|
|
 رسالة مفتوحة القلب الى ناهد بشير
|
يا ناهد سلام يغشاك
الليلة ابو غادة عندو مناسبة فى اهله و محمد وحسام مرقوا مع بنات خالاتهم قالوا فى مسرحية اسمها النظام يريد
مشيت وصلتهم وحسيت انى مابقدر ادخل معاهم اخلاقى كانت واجعانى شدبد ومعاها بطنى الغلت عليها بالكسرة
جيت راجعة البيت الصاااااانى و احزانى غلبتنى ....
غنيت لى غادة لمن قلت بس واستعدت مشهد محمد داخل المسرح مع نوسه وقلت حليل غادة لاخوها
الشيطان لعب بى جد يا ناهد ... نوسه مالها ماياها اختو واحمد اخوهو سادين مكان غادة وما مقصرين
لكنى افتقدتها شديييييد اللحظة ديك ... قلت حليل بتى التسند قفاى ..حليل بت البتشيل اخوانها معااااى
امانه الشيطان ماهو كافر ولعين
اتذكرتك واتذكرت انى كنت ناوية افتح ليك بوست اقول ليك تعالى يا بت امى
اقطعى قلب الناس هنا واحكى عن بنتك و ففضفضى ... امانه قلوبها ماها واسعة
و بتحمل ...تعالى اكتبى و اسندى رقبتك وحزنكم عليهم امانه ما شيالين تقيلة
خلى ود الصايم يقول ليك لاحولة والا قوة الا بالله
وود البشرى يقول ليك شيلى الصبر
يجيك كيكى بركبات الحزن يفككها ليك
تجيك الجندرية امانى بت امى تقول ليك
امى قالت ليك امسكى فى ربك و استعينى ببهو على الحزن
وتحكى ليك خبر العروس الماتت فى حضن امها فى نص البحر
وهن فى مركب
تجيك اشراقة تقول ليك بكتب ليك وعشانك
ويجينك بنات العباسى يعصرن معاك قلبك
ويجينك حنين للبلد و سارة اخوات ماهن هينات يقالدنك
وتجيك دينا خالد تقول ليك عاينى للايجابى وامسكى فى
قيقراوى يجيك فى نص بيتك ويشد من ازرك وبنات حيمورة ينعصرن عليك
يضرب ود ميرغنى من اليابان يباكيك ويقول ليك الصبر طيب
يجيك حيدر منقل من بلد طيرو عجمى يشد ايدك ويعزيك
تضرب ليك حليمة بت عبدالرحمن تقول ليك حزنن يهد الجبال بس ابقى طيبة
هو نان منو هنا الما بجيك ؟؟؟؟؟؟؟!!!!!!!!!
يجوك الناس من جم يعصرو معاك الحزن و يختو يدينهم خدرا بدورايسددو منابعه
كان يقويك
وتجيك تماضر طايرة من هناك تديك فرد نهره ..ترد ليك رشدك
بكرى يفتح ليك حوشوا و قلبو
والناس تتم الباقى
تعالى امانه هنا مافى اخوان واخوات
يا ناهد خربانة ام بناية قش .. غرار العبوس دار الكمال وناقص
دوبا حليل بناتنا ستات الفهم والراس
اعاين اقول نحمدالله شوفى الناس فى بلدنا حالم كيف
بناتنا قاعدات تحت ضل الخوف والوجع
والامان ودر والقلب مهزوز راجف من ازيز طيارات الموت
الامهات جنياتن بموتوا قدامن اشلاءهم تطاير
ياقى عليهن حرقة حشا و غضب غزيز
يقد روحهن قد
نحن يا بت امى حزنانات و حزنا مبارينا لمن نلاقيهن
الم ياتيك خبر الام فى دارفور مرقت للسوق جات لقت
قطيتها حرقانه ومعاها 3 من اولادها والكبير فيهن
حاضن الصغار تحتو بدور يحميهم
نشفو كلهم سوا ...
