نونية الشاعر محمد طه القدال التي أرسلها للشاعر حمِّيد ( عليه رحمة الله ) ... ( كان حمِّيد في جده حينها ) وكانت حبل وصال وحنين بين شاعرين ( هذا الحديث من مذكرات الشاعر السر عثمان الطيب متعه الله بالصحة والعافية )
وكانت النونية ( رباعية .. وكما نسميها دوبيت ) قال فيها
يا حمِّيد أخوي شُوف الخُلوق محنانة كَفكِف دَمعتك والعبرة فوت خَنَقَانَا عسلك سال بحر فوقو النحل ونَّانة يات من ضاق غَرَف جازاك دبابير دانة
07-02-2013, 04:38 PM
عبدالحفيظ ابوسن
عبدالحفيظ ابوسن
تاريخ التسجيل: 06-24-2013
مجموع المشاركات: 22319
كبس الهم علي والحال قبض ياالسيد غبنا في كج وتادو وجمبي معيد ما جنا تجيب سلسل جنازر وتقيد بلا غيبوبة البلد النصيح ومصيد القدال وللقدال عشقا في داخلي وانا صبيا يافعا ولم يزل وبل يزداد كل يوم حضور و متابعة ورغبة في التداخل آتية
07-02-2013, 08:00 PM
خالد علي محجوب المنسي
خالد علي محجوب المنسي
تاريخ التسجيل: 04-10-2006
مجموع المشاركات: 15968
كبس الهم علي والحال قبض ياالسيد غبنا في كج وتادو وجمبي معيد ما جنا تجيب سلسل جنازر وتقيد بلا غيبوبة البلد النصيح ومصيد القدال وللقدال عشقا في داخلي وانا صبيا يافعا ولم يزل وبل يزداد كل يوم حضور و متابعة ورغبة في التداخل آتية ======================================
الأخ الفاضل عبدالحفيظ أبوسن لك التحية على هذا المرور الجميل
فعلاً للقدال وقع وطعم خاص شديد بين الشعراء كبس الهم لاحظ اخي ابوسن مفردة كبس وعندما يكبس عليك شئ فهو غصباً عنك ولا برضاك كبس الهم الحال قبض يا سلاااام الحال وقف تب ووقف دود عبناً : والله يكفينا شر الغبنة وهي من الغبينة ( عينك في المأذيك وماتقدر تأخد حقك منو ) ودا البجيب الغبينة غبناً فينا كجا أوتادو والوتد معروف وهو ما تربط فيه الدابة ويدق في الارض حتى يثبت قوي كما حال الغبن الذي ثبت أوتاده فينا وما زاحي وهو غبن ماهو جن ( اي جن راكب فينا ) عشان الفقرا يجيبو سلاسلم ويقيدونا يطبونا بقراءة القرآن لكن غبينة زي غبينة البلد الصبح لا هو نصيحولا واعي ورمز لها بي كلمة مصيّد المصيد هو المجنون ويقال له مصيد لانه سارح ومركز في شئ خيالي في خياله وكأنه ينتظر فريسة يريد أن يصطادها ياسلااام على تركيب مفردات القدال حين ينضمها عقد من لؤلؤ في جيد السمحة في البنوت ولك الشكر أخي ابوسن
07-04-2013, 08:08 PM
خالد علي محجوب المنسي
خالد علي محجوب المنسي
تاريخ التسجيل: 04-10-2006
مجموع المشاركات: 15968
مرقن صباحا جيت من عين بروقن خايفات مهاوى الصيد خايفين حروقهن هن فوقنا متسابحات وعبوننا فوقن مرقن من الجايات ختمن مروقن جيتك كما الجمرات راجمات علوقن من نورى متطابقات حالفات يقوقن طيرتين من الجنات منحلى طوقن نشدن غناوى الخير طرقن حلوقهن من مغرب الغنوات لا عند شروقن تابات مع البنوت لا زمات عشوقن شبلنو متسابقات متساوى روقن شيلن بلا خيلن والعزة طوقن نخلن بلا شعرن والنيل عروقن ما بردن فاترات يوم حر سوقن ما قبلن حارنات خوف البسوقن