلويات ودي أكبر مشكلة لنقص الوزن في هذا الشهر.
فكرة ممتازة يا مريم فتح الموضوع دا قبل رمضان لوضع برنامج غذاىي لكي تكون علي الأقل الخسائر ما كبيرة
طبعا من اهم نجاح برنامج نقص الوزن تناول كمية قليلة من الطعام خمسة مرات في اليوم بدل عن وجبتين مشبعتين كما تعودنا علي ذلك
تعالوا نبدأ من اول يوم في رمضان وزن انفسنا وتسجيل الوزن . بعد عشرة أيام او العشرة الأوائل من رمضان نعيد الوزن لمعرفة نتيجة برنامجك الغذائي .
أكيد متابعين ومشاركين .
فكرة الوزن كل عشرة أيام دا كيف يا مريم ؟ عشان لو في أي زيادة نحسبه من بدري أو لو في نجاح في خطة العشرة أيام نشارك في البرنامج الناجح ونتبعوا للفائدة العامة
تسلموا.
| |
|
|
|
|
|
|
|
|
|
Re: Sudaneseonline Biggestloser reunion .. رمضان جانا.. وعاملين كيف؟ (Re: Nagat Sid Ahmed Elshiekh)
|
العم يحي قباني، والله ما شفته الفيديو ده إلا حسي... كنت مشغوله مع الوفاة، والحمدلله على امر الله
نجاة ازيك... شكرا حبيبة على الفكرة الحلوه، فعلا انا موافقة ومعاك، وحأمشي حسي اوزن نفسي عشان نتابع ونشوف النتائج ... انا استراتيجتي بتعتمد على انه في الفطور الشوربة مهمة جدا جدا جدا، عشان كده كل يوم حأكتب وصفة الشوربة الحنعملها في فطورنا.. بعد الفطور بي ساعة حأمشي لي ساعة في الtreadmill ... بعداك ممكن آكل لي حاجه خفيفة... اعتقد المشكلة الاكبر انه الناس عشان وقت الفطر قليل ما بياكلوا خضار وفواكه بصورة كافية... حأحاول اركّز على السلطة لكن ما عارفه في الفطور ولا العشاء... انا ما بتسحّر في الغالب لكن بشرب شاي مع حاجه... حأقلل كمية الشاي البشربها عشان ما اكل معاه كتير..
شوربتنا الليلة شوربة عدس
| |
|
|
|
|
|
|
|
|
|
Re: Sudaneseonline Biggestloser reunion .. رمضان جانا.. وعاملين كيف؟ (Re: مريم بنت الحسين)
|
شوربة العدس ميزتها الاساسية انها بروتين نباتي، وفي الغالب البروتين بملى البطن وبخلي الزول شبعان لفترة طويلة، والبروتين النباتي ميزته انه ما مدهن زي البناكله من اللحمه او الدجاج... شوربة العدس بتتعمل بطرق كتيرة جداً، ووالدي (الموجود وهو ووالدتي معانا الايام دي) بحبها جداً... عشان كده شكلي حأعملها اكتر من مره وبأكتر من شكل
الطريقة الاولى-العادية
حبة واحده بصل، وحبة بطاطس، وحبة جزر، وكوب عدس اصفر او احمر (الفرق انه الاصفر بنضج سريع ونكهته ما قوية، الاحمر حبّته سميكه بحتاج لوقت اكتر عشان ينضج ونكهته قوية)، نقلب العدس في البداية في شوية زيت وبعداك نقلب معاهم الخضار كلها، نضيف عليها موية لما نغمرهم او شوربة دجاج، نخليهم مع بعض ينضجوا (بي حلة البريستو اسرع)، بعد ينضجوا ممكن نخليهم صاحيين او نخلطهم عشان تبقى ناعمه... البهارات اهم بهار هو الكزبرة والشمار الناشف (حق الفول)، ممكن نجدع قرون شطة خضراء للنكهة... انا عادة بقدّمها مع رشّة بتاعت بصله محمرّة بي فوق (عندي بصلة محمرة وناشفه) او مكعبات خبز محمصّة... وشرايح ليمون
الصورة بعدين...
| |
|
|
|
|
|
|
|
|
|
Re: Sudaneseonline Biggestloser reunion .. رمضان جانا.. وعاملين كيف؟ (Re: محمد عبد الماجد الصايم)
|
ود الصايم، قطعة او قطعتين بالكتير... انا من انصار انه الزول ما يحرم نفسه تماماً... واهم شي الرياضة، ما قلت لي اخبارها شنو...
