|
ترزي العائلات جلاليب ، عراريق ، سراويل .. و يوجد بالمحل مهندس معماري
|
سؤال و مداعبة لأخونا الباشمهندس ايمن محمود __________________________________ في بداية تمانينات العام الماضي ...
قرأت هذه اللافتة في شارع من شوارع امدرمان ...
( ترزي العائلات جلاليب ، عراريق ، سراويل .. و يوجد بالمحل مهندس معماري )
و لأني كنت مهندس معماري جديد لنج ...
مسكتني الهاشمية و قلت ياخي كيف يعني اللخبتة دي ...
لو هو داير يشتغل ما يعمل ليهو مكتب براهو ...
نزل و دخلت الدكان ... سلامات يا حاج ...
ازيك يا ولدى ... جاي لي جلاليب و لا جابتك يافطة المهندس ؟؟؟ ______________________________________________ انا يا باشمهندس ايمن محمود ...
و الله بقيت ما عارف بوستاتك مالها ...
يعني ما قادر احدد ... اخش افتكر في شي هندسي ...القي حمادة بت ...
انا شخصيا اول بوست فتحتوا هنا عن الكشتينة و الهوس الديني ...
وتاني بوست عن المرأه السودانية و مفهومها للرومانسية ...
وعندي بوستات غنا ما تديك الدرب ...
و بوستي الاساسي حق جدي التاريخ حكاويه عديله ...
يعني طارح نفسي زي ( جاد الله ) ...
اها انت يا هندسة بديت بي بوست عن الاستشارات الهندسية ...
وطلبت فتح مكان لناس الدراسات العليا ...
الحصل شنو بعد داك يا هندسة ...
الجو العام داير كده ولا شنو .؟؟؟
اسمع مثلي القال حبيب نورة اصلو ما سمع بيهو ...
( يا تِفّـــــه ... يا طاقية بي ريال ) ...
اخوك جاب رد من الفاجومي لابو اسلام ... قالو ليهو ما شبهك الكلام ده ...
|
|
|
|
|
|
|
|
Re: ترزي العائلات جلاليب ، عراريق ، سراويل .. و يوجد بالمحل مهندس معما (Re: يحي قباني)
|
استاذنا يحي قباني ،،، لك التحية والاحترام يوم جيت راجع من الجامعة لقيت اختي الصغيرة - الكلام ده طوّل ... بس ما شديد . لقيت معاها زميلاتها الصغار قالبن البيت لعب وكواريك البنات فجاة كده سكتن ووقفو اللعب ! اختي الصغيرة قالت ليهم : العبوا العبوا ... ده ما بسوي حاجة !
- في مناقشة مشروع التخرج بتاعي - كان الممتحن الخارجي - بروفيسور من جامعة بغداد بعد ما قدمت البرزنتيشن بتاعي قال (والكلام للبروفيسور طالب حميد الطالب) وبعد ان وقف وواجه الحضور : (انا حقيقة ً متفاجئ انو في دولة من دول العالم الثالث وفي افريقيا تحديدا والسودان على الاخص - يكون في طالب بالمستوى ده من الفهم العميق لماهية العمارة ) . انتهى كلام بروفيسور طالب
المعنى واحسبك قد ادركته : انا لست من انصار ان يحبس الانسان نفسه في قالب معين او ان يظهر بغير حقيقته ! انا زول بطبيعتي مرح وبحب البهجة ،،، واقدر جميع ضروب المعرفه ،،،
الاجازة الفاتت كنت مع احد اصدقائي الاعزاء وود دفعتي - وراني شغلو في تنجيد كراسي العربية بتاعتو واعجبت به ايما اعجاب ،،، والله صحي وكن جيت للطباخة - اسكت ساي ... أخوك معلم كبير
| |
|
|
|
|
|
|
Re: ترزي العائلات جلاليب ، عراريق ، سراويل .. و يوجد بالمحل مهندس معما (Re: أيمن محمود)
|
Quote: (انا حقيقة ً متفاجئ انو في دولة من دول العالم الثالث وفي افريقيا تحديدا والسودان على الاخص - يكون في طالب بالمستوى ده من الفهم العميق لماهية العمارة ) . انتهى كلام بروفيسور طالب |
لكن البروفسور حقك يا ايمن من شدة إعجابو بيك
طلع ناس أفريقيا و السودان كلهم ما فاهمين ؟
والله انا الآن ( متفاجئ ) اكتر منو ...
يا زول ما يهمك ... كنت دائر اناوشك بس ...
حمادة بت حمادة بت ... ما حدش وأخد منها حاجة
| |
|
|
|
|
|
|
Re: ترزي العائلات جلاليب ، عراريق ، سراويل .. و يوجد بالمحل مهندس معما (Re: أيمن محمود)
|
Quote: للأسف يا استاذ قباني فكرة العرب الجهلاء والمتعلمين منهم - وحتى الاوربيين والامريكان ،،، عن افريقيا والسودان سيئة جدا وبعدين البروفيسور (حقك ) ،،، دي ما حلوة منك |
انت ما صلحتوا ليه يا ايمن و قلت ليهو السودان فيهو معماريين
يعلموهوا هو ذاتو ... ___________________ أما بالنسبة لكلمة البروفسور ( حقك )
تعني .... ( your) Professor
هل في طرقه تانية لكتابتها ؟ ______________________ هدي نفسك ياخي ...
علي فكره انت خريج سنة كم يا ايمن ؟
| |
|
|
|
|
|
|
Re: ترزي العائلات جلاليب ، عراريق ، سراويل .. و يوجد بالمحل مهندس معما (Re: يحي قباني)
|
Quote: انت ما صلحتوا ليه يا ايمن و قلت ليهو السودان فيهو معماريين يعلموهوا هو ذاتو ... |
للمرة الثانية يا استاذ قباني - هو لم يتحدث عن (المعماريين السودانيين) - هو تحدث عن (طلاب العمارة) هذا اولاً
Quote: أما بالنسبة لكلمة البروفسور ( حقك ) تعني .... ( your) Professor |
برضو اقول ليك - هو ما كان my professor كان my external examiner !
Quote: علي فكره انت خريج سنة كم يا ايمن ؟ |
الاجابة على السؤال بتفيد النقاش بي شنو ؟!
| |
|
|
|
|
|
|
Re: ترزي العائلات جلاليب ، عراريق ، سراويل .. و يوجد بالمحل مهندس معما (Re: يحي قباني)
|
ياسلاااااااااام دا بوست ذكرني أول ( بيت عزابة ) سكنت فيه بعد التخرج في الجامعة البيت دا كان في ديم القنا بيت كلو معماريين الرشيد - الطيران المدني محمد الطيب إدريس - الإسكان الأمين أبو - عبدالمنعم مصطفى وشركاه كانو ناس لذيذين خلاص أنا وصاحبي متوكل ( سونا ) الوحيدين الما كنا معماريين متوكل دا إسمو متوكل محمد أطلقنا عليه متوكل سونا لأنو كان شغال في وكالة السودان للأنباء ( سونا ) قسم الإخبار الإنجليزية .... الأخبار العالمية أول حاجة تجي عندو .. يترجمها ويوزعها للتلفزيون والراديو والجرايد ... أها متوكل دا يجي يصحينا نص الليل ومن أعز نومة عشان يحدثنا عن بلاوي حصلت في الإكوادور أو سيول في مانيلا أو راجل كتل مرتو في جنوب إفريقيا أو سيدة عملت شنو داك ما بعرفو في أمريكا......