يا ناهد انا مرات بحس والله والله ما طالبانى حليفة بالخجل من الامهات ديل
وينا منهن ووينا من الدنيا
مافى موت فرادى ولا جماعى بخفف علينا
بس بنتعظ...لو اراد الله الموعظه
ونحن ماشين ووين و نهايتنا شنو
حليل مريومة ..مريم عبدالله... ما بعرفها لا بتعرفنى
ترسل لى تقول لى قولى غادة كبرت ونجحت و قرت و عرست وولدت
ياها ماشه على قبرها .. كل ابن ادم مصيره قبره
بتك يا سهام الله حباها واختارها لجنتو
قولى الحمدلله ..انت ياتو خير اكتر من الجنه دايراهو لجناك
الفراق حار
حليل غدويتى افرح بهناها حليل بتى اشيل جناها
دنيا يا ناهد وينا لينا وينا مننا
الله اراد واختار ولا راد لقضاء الله
كان صبرنا جبرنا وكان ما صبرنا كفرنا
نلقاهن وين سمحات الخلقة والاخلاق
الجنة دربها صعب ...يا امجد اخوى (او ولدى)
بس مافى حل غير نسوى ليهن السمح كان نلقى معاهن السمح
كنا دايرين نسوى سمح عرسن ..نحنن ونجرتقن
بس الله قال غير
اها كيف الدبارة
شن بنسوى يا بت امى
قالوا الصبر جبر
ما تسوى لى سوات حسام ولدى
قال لى ياماما الناس بتقول اصبروا
يعنى شنو؟؟؟
اكضب عليك يا ناهد ما عندى جواب
بس الناس هنا ديل جزء من الصبر
امسكى فى ربك وفيهم
تعالى اكتبى
ربنا يبارك فيك لمى حزنك مع حزنى وحزن حواء بت سليمان
وعفاف الصادق وكل حزين
قسمى الهم هو فى شنو غيرو
الناس ما ناقصه هموم همنا يا عملات محسن خالد
لا بوديهم الدكتور لا بحميهم العشا
وبققققققققدروا يشيلوا معانا
بخترهم (ياقول اهلنا)
ماهو مشحودين ولا مجبورين
الناس بالناس والكل برب العالمين
اعذرينى حاسة بيك وعاوزاك تستفيدى من تجربتى هنا
الكتابة بتريح و بتحسسك انك ما براك
والدنيا ناسها بخير
انا ياناهد برضو سكيت اقرأ واسمع عن حال الميت
والقبور حتى اسألى اخوى تمبس
كان بفتش معاى على الكتب الزى دى فى النت
بس ختيت الرحمن فى قلبى واستودعت غادة عند الله
ووداعة الله ما ها هينة
وان شاءالله امر بناتنا كلو طيب وسمح
يا ناهد الدرب طويل .. وكان غرقنا فى التفكير عن حالهن
الله عالم ما بنصل لشئ
الاحسن نحسن الظن بالله الرحيم
وهن عند ربهن رحيم عليهن اكتر مننا
املى قلبك بالكلام ده صدقينى
انا كل ما ازور غادة لمن اجى امرق
بقول ليهو يا ربى ما عندى غيرك
بتى خليتها فى وداعتك ارحمها وحن عليها
واجعلها فى فرح وسرور
بقول الكلام ده بكل قوتى و بكل ايمان الله وضعه فى قلبى
بطلع مرتاحة ..من ما ماتت ما حصل زرتها طلعت باكية
غير مرة واااااحدة شوقى ليها كان فوق احتمالى
امر الميت وامر قبره كان سعيد كان شقى عند عالم الغيب
ونحن ما عندنا غير نحسن الظن فيهو
نوكل امرنا لله ربنا يسعدن محل ما مشن
ويوسع عليهن قبورن
ويجعلهن مع الشهداء
ويجعل امهاتهن الصديقات والصحابيات
وانا بدعو برضو لغادة كل ما ازورها ان تكون فى صحبة
الزهراء و اسيا ومريم بنت عمران
قولى امين
وربنا يجمعنا بيهن فى جناتو
___________________________________
يا ناس اون لاين الليلة انطبق عليكم حال البلد وحالنا |(وحال المنبر)
طولوا بالكم
والبوست ده لناهد بشير كلموها و عزوها
يا ناهد البركة فيك واحسن الله عزءاك و جبر كسرك
وربط على فؤادك يا رب
الله يديك الصبر
ويعوض شباب بنتك الجنة
قادر يا كريم
|
|
  
|
|
|
|
|
|
|
|
Re: رسالة مفتوحة القلب الى ناهد بشير (Re: Siham Elmugammar)
|
يا سهام وناهد ..أخوات الألم والفقد وأخواتنا
ما عارفة أقول شنو ..لكن هي الحياة كدا لحظات تطول أو تقصر وبعدها خلاص
كثير ما بفكر ..أنه كيف نودع أحبائنا التراب وكيف ممكن الام مقلا تخلى بنتها أو الابنة أمها
لكن نحنا بنودعهم لله ..خالقهم ..
