|
والله الا يكون في أصبعك
|
عبدالماجد ضبطه اخوهوالأكبر مكردم (سفة التمباك في خشمه) ابراهيم: تعال هنا يا عبدالماجد, إنت بِتْسِف تمباك؟! عبدالماجد: أنا؟ أبداً , تمباك شنو كمان؟ يازول الـ في خشمك ده شنو؟ أنا خشمي مافيهو حاجة!! ياولد الـ في خشمك ده ماتمباك؟ ابداً انا اصلاَ ماسفيت تمباك في حياتي!! إبراهيم يضع سبابته في خشم عبدالماجد ويخرِت بها التمباك منه. يازول ده شنو؟ ده ما تمباك؟ عبدالماجد: والله إلاَّ يكون في أصبعك.!!
|
|
|
|
|
|
|
|
Re: والله الا يكون في أصبعك (Re: محمد البشرى الخضر)
|
كيفك ياهندسة.. ياخ دي مسألة تحير الثعلب ذاتو. أنا كان عارف بوست زي ده بجيبك لينا كان كتبناه من زمنا البنكتب في الجرايد الحائطية القصة دي قديمة من زمنا الـ في الإبتدائي اتذكرتها بعد شفت النكريبة الـ في البورد ده
| |
|
|
|
|
|
|
Re: والله الا يكون في أصبعك (Re: عبدالعزيز الفاضلابى)
|
والله يا الفضلابي فقعتني من الضحك .. ها زول تصدق مافي زول عايز يطلع نفسو غلط .. انا في حياتي قابلتا ناس يغالطوك في اسمك ويقنعوك كمان .. بس جماعتنا الهنا ديل حيروني والله .. تجيب ليهو الكلام بي ديليلهو يكبر ليك اللفة ويقعد ويخرخر لمن انت تفهم حاجة ..
مشتاقين والله وكدى ..
| |
|
|
|
|
|
|
Re: والله الا يكون في أصبعك (Re: عبدالعزيز الفاضلابى)
|
Quote: ها زول تصدق مافي زول عايز يطلع نفسو غلط .. انا في حياتي قابلتا ناس يغالطوك في اسمك ويقنعوك كمان .. بس جماعتنا الهنا ديل حيروني والله .. تجيب ليهو الكلام بي ديليلهو يكبر ليك اللفة ويقعد ويخرخر لمن انت تفهم حاجة .. |
مرحبا هشام ـ ومع النكريبة بس راجيين زول يغلط ـ عشان يبيحوا لنفسهم الغلط.
الناس في البورد ده زي الراجل الصايم رمضان مرتو ختت الأكل للشفع هو قعد يقول للشفع: إنت يا احمد شيل العضم ده عادل ده ماتظلموهو اللِّحيمات خلوها لي أختكن .. مرتو قالت ليهو آآجي ياراجل !! ماتخلي الولاد ياكلوا اكلن. قال لها: آآهاآآ إنتي دخِّلتي قِدِدِيمك ده ـ ـ والله كمان الا افطر. وتوووش في نص الشُفَّع.
| |
|
|
|
|
|
|
Re: والله الا يكون في أصبعك (Re: عبدالعزيز الفاضلابى)
|
مساطيل كبس عليهم البوليس في الغرفة ... جدعو السجارة بالشباك البوليس قال ليهم قاعدين تسطلو مش كده !!!!! ابداً ياجنابو حتى عاين سجارة في يدنا مافي !!! طيب الدخاخين دي شنو ؟؟؟؟؟؟؟؟ والله ياجنابو نحن ذاتنا ما عارفين !!! نحن اجرناها كده !!!.
| |
|
|
|
|
|
|
Re: والله الا يكون في أصبعك (Re: عماد الشبلي)
|
Quote: مساطيل كبس عليهم البوليس |
هلا بالصفوة جنابو عمر والله بوستاً جاب جنابو ده ـ مبروك بلحيل. صاحبك وزميلك (جنابو) عبدالكافي . طبعاً هو معانا هنا في نيويورك. اخوهو كان بتكلم معاهو بالتلفون من السودان. اخوهو قال ليهو : ربنا يرد غربتكن ياعبدالكافي. عبدالكافي قال ليهو: لا يا خوي انتو الربنا يرد غربتكن وتجونا هنا في امريكا.
*******************************************************
اها ياجنابو عمر راجين رايك في نكريبة المنبر دي.
| |
|
|
|
|
|
|
Re: والله الا يكون في أصبعك (Re: عبدالعزيز الفاضلابى)
|
والله يا ود الفاضلابي زي ما قلت الجدل السوداني بقى زي الجدل البيزنطي.. لكن في مواضيع هنا بدور فيها جدل تخليك تؤمن ان ناس الجدل البيزنطي شفوا جدلهم من الجدل السوداني.. لكن برضه بصراحة ما ننسى انو في مناقشات هنا في المنبر العام على مستوى رفيع من الصدق والشفافية والفهم.. وانا عندي لستة من 13 عضو في البورد بوستاتهم كلها صدق ومفهومية وعلى راس هؤلاء واصل علي.. والله يديك العافية
| |
|
|
|
|
|
|
Re: والله الا يكون في أصبعك (Re: اميرة السيد)
|
Quote: لكن في مواضيع هنا بدور فيها جدل تخليك تؤمن ان ناس الجدل البيزنطي شفوا جدلهم من الجدل السوداني.. لكن برضه بصراحة ما ننسى انو في مناقشات هنا في المنبر العام على مستوى رفيع من الصدق والشفافية والفهم.. وانا عندي لستة من 13 عضو في البورد بوستاتهم كلها صدق ومفهومية وعلى راس هؤلاء واصل علي.. والله يديك العافية |
أميرة الأميرات بت السيد. انا وكت شفت إسمك قلت اول شئ أدخل عشان أقول آمين. لإنك دايماً في آخر كلامك بتقولي للزول ـ (والله يديك العافية) ومعاك نقول آمين آمين ـ هو في أحسن من كده يا أميرة؟ نجي لي كلامك الـ في المداخلة: أنا بتفق معاك إنو في ناس بتكتب كلام زي الفل. وبتفق معاك إنو واصل واحد منهم ـ ـ. لكن: هؤلاء صاروا زي الشامة في جلد المرة الحلبية. ومن أسف فإن القبيح طغي علي الجميل .. والموجب العذب غرق في مياه السالب الآسنة. وكل واحد يدعي ان المعرفة نزلت عليه وحده. والله يديك العافيك يابت السيد ـ البت الجدعة.
