|
|
|
 Re: راكب يصفع مضيفة ويهدد أمن طائرة متجهه من الخرطوم إلى دبي (Re: ASHRAF MUSTAFA)
|
واحد من اتنين
يا الراكب دا مريض ( مجنون) ..
يا المضيفة دي إستفزتو ودفعتو للتصرف دا..
بعض المضيفات تحس معهن وكأنهن مالكات الطائرة وليس مجرد موظفات مهمتهن
إستضافة الركاب والوقوف على راحهتهم وتسهيل أمورهم خلال الرحلة ..
على بعض خطوط الطيران تأهيل أو اعادة النظر في بعض المضيفات ..
...........
أقول قولي هذا ولم يحدث أن تعرضت لموقف* لكنني شاهدت والحمدلله.
...........
من النظرة والكلمة الأولي للمضيفة أدرك بحاستي التاسعة إن كان يجب أن أقفل خشمي علي أو
أطلب موية وشاي وقهوة خلافو .
| |
 
|
|
|
|
|
|
|
|
Re: راكب يصفع مضيفة ويهدد أمن طائرة متجهه من الخرطوم إلى دبي (Re: Hani Arabi Mohamed)
|
الرحال جاب الكلام من الآخر. الاستهتار بالراكب السوداني واضح وقد حدث لي من قبل في رحلة من الرياض إلى الخرطوم على الخطوط السعودية حيث لاحظت ان الخدمات المقدمة اقل بكثير من الخدمات التي تقدمها نفس الخطوط على رحلاتها إلى مدن أخرى وتناقشت مع المضيفة الفلبينية حول والتي أكدت على كلامي بصدق اكبرته فيها وطلبت منها ورقة وكتبت خطاب طلبت توصيله لمكتب مدير الخطوط عن طريق كابتن الطائرة. بالتأكيد لم يقم السوداني بضرب المضيفة المعينة اعتباطاً والتي اعتقد أنها مصرية لأنهم اكثر الشعوب استخفافاً بنا.
| |
|
|
|
|
|
|
|
|
|
Re: راكب يصفع مضيفة ويهدد أمن طائرة متجهه من الخرطوم إلى دبي (Re: نيازي مصطفى)
|
لامانة وكثيرا من المشاهدعلى الطيران ان السوداني مستخف به ولا يمنح الاعتبار والمكانة امام الجنسيات العربية الاخرى حتى الخطوط الاخرى المتجهة من والى للخرطوم تحتلف تماما عن نفس الخطوط المتجه لعواصم عربية اخرى او مغادرة منها من حيث الطائرة في حديدها وخدمات الضيافة الجوية والارضية ليه يا جماعة نحن مستهدفون ؟؟؟؟؟؟؟
دي حقيقة
نشاهدها عندما تكون راكب ترانسيت في المحطة ومنها الي الخرطوم المعاملة تختلف كثير كما نحن بصراحة طبعنا شين غير ملتزمين لا بي ارقام مفاعد الواحد شايل في ايدو 50 كبس انسي الواحد بزهج من المناظر دي
| |
|
|
|
|
|
|
|
|
|
Re: راكب يصفع مضيفة ويهدد أمن طائرة متجهه من الخرطوم إلى دبي (Re: نيازي مصطفى)
|
أولا أرفض ضرب المضيفه أو أي ظل تاني ..
بس بصراحه ياجماعه سافرنا كتير مع شركات طيران مختلفه لجهات مختلفه ...
ملاحظتي الشخصيه إنو في جميع هذه الشركات التي سافرت على متن طائراتها يكون التعامل مع الركاب سيئ جدا في الرحله المتجه للخرطوم ...
عشان كده مابعيد يكون المضيفه استفزته ..
قبل كده أنا في طيران الاتحاد سألت المضيفه ليه أنا والاسره ماقاعدين في كراسي جنب بعض أو على الاقل خلف بعض حسب ماقال لي المشرف على الرحله في الكاونتر ؟؟
ردت وقالت ليه نا مازي بيتك تقعدوا كلكلم في غرفه واحده !!!! أها زي دي تعمل ليها شنو ..
كتبت ليهم شكوى لرئاسة الشركه في أبوظبي وجاني إعتذار مكتوب
| |
|
|
|
|
|
|
|
|
|
Re: راكب يصفع مضيفة ويهدد أمن طائرة متجهه من الخرطوم إلى دبي (Re: Dr.Elsadig Abdalla)
|
سلامات يا أشرف
أتفق مع الجميع أن الراكب السوداني مستهدف من بعض شركات الخطوط العربية
لكن ده ما بيدي الحق لهذا الراكب بضرب المضيفة وإستعمال العنف بطرقه المختلفة.
ياخي لو عندك حق أو المضيفة تعتقد أنها أساءت لك، في قنوات حقوقية يمكن بها أخذ حقك كاملاَ
كان بإمكان الراكب المعني أخذ شهادة الشهود حوله حول تصرف المضيفة و كتابة محضر رسمي
إلي إدارة الخطوط المعنية مدعم بتوقيع الشهود للحادثة. ولو هذه الخطوط تهتم بخدماتها أكيد سوف
تولي الشكوي كل إهتمامها.
تحياتي للجميع
| |
|
|
|
|
|
|
|
|
Re: راكب يصفع مضيفة ويهدد أمن طائرة متجهه من الخرطوم إلى دبي (Re: الصادق صديق سلمان)
|
اتفق مع كل الآراء المطروحة وأزيد
ان شركات الطيران العاملة من والى الخرطوم
تستهتر ولا تحترم الراكب السودانى حتى وان كانت
تذكرته على الدرجة الأولى .
