|
|
 حــــال الــحــول
|
حال الحول ويا للهول
ولسة حُزنا زي ما هو
وياما وجعنا بيك بيطول
والجرح البسيل جوانا
زي ما تقول
همس صمت الخواطر قول
ولم الفرحة كان تنداح
بسيماتك تشع يا يمة
تملى الدنيا ضحكات
بالعرض والطول
***
وياللهول اذا فتشت ما لقيتك
يموت جواي حلم من صُغرى
متجلبط ليان طينك
وشايل من ندى جرفك
نضارة سُنبلة وقندول
ويا للهول عُقب ما والفك قلبى
وشرب من نهرك الصافى
وروى من نبعك المعسول
زرع روعة محاسنك خُضرة
فى جوف الصحارى شتول
ويا للهول اذا عطشان ورد زيرك
وضُل راكوبتك الهبّاب
ولقى كوز السبيل مرمى
يناهد بالعطش مكتول
وعارف لا بتجيهو سحابة
لا بتغشاهو غيمة هطول
***
يا للهول وحال الحول
وانا يا يمة لسه قعبكى
زي مهبول مجندّل
فوق رماد حُزنى
وعلى كتف الاسى محمول
افتش نفسى ما لاقيها
عارف إنى مصرور
فى طرف توبك
ومن بين الخيوط مسلول
***
ويا للهول إذا جا الليل
لقى عنقريبك فاضى
زي عاداتو ما معدول
وشاف فى كوز وضوكى ليان
وباقى ترابك المبلول
وحيران خلوتِك إندسو
جرجرو توب غُتاكى زهول
وتاوق جاي وعاين جاي
وفتش وكاس وما لقى زول
وياللهول إذا حاديتا طرف الدنيا
من تالا السما القُبلانى
اسأل عنك العابرين
ابحلق فى المدى المجهول
وأسأل نفسى
كيف يا أُمى إنتى هناك
ما بعرف ولا بعرف
ولا بقدر ولا حا اطول
***
دحين كان ود نصر لاقاكى
وكان قابلتى بت احمد
وناس يوستنا وميّاسة
ناس عثمان وسيد احمد
وناس عبد الرحيم وابزيد
وحوشة وستنور وحمد
ونور الشام حُجاالايام
وكل اهنّا والارحام
واهل الخوّة فى الاسلام
سلام يا أُمى ليكى سلام
اريتك إنتى عافية تمام
ومن هنى تانى لى قدام
كان حضرنى الله الحج
بحج ليكى عام ورا عام
ودا ياهو منايا والما مول
انا المسكين بقيت وحدانى يا أُمى
لاواصل ولا موصول
وحال الحول
***
يوسف الحداد
|
|
 
|
|
|
|
|
|
|
|
Re: حــــال الــحــول (Re: يوسف الحداد)
|
هيه يا حداد
نص موجع
وإن حمل الكثير مما جادت به (كنز الدنيا والآخرة/الأم)
ولاح غير خاف غرسها الجميل
في الدعاء بأن يمكنك الله من الحج عنها كل عام
مكنك الله من ذلك
وجعل الجنة مثواها
ومن ذكرت
تحياتي
| |
|
|
|
|
|
|
|
|
Re: حــــال الــحــول (Re: مجدي عبدالرحيم فضل)
|
إنها والدة الجميع
أكثر لها بالدعاء
ألا رحم الله تلك المرأة الفاضلة
التى أحسنت تربيتكم
نسأل الله أن يبدلها دارا خيرا من دارها
وأن يجعل قبرها روضة من روضات الجنة
اللهم ارحمها
اللهم ارحمها
اللهم ارحمها
وألزم ولدها يوسف الصبر والسلوان
تاج السر
| |
|
|
|
|
|
|
|
|
|
Re: حــــال الــحــول (Re: يوسف الحداد)
|
الاخ الشاعر ودالحداد
اولاً احسن الله عزاك ورحم الله والدتك
وغفر لها واسكنها فسيح جناته
يا اخى هوّن على نفسك واستعيذ من الشيطان
والله يا اخى قطعت قلوبنا
من ناحية اخرى والله قمة الابداع
لك التحية يا اخى والله يصبرك تحياتى ا
امين العبادى ..
| |
|
|
|
|
|
|
| |
بله محمد الفاضل
مجدي عبدالرحيم فضل
تاج السر محمد حامد
فيس بوك
تويتر
انستقرام
يوتيوب
بنتيريست