|
|
 عمق إحساسك في كشـكــــــــــــرتــــــــــك
|
سوف نتناول بعض النواحي الحياتية السودانية في شكل حوارات بين شخصيات وهمية من نسج الخيال ليس لها علاقة مع الواقع.
وإن تصادف أن كانت أوصاف الشخصية متوافقة مع شخصية واقعية ، نؤكد بأنه لا صلة بينهما وما هي إلا محض الصدفة
الباب مفتوح لكل الأخوان للإضافة في نفس السياق علنا نتلمس نبض الواقع والإنسان السوداني بشكل واقعي حقيقي
لانطبل هنا بالدفوف ليعلو الصوت ولا نخزن في الصناديق لنخفي الحقيقة
|
|
 
|
|
|
|
|
|
|
|
Re: عمق إحساسك في كشـكــــــــــــرتــــــــــك (Re: الصادق عز الدين)
|
البداية سوف تكون مع حاجة التومة وحاجة نفيسة أحيانا بائعات شاي وفي أحايين أخري يبيعون التسالي والنبق والطواقي المهم كل ما من شأنه أن يدر دخلا يعينهم على نوائب الحياة وغلاؤها ، يسكن (نون النسوة) في أحد الأحياء الشعبية بالعاصمة المثلثة
يخرجان سويا كل يوم صباحا ويتوجهان حيثما تملي عليهما نفسهما ويستقرا ويفترشان بضاعتهما للبيع وكسب الرزق
سوف نواصل
| |
|
|
|
|
|
|
|
|
|
Re: عمق إحساسك في كشـكــــــــــــرتــــــــــك (Re: الصادق عز الدين)
|
الصباح بدري حاجة التومة قامت من النوم شأن حبوباتنا الزمان وحبهم للبكور
عملت الشاي وختت الصينية قدام أبو الأولاد
أصبحت كيف يا أبونا ، وجع الرجلين بتاع بالليل راح خلاص
آي الحمد لله
حاجة التومة : أشرب كباية الشاي دي بتدفي جسمك
أها أنا ماشة حاجة نفيسة مستنياني في الشارع ، إتأخرت عليها
أبونا : ربنا يسهل ليك طريقك وخلي بالك من نفسك
حاجة التومة طلعت الشارع تتلفت يمين شمال شافت حاجة نفيسة جاية من هناك
حاجة نفيسة: إزيك ياختي أصبحتي كيف
حاجة التومة: الحمد لله إلا بس وجع الرجلين ده مرة مرة يجيني
حاجة نفيسة: هوي يا ولد ، ركشة اقيف
وقف صاحب الركشة ركبن حاجة التومة وحاجة نفيسة
ياولدي ماشين جنب المجلس البلدي تودينا بكم
صاحب الركشة عشان خاطرك ياحاجة بي سبعة جنيه
حاجة نفيسة: سجمي .... ليه سبعة عشان شنو أمبارح مشينا بي أربعة جنيه ما كدي يا ختي
حاجة التومة : يعني كيفن سبعة كمان
صاحب الركشة : الأسعار زادت ياوالدة البنزين زاد والبنزين زاد وكل حاجة زادت
حاجة التومة : ما عادي الحاجات دي بتزيد دخل الركشة شنو كمان
حاجة نفيسة: يعني زادت بتين أنا بقول ليك أمبارح مشينا بي أربعة جنيه ... أحي حليل زمن القرش والتعريفة
صاحب الركشة: والله ياحاجة زادت أمبارح المغرب ، وبصراحة هسي الصباح ما سألت من سعر الدولار يعني لو زاد كنتا بزيد ليكم تاني
يا أركبوا يا إستنو واحد تاني بس ممكن يكون عندو خبر سعر الدولار وتمشوا بعشرة جنيه
حاجة التومة: لا حول ولا قوة ... يا ختي أركبي ما يجينا واحد تاني تفتيحة وندفع زيادة
حاجة نفيسة: حسبي الله ونعم الوكيل ... ده حال شنو
حاجة التومة: عارفة يختي أنحنا زاتنا بنزيد أسعارنا يعني البزيدو ديل أحسن مننا
حاجة نفيسة: ياختي الناس غلابا من وين يجيبوا
حاجة التومة: كيف يعني من وين يجيبوا والعربات الراكبينها دي ماشه دفرة ما ماشة بالبنزين الزاد لينا الركشة دي من أربعة جنيه لسبعة جنية
حاجة نفيسة: وووب علي براحة يا ولدي كان الركشة دي إنقلبت بينا ... براحة شوية
صاحب الركشة : والله ياحاجة مشواركم ده على بالخسارة هسي إتصل بي صاحبي وقال الدولار زاد أمبار بالليل ، يعني مفروض تدفعو عشرة
عاوز ألحق أنزلكم وأمشي أكب بنزين قبل ما الدولار يزيد تاني ويزيد البنزين
