|
|
 إنطباعاتكم عن البورد يا برالمة ..
|
بعد شهر يزيد أو ينقص
كدي احكوا لينا عن انطباعاتكم عن البورد من جوّة
خاصّة لمن اعتادوا المتابعة من برّة لفترة من الوقت
أكيد فيكم من كان راسم صورة معيّنة ورديّة ربّما - او كحلي :)
اها لقيتوها كيف؟
هل اليوتوبيا يوتوبيا طلعت ام باطنية ؟
|
|
  
|
|
|
|
|
|
|
|
Re: إنطباعاتكم عن البورد يا برالمة .. (Re: محمد البشرى الخضر)
|
لمّا كنت اقرا لبعضكم بوستات فرحة بنيل العضوية خاصة التي تعلن عن سنوات الإنتظار
واحد قال اربعة سنين و آخر حمسة بل وصلت عشرة أعتقد
كان براودني التساؤل موضوع البوست ومستني متين يحين الوقت الأتساءل فيه
خاصة اخونا أبو عشرة سنة متاوقة, اها لقيت وش البامية كيف؟ يستاهل شمّاعة عشرة سنة :)
| |
|
|
|
|
|
|
|
|
|
Re: إنطباعاتكم عن البورد يا برالمة .. (Re: Dr. Ahmed Amin)
|
ود البشري سلامات
إنت في كم عضو جديد تم تسجيلهم
ياخ في زحمة في حركة المرور مبالغ فيها
تكتب في البوست....بعد دقيقة تجي تفتشو ...تلقاهو في الصفحة الرابعة
ديل شكلهم عايزين يخلصوا حق السنين دي كلها في شهر
عموما مرحب بهم كلهم...ونتمني أن يكونوا إضافة حقيقية تستحق
تحياتي
مرحب بكل البرالمة
| |
|
|
|
|
|
|
|
|
 Re: إنطباعاتكم عن البورد يا برالمة .. (Re: Dr. Ahmed Amin)
|
سلامات ود البشرى وضيوفه.
-=-=-=-
أيام الدراسة الجامعية كنا - مجموعة من الطلب نقيم لفترة مؤقتة في فندق متواضع - وكنا نخصص الوقت بين الثامنة مساء والعاشرة لمشاهدة التلفزيون في استقبال الفندق -
كان أحد طوابق الفندق مخصصاً للعرسان. ويمر العرسان من أمام الاستقبال والتلفزيون في نزولهم وصعودهم إلى غرفهم.
سقطت عروس ذات مرّة على السلّم ..... فحملها العريس بين يديه بكل حنيّة وأنطلق يشتم الفندق والاستقبال والموظفين ولم نسلم نحن المتفرجون على التلفزيون من بعض الشتائم ، وطلبَ العريس من الجميع إصلاح عتبة السلم قبل الصباح.
بعد ستّة أشهر جاء نفس العريس وزوجته إلى الخرطوم مرة أخرى لمراجعة الطبيب ، واختارا نفس الفندق للنزول.
سقطتَ المرأة مرة أخرى على ذات السلّم .... فما كان من زوجها إلا أن نهرها وضربها على وجهها قائلاً: يا حيوانة .... وقعتِ هنا قبل ستة شهور ... جاية تتدلعي تاني وتقعي ... إنتِ عميانة ؟
رغم ألمنا لما أصاب المسكينة إلا أننا حمدنا الله على أننا سلمنا من الشتائم هذه المرّة.
| |
|
|
|
|
|
|
|
|
|
Re: إنطباعاتكم عن البورد يا برالمة .. (Re: Maawya Hussein)
|
ود البشري تحياتي
أنا من الناس البديت أتابع البورد من سنة 2010
جذبني ليهو وجود ناس مميزين الوقت داك
أذكر منهم واحد إسمه كباشي الصافي (كانتونا)
كان زول نشط جداً ومشاركاته مميزة
الزول ده وين ياجماعة؟
لكن كمان ما كنت متلهف للتسجيل هنا
قبل كدا رسلت ايميل واحد لي بكري طنشو والتاني اداني الباسويرد
| |
|
|
|
|
|
|
|
|
|
Re: إنطباعاتكم عن البورد يا برالمة .. (Re: أيمن الفاضل)
|
اهلا ايمن - تعرف انا في البداية بتلخبط بينكم انت و ايمن محمود و ايمن خليفة واعتقد في ايمن تايسون ايضا
شوية شوية فرزنا ايمن المعماري و ايمن العنصري و انت ايمن الكبري  لو ما ملخبط - أمّا ايمن تايسون فميّز رقبتو من بدريبتايسون دي
اها ما اديتنا انطباعاتك بعد نلت الباسويرد, خاصة وانت متابع من 2010
الصورة من جوّة كيف لقيتها؟
| |
|
|
|
|
|
|
|
|
|
Re: إنطباعاتكم عن البورد يا برالمة .. (Re: محمد البشرى الخضر)
|
دقيقة دقيقة
أيمن الكبري دي شنو ؟ هههههه
إنت أظنك لسة ملخبط يازول
-----------------------------------------
بالمناسبة أنا عندي طريقة غريبة في تميز الأعضاء
قاعد اركز علي صورة البروفايل أكتر من إسم الزول
-----------------------------------------
أسمع لو ما قدرت تفرزني حا أجيب ليك بوست مميز شاركنا فيهو أنا وإنت
حتي مذكر هناك رديت عليك لكن طنشتني زيك وزي أي سنير عنصري إنتهازي حاقد هههههه
| |
|
|
|
|
|
|
|
|
|
Re: إنطباعاتكم عن البورد يا برالمة .. (Re: Maawya Hussein)
|
حلوة يا دكتور أحمد
يعني كان نأخّر السؤال كم شهر كدا ولاّ كيف؟
هلا دكتور ياسر
العدد السجّل أكتر من البشارك بكتير انت شكلك كنت غايب بداية السنة في اليوم الواحد كان في اكتر من خمسة ستة أعضاء بعلنوا عن انضمامهم
كتيرين منهم ما قريت ليهم تاني نهائي و البعض مشاركاته قليلة جدا
الشباب العامل حيوية ديل على اصابع اليد لكن ما شاء الله عليهم
عشان كدا انا بسأل عن انطباعاتهم بالذات الغائبين منهم حاسّي بيهم زي الأخدوا زمبة وكانوا خاتين قريت إكبكتيشنز :)
هاني قصّتك دي قريبة لجزؤ تاني من نكتة
يا معاوية صورة البروفايل دي ليها علاقة بحقّنا ولاّ صدفة ساي :)
بوست انطباعات عن البرالمة دا شكلتو حتكون برّة زي بوستات اوسكارات اساسي الكل سنة ديك هههههههههههه
فكرت في بوست اخير منو بوست بتاع تقسيمة وعزلة, لو عايزين نعمل تقسيمة وكل ناس يعزلوا تيمهم من البرالمة,البتعزلوا أوّل ديل اللعاّبين و الفيهم فايدة و آخر ناس بقى انت أدرى هههههههههههههههه
يا سليمان اولا مبروك اخدت البرايز شايفك
انتو كمان مقصرّين ولاّ راجين يسالوكم ما طوالي بتدونا انطباعاتكم في يدّنا اول بي أول هههههه
بعدين تعال هنا انتو ما عندكم جوازات ولاّشنو, المعلّم قال رسّل صورةالجواز يأتيك الباسويرد قبل أن يرتد إليك طرفك
ولاّ تكون بس عاجباكم المدرّجات حيث التسالي و قصب السكر :)
