اللازمة العملت لـي الأزمة ( عليك الرّحـمة والـمغفرة يا زيدان )

Quote: لؤي اخوي الحبيب ملالك علينا مفتح جروحنا يا اخوي الحكاية جاطت شوف ابو الزهور ازهري نور الهدى يفتي ليك بعدين انت البوديك تسمع شنو تورم فشفاشك ليك المحبة الابدية

أُستاذنا العزيـز ودّ السُّنّـي
صباح الـخيـر

وحياتك يا غالـي
لا كنت بسـمع ولا جايب خبـر
لكن اللزمة طقشت أضانـي من علـى البُعد
فجيت جاري أشوف الـخبـر شنو
قُلت يا ربّـي دا توزيع جديد ولاّ شنو ؟
فتورّم الفشفاش وتـحشرمت شُرّافتاه








مـحبّتـي

Quote: العندليب عصي علي التقليد شكرا لؤي

Quote: اخونا لؤى ناس الموسيقى ديل ما بستحملوا. اية حاجة لو قالت سيييك ساى بتضرسم. انشاء الله الشاب ده والفرقة المعاه يشفوا التحليل بتاع الغنية بتاعك وانحنا طبعن بنسمع ساى وما فاهمين الحاصل شنو

Quote: اما الفرقة والله مع انهم عازفين معروفين جيدين لكن الوم المشرف عليها اذ كيف يقع فى مثل هذه الاخطاء الفادحة

Quote: مستـحيل دنياي تبسـم أو تفرّح مرّتيـن

Quote: لك الرحمة يا زيدان

Quote: استاذ لؤى ... سلامات ... ما شايف لى أى MUSIC NOTES CHART قدام الناس البعزفوا ديل ! و إظهر علييهم ( كالعاده ) شغالين ( زلنطحيه ) ساى ... يا خوى الناس ديل ( لا العازفين لا المؤدى ! ) ما فيهم زول جايب خبر لل #F أو الصول و المى و الرى و لا حتى ال دو ( F# G G A E D C ) ... LOW , HIGH OR FLAT PITCH جربنديه ساى ... ( اوركسترا الفضائيات السودانيه ! ) ما شغالين بالحكايه دى ! و إخيل لى كتير منهم بغتبرا ( فلفسه ! ) ساى ! و مرات الشتاره و النشاز لحدى ماإضرسوك وتقول الرووووووووب ... غايتو ! الله إكون فى عونك مع ( اللزمه ! ) ... .... لست بموسيقى متخصص او محترف ... و لكنى درست النوتة الموسيقية فى وقتِ ما ..... و كلامك صحيح ... الآداء عاليه يختلف عن الأصل للفنان الراحل زيدان إبراهيم ... و كتابة الموسيقى يجب أن تكون حسب الآداء الأصلى للمؤلف و الفنان الذى إبتدعها فهى مثل ال DNA , و التى اى ( النغمة الموسيقية ) لا يمكن لها أن تزور أو تحور حتى تحفظ و تخلد بنكهتها الأصلية ... .... عبدالماجد

أخونا أُستاذ عبد الـماجد
سلامات

كلانا فـي الـهـم سوا يا صديقـي
أنا كمان ما موسيقـي مـحتـرف أو مـتخصّص
رغـم دراسة الـموسيقـى
وشرف الـمجاملة بالعزف مع رموز
طبعاً مسألة النّوتة دي فـي موسيقانا للأسف مسألة شكليّة جدّاً
رغـم ضرورتـها
وخلّينـي بعد إذنك أحكـي ليك قصّة قصيـرة
فـي السّويد قبـل سنوات زارنا الأُستاذ العزيز مـحـمّد ميـرغنـي
وبعد جلستـي الأولـى معه ومراجعة الأُغنيات التـي كان ينوي تقديـمها
إقتّرحت تكويـن فرقة مصغّرة
بدلاً عن الأداء بالكيبورد فقط
وإتّفقت مع الأخ أميـر طاشيـن ( بيـز جيتار )
والأخ الأميـن حسب الله ( جيتار )
وللأسف نسيت الآن من كان هناك أيضاً
الـمهـم إنضـمّ لنا عازف درامز جامايكـي
وأثناء البـروفة ( بدون نوتة طبعاً )
وكنت أراجع مع الشّباب بعض التّفاصيـل واللازمات
فسألنا كـم سنة ظللنا نعزف مع مـحـمّد ميـرغنـي
فأخبـرناه بأنّـها الـمرّة الأولـى
ولن تستطيع تصوّر دهشة ذاك الـجّامياكـي لـحظتـها
وعدم استيعابه لكوننا نـحفظ جـميـع تلك الأُغنيات عن ظهر قلب
ومن مـجرّد استـماعنا لـها عبـر الرّاديو أو الـتّلفزيون
زمن جـميـل ياخـي





تقديـري ووُدّي

Quote: لؤي يا شمت ... الزمن وقف يا صديقي ... كبارنا راحوا والبقية تعد علي أصابع اليد الواحدة ... الله يستر يا لؤي ...