آهههههههه يا زمن
Quote: - في مناقشة مشروع التخرج بتاعي - كان الممتحن الخارجي - بروفيسور من جامعة بغداد بعد ما قدمت البرزنتيشن بتاعي قال (والكلام للبروفيسور طالب حميد الطالب) وبعد ان وقف وواجه الحضور : (انا حقيقة ً متفاجئ انو في دولة من دول العالم الثالث وفي افريقيا تحديدا والسودان على الاخص - يكون في طالب بالمستوى ده من الفهم العميق لماهية العمارة ) . انتهى كلام بروفيسور طالب |
دا كلام زى الورد أكيد دا مشروع عبقري الخلى الممتحن الخارجي يتغاضى عن الدبلوماسية ويتناسى إرث قارة بحالها في مجال التعليم المعماري الله يرحم جعفر نميري لو كان حي ورئيس كان أمر على الفور أن ينفذ مشروعك العبقري هذا .. فقد فعل ذلك من قبل عندما أمر بتنفيذ مشروع التخرج العبقري لطالب عبقري آخر وهو الباشمهندس قمر ... المشروع كان مسجد النيلين ..مسجد النيلين دا هسع عملوهو جامعة...
لكن يا زول ولا يهمك ملحوقة
جيب مشروعك دا هنا في سودانيزأونلاين دي أشرحو لينا
بعد داك الله يعمل الفيها الخير
عمك يحيى دا ما تشوف كلامو كدا زول ضكران خلاص .. أسألني منو أنا .. سكنت معاهو في داخلية وااااحدة
المهم يا زول جيب مشروعك دا وأعمل لينا بريزنتيشن على الأقل نتثقف معمارياً
وبعد داك لا أدري ربما يحدث الله أمراً
| |
|
|
|
|
|
|
Re: ترزي العائلات جلاليب ، عراريق ، سراويل .. و يوجد بالمحل مهندس معما (Re: عاطف عمر)
|
هلا يا عاطف ،،،
Quote: أكيد دا مشروع عبقري الخلى الممتحن الخارجي يتغاضى عن الدبلوماسية ويتناسى إرث قارة بحالها في مجال التعليم المعماري |
ابدا يا عاطف المشروع في حد ذاتو انا ما شايف انو كان عبقري ولا حاجة ،،، بالعكس كان بسيط جدا ،،، واعتقد انو البساطة ووضوح الرؤية كانتا السبب الرئيس في اشادة الممتحن الخارجي ،،، لانو جريا على العادة ،،، طلاب العمارة غالبا بميلو انو يعملو تصاميم تحاكي العمارة الحديثة وتقلد مفاهيم وتصاميم في دول اخرى ! الا انو في رأيي انو قمة الابداع ان تخرج العمارة في السودان من رحم الواقع السوداني بخصائصه الثقافية والاجتماعية والبيئية ،،، والابداع هو ان تستصحب كل هذه المفاهيم في انتاج عمل معماري يسمى هذه الايام بالعمارة المستدامة sustainable architecture الكلام ده كان قبل 12 سنة من الآن
Quote: عمك يحيى دا ما تشوف كلامو كدا زول ضكران خلاص .. أسألني منو أنا .. سكنت معاهو في داخلية وااااحدة |
مأخذي على استاذ يحى وكأني به يستنكر ان يتحدث *(المهندس المعماري) في غير المواضيع الجادة ، وانا اختلف معه في ذلك اختلافا كبيرا ،،، بل ارى العكس من ذلك ورأيي ليس محصورا في المعماريين بل كل الناس الحديث في ضروب التفاعلات الانسانية المختلفة يضيف ولا يخصم من المكون الثقافي للفرد ! تحياتي ------------ * من الخطأ وصف المعماري بـ (المهندس) ،،، العمارة تعد من الدراسات الانسانية ولا تتبع كلية الهندسة
| |
|
|
|
|
|
|
Re: ترزي العائلات جلاليب ، عراريق ، سراويل .. و يوجد بالمحل مهندس معما (Re: أيمن محمود)
|
Quote: يكون في طالب بالمستوى ده من الفهم العميق لماهية العمارة |
الطالب ده يا مهندس ...( سوري ) يا معماري
مش هو ( معماري ) المستقبل ؟؟
يعني انت قبضت الإطراء حقك ... و قلت يلا بلا كمال عباس ... بلا حمدى
بلا عبد المنعم مصطفي ...بلا عبدالوهاب و عبود ... بلا جاك إشخانص
كل ( البيوتات ) المعمارية دى طلعت اي كلام ...؟؟
اكيد البروفيسور ( الممتحن ) بيفهم كل شي ...
اها انا اتخرجت لي 30 سنة من (هندسة معمارية) ... كان اسمها كده بالمناسبة في جامعة الخرطوم...
بتاخد BSc of Architectural Engineering
بس طبعا دي جامعة الخرطوم ... جامعة سودانية افريقية ...
فغلبني افهم المقصود شنو ( بالفهم العميق لماهية العمارة ... ) ________________________________________________ بالنسبة للسؤال ان اتخرجت سنة كم ... انو ده حيفيد شنو في النقاش ...
اكيد يا هندسة ( الخبرة ) دائما بِتُثري النقاش ... ولا ما كده ... ________________________________________________
Quote: اما عن البوست الخلاك تفتح البوست ده حماده بت ،،، انا مالي فيني شنو؟! فهو يتحدث عن ان كلمات هذه الاغنية تحتوي على اشارات عنصرية واضحة وانا اسأل فيه عن وجود قوانين تحاسب على التفوه بعبارات عنصرية ام لا ؟ شكلك ما قريتو ! |
لا ابدا ...
ما بسمع للاستاذ حمادة بت ...
و ما عندى لا عنصرية ولا عنصرية مضادة ...
انا نشأت في زمن كنا بنشوف دواخل الانسان و( فهمه العميق للحياة ) ...من غير ما نشوف لونه او دينه الخ ....
كان اهم شي عندنا احترام كبارنا ... وتقديرهم ... بغض النظر عن جهويتهم ... ___________________________________________________________________
Quote: مأخذي على استاذ يحى وكأني به يستنكر ان يتحدث *(المهندس المعماري) في غير المواضيع الجادة ، وانا اختلف معه في ذلك اختلافا كبيرا ،،،
بل ارى العكس من ذلك ورأيي ليس محصورا في المعماريين بل كل الناس |
انا دلوقت عرفت الفرق لانى ما بدخل من ضمن مجموعة ال ( * ) ...
لك الود يا معماري ... تحدث ما شئت من الحديث ...
تصدق انا ما كنت بستنكر ؟؟؟ ________________________________________
Quote: الكلام ده كان قبل 12 سنة من الآن |
شكلي استعجلت ساكت ... اهي جات براها ...
يعني تخرجت عام 2001...
معناتها ما شاء الله من مواليد 1978 تقريبا ...
1978 انا دخلت جامعة الخرطوم ... كلية الهندسة و المعمار
اكيد الهندسة المعمارية كانت بكر وقتها ....
محظوظين انتم ... اخدتوها بعد ما ( تعتقت ) ... _______________________________________ اضم صوتي لصوت باشمهندس عاطف ...
حقيقة و بدون هزار ... اتمني ان تاتينا بمشروع التخرج ...
ورينا شرح بيان بالعمل لكلامك ده ...
دعنا نري هل لنا بعض من بقايا هندسة معمارية !!!
Quote: لانو جريا على العادة ،،، طلاب العمارة غالبا بميلو انو يعملو تصاميم تحاكي العمارة الحديثة وتقلد مفاهيم وتصاميم في دول اخرى ! الا انو في رأيي انو قمة الابداع ان تخرج العمارة في السودان من رحم الواقع السوداني بخصائصه الثقافية والاجتماعية والبيئية ،،، |
| |
|
|
|
|
|
|
Re: ترزي العائلات جلاليب ، عراريق ، سراويل .. و يوجد بالمحل مهندس معما (Re: يحي قباني)
|
انا نشأت في زمن كنا بنشوف دواخل الانسان و( فهمه العميق للحياة ) ...من غير ما نشوف لونه او دينه الخ ....
