|
|
|
 Re: أيهما أفضل للهلال ؟ .. أعتقد هذا أفضل . (Re: طلحة عبدالله)
|
تخيل معي عمر الفاروق وقد إمتطي الفارهة إلى جوار الأمين البرير ثم ضربا معا نواحي
الأقاليم بعيدها وقريبها لإستجلاب لاعبين جدد للهلال, فكيف يكون مستوي هولاء اللاعبين وإلى
أي مدي يمكن أن يفيدوا الفريق فنيا؟ مع التسليم بان توفيق اللاعب أو عدمه في أي فريق ربما
لا يكون له ارتباط بمستواه الفني وحرفنته ومهاراته الكروية في بعض الأحيان.
أو تخيل معي أبو عمير وقد رن تلفونه الجلاكسي أو أية حاجة وكان المتصل من الجانب الآخر
القطب الهلالابي فلان الفلاني ليأمره بالتوجه غدا أو بعد غدا بالكتير إلى مجاهل أفريقيا
وعدم العودة من هناك إلا وبمعيته ثلاثة لاعبين محترفين على الأقل، فكيف سيكون هولاء المحترفين،
( يمكن التوجه طبعا إلى مجاهل البرازيل أو كردستان أو رأس الرجاء الصالح.. الخ )
على أقل الفروض والواجبات التى يمكن أن يقوم بها عمر الفاروق كصحافي هلالابي كبير وصاحب
حظوة تخيل معي كيف سيكون الرد على حكم ظلم الهلال أو زميل مريخابي سخر منه أو اتحاد
عام تحامل عليه، أو ساي كدا قول الهلال دا فاز على المريخ .
| |
 
|
|
|
|
|
|
|
|
Re: أيهما أفضل للهلال ؟ .. أعتقد هذا أفضل . (Re: محمد البشرى الخضر)
|
جرجير
موضوع البوست دا كلو مبني على إعتبار Quote:
وبما إن الحكاية كلها تعصب في تعصب
وإنتماء ضيق في انتماء ضيق فأحسن كثير جدا في هذه الحالة عمر الفاروق الذي وإن كان
متعصبا ولكنه مفيد ككاتب صحفي يمكن الاستفادة من كتاباته وأرائه عكس الآخرين |
وطبعا معلوم لدي الجميع إن كثير من الصحافيين يتدخلون في الشأن الفني
بطريقة مباشرة أو غير مباشرة بما في ذلك استقدام المدرب واللاعبين الأجانب
بل وربما كانوا أصحاب رأي نهائي في الحتة دي، عشان كدا قلت عمر الفاروق أحسن
للهلال فهو من وجهة نظري ممكن يجيب مدرب أو لاعبين مواطنين وأجانب أفضل كثيرا.
وبرضو عمر الفاروق أفضل لو الحكاية بقت فيها نقد وعلاج بالكي، تماما كما هو
جيد في حال الدفاع عن الهلال ضد كتاب المريخ ..
ومع دا كلو فهو في حال قرر الكتابة بعيدا عن هلاليتو ممكن الرياضة تستفيد من كتاباتو قياسا على
ثقافتو الكروية العالية وإطلاعو الواسع، ودا ما متوفر عند أغلب الباقيين اللي هم كتاب كبار
في الهلال .
| |
|
|
|
|
|
|
|
|
|
Re: أيهما أفضل للهلال ؟ .. أعتقد هذا أفضل . (Re: طلحة عبدالله)
|
طبعا يا تنظير كلامك في الحتة صاح من ناحية احترام التخصصات و كل واحد يلعب دوره وكدا
لكن من باب الغلاط لأجل الغلاط بقول ليك و المشكلة وين كون الصحفي يسخر خبرته ومعرفته و عينه النجيضة في سبيل فايدة فريقه و يدلهم على اللعيبة الكويسين, و بالمرة يفيد ويستفيد
| |
|
|
|
|
|
|
|
|
Re: أيهما أفضل للهلال ؟ .. أعتقد هذا أفضل . (Re: محمد البشرى الخضر)
|
Quote: بقول ليك و المشكلة وين كون الصحفي يسخر خبرته ومعرفته و عينه النجيضة في سبيل فايدة
فريقه و يدلهم على اللعيبة الكويسين, و بالمرة يفيد ويستفيد
|
ما في أية مشكلة يا جرجير لو فعلا بفيد ويستفيد
لكن المشكلة الكبيرة جدا والمودية كورتنا التوج إنو الصحفي دا يكون معرفتو
في اللاعب المفيد زي معرفتي في اللغة الجامايكية .. يلغف ويبزق .
وعندك التجارب لي وراء ما تديك الدرب .
عشان كدا بقول زي عمر الفاروق دا أفضل من يكون صحافي هلالابي عندو رأي وقرار..
ممكن في الصفقة الواحدة يلبع تلتمية أربعمية ألف لكن يجيب ليهو لاعب يفيد الهلال
لمدة خمس سنين طويلة.