السؤال ماهو السبب وكيف نغير من هذة النظرة تجاهلنا ؟
حكى لى صديق قصة غير مستغربة حدثت على الخطوط المصرية
وقال انه تفاجأ بعد ان صعد الى الطائرة متجها الى إحدى العواصم الأوربية بمقابلة المضيفين لة
وبمنظر الطائرة الداخلى ######ونتها وحالتها الرثة وراءحتها بالرغم من أنها طائرة ايرباص اية 330 حديثة الصنع
قال فكرت لوهلة محاولا اقناع نفسى وإيجاد عذر للشركة لربما كانت طائرة مستبدلة وتم ادخالها فى الخدمة مؤقتا
لسد الحاجة او لربما كان الضغط على هذا الخط قد آخر القاءمؤن على الامر. فى الشركة من القيام بنظافة الطائرة
وا وا وا واوا. الى ان صعدت الى الطائرة المتجهة الى عاصمة الدولة الأوربية قال والله منذ الوهلة الأولى وعندما دخلت
من باب الطائرة قابلتني المضيفات بابتسامات عريضة وأتتنى رائحة الطائرة كمسك وعمبر باردة وليست سخنة كما فى
الخرطوم ثم أضاف والله اعتقدت للوهلة الأولى بعد ان دخلت الطائرة ان هذة الطائرة جديدة وتقوم بأولى رحلاتها ثم
أضاف لقد صممت ان اسأل المضيفة عن جدية الطائرة فقال وعندما فعلت قالت لا اعرف عمر هذة الطائرة ولكن هى بوينج
737 /400 وهذه النوعية من الطائرات قديم نسبيا فى الشركة التى استحدثت أسطولها الآن بطائرات الايرباص وبعد
إجابتها ورغم قلة سعر تكلفة المصرية مقارنة بالشركات الأخرى استفذتنى المعاملة والنظرة الدونية لنا كسودانيين من
قبل إخوتنا المصريين فقررت ان لا ابتاع تذكارها مرة أخرى .
| |
|
|
|
|
|
|
|
|
|
Re: راكب يصفع مضيفة ويهدد أمن طائرة متجهه من الخرطوم إلى دبي (Re: Hisham Amin)
|
كف ....
وبصق في الوش ...
ما اظن الموضوع ساهل ...و ما اظن الزول دا وصل للدرجه دي من رد الفعل ....الا اذا كان الفعل الاستفزازي فوق طاقة الاحتمال ....
رد الفعل وتقدير الموفق في كيفية رد الاعتبار يتفاوت من شخص لاخر ...بعض الناس يصبر ويمشي ....وبعضهم يتعامل بطريقة تتقدا ما تتلتق....
بس معظم الناس اتفقت معاي ....انو غالبية ان لم نقل كل شركات تقدم خدمات أقل كثيرا من حيث الجوده وتعامل الضيافه علي متن سفرياتها المتجهه من والي الخرطوم ...
| |
|
|
|
|
|
|
|
|
|
Re: راكب يصفع مضيفة ويهدد أمن طائرة متجهه من الخرطوم إلى دبي (Re: الصادق البديري)
|
الحالة لا يمكن اعتبارها مجرد نقاش بين راكب ومضيفة
هنالك نوع من المضيفات مستفز جداً .. ولديهم نظرة دونية لجنسيات معينة .. في الوقت عينه هنالك ركاب ليست لديهم المعرفة التامة
بالتعامل مع الطيران مثل الجلوس في المقعد المخصص له .. أو مثلا وضع الهاند باق في الرف
وهنا يأتي دور المضيفة في تنويره بالجلوس في مقعده المخصص له.. ووضع حقيبة اليد على الرف..
دور المضيفة هنا التحدث بود واحترام وكياسة ..
تصرف كابتن الطائرة سليم جداً ...
عموماً .. هذه صورة قاتمة أخرى لما وصلنا إليه في التعامل مع الغير
عبد العزيز
| |
|
|
|
|
|
|
|
|
|
Re: راكب يصفع مضيفة ويهدد أمن طائرة متجهه من الخرطوم إلى دبي (Re: عبد العزيز محمد عمر)
|
لو إدارة الشركـة تخصص طائرات قذرة للســودان، فكيف تلومون المضيفين؟
وهم لا يخصصون طائرات نظيفـة للأروبيين لخضار عيونهم، ولكن لو طائرة قذرة حطت فى مطار اوروبى فإنهم يفقدون ترخيصهـم.. بإختصـار..
وحكومـة القرف دى لا عندها مواصفات ولا فرق تفتيش مطابقـة.. تصورهم للحكم هو الكراسى والوجاهات فقط..
فى ذات الوقت (وليس هـذا مبررا لعنصريـة بعض المضيفينات) فإن تصرفات بعض السودانيين رعائيـة للحـد البعيـد وهمجيـة وغير متحضـرة، شوف الزول
البيهابش فى عربـة الأكل دا.. لو قعـد فى مكانه وطلب ما يريد ماذا كان سيخسـر.. فى زر للمضيفـة، يخليـه يولع كل مرة وما يطفى لحد ما يجيبوا ليه الدايرو. وهو فى
مكانه محافظ على إحترام نفسـه ووقاره.