السمبوسة ممكن تجيبو النوع المعمولة بالزيت زي دي كده
وتتحمر في الفرن، بدل ما تتحمر في الزيت، بتطلع اخف والز بكتير والله... خلي المدام تجربها ليكم
انا بديت امس الرياضة زي ما قلت، حوالي الساعة 11 بالليل، فتحت لي مسلسل وقعدت امشي في الtreadmill لحدي ما انتهى... الليلة برضه حأعمل نفس الشي... بالنسبة للفطور بحس اني بكون مرتاحه اكتر لو اكلت قليل في الفطور، ممكن بعداك لو جعته اكل، لكن في الفطور بشرب كوب كبير موية وتلاته تمرات، بعداك بلقط على خفيف خالص.... بعد الفطور بي ساعتين كده بشرب تاني كبايتين موية وباكل لي تفاحة او اي قطعة فاكهة... بعد الرياضة بتعشى وبشرب لي شاي... قبل انوم بشويه تاني بشرب لي كبايتين مويه، كده بكون شربته كمية المويه بتاعت اليوم كله...
بجي بصورة الشوربة بعد شوية
| |
|
|
|
|
|
|
|
|
|
Re: Sudaneseonline Biggestloser reunion .. رمضان جانا.. وعاملين كيف؟ (Re: مريم بنت الحسين)
|
اذيكم يا شباب ? الحال و الاحوال?......
شفتى البقت على يا مريم?...... زمان كنت شايلة حس ود الصيام -عشان قل ما عنده زمن يتريض. هسي -و الله- ما لاقية وقت اتريض. يا اخى لى شهر ما قعدتا فى تلفزيون !!!! دى اصلها ما حصلت لى قبل كده.
الصباح بنصحى نتجارى لحدى ما الاولاد يلبسوا للمدارس و يفطروا و انا البس و يمرقوا. لما نرجع لحدى ما ياكلوا و يعملوا الواجبات و ياخدوا حمامات و نقرا كتب قبل النوم...و هسي بقى فيها تجهيز فطور رمضان فى نص الجوطة دى. لحدى ما ينوموا و الم المطبخ واجهز ليوم بكرة, الساعة 11 و نص بتكون جات. بكون عاوزة اخد حمام و اصلى العشاء و اتخمد. لو كمان قلتا اتفلهم و افك لى كرتونة (ايوه, رحلنا من شهر ولسه عندنا كراتين ما فتحناها) اها لو قررتا انظم شيء بنوم 1 صباحا. وتانى يوم شكلى ذي العيانة. اى زول يلاقينى: "مالك ???عيانة??"
البيت يا مريوم مفروض اشترى ليه عفش..لكن والله ما عندى زمن.. اولادى بيتجاروا فيه و يكوركوا :echo.....echo....echo ...
بعد كده الا اشترى عفش من امازون :(
__________________________________________________________
عجبتنى فكرة البصلة المحمرة فوق الشوربة.
وعندى ليك اقتراح ...بدل البطاطسة ختى فلفلية خضراء و كوسة. الفلفلية الخضراء بتدى نكهة جميلة جدا فى شوربة العدس. و الكوسة بتضيف قيمة غذائية. البطاطس فيه نشويات كتيرة.
و كمان لو عندك بدرة كارى و بس كبيتى ربع ملعقة صغيرة...مبالغة.
