اغنيتي المفضلة .. امس غناها الاستاذ/ عمر بطلب خاص جدا .. وبمزاج عالي جداً
ياخي صلاح حاج سعيد دا زول ما عادي .. لكن بس جهجه باكاتنا في (الحزن النبيل) بي:
ندمان انا؟ ابداً وحاتك عمر ما شلت الندم!
لأول مرة اعرف انها هي كدا (تساءل .. ورد) بعد شرح عمر خليل وناصر الليندي .. ومشاركة ابو ذر النضيف لانها لا تستقيم هكذا (ندمان انا ابدا وحاتك عمري ماشلت الندم) زي ما كنت شايفا زمان!!
باسم الحاضر والمستقبل ست الدار بت احمد قالت: ليك يا الزين ود حامد شوقنا اما بعد، المبعوتة المنك ... وصلت ورح فكيت الطلب الفوقنا باقي الدين يالزين خلصتو قدر الفاضل مصروف راشد والتومات والجايات من جاي لا جاي زي ما قت لك قبال ده شهر اتنين حنطهر راشد شهر اتنين المدرسة تأجز الله يبعد العارضي تجينا وراشد حالف ما يطهر الا ابوهو وعمتو تحضر ...
"اولادنا هنا بغنوا لمصطفى .. واندادهم في السودان بغنوا "حرامي القلوب تلب"
التحية لعمر خليل .. عاطف انيس .. محمد عجبنا .. صلاح كوستي .. وكل العقد النضديد وربنا يرحم مصطفى سيد أحمد، وحميد .. ويطرح البركة في ذريتهم واصدقاءهم ومحبيهم
نعم يا قيقا الصدفة وحدها ساقتنى الى هذا الرائع الذى عنونت به هذا البوست فى الحقيقة كنت أبحث عن أشعار القدال .. وكعادتى دايما فروم تايم تو تايم أحب أن استمع الى هذا القدال رغم أنى أحفظ الكثير من أشعاره لكنى أحب أن أسمعها منه باعتبار انو القول سمح من خشم سيدو .. ومنها دلفت الى أغنيات مصطفى سيدأحمد فوجدت هذا المبدع يترنم برائعة صلاح حاج سعيد (قمر الزمان )
04-07-2013, 10:47 PM
الصادق سيكا
الصادق سيكا
تاريخ التسجيل: 02-26-2013
مجموع المشاركات: 640
Quote: وجدت هذا المبدع يترنم برائعة صلاح حاج سعيد (قمر الزمان )
قبل ان استمع اليه كنت اظن من الصعب أن يأتى شخص ويستطع تقليد ابو السيد حتى قريبى عاطف أنيس كنت أعتبره مشوها لابو السيد وخصوصا انه أول من بدأ يقلده . لكن هذا الرجل بهرنى ’ كنت أغمض عيناى وأنا أستمع اليه ’ تذكرت يومها وانا (جاى من البلد جديد فى البندر ) ألبس جلباباً وأنتعل مركوبا جديد يسمونه الفاشر , تنبعث منه رائحة القطران وعمامة أغطى بها رأسى وجميع وجهى الا عيناي , أن وجدت فنانا يقال له مصطفى سيدأحمد وهويغنى فى حفل بالصحافة مربع 25 باغنية السمحة قالوا مرحلة . عجبتنى الاغنية ورقصت رقيصاً كان مختلفا من رقيص أهل الخرتوم وكنت أقصد ذلك بحجة أن اهل البندر يهزون اصلابهم ولايجوز لقروى مثلى أن يفعل ما يفعله ( كارب صليبو ) هكذا كنا نسمى من يلبس البنطال . بعدها علمت ان رقصى كان أشتر ومخالفا لقواعد الرقص بالمدينة رغم أن الجميع كانوا ينظرون الى وهم مبتسمون او ربما كانوا يضحكون ,وكنت قد حسبتهم استحسنوا رقصى . كان ذلك هو اول يوم رأيت الاستاذ مصطفى سيد احمد وقد أحببته كثيرا لدرجة أننى اذكره كثيرا فى خطاباتى التى أبعثها للبلد بمناسبة أو بدونها ثم بدأت بعد ذلك ألاحقه اينما غنى فى العاصمة التى كانت مثلثة.
