|
|
|
 Re: يا ود شيقوق تعال النِتعضّر لعادل عبد العزيز ونقعلوا فوق راسو ... (Re: معاوية المدير)
|
ذات في يوم والقيمة تهتف
مطرا نقع فوق نوار الطلح
الفقع ريحة البرم ان جاتك
فايت ريحة الخمرة الفوق
اردافا مجدع.امنت بالله
ودالمدير كيف حالك ياخي
شوف دكتور بادي تشبيهو
جميل كيف
لانو البرم للناس الحناكيش
زهرة الطلح يعني من نفس
فصيلة المقبلات شبه الارض
في الخريف بالانثي في كامل
زينتها واناقتها وتفوح منها رائحة
الطيب.
ودالمدير انا البوست دا كان افوتو
افوتو مفلق والعجب كان جاك عمنا
ودشيقوق اقدل كدي ومشنق طاقيتو
واخد ليهو تبة سمحة الكلام بقصر تب .
حضور ومتابعة
تسلم عادل عبد العزيز مكتشف الجمال
تسلم ودالمدير
تسلم ودشيقوق
| |
 
|
|
|
|
|
|
|
 Re: يا ود شيقوق تعال النِتعضّر لعادل عبد العزيز ونقعلوا فوق راسو ... (Re: سليمان القرشي)
|
Quote: كدى قبال ما نتوكر ليقدام الرقراق معروف للجميع هو شنو ولا نشرحو ؟
اخير نشرحو مراعاة لظروف البعض اللذىن لم يتمكنوا من العيش فى الريف ولم يتعرفوا على
مثل هذه المصطلحات .. اها الرقراق ده يا حبان هو ضؤ الشمس اللذى يتسلل ما بين فتحات
الراكوبة المعروشة من القش او الصريف فتكون فيها فتحات تدخل بعض اشعة الشمس وتتساقط
على عيون او جباه الناس النائمين او مستلقيين فى الراكوبه وبالتالى تكون مزعجة جدا وقد تجلب لهم الصداع لاحقا . |
كدي يا عادل تعال النشوف شيخنا المتنبئ
قال شنو في الرقراق ؟؟؟:
قال المتنبئ في وصف شِعب بوان:
طَبَتْ فُرْسَانَنَا وَالخَيلَ حتى خَشِيتُ وَإنْ كَرُمنَ من الحِرَانِ
غَدَوْنَا تَنْفُضُ الأغْصَانُ فيهَا على أعْرافِهَا مِثْلَ الجُمَانِ
فسِرْتُ وَقَدْ حَجَبنَ الحَرّ عني وَجِئْنَ منَ الضّيَاءِ بمَا كَفَاني
وَألْقَى الشّرْقُ مِنْهَا في ثِيَابي دَنَانِيراً تَفِرّ مِنَ البَنَانِ.
جمال المكان جعل المتنبئ يخشى علي خيله أن تحرِن فيهو وترفض الحركة
ومواصلة السير، ونحن عندنا الحمار وكت يحرن أمانة ماهو عنيد وبُوّم.
أها، بعد المتنبئ واصل السير الرقراق بقى يتنفض فوق أعراف الخيل مِتل
الجُمان كما شبهه المتنبئ. (الجمان خرز من فضة يشبه اللآلىء).
في مواصلة السير حجبت الأغصان الشمس وأصبح يصله من ضؤها ما يسقط
عليه من خلآل فتحات الأغصان، وهو الرقراق الذي شبهه المتنبئ بالدنانير
التي يصعب الإمساك بها. (الشرق تعني الشمس).
أها، دا الرقراق.
والله شهيتونا رقدة تحت ضُل منقة فوق عنقريب كرآب
ما فوقوا غير شلتوت وِسادة.