| |
|
|
|
|
|
|
|
|
|
Re: Sudaneseonline Biggestloser reunion .. رمضان جانا.. وعاملين كيف؟ (Re: smart_ana2001)
|
سلام يا ست البوست وضيوفها ورمضان كريم
إها بسم الله ابتدينا اول يوم صيام بي زيادة كيلو كامل
أي و الله كيلو كامل زيادة مع انه ما أكلت كتير
شوية قراصة بي ملاح ويكة في الفطور
شوية كنافة بالكريمة بعد كم ساعة كدي
و العشا صحن فول بي زيت سمسم
لكن و حاتكم بي عيش اسمر مسيخ مساخة
و بعد دة الوزن زاد كيلو
النسوي شنو يا ناس
بالشكل دة إلا افتش لي ترزي بعد رمضان
| |
|
|
|
|
|
|
|
|
|
Re: Sudaneseonline Biggestloser reunion .. رمضان جانا.. وعاملين كيف؟ (Re: عثمان مكي)
|
سمارت ازيك ومشتاقين انقري ما كتبته اسمك الحقيقي بعداك مسحته، غايته يوم بعمل ليك مصيبة في البلد دي... دي شوربتنا بتاعت اول امس
عجبتني شديد فكرة الكوسه والكاري، واعتقد بتبقى طعمها مختلف وجديد حأعملها بعد بكره، الليلة وبكره معزومين فطور، امس عملته الشوربة بتاعتك الGreek... بس بدل الرز عملته مكرونه صغيروووووونه البعملوها في الItalian wedding soup.. طلعت لزيزه شديد... الرياضة والله صعب الواحد يلقى ليها زمن، لكن اعتقد انه ممكن الزول يحشرها... حاولي راجعي يومك شوفي لو لقيتي نص ساعة بس كفاية... ما عندكم gym في الشركة؟ وقت الغداء امشي شويه... ops نسيت الصيام... معناها إلا بعد الفطور... مدي حاولي دبّريها، بتديك طاقة وبتخليك تنجزي باقي حاجاتك بمعنويات عالية.. انا بتمشّى بعد انوّم الاولاد والبيت كله، الايام دي ماسكه في مسلسل لزيز كده، اسمه Drop Dead Diva... عن legal firm وفيه شوية كوميدي كده... نكهته بتشبه Alley Mcbeal لو بتعرفيه، كنت بحبه جداً زمان ومن اول المسلسلات الlegal الاحضرها... لقيت في منّه خمسة اجزاء... قاعده اتفرّجه من اللابتوب واثناء ما بحضر بكون بمشي.. مدّة الحلقة تقريباً 45 دقيقة، اول ما تنتهي بوقف مشي وباخد shower وبتسحر وبقعد شويه وانوم.. طبعا انا مأجزه... معظم شغلي في البيت والقراية بكون بالنهارية... حاولي شوفي يومك، يمكن تقدري...
ود الصايم ما وريتنا الرياضة البتعملها شنو؟
اخونا عثمان مكي.. مرحب بيك واهلا وسهلا... اعتقد انا فهمته الحصل شنو، ما ممكن الزول يزيد كيلو كامل من يوم واحد، انت وزنته نفسك غالباً بعد الفطور... وكده ما ينفع.. الوزن بكون الصباح اول ما تصحى من النوم وتدخل الحمام لا مؤاخذة... لانه فضلات الاكل والسوائل كلها بتعمل ليها براها كيلو ومرات كيلو ونص.. عوّد نفسك تقيس نفسك الصباح... وخلي مرات الوزن متباعده زي ما قالت نجاة... يعني كل عشرة ايام.. انا بوزن مرّه في الشهر لاني اكتشفته انه الرقم ما مهم كتير... احسن مؤشر لموضوع الوزن والزيادة هو زي ما قلت انت، الملابس... لانه الغازات ساي (ولا مؤاخذة تاني) ممكن تلخبط ليك الرقم، ما لم تكون بتقيس بنوع معيّن من الموازين البديك النتيجة الدقيقة... في انواع من طرق الوزن، النوع العادي الفي السوبرماركت ده بديك وزن مرات مذبذب وما حقيقي وبتأثر شديد حتى لو انت لابس ملابس تقيلة شويه... وفي نوع تاني بقيس بالضبط نسبة الدهون في الجسم وبعتمد على تمرير تيار كهربائي خفيف بقيس بالضبط وزنك، وده إلى حد ما أدق... طبعا دي الطرق المنزلية للوزن في طرق تانية في العيادات والمراكز المتخصصة...
نجي لي حتت ما اكلنا كتير... الحاجات الاكلتها دي كلها ما عندي مشكلة معاها بس حاول عدّل الكمية، يعني ما تكون كتيرة... لكن اتمنى انك تكون اكلته ليك خضروات او فواكه طازه... يعني قبل الكنافة او بعدها كده.. العيش الاسمر ممتاز.. وطبعا مهم جدا انك تشرب موية كتيرة خلال الفترة بين الفطور والسحور.. لانه العيش الاسمر مليان فايبر، وبعطّش زيادة... شي تاني، حاول ابتسم وانت بتاكل في العيش الاسمر، لانه لا مفر  .. انا جادة، السلبية تجاه الحاجات الصحّية البناكلها والتعامل معاها على انها شيء مؤقت اكبر مشكلة.. يعني الواحد يحاول يتصالح معاها باعتبارها جزء اصيل من حياته وانه الاستثناء هو الحاجات المضرّة... خليك ايجابي..
