|
|
 بيت بكاء .....
|
*** جميع شخوص وأفراد وأحداث وأماكن هذه القصة خيالية ولا علاقة لها بأي أشخاص في الواقع.
(1)
أمام المستشفى:
محمود: لا حول ولا قوة إلا بالله ، لا إله إلا الله.
عادل: (ينظر إليه بكل ألم): ما تقول لي ....
محمود: لا حول ولا قوة إلا بالله البقاء لله.
عادل: (يصمت تماماً ويغرق وجهه في بحر من الدموع).
(2)
المنزل:
ترررررن تررررررن (جرس التلفون يرن).
فاطمة: شنو تلفون نص الليل دا ........ ألو
(ويسقط التلفون من يدها).
سامية: (تستيقظ متململة على صوت بكاء فاطمة) ، وتجري نحوها. يا بت ما تلمي علينا الجيران والبيت في حالتو دي. صحي أخواتك والبت وتعالوا.
(3)
تبدأ سامية وبناتها في تنظيف المنزل وتلميعه وإغلاق الأشياء الثمينة في الغرف البعيدة وإحكام إغلاقها.
وبعد الإنتهاء من العمل الشاق الذي استغرق ساعة.
سامية: الليلة وووووووب يا خالتي ..... الليلة خليتينا ومشيتي يا خالتي .... الليلة واااااااااي
..... وبدأ الجيران في التوافد.
(4)
أمام المستشفى:
عادل: ألو ..... عمّ الضو ..... الحمد لله، لا حول ولا قوة إلا بالله.
الضو: لا حول ولا قوة إلا بالله، متين الكلام دا؟
عادل: حسع. قبل شوية. أقول ليك تعال المستشفى سريع.
الضو: حاضر يا ولدي دقايق بس.
(5)
تجمع الأهل أمام المستشفى وتعاونوا في سداد مبلغ تسعة ملايين (متأخرات المستشفى) ليتمكنوا من إكمال إجراءات شهادة الوفاة واستلام الجثمان.
(6)
السعودية:
ترررررن ..... ترررررن ..... ترررررررن
مؤيّد: المنبه دا مالو ضارب بدري كدا .... انا ما زبطتو كويس ولا شنو؟ ... الله دا الجوال.
أمي ؟ ..... ما ممكن ...... وينخرط في موجة من البكاء.
(7)
مؤيد: طال عمرك .... أمي توفت وأنا طالب إجازة.
خالد: البقاء لله أحسن الله عزاكم ..... بس أنتْ تِدري ما في احد غيرك في المكتب وزميلك في اجازة وبيجي بعد اسبوع ... انتظر يا رجّال كلها اسبوع وتنزل.
مؤيد: طال عمرك ....
خالد: يا رجال الحزن في القلب. واللي راح ما راح يرجع .... خل عنّك ها الكلام واصبر.
(8)
لندن:
وئام في هيثرو تحاول إيجاد أي مقعد في أي طائرة متجهة إلى أي مكان قريب من الخرطوم.
(9)
بيت البكاء :
زائر: الفاتحة .....
(10)
سيارة متجهة إلى بيت البكاء
فتاة: ماما خلاص قربنا اقفلي صوت وردي دا ما يسمعونا
تنزل- الفتاة وأمها امام الصيوان.
الأم : وااااااااااااااااااااااااااااااااااااااااااااااااااااااااااااااااااااااااااا اه اه اه لا لا لا لا وااااااااااااي ،
عادل: ادخلي على النسوان بيجاي ، لا حول ولا قوة إلا بالله الفاتحة.
الأم: (بعد أن دخلت إلى داخل المنزل): واا وا وا وا وا مما سمع الخبر دموعي جفت وا وا وا وا ... وا .... واي ... ووووووب ....... لا ..... .... ....
(11)
زائر: يا ولد تعال .... أنا غداكم دا ما بنفع معاي الدكتور مانعني من الحاجات دي ... شوف لي غدا مافيه بهار.
عادل: حاضر يا حاج بشوف ليك غداء من بيت الجيران. (يخاطب نفسه) : في زول عزمك غداء ؟ ولا عشان ختيت عشرة جنيه في الكشف داير تطلع ميتينا.
وبينما عادل ما زال يحادث نفسه ويغالب حزنه على أمّه ، غرقت عيناه في مزيد من الدموع عندما رأى ثلاثة بصات مكتظة بالركاب تنزل أمام الصيوان : ناس البلد جو.
(12)
بعد صلاة المغرب
عادل ومحمود وعمّ الضو وآخرين في داخل غرفة بالمنزل:
عادل: يا جماعة نرفع الفراش؟
محمود: الكلام دا كيف؟ أخوانك مؤيد ووئام ما جو لسع ، وداير الناس تقول علينا شنو؟
عم الضو: والله يا جماعة الحالة بطالة، أنا أمس اتدينتَ عشان خاطر نطلع المرحومة من المستشفى ، ما حاقدر تاني ازيد حاجة. وقروش الكشف حسع ما غطت ربع الانصرف. ولسع مفروض نجيب حاجات.
عادل (يخاطب نفسه) : حتى إنتَ يا عم الضو عايز تذلنا بالقروش الدفعتها أمس؟
(13)
الدلالة.
سمسار يبيع سيارة عم الضو لتغطية الزنقة الحاصلة في بيت البكاء.
ما جابت سعر كويس .... لكن الجماعة مستعجلين ، وبعدين السمسار مالو؟ هو ماخد حقو كان كدا أو كدا.
(14)
وصلتَ وئام بعد رحلة امتدت من هيثرو إلى القاهرة ثم الخرطوم واحتضنت أخواتها وبكت من أعماق قلبها.
(15)
مؤيّد: طال عمرك طاف اسبوع ... الله يرحم والديك خلني أسافر.
خالد: يا معوّد ما أقدر ، لازم زميلك يجي. الله يرحم والديك ترا امك متوفية لها اسبوع. الله يرحمها ادعي لها وصلّ عليها وانت هنا.
مؤيّد: اسمعني أنا ما داير شغل .
خالد: وشّو ؟ تبى تروح السودان وتترك النعمة ، لا تجحد النعمة يا رجال،
مؤيّد: نعمة بتاعة دينك ؟
خالد: الو .... الهيئة .... ترا عندي سوداني يسب الدين ......
(انتهت)
|
|
 
|
|
|
|
|
|
|
 Re: بيت بكاء ..... (Re: Hani Arabi Mohamed)
|
أسلوب رائع و مشوّق في سرد القصة التي تمثل انعكاساً لواقع المجتمع السوداني الذي لا يخلو من التناقضات..
شكراً هاني على هذا السيناريو الرائع ،،
في انتظار البقية،،
| |
|
|
|
|
|
|
| |
Hani Arabi Mohamed
رانية عمر عبدالله
عادل خياري
فيس بوك
تويتر
انستقرام
يوتيوب
بنتيريست