كان اهم شي عندنا احترام كبارنا ... وتقديرهم ... بغض النظر عن جهويتهم ... ___________________________________________________________________
تحياتي ياباشمهندس يحى أعلاه اجمل واعمق كلام يسعد أيامك يا هندسة تحياتي للمهندس عاطف والمهندس أيمن
| |
|
|
|
|
|
|
Re: ترزي العائلات جلاليب ، عراريق ، سراويل .. و يوجد بالمحل مهندس معما (Re: يحي قباني)
|
Quote: يعني انت قبضت الإطراء حقك ... و قلت يلا بلا كمال عباس ... بلا حمدى بلا عبد المنعم مصطفي ...بلا عبدالوهاب و عبود ... بلا جاك إشخانص كل ( البيوتات ) المعمارية دى طلعت اي كلام ...؟؟ |
لو كان المقام (ونسة ) زي ونستنا دي ،،، كان رددت عليهو بمثل ما قلت ولكن المقام كان مقام آخر !
Quote: اها انا اتخرجت لي 30 سنة من (هندسة معمارية) ... كان اسمها كده بالمناسبة في جامعة الخرطوم... |
كاااان اسمها كده - الآن اسمها كلية العمارة ... تفتكر ليه الناس غيرت الاسم ؟! العمارة في اغلب دول العالم - كلية قائمة بذاتها او تتبع لكلية الفنون الجميلة ،،، كونها كانت جزء من كلية الهندسة فده كان لاسباب ربما تكون متعلقة بالتأسيس النظري والمادي لها !
Quote: اكيد يا هندسة ( الخبرة ) دائما بِتُثري النقاش ... ولا ما كده ... |
هل تعتقد أن الخبرة تقاس بسنوات العمل ؟! ان كنت تعتقد ذلك - فانت مخطئ !
Quote: انا نشأت في زمن كنا بنشوف دواخل الانسان و( فهمه العميق للحياة ) ...من غير ما نشوف لونه او دينه الخ .... كان اهم شي عندنا احترام كبارنا ... وتقديرهم ... بغض النظر عن جهويتهم ... |
ده كلام جميل جدا وليت هذا الفهم عند كل الناس
Quote: 1978 انا دخلت جامعة الخرطوم ... كلية الهندسة و المعمار |
يا هو ده سبب سؤالك عن : انا اتخرجت متين ! نفس الاسطوانة المكررة - يازول انت لما ولدوك احنا كنا اتخرجنا ،،، يازول عمرك ده كلو عديناه ... ما عارف شنو ! عن نفسي ،،، عندي استعداد دائم للاستماع للآخرين بغض النظر عن اعمارهم او حتى مستواهم التعليمي ،،،
Quote: انا دلوقت عرفت الفرق لانى ما بدخل من ضمن مجموعة ال ( * ) ... |
انا اعتقد انو الفرق هو في اختلاف طريقة التفكير - اختلاف اجيال !
يااه ،،، يا ريت لو الواحد سحب المشروع من الجامعة واحتفظ بيهو ! --------- يا ريت يا باش (مهندس) لو حدثتنا عن اهم المشاريع التي عملت بها خلال الثلاثين سنة الماضية ربما يوحي لنا ذلك باسئلة تفيدنا اجابتك عليها في مستقبلنا العملي
| |
|
|
|
|
|
|
Re: ترزي العائلات جلاليب ، عراريق ، سراويل .. و يوجد بالمحل مهندس معما (Re: يحي قباني)
|
Quote: تحياتي ياباشمهندس يحى |
Quote: تحياتي للمهندس عاطف والمهندس أيمن |
هسع يا أمير أنا أزعل منك ولا كيف الفهم يعني ؟؟ البورد دا والبوردات المجاورة عارفين أن ( عمكم ) يحيي دا دفعتي بعدين أنا في البوست دا زااااتو قلت ليكم إننا سكنا في داخلية وااااحدة تقوم تخليهو باشمهندس ( أد الدنيا ) وأنا تخليني ( حيا الله ) مهندس أى نعم يحيي يستاهل ( الباشوية ) ونص ... بس العدل تساوينا بيهو مش كدا برضو ؟؟ دي واحدة
التانية تقوم تختني مع عزيزنا أيمن ( في سطر واحد ) ؟؟؟ ح أتجاوز أنو بينا زى سبعتاشر عام بالتمام والكمال .. دي ( ما فيها مشكلة ) و ح نتجاوزها لكن المشكلة أنو عزيزنا أيمن إنت شايفو حردان قصة ( مهندس ) دي من أساسا وما معترف بيها عاوز الناس يقولو ليهو معماري أها أنا ما معماري أسوي شنو ؟؟
| |
|
|
|
|
|
|
Re: ترزي العائلات جلاليب ، عراريق ، سراويل .. و يوجد بالمحل مهندس معما (Re: عاطف عمر)
|
Quote: يا ريت يا باش (مهندس) لو حدثتنا عن اهم المشاريع التي عملت بها خلال الثلاثين سنة الماضية ربما يوحي لنا ذلك باسئلة تفيدنا اجابتك عليها في مستقبلنا العملي |
يعني بترد علي طلب مشروع التخرج حقك الخلع الممتحن ...
بي طلب من مشاريعي انا ؟
طيب اديك كم حاجة كده ...
1983 - الاشتراك في تصميم و تنفيذ مبني شركة التأمينات السودانية ( مكتب عبدالوهاب و عبود ) كاربلن الاستشارية
1984 تصميم بنك ابو ظبي الوطني ( لم ينفذ )
1985 1988 تصميم و تنفيذ فلل في منطفة المنشية و الطائف عد 17 فيلا سكنية
تصميم و تنفيذ لفصر صاحب السمو الملكي الامير مشعل بن عبد العزيز آل سعود بالرياض 1989 قيمة المشروع 200 ملبيون ريال سعودي
تصميم و تنفيذ و تصميم داخلي لقصر الامير مشعل بمنطقة ضرما و المزاحمية 1991 قيمة المشروع 65 مليون ريال سعودي
تصميم قرية الشعلة السياحية بالهاف مون ( الخبر ) بالمنطقة الشرقية 1993 120 مليون ريال
تصميم و تنفيذ قصر الامير عبد الرحمن ( شقيق زوجة الامير مشغل بمنطقة عرقه1991 35 مليون ريال
اعادة تأهيل اسواق الشعلة بالمنطقة الشرقية 1994 6 مليون ريال
اعادة تاهيل شعلة الرياض 1996 3 مليون ريال
بناء فلل في مناطق الطائف ، القصيم ، حفر الباطن و الرياض و جده و الهدا ...1989-1998 اكثر من 100 مليون ريال
توقفت عن العمل الهندسي عام 99 و اتجهت للتجارة و شراء و بيع العقارات بكندا
في العام 2012 قمت ببيع و شراء بيوت و عمائر و شركات ( للغير) بلغت في قيمتها 12 مليون دولار كندي ...