Quote: ولاّ كـمان نكون خرّفنا

Quote: والله يا لؤي هذا الشاب اتذكره تماما وما قدرت بصراحه اكمل الاغنيه تشويه يبدو انه متعمد لطمس هويتنا الموسيقيه بعد طمس كلما تبقي من الاتحاد السوداني السابق " علي وزن الاتحاد السوفيتي السابق " والعتب اولا علي ادارة التلفزيون التي جعلت هذا ممكنا ثم بابكر صديق ولجنته التي اشك في تقييمها كثيرا والتي لولاها لمااتيحت لهذا الشاب فرصةالظهور اصلا في البرنامج ثم هل ادراة المنوعات بمناي عن كل ما يتم تقديمه بواسطة بابكر صديق؟؟؟ هذا نسميه مرض وبلغة الشباب اليوم بيض

Quote: حبيبنا لؤي مسكاقمي والله انت بالك طويل قعدت تسمع لي هرطقة زي دي ، يا خوي الحكاية جاطت وكل واحد يقدر يتحصل على مايكرفون طوالي يبدا يغني والغريبة غنا التانين ووين؟ في التلفزيون يعني ما في الحلة يعني الاجهزة الاعلامية هي التي تقود حملة تدمير الفن في السودان بالسماح لهكذا مهرجين بتشوية أغاني خالدة، يا خوي كان بقيت تسمع الجماعة دييل ياكا الجاك ضغط وسكري ، آآآآفيلقو

أُستاذنا العزيـز ساطور
سلامات وأشواق

الضّغط والسُّكّري الـجّد
لـمّا تسـمع واحد من الشّباب ديـل
بيغنّـي فـي نور العيـن
وبدل لكن الأشواك والنّار حواليك
بيقول :
لكن الأشواق والنّاس حواليك
دا دليـل علـى شنو ؟ غيـر عدم الرّقابة والـمتابعة والـمراجعة
وعدم الـمعرفة رُبـما بتفاصيـل الأُغنيات الـمؤدّاة





مـحبّتـي

Quote: أخي الاستاذ لؤئ والله انا معاك في كل ما ذكرت وفعلا في تغيير في اللازمة .. لكنن على ما اذكر انا سمعتها بنفس الطريقة دي قبل كدة في حفل للمرحوم زيدان والذي كان معروفا بتجديده للازماته الموسيقية وتغييره لدخولياته وخواتيمه كثيرا .. الود المؤدي انا بعتبرو فاشل تمااااااما .. فالصوت نشاذ مؤسس .. الشباب الموجودين في الفرقة المصاحبه أي واحد فيهم بمهارة وذكاء عشرة عازفين من أي فرقة (ديناصورات) من جدودنا زمان .. وليس من العدل ان نهاجمهم بكل هذه القسوة .. وياريت لو كل الغنا السوداني القديم ده اتوضع في الواطة وشفنا ليهو إعادة ترميم لأنو نااااااااااااااااااااااااااااااااقص كتيييييييييييييييييييييييييييييييير .. وفاقد أهم مكونات التأليف الموسيقي الجيد إلا بعض الاعمال القليلة . أضعف الإيمان عشان يبقى صامد بعد 30 أو 40 سنة لقدام .

Quote: الود المؤدي انا بعتبرو فاشل تمااااااما .. فالصوت نشاذ مؤسس ..

Quote: Quote: الود المؤدي انا بعتبرو فاشل تمااااااما .. فالصوت نشاذ مؤسس .. شكرا ياسيف باقى كلام لؤى شعرا ماعندنا ليهو رقبة لؤى تحياتى

(عدل بواسطة Elmosley on 02-06-2013, 11:03 AM)

Quote: وحتى الأداء باهت .. ثم أين المواهب أصلاً ؟ .. في هذا البرنامج البائس ..

Quote: الاخ لؤى لك التحيه افتكر الفرقه ما بتعمل بروفه لتجويد الاداء الموسيقى واللحنى بل لمعرفة المنطقه التى يغنى عليها الفنان (الاسكيل اوالسلم ) كما نسميه وبعدين الاعتماد على حفظ الاغنية البعد مرات بكون ساهلة الحفظ صعبة الأداء ما تنسى انه فى اكتر من فنان فى الحلقة ما اظن فى وقت علشان يعملو معاهم بروفات وبعدين مافى موسيقى مسؤول عند تسجيل مثل هذه البرامج الغنائية او الموسيقية علشان كده بتحصل الحاجات دى و ما بحسها الا الزول ابو اضان موسيقية نضيفة