دي الحقيقة لازم يكونوا هناك لوحدهم بين يديه ..دورهم
واخنا دورنا جاي لا محالة
ليهم الرحمة ومغفرته وجنانه ولكن الصبر واليقين
| |
|
|
|
|
|
|
|
|
 Re: رسالة مفتوحة القلب الى ناهد بشير (Re: رشا سالم)
|
اللهم ارحم اختي غادة ووسع مرقدها ..
اللهم اجعلها ووالديها من اهل الجنان
اللهم قوي سهام وناهد ..
_____________________
عهدناك امراة قوية يا سهام .. صبرتي
واسرفتي في الصبر حد الايمان
لا تدعي الشيطان يقوى عليك ..
| |
|
|
|
|
|
|
|
|
|
Re: رسالة مفتوحة القلب الى ناهد بشير (Re: هشام كمال عبادي)
|
نعم
إنا لله و إنا إليه راجعون
لا حولا و لا قوة إلا بالله
والله ما عارفه أقول ليك شنو يا سهام
والله إنتي إنسانة قوية و قاعده تلهمي ناس كتار بي صبرك و عزيمتك
ربنا يجعلها في ميزان حسناتك
غايتو
ربنا يلزمنا كلنا الصبر و صالح العمل و الدعوات .
إنا لله
| |
|
|
|
|
|
|
|
|
|
Re: رسالة مفتوحة القلب الى ناهد بشير (Re: امجد الجميعابى)
|
روزمين...انقابو...رشا سالم...هشام عبادى ..حجة امنة.. امجد
تحياتى ليكم وتعالوا ننتظر ناهد فهذا البوست لها
اتمنى ان تستجيب
________________________________
كان ممكن ارد ليك فى الخاص يا ناهد لكن كتبت هنا
عشان تمرقى
يا ناهد امرقى وارجعى اكتبى
| |
|
|
|
|
|
|
|
|
|
Re: رسالة مفتوحة القلب الى ناهد بشير (Re: Ishraga Mustafa)
|
Quote: نوكل امرنا لله ربنا يسعدن محل ما مشن
ويوسع عليهن قبورن
ويجعلهن مع الشهداء
ويجعل امهاتهن الصديقات والصحابيات
وانا بدعو برضو لغادة كل ما ازورها ان تكون فى صحبة
الزهراء و اسيا ومريم بنت عمران
قولى امين
وربنا يجمعنا بيهن فى جناتو |
اللهم آمين ..
ندعو المولى الكريم أن يتغمد (غادة) و(هبة)..
وأن يعوضهما عن شبابهن الجنة..
وأن يصبركن .. (سهام) و(ناهد)
وأن يأجركن الله على هذا المصاب الجلل ..
وكل الإمهات اللائي فقدن فلذات أكبادهن ..