حاجة التزمة: هو الدولار ده بيزيد براهو كده ولا بيعملوا ليهو شنو عشان يزيد كده
حاجة نفيسة: ياولدي خلينا نوصل بالسلامة يطير الدولار العاوز يطير حياتنا ده
نواصل في مشهد جديد
| |
|
|
|
|
|
|
|
|
|
Re: عمق إحساسك في كشـكــــــــــــرتــــــــــك (Re: الصادق عز الدين)
|
حاجة التومة وحاجة نفيسة نزلن من الركشة ودفعن السبعة جنيهات وتوجهن نحو الشجرة الكبيرة وسط الحوش فرشن حاجياتن جنب ست الشاي
سامي وعلي محبين الكورة جلسا كما هي العادة يوميا لشرب الشاي ومطالعة صحف الرياضة
سامي : عليك الله شوف هسي صورة هيثم دي بلبس المريخ دي كيف
على: لا بيشبهكم ولا حاجة بس الله غالب
سامي: هههههه غايتو حا تتغلبو غلب (بضم الغين) السنة ، تتذكر إنتقام إيتو من ريال مدريد في المباراة المشهورة ، أها هسي بتبقى فيكم إنتقام البرنس من الهلال هههههههههه
علي: تضحك ليها شنو حا نشوف بس الحمد لله .... الله غالب ...... عملتها فينا يا البرير
حاجة التومة: هوى إنتو بتتكلموا لي في الكورة والدولار إرتفع
سامي وعلي هههههههههههههههههه
وإنت علاقتك شنو بالدولار ما يزيد ولا ينقص
حاجة نفيسة: كيفن عاد دخلنا شنو ، ما بنركب الركشات ، قوموا شوفو شغلكم الزمن جا خلاص
حضر محجوب موظف الأراضي متأخرا ومنزعجا وجلس لتناول الشاي
حضر أحد المراجعين إلي محجوب وسأل لو سمحت إنتا محجوب
رد محجوب قائلا: لا محجوب منو ؟
السائل: ياخي ده موظف هناك أنحنا واقفين صف أعمالنا متعطلة بسسبو قالو قاعد يشرب شاي هنا
محجوب : أسال عنو في مكان تاني
ذهب السائل
حاجة: محجوب ده شنو السويتو ده
محجوب : في شنو يا حجة التومة
حاجة نفيسة: الناس واقفة صف ما عطلتهم قوم شوف شغلك
محجوب: يعني لاحقين شنو ما ينتظرو شوية ... راسنا ده محتاج شاي ويرتاح عشان نشتغل
حاجة التومة: الدنيا لسه الصباح يا ولدي ... يعني نص النهار تعمل شنو
محجوب : عليك الله غيري الموضوع خليهم واقفين ... ديل شنو الدنيا ما أصبحت واقفين صف
حاجة نفيسة: الساعة تسعة هسي كيفن ما أصبحت
خاجة التومة: هسي لو كان خلصتهم أمبارح كان وقفو ليك صف
محجوب: يا حجة ديل شغلهم ما بيخلص أنحنا حا نموت وهم واقفين صف
حاجة نفيسة: غايتو حنس نصايب ما ياهو ده حال خدمتنا المدنية ... الشغلة بتاعت الدقايق تاخد ساعات
محجوب: عليك الله ما تخربي لينا مزاج كباية الشاي دي
حاجة نفيسة: هسي البخربها ليك كلامنا ده ولا قعادك وتأخير الناس
على مهرولا: يا محجوب ياخي قوم شوف الناس ديل كلهم منتظرينك ... شيل الشاي ده معاك
ظهر السائل فجأة إنت محجوب وقبل شوية تقول لي فتشوا في مكان تاني
محجوب: يازول إنت مالك أمشي أقيف في صفك أنا جاي
السائل: والله إلا أشتكيك
محجوب : ياخ أمشي إشتكي لأي زول
دخل السائل على رئيس القسم وحكى له الموقف
رد الرئيس معليش .... بس محجوب ده من أكفأ الموظفين عندي ومعليش لو تأخر عليكم شوية
السائل : أنا بقول ليك سألته إنت نحجوب قال لي لا
الرئيس: إنت عارف إسمه محجوب منو
السائل : لا وما بهمني أعرف
الرئيس: طيب إنت لو كان سألتو بإسمو الكامل كان قال ليك نعم ... لكن في كم واحد إسمو محجوب
السائل: هسي بالله عليك الله ده رد
الرئيس : طيب رايك شنو أناديهو وأوقفو من الشغل وإنت تنتظر لغاية ما يجي موظف تاني بعد كم شهر
السائل : لالالالالالا عفيناهو
الرئيس : خلاص أمش أقيف في الصف
الساعة حداشر طلع محجوب من المكتب وجا عند ست الشاي
حاجة نفيسة: أجي ياولدي تاني جيت إنت بتين مشيت
محجوب: تعبت والله قلت أجي أرتاح شوية
حاجة التومة: الله يعين الخدمة المدنية الما فيها ضابط ولا وجيع