التحية ليك يا عادل، والبوست بتاعك زاغ مِننا في زحمة كرقة
بكري دي. دحين يا أخوي العفو والعافية...
| |
|
|
|
|
|
|
|
|
|
Re: يا ود شيقوق تعال النِتعضّر لعادل عبد العزيز ونقعلوا فوق راسو ... (Re: الطيب شيقوق)
|
Quote:
دى نوارة يا ود المدير مش برم - صحيح البرم نفسه نوار
ولكن كلمة برم تطلق بالتحديد على نوارة الطلح وهي
صفراء اللون ولها مذاق حلو ورائحة أخاذة . |
سلآم ود شيقوق.
حبابك.
يا ود شيقوق إنت زول صعيد وأنا زول سافل.
أها هاك دا برم.
البرم عندنا لا سافل هو نوار أشجار الطلح
والسُنُط معاً. رغم أنّ النوارة شكلها وآحد
لكن تجد الأشجار تختلف في شكلها عن
بعضها البعض.
في العربي الفصيح يطلق البرم علي ثمر الطلح،
أما ثمر السُنُط فهو القرض اللِيلنا الوآحد دا.
ثمر الطلح في عاميتنا بنقولوا، العُليّف.
الفي الصورة الأولي برضو برم لكن يبدو أنّ البيئة
التي نمى فيها مختلفة.
مودتي...
| |
|
|
|
|
|
|
|
|
|
Re: يا ود شيقوق تعال النِتعضّر لعادل عبد العزيز ونقعلوا فوق راسو ... (Re: معاوية المدير)
|
Quote: البرم عندنا لا سافل هو نوار أشجار الطلح
والسُنُط معاً. رغم أنّ النوارة شكلها وآحد
لكن تجد الأشجار تختلف في شكلها عن
بعضها البعض. |
كلام صحيح مية المية ومتفق مع توصيف عولك ناس الصعيد
Quote: في العربي الفصيح يطلق البرم علي ثمر الطلح،
أما ثمر السُنُط فهو القرض اللِيلنا الوآحد دا.
ثمر الطلح في عاميتنا بنقولوا، العُليّف. |
والله طالما بتعرف العليف تاني زولا بنازلك مافي طااب
بس الفي الصورة دى ما اظن برم انتظرني بخمشوا ليك هسه وبجيك
| |
|
|
|
|
|
|
|
 Re: يا ود شيقوق تعال النِتعضّر لعادل عبد العزيز ونقعلوا فوق راسو ... (Re: الطيب شيقوق)
|
Quote: ذات في يوم والغيمة تهتِّف
مطراً نقّع فوق نوار الطلح الفقع
ريحة البرم إن جاتك عطراً
فايت خُمر الفوق اردافا مجدّع. |
يا ود القرشي محمد بادي دا زول بالحيل شديد.
الزول دا في لحظة شوق شديد جاب الغيمة والمطر وريحة البرم،
ودا كلوا شوق للمكان في زمان معيّن.
عارف دايماً المطر بتهيج ريحة البرم، وريحة البرم بتكون أجمل
لآمن شدُرة الطلح يكون تحتا مُراح غنم وتتمازج ريحة البرم
مع ريحة المُراح مع دُعاش المطر.آآآآآآآآآخ يا أنا. دي ريحة يمين
الله فايتا خمر الفوق اردافا مجدع وجميع العطور الباريسية،
نعمنها ريحة بُكان. ود بادي هنا بيتنفس المكان ويستنشق عبيره
في لحظة شوق شديد.
في بدلية المُسدار ود بادي قال:
أنا اخو البِت اللكعت قرن الخُمرة النازة
علي وِردان الصبوة الرآكزا.
القرن في المقطع هو شعر البنت، ولكعتو أي جدعتو وكشحتو فوق
وريد الصبي الركز للشبال، والوريد عرق في الرقبة. دايماً الصبي
بيدنقر للشبال والبت بتكشح فوقوا شعرا. لآحظ شعر البنت تريان
بعطر الخُمرة.
في المقطع المعني قال ود بادي:
ريحة البرم إن جاتك عِطراً
فايت خُمر الفوق اردافا مجدّع.
