|
|
 الطقس ... الحكومة ...المدام
|
المناخ الصحرواي متقلب ما تقدر تتنبأ بيهو ممكن اليوم معتدل أو تاني يوم حر ثالث يوم غبار وحر رابع يوم مطر يختلف عن المناخ الاستوائي بتاعنا البرد ادخل ليك بالتدريج وكذلك باقي الفصول ...
في منطقة الخليج لازم تخلي معاك جكت في فترة الشتاء في السياره لزوم تقلب الجو كمان كمامه لو فتح ليك غبار ، لازم تتأكد المكيف شغال طول السنة لو ما شغال واطاتك اصبحت .
الصباح أنا ماشي علي الشغل الكلام ده في السودان كنا موظفين بنوك بعد ما دخلته البنك عندنا مراسله بتاع كوارث لازم كل فترة اجيب ليك مصيبة .....قال لي في جماعه عايزنك في الاستقبال.
مشيت لقيتم ناس الامن بدون اي مقدمات قالو لي جملتهم المعتادة لي أي زول ((عايزنك خمسة دقائق )) ركبت البوكس دبل قبين او مشيت معاهم.
وصلنا مكاتب الامن عزيزين مكرمين .
كانت المفاجأة لقيت واحد زميلنا جوه استغربت الراجل ده الجابو هنا شنو؟؟؟
سلمت عليهو الراجل منطط عيونو متكرفس مطوطو كرعينو عليهو قاعد في الواطه الوقت كان شتاء ، التساؤل الجاني الراجل في حالو مسكين لا عندو علاقة بي اللحمة ذادت ولا الموية قطعت مالو ماسكنو ناس الامن طبعا هو صديق عمل ودفعه اتعينا سواء في البنك من مدينتنا زول ما عندو أي علاقه بالسياسه بتاع شمارات اجتماعيه في البنك اقول ليك فلانه طلقوها فلانه بتحب فلان ونستو كلها مع البنات رغم الصداقة البينا الراجل دخلني في مشكلة قبل كده عويصة ومنها تاب مني.
اساس المشكله زميله لينا كانت بتحب ليها واحد من سماسرة السوق بسجل ليها زيارات بتاعت غرام في البنك كان عاملني السلم بعمل جاي لي أنا .
وفي ونسة صاحبي سألني انت الزول البجيك كل مرة هنا بتعرفو ؟؟؟؟
قلت ليهو ايوة بالحيل ...
قال لي الزول مشيلك القفه اصلو بحب فلانه وقالو عايز اخطبها .
بالله ياخ ...والله أنا دقوسة كيف... بعدين البت دي مجنونة تعرس صلاح كديسه الكضاب ممتلكاتو كلها بنطلون الجنز والنضارة اللابسها زول صعلوق ومطلوق غايتو شبهينا واتلاقينا العامله وشها زي يد الخلال ((في زمان خلال بسرحو بيهو الشعر يدو معموله وش زول)) شبهينا واتلاقينا .
قوم انت يا صاحبي شيل الكلام ودي لي بت والبت لي بت وكل زول ازيد ليهو كوز مويه لما وصل الخطيبه والمحبوبه كانت قصة طويله وعريضه شالتو بي صمتو ودتو لي صلاح كديسه.
وتعال يا ذرزرة وسط البنات وانت قلته كدي وانا قلته كدي بقت قصة عيييييييييييييييك طويله وخاصة لما تكون في جوقة نسوان!!!!!!!
وصلاح كديسه كان مأمل اعرس البت قبل العرس تطلع ليهو سلفية من البنك اشتغل بيها في السوق الراجل حسي ممكن احلامو تطير لو فكيت اخري وكبيت باقي المعلومات عنو.
أها المراسله بتاع الكوارث جاني عامل فيها بقدم لي خدمة... يا عباس الليلة لو طلعت ماشي البيت اعمل حسابك صلاح كديسه منتظرك بره شايل ليهو مسدس ...
غايتو كانت لحظات عصيبه!!!!!