| |
|
|
|
|
|
|
Re: والله الا يكون في أصبعك (Re: عبدالعزيز الفاضلابى)
|
ههههههههههههههههه الولد ابوه لقى سافي وبرضو زرا الولد دنقر علي الواطا وشال لي كتحة تراب وقال لي ابو : يا يابا كان انا بسف الترابا دي في خشمي ودعك التراب في خشمو وخلطو مع التمباك وبصقو
لكن ود لبشرى دا اكبر نكار
| |
|
|
|
|
|
|
Re: والله الا يكون في أصبعك (Re: خالد علي محجوب المنسي)
|
ماقيل في الجدل البيزنطي: هو انهم كانوا يتجادلون حول جنس الملائكة إلي أن دهمهم العدو قبل أن يعدو للقتال عدته. في السودان يقال: الناس في شنو والحسانية في شنو؟ ويقال: أنهم كانوا مشغولين بسباق للحمير حتي دهمهم العدو ـ والله تعالي اعلم.
| |
|
|
|
|
|
|
Re: والله الا يكون في أصبعك (Re: عبدالعزيز الفاضلابى)
|
رغم أن هناك فرقاً بين المراء والجدال إلا ان كلاهما يملأ هذا المنبر. فالمراء هو: {المراء، والمقصود به في اللغة: استخراج غضب المجادل، من قولهم: مريت الشاة، إذا استخرجت لبنها، وحقيقة المراء المنهي عنه: طعن الإنسان في كلام غيره؛ لإظهار خلله واضطرابه، لغير غرض سوى تحقير قائله وإظهار مزيته عليه. وإن كان المماري على حق ، فإنه لا يجوز له أن يسلك هذا السبيل؛ لأنه لا يقصد من ورائه إلا تحقير غيره والانتصار عليه.} (منقول) وهذا النوع كما تعلمون موجود في المنبر وبكثرة.
| |
|
|
|
|
|
|
Re: والله الا يكون في أصبعك (Re: عبدالعزيز الفاضلابى)
|
روى أبو داود عن أبي أمامة -رضي الله عنه- أن رسول الله -صلى الله عليه وسلم- قال "أنا زعيم ببيت في ربض الجنة لمن ترك المراء وإن كان محقا، وببيت في وسط الجنة لمن ترك الكذب وإن كان مازحاً، وببيت في أعلى الجنة لمن حسَّن خُلُقَه " رواه أبو داود، في كتاب: الأدب، باب:في حسن الخلق، (رقم الحديث): (4800).
| |
|
|
|
|
|
|
Re: والله الا يكون في أصبعك (Re: عثمان محمد كرار)
|
هلا وغلا عثمان كرار
Quote: واحد محكر سفتو في نص نهار رمضان اخوه قالو دا ازول ؟انت ماك صائم ؟قالو صائم والله بس احتمال اكنو ناسيها في خشمي من امس |
ضيف دقِّ الباب صاحب البيت نادهو منوالـ في الباب؟ الضيف: ده أنا. صاحب البيت: علي الطلاق ده ما إنت!!! ده ياهو حال المنبر ده.
| |
|
|
|
|
|
|
Re: والله الا يكون في أصبعك (Re: عبدالعزيز الفاضلابى)
|
الفاضلابي
يديك العافية
اهلنا زمان قالو الشينة منكورة
لكن بنقول الحكمة ضالة المؤمن انى وجدها اخذها
وحقيقة محاولة الانتصار للذات بالحق والباطل تكون من الادعياء
ولن تجدها ابدا عند اصحاب الفهم والفكرة
واحد العلماء قال اذا جادلني 100 عالم لغلبتهم
وان جادلني جاهل واحد لغلبني
| |
|
|
|
|
|
|
Re: والله الا يكون في أصبعك (Re: علي محمد الفكي)
|
الحبيب علي الفكي هلا بيك كفيت واوفيت
Quote: اهلنا زمان قالو الشينة منكورة |
حقيقة يا فكي كثير من الأمثال الشعبية السودانية فيها نظر. فمثلا لو قالوا: الشينة مردودة لكان أفضل وزي الأمثال بتاعة ود ابزهانا اراها تدعو لتثبيط الهمم وقتل الإبداع والصبر والمثابرة: مثال ذلك: كان غلبك سدها وسّع قدّها ودار ابوك كان خربت شيل لك فيها شلية في سفرتي الأخيرة {ايت لافته كبيييرة فى شارع حي تقول: سمحة المهلة - طبعا ناس الخدمة المدنية مطبقين كلام اللافتة ده علي اصولو.
| |
|
|
|
|
|
|
Re: والله الا يكون في أصبعك (Re: عبدالعزيز الفاضلابى)
|
Quote: اهلنا زمان قالو الشينة منكورة
لكن بنقول الحكمة ضالة المؤمن انى وجدها اخذها
وحقيقة محاولة الانتصار للذات بالحق والباطل تكون من الادعياء
ولن تجدها ابدا عند اصحاب الفهم والفكرة
واحد العلماء قال اذا جادلني 100 عالم لغلبتهم
وان جادلني جاهل واحد لغلبني |
يا سلاااام عليك وعلي حديثك الطيب اي نعم هي كلمة طيبة أصلها فرع في السماء وضاربة بجزورها في أعماق الأرض ثابتة والحسنة بتمعط شارب الأسد
يقال أن ملك طلب مهر بنته ( صوفة من شارب الأسد ) وفشل كل الخُطاب .. وكل من نازل الأسد هزمه لكن رجل طيب حسن الخُلق إنبرى ان يأتي بصوفة من شارب الأسد وبالحسنة فعلاً نجح كان يرمي من بعيد للأسد لحمة ويقترب كل شبر حتى صارت بينهما المعرفة حنين لعاطي ومُعطى وصار بعدها يجالس الأسد ويطعمه ورتب بيده على رأسه .. لآمن ويوم تف نتف لو صوفة من شارب الأسد وذهب بها للملك وتزوج البنت وصار المثل الحسنة بتمعط شارب الأسد
| |
|
|
|
|
|
|
Re: والله الا يكون في أصبعك (Re: عبدالعزيز الفاضلابى)
|
ود عمى سلامات الشوق مطر
ووووين انت ياخى
التمباك والسجائر ديل اكتر شى بقرفنى فى الدنيا دى وخاصة السجائر طوالى بتصيبنى قمة
انا والله مستغربة فى النسوان القاعديين مع رجال بدخنوا وبسفوا ديل
ياخى مقرف جداً نفسن بكون
| |
|
|
|
|
|
|
Re: والله الا يكون في أصبعك (Re: وضاحة)
|
Quote: التمباك والسجائر ديل اكتر شى بقرفنى فى الدنيا دى |
هلا بنت عمي الغالية باقي ليك الغلات ده ما أخير منه السجاير والتمباك؟ الرباطابي جارتو عندها تيـ س فحل راح عشان يستلفه منها. الرباطابية شامَّة جارها فقالت ليهو: ماعندي تيـ س أنا تيـ سي بعته. الرباطابي: بعتيهو متين؟ نان امس الـ بي يَنْفٌر الليل كله فوق غنمك زي المكوجي الـ صَبْحان عليهو العيد ده شنو؟
| |
|
|
|
|
|
|
Re: والله الا يكون في أصبعك (Re: عبدالعزيز الفاضلابى)
|
سلام يا حبيب
بوستكم لخص العلة، بس القوا لينا الدواء :) == تقول الطرفة أن أحدهم كان يتوهم ويرى نفسه أنه حبة ويعيش على هذا الوهم متحاشيا كل ما يمكن أن يؤذيه كحبة و خاصة الديوك.