أي ريحة البرم دي وكت تجيك مع ريحة دُعاش المطر تكون
أجمل وأحلى من ريحة شعر البنت المعطون بعطر الخُمرة
ومجدّع فوق اردافها، أي نازل فوق الأرداف بصورة مُسدلة،
والأرداف هي كفل البنت وهذا كناية عن طول الشعر.
الكلآم النفر دا بيطرطش يا ود القرشي
في نفر غربتنا دي...
| |
|
|
|
|
|
|
|
|
|
Re: يا ود شيقوق تعال النِتعضّر لعادل عبد العزيز ونقعلوا فوق راسو ... (Re: وضاحة)
|
جعفر
كيفك
Quote: شكلك كنت بتتكل رويسك على الصريف لامن تقرصك شمس الصباح
أو تعضيك رتيلا |
هههههههههههههههههههها يعني الواحد اكان كتب ليهو كليمة عوييييييييييييييييييصة وبتورية بعييييييييييييييييييدة برضو ملاحقنو؟
تاني الواحد ما يقول خلق الله دى ممكن كلها تدقسا
لكن بيني وبينك يا جعفر اخوي زول بيعرف المشلعيب دا السايبة ديييييييييييك ما بتفوتو
| |
|
|
|
|
|
|
|
|
|
Re: يا ود شيقوق تعال النِتعضّر لعادل عبد العزيز ونقعلوا فوق راسو ... (Re: معاوية المدير)
|
Quote: أها أنا الزول دا وححححدوا ما بقدر عليهو، وهو كمان ختاني في
حِتّة ضيّقة شديد بحكاية تسعة من عشرة دي، دحين مافي زول بيوفيهو
حقو نيابة عني غيرك يا ود شيقوق.
إسركن تب. |
نعم يا المدير صديقي كبر جاك ولسان حالو بقول :
آكل حارة ما أضوق باردة ماك داريني
حس اب جقرة والقربين دوام باريني
أسال منى ربعاي البعرفوا قريني
زولك ما براهو عندو قرين وقرينو نحن بنعرفو لكن ما بنتكلم بيهو
| |
|
|
|
|
|
|
|
|
|
Re: يا ود شيقوق تعال النِتعضّر لعادل عبد العزيز ونقعلوا فوق راسو ... (Re: عادل عبدالعزيز عبد الرحيم)
|
Quote: التحية لكم ثلاثتكم
ود المدير وصاحبه ود شيقوق وصاحبي عادل عبد العزيز
ودعونا ندعو أخونا عادل عبد العزيز بإعادة كتابة الخيط بتاعو مرة تانية
عشان نجمع فيه ما اندثر وفي طريقه للاندثار من ثقافتنا الشعبية وتراثنا
ويكون مشلعيب زي مشلعيبي دا |
جعفر محي الدين،
السلآم يغشاك شقيش تقبّل.
لو سمحت نحن مشلعيبك دا دايرين نستعملوا مرجع
في سياحتنا دي، وأخونا عادل تراهو ظهر. إن دُرتوا
تواصلو هنا حبابكم ألف، وإن درتوا عادل يفتح لكم
ديوانوا سليل الرحماب ما ظنيت ديوانوا يبقى عندو
سدادة.
لك مودتي يا رجل...
| |
|
|
|
|
|
|
|
|
|
Re: يا ود شيقوق تعال النِتعضّر لعادل عبد العزيز ونقعلوا فوق راسو ... (Re: معاوية المدير)
|
Quote: عادل عبد العزيز ما قصر معانا تب
ساق المتعة دي لينا ولو بعد حين
ما في أي داعي للشرح يا ودالمدير ود شيقوق
الفهم (بكج) والمفردة لما تمرق من جملتها بتغرق |
سلآمات،
أخونا محمد علي شقدي.
كلآمك في محلو يا شقدي، لكن زي ما قال لك ود شيقوق
شِن نسوي نحن مع جنوّن البندر ؟؟؟.