برضو يساورنى شك ان القصـة ملعوبـة.. وفيها مئات الالاف من الدولارات.. لو كانت المضيفـة من ذات الجنسيـة.. منهم جماعـة قبل كم سنـة، عرضوا على امشى وراهم
بعربيتى لحـد نفق هولنـدا، وقبل الدخول فى حواجز الرسوم هم يقيفوا فجأة وأنا أخش فيهم من ورا مع ضربـة خفيفـة لا تأذى عربيتى.. دى كل مهمتى وعرضوا على مقابل ذلك مبلغ 600 دولار!!
فتأمل.
.
.
| |
|
|
|
|
|
|
|
|
|
Re: راكب يصفع مضيفة ويهدد أمن طائرة متجهه من الخرطوم إلى دبي (Re: Abureesh)
|
سلام للجميع
Quote: بعض المضيفات تحس معهن وكأنهن مالكات الطائرة وليس مجرد موظفات مهمتهن
إستضافة الركاب والوقوف على راحهتهم وتسهيل أمورهم خلال الرحلة ..
على بعض خطوط الطيران تأهيل أو اعادة النظر في بعض المضيفات .. |
المضيفات الفلسطينيات العاملات في شركات الطيران العربية خير مثال على اللئامة وقلة الاحترام ، واحدة في طيران ناس في رحلة الخرطوم-الرياض بعد أن طلبت قهوة وسددت 100 ريـال ، بعد فترة طالبتها بالباقي فردت : ما راح آكـلُن عليك .. عملت ليهم غاغا ودونت شكوى رسمية لكين لي يوم الليلة ما هببو لي ..
| |
|
|
|
|
|
|
|
|
|
Re: راكب يصفع مضيفة ويهدد أمن طائرة متجهه من الخرطوم إلى دبي (Re: بكري اسماعيل)
|
أشرف مصطفي وضيوفو جمعتكم مباركة
مهما كانت درجة الاستفزاز صفع المضيفة سلوك مرفوض وموضوع أنو المضيفين بيتعاملو مع
السودانيين بأستخفاف دي دفن الرأس في الرمال ساي ، قبل كذا عام كنت في رحلة الي
الخرطوم عبر طيران الخطوط العربية السورية
مرورا بدمشق تحركت الطائرة من مطار فرانكفورد الي مطار دمشق الجوء هاديء
ولا صوت ما بتسمعوا وكل الركاب ملتزمين بتعليمات الضيافة ، ومن مطار دمشق
الي مطار الخرطوم عينك ماتشوف الا النور التقول صيوان عزاء كواريك وإزعاج
وكيس تمباك يجيء طاير فوق رأسك والمضيفات ريقهن نشف من الكواريك أربط الحزام ،
لا تتحرك الطائرة صاعدة ، نازلة، أغلق الهاتف وعييك و الركاب للأسف الصعدو من مطار دمشق ناس مشهورين
( ممثلين وممثلات) عدم إحترام التعليمات والفوضي هي التي تجعل المضيفات يتعاملو بضيق .
أسع دا صفع المضيفة عشان دخل معاها في نقاش عن سبب تأخر الطائرة
هي مالا ومال تأخر إقلاع الطائرة ؟ لو في سبب عن تأخر الاقلاع بيكون بسبب إدارة مطار
الخرطوم السجم دا لو الكابتن ماأدوهو إشارة بالاقلاع حيتحرك كيف .
| |
|
|
|
|
|
|
|
|
|
Re: راكب يصفع مضيفة ويهدد أمن طائرة متجهه من الخرطوم إلى دبي (Re: Abureesh)
|
سافرت عدة مرات من مطاري بروكسل وامستردام متجها للخرطوم وعبر عدة شركات
- السورية
- المصرية
- الاردنية
- التركية
- الافريقية (الليبية)
باستثناء الافريقية المعاملة من محطة الترانزيت للخرطوم الفرق شاسع جدا
اولا الطائرة نفسها البتكون متجهة للخرطوم يمكن تمسيها درجة تانية
ثانيا نوع الاكل بكون برضو اقل درجة مقارنة بالرحلة الاخرى
تالتا في رحلة الخرطوم يقدمون طعام ومعه الشوك والمعالق بلاستيك وفي الرحلة الاخري ستيل
رابعا المضيفات معاملة باردة عكس الرحلة الاخري تعامل قمة في الفرايحية وفي طيران الخطوط
السورية الرحلة المتجهة للخرطوم المضيفين كلهم ضكور ...شكلهم عارفين فيها كفوف علشان كده مرسلين عنقالة 
المرحومة الافريقية (الليبية) للامانة المعاملة بنفس المستوى ولم اشعر باي فرق في الرحلتين
فالرحلة القادمة من اوربا والذاهبة الى الخرطوم والعكس كله نفس المستوى
لكن بالمقابل والله نحن نستاهل وبندي الناس فرقة تستفزنا وتقلل من قدرنا
ياخي اي رحلة لما الطايرة خلاص تصل الارض الناس تصفق وتزغرد الا في طيارة الخرطوم
تلقى الناس كاشة وعبوس ومافي احساس بانك وصلت للارض بالسلامة .