Quote: حذف للتكرار

Quote: حبابك استاذ لؤي يا مبدع ملاحظة موسيقية راقية, لطبيعة برنامج نجوم الغد لا اعتقد ان الفرقة تسعى لاي تطوير لاعمال الراحل زيدان ابراهيم فالاصل هو تقديم المواهب .. ربما هي غلطة وتجاوز مع عشرات الاغاني المقدمة , وعدم وجود النوتة كما تكرمت .. نحن من ضمن الشعوب السماعية والمعلومات والاخبار نفضلها مروية وتتناقل كذلك , فتفقد التوثيق الجيد , يبدو موسيقانا بذات النهج . للامام ابداع و نشر وعي وثقافة .. ______________________________________________________ ليتهم يعلمون ان عمر اللحظـه في بعـدك يا خـرطـوم سنين طـوال د شهـاب الفاتح ـ كوالالمبـور

Quote: العزيز لؤي.. إزيّكْ يا فنان.. ورحم الله زيدان.. وبعد ،،، فإذا كان "المؤدي" قد ابتلاه الله بكثير من "الشجاعة الأدبية" وكثير من "قوة العين" وكمان جابت ليها ظهور في التلفزيون واليوتيوب والمنابر...ما أستاذ موش؟؟ ما عندنا ليهو طريقة..To late والله.. وعملاً بالمأثور السوداني: الجفلن خلهن..أقرع الواقفات.. تجدنا معك في خندق واحد..نقرع العازفين ديل.. السهو وارد..مع الزحمة وضغط البرنامج... لكننا نرفض تماماً أن يكونوا عمداً كدا "استظرفوا" الوحدة على قول أستاذنا موصلي.. ما ليهم حق قطعاً... نشكر لك غيرتك واهتمامك أيها الفنان الأصيل.. ....كنوز محبة....

Quote: الاغنية دى تحديدا من الاغنيات التى ابدع زيدان فى ادائها بصورة مذهلة فوق الكثير من اغنياته. لذلك حرام والله حرام

Quote: الحبيب لؤي الكلام العملوه في الاجزاء الاولي هو مايخص الجزء الذي يبدآ من ياعبير يانسمه هاشه الخ لكن الجماعه مشتاقين للوحده في لازمات الاغنيه زي مانحن محتاجين لوحدة السودان ههههه تحياتي للملاحظه اللماحة

أُستاذنا الـحبيـب أب جاكومة
سلامات وأشواق

بالفعل
وقد كان تـلخيصك مطابقاً لردّي علـى الأخ سيف الدّيـن الفاضل

Quote: أخـي أُستاذ سيف الدّيـن صباح الـخيـر أنا متأكّد أنّك بالفعل سـمعت اللازمة بنفس الطّريقة فاللازمة يا عزيزي أصلاً موجودة لكن فـي موضع آخر تجدها فـي الكوبليه الـتّالـي :- يا عبيـر يانسـمة هاشّة ويا فرح مليان إعاشة شيل سنينـي وشيل نداها وشيل معاك كُلّ البشاشة ويبدو أن خلط قد حدث بيـن الـموضعيـن

الوحدة الغيـر جاذبة دي ما عاوزينّـها





مودّتـي

Quote: Samah Ali · Port Sudan انت للازمة جابت ليك ازمة وانا شترة صوتو زبحت اضاني زبح

Quote: حبيبناالشفيف لؤي كفنك اخوي ؟؟ الجاتك في اضانك سامحتك ..الله وحكمتوا نسوي شنو مع المقدور نسوي شنو ؟؟ جيل العطاء لا يتكرر فهذا جيل العصر الذهبي,هؤلاء الرواد خلقهم رب العباد للابداع لا لشئ اخر هؤلاء حملوا رسالة كبيرة وعظيمه فيها كل معاني الحب والخير والجمال ... لهم الرحمة من فقدناهم والذين مازالوا يثروا وجداننا يديهم الصحة والعافيه و يمد في ايامهم لكن والله دي بالغت فيها يامحمد زكريا قلت زيدان بطريقه ود الامين لا حوله.. بس ادوهم فرصه الناس ديل غلطوا في العنوان اقصد في الاختيار .. رحمك الله يازين الشباب (زيزو) بقدر ما امتعتنا

عـماد
سلامات

من ناس ديل وااااا أسفاي
ومن زي ديل وااااا أسفاي






وااااا ضيعة الوتـر

Quote: تحياتي يا لؤى للأسف ما إنتبهت للبوست دا الا هسه .. والله يا لؤى مفروض الناس تكون عندها وقفة جادة مع القنوات التجارية البقت تستضيف كل من هب ودب وتعمل منه فنان! اللازمة مافي مكانها ومقصودة لانها لو خطأ كانت حصلت جوطة وما قدرت افهم فكرة الاوركسترا شنو في التنظير الغريب دا ههههه ــــــــــــ بشكرك كتير يا حبيب على حسن ظنك في أضاني :)