يا علاء الدين تسجيلات الهلال ما فشنك الفشنك الكوتش الله يحلّنا منو - قاصد غارزيتو ما تودوناش في داهية :)
| |
|
|
|
|
|
|
|
|
|
Re: إنطباعاتكم عن البورد يا برالمة .. (Re: عفاف الصادق بابكر)
|
هلا بت الصادق , تمام الحمد لله ومالك ما بتسألي من الأمير طيب ولاّ دا تمييز جندري ههههههههههه
انطباعي عن الشباب كالآتي:
لا يوجد
بمعنى لا يوجد انطباع عن البرالمة ككل لأني معترض و قلت الكلام دا سابقا على الغاء شخصياتهم المستقلة و أخدهم كبكج أو دفعة
لكن فرادى ففيهم بصراحة من يبهرك بالكتابة الرزينة الجميلة المتمكّنة وفيهم الكرور برضك
ودي فرصة أسوّق لأحدهم منهم كتب شعرا من أجمل ما قرات
كدي اقري يا عفاف و أدعي لي
تحياتنا ليكم ... و بعض أحاديث ما دار .. ( يوجد برلوم )
يا أيمن بيني وبينك قلبي أكلني شكلي فعلا ملخبط
اذكر دخلت بوست لـ أيمن - ما متأكد انت أم لا - عن تفسير مختلف للـ الكبري
ههههههههههههههه, حصل خير عموما
دا ياتو بوست الما رديت عليك فيه و عدم الرد ما طوالي بكون حركات سناير مرات بتكون ما لا حاجة تقولها - كيف المراقة دي :)
| |
|
|
|
|
|
|
|
|
|
Re: إنطباعاتكم عن البورد يا برالمة .. (Re: عفاف الصادق بابكر)
|
باشمهندس محمد البشرى ...سلام يا زول يا راقي ....متابع المنبر من 2005 ... عددد مُقدّرْ من أفراد الأسرة كانوا أعضاء في البورد ...تركوه لأسباب مختلفة ...كان القاسم المشترك ...كمية المهاترات و الضيق بالرأي الآخر ...ما فكرت أقدّم للعضوية خوفاً من (الجرّب المجرّب يحصد الندامة)...النظام الجديد للعضوية أضاف عدد مقدّر من الأشخاص المميزين ...وأضاف روح ملحوظة في المنبر ...يمكن شهرين تاني والصفوف تتمايز ...و (يذهب الزبد جفاءاّ و يبقى ما ينفع الناس) ...عتاب كدة بالجنبة ...سجّلت قبل 5 أيام ..رحبوا بي 6 أعضاء ..2 برالمة (دفعة).. 2 من القدامى ...1 صديق وزميل جامعة ...والأخير شقيقي ...يمكن السبب من الزحمة ...عموماً شكراً ليك و تحياتي لأسرتك الكريمة
| |
|
|
|
|
|
|
|
|
|
Re: إنطباعاتكم عن البورد يا برالمة .. (Re: محمد محمود محمد)
|
سلامات ود البشري وضيوفه الكرام
أولا بالتبادي ياخي عا########ي صورة بتك دي ربنا يحفظا وأبنائك جميعا
تانيا البورد أمره عجيب ياخي بوستات سياسية وبتطرح أفكار مهمة وبجلوها سياسيي البورد بمزاااج وبرضو بوستات في الفن والمجتمع والدين بتلقى إهمال غريب (بسبب المشغوليات أحيانا أو كترة البوستات) ومرات متعمد (بسبب الحكم المسبق على صاحب البوست )
تالتا اتفاجأت بمدى تخلف البورد تقنيا وما عارف السبب المصبر بكري عليهو شنو وبالمناسبة الماسنجر ده شغال ولا نأكل باسطة :)
رابعا بشكرك على متابعتك لمداخلات الفيسبوكاب لأنو بصراحة هم إضافة مميزة وعاملين زي رمانة الميزان( لكن في ناس منهم بزودها شدييد)
تحياتي لكم جميعا
| |
|
|
|
|
|
|
|
|
|
Re: إنطباعاتكم عن البورد يا برالمة .. (Re: Musab Osman Alhassan)
|
| Quote: بعد شهر شهرين ما تنسي حقنا في بوست إنطباعاتكم يا سنير البورد عن البرالمة .. |
هههههههههههههه يامغربي ... عجيب ياخي
انا غايتو اتوقعوا مني بوست بعد اكمّل شهر بعنوان:
تجربتي في البورد ... يوجد عيد ميلاد
سلامات ياود البشرى
بالنسبة لي مافي تغيير يذكر..
متابع المنبر من فترة ماعارفها كم سنة .. ماحصل حاولت اطلب باسويرد لانو بعتقد انو صعب
اسي بقى ساهل جدا .. رسلت ايميل لي بكري وارفقت صورة الجواز تاني يوم جاني الباسويرد
بالنسبة لي مامهتم بالكتابة .. لاني حقيقي ماحايكون عندي حاجة اضيفها
لكن مرات بتحتاج تناقش حاجة او تقول رايك في حاجة
زمان كنت بشارك عن طريق الايميل .. شاركت في عدة بوستات بالايميل وفي بوست اظن كان عندي قرابة عشرة مشاركات فيهو
المهم الانطباع عادي .. مافي شيء مختلف .. بس التعامل التقني مع المنبر صعب حبتين زي الاقتباسات والوشوش التعبيرية الخ
كدى خلينا نحن .. انتو انطباعكم شنو عن المنبر ... يعني مبسوطين أوي ؟ :)
| |
|
|
|
|
|
|
|
|
|
Re: إنطباعاتكم عن البورد يا برالمة .. (Re: Musab Osman Alhassan)
|
الاخ محمد البشرى ،،، تحياتي
الانسان بطبعه يتمنى ان ينال ويسعى لاجل لذلك الهدف وينتظر ويداوم على المسعى وعند تحقيق الهدف يكون فرحا ويعمه السرور ولكن بمرور الوقت رويدا رويدا يجد ان الامر اكثر من عادي لطبيعة الفعل المكرر وما يجعل البورد مختلفا عن بقية المنابر ضخامة العضوية والمشاركات واختفاء ثقافة الشللية نوعا ما عن بقية المنابر وانعدام المجاملات وقلة المصفقاتية
عكســـة :- البرالمة اصبحوا مادة جاذبة ومدخل عريض للكتابة وده في حد ذاتو مؤشر ايجابي انهم لفتوا الانظار
مودتي
الرحـــال
| |
|
|
|
|
|
|
|
|
|
Re: إنطباعاتكم عن البورد يا برالمة .. (Re: أشرف الرحال)
|
ود البشري
يا زين يا سمح
للاسف سودانيز اون لاين
اصبح طارد وغير جاذب للاعضاء او الزوار
السبب عدم وجود مصداقيه + الشليليات ... الخ
والاهم في جزء من الحرس القديم عايشين في عالم وهمي وهو نجوميه سودانيز اون لاين
| |
|
|
|
|
|
|
|
|
|
Re: إنطباعاتكم عن البورد يا برالمة .. (Re: saidahmed shami)
|
لسه بدرى يا باشمهندس وزى ماذكرته إنته عدد المسجلين اكتر بكتير من المشاركين بفعاليه .
وده لانه ناس كتيرة مازالت متوجسة وخايفة إنها تفتح ليها مواضيع ماتجد القبول.
زد على كدة صعوبة العثور على مواضيع للحوار وتقريباً الناس ماخلت حاجة ما تطرقت ليها تفتح اى موضوع يجيك كم رابط بنفس الفكرة.
واحد صاحبى برلوم قال لى جوه زى بره.
