|
|
|
 Re: وجع الدوايه (Re: أبوذر بابكر)
|
Quote: وجع نومك
متاوقة البيوت
جيهة البحر
ريقك نشاف الأمنيات
همك مرق
من محاحاة البدايه
من درب الحروف الانسرق
من جوه من جمر السفر
ولامن مواعيد الحكايه
طارت بعيد
ركت على وش القمر
وتِلت التلاتة
الإنقسم
|
*** دعنى أصدقك القول أباذر
قد تكون هناك كلمات مموسقة بالنص
ولكن المؤكد خلو النص تماما من أبسط المعانى والقيم والصور
فادعاء الرمزية جرد روحه فأصبح مجرد رص .
مجرد راي أراه صحيحا وقد تراه غير ذلك .
*** عموما شكرا ونتمنى أن تدينا المباشر تووووووش
| |
  
|
|
|
|
|
|
|
|
Re: وجع الدوايه (Re: أبوذر بابكر)
|
Quote: ما اللمه ترياق الفراق
والنمه مقلاع الوجع
الغنية مخلاية الوئام
الضحكة بلسم لى الفزع
وشك مبحلق فى الشمس
حاضن نهارات السؤال
حسا مصنقع من أمس
ينده تساويف المحال
حلما هناك لابس الضيا
بهرج حقيقتك
وإنكسف حد الخيال
ويا طالع الأكوان
جيب لى معاك وصال
يربط يكفينا
يا خازن الأحزان
خلى الوجع ينشال
زح همنا الفينا
أملا المخالى أمان
اسقينا وادينا
حبة بشاره وفال
عرج على الحبان
خلى المحبة تجى
ترقص مع الموال
تدى الفرح شبال
يا خازن الأحزان |
شكرا أبا ذر ومع الفجرية
زحّيت همنا الفينا ومليت المخالي فرح
وسقيتنا النم مطر ولفحت فوقنا شبال نضما دقاق وفاتت عدت الأحزان
أبا ذر يا خازن الأفراح والشعر
محبتي
| |
|
|
|
|
|
|
|
|
|
Re: وجع الدوايه (Re: عبيد الطيب)
|
العزيز عبيد
شوفتك ذاتها
بشارة وفال يا صديق
ويا ريت كل المخالى تتملى
محبة وسلام
وكل الناس تسعد وتطيب
والبلد تتعلى كل يوم
ويديها الفرح شبال
كل المعزة والود ليك يا عبيد
| |
|
|
|
|
|
|
|
|
 Re: وجع الدوايه (Re: أبوذر بابكر)
|
Quote: همك مرق
من محاحاة البدايه
من درب الحروف الانسرق
من جوه من جمر السفر
ولامن مواعيد الحكايه
طارت بعيد
|
*** أشكرك أباذر على الشكر المابستحقو دا .
بس عايز أقول ليك حاجة الكلام الفوق دا أنا بالنسبة لى زي بعض الرسوم التشكيلية ديك
فتظل تسأل نفسك الزول دا صحى رسام والغلط فى ذوقك ولا ذوقك صاح و الزول دافاكيها فينا و بشخبت ساى .
فيا أباذر لا تتركنا لهكذا تساؤل إجابته قد تجعل منا أو منك خاسر .
لأنو الكلام الفوق دا أنا جبت المفك والزردية والشحم وعضيت ليك قميصي وفكيتو وااااحدة واحدة وحرف حرف ما فهمت حاجة
فى النهاية جدعت العدة ونعلت ليك ذوقى مية مرة لأنو فشل فى الوصول لأى نتيجة منطقية .
*** دم بخير وأكرر لك شكرى لتحمل فاولاتى الكتيرة دى .
| |
|
|
|
|
|
|
|
|
|
Re: وجع الدوايه (Re: الطيب عثمان يوسف)
|
تحياتى يا الطيب مجددا
كيف ياخى ما بتستحق الشكر
ده كلام شنو
كان ما على أى حاجة، بنشكرك على جيتك واهتمامك ونضميك معانا
عندنا فى البلد الزول كان جاييك فى تار ودم
اول شى بتضبح ليهو وتكرمو حتى تانى تشوف الباقى
فما بالك انت جيتنا زيارة سمحة والله
بعدين اصلك ما تشيل هم فى حكاية التذوق والفهم دى
خصوصا فيما يتعلق بالحاجات الأدبية والفنية من كل الأصناف
الناس طبيعى يكون ذوقها وميولها بتختلف
ومافى زى ما تقول معيار استاندرد بحدد الحاجات دى ويخت ليها مقياس معين
كل زول حسب استعداده ومكوناته المخلوق بيها
واكيد برضو بتكون جميلة مهما اختلفت من شخص للتانى
فى ناس بميلو ويحبو الاتجاهات السريالية زى حكاية الشخبتة الفى اللوحات الإنت قلتها
وفى غيرهم من انصار المدرسة الواقعية وفى ناس بفضلو الرمزية الخ
وما بنقدر نقول لأى واحد منهم انت كويس او انت كعب
لازم الزول يقدر ويحترم ذوق الناس وتفكيرهم وميولهم مهما تباينت واختلفت من العنده
والله كان نفسى افسر ليك او اشرح ليك جزء من النص المشربك ده
لكين الشعر بالخصوص بطلع من معنى الشعر لو الزول حاول يفسره او يشرحه
ده ما بيعنى انه الكلام ده كله ما عنده موضوع او غرض معين انكتب ليه وعشانه
لكن أنا بفضل انه أى زول يقرأ يفسر زى ما الكلام بوصل ليه
وعموما رمزية الدلالات والمعانى واستخدام مفردات بطريقة مختلفة وبغير الطرق الإتعرفت بيها عند الناس، دائما بتخلق الفرق بين الشعر والكلام العادى
| |
|
|
|
|
|
|
|
|
|
Re: وجع الدوايه (Re: الطيب عثمان يوسف)
|
الاستاذ ابوذز
التحيات الغوالى لك اينما كنت ..