دمرن شعاب الروح فى يوم نشوغن بلدن قلوب الناس والحنة شوقن هن عرفن الخلقن خابرات خلوقن تمن تمام الكيف حسبن فروقن ايش البلد حيكون ناقص دلوقن غنن بنينة الخير فوق حادى نوقن بنن بنن بانينة يا بنينة هى نبنى البنا البانينا يا بنينة هى باسم الله ابتديت يا ربى يا بارينى والصلاة والسلام للحبه بارينى يابنينة هى الوطن السماح الحبه بارينى قلبى على الولد قلب البلد بارينى يا بنينة هى مامنعوك من شمس الله ما منعونى والكلمةالحقيقة حقيقة شمس الكون يا بنينة هى للغبش السواد غنوة وشفا المكنون للظالم سياط تجلد قفا الظربونى يا بنينة هى ما منعونى من ريحتك ولا منعوكا ما كازوك لو عرفوا العنا وعرفوكا يا بنينة هى الغنوة البحجرا عليها بالبازوكا دوب سجانها فز وفرهدت فى شروكا يابنينة هى ما منعوها من شوفتك اذا منعوها تلقاك فى الارض فى امها وفى بوها يا بنينة هى شارياك بالنفس ما همها الباعوها لا نايحه بتنوح لا أذنت مندوهة يا بنينة ما منعوك ما منعوها ما منعونا شيل الناس وشم الطين وشوق أمونة يا بنينة هى ما شفنا البكيل نقص حوافى الشونة ما كبر الصغير بى نفخة البالونة يا بنينة هى كيف العاصمة تبقى الشاية للحرية والعكاز مضبب والزمن جهدية يا بنينة هى نحن عروسنا قولة حق نشيلها هدية لى ابو قدوم ونورى حليوة والمكنية يا بنينة هى نحن الكلمة شمس القايلة ما بنلوكا سن الحق على الظربونى حلق الشوكة جنياتا بعرفو الغنوة شدوا سلوكا شالوا الحق نهيض نقزى وضرب دلوكة نحن بلدنا راسية النيا يراضى حدوبا فى الغرب الجبل فى النص جبال النوبة فى الشرق التلال عطرون علاج القوبة والبركل مع الاماتونج ركايز الحوبة نحن بلادنا باولادها البعرفوا الراطنة احمد ودقرنق واسحاق اخوك وابوفاطمة لو ما كان قبيل حشف القبيلة الجاطنا كنا نهضنا لى قدام لحقنا الفاتنا نحن غنانا للولد البشوف قدامو للبنت البتسند حيلو شادة حزامو ونحن غنانا للبلد البراشى غمامو نطرى جماي لو حميدو وجميل اياموا جيت ناس فلتكان ختونا فى غوغايا قالولنا السلام زيت البلد هو الغاية (شيشانا) القبيل غنونا بالهوهايا ولدولنا السلام ولدة حبل بالداية المهدى القبيل ولدا قدل فوق عزة و(الشيشان) سكوت لا زول عرض لا هزة يا نص العصا اللاكرة فيك لا فزة بوش وبلير اخوك ختونا فى قد بزة يا بنينة هى
جمعة مباركه أبوالخلد
07-07-2013, 08:49 PM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
شوف جنس النضمي دا وشوف جنس المحنة الما كاذبة بين هولاء القوم الشرفاء عرف القدال أن أزهري شدَّ الرحال ولمَّ بأخوانه فكتب القدال رسالة نصية في التلفون وارسلها
قال فيها يخاطب حميد رفيقه عليه رحمة الله
يا حمِّيد أخوي شُوف الخُلوق محنانة كَفكِف دَمعتك والعبرة فوت خَنَقَانَا عسلك سال بحر فوقو النحل ونَّانة يات من ضاق غَرَف جازاك دبابير دانة
07-10-2013, 08:51 AM
خالد علي محجوب المنسي
خالد علي محجوب المنسي
تاريخ التسجيل: 04-10-2006
مجموع المشاركات: 15968
وكانت نونية القدال التي أرسلها هذه وصل بين أم مبدة وجده في ذاك اليوم