ذكرنى نكتة الزول المشى فندق هيلتون مدخل الفندق باب قزاز دائرى صاحبنا دفر الباب وراح لافى مع الباب لفة كاملة دخل ومرق تانى لقى نفسة بره قال هيئ جوه ذى بره.
هانى عربى نكتتك حقت العريس دى اظنك حكيتها لى محمد موسى لانه شايفو قاعد يقوله طوالى .
| |
|
|
|
|
|
|
|
|
|
Re: إنطباعاتكم عن البورد يا برالمة .. (Re: saidahmed shami)
|
محمد البشرى سلام ..
صراحة الواحد برا البرود بيكون عنده مواضيع كتيرة داير يكتب عنها
ومرات المواضيع زاتها بتكون أحداث و إنتهت يعنى مثلاً هلال مريخ ، إنفصال،
فنان أو اى حدث ، إلا بس اللهم العضو يكون روائى ولا شاعر و محتفظ بى دفتر ..
أما الآن البرود ما زال فيه من هم إذا كتبوا ما علينا إلا نقراْ
ليس لأنهم قدماء فى هذا المنبر أو كبار فى السن فقط لأنهم كُتّاب ..
أكثر ما شدنى الى هذا المنبر هو التلاحم و التعاون بين البوردات رغم إختلاف
المبادئ و المعتقدات إلا أن الإحترام له مكانه بينهم ..
أنا صراحة من الأعضاء أو العضوات كنت أقرأ لها كثيراً و أنا خارج
البرود منذ فترة طويلة عضوة قديمة إسمها ( نور تاور ) و إلا الآن بين الحينة
و الاخرى الواحد بيمشى مكتبتها و يقرأ ما تيسر منه ..
عبد الحفيظ ..
| |
|
|
|
|
|
|
|
|
|
Re: إنطباعاتكم عن البورد يا برالمة .. (Re: جمال عبد الناصر محمد)
|
ياخي من زمن الأسابيع ولمّن إنت كنت في كامل لياقتك
وبتكبّسل لينا البورد للمحلات البندّي فيها ربنّا العجب
ونحن نشيل ونرّفس ونرسّل في الثّرو باصات بالإيميلات
و..الناس ماتعبرنا وتسفهنا وتستو..(تقرأ بتاعت البروف أمين البتتشخبط ديك)
وشايفوا جاي راجع بعد حردتوا مبشر بإزالة كل القبح والبتاعت الهنا دي..الله يقدروا
و...رغم أنا عارف إنك منبهة لإنوا حنك سنّير وبرلوم وبتاع حنك عاضّي وماجايب هموا
بس لسه ما زال دا إنطباعي ...أها تقوم تقول ياربي أفتح بوست ولا ح يجيك سنير
لخّ ..يلّخ ليك كم رابط في صمة خشمك وبإبتسامة جنبّواية : أنا كتبت الموضوع دا سنة أسكت
أها ياربي أدخل أعلّق على البوست بتاع هنّاي دا : يقوم برضّوا يلخّك بـ يابرلوم : أنا شبهك
حجّمك ..قدّرك ...لونك ..بعرفك .. ياكمان طار فيك جوز زي بتاع بلّه جابر وختاها ليك
في حنان حنانك : أمشي كدا ولا كدا عايز تشتهر
وفي واحدين مافضل ليهم و..بعد يفصلوا الدين عن الدولة
الأ يكتب في عنوان بوستوا : لبّ ..لبّ..لبّ (يمنع دخول البرالمة)
و..بعدين في ذمتك وعارفها مازي بتاعت طلحة البورد ياهو زي زمان ياخي جينا لقيناكم راقدين في
ضللّة البوستات وماقادرين تردوا وسحكتوا المواضيع سحك والآكشن كلوا معاد وبقى ماااسخ
ياكمان جف(تقرأ هوو هوو) فيك واحد وضرب بيك واطة البورد من باب دق البرلوم خلّي السنير داك يشوف
ــــــ
شايف مداخلتي بقت بالمتر عامل فيها تمبس زماني بس دا ما يمنع إنوا أطيع ليك إنطباعاتي بـــ:
و...على قول المثل القديم
ـ من برا هلّا ..هلّا ومن جوه يعلّم الله
وصدر حديثا" من المثل
ـ من بره كنّا شايفنوا إسطورة دخلنا لقيناهوا ماسورة ..
أقول قولّي هذا وأرسل لكم ..(بتاعة خضراء لافة تسّر الناظرين)
| |
|
|
|
|
|
|
|
|
|
Re: إنطباعاتكم عن البورد يا برالمة .. (Re: أمير محي الدين محمد)
|
بصراحة يظهر انو الواحد لما يكون بشاهد من بره بحس بالحاجات الحلوة والكلام الحلو لكن لما دخلنا وجدنا شلليات في الردود وكذلك هنالك بعض الاشخاص كانهم اوصياء على الكلمة التي نكتبها والتي لا تأتي حسب أهوائهم يعجبك كلام ود الباوقة انت كوز مندس تحب كلام صديق الموج الحلو انت معارض عشان كده المتاوقه من بره كان احلى وألطف.
| |
|
|
|
|
|
|
|
|
 Re: إنطباعاتكم عن البورد يا برالمة .. (Re: جمال عبد الناصر محمد)
|
تشكر كتير علي سؤالك واهتمامك ، ودا بدل علي شخصك فلك الشكر ، حتي لو محاحاة 
Quote: دي ذكرتني حكاية العريس بعد ما يتم شهر العسل :
أها لقيت العرس كيف ؟؟؟
حيقول ليك تمااااام ...
لكن لو سألته بعد سنة بياخد ليهو صنه كده وبعدين يديكـ رايه .. |
انت عارف يا Dr. Ahmed Amin انو الصورة هنا بالعكس تماماً
الزول محتاج لصنّه طويلة عشان يفهم الحاصل وبعد ما يسلك ح يقول ليك تماااام
والكلام القالو الدفعة Musab Osman Alhassan
Quote: البورد أمره عجيب ياخي بوستات سياسية وبتطرح أفكار مهمة وبجلوها سياسيي البورد بمزاااج
وبرضو بوستات في الفن والمجتمع والدين بتلقى إهمال غريب (بسبب المشغوليات أحيانا أو كترة البوستات) ومرات متعمد (بسبب الحكم المسبق على صاحب البوست )
تالتا اتفاجأت بمدى تخلف البورد تقنيا وما عارف السبب المصبر بكري عليهو شنو |
صحيح وخاصة النقطة الأخيرة ، الزول محتاج يقرأ HTML عشان يتعامل مع البورد
بالأضافة للشلليات وعدم المصداقية والإفتراء و للأنا العالية جداً عند البعض وعدم التعاطي و قبول الرأي الأخر
إضافة للتصنيفات الجاااهزة والمعلبة ، حقو يتعمل تصنيفات وتبويبات جاهزة تختار منها قبل ما تأخد الباسورد
مثلاً ، لو في برلوم فتح ليهو بوست (الله يسامحو) ، الناس ما ح تشارك معاهو الا تعرف الزول دا اتجاهاتو شنو ؟ وشايت وين ؟ ....