Quote: ثم بدأت بعد ذلك ألاحقه اينما غنى فى العاصمة التى كانت مثلثة.
نعم يا صديقى صار ابو السيد من يومها هو فنانى الاول وما كنت أظن أن هنالك من يأتى بعده ويلقب بابوالسيد الصغير منا جرت العادة , الا أن هذا العمر أدهشنى حقيقةً عندما وجدته مصادفتةً وهو يغنى رائعة صلاح حاج سعيد( قمر الزمان ) . هذا المبدع أجد فيه من ريح أبو السيد الكثير الذى يسد رمقى ...
04-07-2013, 11:36 PM
الصادق سيكا
الصادق سيكا
تاريخ التسجيل: 02-26-2013
مجموع المشاركات: 640
Quote: باسم الحاضر والمستقبل ست الدار بت احمد قالت: ليك يا الزين ود حامد شوقنا اما بعد، المبعوتة المنك ... وصلت ورح فكيت الطلب الفوقنا باقي الدين يالزين خلصتو قدر الفاضل مصروف راشد والتومات والجايات من جاي لا جاي زي ما قت لك قبال ده شهر اتنين حنطهر راشد شهر اتنين المدرسة تأجز الله يبعد العارضي تجينا وراشد حالف ما يطهر الا ابوهو وعمتو تحضر ...
كم أنت رائع يا فتح الرحمن كما عمر خليل .عمر خليل ربما أخذ شيئاً من نفس أبو السيد والذى ذكرنى بالسامرى الذى أخذ قبضةً من أثر الرسول عندما صنع لهم العجل ذو الخوار . لكن روعتك يا فتح الرحمن كانت تكمن فى هذا الخيط وتجلى ذلك أكثر حينما دلفت على حميد وبدأت تقرأ لنا رسائل ست الدار بت أحمد جابر الذى صاغه حميد بطريقة تجدنى أعجز فى وصف سلاسته وروعته اذ يقول والا يجيبو الغنايين شان الشوق بت سرنا ترقص قلنا نجيب المداحين طنطن .. انا جاى من الحج وعارف راشد لما يطنطن كل الدنيا الفيى تطنطن غايتو بشر بس ربو يهون ما كامتك بالتومات اول البارح جنى يرطنن قالن نحنا الخواجات بسم الله مرق حصلت لقيتلك جعفر زارد البيت بالخواجات يبقى حداشر وخواجية
Quote: حتى قريبى عاطف أنيس كنت أعتبره مشوها لابو السيد وخصوصا انه أول من بدأ يقلده .
حرام عليك!!!
الظاهر انو انطبق عليك المثل (زامر الحي لا يطرب) عشان هو قريبك ساي! عاطف انيس فنان مكتمل .. في تقديري الضر مشواره الفني قصة الهجرة المبكرة دي بس ما اكتر.
الاستاذ/ عمر خليل خريج المعهد، واوسم الصامدين في البلد المنكوبة ديك
---------
استاذ/ عماد انيس برضو قريبك؟
كان معان في ضهاري المملكة .. الحفر (حفر الباطن)
04-07-2013, 11:58 PM
الصادق سيكا
الصادق سيكا
تاريخ التسجيل: 02-26-2013
مجموع المشاركات: 640
انت لمن جيت البندر .. في القصر الجمهوري -المبنى الفي شارع النيل .. جمب المنتزها- داك كان الساكن فيو منو!؟
قيقا حبيب ألبى ... انا لما جيت البندر لم أكن أدر أن بالخرتوم قصرأ جمهوريا ً دعك من الذى يسكن جواره ...!! انت عارف يا قيقا كنت كلما أشوف بيت سمح ونا جديد أقول فى نفسى أكيد ده بيت الرئيس .. وعندى قصة طريقة جداً مع الرئيس ربما سأحكيها فى يوما ما .. لكن يا قيقا عاطف أنيس ابدا ما فيهو ريحة مصطفى بالنسبة لى زى ما شاميها فى عمر دا وعاطف قريبى وهو فنان كويس بس المشكلة راجل كسلان جدا ما قدر يحفر اسمو فى خارطة الغناء مع انو صوتو جميل. طبعا يا قيقا اسمو الحقيقى عاطف حسن اسماعيل وانيس دى ما عارف جات من وين لكن اكيد جات ايام الدراسة .
