حفل خيري بالنادي السوداني – Hayward, CA لدعم السودانيين بالمعسكرات والتكايا
|
|
 مــــناجـــات ام
|
كان يوم منايْ
وكتين اشوفك ياجناي
فرحان وعايش فى هنا
فى الخمسة اوكات بدعى ليك
يتمنى واطلب ربنا
كان نفسى اشوفك ياجنايْ
بعد العذاب الشفتو انا
يتبللى شوقى وإستريح
اقعد واسكت ليك جنا
لكين بعادك طال عليْ
النوم وراك يسمنا
انا يانى امك ياجنايْ
مالو إن رجع جيت شفتنا
***
اطرا الوصية القتها
يومت مسافر مننا
يوم قت ليك خليك حريص
كوس الدروب الهيّنة
الغُربة ما فيها الحُنان
ولا ناس طويبين زينا
المولى يرعاك كدى بى رعايتو
وليك القواسى يهوِّنا
**
من كم سنة وانا فى رجاك
يا كبدى يا مصرانى انا
وبرايا فى ليل الهموم
شايفة العذاب والبشتنة
ارجع تعال خليك هنا
وافضل معانا وجنبنا
الفى نفيستك قولا ليْ
كان دار تعرِّس مننا
وكان ليك خاتر فى الهناك
إسعادك إنت يهمنا
***
إن شاءالله حيّة قبل اموت
عينيْ تشوفك يا جنا
القاك فى بيت العدل
من تانى يتلم شملنا
القاك يا باردالحشا
بى سرعة جيت فرحتنا
فى بيتك البانيهو داك
وفى ديوان ابوك الجنبنا
بى غادى قدام المسيد
فى ضُل تميرات جدنا
نتلمّ يوم عرسك كدى
وكل الحبايب حولنا
ناس روضة ناس بت احمدى
ناس ليلى ناس يوستنا
ناس هولة ناس ست البنات
ناس مسكة ناس حجة منى
ناس جارة ناس زينب على
حفصة وفطيمة وامنا
يتلمو بنوت الفريق
ساعة الرقيص والدندنة
ساعة الولاد واقفين صفوف
والفرع ميّس وإنتنى
وحدين دليبن بى هناك
وكلتوم تدندن بى هنا
ووحدين طنابيرن ترن
طول ليلن نازلين فى الغُنا
مبروك عليك ياولدى ليك
إن شاءالله بى عمراً طويل وسعد وهنا
وإن شاءالله عقبال للمعاك
ولى كُل ام والدى الجنا
|
|
 
|
|
|
|
|
|
|
|
Re: مــــناجـــات ام (Re: يوسف الحداد)
|
ليلا طويل فى الغربة عاد يا يمة
مابالحيل هو مر
وزول زى وليدك
ما اظن يقدر يطيقلو فرد شهر
الدنيا لعبت بى لعب خلتنى دايما مغترب
خلتنى هايم فى سراب
عميان كفيف ضالى الدرب
وكل اشوفو غريب غريب
قدام عيونى كتر كتر
يايمة وين درب الخلاص
انا كيف اسوى خلاص فتر
انا تانى عاد ما عندى حيل
ولا تانى شى اسمو ا لصبر
عدا نجيمات الصبى
وشرقا على شمس الكبر
وغابة مصابيح النهار
فى عتمة زى ليل القبر
ياهو النصيب ياهو القدر
ياهو اللى من يوم قمت جيت
فوق الجبين راقد سطر
**
حال الغريب فى غربتو
يا يمة ابدا ما بسر
تلقيهو بين ميت وحى
سكران وساهى بلا خمر
يحسب نجيمات المسا
لامن يبين خيط الفجر
ولامن تهل شمس النهار
سهيان وما جايب خبر
انا حالى ياها الحالة دى
من يوم بريت درب السفر
وانا حالى حال التابة
عاد يا يمة قولى معايا كُر
شوفيلى حل قبال اضيع
خلينى اعيش باقى العمر
ارجع اعيد ايام زمان
بين الجناين والتمر
اوعك تقوليلى انطلق
رحت ودخلتالك وكر
وبريت دريب امات براقع
البشبهن لون التبر
يا يمة والله العظيم
قولك دا فى البال ما خطر
نحن الجمال واهل الجمال
نحن السماحة بلا بدر
انا شن مخلى قليبى جامح
غير بنياتنا السمر
وانا وين معا سحر الطبيعة
الفى سهولنا سكا المطر
ما عقلى طاير من زمان
وقليبى من جواى فر
وا شوقى للاسمر وسادة
البى بعادا انا ماقدر
يايمة لو شفتيها كيف
بتقولى زيها ما ندر
عينيها واسعة بلاحدود
ضواى وشيها من القمر
نازلات ضفايرا بى عدل
فايتات نهيداتا البكر
والريم رقابا ان ما كضب
من جيدا انقص بى شبر
وخصرا مضمر يمة كيف
كان دار اوصفو ماقدر
| |
|
|
|
|
|
|
| |
فيس بوك
تويتر
انستقرام
يوتيوب
بنتيريست