بالمختصر كده البورد ما فيهو اريحية نؤهااااااائ
واسمح لي ان انتهز هذه الفرصة لأحي جميع المتداخلين ، وارحب بالمشاركين الجدد
ممكن أهدي ؟
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
البورد يا هندسة فيهو تقريبأ Ayman Khalifa ، ،ايمن الصادق ، أيمن الفاضل ، أيمن رمضان ، أيمن محمود
وشخصي الما ضعيف ،
هذا والله أعلم
| |
|
|
|
|
|
|
|
|
|
Re: إنطباعاتكم عن البورد يا برالمة .. (Re: Amin Tayson)
|
ياتايسون الله يهديك أهدي على قدر ما ربّنا يقدرك
سيد البوست الأيام دي إضافة لإنو لياقتو ضعيفة
و..غرقان لي شوشتو* ...(مرفق خارطة طريق أدناه)
في الفلانتاين إشي ترباس وإشي ود اللمين وغسيل عدة بعد الرحلات ومفارش رايحة و..إشي وشويات
أنا برضو عايز أهدي ليك وللباش ود البشرى وبآكسنت أم كلثومي غااارق في الحزن
برلوم إيه ...برلوم إيه الأنا ح أرد عليه...هو عارف أول معنى البورد إيه
وإقترح إنو يكون اللحن النشيد الوطني للبرالمة زينا وزي ناس (ح ل د) العايزين يغيروا نحن جند الله
يا كمان.... بــ برانا برانا ح نغلب غانا إيهما أكثر حماسا".
ــــ
* هووووي الواضح مافاضح ومنعا" لإي رأس ح يودي ويجيب
مابتاعت الكاركتير ديك
( )
| |
|
|
|
|
|
|
|
|
|
Re: إنطباعاتكم عن البورد يا برالمة .. (Re: محمد البشرى الخضر)
|
Quote: أكيد فيكم من كان راسم صورة معيّنة ورديّة ربّما - او كحلي :)
اها لقيتوها كيف؟ |
صباح الخير اخي محمد البشرى الخضر
صراحه عادي جدا وإن كنت ظاني بان الموضوع اكبر من كده بكثير
ولاكن الشي الصدمني بعض المسقفاتية بعد نظرهم قصير جدا خاصه فيما يتعلق
بالاعضاء الجدد << عدم ترحيب ويحسسكو كانك مامفروض تكون معاهم هنا.... للاسف
والبعض الاخر رحب بنا ترحيب جميل وتحسوا من القلب ...
الحوش من الداخل جميل وكوني ارد على المواضيع شي رائع ...
اما الماسنجر لحدي اسي مافي زول عبرني هههه
واشكرك مره اخري لاهتمامك بإنطباعنا عن الموقع
كن بخير ... محمد الامين
| |
|
|
|
|
|
|
|
|
|
Re: إنطباعاتكم عن البورد يا برالمة .. (Re: محمد البشرى الخضر)
|
تحياتي للأستاذ - محمد البشرى الفاضل
وكل المشاركين
سنوات من المتابعة, تعود للعام 2005م
المنبر عبارة عن سودان مصغر . . .
إعجاب شديد بكمية من الأقلام الرائعة.
تعَجُّبْ من عدم قبول البعض للأعضاء الجدد موديل 2013م
أدت الى تخوف الكثير من المشاركة وكتابة المواضيع.
حفاوة الاستقبال والاهتمام من البقية . . .
تلجم ألسنتنا , وتزكي نفوسنا . . .
فيعجز قلمنا عن الشكر.
ظاهرة الشلليات الواضحة جدا جدا . . .
قد تكون سببا في الجمود الحاصل وانزواء البعض.
نتمنى التوفيق للجميع.
كل الود.
| |
|
|
|
|
|
|
|
|
|
Re: إنطباعاتكم عن البورد يا برالمة .. (Re: Mohammed Abuzaid)
|
أبو حتحوت
أخبارك
بما إنو في عدد مقدر من الزملاء ( البرالمة ) عاوزم يشوفو الإقتباسين ديل ، ويشوفو كمية الأدب و التواضع القالت بيهم مريم بت الحسين ملاحظاتها ، و التواضع الرد عليها بيهو المهندس معتصم الطاهر
مريم بت الحسين قالت ليهو Quote: باشمهندس معتصم الطاهر...
غايته شايفاها تقيلة أنظّر ليك.. لكن غايته بغمّض وبكتب.... ده من كبر مقامك عندي والله
اعتقد انه التسلسل الصحيح هو اولا تحدد مشكلة البحث what is your research question؟ عادة ده بكون على شكل proposal، وحسب ما فهمته انت اتقبلت مشكلتك... بعدين الmethodology بتجاوب على سؤال how will you solve the research problem؟ ... ده بعتمد على مجالك... لكن ممكن تعمل quantitative analysis أو qualitative analysis أو الاتنين معاً...لقيت الpaper دي وهي بتتكلم عن الانواع التلاته وعلاقتهم بالتخصصات الهندسية.. ممكن تساعدك
Qualitative, Quantitative and Mixed Research Methods in Engineering Education
ده powerpoint طويل شويه عن نفس الموضوع... ممكن يساعد برضه
PowerPoint: Research Methods for Engineers
ان شاء الله ما يكون تنظير في الفاضي.. وجاهزين لأي مساعدات أخرى لو بنقدر...
|
وشوفو الرد عليها كان كيف : Quote: سلام يا حبيبة ..
تعايني كيف وانت زى عين الشمس .. ما فى عين تلاقيها ..
دا كلام جميل واجابة عن سؤالى أقرأ و أجاوب و أجيك
|
الاقتباسات دي في البوست ده Re: طلبة الدراسات العليا والباحثين - تبادل خبرات ونصائح بوست غاية في المهنية و الفايدة العالية
يا ريت كلنا نتعلم احترام و تقدير الآخر و الأهم من ده كلو .... التواضع
التحية ليك ود البشرى و مريم بت الحسين و معتصم الطاهر و المتداخلين هنا
| |
|
|
|
|
|
|
|
|
|
Re: إنطباعاتكم عن البورد يا برالمة .. (Re: kamal omer)
|
يا ايمن يا فاضل معذرة على اللخبطة يبدو انو الكبر دخل فعلا لا مجازا
ومعذرة مرة تانية على عدم التعليق في بوست داليا
بس طيف ما شايف ف فرق بين الأمس و اليوم, انا سألت عن انطباعك الشخصي بعد بقيت قادر تشارك بالرد و تعبّر عن رأيك معقول لافرق؟
وجهة نظر صبري ما وقعت للامانة لكمن واضح فعلا ان عزوف وابتعاد العديد من الأعضاء عن المشاركة قلّل من الحركة
يا هلا محمد محمود
يا عزيزي هوّن عليك و احمد الله على الستة انفار الرحّبوا بيك
انا اول بوست لي كتبت معلّقة طويلة عريضة دخلوا لي تلاتة انفار بس :)
غايتو من تجربتي اقول ليك لا تعوّل على المسائل دي كتير
و أكتب لي رقبتك دي متّعها وتمتّع بكتابة رأيك بحرّية وبلا قيود
ود جبريل محاحاة بالـ حا؟
تحرّش شنو يا ابو الزهور الله يهديك, إنت لسّة عايش فوضى المصطلح دي :)
هلا مصعب و شكرا على ذوقك وربنا يقبل
الواقع مش مسالة إهمال بوستات بالمعنى الحرفي لكن في عوامل مختلفة تتحكم في مسألة المشاركة في البوستات
البوست عايز رعاية و سواقة و تكتيكات معيّنة تبدأ من العنوان و طريقة ادارته و مرّات دايرة ليها توفيق
ما تشغل بالك بالقصة دي من أسّي بمرور الزمن بتقع ليك
بالنسبة للمسنجر شغّال,أما التخلف التقني دا تخيّل دا من اسرار تميّز البورد ههههههههه
ما عارف مدى دقّة الكلام دا شنو لكن غايتو اتعوّدنا عليه كدا
هلا يا خالد عبد الوهاب
الصعوبات التقنيّة يومين تلاتة وتتعوّدوا عليها ما مشكلة, المشاركة المباشرة اظرف طبعا و اكثر فعالّية من مسألة الإيميل
وليه ما عندك حاجة تضيفها؟ بعدين ما شرط تكتب عشان تضيف حاجة, اكتب لأجل الكتابة في رقبتها
عن انطباعي انا ايّامي النلت العضوية جديد كان عادي لأني ما وضعت أو رسمت صورة كبيرة أو غير حقيقية
و الفترة بين ما قدّمت طلب العضوية ونيلها كانت يومين تلاتة يمكن
لكن بمرور الزمن و الحوادث المختلفة الإنطباع صار أكتر سلبية لكن للامانة هو إنطباع عن الشخصية السودانية المعقّدة و المتناقضة اكثر منو إنطباع عن البورد كبورد
نواصل يا شباب
| |
|
|
|
|
|
|
|
|
 Re: إنطباعاتكم عن البورد يا برالمة .. (Re: محمد البشرى الخضر)
|
والله ياود البشرى امرك عجيب ...يبدو الكبر فعلا حصل
لما جينا البورد 2009....عملتو فيها زي القارد الفي ابواب النوادي الليلية ديك بتاعة الافلام
اقيف في الصف...