اخوي الاصغر مني اسمو (محمد الامين) اسم واحد دا .. حريف كورة .. ومشهور زملانو يعكمونا ليك انحنا زاااااتنا بي (ود اللمين) دي!
نعم يا قيقا وعندو اخوهو الصادق فى ليبيا وهو برضو عازف بتاع اورقن عاى ما أظن .. طبعا اسماعيل ده رسام وقصة زواجو كانت طريفة .. ههههههههههه قلت لي انت برضو شبك فيك وداللمين ..؟ تعرف يا قيقا مع النضارة دى لو كنت عندك صلعة كان وداللمين ده بنطبق عليك مع تحياتى لود اللمين وكل صاحب صلعة وعلى راسهم بكرى الريس
قيقا ياريت سيرة ذاتية عنو ولو مبسطه .. الزول ده فى وشو الطيبة مشرورة ومدفقه .. انا طبعا لاول مره اسمع بيهو قبل ساعات من كورة المريخ كنت حايم فى اليوتوب زى ما ذكرت ليك.. لاحظت فى الصور دى عندك واحده فقط شكلك كنت بتصور لانك ظهرت مره واحده ..
العزيز فتح الرحمن قيقراوي مساء الورد ومبروك اولا على المعرف الجديد وعقبال عشرة الف مشاركة لوووول
تحياتي يا ملك ومشكور جدا على الصور الجميلة والتوثيق وارجو من جميع الحضور المساهمة في رفد البوستات بالصور كانت ايام جميلة فقد كنا محظوظين بالمجموعة بزيارة المبدع عمر خليل وقد كان اضافة جميلة الى كوكية المبدعين بجدة ومنهم عضو البورد المبدع محمود مصطفى والمبدعين محمد عجبنا و حسين الفكي وزيادة النور من اعضاء مجموعة اصدقاء ومعجبي الراحل المقيم وشكر خاص جدا ايضا لمجموعة الموسيقيين على جهودهم المستمرة واقتطاعهم لاوقات غالية من اجل البروفات وتجويد العمل.
قيقا ياريت سيرة ذاتية عنو ولو مبسطه .. الزول ده فى وشو الطيبة مشرورة ومدفقه .. ----------------------------------------- سلام يا الصادق وقيقراوي اعرف عمر منذ فترة طويلة شاركتهم السكن لفترة في داخلية الكنيسة ايام دراستو في كلية الفنون وعمر تخرج من كلية الفنون قسم التلوين ثم تزاملنا وعملنا في التدريس في مدرسة الخرطوم العالمية تركت انا السودان وهاجرت وزرته قبل فترة في نفس المدرسة واصبح رئيس قسم الفنون عمر من اولاد الابيض وفنان جميل وصديق عزيز طيبتو المشرورة دي من فدوى سيد احمد زوجتو ! هدت فوقو .. وهم الاتنين ثنائي تشكيلي جميل لكم المحبة
Quote: وعمر تخرج من كلية الفنون قسم التلوين ثم تزاملنا وعملنا في التدريس في مدرسة الخرطوم العالمية تركت انا السودان وهاجرت وزرته قبل فترة في نفس المدرسة واصبح رئيس قسم الفنون عمر من اولاد الابيض وفنان جميل وصديق عزيز طيبتو المشرورة دي من فدوى سيد احمد زوجتو ! هدت فوقو .. وهم الاتنين ثنائي تشكيلي جميل لكم المحبة
---------
وفي دروع تانية من زملاء كلية الفنون:
محمد دهب - مواهب سيف اليزل - فتوتا