نواصــــــــــــــــــــــــــــــل.....
|
|
 
|
|
|
|
|
|
|
|
Re: الطقس ... الحكومة ...المدام (Re: عباس الدسيس)
|
سلام يادسيس
انت كنت مندسي وين وعندك الحكاوي الطاعمة دي
لكن عجبتني ليك الفتنة انت الشمار ليك شنو مالك ومال البت زي الخلال ولا المراية داير تعرسها انت اصلو ههههههههههه
وتاني البركة ناس الامن الفكوك عشان نسمع النضمي الكتابي السمح ده يلا ماتتاخر منتظرين باقس القصة شوقتنا
وقبل ماتجي حاول دخل لينا صاحبك الخرباش عبدالرحمن مدثر عشان يجي ينداح بي هنا
| |
|
|
|
|
|
|
|
|
|
Re: الطقس ... الحكومة ...المدام (Re: عادل خياري)
|
فكرته قلته معقوله زميلي بتاع البنك ناس الامن قبضوهو جاب ليهو اشاعه في زوجة الرئيس ((زمان الريس ما كانت عينو طايرة واتزوج التانية))......
قبل ما أسالو قال لي عباس والله أنا اسف كنت مضطر لي كده!!!!
ما كنت فاهم الموضوع قلت ليهو ولا اهمك الناس ديل بكونو غلطانين بعد شويه بفكوك...
بعدين انا الاسف يا ابو الشباب امكن مسكوك عشان لينا فترة بنتحاوم سوا.
صاحبنا مدد رجليهو الحكايه يا حبينا ما كده اصلو انا مشيت جامعه الجزيره كان عندي مواعيد مع الحبيبه لقيت ليك هناك الجامعه مشاكل كثيره في طلبه تم اعتقالم حسي معانا في الزنزانه الثانيه... طلع بيان من التجمع الديمقراطي لقيت لي نسخه شيلتها معاي البيان كلامو قوي شديد عجبني وعايز اعمل للجكسويه أنا مقددها في عالم السياسة شيلته البيان بعد إطلعت عليهو ختيتو في جيبي الخلاني اشيلو شنو والله ماعارف.....
من شدة البيان ما عاجبني كنت بديهو للناس إقروهو واشيلو منهم تاني في ناس عندهم عباطه اقولو ليك ادينا ليهو قلت خلاص اصور كم نسخه البتعبط علي اديهو نسخه صورته بس عشره نسخ وزعت منهم سبعه لي جماعه في الحي وشايل الباقي في جيبي .
انا ماشي علي البيت ما اشوف ليك الي عربيه تقيف جمبي قالو لي اركب اشوف ليك جماعة شايلين اسلحه (( كلاشنكوف)) كرعي قعدن اضربن من الخلعه رووووووب بركته في الواطه نزلو شالوني فوق رموني زي الحمل في ضهر البوكس قالو لي وقت انت ما راجل البوديك توزع بيانات شنو....
الله امرقنا من المصيبه دي......
قلت ليهو والله تشوف مصيبه غيرك تهون مصيبتك انا والله مسكوني سااااااااكت بدون أي سبب......
قال لي معاك سجاره اديتو سجاره ولعتها ليهو تعرف يا عباس انت مسكوك ليه ؟؟؟؟؟؟؟
قلت والله شمشره الزول اقدم مني هنا امكن عارف افك حيرتي قلت ليهو ليه يا ابو الشباب؟؟؟؟؟؟
قال لي انا في التحقيق طبعا سألوني المنشورات جبتها من وين؟؟
طبعا انت اول من جيت انا قلت ليك اسف صاح وانت ما فهمت كلامي ؟؟؟
قلته ليهو لسع ما فاهم كلامك........
الجماعه ديل أنا قلته ليهم البيانات دي اداني ليها عباس !!!!!
اول حاجه عملتها كان شايل سجارتي باقي فيها نص علي طول بسرعه ختفت السجاره من خشمو.. الله ،،،،اولا اديني سجارتي او بعدين كمل الموضوع الظاهر القعده حا طول يا النعجه الراجل ودانا في داهيه اخير منها حكاية صلاح كديسه ....
طيب يا ابو الشباب ليه قلت حقتي انا ..او متين انا قابلتك عشان اديك منشورات..ليه تكذب.. دي اخر صداقتي معاك .
قلته ليهم الحقيقه ما صدقوني وقعو فيني تلطش وضرب قعدو اقولو لي في التحقيق انت بتمشي مع عباس احنا مراقبنك قلت احسن حاجه انا اتفكه منهم اقول المنشورات بتاعتك انت، اصلو امورك معاهم مطينه وزفت والموضوع بلف او بجيك تاني خاصة انت اخر مرة ابيت تمشي الدفاع الشعبي وعملت مشاكل في البنك استدعوك وفكوك بتطلع منها.