اسمك مامكتوب...
اطلعوا برة...
وكمان معاها صرة وش...
هسع بقيت تفتح بوستات للبرالمة ...انطباعاتكم ...احوالكم ...والناقصكم شنو ...والله زمن
-------------------------------------------
تحياتي لجميع الاعضاء الجدد ...اضافة حقيقية للمنبر ان شاء الله
| |
|
|
|
|
|
|
|
|
|
Re: إنطباعاتكم عن البورد يا برالمة .. (Re: محمد البشرى الخضر)
|
Quote: عد شهر يزيد أو ينقص
كدي احكوا لينا عن انطباعاتكم عن البورد من جوّة
خاصّة لمن اعتادوا المتابعة من برّة لفترة من الوقت
أكيد فيكم من كان راسم صورة معيّنة ورديّة ربّما - او كحلي :)
اها لقيتوها كيف؟
هل اليوتوبيا يوتوبيا طلعت ام باطنية ؟ |
عدائية زايدة من قبل بعض القمم كما يطلقون علي انفسهم
| |
|
|
|
|
|
|
|
|
|
Re: إنطباعاتكم عن البورد يا برالمة .. (Re: Mohammed Maher)
|
زى العرس ....!
حاول احدهم ان ينظّر لصديقه المتزوج حديثاًً فقال له : العرس ده عباره عن برميل زفت على وشو طبقه خفيفه بتاعت عسل بتلاقيك فى شهرك الاول ....!
فما كان رد صديقه الا : بالله انا كان كده فتحت البرميل بالمقلوب ....!
فكثير منا فتح المنبر بالمقلوب عشان كده وحفظاً للبوست من الخج فحقو يتأجل السؤال ده عشرين سنه لى قدام..... !
عشان الناس الفتحوا بالمقلوب يكونوا وصلوا وش المنبر العسلى ....الفوره الف ورانا شنو ....!
| |
|
|
|
|
|
|
|
|
|
Re: إنطباعاتكم عن البورد يا برالمة .. (Re: سامى عبد المطلب)
|
| Quote: لكن بمرور الزمن و الحوادث المختلفة الإنطباع صار أكتر سلبية لكن للامانة هو إنطباع عن الشخصية السودانية المعقّدة و المتناقضة اكثر منو إنطباع عن البورد كبورد |
صباح الخيرات ياود البشرى
طبعا شفت البوست وكنت قايلك مارديت
فجيت داخل وفي نيتي اني اقوم ابلّك واتهمك بالعنصرية والاستوساخ
واجيب ليك كوتات وروابط من الارشيف وصور برنت اسكرين الخ
لكن لقيتك راادي وكتلت لي الدش في يدي
هههههههههه عجيب ياخي
تعرف .. الكلام عن انو المنبر ده عبارة عن سودان مصغر وانو التصرفات المتناقضة الفيهو هي انعكاس لتناقض الشخصية السودانية وتعقيدها .. كلام غير دقيق
المنبر ده حسب رأيي بتحكموا قوانين وعادات اجتماعية مختلفة تماما عن العادات والقوانيين في الواقع .. وماعارف كيف نبتت وقامت لمن بقت قوانين مجتمع عدييل وان كان اسفيري!
والمدهش انو نفس الشخص بتلقاهو في المنبر بي شخصية وفي الحياة العادية بي شخصية تانية مختلفة ( لو كانت الامور هنا عادية كنت اسي جبت ليك نماذج لي ناس بي اساميهم ووضحت ليك مكان التناقضات بين شخصياتهم المنبرية والحقيقية) لكن لو عملت كده زي ماعارف يعني حا اندق دق العيش وانازول مسكين ومابقدر على الملاواة .. لكن انت عااارف زي منو وانا عارفك عارف ههههههه
دليلي على الكلام ده .. يعني مثلا شوف موضوع الاعتذار .. شوف حجم المساككة للزول عشان يعتذر !! تلقى واحد هنا مقبقب ليهو زول لعدة سنوات وكل موضوعو معاهو في انو الا يعتذر ليهو عن شيء ما !!
متين في مجتمعنا السوداني في زول بسك ليهو زول لي اعتذار ؟؟ لو زول غلط معاك يابتدقو يابتشتكيهو يابتقاطعو يا اي حاجة .. لكن عمري ماسمعت بي زول بسك زول عشان يعتذر ليهو !! اصلا الاعتذار ده شنو هو ؟ ماعارف بالجد كيف اختلف معناهاو وقيمتو هنا في المنبر ده لمن بقى حاجة بطلبوها عديييل ويسكو فيها ويقلعوها قلع !!