04-10-2013, 09:39 AM
Mahmoud Mustafa Mahmoud
Mahmoud Mustafa Mahmoud
تاريخ التسجيل: 11-26-2004
مجموع المشاركات: 4325
سلام يا فتح الرحمن وضيوفه الكرام. معذرة على الدخول المتآخر. وشكرا على البوست الإحتفائي فقد شدني إلى ماضي ذكريات صادقة وجميلة وصديق مفعم بالرقة والاحاسيس النبيلة: عمر خليل. زاملته وشقيقه طلال في منافسات دوري التنس بالابيض، ثم في منتخب الابيض وبطولة الجمهورية في منتصف الثمانينات. ولم يكن بدأ الغناء آنذاك بصورة رسمية، ولم يكن يعرف بموهبته الغنائية سوى دائرة مقربة وضيقة من اصدقائه، ذلك انه كان خجولا - واظن أن هذه الصفة لا زالت تلازمه. بدأ بترديد اغنيات بوب مارلي في بيت خالته ومعه إبن خالته فارس احمد علي بقادي الذي كان عاشقا لبوب مارلي حد إرسال الشعر المجدل، كما يفعل اهل الراستا، كما كان عازفا بارعا على الجيتار والعود، وفي بيت خالته تعلم عمر العزف على آله العود واجاده في فترة وجيزة، وكان منزل آل بقادي، في حي القبة غرب، من اول المنازل، من بعد منزل آل العميري، التي طبقت فكرة جلسات الإستماع والقراءات النقدية، والتي إبتكرها الراحل مصطفى والشاعر يحي فضل الله لتوصيل الرسالة الفنية "الصرفة" بعيدا عن فلتر الاجهزة الرسمية ودوغمائيتها، وأظن بأن جلسات الاستماع المصطفائية تلك كان لها دورا محوريا وتاثيرا في ذائقة عمر الفنية وإختياره في فترة لاحقة التغني بلونية ونكهة مصطفى. صعد عمر لاول مرة إلى المسرح في مدرسة الابيض الثانوية في حفل تخريج دفعة 1987. وكانت اول اغنية اداها بمصاحبة الاوركسترا هي " ماضي الذكريات" والتي أداها بصورة شغفت القلوب ورجت الوجدان حضور تطريبي وتفاعل معه الحضور بصورة مدهشة، وعندما وصل إلى مقطع "رميتني في نيران صدودك" كانت المشاعر قد بلغت مرحلة اللهب والنيران ومفاعل تشرنوبل! التحية لك مجددا وعبرك للصديق عمر..
يا قيقراوي ا يا صديقي ، الناس ديل تبعلك ولأ نوقم نرش من طرف؟!!!! الصادق سيكا كتب:
Quote:
تخيل يا قيقا قبل كورة المريخ بى ساعتين كنت بستمع ليهو فى اليوتوب .. بالصدفة لقيتو والراجل بجضم ابو السيد طبعاً اول مره اسمعو راجل فنان جد
حرام يا الصادق ، و الله حرام ، انتا عارف انا كنت وين ؟ .. كنت بسمع في غنا لو يقدر بجمعنا بي زول فنان سوداني اسمو الطاهر بشرى ( عارف يا الصادق ، و قدام الخلق ده ، الزول د بيعرفوهو و مابيسالوا منو منو؟.. شاعر اسمو الصادق الرضي ، و شاعر اسمو عاطف خيري..!!!!.. اما موضوعي معاهو شنو؟ مش مهم...(تصدق خالد كودي الوحيد الفي المنبر ده عارف البير و غطاه,, و ما عندنا بيهو شغلة..!!!!)
