يا فاطنه صباحنا القيّل تحت الضليل الرامى منك شايل شمسو فى ايدو ومباريكى
وفرحنا الميّل مرق فات حد السكوت حاضن غناهو ويحكى عنك وسط البلد واقف يناديكى
يا فاطنة سألتك بى دم الروح المدفق نيل امرقى على الخلوق الشاته تشحد فى سماك الفوق مغطيكى
يا فاطنة ندهتك بى لسان شغفى الأساهو طويل فكى جداول إسمك المسحور واسقينا شوفى بلية الولد المرق مجبور ونادينا اربطى جبيرة الخاطر الدوام مكسور وداوينا نرسم ليك شمس محروسة بالأفلاك نلون ليك قمر فى حضنو رك ملاك نحلب ليك غنا الليل المحين ريد تشربى بى كفوفنا لما تتكفى وتنهلى من قلوبنا لما تدفى
يا فاطنة
هاكى الفينا فضل من غنانا بعد عشرق علينا الصوت وهاكى الدنيا مزروعة مستفه بالشدر والناس تسبح ديمه بى نونك لا بتفوت ولا بنفوت لا بتموت ولا بنموت هاكى رحيح ارواحنا كايسك يوت شيلى الباقى من فضلة منانا
يا فاطنة
راوى الحلة غناكى
بالفا فرح يغشاكى يملاكى بالأ أرض مكسيه بى خدرة بهاكى
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
أبوذر بابكر
فيس بوك
تويتر
انستقرام
يوتيوب
بنتيريست