ما زال لي فريق تنفيذي لعمل الديكورات و المطابخ و اعادة تأهيل الفلل و العقارات تمهيدا لبيعها ... ________________________________________________________________ في انتظار مشروعك الاعجازي ...
| |
|
|
|
|
|
|
Re: ترزي العائلات جلاليب ، عراريق ، سراويل .. و يوجد بالمحل مهندس معما (Re: يحي قباني)
|
Quote: 1983 - الاشتراك في تصميم و تنفيذ مبني شركة التأمينات السودانية ( مكتب عبدالوهاب و عبود ) كاربلن الاستشارية
1984 تصميم بنك ابو ظبي الوطني ( لم ينفذ )
1985 1988 تصميم و تنفيذ فلل في منطفة المنشية و الطائف عد 17 فيلا سكنية
تصميم و تنفيذ لفصر صاحب السمو الملكي الامير مشعل بن عبد العزيز آل سعود بالرياض 1989 قيمة المشروع 200 ملبيون ريال سعودي
تصميم و تنفيذ و تصميم داخلي لقصر الامير مشعل بمنطقة ضرما و المزاحمية 1991 قيمة المشروع 65 مليون ريال سعودي
تصميم قرية الشعلة السياحية بالهاف مون ( الخبر ) بالمنطقة الشرقية 1993 120 مليون ريال
تصميم و تنفيذ قصر الامير عبد الرحمن ( شقيق زوجة الامير مشغل بمنطقة عرقه1991 35 مليون ريال
اعادة تأهيل اسواق الشعلة بالمنطقة الشرقية 1994 6 مليون ريال
اعادة تاهيل شعلة الرياض 1996 3 مليون ريال
بناء فلل في مناطق الطائف ، القصيم ، حفر الباطن و الرياض و جده و الهدا ...1989-1998 اكثر من 100 مليون ريال
توقفت عن العمل الهندسي عام 99 و اتجهت للتجارة و شراء و بيع العقارات بكندا
في العام 2012 قمت ببيع و شراء بيوت و عمائر و شركات ( للغير) بلغت في قيمتها 12 مليون دولار كندي ...
ما زال لي فريق تنفيذي لعمل الديكورات و المطابخ و اعادة تأهيل الفلل و العقارات تمهيدا لبيعها ... |
حالتي قايلاك حلبي شغال في طرمبة
سلام ايمن وضيوفك
| |
|
|
|
|
|
|
Re: ترزي العائلات جلاليب ، عراريق ، سراويل .. و يوجد بالمحل مهندس معما (Re: جميلة ابراهيم السيد)
|
Quote: انا نشأت في زمن كنا بنشوف دواخل الانسان و( فهمه العميق للحياة ) ...من غير ما نشوف لونه او دينه الخ ....
كان اهم شي عندنا احترام كبارنا ... وتقديرهم ... بغض النظر عن جهويتهم ... ___________________________________________________________________
تحياتي ياباشمهندس يحى أعلاه اجمل واعمق كلام يسعد أيامك يا هندسة تحياتي للمهندس عاطف والمهندس أيمن |
أمير يا أمير ...
دايما تجبر بي خاطرنا يا رجل يا ذوق ...
ما تبعد و خليك قريب ...
| |
|
|
|
|
|
|
Re: ترزي العائلات جلاليب ، عراريق ، سراويل .. و يوجد بالمحل مهندس معما (Re: سيف الدولة كامل)
|
Quote: يا دفعة يا عجوز ,, انا عرست بعد الجامعة بخمسة سنوات وولدي مهندس ,,, انت ولدك بكون عميد الهندسة .
سلامات وشوقنا بحور يا يحيي . بعدين حكيتها مع الباشمهندس شديييد يا دفعة خليهو يتمدد . وتحياتي للباشمهندس
الكبير عاظف . والمهندس ايمن وان شاء الله مستقبل باهر . |
اووووو
زارتنا البركة يا استاذ سيف ...
العجز ما حكمة يا سيف ولا شنو ؟
شوقنا اكتر و طولنا ما سمعنا صوتك ...
قصدك حكيتها مع ( المعماري ) ...
ما يتمدد مالو ... و ( يَنْداح ) كمان ..
صحي يا سيف .. انت استاذ ...
كلمة منداح و اندياح الجات القاموس السوداني بعد ما مرقنا من السودان دي مصدرها شنو ؟؟
لانو بصراحة غلبتني ...
قريت قدر ما قريت ...ما لاقتني كلمة اندياح دي الا في تلفزيون السودان ... وهنا !!!
حسب ( المُنجِد ) في اللغة حق ( لويس معلوف ) ...والصدر 3 مرات
1908 ...ثم اعيد النظر في طباعته 1927 ...و بعد داك جات الطبعة الجديدة عام 1956
وانا عندي منها نسخة ...
كلمة ( ندح ) ...ندح ندحاً الشئ ووسعه ...
و ( تندح ) الغنم في مرابضها ...اي انتشرت و تبددت ...
و ( المنتدح ) السعة و الفسحة ...
و يقال : لك عن هذا الأمر ( مُنْتَدَح ) ... اي يمكنك تركه و الميل عنه
اها انديح ... وتمدد في حرف الكلام ....
القصة دى جات من وين ؟؟؟
| |
|
|
|
|
|
|
Re: ترزي العائلات جلاليب ، عراريق ، سراويل .. و يوجد بالمحل مهندس معما (Re: أيمن محمود)
|
هسع يا أمير أنا أزعل منك ولا كيف الفهم يعني ؟؟ البورد دا والبوردات المجاورة عارفين أن ( عمكم ) يحيي دا دفعتي بعدين أنا في البوست دا زااااتو قلت ليكم إننا سكنا في داخلية وااااحدة تقوم تخليهو باشمهندس ( أد الدنيا ) وأنا تخليني ( حيا الله ) مهندس أى نعم يحيي يستاهل ( الباشوية ) ونص ... بس العدل تساوينا بيهو مش كدا برضو ؟؟ دي واحدة
التانية تقوم تختني مع عزيزنا أيمن ( في سطر واحد ) ؟؟؟ ح أتجاوز أنو بينا زى سبعتاشر عام بالتمام والكمال .. دي ( ما فيها مشكلة ) و ح نتجاوزها لكن المشكلة أنو عزيزنا أيمن إنت شايفو حردان قصة ( مهندس ) دي من أساسا وما معترف بيها عاوز الناس يقولو ليهو معماري أها أنا ما معماري أسوي شنو ؟؟
-----------------
عزيزي الباشمهندس عاطف عمر يأخي انت على راسي من فوق لك التحية والتقدير ،، ما عايزين نلخبط ليكم بوستيكم ده ..
| |
|
|
|
|
|
|
Re: ترزي العائلات جلاليب ، عراريق ، سراويل .. و يوجد بالمحل مهندس معما (Re: أمير محمد ادريس)
|
تحياتي للمهندسين - الباشمهندسين عشان عاطف ما يزعل:) يا أيمن كون العمارة ليست احد فروع الهندسة دي وجهة نظر ينفيها مشاركتك في تنفيذ المشاريع الجبت صورها دي الهندسة سينس و حلول و قواعد المشاريع اعلاه عشان تتنفذ على ارض الواقع بل قبل كدا عشان تتصمم حتى بدون السنس و الحلول و القواعد الهندسية كانت ستظل حبيسة فكرة او خيال ما فالمعماري صاحب خيال وفنان نعم لكن لو اكتفى بكدا بدون المامو و مراعاتو للقواعد و الحلول الهندسية البتحول خياله و فكرته لتصميم ثم تنزله على الأرض كمشروع فما ح ينجز حاجة غير دفتر مليان رسومات خيالية اها المامك بالقواعد و الحلول الهندسية ومن قبل السنس النمّتو دراسة الهندسة و ممارستها كافية لإنك تقول انا مهندس بارتياح :)
بالمناسبة هل لازلت في دبي؟
| |
|
|
|
|
|
|
Re: ترزي العائلات جلاليب ، عراريق ، سراويل .. و يوجد بالمحل مهندس معما (Re: محمد البشرى الخضر)
|
سلام يا محمد البشرى
Quote: يا أيمن كون العمارة ليست احد فروع الهندسة دي وجهة نظر ينفيها مشاركتك في تنفيذ المشاريع الجبت صورها دي |
مسألة انو العمارة ليست فرع من فروع الهندسة دي ما وجهة نظري انا ،،، دي حقيقة العمارة حسب تصنيف الجامعات العالمية ! ،،، وان كنت انا مقتنع تماما بهذا التصنيف حسب علمي غالبية الجامعات الاوربية والامريكية لا تتبع العمارة الى كلية الهندسة لاحظ انو جامعة الخرطوم فصلت كلية العمارة من كلية الهندسة ،،، وده ما حصل عبثاَ .... مشاركتي في المشاريع دي كانت (كمعماري) ! ...