امس في قناة العربية سمعته تقرير عن اسلوب مقترح للاكل في رمضان بحيث انه البطن ما تتعب، وعجبني التقسيم جداً... ده التقرير
Quote: نظام الصوم الصحي يشمل 4 وجبات مقسمة بين الإفطار والسحور
الوجبة الرئيسية يجب أن يكون نصفها خضراوات وربعها بروتينات والباقي نشويات
دبي - آسيا صفي الدين
من أجل اتباع نظام غذائي صحي خلال شهر رمضان يتوجب تقسيم الطعام في الفترة ما بين الإفطار والسحور إلى أربع وجبات. كما يُفضّل الإفطار على بضع تمرات وموازنة وجبة السحور.
ويبلغ معدل ما يصومه الناس في شهر رمضان 14 ساعة في اليوم، عدا عن درجة الحرارة المرتفعة التي تتجاوز أحياناً 40 درجة مئوية، من هنا جاء تشديد خبراء التغذية على ضرورة اختيار وجبة صحية للفطور والسحور ونصحوا بتقسيم الوجبات إلى 4 مراحل خلال الفترة ما بين الإفطار والسحور.
ويجب بدأ الإفطار بالماء والتمر وبعد ذلك ينصح الخبراء بتناول صحن من الشوربة لتهيئة المعدة للطعام، ثم الانتظار نصف ساعة قبل البدء بالوجبة الرئيسية التي يجب أن يكون نصف الطبق فيها خضراوات وربعه بروتينات والباقي نشويات، ويفضل عدم تناول الأطعمة المقلية وتلك الغنية بالدهون واستبدالها بتلك المشوية والمسلوقة.
ويجب أن تتكون الوجبة الثالثة في يوم الصيام من الفواكه أو قطعة صغيرة من الحلويات قليلة الدسم، أما وجبة السحور فهي الأهم لقدرتها على إعانة الصائم على تحمل فترة صيام طويلة، ويفضل تناول الكثير من السوائل بالإضافة الى البروتينات الممثلة في البيض والأ######## والألبان والنشويات المعقدة.
ولتجنب العطش خلال نهار رمضان ينصح بالابتعاد عن التوابل والمأكولات الغنية بالأملاح والكافيين التي تحفّز الجوع والعطش. |
| |
|
|
|
|
|
|
|
|
|
Re: Sudaneseonline Biggestloser reunion .. رمضان جانا.. وعاملين كيف؟ (Re: مريم بنت الحسين)
|
كتر خيرك يا مريم على المعلومات القيمة و عشان اديك خلفية عن معاناتي انا بطلت السجائر السنة الفاتت قام الوزن زاد ليهو بتاع 8 كيلو كدة
من اول السنة بقيت ماشي على رجيم نزلنى 10 كيلو و فضلت مستمر عليهو لحدي ما جة الشهر الفضيل و اللخبطة بدت
انا بقيس وزني كل يوم الصباح بعد الحمام و و بقيت مهووس بالميزان لو في أي زيادة بقلل الأكل و بزيد مدة المشي أو الرياضة . كل شئ ولا الواحد يرجع تاني للسمنة و المعاناة في ربط رباط الجزمة لا مؤاخذة.
المهم حاخد بي نصيحتك و أجرب أشوف حي يحصل شنو
انتي شكلك بتحبي court room drama زيي، حاولي تشوفي suits أجمل من drop dead diva مع انه التانية جميلة جداً
ولو ما شفتي Boston legal نص عمرك ضايع
| |
|
|
|
|
|
|
|
|
|
Re: Sudaneseonline Biggestloser reunion .. رمضان جانا.. وعاملين كيف؟ (Re: عثمان مكي)
|
سلام يا مريم وان شاء الله البركة فيكم
أنا كنت واحد من مدمني البوست السابق اذا صح التعبير ويمكن أكون قريته كله من طق طق للسلام عليكم أكتر من مرة
عن نفسي البوست كان دافع لي انه انقص في الفترة ما بين شهر أغسطس 2012 لغاية يناير 2013 عشرين كيلوجرام أيوا* عشرين كيلو ما رطل ولا وقية
للأسف مع مشغوليات الدنيا هسه رجعت حوالي خمسة أو ستة كيلو لكن بقبل عليهم وبنقصهم تاني ان شاء الله
من خلال تجربتي بقول انه أكبر عدوين هم السكر والرغيف ونحن السودانيين بنريدهم الاتنين زي عيونا
أنا الحمد لله حملة مقاطعتي للسكر لغاية هسه ناجحة مما بديت البرنامج السنة الفاتتت لكن الرغيف كل مرة بجي يديني على وشي!