يقول الشاعر الجميل السر عثمان الطيب في مذكرته يزور الشاعر الرقيق أزهري محمد علي مدينة جده ، مرافقاً للشاعر محمد أحمد علي سالم حميد في رحلة علاجه قال الشاعر السر كان أول لقاء لي بالشاعر ازهر وسعدت بلقائه رغم الزيارة الغير عادية وما يكتنفها من معاناة إلا أن ازهري بهدوئه الذي ينم عن تفاؤل وصدق وإيمان بالقدر وثقة في إشراقات الأمل المرجو قد عطر مراراً لحظات غربتنا المريرة بتغريده الفريد المشجي
07-10-2013, 09:51 AM
عبيد الطيب
عبيد الطيب
تاريخ التسجيل: 08-31-2012
مجموع المشاركات: 1801
Quote: ما قبلن حارنات خوف البسوقن دمرن شعاب الروح فى يوم نشوغن
خالد أخوي سلااااااااااااااام ومعزة كبيرة ليك ولي شاعرنا الجميل القدّال
رمضان مبارك عليك وعلي الشاعر وعلي الجميع
"دمرن شعاب الرُّوح في يوم نشوغن" يا سلااااااااام والضد يظهر حسنه الضد
نعم القدّال روح طيبة.........! و حين يرد عليك السلام السلام يسبقها دون تكلّف وبصدق هاشا باشا " حبابك يابا...................! ومفردة عميقه تقدل زهوا في بساط الموروث كما القدال شاعرنا
محبتي لك وللشاعر وللمتداخلين
07-10-2013, 03:54 PM
خالد علي محجوب المنسي
خالد علي محجوب المنسي
تاريخ التسجيل: 04-10-2006
مجموع المشاركات: 15968
يقول تاج السر عثمان الطيب في مذكرته كانت لقائتنا بالأخ أزهري محمد علي جلسات عامرة بفرحٍ اضفاه عليها بروائعه الشعرية الأنيقة المملوة صدقاً وثباتاً وإلتزاماً بالموقف الجاد المنحاز للوطن وإنسانه
يوم الخميس 24/5/ 2001 كان واحد من أزمان هذه اللقاءات ... حشد ضخم من الشعراء المبدعين شرفوا درانا بحي الخالدية بمدينة جدة أزهريمحمد علي المكاشفي محمد بخيت الشاعر حميد شمس الدين حسن خليفة محمد حسن حدباي الطيب البرير طه حسن صلاح إبراهيم جمال السنوسي كمال كركساوي مرتضى صباحي والفنان الساكن المتحرك نغماً عادل الصديق والأخوة الأعزاء محمد أحمد عل سالم ، النذير سعيد ، محمود إبراهيم بشير ، محجوب النعيم ونواصل مع مذكرات السر عثمان في حينميسرة
07-10-2013, 05:03 PM
خالد علي محجوب المنسي
خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: خالد أخوي سلااااااااااااااام ومعزة كبيرة ليك ولي شاعرنا الجميل القدّال
رمضان مبارك عليك وعلي الشاعر وعلي الجميع
"دمرن شعاب الرُّوح في يوم نشوغن" يا سلااااااااام والضد يظهر حسنه الضد
نعم القدّال روح طيبة.........! و حين يرد عليك السلام السلام يسبقها دون تكلّف وبصدق هاشا باشا " حبابك يابا...................! ومفردة عميقه تقدل زهوا في بساط الموروث كما القدال شاعرنا
محبتي لك وللشاعر وللمتداخلين
العبيد أخوي رمضان كريم تصوم وتفطر علي خير وما أحلى النشوق والرحيل والرحيل عز هي كلمات تشعر بالحنية فيها ومملئ بالحنان والعاطفة حبابك يابا مشتهياك ضُمة تعال يا عشاي وا شري وا شري والكثير من ألفاظ أهلنا الحُنان لك التقدير يا عبيد وخليك قريب
07-10-2013, 09:02 PM
خالد علي محجوب المنسي