ده مثال واحد ... ممكن اقول ليك امثلة كتيرة زي موضوع الشتايم .... الاذية المبالغ فيها ... الفجور في الخصومة .. الخ
وبرضو كنت عايز اكتب عن الحاجات الجميلة في المنبر الممكن تكون اجمل من في الواقع.. لكن حسيت المداخلة بقت طويلة شديد وبعد كده حا اتصنف برّاري ههههههههههه
| |
|
|
|
|
|
|
|
|
|
Re: إنطباعاتكم عن البورد يا برالمة .. (Re: خالد عبدالوهاب)
|
اهلا يا رحّال
من كلامك يبدو انطباعك إيجابي نوعًا ما, بل و متفائل
أمّا كثرة البوستات عن البرالمة ففيها اكتر من وجهة نظر
يا شامي كيفك
الغريبة زاوية شوفك تماما عكس الرحّال في المداخلة القبلك مباشرة فيما يتعلّق بالشللية و كدا
مسألة الحرس القديم دي تبدو كانطباع مسبق عندكم, انا غايتو ما شايفها, لكن عموما نجومية بورد شنو وبتاع دي وهمة اسافير ساي
ولا معنى لها, البعمل ليك نجم اسفهه بس
هلا هلا يا طائف
ياخي بتبالغ كيف صعوبة طرح مواضيع, النقة دي ربّنا ما كتّر حاجة زيّها عند السودانيين
يا زول لو ما لقيت موضوع اقع اليوتيوب بس, فيديوهين تلاتة و عييييييك :)
اهلا شذا, انت شكلك من الفيسبوكاب
كدي ادينا انطباعك عن الفرق
هلا عبد الحفيظ
فعلا ملاحظتك وجيهة بعض المواضيع متعلقة بأحداث ساخنة تناولها بعد مرور فترة اشبه بالأكلة البايتة
لكن ما فات شي اهو انت موجود و إمكانية التعليق اللايف اتوفّرت
بالنسبة للناس البجيدوا الكتابة نعم بفرضوا عليك تقرا ليهم لكن برضو اكتب, الميزة هنا ان البورد عام بمعنى الكلمة يعني ما مخصّص لمن يجيد الكتابة مثلا, عبّرعن نفسك بأدواتك البتريّحك وما تشيل هم المقارنة بآخرين, ما دام بتفرّق بين ناس (ي) و (ى) ما عندك عوجة تاني هههههههههههههه
اهلا جمال و مرحب بيك
سمح صابرين زي ما قلت شهر واحد ما كفاية
أوووو أمير ياخ
يا امير انا اشك في انك برلوم لعبك الضاغط دا لعب خبرة :), يا زول انت كنت هنا بيوزر نيم قديم ولاّ حاجة وكنت راكب معانا في باص الاسابيع خلّي بالك
حتة سفه الإيميلات دي إلاّ كان صاحبك حموودي أنا ما قاعد اطنّش برد أقلاّاها بالإيميل و الثرو باص لو ما انقطع تقديره خاص عندي
بعدين ليه تتهيّب مسالة فتح البوستات؟ انت افتح لو الموضوع بستاهل الرش ح تترّش ح تترّش غض النظر عن كونك سنير او برلوم فاالرش في سودانيز واجب وطني:), وبعدين كونك جديد بتديك العذر في تناول مواضيع سبق تناولهاالبجيك برابط سابق بكل ظرافة قول ليه شكرا و طنّش حنانه وواصل في بوستك عادي
أما ناس عايز تشتهر فدي جهللة ما أكتر لا تلق لها بالا وعلّق تعليقك عادي
فهمت من المثل المعدّل (الاسطورة و الماسورة) انو انطباعك ما خالص كدا, كدي نأجل السؤال كم شهر كدا و نشوف لسّة الماسورة ماسورة
اهلا عمر,
نعم النوعيّة الذكرتها دي في لكن احسن شي ما تشتغل بيها بل ما تشتغل بمسالة التصنيف دي نهائي
غض النظر عن كونك برلوم أو سنير لن تعدم من يصنفك كذا أو كذا بناء على رأي لك كتبته
يا امين تايسون لا حولا دخلت في اضافريني عديل كدا
زمني دا كلو بقرأ اسمك ايمن ما عارف السر شنو في الاستعجال دا| Quote: بالمختصر كده البورد ما فيهو اريحية نؤهااااااائ |
يا زووول !!
كدي انا حاأأجل السؤال دا شهر شهرين نشوف الانطباعات السلبية ح تستمر ولاّ تتغيّر
يا اخوانا وين الشاب الكان مستني الباسويرد عشرة سنة :)
| |
|
|
|
|
|
|
|
|
|
Re: إنطباعاتكم عن البورد يا برالمة .. (Re: محمد البشرى الخضر)
|
الباشمهندس محمد البشرى ( البشرى ان شاء الله مكتوبه صاح )
تحيتي لك ولضيوفك الكرام،، وخصوصا الدفعة
أولا: المنبر بالنسبة لي وجبة يومية دسمة لابد منها مهما تكاثرت الأعباء والمهام وامتد هذا الشغف منذ ايام الجلوس في المسطبة وحتى الان.
ثانيا: بعد الحصول على كلمة المرور ازداد الاهتمام أكثر وأكثر وربما متابعة المداخلات والرد عليها كانت عاملا جديدا لم يتوفر ايام المتاوقة
ثالثا: سياستي الان الهدوء الحذر والمداخلات في بعض الموضوعات مع بعض البوستات بين الحين والاخر . واتيقن انها مرحلة مؤقتة سرعان ماتزول بمرور الوقت وحصول الالفة والمعرفة.
رابعا: المنبر رائع وعضويته فخر دخوله سمروالخروج منه ضجر.
| |
|
|
|
|
|
|
|
|
|
Re: إنطباعاتكم عن البورد يا برالمة .. (Re: محمد حامد)
|
محمد الأمين مرحب بيك
قولة (المسقفاتية) مالهااقريسيف كدا يا ابوحميد, صاح في نوع كدا من ما تعرف شنو احاسيس سلبية او قول غربة مثلا بين نتاس متواصلين سنين مع بعض و اعتادوا على لغة بعض و خلق بينهم نوع من التفاهم و بين قادمين جدد
لكن ما بتصل لمرحلة صراع او رفض وجود في النهاية كلّنا ضيوف و ليس لحد حق أكثر من غيره في الانتماء لمكان عام يحمل في اسمه وشعاره جنسيتنا جميعا
كان للمسنجر صبر ابوي لسة يا دابكم بتقولوا يا هادي
عموما اعتقد ان انطباعك ممكن اصنّفه كمحايد لاهو بالسلبي لا هو بالإيجابي
يا عبدو ما تضيق مسألة الزيارات دي عايزة تكتيكات تبدأ من العنوان الجاذب ابو (توجد صورة) وتنتهي بـ (عاااااااجل الحكومة ولدت)
لغاية ما يتعرف الإسم حينها ما بتحتاج للتكتيكات دي
فا شنو .. ما تحبط ولا تضيق
يا هلا يا محمد ابوزيد يا ملك
لا اعتقد ان تهيّب الكتابة يعود لمسألة اللترحيب - او عدمه للدقة - فيكم شباب نشيطين
الشلليات دي اصلها في و ما ح تنتهي شي طبيعي و عوّدوا نفسكم عليها و على التعايش معاها فليست شرا كلها
لكن الموضوع الجيد - او السيئ خااااالص - بفرض نفسه و بجيب التعليقات وقد يكون صاحبه لا شلة له
هلا ابو كمال
وشكرا على اشراكنا معاك الملاحظة دي
عمر يا توم كيفك
قدر ما نحت ذاكرتي متين عملت ليك/م بودي قارد في الفين وتسعة ما اذّكرت
اسوّي ليك سواة الحبشي الليلة :)
اين الرابط اين الكوت
غايتو كان قاصد باص الأسابيع فداك طبيعتو كانت كدا بالإضافة للفرونت سيتس روول وكدا
ودي بالمناسبة كانت بتطبق على الجميع سناير و برالمة, يعني مافي ديسكرمنتيشن هنا :)
| Quote: عدائية زايدة من قبل بعض القمم كما يطلقون علي انفسهم |
ما بتّفق معاك مية مية يا محمدماهر
وبعدبن مافي من يطلق على رقبته قمة, صاح في الفاكنّها في رقبتن لكن ما لدرجة يسمّوا روحن قمم - اللهم إلاّ ما تكون قاصد المعنى الحرفي
قلت كدا يا سامي .. نأجّلو عشرين سنة!! ما كتيرة ياخ
انتو قايلين روحكم آخر دفعة ولاّ شنو! يابوي العالم دي كلّها عندها جوازات , اسّي تلقوا رقبتكم سناير زي المافي شي
يا خوانا في فيسبوكابي قريت ليه تعليق اوسكار عديل كدا Quote: Aiman Awad
قيل فى الاثر الما عندو حزب ما عندو الحبة ر متفق عليه باسثناء مازن مصطفى واحد ابناء الهامش ويدعى حسن موسى المصدر سودان فور اوول سابقا حاليا سودان بتاع فنلتك |
الكابتن دا ما تجيبوه لينا فوق بكورتو الفنّانة دي :)
| |
|
|
|
|
|
|
|
|
|
Re: إنطباعاتكم عن البورد يا برالمة .. (Re: محمد البشرى الخضر)
|
سلام
البورد شكلو زى سير العفش فى المطار
كان فوتت شنطتك تانى ماتلم فيها ب الله ويامين
..