أنا والله مستغرب التفاف الجماهير والناس حول صحافي كل ميزتو إنو بشتم الفريق
التاني وبديهو في التنك .. يعني شنو ؟؟؟؟؟؟
| |
|
|
|
|
|
|
|
|
|
Re: أيهما أفضل للهلال ؟ .. أعتقد هذا أفضل . (Re: طلحة عبدالله)
|
في الأيام الأخيرة تابعت كتابات ومداخلات وردود أمير عمر الذي أتمناه مريخابي
يكون مقابل لعمر الفاروق في الهلال ..
المحيرني إنو ( عامر ) عمر دا ما ظهر لي إلا في اليومين الفاتوا ديل مع إنو والله
المفروض يكون ليهو كم وحلغمية سنة قاعد يكتب هنا.
أمير عمر برضو زول بعرف يكتب ويقول شنو بطريقة مميزة جدا في الكورة ..
لو عملت جريدة واللا بقيت مسؤول فيها بجيب عمر الفاروق كهلالابي وأمير عمر
كمريخابي على أن يراسلنا تامبا لما الهلال يكون غالب فقط أما جرجير
فممكن نديهو الاشراف على صفحة الولايات .. 
| |
|
|
|
|
|
|
|
|
|
Re: أيهما أفضل للهلال ؟ .. أعتقد هذا أفضل . (Re: keiga2000)
|
يا أبو مصطفي فعلا الهلال القاصدو أنا ياهو أبو أربعة الفوق دي فضلا
عن أربعات وخمسات أخري قديمة، عشان كدا قلتا للجماعة غيروا من باب :
((إِنَّ اللَّهَ لا يُغَيِّرُ مَا بِقَوْمٍ حَتَّى يُغَيِّرُوا مَا بِأَنفُسِهِمْ))[الرعد:11]
لو جابو عمر الفاروق من الصفوف الخلفية وختوهوا في الصفوف
الأمامية فعندي يقين كبير إنو الهلال سينتصر في معاركو اللاحقة
ولو ما انتصر أقلها سيحفظ موية وشو .
| |
|
|
|
|
|
|
|
|
|
Re: أيهما أفضل للهلال ؟ .. أعتقد هذا أفضل . (Re: طلحة عبدالله)
|
حولااا يا طلحة هو بالله فحوى البوست كده ؟؟؟ :)
عارف انا شايف العنوان وقلت طلحة جوة بيكون قاصد هل أفضل للهلال يطير بدري وما يتعب نفسو في التأهل لأنو الجاي أغرق..أم على الهلال شحذ الهمم والفوز بالتلاتة والتأهل وبعد داك يجهز حالو للخمسات والستات..
طبعاً انا بنصحك بي زول إسمو أحمد الريح يستلم الصفحة بدلي لكن ده ما بيمنع عمودي يكون في الصفحة الأخيرة :):)
بالمناسبة يا طلحة فيما يتعلق بي الأخ أمير فهو إبن العم عمر علي رئيس نادي الهلال الأسبق ...يعني من أصحاب لاشي زاااتا ..
| |
|
|
|
|
|
|
|
|
|
Re: أيهما أفضل للهلال ؟ .. أعتقد هذا أفضل . (Re: عمر الفاروق)
|
آآيي والله ..
مرق من بالي كلو كلو ..
كلمو لينا بالله يا أبو عمير
بعدين أنا ما قلتا عندك صفحة قلتا عمود عمووووووود بس
لكن ممكن مرة في الأسبوع تعمل لينا صفحة منوعة كفر على وتر ..
مرة عليك ومرة على أمير عمر ..
بالنسبة للأعمدة فقطع شك ح تكون في الصفحة الأخيرة إتا
يمين وأمير شمال وطبعا يوميا .
وهسع بعد ذكرتني أحمد الريح فممكن نطلب منو صفحة أسبوعية ونعفيك
إتا منها .. لكن بس كدا بكون عايز واحد مريخابي عشان يعمل لي صفحة
أسبوعية برضو وأريح (عامر) منها إسوة بيك .
آآآآآآيي والله ذكرتني أحمد الريح ياخ 
| |
|
|
|
|
|
|
|
|
|
Re: أيهما أفضل للهلال ؟ .. أعتقد هذا أفضل . (Re: طلحة عبدالله)
|
طلحة ازيييييك انت والزول القاعد جمبك
اها رايك شنو يا طلحه فى الصحفى البيكتب الكلام , و بكره ناس مجلس الاداره يطلعوا قرار بى رايو
الصحفى دا مش كده وبس تانى يوم كل الصحفيين يكونوا مدورين نفس المكنه وبى نفس التقسيمه.
(راجع كتابات مزمل ابو القاسم ) ياخ دا مركب مكنة رئيس نادى عدييييييل وممكن يشطب ويسجل ويشيل
المدرب ظاااااااااتو والله صحى ..
بالنسبة لى انا ياطلحة الصحفى الرياضى زمااان كان زوول عادى ومازول فنى يعنى ماعندوا علاقه فنية متخصصة فى الكوره (يعنى
ممكن يكون من الله خلقوا مادقاها ولا بتاعت الشراب ديييك ) ممكن يكون زول قادر يفهم الواقع كويس
يحلل الوضع الادارى ونتائج الفرق والاداء و....الخ .
الصوره اسسع ياعمك بقت فيها تغيير طبعاً اسسسع عندنا صحفيين فهمهم والمشجع العادى وااااااااحد ,,
لك وعج وتك شديييييييد والله واحدين المشجعين افهم منهم .
وبرضوا فى وضع جديد بتاع تخصص وصحافيين واعلامين عندهم علاقة علمية وعملية بالكوره وقادرين وعندهم
الامكانيات البتخليهم ينجحو فى المجال دا ..
عموماً يا اخ انت من الناس الانا قاعد استمتع فى القراية ليهم ومعاك اقلام جميله تانية فى الحوش دا
وكذلك الاستاذ عمر الفارق صاحب الرؤية النافذه العميقه
تسلم يا حبيب
| |
|
|
|
|
|
|
|
|
|
Re: أيهما أفضل للهلال ؟ .. أعتقد هذا أفضل . (Re: اسلام عبد الرحمن عمر)
|
شكرا كتير يا اسلام عبد الرحمن
فعلا كلامك الفوق دا ينطبق على واقع الصحافة الرياضية التعيسة وبدون تحديد أسماء
يمكن القول إن ما يفعله الذين يكتبون في الصحف هو في الحقيقة تشجيع مدرجات بل
وأكتر تعصبا بسبب الإنتماء للأندية والعاطفة الزائدة، فاذا أضفنا لهذا الاعلام السلبي
سلبيات أخري معروفة وموجودة بكثرة في الوسط الرياضي فلا عجب إذن أن تظل كورتنا السودانية
متخلفة وعرضة دائما للنكسات والنكبات .
المشكلة الكبيرة يااسلام إن هذا الإعلام أفسد ذوق القارىء والجمهور وحجم طموحاته وجعل
كل أمنياته محصورة في فوز الهلال أو المريخ بالبطولات المحلية الضعيفة .
وزي ما قلت لود البشرى فوق لو إن الصحفي الذي يتدخل في الشئون الفنية خاصة فيما يتعلق
باستقدام المدربين واللاعبين كان ملما بهذه الجزئية وناجح فيها لما كانت هناك مشكلة بل
بالعكس يمكن يكون في تطور للمستوي، لكن المصيبة إنو الصحفي دا يكون فاشل لا يفرز الكوع
من البوع في الأمور الفنية ولا يهمه إلا تكبير كومه من المصالح الشخصية والمكاسب الاقتصادية
على حساب المصلحة العامة.
أنا والله أستغرب كيف أن مثل هولاء مازالوا مصدر ثقة وكلمة مسموعة لدي الإدارة والجمهور
برغم إن كل تنظيراتهم وأرائهم ومشوراتهم في الأمور الفنية قادت لفشل ذريع ومتكرر .
| |
|
|
|
|
|
|
|
|
|
Re: أيهما أفضل للهلال ؟ .. أعتقد هذا أفضل . (Re: طلحة عبدالله)
|
| Quote: أيهما أفضل للهلال ؟ .. أعتقد هذا أفضل . |
أحسن حاجة يعملها الهلال يتجوز ويقعد في البيت .. والله صحي
(خسوساً) بعد 83 سنة محاولات لبطولة خارجية
..
..
عارف في ناس كده بحاولوا يقتلوا الابداع والابتداع
تابعت يومداك حلقة عن تسجيل منتدى محبي المريخ للاعب سليماني
الحلقة كانت في قناة الخرطوم ..
استغربت لكمية الانتقاد الموجهة للمنتدى رغم المبادرة الجميلة منهم والتي تستحق الشكر
المنتدى رشح اللاعب وجاب السيرة الذاتية لمجلس الادارة
وهي سيرة ناصعة (ورقياً) ولغاية هنا عداهم العيب والباقي مفروض يكملوا مجلس الادارة والمدرب
وافق مجلس الادارة على تسجيل اللاعب وتكفل منتدى المحبين بدفع المقابل المالي
الكوكي جاء وقال ليهم اللاعب ما نافع معاي وشوفوا ليكم طريقة يتخارج بيها مني
ليس هناك ما يمنع الصحفي او المتابع للشأن الرياضي من العمل ككشيف لاعبين
الفيصل والقرار النهائي سيكون عند مجلس الادارة والمدرب ولا اعتقد بخطأ المنتدى
تحياتي
| |
|
|
|
|
|
|
|
|
 Re: أيهما أفضل للهلال ؟ .. أعتقد هذا أفضل . (Re: اسلام عبد الرحمن عمر)
|
| Quote: عارف انا شايف العنوان وقلت طلحة جوة بيكون قاصد هل أفضل للهلال يطير بدري وما يتعب نفسو في التأهل لأنو الجاي أغرق..أم على الهلال شحذ الهمم والفوز بالتلاتة والتأهل وبعد داك يجهز حالو للخمسات والستات.. |
والله فعلا ياعمر انا جيت شايل جراح .. وقلت المنظراتي دا عايز كمان ينظر لينا نحن نطير متين وكيف ولييه ..
لكن بالقريتو دا .. اخير يجي صبري طـه بسرعـة ..
| |
|
|
|
|
|
|
|
|
|
Re: أيهما أفضل للهلال ؟ .. أعتقد هذا أفضل . (Re: tmbis)
|
يا اللمين ليس هناك ما يمنع أن يكون كشيف إذا عندو القدرة لذلك لكن المشكلة
يكون فاشل ومو فارز ومع ذلك يشتغل كشيف عشان يملأ جيبو بس ..
يا تامبا عليك الله ما تجيب لينا صبري طه دا هنا .. غايتو لو جاء عشان ما يمعط
لينا البوست المهم دا بقول ليهو تعال أشتغل لينا كلمات متقاطعة في الجريدة
المرتقبة، يمكن قلبو يرق 
...........
بالمناسبة يا تامبا جهز نفسك على صفحة إسبوعية قول فيها العايزو كفر ووتر ويا حبذا لو ركزت
على الوتر دا على شرط تبعد لينا خالص من الأميرة عشان ما أخصم منك مرتب سنتين .
| |
|
|
|
|
|
|
|
|
|
Re: أيهما أفضل للهلال ؟ .. أعتقد هذا أفضل . (Re: طلحة عبدالله)
|
عارف يا طلحة الأيامات دي في ظاهرة غرييبة عجيييبة طلعت موضة ..صحفيين كتار ما كان ليهم علاقة بي الكورة ..مثقفين كتااار ما كان ليهم علاقة بي الكورة..فنانين كتااار ما كان ليهم علاقة بي الكورة .. فجأأأأة كده الناس ديل ظهروا في توب الناقد الرياضي بل والمشجع المتعصب ..انا ما بكضب عليك في نظرية التعصب دي بختلف معاك وبجيك ليها لي قدام كان ربنا هوون ..لكن بالجد عايز افهم قصة الناسالاتشوبرو فجأة فيينا ديل !!!!
يعني مثلا هيثم كابو يجيك ويتكلم عن الهلال ..الزول الشيوعي بتاع جريدة عالم النجوم داك الكان كاتب يقال إنو سياسي.. إيمان لندن وافراح عصام وووو الامثلة كتييرة ..
ديل يا طلحة لقو وسطنا الرياضي ده وسط حلو وناسو بسيييطة وقلبها ابيييض بغض النظر عن المشاحنات العرضية واللي انا بشوفا ملح الرياضة ..الناس ديل جو خشو في الوسط ده عشان لقوهو اسرع وسط يكسب الشهرة ..صلاح ادريس مثلا قعد يبحت سنييينو كلللها للشهرة من مصنع الشفا للفنانين للشعرا للملحنين للعرس و و و ورغماً عن كده ما وصل للشهرة اللي وصلها فقط لمن دخل نادي الهلال..
الكورجة بتاعت ناس سيد احمد ومعتصم جعفر ومنو ومنو ديلك ما بيفهمو قاف من القانون يا قول البروف شداد واتحككرو في الرياضة..
كمية من وزراء الشباب والرياضة الما بيعرفو الكورة فيها كم لاعب في الميدان..
وعلى ذلك قس..
عارف يا طلحة ..ما انتقاص من مزمل ولا تقليل من شأنه لكن مرة حنني جداً وهو بيحاول يتكلم عن البروف كمال شداد والقوانين ..البروف ما منزه عن الخطأ لكن انا اعلم تماااما ثقافة مزمل ثقافة تلاقيط تعتمد على نشطاء المنابر وسرقتهاثم التلاعب بالكلمات ونسبها إليه ..مزمل لمن فقد منطقو مع شداد جا ودقس دقسة عمرو وهو بيقدح في نزاهة البروف المالية!!!
قادر تتخيل الحتة دي؟؟؟
| |
|
|
|
|
|
|
|
|
|
Re: أيهما أفضل للهلال ؟ .. أعتقد هذا أفضل . (Re: عمر الفاروق)
|
والله يا أبوعمير حكاية تشوبر الناس القلتهم ديل عامل لي إشمئناط في جسمي كلو، ما عشان بقوا
مشاهير أو اغتنوا .. لا أبدا والله، دي أرزاق بيد الله يوزعها لمن يشاء، لكن لأنهم أكدوا على
حقيقة الناس كانت ولسة بتتداري منها وهي إنو الصحافة الرياضية دي مهنة من لا مهنة له.
المصيبة الأكبر من كدا إنو لو لميت أغلب الجماعة ديل (إذا ما كلهم) في خلاط وخلطهم ما بتطلع
منهم حتة مرقة فيها الفائدة .. كلها كواريك وحرق عمم وشوية وسب وشتم وإبتذال وإبتزاز وحرق بخور
وضرب نوبات، إضافة لكتير من التنظير اللي لا يقدم ولا يؤخر .
ودا كلو يا أبو عمير دليل قوي على كلامي القاعد أقولو (بمناسبة ودون مناسبة) إنو الصحافة
الرياضية أفسدت الأذواق والعقول وحجرت فكر الجمهور وحجمت طموحو وخلتو يشوف الكتابات الموضوعية
والناقدة والممكن تقدم لي قدام بى ملل وطمام بطن،إذا ما اعتبرا فلسفة أو جن كلكي .. ودا أتاح
الفرصة لأي زول (عاطل موهبة) يجيد التشجيع وملم بفنونو من تعصب وخلافو يكون صحفي كبير ليهو قراء
ومعجبين وربما قروب في البوك فيس أو أيا كان إسمو .
أعرف صحافيين كبار ( بتقييم الزمن دا ) كانوا مجرد مشجعين وعمال مطابع وموظفي رسبشن،
والكويسين خالص من البقوا صحافيين ديل كانوا مجرد مخبرين ينقلون أخبار مباريات الروابط للصحف
كلام خشم (لعدم مقدرتهم على الكتابة الواحدة دي ) وتانين بتاعين كلمات متقاطعة وتسالي وما شابه،
وصدقني أنا فتحت البوست دا ليكم إنتوا البتكتبوا هواية ديل وخجلان عديل منكم كوني أقول ليكم تعالوا
أبقوا صحافيين لتركبوا في سرج واحد مع الجماعة المقصودين ديل لأنو أجزم وأحلف يمين ستين إنو ما في
أية مقارنة بينكم وبينم من حيث أية حاجة.. وأية حاجة دي تشمل الموهبة والمقدرة على التعبير والأفكار
والثقافة والإطلاع.
يا أبو عمير لو ما ضربو رمي ساي وشختك بختك صدقني أصلو ما مفروض الجماعة ديل يكونوا صحافيين
وإتوا حايمين بالمنابر وقاعدين تجدعوا في أفكاركم وكتاباتكم الدسمة دي في أسافير الله ساي .
Quote: ودقس دقسة عمرو وهو بيقدح في نزاهة البروف المالية!!!
|
غايتو أظن غير آثم إنو الحتة دي تحديدا كانت مفترق
طرق في نجومية مزمل كصحافي جماهيري وأعتقد والله أعلم إنو شعبيتو
انقسمت نصين دا لو ما بقت تلت أو أقل .
| |
|
|
|
|
|
|
|
|
|
Re: أيهما أفضل للهلال ؟ .. أعتقد هذا أفضل . (Re: محمد البشرى الخضر)
|
يا جرجير إتا قايل صفحة الولايات دي بدوها أي زول ؟؟
دي لازم المشرف عليها يكون متمكن جدا وعارف كل صغيرة عن فنون الخبر والتحرير الصحفي
وأهم من دا كلو يكون صبور وبالو سلبة .
أخبار كورة الولايات في الغالب تجيك كلام خشم بالتلفون .. يضرب ليك منو كدا مراسلنا من
سافل الصعيد ويقعد يتونس معاك عن كورة أمبارح في دوري السودان اللي إنتهت بفوز الصمغ
العربي على القطن طويل التيلة خمسة صفر ومنو عمل ضربة جزاء ومنو شات الكورة من الكورنر
لافة لغاية من دحلت والحارس يتفرج ومنو كدا تفة للحكم في وشو و..و.. واتا عليك انك تطلع من النقة
القريب ساعة دي خبر لا يتعدي ال180 كلمة .. دا طبعا غير البرسلوا ليك فاكسات من كم وأربعين ورقة
وعشان تلقي بداية الخبر عليك تفتش الكم وأربعين ورقة ورقة واذا كتا سعيد الحظ وما لقيت
خمستاشر عشرين ورقة ممسوح نصهن أكيد بتلقي تلاتة أربعة ورقات ناقصات وعليك أن تألف لتتم
الممسوح أو الورق الناقص عشان يستقيم التقرير و.و.و .
الكلام دا يا جرجير تقريبا ممكن ياخد منك خمس ست ساعات على الأقل دي تنسيق بس.. وبعد كدا
تمش توديها الجمع الإلكتروني أو الصف ويقوم البصف دا يناديك بعد أقل من خمس دقائق عشان
تقرأ ليهو تلاتة أربعة سطور ما واضحات وممكن يكرر المناداة دي كذا مرة إتا وحظك.. وفي
الأثناء إتا بتكون غاتس في الأرشيف عشان تطلع الصور المناسبة لكل مادة وبعد تلقاها بعد جهد
جهيد يجىء دورك كمشرف على الصفحة عشان تمش تنزل المواد في الماكيت بتاع الجريدة مع المصمم
وفي الغالب تلقي نفسك محتاج لتمامة يعني عندك كم بوصة كدا فاضيات في الصفحة وعليك أن
تتمها إن شاء الله بى نعي أليم أو تهنئة خطوبة أو أية حاجة تكمل الصفحة دي .
وبعد دا كلو بكرة لما تجيء الجريدة يضربوا ليك العشرات ما بين لائم ومستنكر وزعلان إما لأنك
نسيت فلان ما كتبتو وإما لأنك حجمت مساحة المباراة الفلانية وإما لأنك أخترت صورة شينة للاداري
الفلاني.. الخ .. دا طبعا غير البضربوا ليك يشتموك أو يناقشوك في خبر باعتبارك إتا النزلتو
ما المراسل بتاعك .. ولازم تتحمل دا كلو .
| |
|
|
|
|
|
|
|
|
|
Re: أيهما أفضل للهلال ؟ .. أعتقد هذا أفضل . (Re: محمد البشرى الخضر)
|
جرجير
خلاص يا زول وطالما كبيت الجرسة من صفحة الولايات أمس لينا قسم الترجمة لصفحة الرياضة العالمية
وممكن تجرجرنا بعمود إسبوعي في الكورة المحلية.. وفي حالة الهلال يكون لاعب برة واللا جوة برضو
عندك الخيار إذا عايز تكتب عنو مقال بى عناوين في صفحة تلاتة .
أها رأيك شنو ؟
الكلمات المتقاطعة دي بجونا المتدربات من كليات الإعلام وبنعلقا في رقبة أول واحدة نحس
إنها ممكن لى قدام تستمر معانا.
| |
|
|
|
|
|
|
|
|
 Re: أيهما أفضل للهلال ؟ .. أعتقد هذا أفضل . (Re: طلحة عبدالله)
|
Quote: في الأيام الأخيرة تابعت كتابات ومداخلات وردود أمير عمر الذي أتمناه مريخابي
يكون مقابل لعمر الفاروق في الهلال ..
المحيرني إنو ( عامر ) عمر دا ما ظهر لي إلا في اليومين الفاتوا ديل مع إنو والله
المفروض يكون ليهو كم وحلغمية سنة قاعد يكتب هنا.
أمير عمر برضو زول بعرف يكتب ويقول شنو بطريقة مميزة جدا في الكورة ..
لو عملت جريدة واللا بقيت مسؤول فيها بجيب عمر الفاروق كهلالابي وأمير عمر
|
يا طلحة ياخي بالغت معاي بولييغ شديد ، وشيلتني شيلة أكبر مني بكلامك دا ...
لكن طالما الموضوع جاب ليهو جرايد وكدا ح امشي اذاكر ليهو من اول وجديد
ما تحتار لأني فعلاً كنت معتزل الكتابة عن الكورة لكن كترت الاحباطات اجبرتني اني افضفض!
Quote: على أن يراسلنا تامبا لما الهلال يكون غالب فقط أما جرجير
فممكن نديهو الاشراف على صفحة الولايات .. |
أوسكاااااار
| |
|
|
|
|
|
|
|
|
|
Re: أيهما أفضل للهلال ؟ .. أعتقد هذا أفضل . (Re: طلحة عبدالله)
|
Quote: الكلمات المتقاطعة دي بجونا المتدربات من كليات الإعلام وبنعلقا في رقبة أول واحدة نحس
إنها ممكن لى قدام تستمر معانا. |
قالوا واحدة جات متدربة في واحدة من الرجرايد.. رئيس التحرير قال ليها أمشي الشارع جيبي لينا خبر مدنكل..
مشت وجات كاتبا ليهو خبر من سبعة صفحات فلوسكاب ..تفاصيل التفاصيل زااتو وأييي شي بي ضبانتو..الراجل هاااج فيها وقال ليها ده خبر شنو ؟؟ إنتي كصحفية مفروض تحاولي تضغطي الخرب في كبسولة من خلالها القارئ يقدر يفهم كلل الحاصل مش تكتبي لي شغل الحكاوي ده..
أمشي تاني أعملي لي خبر من أول جديد ..
طلعت بكرة وجات شايلة ليهو الخبر في سطرين :
كان في راجل سايق العجلة في شارع الظلط ..يقام المأتم بالكلاكلة ..
| |
|
|
|
|
|
|
|
|
|
Re: أيهما أفضل للهلال ؟ .. أعتقد هذا أفضل . (Re: عمر الفاروق)
|
بالمناسبة يا طلحة عندي ماسنقر من عمر الفاروق بتكلم عن صعود اهلي شندي بعد هزيمته تلاتة من اهلي شندي
وهسع منتظر النبوة بتاعتو بتاعة صعود الهلال
بعد يا طلحة قسطنطين بقا مدرب كبير
شايفك اكلت حقي في نبوة التعادل بتاعة مباراة القمة
وتحذير لاعبي الهلال من مغبة وصول مباراة دجوليبا لركلات الترجيح
وغيرها
بالمناسبة يا طلحة هل صحيح ان المدرب مورينهو لم يمارس كرة القدم
| |
|
|
|
|
|
|
|
|
|
Re: أيهما أفضل للهلال ؟ .. أعتقد هذا أفضل . (Re: khaleel)
|
يا أبو الخل خلاص ما تزعل ح نديك (الإلتقاط ).. مكتب كبير فيهو تربيزة طول وعرض
عليها أرقي وأحدث أجهزة الكمبيوتر مع أثاث فخيم وستاير أنيقة و كراسي
جلوس كبيرة وتلاجة صغيرة وتلفزيون شاشتو شاشة سينما + تلاتة أربعة
رسيفيرات مع كل بطاقات القنوات الرياضية المشفرة وتكون مهمتك تلتقط لينا
الأخبار العالمية المهمة، مع العلم إنو ح نكون مشتركين في كم وكالة أخبار عالمية.