Quote: المعماري صاحب خيال وفنان نعم لكن لو اكتفى بكدا بدون المامو و مراعاتو للقواعد و الحلول الهندسية البتحول خياله و فكرته لتصميم ثم تنزله على الأرض كمشروع فما ح ينجز حاجة غير دفتر مليان رسومات خيالية |
ده كلام صحيح تماما ،،، المام المعماري بالاصول الهندسية ،،، وتقنيات الانشاء والتشييد فقط حتى يكون عندو فكرة عن شغلو ده ممكن يتنفذ والا ... لا ؟ - ولما يتنفذ - شكلو حا يطلع كيف ؟ وهل حا يأدي الغرض بتاعو والا لا ؟! يعني المجال الممكن يشتغل فيهو قدر شنو ؟
Quote: السنس النمّتو دراسة الهندسة و ممارستها كافية لإنك تقول انا مهندس بارتياح :) |
اول حاجة الهندسة علم ما فيهو سنس ولا حاجة - حسابات بس
Quote: كافية لإنك تقول انا مهندس بارتياح :) |
يازول نقول ليك نحن معماريين - تقول لينا: انتو مهندسين !!! اش جاب .. لجاب ؟!! ----------- العمارة تتبع للدراسات الانسانية
| |
|
|
|
|
|
|
Re: ترزي العائلات جلاليب ، عراريق ، سراويل .. و يوجد بالمحل مهندس معما (Re: أيمن محمود)
|
Quote: زي ما قلت ليك -- مشروع التخرج بتاعي ،،، على الاغلب تلف في الجامعة ،،، وهذه حقيقة بس ممكن اديك عينة من المشاريع الشاركت في الاشراف على تنفيذها ،،، |
سلام يا ايمن ...
انت ما شاركت في التصميم ؟
طيب انت معماري مصمم في الأساس كيف شاركت في التنفيذ؟
ويا ريت توربيني شاركت في التنفيذ كيف ؟ يعني دورك كان شنو ومعاك كم ( معماري ) و كم مهندس وتواريخ التنفيذ كمان
و مكتبكم اسمه شنو بالمناسبة... لأنو معظم الصور الجبتها هنا دي مشاريع اتنفذت بواسطة شركات عالمية ... فمكتبكم كان دوره شنو بالضبط
و يا ريت ترد علي كلام عمك ود البشري ده لأنو مهم جداً ...
و برضه كمان يا ريت تورينا ( صممت ) شنو...
اعتبرها سيرة ذاتية دائر تقدمها لشركة تانية
| |
|
|
|
|
|
|
Re: ترزي العائلات جلاليب ، عراريق ، سراويل .. و يوجد بالمحل مهندس معما (Re: يحي قباني)
|
Quote: تحياتي للمهندسين - الباشمهندسين عشان عاطف ما يزعل:) يا أيمن كون العمارة ليست احد فروع الهندسة دي وجهة نظر ينفيها مشاركتك في تنفيذ المشاريع الجبت صورها دي الهندسة سينس و حلول و قواعد المشاريع اعلاه عشان تتنفذ على ارض الواقع بل قبل كدا عشان تتصمم حتى بدون السنس و الحلول و القواعد الهندسية كانت ستظل حبيسة فكرة او خيال ما فالمعماري صاحب خيال وفنان نعم لكن لو اكتفى بكدا بدون المامو و مراعاتو للقواعد و الحلول الهندسية البتحول خياله و فكرته لتصميم ثم تنزله على الأرض كمشروع فما ح ينجز حاجة غير دفتر مليان رسومات خيالية اها المامك بالقواعد و الحلول الهندسية ومن قبل السنس النمّتو دراسة الهندسة و ممارستها كافية لإنك تقول انا مهندس بارتياح :)
بالمناسبة هل لازلت في دبي؟ |
كامل التضامن مع ود البشري ...
| |
|
|
|
|
|
|
Re: ترزي العائلات جلاليب ، عراريق ، سراويل .. و يوجد بالمحل مهندس معما (Re: أيمن محمود)
|
Quote: المعماري Diébédo Francis Kéré من بوركينا فاسو ،،، وانا متفاجئ من وجود معماري في ذلك البلد الافريقي يحمل فكرا معماريا (ناضجا) تجاه التحديات البيئية والاقتصادية والاجتماعية للعماره في بلده . بحيث انتج عملا معماريا يحوذ على ارفع جائزة في مجال العمارة في العالم (جائزة الاغا خان) وكما سترى لم يكن عملا (عبقريا) بمفهوم العامة من الناس ،،، بل كان قمة الابداع والنضج حسب محكمي جائزة الاغا خان !
|
شفت مشروع المدرسة فى بنغلادش المبنية فقط بى واسطة الحصير اظنى شفتها فى ناشونال جغرافيك .. ولو ما اخاف الكضب ىاخدت برضو جائزة الاغا خان
| |
|
|
|
|
|
|
Re: ترزي العائلات جلاليب ، عراريق ، سراويل .. و يوجد بالمحل مهندس معما (Re: وضاح عبدالرحمن جابر)
|
مشكور على التضامن يا يحيى, ما بتقصّر عارفك.
يا أيمن ... يا ولدي :) الجامعات خليها, التصنيف المهني في الإتحادات و الجمعيات الهندسية للمعماري شنو؟ هسّي في الإمارات تصنيفك في البلدية و الأشغال و جمعية المهندسين شنو؟ في الدار قروب مسمّاك الوظيفي شنو؟ في المشاريع الشاركت فيها المسمى شنو؟ مش مهندس فصل العمارة في جامعة الخرطوم عن الهندسة عندو اسباب واعتبارات تانية ليها علاقة بالكورسات و العمادات زي فصل الاسكول من العلوم و البزنس من اقتصاد
Quote: المام المعماري بالاصول الهندسية ،،، وتقنيات الانشاء والتشييد فقط حتى يكون عندو فكرة عن شغلو ده ممكن يتنفذ والا ... لا ؟ - ولما يتنفذ - شكلو حا يطلع كيف ؟ وهل حا يأدي الغرض بتاعو والا لا ؟! يعني المجال الممكن يشتغل فيهو قدر شنو ؟ |
يا ولدي انا ما اتكلّمت ليك عن اصول و تقنيات تنفيذ انا قلت ليك حلول و قواعد, وقواعد بالذات هي المعنية واحد من اساسيات تصميم المباني البتدرسوه هو التهوية مش كدا؟ اها دا جزء من مساق هندسي كبير و متشعب و في بعض كليات الهندسة يعتبر تخصص وقسم بحاله دا واحد من العلوم الهندسية و القواعد اللابد تدرسها, زيها وزي الاستركشر مثلا دي ما تقنيات تنفيذ لا دي علوم و قواعد لابد تستوعبها تماما وتستصحبها معاك في تصاميمك
Quote: اول حاجة الهندسة علم ما فيهو سنس ولا حاجة - حسابات بس |
يا ولدي كان ابيتنا بطريقتك, لكن ما تبشتن علينا هندستنا ساي :) السنس دا هو البخليك توصل بوكس اللبن من النقطة الف للنقطة باء بالطريق الأقصر و الأسلم و الأفضل, غيرك ممكن يصلها في سنة وواحد تاني بصلها في يوم لكن كشح نص اللبن السنس الهندسي هو البخليك توصّل اللبن كامل وسالم وفي الموعد المناسب:) السنس دا ببدا عندك من الكلية وبتنميه الممارسة العملية و المشاكل القابلتك وحلولك ليها قوّمت نفسي ياخ, بعد دا إلاّ ننادي ليك ناس اليوم الحار :)
| |
|
|
|
|
|
|
Re: ترزي العائلات جلاليب ، عراريق ، سراويل .. و يوجد بالمحل مهندس معما (Re: محمد البشرى الخضر)
|
محمد البشرى يا بابا
Quote: الجامعات خليها, التصنيف المهني في الإتحادات و الجمعيات الهندسية للمعماري شنو؟ هسّي في الإمارات تصنيفك في البلدية و الأشغال و جمعية المهندسين شنو؟ في الدار قروب مسمّاك الوظيفي شنو؟ في المشاريع الشاركت فيها المسمى شنو؟ مش مهندس |
في امريكا - المعماري يتبع الـAIA) the American Institute of Architects) ،،، دي الجهة البتديك الرخصة لممارسة المهنة في بريطانيا - المعماري يتبع الـ RIBA) The Royal Institute of British Architects) في ايرلندا - المعماري يتبع الـ RIAI) the Royal Institute of the Architects of Ireland) اغلب دول العالم (المتقدم منها خاصة) لها جمعيات معمارية هي التي تمنح تراخيص ممارسة المهنة ،،، حتى في الامارات والسودان في الجمعية المعمارية - نعم لسا ما مفصولة عن الجمعية الهندسية - بس موجوده ككيان قائم لايمكنك ممارسة المهنة بدون موافقته !