انا فتحت بوست للترحيب وجيت راجع بعد ساعة قلت اشوف
الحاصل .. القاه راح الصفحة التانية .. عملت مداخلة ومسافة الشغل للبيت
لقيتو تانى نزل للليق ..
بصراحة الواحد لو اتفرّغ 24 ساعة ما بيقدر يقرأ 10% من البوستات
ناهيك عن الرد ود
تحيتى
| |
|
|
|
|
|
|
|
|
|
Re: إنطباعاتكم عن البورد يا برالمة .. (Re: Salah Habib)
|
السلام عليكم اخ محمد البشرى وجميع الاخوة والاخوات الكرام
انا متابع المنبر يمكن من 2007 والانطباع الظهر لي من الزمن داك انو فيهو تضخيم للاحداث بشكل ما عادي ...يعني في احداث خليل وفي الانتخابات والانفصال والثورة السودانية واحداث كتيرة مرت خلال السنوات الماضية لمن تقرا عن الموضوع هنا تقول خلاص الدنيا اتقلبت
وترجع الشارع تلقى الناس عايشه عادي ومافي اي حاجة ....ففي تضخيم للاحداث وللاشخاص كوصفهم بالمناضل...والجسور......الخ....والزول يكون عارف انو كيسو فاضي...برضو في تضخيم لبعض البوستات واعطاءها اكبر من حجمها قد تكون فعلا جيدة لكن ليست بتلك الدرجة التى توصف بها هنا.....
اكبر مشكلة في المنبر دا انو ما عندو اي فعل على ارض الواقع مجرد كلام اسفيري فقط....مرات كتيرة بحس انو الكتابة في الانترنت عبارة عن تدوير لأحاديث النخبة ولا مستفيد غيرهم....يعني ناس متعلمين ومثقفين وبفيدوا في بعض ويتم تدوير هذه الفائدة بينهم فيزداد المثقف ثقافة والمتعلم علما...ودي حاجة كويسه لكن من لرجل الشارع البسيط "محمد احمد" وكيف يتم ايصال هذا الوعي اليه ؟
ناخد مثال موضوع نبوءة او مهدية الاستاذ محسن خالد....المنبر كان يغلي من الحدث وبره في الشارع العام مافي زول سمع بمحسن خالد زاتو خليك من البوست بتاع النبوة حقتو
اغلب البخشو المنتديات الحوارية اقل شي بكونوا جامعيين...لكن الناس الما عندها علاقة بالنت عموما ومنتديات الحوار خصوصا...هم الاغلبية....فهل المنبر يعني فقط بامر النخبة والصفوة ام له رسالة تمتد لتشمل كل المواطنين؟
ان كان دوره يتعدي ليشمل كل المواطنين فلماذا العزلة وسكن الابراج العاجية؟
فهل من اهداف المنبر وكتابه احداث تغيير بالمجتمع وتوصيل رسائل الى السواد الاعظم وملح الارض من المواطنين..ام انه منبر للنخب؟
| |
|
|
|
|
|
|
|
|
|
Re: إنطباعاتكم عن البورد يا برالمة .. (Re: احمد سيد احمد)
|
تحية واحترام يا هندسة
وزي ما قال اخونا ايمن فى الاثر انا بقول على حسب المتداول فى الشارع السوداني الما عندو car ما عندو قرار وسودانيز بمثابة الcar والباسورد بمثابة القرار
عشان كدا الواحد فينا بحاول بقدر من المستطاع يصون قرارو باحترام لانو هو البحدد لينا مشاركاتنا من عدما فى حالة سحبه ونبقى فرآجة ......
مودتي
| |
|
|
|
|
|
|
|
|
|
Re: إنطباعاتكم عن البورد يا برالمة .. (Re: Mohamed alhabib)
|
تحياتى يا باشمهندس
إنطباعى عن المنبر لم يتغير كثيراً حتى بعد password
من الملاحظ وجود شُللِيات (كيمان ) داخل البورد
حتى فى الردود والمشاركه ، ودا بخلى فى صعوبه فى الكتابه والمشاركه بالنسبه
لينا نحن الجُداد (البرالمه ) زى ماهو ماشى اليومين ديل
فى المنبر خصوصاً فى الايام الاولى
لو سمحت لى ارجع ليك سؤال بعد انطباعى دا
انت نصيحتك شنو للتعامل مع المنبر فى وجود (الكيمان ) بحكمك من اهل الدار
تحياتى ، وشكراً على ترحيبك وإستضافتك الجميله دى
| |
|
|
|
|
|
|
|
|
|
Re: إنطباعاتكم عن البورد يا برالمة .. (Re: محمد بابكر محمد)
|
بما انى ما من ضمن .. اخر تسجيلات البرالمه .. لكن برلوم نوعا ما .. الدفعة قبل الاخيرة
الواحد قبل ما ياخد الباسوورد يدو بتحرقو شديد لما يقرا بعض المواضيع والمشاركات ويتمنى يرد عليها
لكن بعد الباسووورد الواحد بقى يجلى كتير منها .. ويقول فى سرو نسال الله السلامه بس وما فى داعى للدخول فى نقاشات معظمها عقيم وما بوصل لحاجه
تحياتى اخى محمد
| |
|
|
|
|
|
|
|
|
|
Re: إنطباعاتكم عن البورد يا برالمة .. (Re: وضاح عبدالرحمن جابر)
|
خالد بلكونة - ولاّ شنوهي :)Quote: تعرف .. الكلام عن انو المنبر ده عبارة عن سودان مصغر وانو التصرفات المتناقضة الفيهو هي انعكاس لتناقض الشخصية السودانية وتعقيدها .. كلام غير دقيق
المنبر ده حسب رأيي بتحكموا قوانين وعادات اجتماعية مختلفة تماما عن العادات والقوانيين في الواقع .. وماعارف كيف نبتت وقامت لمن بقت قوانين مجتمع عدييل وان كان اسفيري!
والمدهش انو نفس الشخص بتلقاهو في المنبر بي شخصية وفي الحياة العادية بي شخصية تانية مختلفة ( لو كانت الامور هنا عادية كنت اسي جبت ليك نماذج لي ناس بي اساميهم ووضحت ليك مكان التناقضات بين شخصياتهم المنبرية والحقيقية) لكن لو عملت كده زي ماعارف يعني حا اندق دق العيش وانازول مسكين ومابقدر على الملاواة .. لكن انت عااارف زي منو وانا عارفك عارف ههههههه |
كلامك وجيه إلى حد ما لكن مسألة التناقض بين الشخصيتين دي ليست حصرا على الاسافير و الواقع فقط, في الواقع نفسه ممكن تلقى التناقض بين ظرف و ظرف بين مكان و آخر بين مجتمع و مجتمع تاني
و إلى حد ما المسألة دي طبيعية, مثلا اللغة البستخدمها مع اصدقائي في الكوتشينة والدافوري قطعا لا تشبه لغة وتصرفات المكتب أو البيت أو المسجد مثلا
لكن دا لا يرقى لقولة تناقض, اعتقد انت تقصد التناقض العديل و مسألة الوجهين, في دي عندك حق, لكن يا خالد في النهاية البورد دا مجتمع تخيّلي
يتيح ليك أن "تبدو" كما تريد فعموما كدا لا تعوّل عليه كثيرا في الحكم على الناس أو خلّي حكمك و انطباعات في حدود الفيرشوال دا
ولا تشتري كثير من البضاعة المجانية المبذولة هبتلّي دي ناس شريف و نبيل و كويّس خالص وايضا لا تلقي بالا للوجه الآخر منها ناس انتهازي و عنصري و بطيخ
كلّها - أو جلّها - سلع اسفيرية ساكت
Quote: دليلي على الكلام ده .. يعني مثلا شوف موضوع الاعتذار .. شوف حجم المساككة للزول عشان يعتذر !! تلقى واحد هنا مقبقب ليهو زول لعدة سنوات وكل موضوعو معاهو في انو الا يعتذر ليهو عن شيء ما !!