يا أبو عمير وجود المتدربات الحسناوات أهم حاجة في أية جريدة في الدنيا.
| |
|
|
|
|
|
|
|
|
|
Re: أيهما أفضل للهلال ؟ .. أعتقد هذا أفضل . (Re: Amir Omer)
|
يا تنظير لا خلاص كبرت في راسي و ح اعمل جريدة منافسة
وبجيب فيها البفهموا الفرق بين شنو وشنو القلتها دي
المهم ح تنضرب ح تنضرب لأنو جريدتك حتكون كلّها تنظير و القرّاء ح يزهجوا و ينصرفوا عنّها زي ما قراء السايبر زهجانين من تنظيرك لكن لأنو ملح ما أنصرفوا عنه :)
| |
|
|
|
|
|
|
|
|
|
Re: أيهما أفضل للهلال ؟ .. أعتقد هذا أفضل . (Re: محمد البشرى الخضر)
|
| Quote: أكيد يا عمر أنا ما عندي أي مانع لكن أمشي أخطبها من عمك عمر علي حسن |
أيواااا قلت لي!!!
تلقوها عند الغافل ..
عمنا عمر دوووب ح يجرب فيني العكاكيز الشاغلتو بيها في المداخلة بتاعت بوست ود البشرى..
لكن طالما هو عولمتو ممتاازة فياخ قول ليهو ممكن أرسل ليك إيميل أخطب منكم البت؟؟ وبنرسل الصور والله ..
| |
|
|
|
|
|
|
|
|
|
Re: أيهما أفضل للهلال ؟ .. أعتقد هذا أفضل . (Re: طلحة عبدالله)
|
طلحه ... سلامات
قبل كم يوم انا ثقلت سودانيز اون تكشف الامتحاب لكل مدرب
لو ملاحظ هنا في ناس كلامها وحلولها وتحليلها الفني جميل جدا
يعني المدرب مفروض يكون مصاقر سودانيز دي اكيد ح ينجح
بس كمان لو الناس بعدت عن التعصب شوية هنا عشان القاري يحس بان النقد هادف ويستفيد منه
حتى لاميتلكه احساس نقد من اجل النقد فقط ...
| Quote: الكورجة بتاعت ناسسيد احمد ومعتصم جعفر ومنو ومنو ديلك ما بيفهمو قاف من القانون يا قول البروف شداد واتحككرو في الرياضة.. |
في مره ياعمر قدمت لي دعوه رياضيه هنا ومشيت
وحاتك قام اخونا وزميل المنبر هنا خالد الجزولي سـال سيد احمد وقال ليهو وين ناس المورده وكم سؤال كدا
المكهم صاحبك سيد احمد زعل وقام نطه وقال ليهو تااااااااني من هنا وماشي ادارة الكوره بسوقها ناس الاقاليم بس ... ( بالله شوف )
ضحكت وهزيت راسي قلت بالله دا حالنا بقى كدا في الكوره ودا كلام زول نحنا جينا عشان نسمع كلامه ونشوف ح يقدم شنو ولا قدم شنو للرياضة
وفي نفس الوقت تماها على الاخر المدرب شوقي عبد العزيز
وقعد يقول عبيد المورده وما ادراك ما عبيد المورده غايتو بكل صراحه كورتنا دي مجنونه عشان كدا فاكه مننا
| |
|
|
|
|
|
|
|
|
|
Re: أيهما أفضل للهلال ؟ .. أعتقد هذا أفضل . (Re: وليد عبد اللطيف)
|
يا طلحة عندي موضوع مزهجني من فترة وطالما القصة جات سيرتها ونحن في حديثنا عن البروف شداد..في تساؤل من زمااان زاني في راسي وبتوقع الاقي فيهو اجابة من البروف شداد وتكون إجابة منطقية واقعية مقبولة ما نوع اجاباتو المرات بتعتمد على التهكم والتشدد..
البروف كان عندو رأيي كبيير جداً في كورتنا وبينتقدها بي شدة للدرجة اللي خلتو يقول ما بيدخل كورة لي فريق سوداني وكان بيتكلم عنها بي أسوأ الأوصاف..سؤالي هو لييي كمال شداد طييب كان بيرأس إتحاد لي كورة هو ما مقتنع بيها ؟؟؟ إجابة عايز يصلحا دي ما منطقية لأنو العايز يصلح بيخش بشوف
لكن بالجد ده إستفهام ومأخذ وحيييد كنت ماخدو على البروف ..
| |
|
|
|
|
|
|
|
|
|
Re: أيهما أفضل للهلال ؟ .. أعتقد هذا أفضل . (Re: وليد عبد اللطيف)
|
يا كابتن وليد سلامات يا حبيب
المتعصبين هنا أحسن كتير من المتعصبين بتاعين صحافة المدرجات
على الأقل ديل هنا إسلوبم جميل وعندهم لطافة وقفشات حتي في السخرية والشتيمة
(باستثناء القليل جدا) دا إلى جانب إنو أغلبم مثقفين و(صعاليق) كورة زي ما
قلت ينقشوها وهي طايرة ..
لكن ديلك مع شنو كمان ؟؟
وقسما كتابة أكتب واحد فيهم هنا في ناس يكتبوها وهم نائمين .. ياخ دي صحافة
شختك بختك وأرزاق ساي لا أكتر ولا أقل .
................
كان مفروض أرجع ليك لكن انشغلت والله.. وذاتو الكلام المهم كلو أظنو كمل
فقلت مافي داعي أشغلك ساي ..
| |
|
|
|
|
|
|
|
|
|
Re: أيهما أفضل للهلال ؟ .. أعتقد هذا أفضل . (Re: طلحة عبدالله)
|
يا أبو عمير
شداد ما بخش الكورة في الاستاد ما معناها ما قاعد يشوفا... قاعد يشوفا ونص ..
وحتي لو ما بشوف الكورة بتاعت الدوري بشوف المباريات الخارجية كان للأندية
كان للمنتخب وعلى ضوء ذلك بقيس ..
من جهة تانية ودا الأهم شداد مفكر ومخطط يا حبيب وما ضروري يشوف أي كورة..
ممكن يحكم من نموذجين تلاتة .. يعني زي الدكتور يفحص المريض ويعرف علتو
ويصرف ليهو الدواء ويترك أمر متابعة تعاطية للادوية دي للممرضين .
| |
|
|
|
|
|
|
|
|
|
Re: أيهما أفضل للهلال ؟ .. أعتقد هذا أفضل . (Re: طلحة عبدالله)
|
لا يا طلحة ما صاح..شداد كان بيصرح انو ما بيدخل او يتفرج لانو ما مقتنع بي كورتنا..وحتى للمنتخب مرة كان لاعب برة وشدان كان في اجتماع الاتحاد الافريقي ورفض يمشي يشوف الكورة..الطبيب صاح بيكتب الروشتة لكن كمان الطبيب ما بيقول الطب ده كلام فاضي واوووعكم تدخلو لي مريض..ما عايز اشوف اييي مريض بس بكتب روشتات ساااي كده بدون ما افحص المرضى!!!
| |
|
|
|
|
|
|
|
|
|
Re: أيهما أفضل للهلال ؟ .. أعتقد هذا أفضل . (Re: عمر الفاروق)
|
أبو عمير لو فتحت طاقة زي دي البوست دا بشيلو السيل وأنا عايزو يكون لموضوعو
لأني جاد جدا فيهو ( حتي في حتة الجريدة دي ) وعايز أوصل حاجة فكرة معينة تخص
موضوع مهم من وجهة نظري ح يكون عندو مساهمة فعالة في اعادة العافية للكورة السودانية.
فاااااا شنو .. لو مصر على حكاية شداد دي ممكن تفتح بوست مخصوص وأجيك فيهو .
شكلك كدا ماخد حتة الجريدة دي هظار .
| |
|
|
|
|
|
|
|
|
|
Re: أيهما أفضل للهلال ؟ .. أعتقد هذا أفضل . (Re: الصادق سيكا)
|
أيوة مفاجأة بس بفهم مختلف!
وطالما الموضوع ما هظار خليني استفيض شوية.
الشاعر قال: كل الأحداث مبدأها من النظرِ ... ومعظم النار من مستصغر الشرر
وبالنسبة لي أيّ فكرة عبارة عن شرارة صغيرة تنشأ عن خاطرة هامشية طرأت على البال في لحظة صفاء أو حتى في لحظة تفكير وإنشغال وإهتمام بأمر ما ..
لكن للأسف كثير من الأفكار والخواطر الصغيرة أو قل الهامشيّة تموت وتندثر لأنها لا تلقى الرعايّة الكافيّة من أصحابها كما تموت الشرارة. ويمكن دا الفرق بينا
وبين العالم المتقدم ، فهناك في العالم المتقدم إنتاج غزير للأفكار ترافقه متابعة لها خطوة بخطوة حتى تخرج عنها إنتاجات يفتخر العالم بها، أو على أقل تقدير،
تثير الاهتمام والانتباه. وعشان كدا المفاجأة بالنسبة لي هنا أنك نويت تهتم بالشرارة الطلعت في لحظة تجلي وفي رأيي ممكن بقليل من الرعاية والدراسة الجادة تصل لمبتغاك.
| |
|
|
|
|
|
|
|
|
|
Re: أيهما أفضل للهلال ؟ .. أعتقد هذا أفضل . (Re: Amir Omer)
|
يا أمير الفكرة ما وليدة البوست دا بل البوست دا وليد الفكرة تلك ..
عندنا ( معي رأسمالية آخرون مهتمون بالاستثمار في الاعلام) مناقشات لا صدار
جريدة .. أول حاجة عايزين نتفق عليها تكون يومية واللا إسبوعية وبعد نتفق
على دي ح نتناقش في بقية التفاصيل مفصل مفصل .. لكن أصلا متفقين على إصدار الجريدة.
طبعا لما قلت في بداية البوست ( لو كنت مسؤول من جريدة .. الخ ) كنت أقضد
ما أقول .
أظن بى المعلومة الجديدة دي يا أمير المسألة بقت أكبر من شرارة.. صاح ؟
| |
|
|
|
|
|
|
| |
طلحة عبدالله
محمد البشرى الخضر
keiga2000
عمر الفاروق
الامين موسى البشاري
tmbis
Amir Omer
khaleel
وليد عبد اللطيف
الصادق سيكا
فيس بوك
تويتر
انستقرام
يوتيوب
بنتيريست