عارف، أوّل ما مشيت البندر حكايتي جاطت لأني كنت
بنضم علي سجيتي، وفي كتير من المرات بلقى ناس
البندر ما فاهمني. كنت بقولهم والله الما عاش في القرية
حكايتو بايظة تب، ها ناس علي اليمين إنتو النضمي دا
ما بتعرفوهو. في نفس الوكت هم كانوا بيشوفوا إني
زول عِريبي اشو ساكت.
حبابك عشرة يا شقدي...
| |
|
|
|
|
|
|
|
|
|
Re: يا ود شيقوق تعال النِتعضّر لعادل عبد العزيز ونقعلوا فوق راسو ... (Re: معاوية المدير)
|
Quote: ازيك يا بلدياتي ودالمدير
ساعه ليقيتك تعتضر لي عادل
جئت جاري للبوست بالديداب
لان عادل اخو وبيتلقي
وسلامي لاخونا بمديرية النيل |
سلآمات قريبي،
ود التوم.
أعفى لينا كان جبناك جاري بالديداب، ونحمد الله
النجاك من الجضول والعترة فوق التقانت.
ود الفراش قال:
بشوف بربر بشوف جوخه وحريره
بشوف الميضنة الفوق الجزيرة
بشوف ركب العبايدة البي خبيره
ترى البردين كسح فات القطيرة
بشوف تربيزة فوقا تمانية بيرة.
حباب أهلنا، حباب ناسنا ليكم شوقنا
بربخاً مفتوح...
| |
|
|
|
|
|
|
|
|
|
Re: يا ود شيقوق تعال النِتعضّر لعادل عبد العزيز ونقعلوا فوق راسو ... (Re: معاوية المدير)
|
عارف يا ود شيقوق قريبى ود المدير ده بيسوى النم فوق طلح الهشابة الناشف ده
اها دا لو جاء على الصعيد وحضرلو قرة من قرر الخريف وكرف له كرفة من همبريب النجمة بيسوى كيفن
حرم كان فات ود بادى ليغادى
انا طبعا ود سافل لكن ترباية صعيد نواحى سنار وكوستى وبابنوسة عشان كدى متفوق على قريبى ود المدير فى كرفان نسام الصعيد
وعندى فوقو نمات من اهل الصعيد كان اسعفتنى الذاكرة بيجبها ليكم هنا باذن الله
| |
|
|
|
|
|
|
|
|
 Re: يا ود شيقوق تعال النِتعضّر لعادل عبد العزيز ونقعلوا فوق راسو ... (Re: معاوية المدير)
|
Quote:
وما تنسى ود بادى قال فى وصف سمحاتنا
ود العين النايم زرقن
مو زايغق رسيان وميقن
وسيدن من الوجعة عروقو يطقن
دحين يا اخوى خايف عليك من طققان العوق والله صحى |
الكلآم هنا يا عادل عن بنات البوادي وبنات الريف، وبرضو المتنبئ
عندو قول فوقن ذي قول ود بادي. المتنبئ ألبسهن توب الفصحى،
وود بادي ألبسهن توب العامية. لكن ود بادي تحدث عن الأدب
والخجل حيث لا يجدي الجمال فتيلا معهن.
قال المتنبئ:
مَنِ الجآذِرُ في زِيّ الأعَارِيبِ حُمْرَ الحِلَى وَالمَطَايَا وَالجَلابيبِ
إنْ كُنتَ تَسألُ شَكّاً في مَعارِفِها فمَنْ بَلاكَ بتَسهيدٍ وَتَعذيبِ
ما أوْجُهُ الحَضَرِ المُسْتَحسَناتُ بهِ كأوْجُهِ البَدَوِيّاتِ الرّعَابيبِ
حُسْنُ الحِضارَةِ مَجلُوبٌ بتَطْرِيَةٍ وَفي البِداوَةِ حُسنٌ غيرُ مَجلوبِ
أينَ المَعيزُ مِنَ الآرَامِ نَاظِرَةً وَغَيرَ ناظِرَةٍ في الحُسنِ وَالطّيبِ
أفدِي ظِبَاءَ فَلاةٍ مَا عَرَفْنَ بِهَا مَضْغَ الكلامِ وَلا صَبغَ الحَواجيبِ
وَلا بَرَزْنَ مِنَ الحَمّامِ مَاثِلَةً أوراكُهُنَّ صَقيلاتِ العَرَاقيبِ .