ياخ انا نوم ما جاني من امس في البرد وجاني مقص وإسهال الكلام ده ما بقدر عليهو كمان عندي ملاريا ... بعدين الواحد كبير كده اقعدو املطشو فيهو معاها تكفت والحاجة في البيت قلبها مشغول ما عارفاني وين.....
قلته الاطرش ودانا في داهية نشوف اخرتها شنو!!!
بحكي لي واحد صاحبنا متعود دايما علي الاعتقالات مرة صادف معاهو زبيديه بتاعين تهريب مسكوهم ناس الامن الاقتصادي الزبيديه هم قبائل بدويه هاجرت من السعوديه تعمل في التهريب غيرو والخيم ما بعرفو حاجة...
واحد فيهم سألو يازول انت الجماعه ديل قبضوكم في شنو؟؟
قال ليهم سياسه ...
عاينو ليهو وسكتو وطنطنو مع اخوانهم بعد فترة تاني يازول انتو قبضوكم في شنو؟؟
اقول ليهم سياسه....
كان السؤال مكرر كل مره ، مع توتر الاعتقال زهج منهم سألوهو تاني قال ليهم بي نهره او معاها صوت عالي ما قلنا ليك مسكوناااااااااااااااااااااااا في السيااااااااااااااااااااااااااااااسه.
سألوهو تاني بدوكم فيها كم؟؟
قال ليهم السياسة ما فيها قروش ....
قالو ليهو يعني بتشتغلو ساكت بلاش وملح علينا احنا انت قايلنا احنا ما بنعرف ولا انتو ما عايزنا نشتغل معاكم عشان ما نخم القروش منكم ..........
الراجل بقت عليهو حكاية الزبيدية قايل فيها خم وعلي الاقل اقشر بيها مع حبيبتو لو ما جابت خالص.
الصدف احيانا غريبه....
انا و صاحبي اتلمينا تاني هنا في السعوديه هو متزوج حديثا اتصلت عليهو يا فلان تعال اشرب معاي شاي مغرب انت وزوجتك نتونس شويه الذكريات الجميله بتاعت السودان.
الراجل مشكور لبي الدعوه بنشرب في الشاي ونضحك نعيد في الزكريات كانت جلسه جميله قال لي بالله ما تشغل المكيف قلت ليهو الجو شـتاء قال لي ما حاسي بي السخانه دي ..........
اها اجيكم للمناخ الصحراوي القلناهو اول الحكايه فوق والعنوان........
خلفت كراعي وبتكلم مع الراجل يا ابو الشباب والله البلد دي في حاجات من جيت هنا ما قدرته افهما خالص انا من جيت السعوديه ثلاثه ما قدرته افهمم (( الطقس –الحكومة – والمدام))!!
الراجل بالله زي القرصو ثعبان وين المرا... امال يا امال ...
قلت ليهو قاعده مع المدام عايزين نسرقا منك .
رفع صوتو عالي – امال –امال –امال يلا نمشي خلاص شربنا الشاي .
يا زول اقعدو اتونسو شويه شنو بي سرعه كده
قال لي يا عباس تاني سياسه؟؟؟؟؟؟؟؟؟؟
| |
|
|
|
|
|
|
|
|
|
Re: الطقس ... الحكومة ...المدام (Re: عباس الدسيس)
|
Quote: سلام يادسيس
انت كنت مندسي وين وعندك الحكاوي الطاعمة دي
لكن عجبتني ليك الفتنة انت الشمار ليك شنو مالك ومال البت زي الخلال ولا المراية داير تعرسها انت اصلو ههههههههههه
وتاني البركة ناس الامن الفكوك عشان نسمع النضمي الكتابي السمح ده يلا ماتتاخر منتظرين باقس القصة شوقتنا
وقبل ماتجي حاول دخل لينا صاحبك الخرباش عبدالرحمن مدثر عشان يجي ينداح بي هنا |
حبيبنا عادل اخبارك والاسرة الكريمة
شوق ممتد ليكم وقعتنا
وقعت طرش في بلاد غابات الاسمنت تختفي احيانا مع الشغل والزحمة واشارات المرور
الخرباش لو جاء هنا مكسب بس الريس عشان تجيب زول تسكو لما تفتر
وخوفنا الثاني لما اجي هنا الديار هناك تبقي فاضية
تحياتي وتقديري
| |
|
|
|
|
|
|
| |
عباس الدسيس
عادل خياري
فيس بوك
تويتر
انستقرام
يوتيوب
بنتيريست