متين في مجتمعنا السوداني في زول بسك ليهو زول لي اعتذار ؟؟ لو زول غلط معاك يابتدقو يابتشتكيهو يابتقاطعو يا اي حاجة .. لكن عمري ماسمعت بي زول بسك زول عشان يعتذر ليهو !! اصلا الاعتذار ده شنو هو ؟ ماعارف بالجد كيف اختلف معناهاو وقيمتو هنا في المنبر ده لمن بقى حاجة بطلبوها عديييل ويسكو فيها ويقلعوها قلع !!
ده مثال واحد ... ممكن اقول ليك امثلة كتيرة زي موضوع الشتايم .... الاذية المبالغ فيها ... الفجور في الخصومة .. الخ
وبرضو كنت عايز اكتب عن الحاجات الجميلة في المنبر الممكن تكون اجمل من في الواقع.. لكن حسيت المداخلة بقت طويلة شديد وبعد كده حا اتصنف برّاري ههههههههههه |
دا من ادبيّات سودانيز السك دا و المحاحاة دي اصبر شوية و بتقع ليك التكيكات دي - أظني قلت ليك الكلام داقبيل ههههههههههه
هلا يا معتز الصادق وتمام زبطت معاك البشرى ما تتخيّل اليا دي بتوتّرني كيف :)
ياخ والله كلامك سمح وانطباعك ايجابي شكله
شكلك بادي البرميل من فوق :)
محمد حامد ما وريتنا ياتو دجاج , الدجاج خشم بيوت فيهوالكنتكي وفيهو دجاج المتعافي الماسخ داك :)
قلبت هوبة في التشبيه بسير العفش يا الحبيب
انت لو ما خانتني الذاكرة طيش الدفعة.مش كدا :)
الحركة السريعة دي من بركات دفعتكم بالمناسبة و الحالة النشطين فيكم قليلين نسبيا
ما بتقدر تقرا ولا العشرة في المية القلتها دي
بعد شوية تلقى نفسك عملت قائمة موضوعات و كتاب في الفيفوريت
هسي انا عندي مواضيع كتيرة ما بخشّها لكن بلقى آخر مداخل واحد من الفيفوريت فبشجعني اشوفه كاتب شنو كتير بلقى الموضوع جميل ويستاهل
أووووو أحمد سيد أحمد
كدي ياخوي اول شي النحييك على النشاط الجم ماشاء الله عليك ربنا يحفظ ماوسك من عين السناير ههههههههههه
اها
من ناحية هناك تضخيم للاحداث نعم دي لا يختلف عليها اثنان, و الواقع في المنبر لا يشبه الواقع في السودان إلاّ في القليل
الحكاية دي بتظهر للواحد لمّا ينزل إجازة و يقارن بين جو البلد البتغلي و على وشك الإنفجار و الثورة العلى الأبواب الخلّاها في البورد وبين الواقع
لكن من ناحية تانية للبورد فوائد جمة في ناحية التوعية بالحاصل في البلد مع مبالغاته خصوصا مع الاعلام الاحادي و مع التعتيم على ما يحدث في الهامش و الحروب و كدا
ففي اخبار و احداث للمنبر الفضل في معرفتنا بيها
المسألة فيها كدا وكدا
يا محمد الحبيب جبت الأثر دا من وين هههههههههههه
لكن كلامك صاح من ناحية المضارفة على الباسويرد, الشغلانة دي زي الدافوري الفيه حكم
اقرص و عفّص و اخد حقّك بي حرفنة, اهم شي الحكم ما يشوفك ههههههه, وكان شافك و اداك انذار اكلو في حنانك وفشّو في اقرب خصم ليك
اوعى تلاويه و تناقرو, بعيد عنّك دا الحكم وسيد الكورة كمان :)
هلا يا محمد بابكر
الشلليات في, أكذّب عليك عاد!! لكنها شي طبيعي
سودانيز ما مجتمع ملايكة فيهو اي شي, السمح و الكعب
اها الشللية دي فيها ايجابيات و سلبيات لكنهاليست شرا كلها, شوية شوية و حتعمل ليك شلّة تنفعك في اليوم الأسود :)
ودي نصيحتي ليك اتعامل عادي و قول رايك وعلّق على الحاجة البتعجبك وما تهتم بالردود عليك و لو كتبت بوست سوقو صاح براك ما تهتم بحكاية الزوار و المتداخلين
لكن الشلة مهمة عشان الونسة ساي ان شا الله :)
تخيّل يا وضّاح انا مرّات كتيرة بفتح نافذة الرد واكتب كلام كتير اها وانا براجعه براي اقول اسّي ح يقول لي كدا و اقول ليه كدا و يرد لي بكدا و القى نفسي خاشي سيناريو معاد و مكرر اقوم امسح الكلام واقول مالي ووجع الراس
ومرّات بتحكم معاي اقوم ارسل الرد لكن غالبا بتحقق السيناريو الاتخيلته و اندم عليه :)
ان شا الله ما نكون فوّتنا الرد على اي من الشباب الكرام
و اسمحولنا ان نسينا أو أخطأنا
(عدل بواسطة محمد البشرى الخضر on 02-17-2013, 09:56 PM)
| |
|
|
|
|
|
|
|
|
|
Re: إنطباعاتكم عن البورد يا برالمة .. (Re: محمد البشرى الخضر)
|
ود البشرى والله ماشاء الله
كالعادة مايسترو وحريف
توجيهات وتوصيات ولا اجدع Manual
ياخ سيد الشى زاتو ما اظن يقدر يرحب ويوجه الاعضاء بالسلاسة وطولة البال دى
انا رغم اقدمية تسجيلى بالنسبة لدفعة 2013 لكن كمشارك رسمى كدا بعتبر نفسى واحد منهم
| Quote: فجيت داخل وفي نيتي اني اقوم ابلّك واتهمك بالعنصرية والاستوساخ |
خالد عبد الوهاب ازيك
انت متأكد انك ما بروف ولا ايو حاجة من هذا القبيل
غايتو الصلعة ما بتجلى كان بروف جلت
خالد انت مريح جداً ياخ حالك حال صاحب المفردتين (بل - استوساخ)
| |
|
|
|
|
|
|
| |
محمد البشرى الخضر
د. ياسر عبد القادر
Hani Arabi Mohamed
Maawya Hussein
أيمن الفاضل
عفاف الصادق بابكر
محمد محمود محمد
طارق جبريل
زهير عثمان حمد
Musab Osman Alhassan
أشرف الرحال
saidahmed shami
بدرالدين الطائف
عبد الحفيظ فخر الدين
جمال عبد الناصر محمد
Amin Tayson
Mohammed Abuzaid
kamal omer
عمر التوم
Mohammed Maher
سامى عبد المطلب
معتز الصادق
محمد حامد
وضاح عبدالرحمن جابر
احمد الأمين على إدريس
فيس بوك
تويتر
انستقرام
يوتيوب
بنتيريست