انا عندي خمسة كيلو عايز اتخلص منها والديد لاين بتاعي العيد او بالكتير اسبوعين بعد العيد معشان كدا معاكم معاكم ومرحب بكل الاقتراحات
--------
* حقوق الملكية محفوظة لسمارت
| |
|
|
|
|
|
|
|
|
|
Re: Sudaneseonline Biggestloser reunion .. رمضان جانا.. وعاملين كيف؟ (Re: أحمد محمد موسى)
|
أخونا عثمان مكّي
طبعا راسي شطب ما عارفه روحي متذكرة Boston Legal ولا لأ... لحدي ما مشيت فتشته الصورة بتاعته وعرفته...
من اميز المسلسلات ... الي شفتها... شخصية الbad boys فيها لزيزة... بتكيف للجوز ديل جداً انا...
أحمد محمد موسى.... انا بحب جداً قصص النجاح... ياخ رفعته لي معنوياتي بشكل... البوست داك كان مُلهم لناس كتيرين، منهم ناس كتبوا لي قصص نجاحهم وفرحته ليهم شديد... وقصتك دي خلتني اتحمّس زيادة... انا مستمرة في الرياضة بانتظام، يومي قبل السحور بمشي لي ساعة في الtreadmill .. لي يومين جايطه في الاكل، لكن الرياضة ما قاعده الخبطها خالص
| |
|
|
|
|
|
|
|
|
|
Re: Sudaneseonline Biggestloser reunion .. رمضان جانا.. وعاملين كيف؟ (Re: مريم بنت الحسين)
|
وين يا شباب?
الرياضة بقت اجبارية يا مريم...دى النوع البيضعف لكن ما بيرفع المعنويات. البيت الجديد فيه سلالم. بعد ما ياكلو الجماعة تحت و الم المطبخ و نطلع فوق. واحد يقول ليك نسيت مويتى, انزل اجيب الموية, يقوم يقول ليك انا اصلا عاوز عصير. ارجع اجيب العصير...تنزل معاى الخانوم الصغيرة (عارفاها انتى) لما نجى طالعين تقول ما قادرة لازم اشيلها. اشيلها ونطلع... تقعد تبكى. فى شنو? نست بطانيتها المفضلة تحت. ارجع اجيبها تقول عاوز تنزل معاى تانى. اديها هرشة تقعد تبكى...تانى. مالك? عاوزة لبن. حالة صعبة. بس نقول شنو الحمد لله. من بداية رمضان نزلتا 3 رطل.
بوستن ليقال من اجمل السلسلات بتاعة المحاكم اللى انا حضرتها. very nice show
| |
|
|
|
|
|
|
|
|
|
Re: Sudaneseonline Biggestloser reunion .. رمضان جانا.. وعاملين كيف؟ (Re: smart_ana2001)
|
سمارت ازيك يا فرده... مشتاقييييين
والله ربنا يعينك على الاولاد والسلّم... لكن فعلا زي ما قلت رياضة اجبارية وممتازة كمان... بتذكر مروان اخوي كان لما يحس انه تقّل في الاكل بطلع السلم بتاع البيت كم مره وبنزل بي سرعة كده... يعني بطلع ليه زي تلاته طوابق كده وبنزل .. لكن حبيبية خالتو الصغيرونة عفيت منها، مأدباك ادبة شديدة...
ألف مبروك ال3 رطل... وعقبال المزيد....
انا امس والليلة عملته رياضة... اكلي مناسب... اكتر شي بجوط في السحور... لكن اعتقد انه مع الرياضة والمحافظة باقي اليوم، ما اعتقد في مشكلة... بكرة 10 رمضان، حأقيس وزني واشوف الوضع كيف وبجي اوريكم
الموية يا شباب، الموية مهمة جدا جدا جدا... ما تهملوها... اشربو قدر ما تقدروا، في رمضان ده احنا بنهمل الموية وبنركز على الاكل والعصاير.. واحنا صايمين محتاجين للموية عشان تعمل cleansing للجسم بعد فترة الصيام... الصيام بطرح السموم، والموية بتغسله ...