شوف الجمال دا طبيعي لم تشبه شائبة الصنعة. حُسن غير مصنوع
وأوجه لم تعرف لها المساحيق درب وحواجب كما خلقها ربها،
والكلآم ليس فيه تكلُف وصنعة. جمال طبعي أصلوا ما مزوّر،
يا قول الغناي.
شيخنا ود بادي قال:
وينا مراتع الدرت الباسط دايما ببكي عليهن
وين بنوت الحلة البكّر عصرا بدري يسون في شاهيهن
بعد الليل ما يهّود ونحن نهّود..
عاد أماتن ينادن ليهن
نمشي على القيزان نتقادم
أقيس الخطوة مع التاتاي ومشيهن
والله البعد الحاصل ما نساني
وحاتكن في قمراتنا بشوفو وشيهن
الا النضم أب غنة اللهج السكر وين بلقاهو
بنات الريل الدوب ليهن
الخوف يا ناس كان يبقى الشوق الحاصل بينا معشعش فيهن
مقنع سابل وين بلقاهو
طرفا ذابل وين بلقاهو
وعين بتدنقر من واليهن
الوجنات الشعّن بقّن
ود العين النايم زرقن
مو زايغ رسيان وميقّن
زولن كان خدران ومحقّن
من الشوفة عروقو يطقّن
كان الدنيا بصح تتخلا
كنا بركنا معاهن فوق رملاة الحلة
الا كمان بنشوفا مذلة.
شوف المقنع السابل والطرف الذابل من الحياء والإحترام
المبالغ فيه الذي يحيل بينهن ورفع العين للنظر للوالي.
قمّة الخجل، وما أجمل الخجل في البنات !!!.
الرسيان وميقن يا عادل من الشوفة عروقو يطقن، فما بالك
أنا وود شيقوق اللآجين وخفيفين ؟؟؟، من الشوفة علي اليمين
ما يفضل فينا عِرِق...
| |
|
|
|
|
|
|
|
|
 Re: يا ود شيقوق تعال النِتعضّر لعادل عبد العزيز ونقعلوا فوق راسو ... (Re: الطيب شيقوق)
|
Quote: المدير
اها اوعاك تبقى إطيقش وتقوم تقول لناس البندر ( السلام عليكم) وهم متابعين ليهم مسلسل
ولا كمان تسلم عليهم وهم ماسكين ورق حريق .
ولا كمان لحظة مبارة هلال مريخ
ولا كمان بعد يطفوا النيران كل النيران - ولا كمان تقوم تمد حلاوة لطفلهم وهو متابع إسبيستون |
الله يستُر يا ود شيقوق.
هسّع فتحة خشُمنا المسنوحة دي خفست فوقنا.
الكُدني يا ود شيقوق أكان لقيتني صُطا لي شي
باقي أنا مرات بسرح...