ولا حول ولا قوة إلا بالله
| |
|
|
|
|
|
|
|
|
|
Re: رسالة مفتوحة القلب الى ناهد بشير (Re: نصر الدين عثمان)
|
Quote: اعذرينى حاسة بيك وعاوزاك تستفيدى من تجربتى هنا
الكتابة بتريح و بتحسسك انك ما براك
والدنيا ناسها بخير
انا ياناهد برضو سكيت اقرأ واسمع عن حال الميت |
البركة فيكم يا ناهد ..وربنا يرحمها ويغفر لها ..ويصبركم ...واهلها ..
وانا لله وانا اليه راجعون ...
| |
|
|
|
|
|
|
|
|
|
Re: رسالة مفتوحة القلب الى ناهد بشير (Re: احمد محمد احمد عتيق)
|
يوم القيامة يقول الله عز وجل ياملائئكتي اقبضتم فلذة كبد عبدي .. ياملائكتي ماذا قال عبدي .. يقولون حمدك وقال انا لله وانا اليه راجعون .. فيقول ياملائكتي ابنوا له قصراً وسموه بيت الحمد ليلتقي مع
ولده في هذا القصر .
اسأل الله أن يجمعكم في الجنة ويرحم غادة ويسكنها فسيح الجنان ، فقد عظيم وقلوبنا معك اخت سهام تشاطرك لوعة الفراق
انا لله وانا اليه راجعون ولا حول ولا قوة الا بالله.
| |
|
|
|
|
|
|
|
|
|
Re: رسالة مفتوحة القلب الى ناهد بشير (Re: الحاج حمد الحاج)
|
سهام
لماذا قلبتي المواجع على ناهد؟
وعلى نفسك؟
وعلى كل من ذكرتي في بوستك؟
وعلى كل من قرأه؟
كل شئ يبدأ صغيراً ثم يكبر عدا الحزن.. فإنه يبدأ كبيراً ثم يصغر.. فدعيه يصغر..
رحم الله غاده.. وعوض صبر ناهد الجنة
ولا نقول إلا ما يرضي الله.. إنا لله وإنا إليه راجعون ولا حول ولا قوة إلا باله
| |
|
|
|
|
|
|
|
|
|
Re: رسالة مفتوحة القلب الى ناهد بشير (Re: Mandingoo)
|
الاخت سهام سلاماً حزيناً
دعواتى لبناتكن بالرحمه والمغفرة وان يجملكن بالصبر..
ارسلت لى الاخت ناهد وهى تعتذر عن عدم الكتابة هنا لفقدانها الباسورد ونلتمس من الاخ بكرى
بتزويدها بباسورد بديل، حتى يتثنى لها ان تكتب وان لا يحرمنا من حروف تاعزيزة ناهد..
هذا ما كتبت الاخ ناهد:
عزيزتي....سهام ....
لك الشكر علي هذا الاهتمام وهذه الرساله التي حملت مشاعر نبيله ..أكتب لك وأنا صابرة محتسبه راضيه
بما قدره سبحانه الخالق الباريء المحيي والمميت لا راد لحكمه ..واستغفره وأتوب اليه راضية بقضائه وقدره
وانا لله وانا اليه راجعون صدق الله العظيم .وقد قال تعالي في محكم تنزيله.... (ولنبلونكم بشيئ من الخوف
والجوع ونقص من الأموال والأنفس والثمرات وبشر الصابرين)صدق الله العظيم... سهام .......كان وقع الفقد
..انهيال جبال من الصخر علي أكتاف حياتي ..وطائر الليل الأسود يحلق أمام المدي البصري يمطر الحزن كثيف
الترنح علي رصيف تلك الليله وتتثاقل خطي اليوم التاريخ الساعه الدقيقه الثانيه لتصطدم جميعها بحقيقه راسخه
..أن تلك تخوم لا يعبرها مسافر عائد........ وأن الموت حقيقه ثابتة ..لا نملك أزاء وقعها سوي أن نلوذ بفاطر
السموات والارض وخالقنا دعوات وايمانا وهو يسترد أمانته ..ونسأله قبوله الحسن وتوسيع مداخل رحمته لفقيدات
العلم والشباب ونضار الملامح غالياتنا هبه وغادة ... ورفقاء طرقنا ... التي ننهل من مشارب عذوبتهم كلما
تمددت صحاري الرهق تحت أقدامنا..... .هبه ياسهام .....لا تزال أمام عيني ..تبتسم في مهدها ..تحبو تمشي
..تكبر حامله أقلامها وكتبها المدرسيه .وأحلامها الصغيره.....مررتى بتجربتى تلك مع غادة ...نعم.......