نشوف بكره الوضع كيف
| |
|
|
|
|
|
|
|
|
|
Re: Sudaneseonline Biggestloser reunion .. رمضان جانا.. وعاملين كيف؟ (Re: مريم بنت الحسين)
|
Quote: الموية يا شباب، الموية مهمة جدا جدا جدا... ما تهملوها... اشربو قدر ما تقدروا، في رمضان ده احنا بنهمل الموية وبنركز على الاكل والعصاير.. واحنا صايمين محتاجين للموية عشان تعمل cleansing للجسم بعد فترة الصيام... الصيام بطرح السموم، والموية بتغسله ...
|
الموية مهمة لكن بعد الفطور مباشرة الزول لو شرب موية ولا عصاير
المسألة بتجوط معاه جوطة بطالة خلاس
وبعدين تاني يشرب ما يروى كلو كلو
أفضل شراب الموية كباية شاي عادية بعد الفطور مباشرة،
وبعد ساعة أو ساعتين من الفطور آخد راحتي في الموية أو في العصاير
أنا شخصياً قاعد أركز على العصاير أكتر من الموية
ولولا كلامك دا ما كنت انتبه لمسألة السموم دي
عصير الليمون دحين ما بغسل السموم برضو ؟؟؟
تحياتي
| |
|
|
|
|
|
|
|
|
|
Re: Sudaneseonline Biggestloser reunion .. رمضان جانا.. وعاملين كيف؟ (Re: بدرالدين بابكر مصطفى)
|
مرحب بدر الدين... انا بفرح بالوجوه الجديدة... :)
الليمون اثرها موضعي، يعني فكرته انه ينظّف البطن لانه حامض (نفس فكرة خل التفّاح)، بشتغلوا على البطن .. اتخيل انه يكون في دهون في صحن، لو كبيت ليها حاجه حامضة بتحللها وتذوب.. وبعداك بتمشي مع الفضلات بره الجسم... الليمون بساعد في الغازات الموجوده في البطن...
انا المويه بشرب كبايتين مع التمر... وبعداك بقعد احوم والف وادور مع الاولاد لحدي ما ياكلو.. بعداك اقوم آكل... ما باكل كتير لكن بكون مرتاحه...لحدي وقت السحور بكون شربت ستة كبابي...
| |
|
|
|
|
|
|
|
|
|
Re: Sudaneseonline Biggestloser reunion .. رمضان جانا.. وعاملين كيف؟ (Re: بدرالدين بابكر مصطفى)
|
| Quote: اعتقد إن هذه فوضى (خلاقة) زي ما بقولوا |
موش عليك الله.. دي موش زي اكل المحشي بالعيش يا قول سمارت... ! بعدين صينية فيها كسره (كاربوهيدرات) ومحشي فيه رز (كاربوهيدرات) وسلطة اسود بي عيش (كاربوهيدرات)... وبعد ده يقول ليك بعمل ريجيم وما نافع...
بشكل عام انا ضد الزول يحرم نفسه، بس المهم انه يتخذ قرارات صحيّة واعية وهو بياكل... اكل الفواكة وشراب الموية بعد الاكل متعب للمعدة... انا لي سنتين ما بشرب مويه بعد الاكل، بشربها قبله... والمسألة تعوديه بس... الفاكهة برضه تكون وجبة براها خفيفة بدل ما تكون تحلية... الحلويات برضها لو الزول عايز يحلّي ما ياكلها بعد الاكل مباشرة... يتنظر ليه ساعتين على الاقل خلي المعدة تفضّي وبعداك ممكن الواحد يحلّي... اصلا التحلية على معدة مليانه مزعج شديد! والواحد ما بستمتع بيها
الخبز الاسمر يا اخوانا ما لي ناس السكرّي... الخبز الاسمر ده فوايده كتيره جداً.. وما بالضرورة يكون الشيييييين داك...
| |
|
|
|
|
|
|
| |
مريم بنت الحسين
smart_ana2001
أيمن محمود
Nagat Sid Ahmed Elshiekh
محمد عبد الماجد الصايم
احمد التجانى احمد
بدرالدين بابكر مصطفى
سيف اليزل برعي البدوي
يحي قباني
عثمان مكي
أحمد محمد موسى
فيس بوك
تويتر
انستقرام
يوتيوب
بنتيريست