|
يااااااااااااااااي حجه ممتعه خاااااااااالص...
|
الراوي حرمنا المصون انها كانت تتجاذب اطراف الحديث مع احد البنات عند ذهابنا لحفلة خاصه . حيث اخبرتها ((البنت)) انها في حالة ذهج شديد بعد التخرج من الجامعه والجلوس في البيت ولو لا انشغالها بالبسه (( الكديسه)) والحلزون ..اول مره اسمع به بعد شرح المدام وابني الصغير انه حيوان بحري يمشي ببطء يشبه الدوده ....بانها كانت سوف تطق من الذهج كل وقتها تلاعب البسه وتمسح علي شعرها الناعم وتراقب الحلزون وتتحدث معه وهو يتسلق شرفة الشقه ..يااااااااااااااااي حجه ممتعه خاااااااااالص... في إحدى القنوات الفضائية , تابعت فيلماً رائعاً , يتحدث عن مزرعة لتربية وتكاثر القططه , التي سيشتريها الهُواة ممن يحبون اقتناء القطط لتشاركهم العيش , ومما هو لافتٌ لإثارة , هو العناية الطبية والنفسية والصحية لها , من نظافة للمكان , والماء النقي للشرب ,والطعام المدروس بعناية فائقة , والاستحمام بالماء الساخن والشامبو , وذلك على أيد ماهرة وذات خبرة تخصصية في هذا المجال , , ومراقبتها ليلاً ونهاراً وعلى مدار الساعة وإحصاء أنفاسه في اليوم والليلة . الفرق شاسع ما بين قططهم وكدايسنا التي تتنطط في الحيط وتاكل في الكوش .. تتحاوم داخل المطبخ كان ست البيت غفلت من حتة لحمه من ربع الملاح اليومي الكديسه بتغطس حجرو بعد داك شوف المساككه كان ما رمت اللحمه البيت كلو اجري وراها... لو عرفت البت دي زمان كنا صغار كنا نلهو ونلعب أحياناً ( بالكدايس) وكثيراً كنا ما نقسو عليها , لدرجة التعذيب اتمني ان لا يعرف ذلك جمعيات الرفق بالحيوان حتي لا اصنف ارهابي وممكن عادي تفتح اختك في البيت باب المطبخ المتكول بالطوبه تجيها ناطه الكديسه وكل البحصل انه بتقول ليها (وب على خلعتيني ) والموضوعااااااااااااااادي .... والله تديها شلوت تتقلب في الواطه زي حامد بريمه في زمنو وانسى ناس كلاب وجميع الزواحف والطيوروهلم جرا أما ناس الضبان والجندب والصراصير فديل حبايبنا ..... ولقد مرت بذاكرتي تلك الابيات الحلمنتيشيه ..... اريدك كيف ... اريدك كيف وبيتكم انتو سابع دور وريحة كديستكم ريف دور . أريدك كيف انحن البيتنا جمب الخور وبيتنا الديما قاطع نور ملاحنا الفول كمان بنحلي بالعجور اريدك كيف يا زينة بنات الحور. واحد حنكوش بصورة ماعادية مشي زياره لي اهلو في حي شعبي التيس بتاع ناس اهلو راح وقام يفتش مع اولاد اهلواالمصيبة هو بفتش في شنو ماعارف لا قاهو صاحبه اثناء تفتيشهم سايق السياره عبورا بالحي الشعبي يادودي يادودى اخبارك ماشايفك في النادى ، ابدا ياولِّى قاعد مع اهلي وهسع راجل غنمايتهم رايح وانا بفتش فيه ومالاقينه غايتو الغنماية جاتها نفسيات عديييل كده. اتذكر أنا جاي من الخرطوم الي مدني شايل شنطة السمسونايت نظام الود موظف بنك قربت علي البيت لمحته من بعيد اخوي الصغير شايل ليهو خرطوش في يدو وبتحاوم صاري وشو!!!!! بعد السلام يازول بتتحاوم مالك نصت نهار في السخانه؟؟؟؟ جاوبني: ياخ والله الحاج غلبتني معاهو الحيلة كل يوم اطلع لي بي مشوار وقصة جديدة قال لي من السماء من الواطه تفتش لينا تيس للغنماية إعشرها ... حكاية عجيبة ..أهو الواحد لو قالو ليهو قبل كده اشتغلت قـ و ا د اقول ايوة!!!!!.
(عدل بواسطة عباس الدسيس on 03-05-2013, 03:32 PM)
|
|
|
|
|
|
|
|
Re: يااااااااااااااااي حجه ممتعه خاااااااااالص... (Re: أسامه الكرور)
|
Quote: يا الدسيس باخ مالك علينا ؟؟؟ خليتنا نضحك برانا زى المجانين |
سلام يا سعادتك اخبارك والاسرة الكريمة وجو البحر الجميل تركيبة المجتمع السوداني اصبحت سلطة فواكه ممكن تلاقي ليك جوافة بذرتها تتدخل في الضرس المشرم كل ما تتواصل مع تجمع من الناس تطلع بالاغرب تمر بيك اشياء او افعال تخليك مدهوش او مبهوط بكون سمعته بي حكاية موري واوباما من القصص الحقيقيه ايضا تتدهش: يقال: أعطي رئيس الوزراء موري بعض المبادئ في المحادثة باللغة الانجليزية قبل زيارته للولايات المتحدة لمقابلة الرئيس الأمريكي باراك أوباما وتم إخباره بأن عليه أن يقول عندما يصافح باراك أوباما التالي: how are you? كيف الحال I am fine, and you? ليرد عليه أوباما : بخير, وأنت؟ me too فيرد عليه رئيس الوزراء وأنا أيضا بخير ثم بعدها يتولى المترجم بقية المحادثة تبدو المهمة ساهلة؟ إلا أن الحقيقة كانت كالاتي : عندما قابل رئيس الوزراء موري باراك أوباما who are you? قال له بالخطأ: من أنت " بدلا من كيف حالك انصدم أوباما من السؤال وحاول تلطيف الجو فقال [ well, I am michelle's husband, ha ha أنا زوج ميشيل ههههه فرد عليه موري me too ha ha وأنا كذلك هههه عندها خيم صمت طوييييييييييل على غرفة الاجتماع
| |
|
|
|
|
|
|
Re: يااااااااااااااااي حجه ممتعه خاااااااااالص... (Re: عباس الدسيس)
|
حنكوش ويكون اهلك من الاطراف مشكله لو من العاصمة وفي العاصمة تختي ناس الكلاكلات كان مدنقرة لو مصنقعه وناس الثورات وهلمجرا مبلوعة شوية. أعصر علي ناس الجزيرة اهلي عشان ما إنط لي واحد من مثقفاتية العنصرية والهامش. حنكوش من الجزيرة بسأل فيهو قريبو من ناس الخلاء: يا ولدي اي انواع الابل تفضل رد ليهو: ياعمو بتبالغ انت بتستهبل علي اكيد آي باد
| |
|
|
|
|
|
|
Re: يااااااااااااااااي حجه ممتعه خاااااااااالص... (Re: منير عثمان)
|
حياالله الدسيس وجمعة مباركة، اسمع أنحنا طبعاً ناس جادين جداً، ههههه لو ضحكنا بنضحك غُمُتّي غمتي، ههههههههه عندي بس الملاحظة دي، وتنبيه لخطأ شائع في الكتابة:
Quote: والله تديها شلوت تتقلب في الواطه زي حامد بريمه في زمنو |
طبعاً بحسب السياق إنت ما قاصد الحليفة! فكتابة اسم الجلالة للتعبير عن هذه الكلمة (ما هو بصحيح) الكلمة الصحيحة ممكن تكون: (وللا) نديها لام تاني عشان ما تختلط بلا النافية! (وشكرن)
| |
|
|
|
|
|
|
Re: يااااااااااااااااي حجه ممتعه خاااااااااالص... (Re: صلاح عباس فقير)
|
Quote: عباس سلامات نكتة قديمة لكن مناسبة مع موضوع بوستيك دة الحناكيش ابو صاحبم مات وعمرهم لامشو عزاء ولابعرفو بقولو شنو في الحالات الزي دي شافو واحد حنكوش اكبر شوية قال ليهم انحنا نلبس اسود في اسود ونشيل عنب اسود ونمش نقول ليهو اوب سورى |
عبدالله سلام يا وجيه غايتو اول مرة تمر علي الظاهر احنا ما متابعين نكت الحناكيش. علي وزن حنكوشك يا الحبيب: حنكوش مشي بيت عزاء للتعزيه: قال ليهم مافي امل ارجع باباكم. الثانية هوادة ليك: حنكوش دخل علي جماعة بتاعين مخدرات بضربو الحقن في ايديهم قال ليهم ياااااااااااااااااي ما عندكم تحميله
| |
|
|
|
|
|
|
Re: يااااااااااااااااي حجه ممتعه خاااااااااالص... (Re: عباس الدسيس)
|
سلام الاستاذة رانية سباق الخيل الملكي البريطاني «رويال اسكوت» مناسبة وهي فرصة ذهبية لسيدات المجتمع البريطاني المخملي للتبرج والتباهي والتنافس على ارتداء أجمل الأزياء والقبعات والمجوهرات والاحذية وتحضره الملكة اليزابث . في الخليج رياضة الامراء ... اما السودان ما شايف ليهو اصداء. تم دعوتي قبل فترة لحفلة رياضية لسباق الخيل وجدت إنني تورط في تلبية دعوة ليس من اهتماماتي والوقت يمر بطيء قعدته اكلم نفسي: يا ولد انت مجنون الجابك هنا شنو تعاين ليك لي حصين تتارس وتتجاري وناس تكورك ((ها ها ها ها ها)) في هسترية من ديك وعيك فراق الطريفي لي جملو بالمناسبة صورة الخيل جميلة اكيد تقديري
| |
|
|
|
|
|
|
Re: يااااااااااااااااي حجه ممتعه خاااااااااالص... (Re: عباس الدسيس)
|
Quote: حياالله الدسيس وجمعة مباركة، اسمع أنحنا طبعاً ناس جادين جداً، ههههه لو ضحكنا بنضحك غُمُتّي غمتي، ههههههههه عندي بس الملاحظة دي، وتنبيه لخطأ شائع في الكتابة: Quote: والله تديها شلوت تتقلب في الواطه زي حامد بريمه في زمنو
طبعاً بحسب السياق إنت ما قاصد الحليفة! فكتابة اسم الجلالة للتعبير عن هذه الكلمة (ما هو بصحيح) الكلمة الصحيحة ممكن تكون: (وللا) نديها لام تاني عشان ما تختلط بلا النافية! (وشكرن) |
شيخنا صلاح السلام عليكم ورحمة الله وبركاته ربنا اجعلها في ميزان حسناتك سوف يراعي ذلك لاحقا شكرا يا حبينا علي الملاحظة مع خالص التقدير للمتابعة والتواجد
| |
|
|
|
|
|
|
|