خالد علي محجوب المنسي
تاريخ التسجيل: 04-10-2006
مجموع المشاركات: 15968
يقول الشاعر السر عثمان الطيب في مذكرته عن تلك الليلة :
إستمتعنا ليلتها إلى تجليات الشاعر حميد والشاعر أزهري محمد علي ، فتجلينا نشوة عبّر عنها أخونا شمس الدين حسن خليفة بخشيته على العربية من حميد مشبهاً مبالغة الإعجاب بإندهاش أمير الشعراء أحمد شوقي وقد أبهرته عامية بيرم التونسي فعبر عن خشيته على العربية منه. وبينما تواصلت جلسة سمرنا الصافية في جدة ، وكان أخونا الشاعر الفذ / محمد طه القدال يسجل حضوراً متواصلاً معنا رغم بعده المكاني في أم مبدة كان بعيداً بجسده عنا لكنه كان قريب بروح فنه ... ومن نصه الشعري الرنان ( أغاني الزنادقة ) جاءنا صوته الحاضر عبر سماعة التلفون مخاطباً حميد
يا حميد أخوي شوف الخلوق محنانة كفكف دمعتك والعبرة فوت خنقانة عسلك سال بحر فوقو النحل ونانة يات من ضاق غرف جازاك دبابير دانة
07-10-2013, 09:11 PM
خالد علي محجوب المنسي
خالد علي محجوب المنسي
تاريخ التسجيل: 04-10-2006
مجموع المشاركات: 15968
يقول السر : تداولنا جميعاً ( الحضور يومها ) ذاك المقطع الذي وصلنا لتوه من الشاعر محمد طه القدال لحميد والمتدفق شهدا .... وعبر عن القول أزهري ان يأتي كل من الحضور بأبيات على وزن نونية القدال لحميد فأكسب الشعراء الحضور الوصل بين القدال وحميد مساحات شاسعة من الشعور المشترك والحس المتوحد الي يربط بين القلوب وإن تباعدت الأمكنة
وكان البدء قولاً من الشاعر أزهري محمد علي
07-10-2013, 09:19 PM
خالد علي محجوب المنسي
خالد علي محجوب المنسي
تاريخ التسجيل: 04-10-2006
مجموع المشاركات: 15968
يافطّون .. فطن حميد فطمنا غُنانا ( فطّون هي فاطمة أخت حميد وكان يحبها جداً وقد تعرفوا عليها الشعراء في زيارتهم لحميد ) لا طاطين ... لا سبنا الخيول تاطانا قدَّمنا وامام ... لا ضلَّ لا ضلانا ماهاب السجون ... مافزَّ من سيطانا وكت الكور حِمى .. ثابت ركز لبطانا عالجا بالرحيل .. مدَّت وراهو لِسانا جرَّبا بالعويل ... قلبت حديثا رطانة حَنسا بي الهديل ... رخت الحبيبة أضانا زي كل الطيور ... دايماً تحن لي أوطانا ما ضاق الوطن .. بس كِبرت الزنزانة
07-10-2013, 09:29 PM
خالد علي محجوب المنسي
خالد علي محجوب المنسي
تاريخ التسجيل: 04-10-2006
مجموع المشاركات: 15968
ياحميد ... هتف نادوس وصلنا سمانا يوم الشمس مغرب طفَّرت بي الزانة فوق حطب الصباح وصلت صباح لمنَّانا نورة إتشمست ، كفّت عيونا بطانا كاويقن حِرق ... مابنجّا إلا غُنانا ياحميد ذرف دمع المدن قوَّانا ياوطناً مدفّق في بلود عطشانة غطيت بي الصمود ... غطوكا بي الجبخانة
ونورة هي رائعة حميد شعرا هي اقيفن نوري فيكن نورة حلابة الِلبيني لس السغيرين والضيوف والقصيدة معروفة وتغني بها عقد الجلاد لكن كانوا يقولون هي أقيفن نعمة فيكن
07-10-2013, 09:46 PM
خالد علي محجوب المنسي
خالد علي محجوب المنسي
تاريخ التسجيل: 04-10-2006
مجموع المشاركات: 15968