أخذه أهله لأحد الشيوخ لمعالجته ،وبعد فترة من العلاج رأى الشيخ علامات إيجابية على سلوكه فقال له: لقد تحسنت الآن قال نعم واقتنعت أنني لست بحبه!
لكن! البقنع الديك منو؟!
===
إن هنالك بعض الناس يكذبون كما يتنفسون، و اعتقد إن المشكلة الأكبر ليس في كذبهم فقط، لكن المشكلة إنهم يصدقون أنفسهم بلا شك. و ممكن يغالطك عشان يقنعك. و إذا حدث و فشل فى إقناعك بكذبة الواضح، فأكيد أنت فاقد تربوي، أو نسبة ذكاءك منخفضة و و وكمية من الواوات. ما عارف المرض دا اسمو شنو لكن ربنا يحفظنا و إياكم.
عبدالرحيم منصور نيويورك * **
| |
|
|
|
|
|
|
Re: والله الا يكون في أصبعك (Re: Abdelrahim Mansour)
|
حبيبنا عبدالرحيم الدواء: ********* قالوا الأبلم (الأحمق) ماهو شقي. شقي الـ يقارنو. (ينقرن فيه) وقديماً قيل: الحماقة أعيت من يداويها. فأحسن دواء ـ التجاهل التجاهل التجاهل. أو كما قال مصطفي محمود.
| |
|
|
|
|
|
|
Re: والله الا يكون في أصبعك (Re: عبدالعزيز الفاضلابى)
|
Quote: ، و اعتقد إن المشكلة الأكبر ليس في كذبهم فقط، لكن المشكلة إنهم يصدقون أنفسهم بلا شك. |
تعرف يا استاذ عبدالرحيم كلامك ده ذكرني واحد كان شغال عامل في المجلس البلدي. الضابط التنفيذي رفده - زملاؤه نصحوه ان يشكيه للمحكمة الراجل راح علي المحكمة واستعان بواحد من كتبة العرائض اللي بقعدوا قدام المحكمة. العامل حكي للعرضحالجي طرف القصة بس - وزولك جبد ليهو فرخ فلسكاب وكررررررررررر قلبة وعدلة -- بعد كتب العريضة قراها للعامل -- العامل انقد بكاء -- العرضحالجي قال ليهو: بتبكي ليه؟ العامل قال ليهو: أنا ماكنت قايل نفسي مظلوم قَدُر ده.
| |
|
|
|
|
|
|
Re: والله الا يكون في أصبعك (Re: عبدالعزيز الفاضلابى)
|
يروي أنه كان رجلا يقال له أبو علقمــة " قال : إن الـذئب الذي أكــــل يوسف عليـه السلام كـــان اسمه " رجحــون" ، فقيل له : ولكن الذئب لـم يــأكل يوسف .. فقـــال : إذاً هــو اسم الــذئب الــذي لــم يأكـــل يوسف عليه السلام
في ناس في المنبر ده زي علقمة ده. بي كِده يكون عندنا أبوعلقمة وعبدالماجد سوفار.
| |
|
|
|
|
|
|
Re: والله الا يكون في أصبعك (Re: عبدالعزيز الفاضلابى)
|
كثيرا ما أعجبتني قصيدة زهير إن ابي سلمي التي يقول فيها:
وأَعْلـَمُ مَا فِي الْيَوْمِ وَالأَمْسِ قَبْلَـهُ وَلكِنَّنِـي عَنْ عِلْمِ مَا فِي غَدٍ عَـمِ
رَأَيْتُ المَنَايَا خَبْطَ عَشْوَاءَ مَنْ تُصِبْ تُمِـتْهُ وَمَنْ تُخْطِىء يُعَمَّـرْ فَيَهْـرَمِ
وَمَنْ لَمْ يُصَـانِعْ فِي أُمُـورٍ كَثِيـرَةٍ يُضَـرَّسْ بِأَنْيَـابٍ وَيُوْطَأ بِمَنْسِـمِ
وَمَنْ يَجْعَلِ المَعْروفَ مِنْ دُونِ عِرْضِهِ يَفِـرْهُ وَمَنْ لا يَتَّقِ الشَّتْـمَ يُشْتَـمِ
وَمَنْ هَابَ أَسْـبَابَ المَنَايَا يَنَلْنَـهُ وَإِنْ يَرْقَ أَسْـبَابَ السَّمَاءِ بِسُلَّـمِ
وَمَنْ يَجْعَلِ المَعْرُوفَ فِي غَيْرِ أَهْلِـهِ يَكُـنْ حَمْـدُهُ ذَماً عَلَيْهِ وَيَنْـدَمِ
وَمَنْ لَمْ يَذُدْ عَنْ حَوْضِهِ بِسِلاحِـهِ يُهَـدَّمْ وَمَنْ لا يَظْلِمْ النَّاسَ يُظْلَـمِ
وَمَنْ يَغْتَرِبْ يَحْسَبْ عَدُواً صَدِيقَـهُ وَمَنْ لَم يُكَـرِّمْ نَفْسَـهُ لَم يُكَـرَّمِ
وَمَهْمَا تَكُنْ عِنْدَ امْرِئٍ مَنْ خَلِيقَـةٍ وَإِنْ خَالَهَا تَخْفَى عَلَى النَّاسِ تُعْلَـمِ
لِسَانُ الفَتَى نِصْفٌ وَنِصْفٌ فُـؤَادُهُ فَلَمْ يَبْـقَ إَلا صُورَةُ اللَّحْمِ وَالـدَّمِ
واري انها ذات علاقة بموضوع البوست.