| |
|
|
|
|
|
|
|
|
|
Re: يا ود شيقوق تعال النِتعضّر لعادل عبد العزيز ونقعلوا فوق راسو ... (Re: وضاحة)
|
Quote: يا المسنوح انا بت شيوخ جدى حامد اب عصاءة سيف
صقر الغبيشة وصادق قولت ها |
هههههههههههههههههههههههههههههههههههها مسنوحة اكان غفلنا هسي بتجي بتقولي انا سليلة اسامة ابن زيد
Quote: حليلك يا المسنوح المدودر
ويا حليل ايام زمانك والدراب الكنت بتفكوا من غير تتلفت
غايتوا من جاء خالك دا جهجك وبقى وشى البامية ما ياهوا |
خلي خالي يغفل بس عشان اديك فلقة في راسك الماكن دا عمرك ما تنسيها
| |
|
|
|
|
|
|
|
|
 Re: يا ود شيقوق تعال النِتعضّر لعادل عبد العزيز ونقعلوا فوق راسو ... (Re: وضاحة)
|
Quote: ود المدير المطرطش وشيقا المدودر
انتوا عنصريين كلامكن كلوا عن بنات الريف
يعنى بنات البندر ما خاشين فى الكاتوقرى بتاعتكم اصبروا يا ظلامة
هاكم شوفوا ود البطانة دا قال شنو فى بت البندر وضاحة يا مسانيح |
كدي تعالي لي بجاي يا سجمانة أوريك هوايل جِدِك العبادي.
في سايق الفيات قال:
أنزل يا صديقى* و شوف يد القدرة
و شوف حسن البداوة الما لمس بدرة
وراد النهر أردونى ما بدرة
الكاتل الصفار أم نضرة الخضرة
ما نفرن تقول سابق الكلام إلفة
عطشان قلت ليهن و صحت البلفة
مافيش كاس قريب قالن لى دون كلفة
تشرب بى كفوفنا لما تتكفى.
قال لي صاحبو أنزل شوف جمال البدو الطبيعي. خلقة ربنا
من غير مساحيق وبُدرة، وقال، قاااااادر الله!!!
الزول دا من شِدة الجمال وُر دُو لُب وقع. كِتِل تب بين صفراء
فاقع لونها والخُدرة الدقاقة، وكلو اورقانيك يا وضاحة.
بعدين الكلآم والتعامل مع الغريب فيهو عفوية وأريحية مبالغ
فيها لدرجة إنهن أدنو إحساس كأنهن يعرفنه ويألفنه من زمن.
لكن رغم دا كلو هو سيطرت عليهو روح الحضر الماكرة
التي تعشق اللف والدوران. الراجل رويان وميتو معاهو في
العربية، لكن بعضمة لسانوا قال إنوا خدعهن وتظاهر بأنه
يكاد يموت من العطش، ومبسوط جداً أن صحت البلفة البلفا
ليهن بإظهار العطش وعدم وجود قيروانة. بكل بساطة ومن
غير كُلفة قالن ليهو ما مُشكلة نسقيك بكفوفنا لآمِن تروى.
البداوة والريف جمال وعفوية وأريحية.
دي حقيقة. والله صحي.
نو اوفنس يا مسنوحة...
| |
|
|
|
|
|
|
|
|
|
Re: يا ود شيقوق تعال النِتعضّر لعادل عبد العزيز ونقعلوا فوق راسو ... (Re: الطيب شيقوق)
|
Quote: في العربي الفصيح يطلق البرم علي ثمر الطلح،
أما ثمر السُنُط فهو القرض اللِيلنا الوآحد دا.