Quote: في المشاريع الشاركت فيها المسمى شنو؟ |
SITE ARCHITECT
وللامانة في الاوراق الرسمية للشركة بيكتبو ARCHITECT ENGINEER لأنو بخاطبو عامة الناس ،،، وحتى المهندسين حا يحصل ليهم ارتبكاك لو اتكتبت ARCHITECT ،،، زيك كده
Quote: واحد من اساسيات تصميم المباني البتدرسوه هو التهوية مش كدا؟ اها دا جزء من مساق هندسي كبير و متشعب و في بعض كليات الهندسة يعتبر تخصص وقسم بحاله دا واحد من العلوم الهندسية و القواعد اللابد تدرسها, زيها وزي الاستركشر مثلا دي ما تقنيات تنفيذ لا دي علوم و قواعد لابد تستوعبها تماما وتستصحبها معاك في تصاميمك |
بالنسبة للتوية الطبيعية فدا شغل المعماري في الاساس اما التهوية الاصطناعية فدي مهمة ناس الميكانيك في الاساس ! - دراستنا لبعض العلوم الهندسية ده ما بالضرورة بيعني انو نحن مهندسين ،،، ناس الجغرافيا مثلا - بيدرسو تخطيط مدن مثلا - هل معنى كده انهم معماريين ؟!!
Quote: يا ولدي كان ابيتنا بطريقتك, لكن ما تبشتن علينا هندستنا ساي :) السنس دا هو البخليك توصل بوكس اللبن من النقطة الف للنقطة باء بالطريق الأقصر و الأسلم و الأفضل, غيرك ممكن يصلها في سنة وواحد تاني بصلها في يوم لكن كشح نص اللبن السنس الهندسي هو البخليك توصّل اللبن كامل وسالم وفي الموعد المناسب:) السنس دا ببدا عندك من الكلية وبتنميه الممارسة العملية و المشاكل القابلتك وحلولك ليها قوّمت نفسي ياخ, بعد دا إلاّ ننادي ليك ناس اليوم الحار :) |
اقرأ المفردات دي : خرسانة ، حديد ، كهرباء ، مكنة ، ماسورة ، ظلط ، جهد عالي ، جهد واطي ............. سنس بتاع فنلتك
| |
|
|
|
|
|
|
Re: ترزي العائلات جلاليب ، عراريق ، سراويل .. و يوجد بالمحل مهندس معما (Re: أيمن محمود)
|
سلام استاذنا يحى قبانى ... وضيوفه الكرام ياخى ان من المتابعين لبوستاتك ... واستمتع بيها جداً ... لما فيها عمق وخفة ظل لا يخطئها قارىء وتحية عبرك لكل المهندسين ... لا المندسّين! و بالمناسبة انا ذاتى مهندس .... لاكين غير ! (باشمهندس بتاع نسوان) .... عدييييييل كدا
يعنى بتاع نساء وتوليد ! اوكما قال أخونا من جنوب السودان المهم ياعزيزى ... الشغلانة ما أعتقد الزول شارك فى شنو ... ومتصوّر وين ....بقدر ما المهم هو نوع المشاركة انا مثلاً قد تلقانى دارع لى سماعة فى أضانى ... ولابس لبس العمليات ... ولكن بعيدا عن شهادة تخرجى ... قد اكون شغال فى اللحظة دى فى وظيفة تمرجى او ممرض فى احدى دور العجزة والمسنين ! وكذا الحال فى الهندسة .... قد يكون المسمى الوظيفى بتاعك مهندس ... وقد يكون غير ذلك ... ولا اعتقد ان المشاركة فى مشروع ضخم يعنى بالضرورة انك كنت سيد الجلد والراس فربما كان دورك فيه لا يتجاوز مهام طُلبة لا غير !
كلنا مررنا بتجارب الامتحانات .... والتقييمات المختلفة ... ولكننا لم نصل لمرحلة خُلعة الممتحنين الخارجيين ! ......... انا شايف انو البوست دخل فى زقاق ضيق والظاهر هبش ليه وتر حساس ... وبعض الناس جقّر معاها ! وأخدت الشغلانة جد جد رغم انه يبدو لى انك قصدت المداعبة .... وانك تدحّك ليس اٍلا ! ولكن يبدو انه سيتحوّل لاستعراضات اكاديمية ومهنية...واٍبراز العضلات , ربما لنفى بعض الشبهات .... وربما لاٍثبات شىء ما !
ارجو ان ترخو الأبنص شوية وماتحكوها لمن تجيب الدم ! ......... بالمناسبة ...هو البروف قال شنو ؟؟
لك ولضيوفك خالص التحايا ....
| |
|
|
|
|
|
|
Re: ترزي العائلات جلاليب ، عراريق ، سراويل .. و يوجد بالمحل مهندس معما (Re: امير بوب)
|
Quote: وتحية عبرك لكل المهندسين ... لا المندسّين! |
Quote: قد اكون شغال فى اللحظة دى فى وظيفة تمرجى او ممرض فى احدى دور العجزة والمسنين ! |
Quote: فربما كان دورك فيه لا يتجاوز مهام طُلبة لا غير |
Quote: وبعض الناس جقّر معاها |
Quote: يبدو انه سيتحوّل لاستعراضات اكاديمية ومهنية...واٍبراز العضلات , ربما لنفى بعض الشبهات .... وربما لاٍثبات شىء ما |
تمام يا عمر بوب ،،، اتوقع الباشمهندس يحى حا يكون متشّرف بمعرفتك وباعجابك بما يكتب دمت ذخرا للوطن والانسانية
انا حا (اهرب بجلدي) من البوست ده يا با شمهندس قباني وضيوفه الكرام ،،، الواحد كان عندو كلام كتير عايز يقولو - بس حقيقة فجأة كده بقى ما عندي اهتمام با لمواصلة
فتكم بعافية
| |
|
|
|
|
|
|
Re: ترزي العائلات جلاليب ، عراريق ، سراويل .. و يوجد بالمحل مهندس معما (Re: امير بوب)
|
Quote: Prepare and supervise the snagging and de snagging works. |
ايمن يا ولدنا ...