أعجبنى العنوان ( وجع الدواية ) ثم دلفت الى الداخل لأرى كيف تتألم الدواية
وجدت الترميز عالياً مما صعب على فهم الشاعر وماذا يريد أن يقول , لست أدرى هل العيب
منى أم من كثرة الترميز .
فى ذات القصيدة هنالك جماليات أعجبتنى جداً مثلا
Quote: مِرِق المودة الإنكسر
فرحا يدافر ما فتر
|
و
Quote: واللوحة تتحدى السكوت
ترقص تصفق بى قفاك
|
و
وهنالك الكثير ..
يوما ما سألت الشاعر الراحل حميد حسن سالم طيب الله ثراه
فى قصيدة ( بينى وبينك ) والتى يقول مطلعها
كل ما تباعد بينا عوارض .... كل ما هواك يا طيبة مكنى
تلد الغربة القرب الواحد.....وبيكى اسمى الشوق وأكنى
لما افوتك من دون خاتر.... او دون خاتر منى تفوتى
قلت له ما ذا تعنى بالقرب الواحد..؟
قال لى انا شعرى ده واضح ومفسر نفسو ..
نعم كان هذا حميد حتى فى أحلك الظروف ايام ظلم العسكر له
كان حميد عندما يذكر ( ألْمِى ) كان يقصد الماء ليس غيره ’
لذلك سهل علىّ حميد حفظ الكثير من اشعاره دون عناء ,
انا هنا يا استاذ ابو ذر لا أقصد المقارنة فقط عنيت أن كثرة
الترميز احيانا ياتى خصما على القصيدة . مع ذلك القصيدة جميلة فى نظرى
والتمكن الشعرى والمقدرة فى مطاوعة الحروف وانتزاع الصورة من متععد واضحة
بعد هذه ( النقة ) الكثيرة قد أكون مخطئأ فى ماذهبت اليه لانى مجرد هاوى للشعر
ولست ناقداً متخصصاً وختاماً لك ولمعقبيك وزوارك
قواسيب من الود
| |
|
|
|
|
|
|
|
|
|
Re: وجع الدوايه (Re: الصادق سيكا)
|
كيف الحال يا الصادق
واريتك طيب
وشديد وسعيد
فعلا الإحالات الرمزية الكتيرة مرات بتكون عائق وحاجز عند المتلقى والقارئ
لكين نسوى شنو عاد
جميل والله قرايتك لينا دى يا الصادق
وده المهم طبعا
تعرف
الواحد كده بقى زى مجبور يخش شويه فى المباشر زى ما قال اخونا الطيب عثمان
وكمحاولة لإزالة قليل من الغموض والتدسدس الفى الكلام
ممكن اقول ليك ولأخونا الطيب برضو انه الموضوع الأساسى للنص هو الوطن كإطار عام
ومعاه بتدخل وتتشابك رؤى ذاتية او شخصية للكاتب نفسه
وفى جوه الإطار العام، برضو داخل موضوع انفصال الجنوب
مافى تصريح طبعا مباشر للموضوعين، لكن ممكن تستشف وتلقى اشارات ومعانى دلالية ورمزية فى كم موقع من النص
يعنى مثلا زى
تلت التلوت القالو واحد وانقسم
وزى اشارة
لون الكحل والحليب والمعنى المجازى الفي الكلمتين
كان ممكن طبعا الزول يخت شوية هوامش مع النص عن موضوعه او الغرض المطلوب توصيله
لكن الضرورة الشعرية مرات بتمنع، وحاجات تانى برضو كمان
كده يخيل لى ممكن يكون فى شوية تفسير للغموض وللمعانى المستترة المدسوسة، ولو فى الحد الأدنى
بعدين تعال ياخ
نحن وين والحبيب حميد وين
نحن فى الثرى
وهو فى الإكليل
زى ما قال شيخنا عمر البنا
ان شاء الله نكون جزء من جزء من حميد
وليك السلام كله
وكل العطر الفى التحية يا الصادق
| |
|
|
|
|
|
|
|
|
|
Re: وجع الدوايه (Re: أبوذر بابكر)
|
Quote: وجلد الشدر
مدبوغ رقد
نضمى البشر
ملدوغ شرد
هوى يا بشر
خلو النضم
نادو الفكى
قصو الأتر
الداهية وين ؟ |
دي ديباغ قرض عديل
شكرا أبوذر بابكر علي دعاش النصم
،،،،أبوقصي،،،،
| |
|
|
|
|
|
|
|
|
|
Re: وجع الدوايه (Re: مجدي عبدالرحيم فضل)
|
تحايا وسلام
يا أباقصى
جلد الشدر اندبغ بقرض الخوف
الخوف من هواء الحاضر المر