كيف ما نبتهج ... مانحن الله اداَّنا كتراً بي درر تغني النفوس ، حصَّانا اليوم بي جلالة قدرو حميد جانا تاني الغُربة تب آلاما ماب تغشانا حميد بي الدرر لا زال خزاينو ملانة طايعالو القوافي وهو البجيد أوزانا كلماتو الرصينة الفي القلوب رنانة البختا الدرب بتحرقو بي نيرانا
07-16-2013, 08:01 PM
خالد علي محجوب المنسي
خالد علي محجوب المنسي
تاريخ التسجيل: 04-10-2006
مجموع المشاركات: 15968
يا كاسي النضم هيبة وصمود ورزانة بيك عالي الشعر وقوافي ديمة مزانة في قلب العدو .. صوتك يمين جبخانة تسلم يا جنا .. شعرك يمين ميزانا ياقشاش دموع الباكيو الحزنانة ياقابض الجمر حافظ الوصية أمانة ان صابت الخلوق داهية وبقت محنانة تلقاك سيف نصر زاهيابو يوت فرحانة
07-16-2013, 08:42 PM
خالد علي محجوب المنسي
خالد علي محجوب المنسي
تاريخ التسجيل: 04-10-2006
مجموع المشاركات: 15968
وقال الشاعر السر عثمان الطيب ( صاحب المذكرة لنونية القدال )
ياحميد أخوي .. كابَّي العيون مطرانة طارين البلد .. كان البلد تطرانا نحن مشتَّتين غادي بعيد ... عطرانا جايلين في الأرض، نوبة ،بدو ورطانة ناس سارقين الوطن ، متنفخة وبطرانة حاكّي جَرب رِباها ، اندلّكت قطرانا ناس بي الجوع نشف يبس أنصفق مصرانا صبرت دُنيتا وفي الأخرة ما خسرانة
07-16-2013, 09:57 PM
خالد علي محجوب المنسي
خالد علي محجوب المنسي
تاريخ التسجيل: 04-10-2006
مجموع المشاركات: 15968
طال ليتها السمر .. وبعد أن فرغنا في المسامع والكاسيت ما إبتكرته القرائح هرعنا إلى الهاتف ، رغم أن خيوط صبح اليوم التالي كانت قد تسللت عبر النافذة .... وبرنينه في منزل الشاعر القدال في أم بدة ، كنا على موعد معه ، فقد كان مستيقظاً معنا .... أبى وجدانه أن يغفو وإن داهم العيون طيف نعاس . حادثناه كلُّ من طرف صلةٍ حميميةٍ به .... وتمنيناه بشخصه وسطنا ... لا هنا شرق البحر ، بل هناك غرب النهر ولكن هيهات!
07-17-2013, 08:01 PM
خالد علي محجوب المنسي
خالد علي محجوب المنسي
تاريخ التسجيل: 04-10-2006
مجموع المشاركات: 15968
السمر إمتد بنا والشدو تواصل ، فغنانا عادل الصديق ... إستمعنا كما لم نستمع من قبل لأنه أطرب وطرب كما لم يفعل من قبل ... وبين الأخذ والعطاء مضى بنا السهر الجميل .... وتواعدنا جمعنا على أن يظل ملمتنا باستمرار وفي هيئة ماعون يسكب فيه كل منا ما يعن له من رؤى شعرية وفنية لندفق المزيج في الرحاب العامة ..... ثم افترقنا والوعد قائم قريب ، تمتيناً لعروة وصلٍ أحكمت ربطها بين أميدة وجدة ( نونية القدال )
07-17-2013, 07:58 PM
عبدالعزيز الفاضلابى
عبدالعزيز الفاضلابى
تاريخ التسجيل: 07-02-2008
مجموع المشاركات: 8199
ودعمي ـ رمضان مبارك بعد رمضان إن الله هَووَّن بنرجع ليك. اليوم هنا عندنا طويل وكأنه يوم عند ربك قَدُرْ ماتحرسها تغيب تلقاها في نص السماء الا مساك اربعة صباحاً والافطار تمانية ونص م. مافضل لينا إلا نجدعها بالحجارة عشان تغيب بالنهار الحرارة زي التقول بتاعة المنطقة الصناعية
07-17-2013, 09:43 PM
خالد علي محجوب المنسي
خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: ودعمي ـ رمضان مبارك بعد رمضان إن الله هَووَّن بنرجع ليك. اليوم هنا عندنا طويل وكأنه يوم عند ربك قَدُرْ ماتحرسها تغيب تلقاها في نص السماء الا مساك اربعة صباحاً والافطار تمانية ونص م. مافضل لينا إلا نجدعها بالحجارة عشان تغيب بالنهار الحرارة زي التقول بتاعة المنطقة الصناعية
الجميل الراقي الفاضلابي رمضان كريم ولك مني كل الاماني الطيبة لك وللأسرة وإن شاء ديمة عامرين ولآمين وطيبين وعافية درت تغطيكم وتغشاكم كل يوم وليلة
قال عباس ( وعباس هذا كان ممسوس بجن عافنا الله وأياكم ) مرة وهو في سوق شندي وقف في سبيل جقم موية زيييييييين فسأله أحد المارا : انت ما صايم يا عباس ؟؟؟ فرد له : والله أمس صحتني ام الاولاد وسحرتني سحور ما خمج وركبت من صباحاً بدري البص وجيت شندي لما جاتالساعة 9 والله التقول غزوا لي كُنش في حلقي قلت يا عباس انت مالك ومال رمضان أنت قدرو ولا لحم سدرو وجيت السبيل دا اجقم لي موية هههههههههههه ربنا يهون عليكم فعلا الصيام في بلاد الغرب اليوم طويل زي نفس ود شيقوق في المساسكا ( مع بنات حواء ما فتر ونفسو طويل ) ههههههههههه تحياتي ومودتي
07-17-2013, 09:49 PM
خالد علي محجوب المنسي
خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: قلت يا عباس انت مالك ومال رمضان أنت قدرو ولا لحم سدرو وجيت السبيل دا اجقم لي موية
واحد كاثوليكي عنده مرة مَنَجِّضاهو نجاض قَدُرْ مافتَّش ليهو حل يتخارج بيهو منها ما لقي طريقة. مشي لي صاحبو المسلم : شكا ليهو عمايل مرتو والمغايس البِتسوي فيها. صاحبو المسلم بعد سمع الحكاية زعل بلحيل من مرة صاحبو المسلم: ياخ ماتطلقها ماسكا لي شنو مرة زي دي؟ الكاثوليكي: الطلاق مو بالساهل زي ماعندكن انتو المسلمين وشرح ليهو التعقيدات اللي حايوجها اذا عاوز يطلقها. المسلم لصاحبه الكاثوليكي: وبعدين ياخوي الحل شنو؟ الكاثوليكي: الحل الوحيد هو أني أغير الدين بتاعي وبعد كده الطلاق بكون ساهل . عشان كده انا جيتك توريني عن الاسلام . المسلم: والله ياخي هو الاسلام مو كعب ديناَ زين. بس عندنا شِهِيرَاً إسمو رمضان ـ أخير منه مرتك دي
07-18-2013, 11:21 PM
خالد علي محجوب المنسي
خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: الكاثوليكي: الحل الوحيد هو أني أغير الدين بتاعي وبعد كده الطلاق بكون ساهل . عشان كده انا جيتك توريني عن الاسلام . المسلم: والله ياخي هو الاسلام مو كعب ديناَ زين. بس عندنا شِهِيرَاً إسمو رمضان ـ أخير منه مرتك دي
هههههههههههههههههه منجض الناس
يا اخوي قوم اشرب ليك موية بل ريقك قطع شك بتأخد ليك جِغيمات في الوضو
07-19-2013, 07:24 PM
خالد علي محجوب المنسي
خالد علي محجوب المنسي
تاريخ التسجيل: 04-10-2006
مجموع المشاركات: 15968