الطيارة يادوربك دقت الارض ناسنا كلهم يقيفوا ودايرين ينزلوا شنطهم وما بكترثوا لي نداء
من المضيفين والمضيفات ويشاكلوا كمان لما يقولوا لهم اقعدوا
سافرت مرة في رحلة العودة بالخطوط السورية والطايرة القادمة من الخرطوم لما وصلت مطار
دمشق والناس خرجت من الطايرة والله العظيم جري ومدافرة لصف الجوازات في منظر غير حضاري
بالمرة والمطار ده كله يتفرج والهرج والمرج من السودانيين فقط ؟؟؟؟؟؟!!!!!!!!
| |
|
|
|
|
|
|
|
|
|
Re: راكب يصفع مضيفة ويهدد أمن طائرة متجهه من الخرطوم إلى دبي (Re: حمزه بابكر الكوبي)
|
عشوائية وجلافة تعامل السودانيين ... الراجل فات أى حد مقبول بإعتدائه على المضيفة
وتأخر 20 دقيقة دى فى عرف السودانيين تأخيير ؟! دا كوم والبحلقة فى المضيفات والنظرة الأولى
الما عندها نهاية كوم آخر !!
بخصوص وجبات الأكل وجودتها، معرووف كل شركات الطيران توفر فى الرحلات القصيرة، وتجود خدماتها
فى الرحلات الطويلة .. وكذلك فى طاقم المضيفات والمضيفين. طولت من سودانير ، ولكن أيضاً زمان مضيفينا
ومضيفاتنا السودانيين أذكر بعضهم يجعلك تتحرج تطلب كباية موية .. خليكم من الأجانب
أذكر سفرية لى بطيران دبى من أمريكا عبر مطار هيثرو بلندن، مروراً بدبى ثم الخرطوم. جابهت بلندن سؤ معاملة
من مضيفة بريطانية ومن أحد موظفى المطار (بريطانى خواجة). والإشكال الأكبر كان فى رحلة دبى الخرطوم . المشكلة كانت
بسبب مضيفة بريطانية مع سيدة سودانية سقط من بين يديها طفلها الرضيع وأجهش بالبكاء، أصرت المضيفة أن تنزل
السيدة وكوم أطفالها من الطائرة ليتم الكشف على الرضيع، وأنه سيتم الحجز لها فى رحلة اخرى بعد أيام . يكت السيدة
وأصرت على الإمتناع عن مغادرة الطائرة وأن رضيعها بخير. .. (كانت تجلس أمامى). تقدم أحد الركاب السودانيين
عرف نفسه ومهنته كطبيب وقام بفحص الرضيع ، مصرحاً أنه لا يجد أى أعراض عليه تحول دون سفره، وخاطبت
الدكتور أن الطفل بعد وقوعة بكى ورضع من أمه وهاتين علامتين على سلامته. جاءت المضيفة إياها وتعاملت بوقاحة
وإستفزاز مقصود مع الدكتور مخاطبة إياه من طلب منك المساعدة والمشورة إذهب وأجلس فى مقعدتك. ثار الدكتور
وعلا صوته ، وكانت المضيفة تمعن فى إثارته. فقمت بمخاطبته باللغة العربية بصوت عالى قاصداً توصيل رسالة
لكابتن الطائرة عبر المضيفات والمضيفين العرب بالطائرة . فقلت له يا دكتور دى قاصدة تثيرك عشان تقول
إنك مسبب شغب ويقوم كايتن الطائرة بإنزالك من الرحلة .. هدأ الدكتور الذى قام بواجبه .. وجاء كابتن الطائرة
ليعتذر للدكتور .. عملوا ليهم تمثيلية جابو ممرضة تعمل بالمطار قلبت الشافع، وقالت يمكن يسافر !
وقامت المضيفة البريطانية بالأعتذار للدكتور ... القصة لها بقية بالخرطوم ..
| |
|
|
|
|
|
|
|
|
|
Re: راكب يصفع مضيفة ويهدد أمن طائرة متجهه من الخرطوم إلى دبي (Re: Hisham Amin)
|
المشكلة التي تحتاج الي حل هي كيف نجعل شركات الطيران العربية تحنرم المسافر السوداني؟
ان غياب التثقيف والتوجيه القانوني في كل مراحل الدراسة كما في الدول الاوربية حيث يتعلم الاطفال ابسط القوانين الاولية المنظمة للحياة مع التدرج مما يعطي حس مشبع بالحقوق والواجبات والمحافظة عليها.
ا-امتلاك الحس القانوني للمسافرالرافض لهضم حقوقه من قبل شركات الطيران والزام العاملين فيها
بالتزام القوانين والاتفاقيات الدوليةالمنظمة لعمل شركات الطيران وبالذات ما يتعلق بحقوق وواجبات المسافرين
2- التزام الوسائل والطرق القانونية للحفاظ علي حقوق المسافرين السودانيين وعدم اخذ الحق باليد حتي لا نعطي الاخرين حقا في منعنا لابسط حقوقنا كما حدث لهذا المسافر الذي فقد حقه كمسافر ويدفع الثمن مضاعفامما يعطي الاخرين حقا في مواصلةالمعاملة السيئةالتي انتهجوها.
3-مع ان شركات الطيران شركات تجارية الا ان رعاية الدولة وتمويلها لتلك الشركات يجعلها واجهة وممثلة للدولة وسياستهافلذلك فمستوي العلاقة بين الدول ينعكس بدوره علي المسافر ايا كان وهنا يظهر دور الدولة وهيبتها .
4-غياب الناقل الوطني احدي المشاكل التي تؤثر سلبا علي المسافر السوداني ويعطي ذلك شركات الطيران العربيةفرصة لامتهان كرامة المسافر السوداني .