شغل الاستشاري في المواقع ما ليهو دخل بال Back snagging and de snagging
ياخي ده شغل المقاول الرئيسي لما تكون عنده مشكله ...
وهو البعمل لي روحو snag list قبال ما يسلم الشغل للاستشاري المشرف
بعدين ياخي انت ( كمعماري ) فقط ... شغلك بورد التصاميم ...
و لو مشيت السايت بتمشي زيارات محدده تشوف التصميم حقك اتنفذ كيف ؟ و بترجع مكتبك تاني ...لانك بتكون مشغول بمشاريع اخري ...
ونفس الشي حاسب الكميات الQS
اما انك تكون مقيم في موقع كمعماري دي جديده علي ...
شغل المواقع ده حق المهندسين المدنيين ...الميكانيك ال الكهرباء ... كل الناس الما عندها ( سنس ) دي ...
وكمان بصراحة ... اللسته الفوق دي ... ما حقة معماريين نهائيا ... الكوالتي كنترول ده شغلتو براهو يا ولدنا ...
| |
|
|
|
|
|
|
Re: ترزي العائلات جلاليب ، عراريق ، سراويل .. و يوجد بالمحل مهندس معما (Re: يحي قباني)
|
Quote: المهم ياعزيزى ... الشغلانة ما أعتقد الزول شارك فى شنو ... ومتصوّر وين ....بقدر ما المهم هو نوع المشاركة انا مثلاً قد تلقانى دارع لى سماعة فى أضانى ... ولابس لبس العمليات ... ولكن بعيدا عن شهادة تخرجى ... قد اكون شغال فى اللحظة دى فى وظيفة تمرجى او ممرض فى احدى دور العجزة والمسنين ! وكذا الحال فى الهندسة .... قد يكون المسمى الوظيفى بتاعك مهندس ... وقد يكون غير ذلك ... ولا اعتقد ان المشاركة فى مشروع ضخم يعنى بالضرورة انك كنت سيد الجلد والراس فربما كان دورك فيه لا يتجاوز مهام طُلبة لا غير !
كلنا مررنا بتجارب الامتحانات .... والتقييمات المختلفة ... ولكننا لم نصل لمرحلة خُلعة الممتحنين الخارجيين ! |
يا أمير ...
سلامات ياخي ...
لا زقاق ضيق ولا شي ...
الامر لا يخلو من مشاغله ...
الاخ ايمن بس كنت متابع بوست الاستشارات حقو الدخل بيهو هنا ...
و لقيتو وقف من الكتابه الفيهو ... كانت فكرته جميله بغض النظر عن المضمون ...
بعيدن لقيت بوست حمادة بت حق ( العنصرية ) ... و قبلو دهانات كمال ترباس ...
فحقيقة استغربت بس ...لانو السيرة دي يتزعجني ...
يعني لما الزول المتعلم ... يقول عنصرية و حمادة بت ...خلينا للجاهل شنو ؟
الشعب السوداني كلو عنصري ... و الغريب انو العالم العربي كلو حاقر بينا ...
| |
|
|
|
|
|
|
Re: ترزي العائلات جلاليب ، عراريق ، سراويل .. و يوجد بالمحل مهندس معما (Re: يحي قباني)
|
Quote: تمام يا عمر بوب ،،، اتوقع الباشمهندس يحى حا يكون متشّرف بمعرفتك وباعجابك بما يكتب دمت ذخرا للوطن والانسانية
انا حا (اهرب بجلدي) من البوست ده يا با شمهندس قباني وضيوفه الكرام ،،، الواحد كان عندو كلام كتير عايز يقولو - بس حقيقة فجأة كده بقى ما عندي اهتمام با لمواصلة |
يا ايمن ...
شكلك فهمت امير ده غلط ...
الرجل ما يقصد اي شي ... بالعكس امير افتكر اننا ضاغطنك ... وده ما صاح ...
الكلام جاب الكلام ...
وانحنا ماشين ...
الدكاترة ديل اصلو ما بريدونا ...
يكتلوا في الناس و يقولوا قضاء و قدر ...
و انحنا كان ( سدابة ) ساي وقعت ... البوليس ما بحلنا ...
ما تهرب يا رجل ... الونسة معاك ممتعة ... وانت رجعتنا لي زمن جميل ...
| |
|
|
|
|
|
|
Re: ترزي العائلات جلاليب ، عراريق ، سراويل .. و يوجد بالمحل مهندس معما (Re: يحي قباني)
|
الباشمهندس ايمن سلام ياخى ...
Quote: تمام يا عمر بوب ،،، |
انا اسمى امير بوب وليس عمر بوب ... ولكن الظاهر انو تشابهت عليك الأسماء والاختصاصات !
Quote: اتوقع الباشمهندس يحى حا يكون متشّرف بمعرفتك وباعجابك بما يكتب |
والله انا الذى لى الشرف بمعرفة الباشمهندس قبانى .... وهو رجل جدير بالاحترام ... ثم ... رغم انه لا سابق معرفة لى بك ... ولا أعلم عن هندستك شىء الا من خلال هذا البوست ولكن دعنى اقول ... من الواضح ان غرض الباشمهندس قبانى هو المداعبة والمشاغلة ليك ... والرجل لاحظ تغيير خط طرحك فى المنبر وتفاوت مستوي المساهمات ... وتساءل عن ذلك بشىء من اللطف وخفة الظل ... وكان باِمكانك ان توضح وجهة نظرك وفلسفتك للأمر بكل بساطة ... وبنفس الأريحية التى بادر بها الباشمهندس قبانى .... ولكنك فى المقابل أخدّت الموضوع بصورة شخصية جدا .... حتى عندما سألك انت خريج سنة كم ؟ لم تتعامل مع الأمر بتلقائية وعفوية ... بل قد تكون فهمت الأمر وكأنه تقليل من امكانياتك وخبراتك الهندسية ... لذلك بدأت فى استعراض مؤهلاتك وخبراتك ... ودخلت مع الناس ديل فى غلاط وعملت ليك عكّة من مافى ! كان واضح جدا من مسار البوست انو صدرك لم يكن رحب فى تلقّى ملاحظة الباشمهندس قبانى ... وهى كانت فى الأساس حول مساهماتك فى المنبر ! انا ياعزيزى ... لا افهم فى الهندسة ... وليس عندى خيال المعماريين ولا حتى خيال مآته .... ولكنى استطيع ان أفرز الهظار من الجد لذلك قلت للجماعة ديل يرخو الأبنص شوية .... حتى لا تشخصن الموضوع ... وكمان عشان البوست ما ينحرف عن مساره ... وسؤاله الأساسى ! بدل ما يتحول لمعترك هندسى ... ونضيع نحن فى الكرعين. ..........
أنا لم اعنيك فى شخصك بشىء .... ولا داعى للاقتباسات التى أتيت بها من مداخلتى ... فهى كانت فى اِطار العموم .... وعن مايحدث فى الواقع انت براك الفى قلبك حرقص .... وفهمتها على انك المقصود بالكلام ! وكان من باب اولى ان يفهمها استاذ قبانى كذلك لو انها فعلا كانت كذلك ... ياخى انا اتعاطفت معاك بعد ماحسّيت انو أعمامك ديل ختّوك بين كماشة . لا اعتقد ان هناك مايستحق الانسحاب او ان تنفد بجلدك كما قلت .... وارجو ان لا تجعلنى السبب .... اللهم اِلا اذا كنت عاوز ليك مرّاقة ساكت ! ..............
عموما تحياتى .... وارجو ان تطوّل بالك ....
| |
|
|
|
|
|
|
Re: ترزي العائلات جلاليب ، عراريق ، سراويل .. و يوجد بالمحل مهندس معما (Re: يحي قباني)
|
استاذنا قبانى سلام
Quote: الدكاترة ديل اصلو ما بريدونا |
عشان شغلكم دايما غلط .... قاعدين عمركم دا كلو ... وليوم الليلة ماقادرين تحددوا الفرق بين المهندس والمعمارى شنو ؟ والله نحن غايتو لو كديسة بالغلط ساى رمت ليها طوبة من مدماك حيطة ... ما بنفوّتا ليكم ... .... ثم بينى وبينك ... ياخى فى أصعب من هندسة النسوان ؟ تقول لى برضو بيم ... واسلابة وماعارف شنو !
Quote: يكتلوا في الناس و يقولوا قضاء و قدر |
يازول هوى الكاتل الله والحى الله ... ........... ايمن دا ياباشمهندس ...قال احسن ينفد بى جلدو .... وعاوز يعملنى سبب ... رغم انى والله حنيت عليه من العصرة دى .... عصرة مهندسين جد جد !! رغم اننا كنا مستمتعين جدا بالنقاش .... والجدعات من هنا وهناك ... ومعليش لو تسببت فى شراد زولكم دون قصد !
تحياتى
| |
|
|
|
|
|
|
Re: ترزي العائلات جلاليب ، عراريق ، سراويل .. و يوجد بالمحل مهندس معما (Re: يحي قباني)
|
Quote: شغل الاستشاري في المواقع ما ليهو دخل بال Back snagging and de snagging |
بعد ما ينتهي المشروع - الاستشاري بمر على الشغل النهائي وبيكتب ملاحظاتو (غالبا بتكون ملاحظات بسيطة ) وغالبا بتكون اضرار في الارضيات والحوائط والاسف ، المقاول بقوم بمعالجة الاضرار دي والاستشاري بيراجعها بناءا على SNAGGING LIST في بعض المشاريع بكون في SNAGGING بعد بتاع الاستشاري - بقوم بيهو المستخدم النهائي للمبنى (المالك او المستأجر) ،،،
Quote: بعدين ياخي انت ( كمعماري ) فقط ... شغلك بورد التصاميم ... |
مين البيعتمد الـ ARCHITECTURAL SHOP DRAWINGS ? مين البيعتمد الـ ARCHITECTURAL MATERIALS ? مين البيستلم الاعمال المعمارية المنفذة ؟ مين البراجع الـ ARCHITECTURAL AS BUILT DRAWINGS ? مين البتابع تنفيذ الاعمال المعمارية في الموقع (DAILY SUPERVISION )؟ في الـ MEGA PROJECTS بكون في تيم معماري (مقيم في الموقع ) ،،، ما في مدني بيستلم الاعمال المعمارية ، كل مجال عندو ناسو شغل الهبتلي مافي Quote: بترجع مكتبك تاني ...لانك بتكون مشغول بمشاريع اخري ... |
في الشركات الكبيرة - التيم بتاع التصميم بكون براهو - وتيم الاشراف براهو ، شركة DAR GROUP افرعها بتاعة التصميم في بريطانيا ، الهند ، بيروت ، القاهرة . افرعها بتاعة الاشراف في : دبي ، الرياض ، جدة ، الدوحة ، انغولا ، وغيرها من الدول
Quote: نفس الشي حاسب الكميات الQS |
المشروع الحالي الانا شغال فيهو - دفعه المقاول الشهرية ما بتقل عن 2 مليون دولار ،،، احنا كاستشاري عندنا 2 حاسب كميات في الموقع خصيصا للمشروع ده !
Quote: كمان بصراحة ... اللسته الفوق دي ... ما حقة معماريين نهائيا ... الكوالتي كنترول ده شغلتو براهو يا ولدنا ... |
اللستة الفوق دي جزء من المهام بتاعتي انا حاليا ك SITE SENIOR ARCHITECT مين البتابع الكولتي بتاعة الاعمال المعمارية ،،، المعماري طبعا ،،، اليوم مثلا - في المشروع الانا شغال فيهو المقاول قدم لي INSPECTION REQUEST لمصعد كمان قول لي المعماري بيستلم شنو في المصعد ! ---------------- انا شخصيا لحدي سنة 2005 كنت مفتكر زيك كده ،،،
| |
|
|
|
|
|
|
Re: ترزي العائلات جلاليب ، عراريق ، سراويل .. و يوجد بالمحل مهندس معما (Re: أيمن محمود)
|
عزيزنا باشمعماري أيمن ( صاح كدا ؟ ) تمشي وين ياخ ؟؟ ما دام الناس تجمعت بنفس رايق خلينا نتونس شوية
رمية
ميزة بيت العزابة الكلمتك عنو في أول البوست أنو كان مركز إستقطاب لمعظم ( المعماريين ) الشغالين في الخرطوم خاصة ( أهل العوض ) و ( المعماريين ) القادمين من الأقاليم موش أولاد الخرطوم المرفهين زى ناس يحيي قباني دا الله يطرا بالخير ( المعماري ) الطيب المادح كان يجينا من مدني
في مرة من المرات في واحد من الأصدقاء ( ما معماري وما مهندس ) محتفل أنو تم بناء بيتهم في أمدرمان الثورة ( الحارة الكم ما متذكر والله ) المهم كان عازم ناس الميز غداء يوم الجمعة... الجمعة ديك البيت كان مليان ( معماريين ) ..أتحشرنا في ( بوكس ) الطيب المادح ومشينا الراجل كان فرحان بالبيت فرحة شديدة قال أخوانو التلاتة المغتربين في السعودية كانو بيرسلو ليهم القروش شهرياً .. أنجز البيت في وقت قياسي ... وصلنا البيت ... الصيوان في الشارع حدادي مدادي .. الراجل من فرحتو قال لأخوانا المعماريين لازم تدخلو البيت تدوهو نظرة...دخلو المعماريين وأخدوا لفة في البيت ... بدأت التعليقات أو قل ( الإنتقادات ) .... المعماري ( البـليـد ) دا منو العمل ليكم الخرطة دي ؟؟ معقول في زول يعمل شبابيك في الناحية الغربية ؟؟ معقول في زول يخلي الغرف....... ؟ ومعقول في زول..... ؟ ومعقول في زول...... ؟
زولنا المسكين فرحتو طارت ليهو في راسو ... ولمن الكيل فاض بيهو قال ليهم
ياخوانا عليكم الله ( معماركم ) دا خلوهو في ( ديم القنا ) حقكم ... نحن بيتنا دا عاجبنا كدا
_______________
ليتك عزيزنا أيمن تقدم لنا رؤية معمارية نقدية للمشاريع التي شاركت في تنفيذها خاصة وقد رأينا أنها مشاريع عالمية وعالية المواصفات رؤية نقدية تشمل الفكرة التصميمية ... وماذا كنت سوف تضيف لها لو كنت أنت المصمم ؟؟ أهم المشاكل التي واجهتكم في التنفيذ وكيف تم إيجاد الحلول لها ؟؟
| |
|
|
|
|
|
|
Re: ترزي العائلات جلاليب ، عراريق ، سراويل .. و يوجد بالمحل مهندس معما (Re: محمد البشرى الخضر)
|
محمد البشرى
Quote: أيمن تقول ما مهندس كيف, اسّي دي مش حردة مهندسين :) |
بالمناسبة انا كنت جادي في الحردان ،،، بصراحة سألت نفسي سؤال - حا تستفيد شنو يا ايمن من الرد على ناس ما قادرة تقرأ بموضوعية ؟ لو لا حظت في المداخلات بتاعتي السابقة في مجهود كبير اتبذل وزمن كتير جاني احساس انو كان في الفاضي احمد ليك يا محمد انو تداخلك كان موضوعي جدا ، وكان ليهو دور اساسي في النقلة النوعية للبوست
| |
|
|
|
|
|
| |