ثمر الطلح في عاميتنا بنقولوا، العُليّف
|
ود المدير وأبوي الطيب وصاحب البوست وضيوفو والمتاوقين بي تحت الصريف
سلاااااااااااام ومحبة والله كنت كارب قشاطتي وما شفت لمّة القرايب الا هسّاع
نحن عندنا في بوادي الغرب بنقول العِلِّيف لي ثمر شجر السيِّال ودائما يكون علف للبهائم الدقاقة "ماعز ضأن"
وفي الصيف ايضا من احسن مراعي دمر النّوق او كما يقول شاعرنا ود المُر
"أني وجبادة الشايل البرم علِّيفُو
نجعنا حلالي من بلد البضوِّي شنيفو
قعود سقّاي أبو دكنة المحمِّر قيفو
يسألنا الله واواي اللّناقيب كيفو"
أما ثمر السنط فهو "القرض" ودي ترا الشجرة التي وجد الشاعر الناصر قريب الله الحسناء الكاهلية علي رأس
أغصانها وكانت ترتدي تلك الحسناء "السدرانة"
"وفتاة لقيتها ثم تجر ثمر السنط بإنفراد الغزال
تمنح الغصن أسفل قدميها ويداها في صدر آخر عالِ
فيظل النهدان في خفقان الموج والكشح مفرط في الهزالِ
تجني ثمرة السُّنط لدباغة الجلود لزينة هودجها "شليل - مفارع- عضبة...........الخ
الناس في القوّة وإنت مشوقر
رعيت عضاوة الدّلج الصعيد ناس أُوقر
ديك البهرة في القف السّنافو متوقِر
هبود جلد أبو نصاً رقيق مو مبوبر
"والهبود هو الرماد ويستعمل في الدباغة"
بجيكم بي مهلة لي رعابيب "حُمْ " الأستاذ وأعني المتنبي كما كان يسميه الراحل الطيب صالح
محبتي
| |
|
|
|
|
|
|
|
|
|
Re: يا ود شيقوق تعال النِتعضّر لعادل عبد العزيز ونقعلوا فوق راسو ... (Re: عبيد الطيب)
|
| Quote: والمتاوقين بي تحت الصريف |
نان فاكرني بتفوت على دي يا العشاء؟
Quote: نحن عندنا في بوادي الغرب بنقول العِلِّيف لي ثمر شجر السيِّال ودائما يكون علف للبهائم الدقاقة "ماعز ضأن"
وفي الصيف ايضا من احسن مراعي دمر النّوق او كما يقول شاعرنا ود المُر
"أني وجبادة الشايل البرم علِّيفُو
نجعنا حلالي من بلد البضوِّي شنيفو
قعود سقّاي أبو دكنة المحمِّر قيفو
يسألنا الله واواي اللّناقيب كيفو" |
تسلم يا العبيد
| |
|
|
|
|
|
|
|
|
|
Re: يا ود شيقوق تعال النِتعضّر لعادل عبد العزيز ونقعلوا فوق راسو ... (Re: معاوية المدير)
|
Quote: ود المدير وأبوي الطيب وصاحب البوست وضيوفو والمتاوقين بي تحت الصريف
سلاااااااااااام ومحبة والله كنت كارب قشاطتي وما شفت لمّة القرايب الا هسّاع |
حباب ود المقدم.
نوّخ وابقى لا داخل.
يا جماعة والله مداخلآت الفيس بوك دي طوالي مبقياني
في حرج. دايماً قبل أرُد علي المدآخلة بفقدها !!!
عليكم الله المدآخلة التحت دي والله فقدتها، دحين كان فيكم
وآحد ظاهرة عندو اليقتبسها وينزلها عشان نرد عليها.
عظيم شكري لصاحب المدآخلة وأرجو أن لا يكون
سحبها ظناً منه أن قد تجاهلناها...
| |
|
|
|
|
|
|
|
|
|
Re: يا ود شيقوق تعال النِتعضّر لعادل عبد العزيز ونقعلوا فوق راسو ... (Re: عبيد الطيب)
|
انا ناس ابتسألو من ال زول
على اليمين خوتكم خوة عجول واحد يرعى والتانى وكران
كنت قاطع نت
ودى جدعة ليك يا ود المدير وبهديها ليوضاحة وودشيقوق كمان من حقه يسمعها
قال شادينا ود الحورى
يا قشيش بلد الكربكان
يا الشرب بالنجمة رويان
عوج البل وفقع الضان
انت حراسك 80
وكل حارسا عنده ######ين
وكل ######ا عنده جروين
وكل جرو عنده ضنبين
وكل ضنبا فيه وردتين
| |
|
|
|
|
|
|
|
|
|
Re: يا ود شيقوق تعال النِتعضّر لعادل عبد العزيز ونقعلوا فوق راسو ... (Re: وضاحة)
|
Quote: سلامات
وتقعلولو فوق راسو حتة واحدة كدا..!!
يعني احتمال يكون فيها فلعة وجرجرة!!