| |
|
|
|
|
|
|
Re: والله الا يكون في أصبعك (Re: عبدالعزيز الفاضلابى)
|
يقول الله سبحانه وتعالى في سورة الحجرات:
{ يَا أَيُّهَا النَّاسُ إِنَّا خَلَقْنَاكُم مِّن ذَكَرٍ وَأُنثَى وَجَعَلْنَاكُمْ شُعُوبًا وَقَبَائِلَ لِتَعَارَفُوا إِنَّ أَكْرَمَكُمْ عِندَ اللَّهِ أَتْقَاكُمْ إِنَّ اللَّهَ عَلِيمٌ خَبِيرٌ.}
أي لأجل التعارف لا لأجل التفاخر، (وكما يلاحظ فصدر الآية يخاطب الناس كافة.) ******************************************************************************* هو الناس ماسمعت كلام ربنا جاية تسمع قوانين بكري؟
| |
|
|
|
|
|
|
Re: والله الا يكون في أصبعك (Re: عبدالعزيز الفاضلابى)
|
اها رايك شنو في الأتنين الأتغالطو في شارع مدني الخرطوم الأول: الشارع دا طبعا بتاع الخرطوم مدني التاني : كضبا كاضب دا ياخوي شارع مدني الخرطوم احتكمو للتالت اسمع يا حبة دا شارع مدني الخرطوم ولا الخرطوم مدني؟
التالت: هو هسع الشارع وينو ذاتو؟؟؟
انا وافق الزول التالت دا غيتو
| |
|
|
|
|
|
|
Re: والله الا يكون في أصبعك (Re: عبدالعزيز الفاضلابى)
|
Quote: ماقيل في الجدل البيزنطي: هو انهم كانوا يتجادلون حول جنس الملائكة إلي أن دهمهم العدو قبل أن يعدو للقتال عدته. |
يا خى الجماعة ديل اللتاريهم 25 سنه وماقدارين يغيروا حكومة
غايتو اختلاف الرأى لا يفسد للود قضية ما اتدعك خشما إلا فى المنبر دا : : : : مع التحيات لله الزاكيات
| |
|
|
|
|
|
|
Re: والله الا يكون في أصبعك (Re: محمد حمزة الحسين)
|
Quote: غايتو اختلاف الرأى لا يفسد للود قضية ما اتدعك خشما إلا فى المنبر دا |
مرحبتين حباب ودالحسين خشمها اندعك والترابا في خشمو زي ماقلت يا محمد هنا تختلف مع زول في راي إنت: كضاب كوز عنصري جلابي كاره روحك وكل عِبَر الدنيا فيك. الكتابة في البورد شر لابد منه. تسلم علي المرور المليان
| |
|
|
|
|
|
|
Re: والله الا يكون في أصبعك (Re: عبدالعزيز الفاضلابى)
|
في كمان نوع تاني من الاعضاء نامن اكتب مداخلة في بوستاتهم بحردو البوست ويطفشوا منه عشان مايردوا عليّ بس انا ديل بعتبرهم ناس محترمين لانهم عاملين لي خاطر وبي طفشتم كأنهم إختاروا أخف الضررين. عادي ياجماعة الماديرني يجلي مداخلتي ويابوست ما دخلك فاضلابي. أحسن زول كانت تراجي تجليني وتجي بعد شوية تقول لي يافاضلابي شوف ـ (الفط ده حار كيفن) زولة علي نياتها افتقدتها كثيراً -- العندو منها خبر يقول عووك. في واحد من بوستات محمد حامد جمعة لقيتا عاملة فيدو ادت فيهو المصريين بالحتة الـ فيها الحديدة ـ كيفتني شديد.
| |
|
|
|
|
|
|
Re: والله الا يكون في أصبعك (Re: عبدالعزيز الفاضلابى)
|
وفي ناس بدورو الزول يفتِل ليهم فوق راس حبِلُنْ غير كده الغاغة تقوم ..
ـــــــــــــــــــــ ياشباب ـ كلمة الغاغة دي ذكرتني حبيبنا طارق الكوتش والله مشتاق لي مناكفاتو في الكورة ـ لعل المانع خير ياكوتش. ****************************************************** الكتابة الـ تِحت الشخيت دي بتزعل أخونا نجيلة معليش ياود سنجة للفلسفة أحكام.
| |
|
|
|
|
|
|
Re: والله الا يكون في أصبعك (Re: 7abib_alkul)
|
Quote: في الحتة بتاعت الغلاط دي صعبين شديد الزول تجي بي هنا تلقي جاك بهناك تمشي ليه هناك تلقي جاء راجع هنا |
هلا بحبيب الكل قلت لي الجماعة ديل زي صاحبك أبو علقمة بتاع رجحون ده ؟ ـ جوهو بي هنا مشي ليهن بي هناك. واحد صاحبنا قال والله يا جنس رزقي أنا. قالوا ليهو رزقك مالو؟ قال: أركب اسافر وراهو للخرطوم ـ رزقي يركب النيسان يرجع القضارف.
Quote: الشيخ قال ليهم دي الكورة بتاعت الاسبوع الفات قالوا ليه ايوه قال ليهم الطلقة دي ما واقعة لانه القوون دا زاته كان اووف صايد |
قطع شك الشيخ ده بكون ود البشري.
| |
|
|
|
|
|
|
Re: والله الا يكون في أصبعك (Re: معاوية المدير)
|
جاء شيخ في حلتنا وجاب معاهوا ولد صغير
وشغال للجماعه اين الغلام واين ذهبت يا غلام المهم صاحبك عندو العشاء ثابت فته ومعاها دجاجه محمره
صاحبنا مسخوط ربنا ياخد بي يدو ويرجع لي اهلو سالم غانم سرق دجاجه الشيخ المحمره والشيخ لمن عرف القصه دق جرس اين الدجاجه
الجماعه قالوا ليهو سرقا فلان واتعشي بيها صاحبك جاء قاصدنا من ولمن وصلنا قال يا فلان انت مطرود من رحمة الله 15 يوم
المهم صاحبنا قال لا يمشي ويغالط الشيخ كيف هو مطرود من رحمة الله وكيف هو حرامي
خاار ج النص أكتشفنا معي مرور الوقت انو الشيخ مخلص وتاجر يعني زول دنيا
تحياتي يا عبدالعزيز ليك وللضيوف الكرام
| |
|
|
|
|
|
|
Re: والله الا يكون في أصبعك (Re: تيسير عووضة)
|
الفاضلابي سلام بوست اكثر من رائع عسى ولعل الناس تستفبد منه والمؤمن مرآة اخيه هاك دى القطر اتعطل فى محطة ام على الجاعة نزلوا البحر وقالوا ياناس الزول المابعرف يعرف يعوم ماينزل اهه فى واحد قالوا له يازول بتعرف تعوم قال لهم اخوكم تمساح ماتخافوا عليه نزل ومن الحجره جب غطس مسااافه طويله ماطلع الجماعه قايلنو زولا غطاس لما المسافه طالت اكثر من اللازم واحد قالهم نلحق الزول .. وغطسوا وراهوا وطلعوهو ..قالوا له كيف ياتمساح ... قالهم لاحوله ولاقوة الا بالله العوم نسيناهو تب والجماعه قر قر قر قر قر المكابره لزوما شنو؟؟؟؟
| |
|
|
|
|
|
|
Re: والله الا يكون في أصبعك (Re: حسن مختار الخليفة)
|
Quote: التين ايدجر في وضع الاستاند باى دخل غرفة والده وهو ينتوى دخول غرفة الشغالة مخاطبا والده مغالطا :عليكم الله دى طهورة تطهرونا ليها شوف الغلاط الجد تقول لي صعوط! جنى |
جني لاتجيب لينا الهوا