والمستقبل الأغبش
مع حضور الأمنيات المتوثبة دائما
وما بتفتر
شكرا يا مجدى على الطلة
| |
|
|
|
|
|
|
|
|
|
Re: وجع الدوايه (Re: أبوذر بابكر)
|
بخصوص استخدام الرمز وما يحيط بالنص، أى نص، من غموض او عدم وضوح نسبة لإستخدام تراكيب تجريدية واستعمال احالات سريالية، وعطفا على مشاركة الزميلين الأخوين الطيب والصادق
بالنسبة للرمز فى الشعر، بنلقى فى النتاج الشعرى الحديث والقديم كمان، زى ما هو عند أبى تمام وهو رائد التجديد وابتكار المعانى المستحدثة ، لكن فى استعمال الرمز الكتير البناقض الرمز نفسه، وكتير ما يجى او يدخل فى القصيدة كمجرد تسمية او مجرد اشارة او لفظ فقط، لأنه الرمز لو ما نقل القارئ بعيد من تخوم القصيدة وبعيد عن نصها المباشر، ما ببقى رمز
ليه؟
لأنه الرمز هو البتيح لينا نتأمل شى تانى مغاير قاعد خلف النص، والرمز هو معنى خفى وايحاء، وهو اللغة البتبدا لما تنتهى لغة القصيدة، وهو القصيدة البتتكون فى وعى القارئ بعد قراية القصيدة، وبدل ما يكون عامل فى خلق الغموض بتحول لإضاءة فى وجود النص المعتم
وربما دخل الرمز لعوالم الفلسفة والماورائيات الغير واضحة، وخلق فضاء من الغموض فى النص الشعرى، وفى الخصوص ده يقول شيخنا "ادونيس" فى كتابه "زمن الشعر" صفحة 173/174، الطبعة التالتة 1983، دار العودة ببيروت/ يقول
الفلسفة لم تكن نظاما ولم تكن مذهبا أى انها لا تقدم لنا العالم فى مجموعة من العلاقات المنطقية والعقلية بل تقدمه فى توهج الحدس والرؤيا، وفى توهج الفلسفة كما كان يفهمها هيراقليطس مثلا أو نيتشه أو كما يفهمها اليوم هيدغر
والفلسفة هنا شعر
إنها كا يقول نيتشه امتداد الغريزة الأسطورية، والشعر والفلسفة هنا شئ واحد، انهما نوع من الابتكار الأسطورى
والشعر بمعنى آخر فلسفة من حيث انه محاولة لإكتشاف او معرفة الجانب والمعنى الآخر من الأشياء، أى الجانب الميتافيزيقى كما نعبر فلسفيا، كل شعر عظيم لا يمكن من هذه الزاوية وبهذا المعنى إلا أن يكون ميتافيزيقيا
الصلة اذن بين الفلسفة والشعر قائمة فى كل شعر عظيم
والسؤال لا يجوز أن يتناول إلا كيفية هذه الصلة، أى كيفية التعبير لدى الشاعر
انتهى كلام ادونيس
وبالنسبة لإستخدام الرمز فى الشعر، فى مقولة وموقف شهير لأبى تمام ومعروف انه اكتر شاعر تعرض للنقد لأنه جاب واستخدم اساليب جديدة وطرق مستحدثة فى الوصف الشعرى وخلق الصورة والتشبيه، والقصة وردت فى كتاب اسمه "الأسس الجمالية فى النقد العربى" تأليف عز الدين إسماعيل، صفحة 186، طبعة القاهرة سنة 1955
قالو انه واحد سمع بيت ابى تمام البقول
لا تسقنى ماء الملام فإننى – صب استعذب ماء بكائى
شال ليه وعاء قالو ومشى عشان يسخر من ابى تمام وقال ليه
عليك الله ادينى شوية من ماء الملامة ده فى الوعاء ده
ابو تمام قال ليه
ما بديك موية الملام دى الا تمش وتجيب لى ريشة من "جناح الذل" وكان قاصد طبعا الآية الكريمة "واخفض لهما جناح الذل من الرحمة"
عايز يوريه ويوضح ليه طبعا انه استخدام الرمز فى اللغة معروف وممكن ومتاح وجميل كمان حتى فى القرآن الكريم كلام ربنا
الكلام كتير اكيد
بس المجال ما مناسب كتير للطرح
| |
|
|
|
|
|
|
| |
أبوذر بابكر
الطيب عثمان يوسف
عبيد الطيب
الصادق سيكا
مجدي عبدالرحيم فضل
فيس بوك
تويتر
انستقرام
يوتيوب
بنتيريست