مرقن صباحا جيت من عين بروقن خايفات مهاوى الصيد خايفين حروقهن هن فوقنا متسابحات وعبوننا فوقن مرقن من الجايات ختمن مروقن جيتك كما الجمرات راجمات علوقن من نورى متطابقات حالفات يقوقن طيرتين من الجنات منحلى طوقن نشدن غناوى الخير طرّقن حلوقهن من مغرب الغنوات لا عند شروقن تابات مع البنوت لا زمات عشوقن شبلنو متسابقات متساوى روقن شيلن بلا خيلن والعزة طوقن نخلن بلا شعرن والنيل عروقن ما بردن فاترات يوم حر سوقن
قال الشاعر محمد طه القدال أنه نظم هذه القصيدة يوم عودة الشاعر الكبير عليه رحمة الله ( محمد الحسن سالم حميد ) من الغربة عائداً لارض الوطن االتي لفظته ورمته للغربة التي يرفضها ويحلو له العيش والضيق مع أهله وشعبه الذي أحب وعشق وما هاجر الأشراف إلا عندما ضيّق عليهم كل واسع برح وما هاجرو إلا بعد ان زُج بهم في السجون كل يوم كل ساعة بسبب ومن دون سبب ( إلا أنهم قالوا لا .. لا .. في وجه السلطان زبانيته ) وقال القدال حضرنا للإحتفاء بعودة حميد ولكن كانت يد الأمن اقوى ( جاءوا ومنعونا أن نقيم اي شئ إحتفالي بعودة حميد ) والسيف فوق رقابنا ما كان إلا أن نمتثل لحكم الجور والظلم شئنا أم ابينا لكن .. أن اسكتوا صوتنا علنا .... فلسان قولنا يصل للقاصي والداني حرف وكلمة شعرا فكان مولد هذه القصيد
مرقن صباحاً جيت من عين بروقّن
ويا لجمال قول القدال عندما يقول فقوله يداعب كل مشاعر حية وطنية وفي من القول في حبيب الشعب المهضوم حقه لسان حال الكادحين ( حميد ) وكان اللقاء السمح في المادح والممدوح قدال وحميد ومرقن صباحاً جيت من عين بروقن
ولحين ميسرة
07-19-2013, 08:32 PM
خالد علي محجوب المنسي
خالد علي محجوب المنسي
تاريخ التسجيل: 04-10-2006
مجموع المشاركات: 15968
مرقن صباحا جيت من عين بروقن خايفات مهاوى الصيد خايفين حروقهن هن فوقنا متسابحات وعيوننا فوقن مرقن من الجايات ختمن مروقن جيتك كما الجمرات راجمات علوقن من نورى متطابقات حالفات يقوقن
واسماها القدال بنينـــــــة الشعراء
وهم محمد الحسن سالم حميد محجوب شريف ازهري محمد علي
وحميد من نوري وازهري من المحمية شمال شندي ومحجوب شريف من قرية القدوم
مرقن صباحاً جيت هي الجديان ( الغزلان ) فرحاً بقدوم حميد عائداً لارض الوطن الذي أجلاه المستنفعين منه عنوة مرقن وعيونهن تبرق خوفاً من مجهول ومهاوي الصيد هي الأماكن التي يحلو لبني البشر القنيص فيها والصيد مهاوي الصيد هن خايفات مهاوي الصيد ونحن نخاف عليهن ان يحرقن بجرف الصيد الجائر من الإنسان عدو الطبيعة
وكانت عودتك يا حميد كما الجمرات ( والجمرات ترجم ... راجمة ) لي من ( لي الحيكومة وهي عدو كل ذو شرف وكلمة لا يحيد عنها ولا يبيع نفسه بحفنة قريشات ويقول نعم ) وهن جئنَّ ريقان ( صفوف وجماعات من نوري يستقبلن حميد بهجة بحاميهم والزئد عنهنَّ ) جنو مطبقات جماعات وفرادا وجن وحالفات يغنن لهذا الشاعر الذي كانت عودته كالراجمات لعدوه
07-19-2013, 08:52 PM
خالد علي محجوب المنسي
خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: طيرتين من الجنات منحلى طوقن نشدن غناوى الخير طرقن حلوقهن من مغرب الغنوات لا عند شروقن تابات مع البنوت لا زمات عشوقن شبلنو متسابقات متساوى روقن شيلن بلا خيلن والعزة طوقن ما بردن فاترات يوم حر سوقن ما قبلن حارنات خوف البسوقن