غايتو انا من شفت اسم شيقوق ده جيت داخل بي زوادتي..
حزمة حزمتين عنكوليب ولي قدام |
يا عبد العزيز عيسى يا اخي
تسلم من كل شر وبلا.
قالوا متألم شوية ويا اخي بُعد الشر عليك.
أمانة ماك زول وآجب. حتي المرض ما نساك وآجبك!!!.
أها،نحن برانا بنقشّر ونقرُش معاهو.
كتّر حيّرك...
| |
|
|
|
|
|
|
|
|
|
Re: يا ود شيقوق تعال النِتعضّر لعادل عبد العزيز ونقعلوا فوق راسو ... (Re: معاوية المدير)
|
Quote: ود المدير و زوارو ..العوافي ..ياني الكنتا مداخل
معاكم واستغربت لما ما لقيتا اها جنس ده ما لاقاني ضمة ضمة في
الاسافير دي ... عموما ... مستمتع بالجد و متابع النضمي السمح
ده و بعدين اختنا وضاحة دي ما دباسة دي ام قيردون .. رقاصة
وغنايا و نقادة .. بتعضر يا وضاحة |
شاحد الله يمتعك بالصحة والعافية يا جلآل.
عارف، دي المرّة التانية النادرة دي تبقى علي !!!،
وتراني أباصر خايف اللوم وحاتك.
أُم قيردون لا سافل بنقولها الكرلي، وهي طائر وديع وحذر
لأبعد حد. وأُم قيردون تأتي لبلدنا في فصل الشتاء. وِكتين
الشاتي يخُت أها هي بتجي، وهي من الطيور التي تألف
المكان.
أذكر كانت في أُم قيردون عرجاء، وكانت تألف منزلنا وتأتي
إليه في موسم الشتاء دوماً.
كنا نحن سُغار نغني لها:
أُم قيردون يا الحاجة
ولدك عريس يا الحاجة
يسِف الدريس يا الحاجة.
والله أيام يا ود جلآل.
بس وضاحة دي تشبه لي أُم بِعبِر
كان الفي البروفايل دي صورتها واللآ
ما صورتا.
مودتي...
| |
|
|
|
|
|
|
|
|
|
Re: يا ود شيقوق تعال النِتعضّر لعادل عبد العزيز ونقعلوا فوق راسو ... (Re: معاوية المدير)
|
| Quote: العبيد ترجم بالله عليك ما فهمتى اتكتح |
نجر اللّيزيرق يقصد به سرج البعير والإزيرق نجار سروج شهير
عفشتي ومعلوقي كل لوازم الرحلة من سعن او قربة ومخلاية وضبية وفروة وتركيبة وبطانية وقيد
وعقال وبندقية ....الخ وكما تقول الحكامة من غنا الجرارية
"الفروة والإحرام
والرقيبة من قدّام
البي الرّسن حطّام
آ خير أُمُّم سو لي زمام
وعلي الشّارف يقصد به بعيره وشارف أي شوح وطويل
"خنَّاق طويرة أم قوقي يقصد بها ذكر النِّعام "الهضليم" الذي شبه به بعيره وللشرح أكثر عن الهضليم
مراجعة بوست "الدّرب إنشحط" وطويرة أم قوقي يقصد بها النّعامة "الربدة"
وعنده جائزة لبعيره إذا أوصله لفرقان "أم عنقا كزجاجة الروم"
اها يا وضاحة الشرح دي كلُّو عشان بوستك الإنساني الرائع و الذي إهتممت به
وآخرون معك عن أطفالنا
محبتي
| |
|
|
|
|
|
|
| |
معاوية المدير
سليمان القرشي
Kabar
الطيب شيقوق
جعفر محي الدين
وضاحة
محمد علي شقدي
عادل عبدالعزيز عبد الرحيم
شمس الدين التوم
عبيد الطيب
Abdlaziz Eisa
فيس بوك
تويتر
انستقرام
يوتيوب
بنتيريست