حلياك يا الصادق.. يازول انتا جادي في حكاية انك أول مرة تسمع عمر خليل؟؟... هل تصدق يا الصادق؟.. ولا ح تبقى زيك و زوي نخبة البنادر الوهم..و تقوم بكرة تودينا في امطرقا عراض؟... اول مرة.. كانت يا الصادق ، في مدينة لأبيض ...في حي كريمة (لاحقا صار اسمو المهدية شرق)... بنات عمي كان ابوهن عامل ولا موظف في السكة حديد ،لا ادري بالضبط ، و لكن كل ما اعرف انو كان شغال سواق قطر (الرفاق بتاعين الحزب الشيوعي تابعوا معانا...!!)...في سكك حدي غرب السودان ، و انو كان عازف جيتار...(مرة كنت معاهو في سنة 1999.. ف حدائق ابريل..و الجكس يشيل و يسلم عليهو ، لاحظ الفرق بينا كان 15 سنة ، و انتظرت تلاتة ساعة عشان اكتشف انو في شبه كبير بينو و بين عبد القدادر سالم...!!!المهم يا الصادق ، في سنة 1988 و 1989 ولا 1990 .. ما اقول ليك .. كانت اول حفلة احضرها لهذا الشاب.. في حي كريمة ... الذي صار فيما بعد حي المهدية شرق في مدينة الأبيض..!!!! في سنة 1991.. كنت ف مدينة كوستي و كنت بسمع صوتوا ، و كان بيادي حفلات بالإشتراك مع صلاح كوستي ،ولو ناس كوستى يجوا هنا... كنت بسمع عمر خليل بيغني: بعد ما عز المزار.. عارفني منك ، لمحتك..!!! و كان ، عجب قيف النيا بيتضامن معاهو ، و تقوم انت العاشق المعذب تتعذب عذاب قبورة..!!!! عشان كده لمن سمعت أخهونا محمد عجبنا ، و انس منو كده ما عارف... كنتا دايما بقول الشيوعيين ديل جنو ولا الموضع فعلا اتجاوزهم و بقى موضوع هامش و مركز؟....
حتى اليوم يا الصادق ، انا حضرت حفلات حية لمصطفى سيد احمد.. تلاثتة أحس بهم اقرب للرجل: فنان من مدينة ألأبيض.. سمعتو في سنما الدلنج 1989..و اتحدثت معاهو.. و قام انزعجت لمن قلت ليهو صوتك بيشهبه مصطفى سيد احمد.. فام اعرض عني و قال لي عبارة وحيدة جارحة: مصطفى حاجة واحدة و ما بتتكرر ، و البيقول غير كده يكون وهمان...!! (اغرب حاجة الزول ده عسكري من سلاح الهجانة ، هو مايعرف بالقيادة الوسطى.!!)..و هذا الفنان كان اسمو عبود؟؟؟و الصوت الثاني.. هو صوت عمر خليل هذا ، و الصوت التالت.. هو صوت صلاح كوستي... اما محمد عجبنا و انس منو كده ما عارف.. فديل ما عندهم أي علاقة بي مصطفى .. اللهم الإ كن تحنيك شيوعييين ساكت..!!!!
كبر
04-10-2013, 10:40 AM
Kabar
Kabar
تاريخ التسجيل: 11-26-2002
مجموع المشاركات: 18537
قيقراوي..حبابك ليك كل المحبة في سانحة التذكر الشماترة دي ( باقي اليومين ديل العالم في ام سودان بيتذكر ليك من سنة 20000 و انت حاي.. شعب قال لييك ما داير تذكر كلو كلو..!!!!)
Quote: اما محمد عجبنا و انس منو كده ما عارف.. فديل ما عندهم أي علاقة بي مصطفى .. اللهم الإ كن تحنيك شيوعييين ساكت..!!!!
تصحيح معلومة .. محمد عجبنا عز العرب زميل دراسة -على وجه الدقة سنيرنا في بزنس، تقريباً دفعتك او البعدكم- ومن كوستي .. ود هامش بأي حساب تحسب بيهو هامش المحبة وليس له ادنى علاقة بالحزب الشيوعي، ومنظماته، وروافده وفروعه .. ولا حتى بالسياسة من اساسو!! تصدق؟
المرة الوحيدة الممكن تقول فيها انو مارس موقف سياسي واااضح، في استشهاد طارق .. ودا موقف انساني بالدرجة الاولى .. حيث لا حياد ول شنو؟
الاذواق بتختلف .. والا لبارت السلع الثقافية
هو مجوّد ومجتهد، ومطور للموهبة بالعلم .. وكان منتمي لمركز شباب بحري اثناء الدراسة. ياخي كان في واحد كدا معجب بيو بجنون -زي علوب كدا- مرة ذات شجنٍ وطرب قال ليو لا فض فوه: والله يا عجبنا ما ناقصك الا شنب كبير .. وفشل كلوي بس!!