مرقن طيرتين من الجنات وكنا نسمي الطير ذو الألوان الزاهية الاحمر والاخضر وذو اللونين طير الجنة مرقن طيرتين من الجنات منحلي طوقن ... الطوق في الطير لون زاهي جميل يزين عنقه وعادة اهل السودان يسمون القماري ابو طوق وللطير طوق تلكما الطيرات .... طيور الجنة جئنَّ ينشدن فرحا بقدوم حميد طرقن حلوقن طرق الشئ اي سنه واصبح حاد وطرق صوته اي شرب شئ يساعد على يطلع الصوت من حلقه جميل في شدوه مرقن وطرقن اصواتهنَّ حتى يغنينا طرباً لحميد يغنينَّ من صباح بدي لعند غروب الشمس موعد عودتهنَّ إلى اوكارهنَّ ( العش فوق شجرة ) وحاكن الصبايا الحلوات وكيف يحترمن عشوقهن ويبرنه عفة ومحبة تابات مع البنوت لازمات عشوقن وجن جاريات لي حميد يدنّو الشبال كما فعل البنات عندما تدي الشبال لعشيقها وكن يتسابقن في رمي الشبال لحميد فرحة بعودته شبلنو متسابقات متساوى روقن والروق : هو الصف اي كنا مصفات في صف يرمن الشبال
شعرن زي نخيل بلادي والدم في عروقن يجري جريان نيلنا الخالد ومابردن بل حرن يوم حرَّ سوقن يوم قدوم حميد
07-20-2013, 11:33 AM
الطيب شيقوق
الطيب شيقوق
تاريخ التسجيل: 01-31-2005
مجموع المشاركات: 28804
محمد الطيب محمد امين لدعواتك لهذا القامة القدال إنسان إنسان إنسان لو تعرفت عليه رجل بمعنى كلمة رجل يحملها أصالة وخُلق قذف الله في قلبه مزعة تجذب البشر لحبه وحب اشعاره بعد ربنا يحفظه
07-20-2013, 09:46 PM
خالد علي محجوب المنسي
خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: ودعمي ـ سلام شيقوق ده مالو حايم في المنبر زي تيس السيدة مريم؟
هههههههههههههههه وانت الصادق زي تيس امنة زوجة بلول ود قرافي كان عندها تيس عايش عيشة الملوك كل يوم يرسلونا عشان نجيبو عند ناس فلان لانو غنمهم عاوزات العُشار ويأكل مجان ويلبلب ويطلع من دي لي دي وناخده من هناك إلى زريبة ناس فلان وبعدها لزريبة ناس فلان وهكذا التيس يرتع وتريان وقوي وعالي القامة تلقانا اقبضينو من إضني اتنين والباقين زافنو من ورة في رحلته تلك ( المغرور التغيان وهو يلبلب ) هههههههههههه واسمو تيس امنة مرة بلول
07-23-2013, 05:07 PM
خالد علي محجوب المنسي
خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: غنن بنينة الخير فوق حادى نوقن بنن بنن بانينة يا بنينة هى نبنى البنا البانينا يا بنينة هى باسم الله ابتديت يا ربى يا بارينى والصلاة والسلام للحبه بارينى يابنينة هى
البنينة هي قصيد مدح تقال للعريس وعادة تنظمها واحدة من اهله مرأة وهناك من البنيننات الكثير الذي اشتهر وشاع بين الناس وحفظه الكل بنينة تيمان عطبرة
والبنينة التي يتغنى بها حسين شندي العديل والزين أنا مناي لي فال حسن والحسن مرق وشدو لي
07-24-2013, 04:41 PM
خالد علي محجوب المنسي
خالد علي محجوب المنسي
تاريخ التسجيل: 04-10-2006
مجموع المشاركات: 15968
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة