|
|
 خير اللهم أجعله خير
|
حلمت يا حبان ... اني زعلان زي وزي أي سوداني او سودانيه من الحاصل علي البلد وناسو الطيبين .. المهم بزعلتي ديك ... مشيت بالليل جامعة الخرطوم وقعدت اكورك في نص الجامعة بصوت جهوري ... ومشحون بالغضب واتلموا معاي طلاب كتار ... وكنتا انا بقول الهتاف وهم برددوا وراي ... كانت مظاهرة عنيفة وهادره .. اها في أثناء المظاهرة ديك شفتا كاميرا من النوع البكون معلق في أعمدة وبتحرك في كل الاتجاهات والبصور بالاشعة فوق الحمراء وتحت البنفسجية قاعدة تصور فيني ... أدت المظاهرة غرضها تماما ومشيت انا بعدها اندسيت وسط الطلاب في كافتيريا بعد شوية جات زي عشرة عربات أمن طوقت الكافتيريا من كل الجهات .. ونزل منها ضابط ... وقف في باب الكافتيريا وقال نحنا عارفنك هنا يا عثمان الحسن ... احسن تطلع براااك ... يا عثمان الحسن ... الكاميرا صورتك ومن صورتك يا شاطر دخلنا علي الداتا بيز حقتك وعرفنا اسمك ... ولعلمك شريحة تلفونك مراقبة ونحنا متأكدين انك هنا ... بدأو يفتشوا فينا واحد واحد ... ولامن لقوا اسمي عثمان جاد الله .. قالوا لي اتخارج... طبعا انا ما صدقت جريت جري واندسيت لي في شقه في عمارة طوييييييله .. وقعدتا براي أحلل .. اتاريها الكميرا بت اللذينه بعد ما صورتني مشت لبياناتي لكن دقست وأخدت اسمي الاول واسم العائلة لزوجتي ههههههههههه عشان كدا جا الخليط عثمان الحسن ... وللاحتياط قفلت التلفون وطلعت الشريحة ... ووقفت من دخول الانترنت ومن الاتصال بأي شخص ... بشاهد بس الأخبار في التلفزيون والصحف وكلها كانت تتكلم عن فرق البحث الخصصت للبحث عني ... بعد شويه سمعت في التلفزيون ندأ موجه من الرئيس البشير لشخصي الضعيف تطلب مني تسليم نفسي مش عشان يعتقلوني .. لكن عشان هو داير يسلمني الحكم والرئاسة ... لانو عجبتو جدا شخصيتي القيادية أثناء المظاهرة ... وانا بفكر في كلام الرئيس وفي انو ممكن تكون خطة وكمين للقبض علي رن المنبه ايذانا ببداية يوم عمل جديد في الغربة.
اها وللعلم ...أنا اليوم داك اتعشيت عدس وفول ... وتجمعات ناس الحكومة ومخاطاباتهم للجماهير دي مقاطعه ... هي و أراب ايدول.
بعد ما أفقت من نومي لم أجد تفسيرا منطقيا لهذا الحلم !!! .... وبعده بيوم أو اثنين ... وصلتني على ايميلي رسالة من السيد/ بكري ابوبكر بالموافقة على عضويتي لهذا الصرح الشامخ.
اللهم أجعل هذا الحلم خيرا لوطني السودان ... وشعبه الطيب.
اللهم أجعل في تشرفي بانتسابي لهذا المنبر السوداني الحر ... الخير لنفسي وللاعضاء الكرام ... ونحلم جميعا يا سادتي وسيداتي الكرام في وطن معافى .. آمن ... وبسع الجميع.
شكرا لمن جعل هذا ممكنا بعد الله ... بكري ابو بكر ... لأرى قلمي يكتب في هذا المنبر.
وأتمنى أن أكون بينكم هنا كما الحلم الجميل .... لا يزعج نومكم ... ولكنه يجعلكم تتبسمون كلما تذكرتموه.
كل الود،،،،
|
|
 
|
|
|
|
|
|
|
 Re: خير اللهم أجعله خير (Re: عثمان جاد الله بخيت)
|
مرحباً بك عثمان جاد الله بخيت مدوناً ليقظتك وأحلامك ونتمنى أن تتحقق أمانيك
Quote: اللهم أجعل هذا الحلم خيرا لوطني السودان ... وشعبه الطيب.
اللهم أجعل في تشرفي بانتسابي لهذا المنبر السوداني الحر ... الخير لنفسي وللاعضاء الكرام ... ونحلم جميعا يا سادتي وسيداتي الكرام في وطن معافى .. آمن ... وبسع الجميع. |
| |
|
|
|
|
|
|
|
|
|
Re: خير اللهم أجعله خير (Re: أسامة العوض)
|
الحلم ده تفسيروا عندي
الكاميرا البتصورك ديل الكيزان المعروفين في المنبر واصلك حاتعمل حسابك منهم
الشريحة بتاعة تلفونك دي ياها الحاتوديك التوج لانو دي بتمثل كيزان المنبر المندسين
والعاملين اصحابك وبيرسلو تقاريرهم يومي عنك لناسهم .
والطلاب الكتار الاندسيت وسطهم ديل نحن ديل نكون خايفين منك تكون كوز مندس ...
ارجو انو التفسير ده مايزعلك لانو مجرد تفسير
تحياتي ليك ومرحب بيك ولك طبعا الحرية فيمن تكون .
| |
|
|
|
|
|
|
|
|
|
Re: خير اللهم أجعله خير (Re: وليد شريف)
|
ههههههههههههه العزيز وليد شريف ... تحياتي وتقديري .... شن ياخ حلمي دا مرقوا لي كسور وبواقي وكيزان ... ياااااااااخ دا حلم لله والرسول والوطن .... ربنا يحقق أحلامنا جميعا يااااااخ .. وبيني وبينك أنا كنتا مزنوق شديد في الحلم ما حلاني الا المنبه القعد يكورك لقيتا حلمه ههههههههههه يااااااااخ لدرجة انو انا لاول مره اقوم مبسوط وانا بصفر للشغل ... شنو ياااااخ شابكني مندس ومندسين اصلو نحنا نقعد نتدسس كدا لمتين؟ سعيد بمرورك وتفسيرك الكريم.
كل الود،،،،
| |
|
|
|
|
|
|
|
|
|
Re: خير اللهم أجعله خير (Re: عثمان جاد الله بخيت)
|
الغالي .. هاني عربي
اللهم أجعله خير يااارب
هههههههههههه ياخ انا كنتا قايل حلمي دا كترت فيه المحلبيه بـــ الداتا بيز والكاميرات البتصور بالاشعة ؟؟ لكن حلمك التاني دا ... طلع حلمي أي كلام دا حلم واضحه فيهو التفاصيل شديد واقرب ما يكون لـــ رؤيا ... وتفسيرو حسب رؤيتي المتواضعه
1- الانقاذ ستزول ... ولكن ليس بأخوي وأخوك.
2- الجنوب ح يرجع يتوحد تاني مع الشمال
3- السودان ح يكون قبلة بلاد العالم رسميا وشعبيا
4- رئيس السودان القادم ح يكون سوداني مقيم او اقام في السعودية او الخليج
5- المواطن السوداني البسيط ح يكون غارق في بحور السعادة والهناء والرضا .. هههههههه آآآآآمين
والله أعلم .... اللهم أجعله خير يااااااااااارب.
| |
|
|
|
|
|
|
|
|
|
Re: خير اللهم أجعله خير (Re: حسن مهدي)
|
ود المهدي يا حبيب ... يعني أحلامي الوطنية .. والرئاسية دي كلها ختيتها في الفول والعدس المساكين ديل ههههههههههههه .... اسعدني مرورك يا حبيب.
| |
|
|
|
|
|
|
| |
عثمان جاد الله بخيت
أسامة العوض
Hani Arabi Mohamed
حسن مهدي
مجاهد محمد الهادي
فيس بوك
تويتر
انستقرام
يوتيوب
بنتيريست