|
|
 النضال الشكلاني
|
قلائل هم المناضلون الحقيقيون الذين يغيرون الواقع المؤلم .. فكما امتلأت ساحات السودان بأصحاب التدين الشكلاني إمتلأت أيضاً بالمناضلين الشكلانيين ،
لكن لا بد أن نؤكد أن طبيعة البلد تسمح لهذا النوع من المناضلين بالظهور والتمركز في قلب الأحداث وفي أذهان العامة ، إذ لا يوجد تنافس على الفعل النضالي في هذا البلد المسمى السودان ،
كما أنه لا يوجد تنافس حقيقي في كل المجالات الأخرى . فالقيام بأي عمل في السودان أصبح خاضعاً للمفهوم الجمالي والإستعراضي (شوفوني .. شوفوني) ،
أي أن الغاية من العمل لم تعد من أجل العمل والبذل والتغيير .. بل ثمة غايات مظهرية تجعل صاحب العمل يقوم بعمله .. هذه الملاحظة البسيطة التي أوردتها عن النضال الشكلاني في السودان صعب أن أوردها بمعزل عن تاريخ النضال في السودان ، هذا التاريخ الذي إعتمد في أغلب الأحيان على رفع شعارات براقة غير مرتبطة بواقع العامة والبسطاء بل مرتبطة بشخصية محددة تريد أن تظهر في الزمن المحدد حتى تُكَرَس كل الكتابات والأحاديث والمناقشات عنها ، شخصية لا تسعى لتغيير الواقع الأخلاقي والسياسي والمجتمعي ولا تتبنى هذا الخط ، بل تسعى للظهور حتى تصير حديث الآخرين ، ومع هذا النوع من الشخصيات يظل النضال في السودان شكل من أشكال الحلم الذي يفضي إلى اليأس من وجود تغيير حقيقي .. لماذا ؟ لأن الأكثرية من حملة لواء التغيير هم عبارة عن طبقة برجوازية يهتمون بالشكل أكثر من الجوهر ولا يدرون أنهم بفعلهم هذا يخنقون العامة ويهضمون حقوقهم وإنسانيتهم .. دعونا نتساءل .. ماذا سيستفيد العامة إن خرجتم وهتفتم وذاع صيتكم ؟ هذا الهتاف لا يعني أنكم تقودون معركة حقيقية في سبيل التغيير ولا يعني أنكم ستتنازلون عن مكانتكم الإجتماعية وامتيازاتكم في سبيل التغيير أيضاً .. فعامة الشعب في حوجة إلى الإحساس بالمساواة في الحقوق والكرامة والإحترام في حوجة إلى الوعي ، في حوجة للتواضع وصدق التوجه بالعمل من أجل البناء .. في حوجة لعدم الإحساس بأن النخبة وميسوري الحال يمتنون عليهم بأي فعل إن كان نضالي أو طوعي أو سياسي .. لنطرح سؤال آخر .. متى سنؤسس لمنهج نضالي مجتمعي ضارب بكل الزيف الذي توارثناه عبر الحكومات والسياسات عرض الحائط ؟ أأتي وأقول أن كل قضايا السودان وإشكالاته الإجتماعية مازالت واقعة تحت تأثير فلك الإستعمار .. ولن تحدث ثورة في هذا البلد إن لم نُصحح إنحراف النخب الحاكمة منذ الإستقلال وإلى يومنا هذا .. هذه النخب التي لم تقم بمهمتها التاريخية وأهمها إرساء الأخلاق .. والفعل النضالي الحقيقيي مرتبط بهذه الأخيرة أي الأخلاق وباستراتيجيات لتصحيح مسار المجتمع السوداني حتى تحدث ثورة حقيقية ، لا ثورة تزيل نظام وتأتي بآخر يكرر نفس الأخطاء والفجائع .. التحية لكل مناضل حقيقي يعشق قيم الحرية والعدل والإنسانية ..
|
|
 
|
|
|
|
|
|
|
 Re: النضال الشكلاني (Re: سلافة الصديق أبو ضفيرة)
|
Quote: لنطرح سؤال آخر .. متى سنؤسس لمنهج نضالي مجتمعي ضارب بكل الزيف الذي توارثناه عبر الحكومات والسياسات عرض الحائط ؟
أأتي وأقول أن كل قضايا السودان وإشكالاته الإجتماعية مازالت واقعة تحت تأثير فلك الإستعمار .. ولن تحدث ثورة في هذا البلد إن لم نُصحح إنحراف
النخب الحاكمة منذ الإستقلال وإلى يومنا هذا .. هذه النخب التي لم تقم بمهمتها التاريخية وأهمها إرساء الأخلاق .. والفعل النضالي الحقيقيي مرتبط بهذه
الأخيرة أي الأخلاق وباستراتيجيات لتصحيح مسار المجتمع السوداني حتى تحدث ثورة حقيقية ، لا ثورة تزيل نظام وتأتي بآخر يكرر نفس الأخطاء
والفجائع .. التحية لكل مناضل حقيقي يعشق قيم الحرية والعدل والإنسانية |
يا سلام عليك!
أولاً السلام عليكم، أستاذة سلافة،
والله طرح رائع جداً، وروعته في أنه يتناول القضية الحقيقية بأسلوب بدهي خالي من التعقيد!
وروعته في أنه يمثل الإجابة العفوية عن السؤال العلمي:
كيف ينبغي أن نؤسس لحركة التغيير في بلادنا؟
يعني: لو شأء أحدهم أن يؤسس فعلنا الوطني بفعل عقلاني، فستكون ثمرة وعيه، هو ما ذكرتيه في هذه الفقرات
التي تدفق بها الكيبورد بسلاسة!
فنحن (وأخص الفئة المتصدية لمهام النضال الوطني، وهي بالطبع وريثة لأحزابنا السياسية القديمة والعجوزة) نحن نتناول هذه الأمور
كما ذكرت بمحض فوضوية، ولا أقول عفويّة!
للأسف كما ذكرتِ يسود بيننا الالتزام الشكلاني، سواء تعلق الأمر بالمتدينين،
أو تعلق الأمر بالآخرين!
....
والله هذه البوست من البوستات النادرة في نظري، التي تتعامل مع القضية الوطنية، بما تستحقه من اهتمام،
وأدنى درحات الاهتمام أن تكرم هذه القضية، بأن يتم تناولها بمنهج علمي، يطرح الأسئلة البدهية:
متى؟ وكيف.؟ ولماذا؟
فالرؤية السياسية السائدة رؤية أسطورية خرافية، يعتقد أصحابها: أن نظام الإنقاذ ده نبت شيطاني،
ولا علاقة له بتطور حركتنا السياسية المعاصرة!
ولا علاقة له بتركيبتنا الاجتماعية!
ولا علاقة له بنا!
...
ولسنا بذلك بمدّعين لأنفسنا منزلة عالية في الفكر والإدراك،
لأن القضية أصلاً ليست معقدة!
القضية في غاية البساطة،
لكن السياسيين والحزبيين لا يريدون أن يتناولوها بحسب ما يقتضيه المنطق البسيط والحس السليم!
لأن هذا يتعارض مع المصالح الصغيرة التي يمثلونها كما تفضلتي!
شكراً جزيلاً لك!
| |
|
|
|
|
|
|
|
|
|
Re: النضال الشكلاني (Re: صلاح عباس فقير)
|
وعليكم السلام أستاذ صلاح .. أشكرك على كلامك الجميل .. كما تفضلت أنت وقلت : والله طرح رائع جداً، وروعته في أنه يتناول القضية الحقيقية بأسلوب بدهي خالي من التعقيد!
لطالما مُلئت حياتنا السودانية بالتعقيد والعُقد على كل المستويات .. فقط هي محاولة لطرق باب قضية طالما أرهقتنا ، هي قضية التغيير والتي لا تتأتى إلا بالتأسيس الجيد ..
النضال هو وسيلة فعالة لإحداث التغيير لكن ما نراه الآن على الساحة من نضال مصنوع ومزيف (إلا القلائل) يصيبنا بالألم ويدفعنا للحديث عن هذا الموضوع المهم ..