5-قيام جمعيات تطوعيةارشاديةتهدف لدراسة تجارب المسافرين السودانيين بغرض فرض حظر علي الشركات
التي لا تلتزم بالمعاملة القانونية وتنوير المسافرين علي الشركات الت تقدم احسن العروض وافضل الاسعار
واعتقد ان هذا ليس بالامر السهل
| |
|
|
|
|
|
|
|
|
|
Re: راكب يصفع مضيفة ويهدد أمن طائرة متجهه من الخرطوم إلى دبي (Re: طه جعفر)
|
مرة عندي خالي د. عبد الحفيظ الرفاعي ربنا بديهة العافية
راجع من لندن بالسودانية بعد رحلة علاج
حكي لي قال : جابو ليه في الوجبة شندوتش لحمة بارده
مليانة شحم فطلب من المضيفة تشوف ليهو لو ممكن لحمة
ما فيها دهن لانه مريض وما اكل اليوم كله
المضيفة عاينت ليه وقالت :
انت ياحاج قايلنا نحن ضابحين في الطيارة دي والا شنو
| |
|
|
|
|
|
|
|
|
|
Re: راكب يصفع مضيفة ويهدد أمن طائرة متجهه من الخرطوم إلى دبي (Re: الصادق صديق سلمان)
|
والله نحن مقصرين وناسنا همجيين صحيح وما متحضرين
لكن المضيفة دي يفترض انها مدربة للتعامل مع اشخاص بهذه المواصفات
الزول غلطان ماف اتنين تلاته .. لكنه زول ساي جاي بطباعه واخلاقه
المضيفة هي المحترفة والتي يجب عليها التعامل مع مختلف الحلات بالصورة المناسبة .. واعتقد انه يفترض انها تكون متدربة على ذلك
بالنسبة لجلافتنا فحدث ولا حرج
نحن الشعب الوحيد الذي يطاردك فيه اشخاص لا تعرفهم في المطارات لتحمل لهم اغراض (تجارية ) معك الى السودان .. ودي ظاهرة بقت تخلينا نشيل هم زاتو ونحن مسافرين .. ونفكر كيف يمكن لنا ان نتخارج من من هولاء السغيلين جدا
| |
|
|
|
|
|
|
|
|
|
Re: راكب يصفع مضيفة ويهدد أمن طائرة متجهه من الخرطوم إلى دبي (Re: عصام علي أحمد)
|
يا جماعه رفقا بالقوارير انا ضد ضرب المراة ولو استفزت او اساءة لرجل و يجب استعمال القانون . ولكن كمان لا تنسوا يا اخوانى نحن نساعد هولاء بالاستخفاف بنا . اذكر كنت اتحدث مع اخ سودانى فقلت له لماذا اكثر مطاعم الخرطوم لاتهتم بالنظافه فانفعل وقال لى يا اخى هذه مطاعم شعبيه لوذهبت الرياض والطائف تشوف العجب هنالك مطاعم لبنانيه وتركيه ولا تستطيع ان تقول فيها شى . فشعرت بشى من الاسى فقلت له كمان هولاء عندهم مطاعم فى الخرطوم وتقدم وجبات سودانيه . فقال لى لا اكل كله اجنبى . فقلت انا عشت سنين فى بلاد الشام ولا اعرف اكلاتهم فكيف تعرفوا عليها هولاء السودانيين بهذه السرعه وهل المطاعم الشعبيه اذا اهتمت بالنظافه تفقد زبائنها.
| |
|
|
|
|
|
|
|
|
|
Re: راكب يصفع مضيفة ويهدد أمن طائرة متجهه من الخرطوم إلى دبي (Re: ولياب)
|
يا اخوان ...القصة ما فيها اي استقصاد
كل المشكلة انو نحن عندنا شعرانة عصبية ...
ولا اعفي نفسي ...
تجربة:
في رحلة دولية في طيارة كبيرة شايلالا 13 نفر فقط
- المضيفة سورية تمشي وتجي فوقى تضحك وتبتسم
يلا اها تخيلو انا جا في بالي شنو؟
قلت الزولة دي بتضحك على ما بتضحك لي
قمت قطبت الجبين ورفعت الحاجب وفي طلعتا ونزلتا اديها الحدرة
قامت جابت الاكل وقالت (انت سوداني)
لاحظوا انا حالتي كيف قمت قلت ليها بي نبرتنا المعهودة (لو ما عندك مانع)
ردت - كيف يكون عندي مانع ...ياخي بكفي انو محمد الفيتورى سوداني
لحدي هنا وبرضو سوء النية مبيتة قلت يمكن بتهرج !!! تخيلوا
وقمت اختبرتها حافظة اشي للفيتورى؟؟؟
والله يا اخوان انها بدت من ( في حضرة من اهوى ..عبثت بي الاشواق حتى سلطان العشاق)
تخيلوا كيف حالى وقتئذاول ما لمت نعرتي السودانية ايما لوم ...
الحقارة الواااااضحة مافي مانع دقوا ليها جرس بس الفيها البين بين الناس مفروض تحسن النية
| |
|
|
|
|
|
|
|
|
|
Re: راكب يصفع مضيفة ويهدد أمن طائرة متجهه من الخرطوم إلى دبي (Re: امين علي الشيخ)
|
Quote: مرة عندي خالي د. عبد الحفيظ الرفاعي ربنا بديهة العافية
راجع من لندن بالسودانية بعد رحلة علاج
حكي لي قال : جابو ليه في الوجبة شندوتش لحمة بارده
مليانة شحم فطلب من المضيفة تشوف ليهو لو ممكن لحمة
ما فيها دهن لانه مريض وما اكل اليوم كله
المضيفة عاينت ليه وقالت :
انت ياحاج قايلنا نحن ضابحين في الطيارة دي والا شنو |
ههههه بتستاهل الرفس زاتو
| |
|
|
|
|
|
|
|
|
|
Re: راكب يصفع مضيفة ويهدد أمن طائرة متجهه من الخرطوم إلى دبي (Re: ASHRAF MUSTAFA)
|
سلام أشرف
Quote: والله نحن مقصرين وناسنا همجيين صحيح وما متحضرين
لكن المضيفة دي يفترض انها مدربة للتعامل مع اشخاص بهذه المواصفات
الزول غلطان ماف اتنين تلاته .. لكنه زول ساي جاي بطباعه واخلاقه
المضيفة هي المحترفة والتي يجب عليها التعامل مع مختلف الحلات بالصورة المناسبة .. واعتقد انه يفترض انها تكون متدربة على ذلك
بالنسبة لجلافتنا فحدث ولا حرج
نحن الشعب الوحيد الذي يطاردك فيه اشخاص لا تعرفهم في المطارات لتحمل لهم اغراض (تجارية ) معك الى السودان .. ودي ظاهرة بقت تخلينا نشيل هم زاتو ونحن مسافرين .. ونفكر كيف يمكن لنا ان نتخارج من من هولاء السغيلين جدا |
كمان الرجل بما حباه رب العباد من ضبط أعصاب وفهم وتفكير بعقلو قبل قلبو عليهو إنو يتحمل المضيفة ..
| |
|
|
|
|
|
|
|
|
|
Re: راكب يصفع مضيفة ويهدد أمن طائرة متجهه من الخرطوم إلى دبي (Re: وليد محمد المبارك)
|
Quote: طيب ليه قلت انو طالما انه رجل ؟؟!
وكانما الرجل افضل من الانثى واوعى واعقل .. لذلك هذا التصرف غير مقبول منه تحديدا لانه رجل ؟! |
ليس أفضل بس بما حباه ربنا من تعقل وبما وصانا عليهو دينا من ضرورة الرفق بالقوارير (الإناث اللطيفات ديل) الرجل فيه ما يميزو عن المرأة من عدم الانسياق ورا العاطفة
كدي البوست دا بنفتل ولا عادي ؟؟؟
| |
|
|
|
|
|
|
|
|
|
Re: راكب يصفع مضيفة ويهدد أمن طائرة متجهه من الخرطوم إلى دبي (Re: مجاهد محمد الهادي)
|
Quote: ليس أفضل بس بما حباه ربنا من تعقل وبما وصانا عليهو دينا من ضرورة الرفق بالقوارير (الإناث اللطيفات ديل) الرجل فيه ما يميزو عن المرأة من عدم الانسياق ورا العاطفة
كدي البوست دا بنفتل ولا عادي ؟؟؟ |
لا اعتقد ..
بل اعتقد ان هذه النظرة التميزية هي من جعلته يضربها باعتبار ان الرجال متميزون عن النساء .. واعتقد لم يتقبل ما حدث منها - ان حدث منها ما يضايق - لانها الانثى الاقل مكانة وهو الرجل الارفع مكانة .. يعني لو كان المضيف ذكر اعتقد انه كان سيفكر اكثر من مرة قبل صفعه
لكن ايضا يفترض على المضيفة ان تجيد التعامل مع هذه الحالات .. لانها لابد وان تكون متدربة على هذه الامور
| |
|
|
|
|
|
|
|
|
|
Re: راكب يصفع مضيفة ويهدد أمن طائرة متجهه من الخرطوم إلى دبي (Re: وليد محمد المبارك)
|
Quote: لا اعتقد ..
بل اعتقد ان هذه النظرة التميزية هي من جعلته يضربها باعتبار ان الرجال متميزون عن النساء .. واعتقد لم يتقبل ما حدث منها - ان حدث منها ما يضايق - لانها الانثى الاقل مكانة وهو الرجل الارفع مكانة .. يعني لو كان المضيف ذكر اعتقد انه كان سيفكر اكثر من مرة قبل صفعه
لكن ايضا يفترض على المضيفة ان تجيد التعامل مع هذه الحالات .. لانها لابد وان تكون متدربة على هذه الامور |
أحب الحنك زاتو
صح ما ذكرت - بس برضو لا يمكن التعويل " أن نعول" ونحكم على ما حدث بالضبط - كما ذكر ولدنا هاني عربي - لأننا لم نكن حاضري المشهد تماماً ..
عموماً غلط الواحد يمد ايدو على مرة .. صحيح قد تكون هناك سياسة تمييز للمرأة بس ليس من الكل - خذ أنا مثلا لا أخت لي وأحب بنتي لميس ذات السنتين أكثر من كل ذكر حايم في بيتنا - لدي ثلاث ذكور أصغرهم يتخصص طب نساء وتوليد .. وهناك أخاها إبراهيم (ستة سنوات) لكني أحبها حد الشغف والوله..
| |
|
|
|
|
|
|
|
|
|
Re: راكب يصفع مضيفة ويهدد أمن طائرة متجهه من الخرطوم إلى دبي (Re: مجاهد محمد الهادي)
|
Quote: حب الحنك زاتو
صح ما ذكرت - بس برضو لا يمكن التعويل " أن نعول" ونحكم على ما حدث بالضبط - كما ذكر ولدنا هاني عربي - لأننا لم نكن حاضري المشهد تماماً ..
عموماً غلط الواحد يمد ايدو على مرة .. صحيح قد تكون هناك سياسة تمييز للمرأة بس ليس من الكل - خذ أنا مثلا لا أخت لي وأحب بنتي لميس ذات السنتين أكثر من كل ذكر حايم في بيتنا - لدي ثلاث ذكور أصغرهم يتخصص طب نساء وتوليد .. وهناك أخاها إبراهيم (ستة سنوات) لكني أحبها حد الشغف والوله.. |
هذا لا يلغي التميز
اغلبنا يحب امهاتهم اكثر من اي شي على هذه البسيطة .. ويتمايزون ضد النساء
جميعنا يفترض بهم ان يحبوا ويتزوجوا ويسكنوا الى انثى .. ويتميزون ضد من يحبون ويسكنون اليهن
اما على الصعيد الشخصي .. فانا لدي ثلاثة امورات شدن وشهد وريان .. لذلك لا استطيع ان اعرف من هي التي افضلها على ابني الذكر محمد
| |
|
|
|
|
|
|
|
|
|
Re: راكب يصفع مضيفة ويهدد أمن طائرة متجهه من الخرطوم إلى دبي (Re: ود الباوقة)
|
سودانيير اتفننت فى تعذبينا وعذابنا .
المسافر يترمى فى المطار ساعات وممكن ايام لما تطلع عينة وزل بيرفع اصبعه فى عين مسئول مافى.
_____________________
الزول استجاب للاستفذاذ ولو مسك اعصابة ومشكى بطريقة حضاريه اشتكى للكابتن ولامكتب الشركة فى المطار او عبر الايميل الخاص بالخطوط كان جهجه المضيفة دى.
| |
|
|
|
|
|
|
|
|
|
Re: راكب يصفع مضيفة ويهدد أمن طائرة متجهه من الخرطوم إلى دبي (Re: بدرالدين الطائف)
|
حدث لي قبل 10 أيام على الخطوط السعودية ما يلي :
على متن الطائرة المتجهة من المدينة إلى مدينة أبها
أجلس في المقعد 32- يأتي زوج من جنسية آسيوية ويقول لي بالإنجليزية على ما أذكر - أنه قد تم التفريق بينه وبين زوجته وأنها تجلس في الخلف في المقعد رقم 46
ببساطة قلت له : أنا أفهم ما ذكرت (مترجم العبدلله فبفهم شوية برضو انجليزي) فذهب وهو متنشن (الأمر الذي لا يعنيني لامن قريب ولا بعيد) جاءني المضيف السعودي ذاكراً لي أن لو استطعت ترجع كي تأتي الزوجة في مكانك في الأمام
برضو ببساطة ذكرت له أن الحل يكمن ببساطة في أن تحضروا من يجلس في الخلف لمكاني (على سبيل المكافأة على الأقل" ليكون زميلي في الرحلة فرد علي بكل وقاحة " أنا بقدر أجيبو بمعنى أنا بقدر أسوي ما ذكرت " .. فكان ردي بصوت واضح مسموع أن مشكلتنا في أننا لا نقبل اقتراحات قد تكون منطقية .. وأنك يا مضيف الهنا لا حق لك في أن تخاطبني بطريقتك هذه حيث أنني عميل ولا ذنب لي في خطأ حدث لسبب آخر لست طرفاً فيه .. في هذه الأثناء حضر زميل رحلة سعودي شاب جميل حمدت الله بعدها أنني تصرفت تصرفي هذا ولم أقم من مقعدي الأمر الذي ما كنت سأفعله وإن أتت ملكة جبال الألب زاتا..
| |
|
|
|
|
|
|
|
|
|
Re: راكب يصفع مضيفة ويهدد أمن طائرة متجهه من الخرطوم إلى دبي (Re: walid taha)
|
نحن يسهل إستفزازنا
بصرف النظر عن ما بدر من المضيفة والذى إستدعى ردة الفعل العنيفة من الراكب ، لو كنت مكان الراكب "الأحمق" لأستدعيت المشرف على الرحلة على الفور - بعد ان يكون كل من حولي قد لاحظ تصر ف المضيفة - ورويت له ما بدر منها لأرى تصرفه حيال ذلك السلوك ومن ثم تصعيد المشكلة والكتابة الى الجهات العليا لأن حسب علمى ان تصرف كهذا لا يمر مرور الكرام وله وما له من المحاسبة فى لوائح شركات الطيران خاصة وانا المنافسة محتدة فى خدمة الزبون وكسب رضاه . وفى هذه الأحوال عادة ما يتم معاقبة المضيفة وتعويض الراكب
هذا هو - حسب إعتقادي - التصرف الصحيح ، التعامل بالضرب والعنف تصرف مرفوض فى مثل هذه الموافق ولن يكون مبرارا إذما حدث مكروه للمضيفة .
بتروى يمكننا أخذ حقوقنا دون ما نقدم على شئ يرتد ضرره إلينا
| |
|
|
|
|
|
|
|
|
|
Re: راكب يصفع مضيفة ويهدد أمن طائرة متجهه من الخرطوم إلى دبي (Re: وضاحة)
|
التفتيش للسودانيين علي سلم الطائرة سببه فساد موظفي وأفراد الأمن بمطار الخرطوم والذين قاموا من قبل بتهريب سلاح لراكب في الخطوط السعوديه وحاول به اختطاف الطائرة لذا أصبحت شركات الطيران لا تثق في إجراءات الأمن السوداني ، بعدين حكاية تخصيص طائرة ردئيه دي صحيحه لكن نحن من اخترنا ذلك بسبب همجيتنا وفوضتنا ، نحن علي استعداد لتحويل طائرة راقيه بعد رحله واحدة لكارو حمار في خط العزبه
| |
|
|
|
|
|
|
|
|
|
Re: راكب يصفع مضيفة ويهدد أمن طائرة متجهه من الخرطوم إلى دبي (Re: احمد التجانى احمد)
|
تحياتي لصاحب البوست والمتحاورين ...
نحن كسودانيين عندنا مشكلة كبيرة في فهم ثقافة السفر وبانك تمثل بلدك في الخارج ..
الكلام ده عندنا نظري فقط ...
شهدت حالات كثيرة جدا لمسافرين من مطار الخرطوم الواحد يجي لا بس ليهو جلابية وشبشب ومن غير طاقية والله العظيم الواحد يخجل
يمشي بيها الدكان ... وحضرت كذا واقعة قام ضابط الجوازات من منع مثل هؤلاء من السفر ما لم يلبس لبس مهذب وكامل ..
أهلنا زمان قالوا (الهياب تحت التياب) .. دي واحدة فقط ...
لا تسمع جلبة وصوت عالي في كثير من المطارات (العربية) الا تعلم بأن ميزان السودانية او غيرها فتح ...
شيئ يحير بالجد ...
سنجبر الآخرين على احترامنا لو احترمنا قواعد السفر والتزمنا طريق الرقي في كل شيئ ....
كدي سوق ليك عربية في شوارع الخرطوم وشوف كم مره حتعمل شكلة ونبذ للسائق الآخر والعكس ...
لسه البون بعيييييد ....
| |
|
|
|
|
|
|
|
|
|
Re: راكب يصفع مضيفة ويهدد أمن طائرة متجهه من الخرطوم إلى دبي (Re: ASHRAF MUSTAFA)
|
شكراً لصاحب البوست لإتاحته هذه الفرصة لمناقشة هذه المسألة الحساسة .. المتعلقة بأدبيات السفر ..
هناك بعض الأشياء أري استخلاصها من هذه التجربة المفيدة جداً :
1- يجب أن نتفق جميعنا بأن أي شغب أو مشكلة يحدثها أي فرد على متن أي طائرة كانت .. تعتبر عمل اجرامي يهدد أمن الطائرة وسلامة الركاب.
2- يجب على أي رجل يحترم نفسه ألا يصفع أي إمراة وإن فقد اعصابه ودخل معها في مشادة كلامية .. وذلك لأنها أنثي يجب أن تعامل بكل رقة وأحترام .. وإن لم تحسن الأدب فهناك جهات معنية بذلك "الجهة التي تعمل بها أو تنتمي اليها" ، كما أن الرسول الكريم (ص) أمرنا بذلك وليس للأمر علاقة بالتمييز كما ذكر بعض الأخوة .. فالأنثي أنثي وعليها بأن تحتفظ بحقها ان اساء اليها رجل تذكره بأنها انثي حتي يعود الى رشده.
3- ألا يعلم هذا الراكب بأن صفعه للمضيفة في أرض الخرطوم .. سوف يضيف بعداً سيئاً لسجلنا المتردي أصلاً .. ويضيف انطباع بأن السوداني يسيء الأدب للأخرين في داره؟
4- أوجه سؤال لهذا الراكب ان استغل سودانير .. هل يستطيع مجرد التخمين او التتنبؤ بعدد الساعات التي يمكن أن يقضيها في إنتظار الطائرة ؟
5- لماذا نعيب سؤ تعامل المضيفات في الرحلات المتجهة الى الخرطوم ونحن الذين نصعد للطائرة وقد حملنا انفسنا بجميع أنواع الأكياس وشنط الهاند باك لكي لا ندفع في الوزن .. علماً بأنه حتى اطفالنا لا يسلمون من تحميلهم بالعفش الزائد .. هذا اضافة الى العجب العجاب من السلوكيات الاخري لبعض للمسافرين!
وأخيراً اتفق مع كل المتسائلين وأردد السؤال التالي :
- لماذا يستخف بالسودانيون بالتحديد كما ذكر بعض المتداخلين ؟
وأرد علي نفسي :
- هل استطعنا أو استطاعت الجهات المسئولة عنا وضع لمساتها لتجعل خطوط الطيران المتجهة للخرطوم أن تحترمنا رغماً عن أنفها؟
| |
|
|
|
|
|
|
| |
ASHRAF MUSTAFA
طلحة عبدالله
أشرف الرحال
امير طمبل
منير عثمان
Hani Arabi Mohamed
الصادق صديق سلمان
علي محمد الفكي
نيازي مصطفى
Elkalakla_sanga3at
Dr.Elsadig Abdalla
Abdelrahim Elamin
ELSADIG ALI HASSAN
Hisham Amin
Abureesh
عادل الباهي عبدالرازق
حمزه بابكر الكوبي
نادر الفضلى
طه جعفر
امين علي الشيخ
نبيل عبد الرحيم
ولياب
الزنجي
عصام علي أحمد
معاذ حسن
garjah
الحاج حمد الحاج
جمال ود القوز
طاهر بدر
مجاهد محمد الهادي
بدرالدين الطائف
Hatim Alhwary
أنور أدم
وضاحة
احمد التجانى احمد
داليا حافظ
زياد جعفر عبدالله
Shueib Medani
فيس بوك
تويتر
انستقرام
يوتيوب
بنتيريست