| |
|
|
|
|
|
|
Re: والله الا يكون في أصبعك (Re: عبدالعزيز الفاضلابى)
|
Quote: جاء شيخ في حلتنا وجاب معاهوا ولد صغير وشغال للجماعه اين الغلام واين ذهبت يا غلام المهم صاحبك عندو العشاء ثابت فته ومعاها دجاجه محمره |
مرحبا بالشامي
واحد من ناس الشؤون الدينية (واعظ) عامل ليهم غلبه في الخرطوم نقلوه واحدة من مناطق الشِّدَة أدبة ليهو. الجماعة المشي ليهم كل يوم بعد صلاة العِشا بعد الدرس يقولوا لشافع منهن : أجري ياولد جيب عشا مولانا,, جيب عشا مولانا,, الشافع يجري يجيب ليهو قرعة مليانة لبن , مولانا يضربها ليك والجماعة ينصرفوا. نامن يوم مولانا اكتشف انو الجماعة بعد ينصرفوا بمشوا يضربوا ليك المريسة ويطمبروا لآخر الليل. يوم جابوا ليهو قرعة اللبن وهو تاريهو خلااااس الكاروشة منجضاهو. شال ليك قرعة اللبن وفنننن ـ ـ وبي زهج قال ليهم: عشا مولانا ـ عشا مولانا ـ عشا مولانا .. إنتوا الشؤون الدينية دي جايبا ليكن واعظ ولاِّ كديـ س؟
| |
|
|
|
|
|
|
Re: والله الا يكون في أصبعك (Re: عبدالعزيز الفاضلابى)
|
Quote: وكان الإنسان أكثر شيء جدلاً (آية قرآنية) |
الحبيب تيسير تحية طيبة.. كما قدمنا في صدر هذا البوست فالجدل بعضه محمود وبعضه مذموم وهذا مانريد التنبيه له في هذا البوست واوردنا مقابلة بين الجدل والمراء. ونورد طرفاً من خواطر الامام الشعراوي حول تلك الآية من سورة الكهف:
بسم الله الرحمن الرحيم {وَلَقَدْ صَرَّفْنَا فِي هَذَا الْقُرْآن لِلنَّاسِ مِنْ كُلّ مَثَل وَكَانَ الْإِنْسَان أَكْثَر شَيْء جَدَلًا}
يقول الامام رحمه الله. يقول تعالى: { وكان الإنسان أكثر شيء جدلا} [الكهف: 54] أي: كثير الخصومة والتنازع في الرأي، والجدل: هو المحاورة ومحاولة كل طرف أن يثبت صِدْق مذهبه وكلامه، والجدل إما أن يكون بالباطل لتثبيت حجة الأهواء وتراوغ لتبرر مذهبك ولو خطأً، وهذا هو الجَدل المعيب القائم على الأهواء. وإما أن يكون الجدل بالحق وهو الجدل البنّاء الذي يستهدف الوصول إلى الحقيقة، وهذا بعيد كل البعد عن التحيّز للهوى أو الأغراض. ولما تحدَّث القرآن الكريم عن الجدل قال تعالى:
{ وَلاَ تُجَادِلُوأَهْلَ لْكِتَابِ إِلاَّ بالَّتِي هِيَ أَحْسَنُ.. } [العنكبوت: 46] وقال: {وَجَادِلْهُم بِالَّتِي هِيَ أَحْسَنُ..}
(عدل بواسطة عبدالعزيز الفاضلابى on 06-05-2013, 08:07 PM) (عدل بواسطة عبدالعزيز الفاضلابى on 06-05-2013, 08:13 PM)
| |
|
|
|
|
|
|
Re: والله الا يكون في أصبعك (Re: عبدالعزيز الفاضلابى)
|
في ناس ينجروا ليك كلام من راسن وعاوزنك تصدقو لكن في ناس بِتقَطِّع ليهم الـنجريبة في روسينن. الـ نَجِر ممكن نضيفو لمواضيع البوست برضو. بلدياتنا اول مرة يمشي الخرتوم ـ زار متحف الخليفة في امدرمان. جاء يحكي للجماعة في الدكان: شوف عيني ديل رحت متحف الخليفة لقيت محل وضؤ الامام المهدي تريان (لين) لي يوم الليلة. واحد من اعمامنا قال ليهو: ليه؟ أصلو كان بتوضأ بالزيت؟
| |
|
|
|
|
|
|
Re: والله الا يكون في أصبعك (Re: عبدالعزيز الفاضلابى)
|
Quote: الجعلي سمع زول غرقان يصيح : يابومروة يابومرة. الجعلي تُلُّبُتْ وراهو ,, وبقوا الاتنين يغتسوا ويقلعوا وماقادرين يمرقوا شافوهم ناس نزلوا وراهم انقذوهم الاتنين ـ بعد عرفوا القصه سألوا الجعلي يازول إنت بتعرف تعوم؟ قال ليهم لا. طيب وكت مابتعرف تعوم نازل وراهو ليه؟ الجعلي قال ليهم: هو قال يابومروة ولاّ قال يالعوامين؟
] |
>>>>>>>>>>>>>>>>>>>>
الله يجازي محنك ود الفاضلابي يعني حتخلينا نضحك ضحكة ود الصائم اسبوع كامل... لكن بصراحة دائما بنسمع ان الجعليين هم اصحاب المروة واهل الكرم والشهامة..حتى في نكات تيراب الكوميديا والفرق الأخرى بيصوروا الجعلي بأنه فعلا صاحب المروة وانه عنده استعداد يقدم مساعدته للكل دون فرز,,,, والسؤال المنطقي هو .. هل هذه الصفات الأصيلة والنبيلة لسع موجودة في الزمن الحالي .. ولا الكلام ده كان زمان.. وكده حدد لينا مناطق الجعليين في السودان بيبدأ من ياتو قرية وتنتهي في ياتو قرية.. والله يديك العافية
| |
|
|
|
|
|
|
Re: والله الا يكون في أصبعك (Re: اميرة السيد)
|
Quote: هلا بنت عمي الغالية باقي ليك الغلات ده ما أخير منه السجاير والتمباك؟ الرباطابي جارتو عندها تيـ س فحل راح عشان يستلفه منها. الرباطابية شامَّة جارها فقالت ليهو: ماعندي تيـ س أنا تيـ سي بعته. الرباطابي: بعتيهو متين؟ نان امس الـ بي يَنْفٌر الليل كله فوق غنمك زي المكوجي الـ صَبْحان عليهو العيد ده شنو؟ |
والله لكن مبالغة يا الفاضلابي كتلتنى بالضحك
| |
|
|
|
|
|
|
Re: والله الا يكون في أصبعك (Re: عبدالعزيز الفاضلابى)
|
Quote: والله لكن مبالغة يا الفاضلابي كتلتنى بالضحك |
بت عمي الغالية ـ وضاحة. طبعاً نكتة زي دي ولاد البنادر مابفهموها ـ باستثناء ولاد إشلاقات البوليس. هاك دي كمان: شافع رباطاب أمه مَلَّحت ليهو كِسْرة بي لبن ـ ورجعت تعوس. بعد شوية الكِسْرة حَفَّت (نِشفت) الشافع كورك لي امُّو. يمه الكِسرة شِربَت اللبن أمه بي نهرة: يا ولد ما تَشْرَبو ـ مَرَقَتبو من القدح؟
| |
|
|
|
|
|
|
Re: والله الا يكون في أصبعك (Re: عبدالعزيز الفاضلابى)
|
واحد أخونا (عضو في البورد ده) ...... أيامهم الصغار، طلع مع أخوانو الكبار في راس الراكوبة. أبوهم جاء نهرهم ونزّلهم .... كل ما واحد ينزل، الأبو مستنيهو بي خيزرانة ... وصررررر ياخد نصيبو ويمشي. فضل صاحبنا (وكان أصغرهم) أبوهو يقول ليهو: أنزل يا ولد ..... وهو يجوعر: (والله يابا أنا ما معاهم).
فاضلابي إزيك.
| |
|
|
|
|
|
|
Re: والله الا يكون في أصبعك (Re: محمد أبوالعزائم أبوالريش)
|
Quote: وهو يجوعر: (والله يابا أنا ما معاهم). |
سلامات يابو العزائم يعني ده من يومو كان مشروع بوردابي ناجح .. ياخ ضحكتني نامن الخواجية الجنبي اتخلعت. ***************************** وبي جوعيرا وحليفتا ـ ده فات عبدالماجد كدي نان الراكوبة الطالع فوقها دي راكوبة الجيران. ياخ ماتورينا ليهو عشان نَنجضو ليك.
| |
|
|
|
|
|
|
Re: والله الا يكون في أصبعك (Re: عبدالعزيز الفاضلابى)
|
شوفوا كسير التلج ده كيف ناس اللغة العربية بسمّوه حسن التعليل ده شاعر ملء السمع والبصر قال وقد أصاب مصر زلزل وكان عليها كافور الأخشيدي
ما زلزلت مصر من كيد يراد بها ** لكنها رقصت لعدلكم طربا الزول ده كان بقا بوردابي كان الأنقاذ غلبت 10 صفر
| |
|
|
|
|
|
|
Re: والله الا يكون في أصبعك (Re: عبدالعزيز الفاضلابى)
|
ود الفاضلابي
والله وجدت كل ما اريد معرفته عن الجعليين وعن مناطقهم وقراهم . وطبعا اشهر قرية هي التراجمة .. وعرفنا الآن عن التراجمة الكثير الكثير,,.. والمعلومات كثيرة ومتوفرة .. اظنك انت جعلي يا ود الفاضلابي والله يديك العافية
| |
|
|
|
|
|
|
Re: والله الا يكون في أصبعك (Re: اميرة السيد)
|
Quote: اظنك انت جعلي يا ود الفاضلابي
|
من جهة الأب أما من جهة الأم فهم كواهلة - سمعتي بي حبوبتنا (شغبة)؟ سنورد لكم طرفا من حكايتها وشعرها ان شئتم - وعشان نحكيها عاوزين عشرة توقيعات في البوست ده.
| |
|
|
|
|
|
|
Re: والله الا يكون في أصبعك (Re: عبدالعزيز الفاضلابى)
|
Quote: .. وعشان نحكيها عاوزين عشرة توقيعات في البوست ده. |
............,,,,,,,,,,,,,,,,,,,,,,,,,,,,,,............
انا شاورت الموقعين ادناه وقالوا موافقين .. بس عليك تبدأ لينا بالأشعار والحكاوي.. والموقعين هم/
- وضاحة - عواطف - بسمات( قارئة خارجية - عبد الحميد( قارئ خارجي من الفيس بوك) -محمد البشرى( اول المتداخلين في البوست) -هشام كمال -المصور الشبلي -خالد علي - علي محمد -ود الصايم -ود منصور ( هسع ديل اكثر من عشرة,, وممكن كمان نزيدك لغاية عشرين ثلاثين.. لو حبيت..فوالله عندك نوادر يتمنى الكل قراءتها لأنها بتزيل عننا الكثير من هموم الغربة.. و انا متأكدة ناس ود شيقوق وحبيب الكل وجني وسيد احمد وابو الريش وحسن ومحمد ما حيكونوا معترضين لكن حيكونوا منتظرين بفارغ الصبر..
والله يديك العافية
| |
|
|
|
|
|
|
Re: والله الا يكون في أصبعك (Re: اميرة السيد)
|
مرحبا بالاميرة لِحقتي تسوي كل ده ـ غايتو الجمهوريين لو شغلوك مدير لحملتهم الانتخابية الديمقراطيين حايكونوا في الباي باي. خلاص يا أميرة (Your word as good as gold ) لحين ميسرة او كما يقول ودالمنسي.
| |
|
|
|
|
|
|
Re: والله الا يكون في أصبعك (Re: عبدالعزيز الفاضلابى)
|
إرتبطت شغبة بزوجها "ود دقلش" وشغفها حباً تبادلانه سويا لدرجة ان مدحها وفخرها كاد يقتصر علي قبيلة زوجها "المرغماب" دون سائر القبائل بما فيها قبيلتها. كانت شغبة قوية الشكيمة لاتركن لكونها أنثي خانتها الدلال والتلطف . كانت شعلة من النشاط تمارس ادواراً كان يمارسها الرجال عادة. تميَّز شعرها بالرصانة والجودة. وكانت قاسية وجارحة خاصة عند استنفار قبيلتها لأخذ الثأر وهي تدفعهم للعراك مع الأعداء , أو عندما تدفعهم للإغارة علي القبائل الأخري لنهب إبلها. شعرها الموجه لأعداء قبيلتها كالسيف البتار وهو مانسميه اليوم الحرب النفسية. وإن كان شعرها موجهاُ لقومها أشعل فيهم الحماسة والغيرة. ولعل أقسي معركة حدثت لها كانت تلك التي دارت بين قبيلة البطاحين وقبيلة المرغماب "قبيلة زوجها" وفيها هجم الشيخ برير إبن أختها "علابة" يقود فرسان البطاحين الأقوياء علي قبيلة المرغماب, وهزمهم شر هزيمة, وقُتِل فيها "ود دقلش" زوج شغبة وإبنها "نائل" أمام ناظريها. كانت المعركة حامية ثبت فيها فرسان القبيلتين, وكانت شغبة تقف إلي جانب رجال قبيلتها تبث فيهم الحماس, ولما رأت زوجها يسقط من فرسه حزَّ الألم في نفسها فقالت:
كُرْ يانوح من ده الخراب عَجَبْ عينَيْ تَاكُلْ فيهو الكـِ لابْ ود دقلش مَيَّحْ من الـرِّكَابْ أَخيرْ ده مِنْ قُولَة جَفَلُوا المُرْغُمَاب.
* كُرْ: لفظ تقوله النساء للإستنكار عند سماعهن او رؤيتهن لموقف رهيب. * يانوح: تتوسل بسيدنا نوح (عليه السلام) * عجب عيني: قرة عيني ـ تعني بها إبنها "نائل" * مَيَّح: فقد توازنه علي ظهر الفرس * من الِّركاب: من ركاب فرسه ـ والركاب يطلق علي السرج وعلي الروافع المدلاة علي جانبي السرج ويضع الفارس قدمه فيها للركوب ويثبت قدميه داخلهما وهو علي متن الفرس. * أخير ده: ذلك أحسن وأفضل. * جفلوا: هربو من العدو وتركوا المعركة.
يقال والعهدة علي الرواة أن البيت الأول من القصيدة اعلاه قالته إمرأة أخري كانت تنافس شغبة علي الزعامة ولم تقله شغبة , ويعللون ذلك بأن شغبة لا يمكن أن تقول "كُرْ" لأنها كلمة خاصة بالنساء ودليل علي الضعف والخنوع وشغبة ليس كذلك.
نواصل إن شاء الله
| |
|
|
|
|
|
|
Re: والله الا يكون في أصبعك (Re: عبدالعزيز الفاضلابى)
|
ظلت شغبة تلهب حماس ماتبقي من فرسان القبيلة شعراً وتحثهم علي الثأر من البطاحين لمقتل زوجها وفرسان قبيلتها حتي يعود الأمن ـ وحتي تتمكن من ورود ماء "عديد نوير" آمنة بناقتها "كبيرة الضيل" وحتي يعود للوادي نضاره وعماره ـ بعد أن حوله البطاحين إلي ارض يباب. أستجاب الفارس "حمد المليحابي" وهو احد فرسان المرغماب فشد رحاله الي حيث قبيلة الأمرار وموطنها منطقة "الـباك" وطلب منهم ان يساعدوه في أخذ الثأر من قبيلة البطاحين , ومكث عندهم عامين يجمع الفرسان ويعد الشبان لمعركة الثأر. تقول الرواية أن قبيلة "الأمرار" أمدته بسبعة الاف شاب إشترط فيهم أن يكونوا من شاربي التمباك لأن شارب التمباك يكون أشد ضراوة في القتال. عاد المليحابي يقود جيشاً عرمرماً مطعماً بشبان الأمرار خاض به معركة الثآر والكرامة ضد البطاحين ـ وينجلي غبار المعركة عن هزيمة ساحقة أُلْحقت بالبطاحين قتل فيها الكثيرين من فرسانهم وأُخذت إبلهم غنيمة وكان الصيد الثمين هو الشيخ برير الذي أُخذ أسيراً ليكون الهدية التي تِقَدَْم لشغبة لتبرد نار وترها في زوجها وابنها وفارس قبيلتها "ود نواي:
وفي المداخلة القادمة إن شاء الله نحكي لكم مشهد اللقاء بين شغبة والشيخ برير إبن أختها "علابة" وماذا قالت شغبة؟
| |
|
|
|
|
|
|
Re: والله الا يكون في أصبعك (Re: عبدالعزيز الفاضلابى)
|
ُكانت شغبة قد طلبت أن يؤتي بالشيخ برير حياً لتأخذ ثأرها بيدها, وقد حقق حمد المليحابي طلبها. باخلاق الشجعان لم تُنْكِر شغبة شجاعة أعداءها "العركشاب" وثباتهم للقتال ثباتاً فاق تصوُّرَها. فوصفتهم بالإقدام رغم انها صبَّت جام غضبها عليهم فقالت:
دُبْ الْعرْكشَابْ وَكْتَاً يَلوكوا المُرْ تدبـتْ للكَـتال مِـتْلَ اْلـكبـاش الغــــرْ يَـدعكـو علي الـصـف الـْ دِمِـيهـو تْـخُـرْ وْ يَـصْفَا لُوْنُو مِـتِلْ دَهَـبْ الجِمَـارْ الحُرْ
* دُبْ: إسم فعل أمر بمعني: إخْسأ ـ البعض يقولون: تُبْ * تدبت: تثبِت * الكِتال: القتال
فهي تصف العركشاب"فرع من فروع البطاحين" اعداءها فتقول إنهم يتسابقون إلي صفوف القتال مثل الكباش الغر وأعظم مارأته منهم ان وجوهم تبدو صافية كلون الذهب المجمر رغم انهم يخوضون الوغي والمعركة حامية الوطـ يس وهذه شهادة منها لأعدائها بثباتهم ورباطة جأشهم عندما رأت شغبة فرسان قبيلتها مع فرسان الأمرار يتقدمهم حمد المليحابي جادت قريحتها بهذه الأبيات التي خلدت معركة النصر إلي يومنا هذا فقالت:
حمـــد المـليحابي سَـدَرْ لـلبـــــاكْ وسنتين بِدولِب في الـ بِشْرَبُوا التُمباك كَـتَلْ الشيخ برير وحَرَقْ حَشَا الدَعَّـــاك وجَــابْ الـ في الَّصفيـه رقهن بـتـراك
* كَتَلْ: قتل * الدعَّاك: رضيع الناقة * بتراك: يلمع
تذكر شغبة كيف أن "حمد المليحابي" ذهب اليالأمرار في الباك وجيَّش الجيوش وقاتل البطاحين وأسر زعيمهم "الشيخ برير" الذي سبق ان أذاقهم علقم الهزيمة وأخذ ممتلكاتهم وكان قاسياً عليهم بأخذه نياقهم الوالدة وترك صغارها تتوجع من الجوع والحنين لامهاتها , ولكن المليحابي وفرسانه استطاعوا أن يعيدوها ومعها إبل البطاحين المغلوبين علي أمرهم . ويقول الرواة أن حمد المليحابي بعد ان سلَّم شغبة الشيخ برير حياً ربطته من خِلاف وأحضرت النقارة وأعدت لها العدة , وبدأت بالشيخ برير فقطعت يديه وحملتهما والدم يقطر منهما وبدأت تدق بهما علي النقارة في وحشية متناهية وتغني في حقد ومرارة وتخاطب برير بقولها:
جِيدْ يابرير الضُقْتَ النُّكور والهولْ وكسْرَ الهمبَروك عيش السديرة الخورْ سـوقةَ اْلخَـدَمْ الْعَقَدَنْ قِفِيهِنْ شــولْ كَتْـلَةَ البَرْمَكي مـع صبــاح الـ بولْ
* جيد: الحمد لله * الضُقتَ: ذُقت * الهمبروك: الزرع الذي لم ينضج بعد * الخدم: تعني بها هنا الإبل حديثة الولادة * العقدن: اللائي نظرن * قفيهن: رقابهن * كتلة البرمكي: تعني به الرجل الكريم والمقصود به هنا زوجها * صباح الـ بول: تقصد به الصباح الباكر وقت ان اغار عليهم البطاحين مع ساعات الصباح الاولي. للقصة بقية بإذن الله
| |
|
|
|
|
|
|
Re: والله الا يكون في أصبعك (Re: عبدالعزيز الفاضلابى)
|
تراكا يا ود الفاضلابي ما ساهل... معقولة انت داسي مننا الدرر والنفائس دي كلها .. هذا التراث المهم..
متابعين ومستمعين وقارئين كل حرف وكل كلمة .. فالمرء لا يمكن ان يمل من مثل هذا التراث .. فواصل سردك .. ولا نود ان نعلق الآن حتى لا نقطع بنات افكارك وتسلسل سردك والله يديك العافية
| |
|
|
|
|
|
|
Re: والله الا يكون في أصبعك (Re: عبدالعزيز الفاضلابى)
|
واستمرت شغببة تقطع أعضاء الشيخ الأسير حتي مات , وتٌعرَف هذه المعركة بمعركة "الدباغات" وهي حفائر ماء تقع شرق أبي دليق. وكان برير يتمتع بشجاعة نادرة لم تستطع مدية شغبة الحادة أن تؤثر فيه أو تبدي منه خضوع مما جعل شغبة تمدحه علي ثباته فتقول:
ودالعِزْ بـرير من ضَرْب النحاس مابخآف وعِنْدو الدُكْرِي الـ بياخُد تلات أخْفَـاف حَالِفْ بالطَّـلاق مَايْفوتْ بـنات عَـسَّاف إلاَّ الـرَاس يَفَـارق الجِـتَّة واللَّكْتَـاف
| |
|
|
|
|
|
|
Re: والله الا يكون في أصبعك (Re: عبدالعزيز الفاضلابى)
|
Quote: متابعين ومستمعين وقارئين كل حرف وكل كلمة |
يا أميرة أنا خايف ودالصايم وود البشري ديل يطالبوا بذهاب هذا البوست إلي خور بكري. عشان مابرضو في البرير ده.هم عارفين المَغتَّا ـ (وش يشبه وشوش ناس شندي) دي برضو عارفينها. ****************************************************************** معليش ده كسر لحاجز الرتابة ـ أصلو البوست ده زي ماقلنا قٌفة حلبية تلقوا فيهو كل العاوزينو.
| |
|
|
|
|
|
|
Re: والله الا يكون في أصبعك (Re: عبدالعزيز الفاضلابى)
|
بعد موت الشيخ برير بيد شغبة قام إبن عم برير وكان يُدعي "اللين", وهو أحد فرسان البطاحين الأشداء وجمع قبائل جهينة والسدارنة ووعدهم انه إذا عُقَدَ له لواء النصر علي المرغماب سوف يترك لهم كل الغنائم وله الثأر فقط, وقد أقسم اللين قبل المعركة بأنه سوف يأخذ نساء المرغماب سبايا. سمع أهل شغبة بعزم اللين علي غزوهم ولما كان الغزو يستهدف المال "الإبل" فكرت قبيلة شغبة تغيير مكان رعي إبلهم حتي لا ينهبها اللين وحلفه. ولكن شغبة الشجاعة المتعطشة لملاقاة اللين أشارت علي اهلها بالصمود وعدم مبارحة مضارب القبيلة. ونظمت ذلك شعراً وقالت:
جَملي في أم شديدة قَلِّدو وهدو والمال لي مَساديرو القُدُمْ وَدُّوا والطـير ياسرَاحين الوجوه غَدُّو والبِجْـفِلْ شَنَاعُـو للبنات ودُّوا
* قلدوا: قلدوا عنقه بالزينة * هدوه: أجعلوه فحلاً للنوق * المال: الإبل * مساديرو القُدُمْ: مكان رعيها القديم * سراحين الوجوه: أصحاب الوجوه الخشنة * البِجفل: الذي يهرب من المعركة
| |
|
|
|
|
|
|
Re: والله الا يكون في أصبعك (Re: عبدالعزيز الفاضلابى)
|
وكده حدد لينا مناطق الجعليين في السودان بيبدأ من ياتو قرية وتنتهي في ياتو قرية.. والله يديك العافية ======================================================================
قال الشاعر حمدان يمدح ناظر عموم الجعلين الشيخ محمد إبارهيم فرح
من البسري لي السبلوقة حدد دار أبوك يا أبــ رسوة كدّق فوقا الحالآك تسوقو بحلاوة وروقة والكازاك حفرك ليهو لي المخروقة
أختي أميرة السيد هذه هي حدود منطقة الجعلين البسري : هو نهر الاتبراوي ( نهر عطبرة ) السبلوقة هو الشلال السادس قرب حجر العسل والمِسيكتاب جنوب أبــ رسوة هو الأسد كدّق اي امسك فيها قوي وكنكش فيها وما تفك منها شبر إلا بعد خراج روحك الحالاك .. الذي كان حلو تعامل معك بتحالي وتقربو ليك الكازاك : المكازي هو المعاكس بتاع الغلاط الزي ود الصايم دا حفرك ليهو لي المخروقة والمخروقة هي عظمة الرجل مع الحوض ايس بتحفر لي وتدفنو
| |
|
|
|
|
|
|
Re: والله الا يكون في أصبعك (Re: عبدالعزيز الفاضلابى)
|
Quote: أها يا أميرة جاك سيد الجلد والراس ود المنسي أب سَرَهيتاً تشق الراس مو زي شيقا ينقرِف في العنكوليب والكلام يكوسو من دفاترو والكرَّاس |
سموك الأميــــرة والأمارة حكراً ليكي يا بت الرُجال كل الخُلوق رهن إيديكي بديكي خبرو عرريب الدندر المتباهي تحت الشدر جالس يرعى غنم أبليس ولآهي
| |
|
|
|
|
|
|
|