لقد حباها الله بذكاء متقد ...ملاحظ...مرئى ....واصطفاها عابدة ساجدة وكساها أدبا وعفه..ظلت كالنسمه هادئة
تعطر حياتنا ..وتهدينا صفاء الأسرة ..تنقلت بين مراحلها التعليميه ..بعقل حكيم وفكر وثاب ..مصطحبة جدها
واجتهادها بخطي الوثوق وطموح مشروع لمستقبل كنا جميعا نتوق اليه حاملين مشاعل الأمل حثيث الخطوات ..
أخضر التوقع .....نعم وغادة كذلك ........ هبه ياسهام .....ينبض داخلها قلب ..عامر بالتقوي والعطف ..وانسانيه
ذلك الفلب الحاني جعلتها تلتحق بكليه الصيدله ..من أجل أن يكون الدواء هو رابطها شفيف الأهداف مع الوطن
والمواطن ..وتفصح عن أمانيها العذبه بأن يكون لكل داء دواء باذنه سبحانه وتعالي....هكذا رغبتها ..هكذا ارادت ...
ولذلك سعت ...
سأكتفي بهذا القدرفالحزن الأكبر ليس يقال ..وأسأل الله أن يلهمنا اجتياز المرارات والمحن ..ولا أود أن أنكأ الجراحات
ولكنني اتضرع الي الله أن يرحم ابنتي الراحله وابنتك الراحله غاده وابن الزميل أسعد الريفي ليث ولكل موتانا الراحلين ..
وأعدك ..بالعودة الي الكتابه مجددا ..فالحزن النبيل ..هو دافع للكتابة وليس كما يتراءي لنا أحيانا بأن الحزن يقعد الكتابه
فالكتابه جمرة بين الأصابع باعثه للاتقاد والاشتعال والتحليق عبر فضاءات وآفاق وتحيه خالصه عبقه لكل زملاء وزميلات المنبر ....
| |
|
|
|
|
|
|
|
|
|
Re: رسالة مفتوحة القلب الى ناهد بشير (Re: Ehab Eltayeb)
|
سلام يا سهام
نقرأ ونحزن
نبكي
ونتوجع معاكم
ونصبر لو يفيد الصبر
لكن ما ماظن
ماظن يا سهام
سلام لي ابو الغادة
وارف معلق ميدالية غادة في غرفتو
وبباهي بيها الدنيا
وبوريها لي كل اصحابو من كل الجنسيات
وسلام يصل للعزيزة ناهد
| |
|
|
|
|
|
|
|
|
|
Re: رسالة مفتوحة القلب الى ناهد بشير (Re: خالد العبيد)
|
العزيزة ناهد تحياتى
البركة فيكم و احسن الله العزاء
والهمنا و اياكم الصبر الجميل
هذا ما كنت اوده انا اراك تكتبين
شكرا للاستجابة
وشكرا لحامل المسك صديق الموج
_________________________________
يا خالد العبيد كلم الولد ده قول ليهو تعليق براهو ما بينفع
يدو معانا فى المكتبة :)
| |
|
|
|
|
|
|
| |
Siham Elmugammar
rosemen osman
رشا سالم
حافظ انقابو
هشام كمال عبادي
امجد الجميعابى
smart_ana2001
Ishraga Mustafa
نصر الدين عثمان
محمد عبد الماجد الصايم
Shawgi Sulaiman
باسط المكي
الحاج حمد الحاج
Mandingoo
صديق الموج
Ehab Eltayeb
خالد العبيد
فيس بوك
تويتر
انستقرام
يوتيوب
بنتيريست