|
|
 جمال الوالى يشترى رقم التلفون 123000000 بملايين الجنيهات
|
طفيلى الانقاذ جمال الوالى يشترى رقم تلفون مميز بملايين الجنيهات !
March 20, 2013
(محمد الطيب الأمين – فنون)
رقم مميز صاح .. زي رقم محاسن لقيمات !!
سعر الرقم أغلى من سعر (الواطة) !!
وناساً حالا زين ..
مصنع .. مصنعين
طين فى طين .. ووين
ما مرابا مُر.. بارد همها
لا يعرق جبين .. ولا وشاً يصُر
عين والله .. عين
كلها كمها .. وهمها هان قدُر
فى الجنة أم نعيم .. فى الجنة أم قُصُر
يا عبد الرحيم إلِّىِ ورا القبُر
ويلكد فى النعال
فتاح يا عليم
وإن كان الفقر يا عبد الرحيم
أشبه بى الكُفُر
*أثار الخبر الضجة الذى أوردته صحيفة (الاهرام اليوم) أمس الأول ردود فعل صارخة فى كل الأوساط !!
* الخبر يقول إن هناك ( نزاع حاد بين رئيس المريخ المستقيل جمال الوالى ورجل أعمال شاب اسمه النور فى رقم تلفون )!!
* رقم تلفون هو سبب النزاع !!
* جمال الوالى يقول إن الرقم حقه والنور قال الرقم حقو !!
* الرقم كما نشرته صحيفة (الاهرام) هو (0123000000) هذا هو الرقم !!
* رقم مميز صاح !!
* زي رقم محاسن لقيمات !!
* مربط الفرس فى الموضوع ده هو (سعر) الرقم !!
* حفاظاً على مشاعرى وعلى مشاعر ناس كتار أمثالى كنت لا أود الحديث عن السعر !!
* ولكن وبما أن (الاهرام) قامت بالواجب فلا حرج فى ذلك !!
* جمال الوالى قال هو اشترى الرقم ده قبل فترة بمبلغ (35) مليون جنيه بالقديم !!
* ورجل الأعمال الشاب قال هو اشترى الرقم ده من إحدى منافذ البيع بمبلغ (85) مليون جنيه بالقديم !!
* صحيفة (الاهرام) من جانبها علمت أن الرقم ده تم عرضه قبل أيام على قطب المريخ إبراهيم ملاح بمبلغ (124) مليون بالقديم !!
* عزيزى القارئ نحن نتحدث عن (رقم تلفون) وليست (قطعة أرض) !!
* ده رقم ما قطعة واطة !!
* الوالى اشتراهو بـ(35) مليون وختاهو فى البيت .. يعنى ما شغال بيهو !!
* والنور اشتراهو بـ(85) مليون وبرضو خلاهو فى البيت ساى !!
* مجدوع فى البيت ساى !!
* يعنى زى لما تشترى ليك شريحة وتجدعها أو تنسى رقمها !!
* نفس الفكرة !!
* الجماعة ديل بيشتروا أرقام بالأسعار دى .. طيب العربات كيف ؟؟
* هسه عليك الله زى الجماعة ديل بيكون عارفين (رطل السكر بكم ) !!
* الله أعلم غايتو يكونوا عارفين رطل السكر بكم وكيلو اللحم بكم ؟؟
* إحنا ما حاسدين والله !!
* وأى زول عندو قروش إن شاء الله ربنا يزيدو !!
* وإن شاء الله ربنا يفتحها ليهم اكتر واكتر !!
* الرزق من الله ونحن لا نعترض على رزق جاى من الله !!
* ولكن !!
* فى ناس ساكنة بالإيجار !!
* وفى ناس بالإيجار ما لاقين سكن !!
* فى ناس الواحد بيبيع تلفونوا عشان يتعالج ؟؟
* وفى ناس الواحد تلفون ما عندو عشان يبيعو !!
* فى ناس ما عندها حق الوجبة ولا حق المواصلات ولا حق المدرسة !!
* أنا عارف الفقر ليس هو مسؤولية جمال الوالى !!
* وعارف كمان أنو لو الناس تعبانة الوالى ما عندو ذنب !!
* عارف والله !!
* لكن أنا بتكلم فى مشاعرنا !!
* بتكلم فى المفارقات !!
* بكره سأتحدث عن قصة حدثت أما عينى وعلى الناس أن تقارنها بقصة هذا الرقم !!
* قصة تجعلك تبكى وتجعلك تحمد الله على العافية فى كل ثانية !!
* قصة من داخل الصيدلية !!
* عندى سؤال لجمال الوالى !!
* سؤال واحد بس ؟؟
* يا الوالى الرقم ده ياهو القاعد يضرب ليك فيهو الحضرى ولا عندك رقم تانى ؟؟
* حضرى بـ(الحاء) !!
* الرقم ده مميز لكن عادى برضو !!
* لو عندى رقم مميز ولا ما مميز فى النهاية بتكلم !!
* شنو يعنى ؟؟
* انتظرونا غداً لو ما متنا !!
* يا أستاذة : البيت الجنبنا باعو بـ(60) مليون فقط !!
* و..و..
* وناساً حالا زين !!
|
|
 
|
|
|
|
|
| |
محمد علي عثمان
jini
مدثر صديق
فيس بوك
تويتر
انستقرام
يوتيوب
بنتيريست