الكل محتاج لمراجعة طريقته في النضال الكل محتاج للتخلص من الزيف والتعامل مع قضايا الوطن بصدق ووعي ومنهج ..
| |
|
|
|
|
|
|
|
|
|
Re: النضال الشكلاني (Re: أحمد ابن عوف)
|
| Quote: والله هذه البوست من البوستات النادرة في نظري، التي تتعامل مع القضية الوطنية، بما تستحقه من اهتمام، |
فعلاً ... الحق ماقلت أخي صلاح ... وسلام وتحية لصاحبة البوست
وكثير ما أفكر أننا نهتم بالتغيير السياسي بيفكرتي الإحلال والإبدال السياسي
ونفتقد النضال الجيفاري الذي يسعى لإحداث حركة تغيير حقيقية دونما مصلحة للداعي للتغيير
والتغيير المطلوب هو التغيير المجتمعي الضارب في عمق الجماهير ليبدأ من تحت وليس من فوق
وفي زمان ما كنت فخور جد بفكرة السودان الجديد وربما مازلت مع تغبيش سببه قادته بالراهن
وكنت ومازلت أقول ان فكرة السودان الجديد هي الفكرة السياسية الوحيدة التي نشأت بشكل صحيح
حيث نشأت الفكرة من وسط الجماهير وقام القائد د. جون قرنق بتنظيمها عكس جُل أو كُل الأفكار السياسية الاخرى
تلك التي تنشأ في عقول قادة او مفكرين ويعملون على إنزالها لأرض الواقع فتأتي الفكرة ممزوجة برغبة صاحبها وحاجات الناس مع غلبة الاولى على الثانية
او شئ كهذا ......... وربما عدت أ. سلافة
الأخ بكري أبوبكر .... ليتك رفعت هذا البوست فأنا اكاد أشم رائحة المنبر القديم
| |
|
|
|
|
|
|
|
|
Re: النضال الشكلاني (Re: Ahmed musa)
|
أستاذ أحمد موسى ، كلنا تواقون لوجود أشخاص يصنعون التغيير بلا مصلحة اللهم إلا مصلحة الجماعة ..
وقد زكرتنا برجل سوداني عظيم الدكتور جون قرنق .. لكن نقول شنو لم يطول مقامه بيننا وحيكت ضده وضد فكرة السودان الجديد المؤآمرات ..
بكل اسف أغلب الشباب ينتهجون نهج القيادات السياسية البالي .. رغبة في الظهور والتحدث عن التغيير خالية من أصالة وقرب من رغبات الجماهير .. لكن هناك تجارب نيرة لا ننكر ذلك .
كان نفسي أعمل إقتباس من كلامك بس ما عرفت أعملو .. ههههههههههه . مرحباً بعودتك وتعليقاتك يا أستاذ أحمد موسى ..
| |
|
|
|
|
|
|
|
|
|
Re: النضال الشكلاني (Re: سلافة الصديق أبو ضفيرة)
|
عودة مجددة،
أستاذة سلافة
فهذا البوست والموضوع الذي يطرحه يمثل هاجس كبير، وكان موضع اهتمامي وتعجبي،
وأظني عبرت عن الفكرة في بعض بوستات سابقة،
ولم تجد تجاوباً!
فلذا تجديني داعماً لهذا البوست، بكل ما أوتيت من وقت وجهد،
طيب، قلتِ:
Quote: ماذا سيستفيد العامة إن خرجتم وهتفتم وذاع صيتكم ؟
هذا الهتاف لا يعني أنكم تقودون معركة حقيقية في سبيل التغيير
ولا يعني أنكم ستتنازلون عن مكانتكم الإجتماعية وامتيازاتكم في سبيل التغيير أيضاً . |
هنا ستواجهين مشكلة المرجعية التي تدعمين بها هذا الاعتقاد،
فما الذي يدعوك إلى وصف هذه الممارسة باللا معنى؟
وبالتالي: فما هي الدوافع الحقيقية أو الفعلية التي دعتهم للخروج؟
هذه محاولة من أجل تأصيل وتأسيس الدعوى العريضة التي يتضمنها هذا البوست!
| |
|
|
|
|
|
|
|
|
|
Re: النضال الشكلاني (Re: صلاح عباس فقير)
|
أستاذ صلاح حال السودان ونكباته بسبب سياسات النخبة والصفوة خير مرجعية .. منذ ولادتي وإلى يومنا هذا أعرف للسودان مشكلتين
مشكلة الهوية ومشكلة النزاع في جنوب السودان .. والمشكلتان موجودتان منذ أمد بعيد بل وتفاقمتا وأحدثتا كل الكوارث التي نعاني منها الآن ..
مشكلة الهوية خلقت إحساس غبي يعاني منه كل السودانيون وهو ( التفوق على الآخر ) وأصبح الكل يؤسس لمعنى الأفضلية على كل المستويات
أنا قبيلتي كده أنا أفضل من فلان أنا من أم درمان أنا صاحب عراقة أنا أهلي بيمتلكو كذا أنا ود زوات ومفروض يحترموني لما أمتلكه .
الكل الذي من المفترض أن يكون واعي وبحُكم استنارته كان لابد أن يؤسس لدولة ومجتمع ، هذا الكل راح يبحث عن مصالحة الخاصة لإثبات وضعه وتعلية شأنه
ونسيت الزمرة الواعية (وأنا أشك في وعيها) نسيت حوجات المجتمع ومتطلبات الآخرين .. هذا وضع أزلي في السودان منذ الأزهري الذي لم يستطع الوفاء بحقوق الجنوبيين
ومطالبهم وفضل الإتحاد مع مصر مُجهض إفريقيتنا وسودانيتنا لو لا من وقفوا ضده في ذاك الزمان ، ولو منح الجنوبيون مطالبهم
لما وصلنا لما نحن فيه الآن من تفرقة وشتات في كل السودان.. رئيس نخلد ذكراه بهذا الإستقلال السهل الذي منحونا إياه الإنجليز .. ولا ننبش ماضيه المؤلم فسياسات النخبة هي من أدخلتنا في هذا الجب ..
هذا جزء من التاريخ المؤلم ، ذاع صيت الصفوة لكنهم لم يقودوا حملة حقيقية من أجل التغيير ، وقس على ذلك ، فإلى الآن هذا الشعب البسيط مازال مسلماً نفسه لأصحاب الزيف ،
الذين يقودون المعارك من أجل مصالحهم (إلا القلائل) .. ومازال الأسياد وأبناء الأئمة ومن لف لفهم يمارسون هذه الكذبة الشنيعة على المجتمع ولا يسعون سعي جاد لصناعة وضع حقيقي
في السودان ، فلو جاء وضع كهذا لفقدوا مكانتهم وطُمست سيرتهم البالية ووضعوا في مكانتهم الطبيعية لا المصنوعة هذه ..
أعود بك أستاذ صلاح لسبب إمتعاضي ونغمتي التي دفعتني للكتابة ، إنها موجة النضال الزائف وسط القادة ووسط الشباب .. وأضف إليها موجة
العمل الطوعي الزائفة من أجل البسطاء وبها كثير من منِ وأزى ، وزد أيضاً ممارسة السياسة الزائفة وهذه بها تنطع مؤلم ..
الكل يهتف من أجل تجميل مواقفه وقد بت أخاف وأشك أن أغلب الهاتفين هم مواليين للسلطة ( يعني وهمة في شكل مناضل) وتحت تحت إنت براك عارف..
هذه السلطة التي أفرغت المجتمع السوداني من المعنى والهدف والصدق في العمل ..وأسست للشكل والإستعراض ..
أغلب الخارجين والبارزين في الساحة كوني عندي إحساس بالإشمئزاز .. ماهو إنت يا إما طالع تغير وضع أو تثبت وضع .. وآليات التثبييت ممكن تتخذ آليات التغيير ..
أنا ضد المساس بالشخصية السودانية وكلامي هذا لكل صاحب عمل أو حراك في كل أماكن تواجدهم ..
| |
|
|
|
|
|
|
|
|
|
Re: النضال الشكلاني (Re: سلافة الصديق أبو ضفيرة)
|
شكرا استاذة سلافة أبو ضفيرة
إن الذين يشتهون التغيير - ولا نقول يدعونه - هم يغازلون إمراة حبلى .. ويتمنون الاقتران بها ..
التغيير المنشود يجب أن يبدأ بخلع الأسمال البالية .. وليس بتجميل الخرقة التي تغطي سوءاتنا .. وعوراتنا
عندما ينتظر الناس طويلاً على مجرى النيل لألتقاط جثمان لشخص عزيز .. غرق منذ أيام مضت..
قد يجدونه مشوهاً .. ولكنهم يحتملون شكله الجديد ريثما يدفنونه دون غسل .. فقد غسله ماء النهر.. الطاهر
يزعم كثير من الذين يناضلون أن الشعب الأغبش سوف يصطف عند المطار وعند حواف المدينة لاستقبالهم مصفقين ..
وأولئك المتشثبثون بمصير العباد .. يعتقدون أن هؤلاء الكادحين الحيارى يسبحون بحمدهم آناء الليل وأطراف النهار..
لذاااا....
عندما لا يبتديء التغيير من دواخلنا ... وعقولنا ... فحتماً سوف نصادف تلكم التماثيل الجوفاء .. ونصادق أحلاماً بلهاء
خطنا شخوصها مع نسمة خريفية قبل المغيب.. سرعان ما تهرب مع أول لسعة للشمس ..
شمس الحقيقة .. وشمس المنطق... شمس تتعامد على أمانينا ... وترمي بظلالها إلى أبعد من خمول بطوننا ..
عبد العزيز
| |
|
|
|
|
|
|
|
|
|
Re: النضال الشكلاني (Re: سيف النصر محي الدين)
|
وعليكم السلام أخ سيف .. الأخلاق التي أقصدها في حديثي يسهل الوصول إلى معناها ومفهومها من خلال السياق ..
أنت صاحب وعي و فضيلة وفعل حسن وتتطلع إلى المراقي .. أنت صاحب أخلاق ..
| |
|
|
|
|
|
|
|
|
 Re: النضال الشكلاني (Re: عبد العزيز محمد عمر)
|
| Quote: يزعم كثير من الذين يناضلون أن الشعب الأغبش سوف يصطف عند المطار وعند حواف المدينة لاستقبالهم مصفقين .. |
كلام عميق .. مفروض أي زول إتخذ الغبش ذريعة ومطية يراجع الكلام ده .. واللي مؤمن بقضية الغبش وصامد من أجلها ربنا يعدل طريقو ويثبتو ..
| |
|
|
|
|
|
|
|
|
 Re: النضال الشكلاني (Re: سلافة الصديق أبو ضفيرة)
|
Quote:
فالقيام بأي عمل في السودان أصبح خاضعاً للمفهوم الجمالي والإستعراضي (شوفوني .. شوفوني) ،
|
ما فهمت الحتة دي .. للامانة لم افهم منطق المقال كله!
---------
مع د. سيف يا ريت لو تم تعريف لممصطلحات بدءاص من (الاخلاق) .. مروراً بـ(جمالي) (شوفينية/ام هي (شوفوني) السودانية) ..اللخ اللخ؟
Quote:
الشوفينية هي المغالاة في التعصب. ففي حال التعصب القومي وحب الوطن يعتبر الشوفيني وطنه أفضل الأوطان وأمته فوق كل الأمم وخصوصاً عندما تكون هذه المغالاة مصحوبة بكره للأمم أخرى.
وقد جاءت هذه الكلمة من اسم نيكولا شوفان الجندي الفرنسي الذي جرح عدة مرات في حروب الثورة الفرنسية وحروب نابليون ولكنه ظل أبداً يقاتل في سبيل مجد فرنسا ومجد نابليون، وتستعمل الشوفينية حالياً في مجال الاستهجان وعدم الاستحسان وتمثل النازية الألمانية قمة التعصب الشوفيني.
وبمعنى اخرالشوفينية فكرة متطرفة وغير معقولة وهي التحزب باسم المجموعة التي ينتمي إليها الفرد، وخاصة عندما يتضمن الحزب حقد وكراهية تجاه أي فريق منافس. كأصحاب التمييز العرقي (حركة منشأها بريطانية).
في الوقت الحاضر الشوفينية هي مصطلح شائع ومنتشر الاستخدام يدل على عنجهية الرجل (بالإنجليزية: male chauvinism)، والتي تشير إلى الاعتقاد بأن الذكور تتفوق على الإناث. كذلك الأمر بالنسبة للإناث الشوفينيات (بالإنجليزية: female chauvinism) التي تعتقد أن الإناث أعلى من الذكور. .
|
مع التحية والاحترام لست الدار
| |
|
|
|
|
|
|
|
|
|
Re: النضال الشكلاني (Re: قيقراوي)
|
سلام سلافة، ومرحب بك فى المنبر..
.
قرأت البوست دة أمبارح وما فهمت حاجة.
اليوم رأيت آخر مداخلة لقيقراوى. قبل أن أدخل البوست مرة أخرى قلت فى سرى "لو قيقراوى بدأ يناقش فى موضوع البوست معناه اكيد فهم موضوع البوست. ولو هو فهم معناه أنا غلطان فى عدم فهمى للبوست وعلى أن أقرا البوست مرة تانى"
دخلت وشعرت ببعض الرضا بعد أن قرأت مداخلته الصريحة.
ومزيد من التوضيح من صاحبة البوست سيضع النقاط فوق الحروف وتتضح الرؤية.
| |
|
|
|
|
|
|
|
|
|
Re: النضال الشكلاني (Re: ombadda)
|
| Quote: اليوم رأيت آخر مداخلة لقيقراوى. قبل أن أدخل البوست مرة أخرى قلت فى سرى "لو قيقراوى بدأ يناقش فى موضوع البوست معناه اكيد فهم موضوع البوست |
the standard of qualities
الله يستر عليك بعد دا ،، هسي بدوروا فيك ،
من قيبل شايف جهابزة كبار اشادوا لحدت وصلت بهم نشوة الانبهار بتثيب البوست ، لكن انعدلي سونامي جاييييييييييييييييييييك ،
لكن زي ما قال قيقراوي د, امبدة بصراحة الموضوع ما وقع لي خااااااااااااااااااااالص ،لكن خفت اقول رأيي الجماعة يلموا فيني (انت مستبيض وكدى)
يعني شنو نضال شكلاني (دي من الشكلة ولا نضال مظهري )
---------
لابد من الزنقة في سودانيز اون لاين ولو طال السفر
تحياتي كاتبة البوست
| |
|
|
|
|
|
|
|
|
|
Re: النضال الشكلاني (Re: علي دفع الله)
|
مرحب يا علي .. السودان كلو مزنوق .. لكن دي ما زنقة .. ده نقاش ظريف وربما يتخذ السخونة أحياناً لأنو ده منبر حر ..
الله يفتح عليك إنت براك قلتها ( نضال مظهري ) .
| |
|
|
|
|
|
|
|
|
|
Re: النضال الشكلاني (Re: ombadda)
|
مرحباً بك أيضاً أم بدة .. أقرا كلامي تاني .. صدقني ح تفهم ..
إنت اتكلمت عن عموميات يعني ما حددت ياتو نقطة عاوزة توضيح .. أ/ صلاح فقير قدم أسئلة وجاوبتو عليها ..
النقاش كده بيكون مأطر والتوضيح بيكون سهل ..
| Quote: اليوم رأيت آخر مداخلة لقيقراوى. قبل أن أدخل البوست مرة أخرى قلت فى سرى "لو قيقراوى بدأ يناقش فى موضوع البوست معناه اكيد فهم موضوع البوست |
من خلال كلامك شكلك بتثق في فهم قيقراوي شديد .. ده شي كويس إنو الزول يثق في فهم شخص ما .. بس أنا لسة ما بعرفكم كويس .. وما بعرفكم بتفكروا كيف ..
أتمنى نصل لي فهم متبادل من خلال طرحنا في المنبر ولي قدام لو إداخلتو معاي أو إداخلت معاكم يكون الفهم كبير وعميق .. نحنا لسة بنكتشف في بعض ..
لك التحية ..
| |
|
|
|
|
|
|
|
|
|
Re: النضال الشكلاني (Re: قيقراوي)
|
مرحب قيقيا
لا اعتقد ان الزميلة تطرقت لمصطلح الشوفونية القاصده انت .. بل قالت (شوفوني .. شوفوني) ودي مصدرها الشوف او النظر وشوفوني بمعنى انظروني او انظروا الي ..
يعني شوفوني انا سويت شنو .. عاينو لي انا عملت شنو
غايتو ده الانا فهمتو .. واحتمال تكون قاصده شوفونية بتاعتك وبتاعة نابليون
| |
|
|
|
|
|
|
|
|
|
Re: النضال الشكلاني (Re: وليد محمد المبارك)
|
| Quote: مهمة الحكومات هي إرساء الأخلاق |
objection
مرة تانية
______________________
اييييييهههههه
حكومات تجي وحكومات تغور
تحكم بالحجي بالدجل الكجور
مرة العسكري كسار الجبور
يوم قسم النبي تحكمك القبور
| |
|
|
|
|
|
|
|
|
|
Re: النضال الشكلاني (Re: وليد محمد المبارك)
|
من المعروف أن مصيبة مصائب السودان ..
تتمثل في النخب الحاكمة والتي تذهب وتأتي ..
وبمختلف أطيافها ولا جديد يذكر ..
وتظل تدور في فلكـ نفسها ..
ومصالحها وتكبير الكوم ..
وتلميع شخوصها .. وفرض أجندتها قسراً ..
دون الالتفات للحاجات الأساسية ..
للمواطن العادي البسيط ..
ولا حتى أخذ رأيه ووضع اعتبار له .. سياسياً أو حياتياً ..
أوتحقيق حلمه في حياة كريمة ..
لا تنغيص فيها ..
فتظل وعود النخب ..
ممهورة على ماء أحلام المواطن البسيط ..
ويتم اهراقها على هموم النخب ..
التي تعاني من انفصام عجيب ..
يفصل بينها والشارع ...
ويظل المواطن البسيط أسير نرجسية النخب ..
وحتى عندما تنقلب الآية وتتغير الأدوار ..
تظل النخب تمارس نفس ممارساتها ..
وتريد الوصول للكراسي على أشلاء من يدعمها ..
دون أي اعتبار لهم او وضع اعتبار لهمومهم ومشاكلهم ..
متخذه كافة الوسائل والسبل لتبلغ غاياتها ..
وبعد أن تبلغ وتدركـ كراسي الحكم ..
تعود ريما لعادتها القديمة ..
وتمارس نفس الدور القمئ السابق ..
لغريمهم الذي يخالفهم اتجاهاً ويوافقهم سلوكاً ..
ويظل المواطن البسيط بين سندان من يحكم ..
ومطرقة من يعارض ..
وتظل النخب في برجها العاجي العالي ..
ولا تلتفت لاحلام وتطلعات المواطن البسيط ..
فلا خير في هذا او ذاكـ ..
ولا أريد ان أكرر بيت مظفر النواب ..
حتى لا أرمى بما لا أقبل ........
ــــــــــــــــــــــــــــــــــــــــــــــــــــــ
قطعاً لم تقصد برلومتنا الشوفينية ..
لكن أسطوانة شوفوني ونرجسية النخب ظلت مدوره ..
ولم تتوقف ..
رغم اختلاف توجهات واتجهات النخب ..
مرحبتين حبابكـ ومنوره والله ........
| |
|
|
|
|
|
|
|
|
|
Re: النضال الشكلاني (Re: جمال ود القوز)
|
واحدة من دوافع الناس حينما يقررون امتهان السياسة هي حب البشر الطبيعي للظهور و القيادة و التميز على الأقران ، و هي غرائر حملها البشر
معهم خلال مسيرتهم الطويلة عبر تاريخهم التطوري.صراع القوة و النفوذ و بسط السيطرة موجود لدى اقاربنا في المملكة الحيوانية بدون الرتوش
و الظلال التي نضفيها نحن البشر على المسألة. و أيضاً الغيرية و حب مساعدة الآخرين و خصوصا من الأقارب -kin selection- مسألة غريزية
مغروسة في الطبيعة البشرية. إذن كل هذه الدوافع هي دوافع مقبولة في حال توفر الإطار المطلوب لممارسة لعبة السلطة وفق قوانين التداول السلمي
و سيادة مبادئ المحاسبة و الشفافية.
| |
|
|
|
|
|
|
|
|
|
Re: النضال الشكلاني (Re: جمال ود القوز)
|
ود القوز جيت تكحلا عميتا .. هههههههههههه . كلامك سمح والله ما عدا كلمة برلومتنا .. أيوة أنا جديدة عليكم في المنبر التحقت به مؤخراً...(مش الأخ برضو برلوم ؟)
الحداثة تعني أنه ستكون لنا شعبية أكبر في المنبر وسنزاحم القدماء .. ( الشعبية ح يصنعوها لينا القدماء طبعاً ، يا بالهجوم علينا "والهجوم برضو بيصنع شعبية " ولا بي قبولنا وصناعة مفهومية مشتركة ).. ههههههههههههههه
ولي عودة للتعقيب على طرحك ..
| |
|
|
|
|
|
|
|
|
 Re: النضال الشكلاني (Re: قيقراوي)
|
Quote: لا اعتقد ان الزميلة تطرقت لمصطلح الشوفونية القاصده انت .. بل قالت (شوفوني .. شوفوني) ودي مصدرها الشوف او النظر وشوفوني بمعنى انظروني او انظروا الي ..
كلك مفهومية أ/ قيقا .. ده قصدي زي ماقال ( وليد ) . قصدي (الشوفان) .. يعني الشوف والنظر (والشوفان ) دي بالدارجي ما تقوم تفهم إني قصدت (الشوفان) حبوب الطعام ..
إنت قلت مقال ، كويس إنك سميتو مقال .. باقي المصطلحات معقول تكون ما فاهما !!!!!
تحياتي ...
|
| |
|
|
|
|
|
|
|
|
|
Re: النضال الشكلاني (Re: سلافة الصديق أبو ضفيرة)
|
عميتا كيف يعني ؟؟ ...
بي برلومتنا دي ولا بي حاجة تانية ؟؟ ..
عارفه ..
أكتر زول كاتل في شغلة الاستبياض دي ..
العبد لله .. وأصلاً ما أخدت الموضوع بجديه ..
كما يحسب البعض ..
لكن كنت أحسب كل الاستبياض الحصل ده ..
مجرد دعابه والى تاريخه ..
هذه فكرتي ..
لكن برلوم لمن يقول لي برلوم إتــــــا برلوم ما أظن فيها حاجة دي ....
ولا أنا غلطان ....
عامله زي مواطن بيسلم على اخوه المواطن ..
ــــــــــــــــــــــــــــــــ
سئلي الله ( على قول المستبيض الأعظم ) ......
أنا ما جيت هنا إلا .. لأشد من أزركـ ..
وأدعم وجودكـ ..
حاكم أنا بحب برالمة 2013 ..
| |
|
|
|
|
|
|
|
|
 Re: النضال الشكلاني (Re: سلافة الصديق أبو ضفيرة)
|
تسلمي استاذة . وأظن البوست جاء مخاطبا لظاهرة ظللت حاضرة بقوة تارة بين المجموعات المتحزبة وتارة أخرة بين الباحثين عن أمجاد ولو علي انقاض البسطاء . تظل الظاهرة هي الوسيلة الأسرع والأنجع وهي ميراث لحقب ونخب ساهمت بل أسست بان تظل كعرف سياسي متقبل مما اقعدت بالبنية السياسية السودانية وأغرقتها في مستنقع لا يختلف كثيرا في فصولها المتعاقبة . البوست لأمس اشواق وتطلعات المشفقين بحال التعاطي في عالم السياسة السودانية التي ولدت وهي فاقدة الضمير . مودتي
| |
|
|
|
|
|
|
|
|
|
Re: النضال الشكلاني (Re: مبارك محمداني)
|
| Quote: وأظن البوست جاء مخاطبا لظاهرة ظللت حاضرة بقوة تارة بين المجموعات المتحزبة وتارة أخرة بين الباحثين عن أمجاد ولو علي انقاض البسطاء |
كلامك موضوعي وفيهو تحليل جميل .. وأشواقنا ما زالت متطلعة لوجود وضع سياسي حقيقي وحياة حقيقية في السودان .. شكراً على مرورك ..
| |
|
|
|
|
|
|
|
|
|
Re: النضال الشكلاني (Re: عبدالغني محمد الحاج)
|
Quote: | Quote: فالقيام بأي عمل في السودان أصبح خاضعاً للمفهوم الجمالي والإستعراضي (شوفوني .. شوفوني) |
ما فهمت الحتة دي! |
قيقا، المافي شنو؟
برضو مشتاقين!
الغريبة ما أظني لاحظت توقيعك الأثير على مداخلتك!
| |
|
|
|
|
|
|
|
|
|
Re: النضال الشكلاني (Re: سلافة الصديق أبو ضفيرة)
|
Quote:
من خلال كلامك شكلك بتثق في فهم قيقراوي شديد .. ده شي كويس إنو الزول يثق في فهم شخص ما .. بس أنا لسة ما بعرفكم كويس .. وما بعرفكم بتفكروا كيف ..
أتمنى نصل لي فهم متبادل من خلال طرحنا في المنبر ولي قدام لو إداخلتو معاي أو إداخلت معاكم يكون الفهم كبير وعميق .. نحنا لسة بنكتشف في بعض ..
|
بل العكس تماماً 
انا هنا ابلد زول ... كان فهمتا .. يعني مطعم الباشا دا كلو فهم
بس (التشكيل داخل ال(بس) على مسئولية القارئ)
------
وليد الشفت ؤ ود القوز مبروك عليكم ضنب الككو ..
وين انا قولت اي ازول اي حاجة .. انا سألت .. السؤال حرام هو؟
سم سانين دا اصلاً ما موضوعي ..
اها (جمالي) مقصود بيها شنو في (الصياغ) دا؟
ياخي لو الحاجات بقت مقياسها جمالي -الجمالي البنعرفو- تاني المناضلين ليها شنو ذاتو!؟
المصطلحات المستخدمة في (الصياغ) دا يا واحدة تانية غير الاصطلحوا عليها جموع الناس .. يا كمان يكونوا الكيزان ديل غيروها
ما بعيدة عليهم كلو كلو ... اي شي جايز معاهم
المافي شنو يا فقير (هل تسمعني ..حول)
المايك معاك
| |
|
|
|
|
|
|
|
|
|
Re: النضال الشكلاني (Re: قيقراوي)
|
| Quote: وقد جاءت هذه الكلمة من اسم نيكولا شوفان الجندي الفرنسي الذي جرح عدة مرات في حروب الثورة الفرنسية وحروب نابليون ولكنه ظل أبداً يقاتل في سبيل مجد فرنسا ومجد نابليون، وتستعمل الشوفينية حالياً في مجال الاستهجان وعدم الاستحسان وتمثل النازية الألمانية قمة التعصب الشوفيني |
الزمن ده كلو انا قايل كلمة شوفوني دي حقتنا سودانية مية المية من شوفوني انا عندي كراع سيدها و حمار سيدو.
طلعت ليها اصل و فصل كمان.
بارك الله فيك يا قيقراوي و من قبلك ابصلع الذي اتاح لنا فرصة الالتقاء بعلماء لم نكن لنلتقيهم.
| |
|
|
|
|
|
|
|
|
|
Re: النضال الشكلاني (Re: Mahjob Abdalla)
|
ازيك يا محجوب
انت قايلني انا ذاتي كنت عارف معناها شنو بالضبط؟
انا كنت عارف انها ما بتعني شنو .. واللهي نظام شوفوني بتاعتنا ديك .. دي كنت قاطع شكها تماماً
------------
الشكر لويكبيديا ياخي
بكري شاكرو على شنو؟
مكتبة ساي ما راضي يعملا لينا ...
اها اسي المعلومات القاعدين نلقط فيها بذاكرة سمبرية (اقرأ خلجوية اذا بتريد) ما ح تضيع على الاجيال القادمة ساي لو صار يخليها تذرؤها الرياح
| |
|
|
|
|
|
|
|
|
|
Re: النضال الشكلاني (Re: قيقراوي)
|
| Quote: سلافة الصديق أبو ضفيرة) |
أستذة سلافة ....سؤال خارج النص ...هل أنت أبنة الأستاذ /الصديق الحاج الصديق ..أستاذ اللغة الفرنسية في كلية الآداب ...؟ في كل الأحوال حبابك عشرة
| |
|
|
|
|
|
|
|
|
|
Re: النضال الشكلاني (Re: قيقراوي)
|
Quote: وليد الشفت ؤ ود القوز مبروك عليكم ضنب الككو ..
وين انا قولت اي ازول اي حاجة .. انا سألت .. السؤال حرام هو؟
سم سانين دا اصلاً ما موضوعي .. |
انت سالت .. ونحن جاوبنا اثراء للنقاش وطلع جوابنا صاح
المشكلة شنو ؟
| |
|
|
|
|
|
|
|
|
|
Re: النضال الشكلاني (Re: وليد محمد المبارك)
|
[انت سالت .. ونحن جاوبنا اثراء للنقاش وطلع جوابنا صاح
المشكلة شنو ؟ ]
المشكلة
اني سألت عن مقصد زول محدد .. وانت جبت لي احتمالات .. لأنك ما نفس الزول
-------
( نسيت اشكرك ياخي) :)
| |
|
|
|
|
|
|
|
|
|
Re: النضال الشكلاني (Re: قيقراوي)
|
Quote: المشكلة
اني سألت عن مقصد زول محدد .. وانت جبت لي احتمالات .. لأنك ما نفس الزول |
قام جا الزول وقال ليك احتمالات وليد صحيح
تبقى المشكلة شنو ؟
| |
|
|
|
|
|
|
|
|
|
Re: النضال الشكلاني (Re: صلاح عباس فقير)
|
| Quote: وليد الشفت و ود القوز مبروك عليكم ضنب الككو .. |
ياقيقا ضنب الككو ده ..
إتا جيتنا ماسكو ...
و جاي معاكـ صحبة راكب .........
داير تسلبطوا فينا هسع دي ..
كااااااك .......
| |
|
|
|
|
|
|
|
|
|
Re: النضال الشكلاني (Re: جمال ود القوز)
|
اللغة ركيكة شوية يا سلافة - لو سمحتي ليّ - لاكين الفكرة وصلت ...
بعدين الجخ أو المراءاة (إن جاز التصريف من "راءى يرائي") جزء من عناصر الثقافة التي ترعى نزعات محددة وتكرسها على حساب نزعات أخرى ...
انا اعتقد انها آلية دفاعية للجمجرة والشمار كنزعة رادارية برعاية "سوداني" ... فلكل جخاخ شمار ... ولكل شمشرجي جخة ...
غايتو طمنتينا على ان هنالك ما يجمع السودانيين الى حد ما ...
... المهم ....
| |
|
|
|
|
|
|
|
|
|
Re: النضال الشكلاني (Re: صلاح عباس فقير)
|
وقت لحد هسع ما وصلتو لحل لمعضلة البوست دا وفك الشفرة بتاعتو
سادلو بدلوي
انا غايتو مع اي او قل كل المناضلين الاحياء منهم والاموات
شكلانيين او لابسين طاقية اخفاء، شوفوني وانا ... كبير والبلد ضيقة
احترم سيدي الامام المهدي بل قل هو ايقونة النضال، وطبعا سيدي الامام
فات حتة شوفوني دي بمراحل وادعى المهدية عديييييل كده، لكن برضو بنحبو ياخي
المشكلة وين؟؟
والراجل كده يجي يقول نضال ود حبوبة دا نضال شكلاني ؟؟؟ علي باليمن مافي راجل بقولها
وكذلك نضال سيدي ومولاي الراحل علي الميرغني وصحبة عبدالرحمن المهدي، و رجال اللواء الابيض
علي عبداللطيف وبقية الاخيار
ونحي نضال من تيعوهم، الاشقاء، الفيليين، ازهري والمحجوب والشفيع وعبدالخالق
منهم من قضى نحبه ومنهم من ينتظر وما بدلوا تبديلا
كلهم مناضلين لهم التحية والتقدير، فيهم السهل وفيهم الكريم وفيهم البخيل وفيهم الشديد
وفيهم النزيه ولكنهم كانوا شرفاغء
نستلهم من مسيرتهم السير في نفس الدروب الشاقة التي حفرها الغزاة في زمانهم ونسير في نفس الدروب التي
يحفرها لنا الغزاة الكيزان التتار الجدد
سيرة ما بها من حطة ولا درن
سؤال لصاحبة البوست:
عن اي مناضلين شكلانيين وناس شوفوني انت تتحدثين؟؟
ادينا امثلة لمناضلين سابقين ومناضلين حاليين؟؟
| |
|
|
|
|
|
|
|
|
|
Re: النضال الشكلاني (Re: أحمد ابن عوف)
|
سلافه سلام ..
لا أدعى فهمى لما تفضلت به من آراء ولكن ..
النضال الشكلانى أو الشوفونى -بحسبك- كظاهرة إجتماعية او نفسية موجود ..
الا أن ربط ذلك بتاريخ النضال فى السودان أولا .. ثم وخلسة من التسلسل المنطقى .. ربط مجمل تاريخ النضال فى السودان بالنضال الشكلانى فى بقية المقال .. يفقد المقال شيئا من الترابط.
نحن إزاء عدد من الاشكالات هنا ..
أولها تعريف النضال فى عضمو .. هل هو النضال الذى تفضلت بارجاعه فى أكثريته للبرجوازية السودانيه ؟!
| Quote: لأن الأكثرية من حملة لواء التغيير هم عبارة عن طبقة برجوازية يهتمون بالشكل أكثر من الجوهر ولا يدرون أنهم بفعلهم هذا يخنقون العامة ويهضمون حقوقهم وإنسانيتهم .. |
حسناً ..
وبتجاوز هذا الحكم النهائي الذى انزلتيه على ما يسمى بالنضال السودانى تاريخا وحاضرا معاشا ..
ونمشي لى قدام ..
من أين لك أن تقيمى الحجه على اهتمام البرجواز بالشكل او الشوفونيه (شوفونى.. شوفونى) .. بأكثر من إهتمامهم بالجوهر ؟!
للبرجوازيه نقائصها بالتأكيد ولكن وفى الاطار السودانى الذى تتحدثين عنه أنت ملزمة بتقديم الشواهد او الاستدلالات على الحكم الثانى الذى أصدرتيه هنا ..
ثم ..
| Quote: أأتي وأقول أن كل قضايا السودان وإشكالاته الإجتماعية مازالت واقعة تحت تأثير فلك الإستعمار .. |
أعتقد أنننا تخطينا مرحلة المظهر القوى للاستعمار الانجليزى فى الحياة السودانية ..
لم يعد مؤثرا بأكثر مما يفترضه التأريخ لنفسه -بصورة طبيعية - من أدوار فى الراهن ..
تحياتى ومرحبا بك فى المنبر ..
| |
|
|
|
|
|
|
|
|
|
Re: النضال الشكلاني (Re: محمد حيدر المشرف)
|
سلام أخ المشرف من خلال ماتفضلت أنت بقوله أظن أنك فهمت ماطرحته من آراء في البوست ..
وحسب قولك نحن متفقون على أنه هناك ظاهرة تسمى بالنضال الشكلاني موجودة في المجتمع ..
لكن أحب أن أضيف شيئاً لما سقته من حديث عن النضال الشكلاني .. وهو أن كل المتداخلين فهموا قصدي سواء كانت الردود إيجابية أو سلبية
ويظل المطلب الأساسي بعد حوارنا وتعليقاتنا هذه هو أنه إن كانت هناك طريقة لتصويب الأمور التي طرحتها في هذا البوست أرجوا أن تعلموني ، حتى نعمل سوياً
عل تأسيس نضال معافى وخلق ظواهر إيجابية في المجتمع ..
أما عن ربط الشكلانية بمجمل تجارب النضال في السودان فهذا لا يفقد المقال شيئاً من الترابط ،أنا عنيت تماماً ذكر هذه الجزئية لأن الصفوة في السودان منذ قديم الزمان
علاقتها بواقع العامة علاقة سطحية وهامشية جداً .. الصفوة المتعلمة والمتفوقة فكرياً والمميزة يجب أن تتفاعل أكثر مع واقع الناس ويجب أن تعيشه وتحلله حتى تستطيع أن تناضل من
أجل القضايا بشكل عميق يفضي إلى التغيير .. الصفوة منذ الإستقلال وإلى يومنا هذا لم تستطع حل مشاكل السودان ، نحن الآن نعيش في نفس المشاكل القديمة بل وأكثر .
إن كان هناك نضال بالمعنى الحقيقي للنضال لما ظللنا نعاني إلى الآن .. ولما ظلت قضايا السودان عالقة إلى يومنا هذا في ذات النفق المظلم .
السودان يعج بالمناضلين ومع هذه الكثرة تظل مساهماتهم في حل قضايا السودان ضعيفة مقارنة مع ما نعيشه ومقارنة بتاريخ النضال الطويل جداً في السودان .
| Quote: تعريف النضال فى عضمو .. هل هو النضال الذى تفضلت بارجاعه فى أكثريته للبرجوازية السودانيه ؟! |
أما عن تعريف النضال فليس هو ما أرجعته للبرجوازيين .. وصراحة ورود سؤال كهذا يبدو غريباً .. لأن النضال لا يرتبط بالبرجوازيين فقط
بل يرتبط بكل شخص صاحب قضية ، أغلب البرجوازيين هم من يتخذون النضال وسيلة لتلبية حاجات الطبقة والمحافظة على مصالحها وأوضاعها ، إن كان
البرجوازييون حقيقة ً ينادوا بالحريات والمساواة فلماذا لا نراها على أرض الواقع ولماذا لايعيشها البسطاء ..؟ إن مناداتهم بالحرية والمساواة تعني مزيد من الإستغلال لموارد
الدولة ومزيد من السيطرة على الإقتصاد لتأمين وضعهم وضمان إستدامته . بكل أسف مجتمعنا السوداني لا يزال واقع تحت أسر الصراع الطبقي سواء كان على مستوى الطبقة
المتعلمة والمثقفة أو الطبقة الميسورة صاحبة الأموال .. النضال الحقيقي هو وسيلة للدفاع عن الحقوق وبسط الحريات وتغيير الأنظمة المستبدة والدفع بحركة المجتمع للأفضل ..
أما عن الشواهد والدلائل فهي واضحة وجلية .. أي صاحب مركز يتلبس لبس المناضل ليضلل الشعب ويحافظ هو على وضعه .. وهذا هو الغالب والمنتشر ..
Quote: أعتقد أننا تخطينا مرحلة المظهر القوى للاستعمار الانجليزى فى الحياة السودانية ..
لم يعد مؤثرا بأكثر مما يفترضه التأريخ لنفسه -بصورة طبيعية - من أدوار فى الراهن . |
في هذا الرأي أخالفك تماماً عزيزي مشرف ويخالفك الكثيرون .. نحن ما زلنا ندور في فلك الإستعمار .. بل وهناك مستعمريين بالوكالة في السودان ويقومون بدورهم على أكمل وجه
وما زلنا ننظر لمشاكلنا وقضايانا بنفس الطريقة التي كان ينظر إليها المستعمر ونتحدث ونتفاوض فيها ثم نأتي ونعالجها بنفس طريقة المستعمر بل وأشنع ..
السياسيون والنخبة في السودان رحبوا ومازالوا يرحبون ويفتحون أذرعهم لكل فكرة ومؤآمرة خارجية تضر بهذا البلد ، وبما أن مصالحهم لن تتوقف فلماذا لا يرعون أفكار الغرب
ويحافظون على الصورة التي رسخها الإستعمار . الإستعمار لم يعمل أبداً على إعداد قادة حقيقيين في السودان بل حتى في الوقت الذي تم فيه إدخال التعليم والمدارس كان هذا من أجل توفير
موظفين وأشخاص لخدمتهم كمستعمرين .. ومازال هذا النظام سائد في السودان فكل الحكومات المتعاقبة لم تشأ أن تخلق وضع حقيقي في السودان ولم تشأ أن توفر قادة حقيقيين لاستلام زمام الأمور
بل أعدت ومازالت تعد من يخدمها ويخدم سلطتها ويثبت وضعها .. وهذا إرث إستعماري .. وهناك الكثير من النماذج التي تبين مظاهر الإستعمار القوية في الحياة السودانية .
أخيراً سرني تداخلك ومرحباً بآراءك ..
| |
|
|
|
|
|
|
|
|
|
Re: النضال الشكلاني (Re: أحمد ابن عوف)
|
أخ إبن عوف تحية طيبة .. إنت قلت إنك مع كل المناضلين الأحياء أو الأموات .. أنا بختلف معاك أنا مع الناس العندهم تاريخ مشرف ومواقف مشرفة ..
هسي أغلب الأسماء الزكرتها دي أنا متحفظة على تاريخ النضال بتاعا .. محمد أحمد المهدي صنع تجربة حكم سودانية بالرغم من كتير من الملاحظات عليها
لكن تظل تجربة سودانية خالصة ما فيها نَفَس مستعمر .. الدور والباقي على اللي خلفوهو من أولادو وهزمو الفكرة وجابو لينا فكرة مشوهة للنضال مبنية على تنازلات
قدموها للمستعمر الفي يدو السلطة .. ومازالت التنازلات على أساس المصالح والسلطة تُقدم وإلى يومنا هذا من قِبل الأكابر من سلالة المهدي، وانت طبعاً عارف ناس المصالح في حزب الأمة واللي دايماً بيقصدو يجهضو أي فكرة للتغيير بالرغم من إنو الحزب فيهو ناس أصحاب قضية ..
نجي للمراغنة الأشراف .. ديل مابقدر أقول فيهم حاجة لأنو خشمي ح يوجعني من النضم .. بس بكتفي بي (معقولة الوحدة مع مصر ؟ ).
المهم الحزبين الكبار ديل بكل أسف قامو على أساس طائفي ما قامو على أساس وطني شامل ..
نجي نقتبس من كلامك شوية :
Quote:
كلهم مناضلين لهم التحية والتقدير، فيهم السهل وفيهم الكريم وفيهم البخيل وفيهم الشديد
وفيهم النزيه ولكنهم كانوا شرفاغء
نستلهم من مسيرتهم السير في نفس الدروب الشاقة التي حفرها الغزاة في زمانهم ونسير في نفس الدروب التي
يحفرها لنا الغزاة الكيزان التتار الجدد |
ذكرت في كلامك ده صفات بتتعارض مع مفهوم الشرف .. ح أتكلم فيها كلام بسيط ..
الشرفاء دائماً يسعون لإرساء الأخلاق في المجتمع وقيمة البذل بتكون حاضرة عندهم وهدفهم الأساسي بيكون التغيير لنشر السلام والأمان والعدل ..
طبعاً نحنا مرو بينا شرفاء كتار في السودان لكن الغير شرفاء ما خلوهم يواصلو المسير وحاربوهم لأنهم قاصدين يدمرو البلد دي ويظل شعبها مرهق وتعبان وبيعاني ويتم تجهيله وده طبعاً لمآرب خاصة ..
حسب تقديري إنو قمة الشرف الدفاع عن الحق .. بالنسبة لي في مناضلين من الذكرتهم في تعليقك مارضو بالظلم وقالو كلمة الحق وحاربو كل أشكال القهر والتجبر ولم يرضخوا ،
نوعية هؤلاء مثال للشرف لأنهم ما إتعاملو بمفهوم السكوت في سبيل المصلحة ..
أما بالنسبة للسير في دروب المناضلين ما ح يكون بإطلاق .. لازم نعيد قراية التاريخ عشان نشوف الصحيح من السقيم ونصوب الأخطاء صدقني لو تابعنا أصحاب الأمجاد المصنوعة
والزائفة وسرنا على نهجهم ولم ننتقد تجاربهم ونحللها لن تكون هناك نهضة أو تغيير في السودان وما ح نقدر نحارب الكيزان بالرغم من إنو المشكلة مافي الكيزان وبس المشكلة في المعارضة برضو، وفي نظام إجتماعي ثقافي كامل محتاج لإنقلاب عاجل ..
Quote: سؤال لصاحبة البوست:
عن اي مناضلين شكلانيين وناس شوفوني انت تتحدثين؟؟
ادينا امثلة لمناضلين سابقين ومناضلين حاليين؟؟ |
أنا أتحدث عن كل المناضليين الشكلانيين الذين قرآت عنهم والذين أراهم الآن في الساحة .. أنا أتحدث عن واقع .. ومن هذا الواقع سُقت كلامي ..
بالنسبة للأمثلة تخير أي حزب من الأحزاب وح تلقى كمية من المناضلين الشكلانيين .. وأزيدك في الشعر بيت تخير أي تجمعات شبابية بتطالب برحيل النظام وح تلقى أشكال وألوان من الشكلانيين ..
مودتي ..
| |
|
|
|
|
|
|
|
|
|
Re: النضال الشكلاني (Re: تبارك شيخ الدين جبريل)
|
مرحباً تبارك .. كلامك عن إنو لغتي ركيكة هو راي خاص بيك وبنحترمو ..
لكن أحب أقول ليك إنو اللغة ماركيكة اللغة واضحة ومضامينها مفهومة ، على الأقل حاولت ما أتعالى بكلمات فخيمة عشان ما أحاكي النخبة السودانية
وما أعيد إنتاج فشلها وعدم قدرتها على خلق تواصل عميق وطرح أفكار غير معقدة تتسرب إلى المتلقى بيسر .. وتساهم في تغيير الواقع ..
| |
|
|
|
|
|
|
|
|
|
Re: النضال الشكلاني (Re: سلافة الصديق أبو ضفيرة)
|
Quote: على الأقل حاولت ما أتعالى بكلمات فخيمة عشان ما أحاكي النخبة السودانية
وما أعيد إنتاج فشلها وعدم قدرتها على خلق تواصل عميق وطرح أفكار غير معقدة تتسرب إلى المتلقى بيسر .. وتساهم في تغيير الواقع .. |
كلما كانت اللغة يا أستاذة سهلة وما معقدة بتسهل الفهم والمتابعة
| |
|
|
|
|
|
|
|
|
|
Re: النضال الشكلاني (Re: تبارك شيخ الدين جبريل)
|
الكلام الركيك وين بالظبط في البوست دة ولا بوست آخر ! حسب مفهوم أهل الإعلام في انسب وافضل لغة لمخاطبة المتلقي هي اللغة الوسطي المفهومة والبسيطة لدي العامة ! أما المنبر مكان لعرض الآراء والأفكار وتبادل وجهات النظر مدعمة بمداخلات كلا حسب تعبيرة لأجل الفائدة العامة ! أما الكلام المنمغ وإظهار المهارات الخطابية فمكانة منابر أسست لتلك اغراض . أما البوست يعد من أميز البوستات التي كتبت مؤخراً من حيث المضمون والصياغة . مودتي
| |
|
|
|
|
|
|
|
|
|
Re: النضال الشكلاني (Re: صلاح عباس فقير)
|
أستاذ صلاح شكراً على الإضافة العظيمة .. والطرح الجريء .. بعد كل الذي ذكرته أحب أن أضيف مشكلة أخرى للمثقفين والمنوط بهم إحلال السلام وهي عدم إعترافهم بالآخر .. عدم الإعتراف هذا أدى إلى تنافس ملتهب وصراع كريه لإثبات الأفضلية وتأمين المصالح هذا كله أدى إلى حروب ألهبت السودان وأهله وأصبحت الحرب عندنا عبارة عن معارك بلا معترك اللهم إلا تصفية الحسابات وإقصاء سكان الأطراف وإبادتهم وحياكة المؤآمرات ضد البلد .. الصفوة محتاجين لتطهير فكري .. حتى نستطيع أن نلج لمرحلة جديدة من التغيير والبناء والتنمية لكن هل هم مستعدون لذلك من أجل مصلحة البلد ؟ ومصلحة الكل ؟
| |
|
|
|
|
|
|
|
|
|
Re: النضال الشكلاني (Re: سلافة الصديق أبو ضفيرة)
|
شكراً لك أستاذ سلافة،
قلت:
Quote: مشكلة أخرى للمثقفين والمنوط بهم إحلال السلام وهي عدم إعترافهم بالآخر ..
عدم الإعتراف هذا أدى إلى تنافس ملتهب وصراع كريه لإثبات الأفضلية وتأمين المصالح
هذا كله أدى إلى حروب ألهبت السودان وأهله وأصبحت الحرب عندنا عبارة عن معارك
بلا معترك اللهم إلا تصفية الحسابات وإقصاء سكان الأطراف وإبادتهم وحياكة المؤآمرات
ضد البلد .. الصفوة محتاجين لتطهير فكري |
وصدقتِ!
فهذه المشكلة تقريبا هي أم المشكلات التي يعاني منها الناشطون أو المناضلون،
أو الفئة المتعلمة عموماً!
والمشكلة أنهم في حال عدم الاعتراف المتبادل بعضهم ببعض، يفرضون على عامة البسطاء،
على الشعب المسكين، أن يدفع الثمن الغالي، كما هو حال أهلنا الآن في دارفور وجبال النوبة!
وهذا يؤكد ما تفضلتِ به من تحديد طبيعة الأزمة كلها بأنها أزمة أخلاقية في المقام الأول!
فعدم احترام الآخر والاعتراف به: قضية أخلاقية في المقام الأول!
| |
|
|
|
|
|
|
|
|
|
Re: النضال الشكلاني (Re: صلاح عباس فقير)
|
بسم الله الرحمن الرحيم
الاستاذة / سلافة
بوست متميز ويتناول قضية حقيقية اقعدت بالسودان عن اللحاق بركب التطور
والفكرة وصلت بوضوح وفى هذا اشارة لسلامة اللغة فواصلى بنفس الركاكة
اللغوية ( ان وجدت ) حتى نفهم نحن البسطاء ونواصل .. وان تعذر فهمها على
بعض علماء اللغة فذلك شأنهم ..
ليأسى ومعظم اهل السودان من هؤلاء المناضلين ( صمت الشعب السودانى
على هذا الوضع المزرى على كل الاصعدة ليس نتيجة لقوة النظام الامنية ولكنه
يأسٌ من هؤلاء ) .. بسبب هذا اليأس كنت اعتقد بأن مخرج السودان من كل ازماته
هذى انما يكون عبر شبابه .. والفكرة ترتكز على قيام حزب أو ائتلاف شبابى من
الشباب الملئ بالوطنية وحب هذا الوطن والبعيد كل البعد عن تلك الامراض التىاستوطنت
المناضلين المذكورين ..خاصةً وان دور الشباب فى الحياة السياسية
السودانية لم يخرج عن كونهم الحصان الذى يجر العربة التى يتحكر على مقعدها الامامى
الوحيد كهول الاحزاب التقليدية .. ناقشت الفكرة مع الكثيرين ممن حولى من اصدقاء
وزملاء منابر وكنت اتمنى انيتم تبنيها وان ترى النور .. ولكن عند عودتى للمنبر بعد
غيبة اكتشفت استحالة الفكرة .. وايقنت بأن المشكل ليس باجيال بقدر ما انه سلوك ....
سلوك ورثته الاجيال وكل جيل سلم رايته للجيل اللاحق .. ومن ذلك حسبما اوضحت
انت عدم قبول الاخر .. والاستعلائية .. ووووووووو
فهل سيأتى علينا يوم يكون فيه حل هذه المعضلة التى تطرقت اليها بهذا البوست عبر
جيل شاب واعى ينبذ كل تلك الامراض التى استوطنت الاجيال السابقة والتى اوصلتنا
لهذا الحال ...
بوست يستحق ان يكون بالمقدمة دائماً
وختاماً
ارجو ان لا تكون لغتى ركيكة ..
ارتيقا
| |
|
|
|
|
|
|
|
|
|
Re: النضال الشكلاني (Re: Artiga Gilani)
|
اختنا سلافة
و الجمع الجميل ...
نضال ما نضال ...شكلاني ..شوفاني ...
لو في النهاية حينسرق زي ما انسرقت انتفاضة ابريل
و يجو ناس ( السيدين ) يخموها ( صرة في خيت ) ...
يبقي ما في فايده ... ( نتغتي ) زي ما صفية زغلول غتت سعد زغلول ...
لأانو طول ما الزول الما بفك الحرف مع الزول الحاصل علي اعلي مراتب التعليم ...
بيقبلوا ايادى ( سيدي ) و( السيد ) ...
فعلي الدنيا السلام ...
__________________________________________________
اسفين للزحمة ...
| |
|
|
|
|
|
|
|
|
|
Re: النضال الشكلاني (Re: يحي قباني)
|
Quote: لأانو طول ما الزول الما بفك الحرف مع الزول الحاصل علي اعلي مراتب التعليم ...
بيقبلوا ايادى ( سيدي ) و( السيد ) ...
فعلي الدنيا السلام ... |
أستاذ قباني ده الفاقع مرارتنا .. لكن صدقني السودانيين قابلين لإنو يتم إنتهاز بساطتهم من قبل ناس زي ديل . يعني السواد الأعظم من الشعب والحمد لله متسبب في الوضع ده ، نحنا علينا نذكر ونجتهد نغير المفاهيم والسلوك المشين ده .
شكراً على الزحمة ..
| |
|
|
|
|
|
|
|
|
|
Re: النضال الشكلاني (Re: Artiga Gilani)
|
Quote: ان دور الشباب فى الحياة السياسية
السودانية لم يخرج عن كونهم الحصان الذى يجر العربة التى يتحكر على مقعدها الامامى
الوحيد كهول الاحزاب التقليدية |
عزيزي أرتيقا إنت قلتها .. وبكل أسف دايماً كهول الأحزاب التقليدية بينظرو لينا كشاب بالطريقة دي .
أنا شخصياً نفسي السلوك ده يتغير ويحصل تجديد على مستوى التفكير ، لكن لو الشباب ح يتبنو نفس خط الأحزاب دي ويلتفو دايماً حول شخصية محددة وما يحاولو يحللو مواقفا أو ينتقدوها ويصوبوها أو ويكونو مصرين يتعاملو مع الشخصيات الحزبية كأناتيك قديمة ومقدسة يجب المحافظة عليها وعدم المساس بها صدقني ما ح يحصل تغيير كبير في السودان . لأنو التغيير وقوده الجرئة ونحنا بالجد محتاجين شباب جريئيين أكتر وأكتر وعندهم قدرة على التحليل والتصويب .
الحمد لله لغتك ما ركيكة .. مالم يجي تبا رك ويقول كده *ــ^ شكراً على مرورك وأفكارك ..
| |
|
|
|
|
|
|
| |
سلافة الصديق أبو ضفيرة
أحمد ابن عوف
Ahmed musa
تيسير عووضة
عبد الله فقير
امير طمبل
سيف النصر محي الدين
قيقراوي
ombadda
علي دفع الله
جمال ود القوز
Sinnary
مبارك محمداني
Mahjob Abdalla
محمد محمود محمد
تبارك شيخ الدين جبريل
محمد حيدر المشرف
Artiga Gilani
يحي قباني
فيس بوك
تويتر
انستقرام
يوتيوب
بنتيريست