---------
يا حوتة يا فنان ..
ياخي انت محلفينك قسم .. ما تمشيها .. المافي شنو؟ ياخي دا الدرع الاول .. قبل التصويب الدرع الاخير مااااا صورتو انا والصورة التانية -المدغمسة- ما بتوضح اسم المهدى لها (فدوى سيد احمد) كويس
غايتو ربك رب الخير الهمني ليك مطة ذمتي اللستك دي لحدي هنا .. قلت امكن تمر في الوهم ديل لكن ماذا نفعل مع الحالفين لينا قسم من جنسك ديل!؟
Quote: ثم تزاملنا وعملنا في التدريس في مدرسة الخرطوم العالمية تركت انا السودان وهاجرت وزرته قبل فترة في نفس المدرسة واصبح رئيس قسم الفنون عمر من اولاد الابيض وفنان جميل وصديق عزيز طيبتو المشرورة دي من فدوى سيد احمد زوجتو ! هدت فوقو .. وهم الاتنين ثنائي تشكيلي جميل
والزمن ده كلو كان غاتس وين ..؟ أم أنا الكنت غاتس وين ...؟
04-10-2013, 02:05 PM
الصادق سيكا
الصادق سيكا
تاريخ التسجيل: 02-26-2013
مجموع المشاركات: 640
Quote: حلياك يا الصادق.. يازول انتا جادي في حكاية انك أول مرة تسمع عمر خليل؟؟.
ما عارف حتة استغرابك دى جاى من ياتو منطلق فى انو اول مره اسمعو .. لكن تجدنى أنا أحسن من عمى عبد الكريم فى بلدنا سألته ذات مره عندما ( طشّ) او ضهب أو تاه وهو فى طريقه لمدينة القولد وهو راكباً على ظهر حماره فقلت له ( يا عمى انت ما سمعت البلابل بقولن البيسأل ما بتوه دارنا نحنا قريبه ليك ) فقال لى ( البلابل ديل منو ..؟) فقلت له ( ديل فنانات فى الخرتوم ومشهورات زى ناس عاشة الفلاتية ومنى الخير ) فقال متهكما ( الله يرحمك يا الفلاتية والله يجازى الدفنو الغنا معاكى ). فلا تستغرب يا أخى فانا ابن تلك الضهارى ورغم ابتعادى عنها زمنا الا أن بهرجت البنادر لم تجهرنى بعد .
Quote: شاعر اسمو الصادق الرضي ، و شاعر اسمو عاطف خيري
اعرفهما جيدا وهما شاعران مجيدان .. وكما قلت لاخى ود العبيد متسائلاً الزول ده كان غاتس وين ؟؟ ام انا الكنت غاتس وين ؟؟؟ ويبقى كلام ذاك العسكرى حقيقة ان مصطفى لا يتكرر وان تشابه علينا كما تشابه على قوم ( موسى )
Quote: Magdi Osman Bahar · متابعة · Lawrence Kinlin School of Business- Fanshawe College Ya Bakri, I just want to like it in Facebook. When can I ??? رد · أعجبني · متابعة المنشور · 7 أبريل، الساعة 04:47 صباحاً
-----------
يا حوتة
04-11-2013, 01:50 AM
خالد العبيد
خالد العبيد
تاريخ التسجيل: 05-07-2003
مجموع المشاركات: 21983
يازول!؟ اول مرة اعرف انو ذمتك لستك كدا يا ود العبيد!
اسي نحنا قاعدين نقول ليو عمو مبارك .. يقوم يمسك في كلامك دا .. الا نرحل انحنا! ---------------------------------------------------------------------------- سلام يا قيقا والله بختك المجاور عمو مبارك ! بالجد اولاد الكنزي من اجمل واحن من عرفتهم في السعودية " احن " دي ختها بين قوسين واضربها في مية لانهم كده طبيعي سلامي للعزيز عبدالعزيز الكنزي .. قلبو كيف ؟ !! الايام ديك ايام عمليتو .. المعفن دخلنا في كستبانة بكينا من الفرح لمن نجحت العملية
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة