|
|
 كمال ترباس بين الغناء الشعبي والالات الموسيقية ..تقييم التجربة!!!
|
كمال ترباس صاحب صوت دافئ حنييين..طروووب ..شجي..مهدئ للأعصاب ..وأغنيات تلامس الوجدان ..منها الخفيف الراقص ومنها التقيل السمعي ..
إرتبط إسم كمال ترباس بالغناء الشعبي..طبلتين وبنقز وشياليين ورق..وهكذا أحبه جمهوره في البدايات..ورغماً عن صعوبة التحدي وقتها في وجود ملك الغناء الشعبي محمد احمد عوض الخاااال إلا أن كمال ترباس شكل علامة فارقة في خارطة الغناء الشعبي وأعتلى كرسي صدارته في أوقات كثيرة ..ورغماً عن أن الغناء الشعبي واحد من أصعب أنواع الغناء كونه يعتمد في الأساس على صوت المغني وتطريبه دون مساعدة الموسيقى إضافة لوجود طاقم شياليين بمواصفات خاصة إلا أن كمال ترباس إستطاع أن يطوع الاغاني ويجعلها سلسة ومهضومة للمستمع ..
وأعتقد أن شهرة كمال ترباس في الأساس كان قوامها الفن الشعبي وهكذا أحبه الناس..
قرر كمال ترباس خوض تجربة جديدة وقرر خوض تجربة الغناء بمصاحبة الفرقة الموسيقية ..فهل كانت هذهه التجربة وهذه الخطوة في مسارها الصحيح ووقتها المناسب؟
هل أضافت للفنان كمال ترباس؟؟
وهل اضاف كمال ترباس للأغنية السودانية الحديثة جديد؟؟
هل وجد كمال ترباس نفسه مع الموسيقى؟
وهل أحبه جمهوره مع الموسيقى؟ أم أن جمهوره يحن لأيام الطبلة والبنقز ؟؟
أسئلة أتمنى أن أجد لها إجابة في شكل إستطلاع مصغر لمحبي ومستمعي هذا الفنان الطروب ذو الحس الفني الراقي..
قناعاتي أنني إشتقت للفنان كمال ترباس في صورته الشعبية ..أحن لأن أستمع للفنان كمال ترباس الفنان الشعبي بدون الات موسيقية وكمنجات وأورغن وبيز..
وقناعاتي بأن كمال ترباس بالموسيقى لم يقدم جديد فلا هو قدم نماذج لحنية جديدة وجمل موسيقية جديدة أو أضاف للاغنية السودانية الحديثة شيئاً بقدر ما أنه جعل من الفرقة الموسيقية شياليين تقوم بنفففس دور الشياليين لأن ترباس يعتمد في كل اغانيه على الألحان الدائرية التقليدية ودوماً ما تقوم الفرقة الموسيقية بترديد وإعادة ما غناه ترباس..
نعم لكمال ترباس حضور أنيق مع فرقته الموسيقية التي دوماً ما يجبرها ترباس للظهور كاااملة مكملة في أناقتها في جمييع حفلاته إلا أنها فرقة لا تقدم جديد..
ترباس بي الرق إفتقدته الاغنية ..
فاتني أن أنوه إلى ترباس اخر ربما هو الأكثر روعة ..
ترباس بالعود في سهرة يتوسطها حسين خوجلي..
فترباس العود غييير ..مريييح ...ويااا للروعة عندما يسحب ترباس عبايته للأمام مع نفس عمييق وهو يرجع إلى الخلف في الكرسي فتبوح حنجرته بكل أسرار فن الحقيبة ..
تخريمة:
غايتو أووول حاجة وروني كمال ترباس عضو معانا هنا ولا لأ..عشان لو عضو هنا اطلب من بكري يحذف الموضوع..باقي انا الزول ده مااا بقدر على لسانو ..
|
|
  
|
|
|
|
|
|
|
|
Re: كمال ترباس بين الغناء الشعبي والالات الموسيقية ..تقييم التجربة!!! (Re: عمر الفاروق)
|
عمر الفاروق ... سلامات ...
بالنسبة لترباس اذا كان له عضوية او غير عضوية ما تشيل ليهو هم بس لازم يكون عندك سوط عنج زي بتاع فرفور عشان تعرف تسكو بيهو ...
نرجع لموضع الغناء
ترباس طبعا زول رائع وصوت جميل ودافي زي ما بتقول
سمعنا له كثيرا وبحثنا عنه كثيرا
وقصة الالات دي حسب كلامه قال عامل السن لان صوته الان يختلف عن صوته زمان النفس النفس ياعمك قال عشان كدا بساعدها بالموسيقى
كلامك دا برضو انا ما ممكن اسمع مدائح نبوية بالموسيقى ولا بقدر اسمع الكحلاوي موسيقى ولا محمد احمد عوض
حتى كنت بقول لصديقنا فرفور دائما ياخي غني لينا زي زمان شعبي فقط ماعارف دي عشان اتعودتنا نسمعهم بهذه الطريقة ولا نحنا بنعرف نسمع ونفرق
قريب تواجد ترباس هنا في السعوديه واستلمت شريط خاص له من صديق شخصي لترباس كهدية بس للاسف به اعمال لم تعجبني ...
ترباس ملك قعدات درجه اولى متعه حد المتعه ...
| |
|
|
|
|
|
|
|
|
|
Re: كمال ترباس بين الغناء الشعبي والالات الموسيقية ..تقييم التجربة!!! (Re: عمر الفاروق)
|
كمال ترباس راجل ذكي يا عمر
راجل ذكي جداً كمان
الكلام الإنت قلتو دا كووووولو صاح وهو يعرفه تماماً
ويعرف أكثر من هذا أنو عوّد الناس على ( كورس يخاتف في الأغنية زى الحدية ) - والوصف لـ كمال ترباس -
هو نفسه عود الناس وعود الكورس على أن يظلا يتناوبان الأغنية في ( منافسة ) هى السر ليكون قد ( شكل علامة فارقة في خارطة الغناء الشعبي وأعتلى كرسي صدارته في أوقات كثيرة )
ذكاء ترباس تجسد في شيئين
أولاً
إدراكه المبكر أن العمر يمضي - وتلك سنة الحياة - في غير صالحه وضع بين قوسين ( المجهود الكبير الذي يبذله مع فرقته في المناوبة أعلاه وكثرة الطلب على ترباس نفسه )
لذلك قرر أن ( يريح نفسه ) ويحافظ على صوته لأطول فترة ممكنة كونه فنان محترف .... أو قل بلغة الكرة ( أنه قرر أن يوزع مجهوده على التسعين دقيقة وقد تضاف إليها أربعة أشواط أخرى )
الآلات الموسيقية تريحه كثيراً
يغني بأقل مجهود
وطبعاً لأطول فترة زمنية
ثانياً
إدراكه - وهو الفنان المحترف - أن الزمن قد قلب وجهه للفن الشعبي ( بشكله التقليدي الذي وصفته ) أياً كان مؤديه
للموسيقي بريقها
كفنان محترف محكوم بـ ( غريزة ) البقاء عليه أن يجاري ( طبع الزمن )
هنا أيضاً تجلى ذكاؤه
لم يرضخ للعاطفة
للأسباب أعلاه
أراه ناجحاً
لأنه لايزال منافساً قوياً في ( بورصة سوق الفنانين الكبار )
| |
|
|
|
|
|
|
|
|
|
Re: كمال ترباس بين الغناء الشعبي والالات الموسيقية ..تقييم التجربة!!! (Re: Elkalakla_sanga3at)
|
Quote: إدراكه - وهو الفنان المحترف - أن الزمن قد قلب وجهه للفن الشعبي ( بشكله التقليدي الذي وصفته ) أياً كان مؤديه
للموسيقي بريقها
كفنان محترف محكوم بـ ( غريزة ) البقاء عليه أن يجاري ( طبع الزمن )
هنا أيضاً تجلى ذكاؤه
لم يرضخ للعاطفة |
اتفق تماما معك ياعاطف
وبالمناسبة حتى الفنانين الشعبيين التقليدين البنشوفهم في التلفزيون بغنوا شعبي تجدهم في
المناسبات الخاصة يغنون بمصاحبة بعض الالات الموسيقية ومنذ فترة طويله بصفة شخصية
شهدت منذ منتصف التمنينات الراحلين بادي محمد الطيب والكحلاوي يغنون مع فرقتهم الشعبية
مع مصاحبة المندلين والجيتار والبيز وكذلك محمود علي الحاج وهو في عز شبابه بمصاحبة الالات
يمكن الوحيد الذي لم استمع له الا في الشعبي هو الراحل محمد احمد عوض
| |
|
|
|
|
|
|
|
|
|
Re: كمال ترباس بين الغناء الشعبي والالات الموسيقية ..تقييم التجربة!!! (Re: عمر الفاروق)
|
عاطف يا عمر:
هذا الكورس الذي يخاتف الاغنية عايشته وانا طفل..ومن ضمن الشيالين كان جدي عم ابوي عمر الشريف رحمة الله عليه..كان صوته صورة طبق الاصل من كمال ترباس ..كان بيسوقني حفلاتو مع ترباس كلها وشاهدت كيف أنهم كانو أسرة واحدة ..
ما عارف يا عاطف لكن انا شاعر إنو ترباس خان العشرة في حتة ما..وباع الناس ديل في نص الطريق..
ما يحيرني يا عاطف إنو ترباس ما طوّر في الموسيقى..وما أضاف شي جديد ..
ترباس طاقة مهولة وصوت خرافي وقبول منقطع النظير ورغم كده ما حاول يضيف شي موسيقي..
| |
|
|
|
|
|
|
|
|
|
Re: كمال ترباس بين الغناء الشعبي والالات الموسيقية ..تقييم التجربة!!! (Re: عمر الفاروق)
|
Quote: ترباس دا مشكلتو انو ما اتوفق فى اى اغنية حقتو
الا يغنى اغانى الحقيبة ....
لما يغنى غنا الحقيبة ياهو بتبين عبقرية صوتو
لكن غناهو هو .. حق روحو .. كعب شديد ....
اكعععب من الشيالين ... |
التحية لعمر الفاروق و كل المتداخلين ...
اخيرا دينا خالد طلعت في حاجة ما تعرف ليها ...
عليك الله ما سمعتي ( امي الله يسلمك ) حقة تجاني حاج موسي ؟
تقولي لي ما اتوفق في حاجة حقتو !!!
طيب الفطن الوسيم كيف معاك ؟ لحنها محمود فلاح و غناها ترباس ؟؟
يا دينا ... ترباس ده ما عنده شي كعب ... نهائيا ...
كلامك صحيح في انه ( بجنن ) غنا الحقيبة و الرواد جن ...
لكن صعب نقول غناهو كعب شديد ... ما بتبقي ...
كدى بتبقي ( اظلم من ظلم )
عموما حب الناس مذاهب ... والدنيا حرية ....
في برضو ناس قالو محمود عبد العزيز اهم من محمد وردي ...
مالو ... كل ما العمر بيمد ... بنسمع اشياء و اشياء ...
| |
|
|
|
|
|
|
|
|
|
Re: كمال ترباس بين الغناء الشعبي والالات الموسيقية ..تقييم التجربة!!! (Re: عمر الفاروق)
|
ازيك يا عمر
السنة الفاتت تقريبا أنا كتبت عن نفس الموضوع فى موقع تانى
وكان المعنى ترباس ومعاه حسين شندى كمان
ما اعتقد انه الحكاية بتتعلق بعوامل التقدم فى السن او ضعف الصوت او ما شابه
الموضوع عنده ابعاد تانى مختلفة
وما قصة وجود كورس او عدمه او ادخال آلات موسيقية محدودة عدديا او حتى اوركسترا كاملة زى ما عمل ترباس حاليا
الأسئلة المهمة زى ما انت قلتها هى
ترباس عايز يعمل ويصل لشنو من الغناء باوركسترا موسيقية ؟
ترباس ليه تخلى عن النمط الغنائى البدا بيه واتعرف واشتهر وطرب ليه الناس فيه ؟
الخصوصية فى اى شى هى البتميز الناس عن بعض
فى نهاية العشرينات محمد احمد سرور دخل آلات موسيقية، صحيح كانت محدودة جدا وما فاتت كمنجة السر عبد الله ولا اوكورديون عمك وهبة
لكن برضها تعتبر تجربة غناء مع مزيكا
وخليل فرح استعمل البيانو
وبعدهم معظم اغنيات الحقيبة الاتسجلت فى اسطوانات فى مصر فى الشركات المعروفه فى الفترة ديك، زى اوديون و ميشيان الأرمنى، كان فى بشكل أو آخر مشاركة موسيقية
اذن الموضوع ما غريب ولا جديد على نمط وشكل غنانا بمختلف مسمياته
لو جينا نجاوب على السؤال الأول
أى مستمع متذوق عادى حيقول ليك
ترباس ما اضاف ولا حيقدر يضيف اى شى جديد وهو بغنى فى شكل وقالب الأغنية الحديثة اللقام فيه ده حتى لو حاول
ما حيبقى محمد الأمين ولا ابو عركى ولا عثمان حسين
وبالنسبة للشيالين او الكورس
ياخى اعظم مغنى الدنيا كان رجال او نساء الجوغة المصاحبة او الكورس والشيالين ديل جزء مهم جدا فى اعمالهم
ممكن تهبش اى نوع غناء فى اى مكان فى الدنيا، طوالى حتلقى فى مجموعة بتغنى وتشيل مع المؤدى الرئيسى
الكلام ده موجود فى الفرق وفى غناء الفرد وفى كل نوع تقريبا
الكورس او الشيالين بدو الغناء طعم جميل وبديع وسمح
اغرب ما فى الموضوع
وده شى يمكن الناس ما انتبهو ليه كويس اللهم الا المتابعين بشكل جيد
وهو انه ترباس ده هو اول زول يمكن يشرك الشيالين المعاه فى الأغنية بشكل شبه كامل
قبل كده الشيالين كان دورهم يرددو استهلالية او الكوبليه الأول بتاع الأغنية وخلاص
لكن ترباس هو الخلاهم يغنو معاه عديل زى كأنهم فرقة واحدة بتغنى
لو اى زول سمع اغنيات ترباس وتحديدا فى مرحلته التانية حيكتشف الشى السمح ده خصوصا فى الشريط السجل فيه اغنيات زى سالونى عن حبى وما منك من العليك وبى قليبك تقول تعال الخ
اشراك الكورس فى بعض المقاطع الجوانية فى الأغنية موجود برضو عند المبدع محمد احمد عوض وان كان بشكل اقل شويه
لكن ترباس هو الأبدع فيه واداه طعم ونكهة جميلة جدا
يجى فى الآخر يستغنى عن الكورس
أنا فى رأى كمتذوق انه دى خطوة بليدة وكعبة وما ذكية من زول مطرب وفنان وصاحب اداء اسطورى زى ترباس
وخصمت منه كتير جدا جدا جدا وافقدته طابعه المميز
الحل شنو ؟
الحل انه مافى زول بقول لترباس ارجع تانى فى مراحك القديم
لكين واصل فى الغناء مع الاوركسترا
بس
رجع كورسك تانى معاك
وصدقنى حتكون اكتر زول مطرب فى الدنيا
والله جد
| |
|
|
|
|
|
|
|
|
|
Re: كمال ترباس بين الغناء الشعبي والالات الموسيقية ..تقييم التجربة!!! (Re: وليد محمد المبارك)
|
يا جماعة وقبل ما أكمل الردود عايز أطلب طلب بسيييط وإنتو بتقرو في كلام الزول الراقي ابو ذر عليييكم الله امشو جيبو أغنية يا عيوني ما قلتي من الريدة تبتي ..اسمعوها بي الشعبي واسمعو الشيالين ديل كووويييس..وح تفهمو ابوذر قاصد شنو ..وبالمناسبة كلام ابوذر ده بالتحديد هو ما جعلني افتح هكذا بوست ..كنت بسمع في اغنية يا عيوني ما قلتي دي ..ولاحظت كيييف إنو الاغنية دي روووعتها وجمااالها في إنها تتغنة بي طريقة المجادعة دي وليس كما يغنيها الان الشباب مع الاورغن او ترباس مع الموسيقى ..
ياخ اسمعو الحوار بتاع :
أقول ليك يا حنينة ..الله عليك ولييكي..
ومن ظلم البظلمك ويوووم ما حس بيكي..
الجافاك اميرك وبقا دمعك سميرك ..
وووووووووب ياااخ والله وروورووووك ..دي حاجة تهبشك جوووة كنكوجك ..
| |
|
|
|
|
|
|
|
|
|
Re: كمال ترباس بين الغناء الشعبي والالات الموسيقية ..تقييم التجربة!!! (Re: عمر الفاروق)
|
فاروق
راقى اتا ده براك
عان ده بالله
هههههههههه
شفت يا عمر
فى مسيرة غنانا السمح ده
حصلت كم نقلة نوعية وتحول فعال غير فعلا من شكل وطبيعة الغنا
اول واحدة فى النقلات المؤثرة دى كانت لما سرور استغنى عن "الطنابرة" تماما واستبدل "الكرير" الصوتى المنغم الكانو بعملوه بين كل مقطع والتانى وجاب بدل منهم شيالين يرددو استهلال او مدخل الأغنية
ومن ديك انتهت الطنبرة وبدا شغل الكورس
النقلة التانية المهمة كانت "مور اسبسفك" زى ما بقولو وكانت على يد سيد المطربين اجمعين عبد الكريم عبد الله مختار كرومة، بعد ما طلب من عتيق انه يؤلف ليه اغنيات بشكل تأليفى مختلف من نمط الدوبيت الكان عند العبادى و ود الرضى وحتى عند صالح عبد السيد، وده عشان هو يقدر يخلق براحات اوسع واجمل واشمل فى التلحين ويقدر ينوع فى طريقة الأداء
النقلة المهمة التالتة كانت على يد الكاشف ومعاه عبد الحميد يوسف
وهم الفعلن وظفو الأداء الاوركسترالى بشكل مختلف تماما وبقت فى مقدمة موسيقية مستقلة وحتى اداء المزيكا ما بالضرورة يحاكى نفس اللحن المغنى
من الوقت داك تانى ما حصل شى فعال قدر يغير فى الغناء والمزيكا السودانية لغاية ما تأهل الناس اكاديميا فى معهد الموسيقى وعرفو طرق التوزيع ودرسو الهارمونى والتضاد الخ اكاديميات المزيكا وبقى عندنا اغنيات موزعة موسيقيا بشكل جديد وسمح ومنظم
اما النقلة الحصلت على يد ترباس، وللأسف مافى زول انتبه ليها على الرغم من اهميتها وحداثتها وسماحتها
هى لما بقى يخلى الكورس يشترك معاه مباشرة فى اداء كلام الأغنية وبشكل مكثف كمان وواضح، وقدر يوظف بذكاء جميل اصوات الكورس فى شكل "فوكال باك اب" فعال ومؤثر وادى الأغنيات طابع جديد ما كان معروف لا فى الغناء بالطريقة الحديثة زى ما بسموه ولا فى الغناء الشعبى بالإسم المجازى بتاعه ده مع انه هو لا شعبى ولا وطنى هههههههه
ترباس بكاء فنى وحس موهوب وربما عن قصد او بدون قصد خلق نظام وطريقة جديدة خالص فى نوع الغناء الكان بعمله هو وباقى المجموعة من الفنانين اصحاب نفس الطريقة زى عبد الوهاب الصادق وعبد الله الحاج ومحمود على الحاج الخ القائمة
وبرضو تانى يرجع ومجددا اقول عن قصد او بدون قصد
يهدم المعبد على نفسه وعلى التانين وبدل ما يبتكر ويجيب شى جديد
مشى ولم نفسه مع ناس لا بقدر يجاريهم ولا حيبقى زيهم ابدا
ليه ؟
لأنه طبيعته ومزاجه وحتى تكوينه الفنى الفطرى اتربى وقام ونشف على شى معين
وحنظل يا عمر بسمع ونطرب لترباس النحن بنعرفه
الزول الفنان المطرب والخلاق وصاحب الصوت والأداء العالى جدا
ترباس القديم بس
نقيت كتير مش ؟
ههههههههههه
| |
|
|
|
|
|
|
|
|
|
Re: كمال ترباس بين الغناء الشعبي والالات الموسيقية ..تقييم التجربة!!! (Re: أبوذر بابكر)
|
Quote: الناس القبله حتى لما عملو التوظيف ده ما كانو خاتنه كأساس او كطريقة فى الأداء
عكس ترباس الركز عليه شديد جدا وكون بيه لونية بقت خاصة بيه هو بس |
بل بالعكس يا ابوذر محمد احمد عوض هو من ركز في الحتة دي اكتر من ترباس
ولو استمعت لاغنية (رغم بعدي برسل سلامي) تجدها اكثر الاغنيات الشعبية على
الاطلاق (حسب وجهة نظري المتواضعة) مجسد فيها هذا الشئ
اضف الى ذلك ان ترباس دوما يتحدث باستاذية محمد احمد عوض له
| |
|
|
|
|
|
|
|
|
|
Re: كمال ترباس بين الغناء الشعبي والالات الموسيقية ..تقييم التجربة!!! (Re: وليد محمد المبارك)
|
الحبان
وليد وحمزة
صحيح المبدع محمد احمد عوض وظف الكورس معاه بشكل جميل
وبقو يقولو معاه الكلام الجوانى الفى الأغنية
خصوصا انهم اصحاب اصوات متميزة زى عمك الطيب عبده وعمك عبد العزيز قسم السيد واحمد عيون كديس
والباقين
وفعلا اكتر شى موجود فى "رغم بعدى" وفى "لو فؤادك خبا حبك" وبنسبة اقل شوية فى "طيبة الأخلاق"
لكن الأنا قصدت اقوله تحديدا
انه الشى ده عند ترباس كان اكتر واشد حضورا
كمنا ونوعا
يعنى الشيالين بكونو تقريبا مشاركين فى الأغنية كلها من البداية لغاية النهاية
وده مكرر وموجود طبعا فى عدد اغنيات اكتر مما عند مطربنا محمد احمد عوض
وبكترة العدد وشدة حضور المشاركة فى كل اغنية
الزول ممكن ينسب لترباس خلق وايجاد الأسلوب ده فى الأغانى
| |
|
|
|
|
|
|
|
|
|
Re: كمال ترباس بين الغناء الشعبي والالات الموسيقية ..تقييم التجربة!!! (Re: عمر الفاروق)
|
Quote: بل بالعكس يا ابوذر محمد احمد عوض هو من ركز في الحتة دي اكتر من ترباس
ولو استمعت لاغنية (رغم بعدي برسل سلامي) تجدها اكثر الاغنيات الشعبية على
الاطلاق (حسب وجهة نظري المتواضعة) مجسد فيها هذا الشئ
اضف الى ذلك ان ترباس دوما يتحدث باستاذية محمد احمد عوض له |
الكلام دا بذكرني مره في اغنية القلم طاوعني تاني
اها عمك المرحوم محمد احمد عوض الشيالين مافتحوا خشمهم بالله اتلفت نهرهم ليك لمن عرفوا حاجه ... لايف
.
.
وزي ماقال اخونا وليد مبارك حسن بركات افضل من اشتغل بالموسيقى وابدع اتذكر زمان في حلقة مطرب وجماهير غني بطريقة جميله ومن ضمن اغنياته العيلفون جنة عدن
وفي سنة 96 تقريبا عمل شريط جميل ( تيه والتاكا ) ...
مبارك دا عندي معاهو قصص كثيره من زمن بسوق ليهو جمال فرفور يدق ليهو ايقاع
طبعا يا عمر الفاروق جمال فرفور في الايقاع افضل من الغناء لاتقول لي اولاد المليجي ولا يحزنون عشان كدا مبارك حسن بركات كان بقول لي جيب صاحبك يدق الايقاع
كمان في واحد خطير شعبي وبغني بالموسيقى تمام ( محمود صداح ) بس لم يجد اعلام ورواج مره مره بظهر في التلفزيون ومره ظهر مع بادي احمد الطيب وغنى بطريقة جميله ..
.
.
هجروني هجروني الليله مازمبي
الليله دق جرسي
المعلمه في الكرسي عايزاني اشوف درسي
ياناظره جيناك سوى نحكى الغرام والهوى
مافيش لزوم للدروس لو تخلو من الهوى
وجب جب جب جب ... ياخي دا سلطان طرب بي اي شي بالكبرتيه بطرب بالمثلث بطرب بالموسيقى بطرب
| |
|
|
|
|
|
|
|
|
|
Re: كمال ترباس بين الغناء الشعبي والالات الموسيقية ..تقييم التجربة!!! (Re: وليد عبد اللطيف)
|
الوليدين وحمزة ومحمد عبد الرحمن والقباني يحى..
كلامكم سمح والموضوع جاب موضوع..
بالنسبة لي مبارك حسن بركات الزول ده بيتميز بي ذاكرة حديدية ومشهور بي إنو الفنان الوحيييد الما بيعيد الكوبليه ..بي نفس وااااحد يجر ليك الاغنية ..وطبعاً الفنانين بيعيدو الكوبليه في الغالب عشان ياخدو نفس يتذكرو الكوبليه الجاي شنو..
مبارك حسن بركات بيجهجه ليك الموسيقى وبيسوقا ليك سوقا واااحدة لممن يأمنو :)
ما عارف يا اباذر بتعرف شلاضيمو ويعقوب ..يعقوب ده برضو كان بيشيل مع الخااال محمد احمد عوض عليه رحمة الله..
أما صداح ده يا وليد فلو ما خانتني الذاكرة فده الزول الكان تخيين وعالي مع سمرة داكنة في لونو..
غايتو جنننو جزمة بيضا لكن زول غناااااي :)
في زول حاول يسوق مع الناس ديل بس اتورط ..النحاس .. مش؟
| |
|
|
|
|
|
|
|
|
|
Re: كمال ترباس بين الغناء الشعبي والالات الموسيقية ..تقييم التجربة!!! (Re: عمر الفاروق)
|
| Quote: ترباس دا مشكلتو انو ما اتوفق فى اى اغنية حقتو |
أجي وتاني أجي يا بت امي ده كلام شنو ده البفتقد للأدلة ده يا متعلمين يا بتوع القانون ..
ترباااس ده فنان مجضم شغلو شديد ..بعذب اغانيه ويعذبنا بيها لمن تمسكنا الهاشمية ونعيش الحالة حتى لو ما بتخصنا
الكلام ده ظالم شديد في حقو من ناحية الغناء .. لكن من وجهة نظري ترباس حالة كاملة وظاهرة تستحق التحليل ..، لكن إلا مكابر البقدح في وصولو لقلوب الناس وتطريبو العااالي ..
بالنسبة لسؤال الحلقة ياعمر ترباس بالشعبي بالحديث من غير موسيقى ..لا اتردد في ان اطلق عليه لقب "مطرب " وللحد البعيد كمان
| |
|
|
|
|
|
|
|
|
|
Re: كمال ترباس بين الغناء الشعبي والالات الموسيقية ..تقييم التجربة!!! (Re: وليد محمد المبارك)
|
ياولي
Quote: وليد يا كابتن
ياخ شوف شغل الكورس مع محمد احمد عوض في:
1. صوتك النادر
2. ابوي يا يابا (دي تقريبا بغنيها الكورس عديل)
3. كفاية نوح يا عين
4. يا راحل بدون انزار ( اكتر اغية للكورس دو كبير فيها )
5. ليك حق ( الما سمعها يسمعها )
6. غيم المحبة
اسمعوا ديل وشوفوا الكورس بشتغل شنو |
وسلام الناس الا لي ما مد ايدو ... ماهو عارف ماهو حاسي كيفن بريدو
وابوي انا يا يابا ما تقول ليهو لا
وكمان في حاجه خطيره عملها عندما غنى لي نية في قمر السماء ومقاصدي اه ما اجسمى بطريقتة الخاصه
وكلام كتر اتقال عن هذه الاغنيه في كلمة ( لي نيه ) ام ( لينيه ) ماذا بقصد الشاعر هنا اسم الفتاة دي حقو يجي يفتي لينا فيها تاني هنا دكتور القريش عشان الناس تستفيد
ياولي سمعت في يوم من الايام محمد احمد عوض بغني مصرى
ياخي اجمل جلسه حضرتها في حياتي لمحمد احمد عوض في بيت الممثل والشاعر الفاضل سعيد صاحب اغنية ( ابوي يا يابا )
.
.
ياخي عمر الفاروق صاحبك دا جهجهنا بهذا البوست ماعرفنا نكز مع منو ذاتو ياخ من الفنانين
| Quote: هو شغل الكورس في اغنية الكان داكا لخلف الله حمد |
انت ياوليد فاكر الناس دي كان تامنها موسيقى ولا شنو وكتمت كتمت
الناس دي كان بتعتمد على اصوات تطلع من الحنجره واصوات تطلع من الصدر واصوات تطلع من البطن شفت كيف
امكانيات صوتية رهيبه وتطريب ماعادي
عمر الفاروق ...
فعلا هذا هو محمود صداح كما وصفته لكن كتلو كتل و النحاس دا ابدا ما اطربني في يوم من الايام
| |
|
|
|
|
|
|
|
|
|
Re: كمال ترباس بين الغناء الشعبي والالات الموسيقية ..تقييم التجربة!!! (Re: وليد محمد المبارك)
|
Quote: يا ولي
ياخ الخال غناي .. الله يرحمو |
تعرف ياولي صاحبك وليد ود الساته زماااان يقوم يجيب الاغنية نكتبها
ونقعد نغيها ليك في المدرج فوضى شديده نلم ليك الجامعه كلها ايام يا ولي
.
.
يامراكبي عدينا وعلى توتي ودينا ..
سوق معاك الرحله شادينا
قوم حرك المركب خلي الشباب يركب
سوق معاك الرحله شادينا
.
.
وكسره =
القامة مربوعة وإيدا مجدوعة
وماشة تتنى كالبانة في عوده
.
تعرف ياولي محمد احمد لمن يصل الحته التي يحضن فيها الرق معناها خلاص الناس ح تدستر وتدخل في عالم وكومه طرب تانية
| |
|
|
|
|
|
|
| |
عمر الفاروق
تيسير عووضة
وليد عبد اللطيف
خالد عبد الله محمود
عاطف عمر
دينا خالد
Elkalakla_sanga3at
طلحة عبدالله
حمزه بابكر الكوبي
محمد البشرى الخضر
يحي قباني
محمد عبدالرحمن
أبوذر بابكر
داليا حافظ
فيس بوك
تويتر
انستقرام
يوتيوب
بنتيريست