| |
|
|
|
|
|
|
|
|
|
Re: عمق إحساسك في كشـكــــــــــــرتــــــــــك (Re: الصادق عز الدين)
|
حاجة التومة وحاجة نفيسة قرروا اليوم يمشوا الملجة في سوق ام درمان
طبعا وافقت حاجة نفيسة على مضض لأنها كانت ترغب أن تذهب ميدان الأسكلا جنب دكان الطوخي عشان تتذكر أيام التوخي والكرتيلا
وتغني من الأسكيلا وحلا
المهم وصلن السوق لقوهو زحمة ما تديك الدرب مافي مكان يفرشون فيهو
التومة: ياختي ديل جو متين
حاجة نفيسة: ديل بايتين هنا ، هسي مع الدولار وسعر الركشة ده من البقدر يمشي ويجي كل يوم
حاجة التومة : والله صدقت بس أنحنا ياهو الغلب والأولاد
بعد عدة محاولات لقن مساحة باللفة كده جنب أبو مرين
حاجة التومة: هسي ياختي البجينا هنا منو
حاجة نفيسة: كدي فرشي الرزق علي الله
السوق زحمة وناس تجي وناس تمشي وناس تنادي ثلاثة قطع بسبعة ونص
وبياع الخضار ينادي طماطم طماطم
حاجة التومة: يختي الناس تشتكي من الغلا وقاعدة تشتري دي يحسبوها كيف يعني
حاجة نفيسة: يعني الناس ما تاكل ولا شنو !!! ما ياها كسرة بموية ولا سخينة وماشي الحال
فجأة الناس بقت تتجارى بي هنا وهناك وبتاع الطماطم نص طماطمو إتدفقت ونصها شالو وشوية عساكر كل واحد عصايتو أطول منو
حاجة نفيسة: هوي ياختي لمي حاجاتك بسرعة ناس النظام العام جو
حاجة التومة: ووووب علينا الدولار زايد وعصايتم طولها زايد دي مصيبة شنو
في خمسة دقايق كان السوق فاضي إلا من الملجة وبعد نص ساعة إتلموا الناس تاني وفرشوا
حاجة نفيسة: عارفة لو ما كنا باللفة كان يمكن حاجاتنا خموها مع الخمة
حاجة التومة : يخمهم البلا ، ده ما رزق ناس وعيش ناس هم لو كانوا لاقين طريقة كان فرشوا حاجاتهم هنا
حاجة نفيسة: لكن بيني وبينك النظام حاو يختي ديل مغطين على ناس الملجة حامينهم اليبع
حاجة التومة: الرزق من الله
بعد شوية جا واحد ماشي ومعاهو عسكري وبوكس لكن الناس ما قامت جارية
نواصل .........................!!!!!!!!!!!!!!!!!!!!!!
| |
|
|
|
|
|
|
|
|
|
Re: عمق إحساسك في كشـكــــــــــــرتــــــــــك (Re: الصادق عز الدين)
|
Quote:
المشهد القادم في حوش المجاس البلدي أم درمان |
ياسلااام ...بعض الامكنة تفيض حنينا ...
وهنا في الصباحات الندية ....
يمتد نظرك تجاه حوش الخليفة ومن حوله الباعة المتجولون ..وتلك الساعة المحنطة في اعلى الجدار منذ زمن بعيد ..في الاتجاه الاخر عمال الكهرباء والمياة يتظللون بظل الفنارة بعد جهد امتد منذ الصباح الباكر ......وكم عرطحالي يقهقهون ببعض الطرفات فيما بينهم وهم يتناولون بعض المهام ...
والله انه حنين الامكنة .....حوش المجلس البلدي (في ظني انه المحافظة ....ام غيبتني السنون يا ترى )
شكرا الصادق ففعلا انت مشروع كاتب او قاص (دي كشكرة عميقة لحدي وين ماعارفة ).
| |
|
|
|
|
|
|
|
 Re: عمق إحساسك في كشـكــــــــــــرتــــــــــك (Re: نعمات حمود)
|
** الصديق الصادق عزالدين..
** سلام ومساءك خير..
## اولاً نبارك تواجدك بيننا فى حوش بكرى..
## ثانياً نشكر بكرى لإستخراج هذه الكنوز المدفونه من السرد الجميل..
## واصل هذا الحكى الجميل لمُعاناة الغلابه وللحال الذى وصلنا إليه من التردى فى كل شئ.
## ماأرخص الإنسان فى بلدى ... والزمن المُهدر الذى لاقيمة له..
(ودام الود بيننا)
(ابو محمد فؤاد)
| |
|
|
|
|
|
|
|
|
|
Re: عمق إحساسك في كشـكــــــــــــرتــــــــــك (Re: الصادق عز الدين)
|
بعد شوية جا واحد ماشي ومعاهو عسكري وبوكس لكن الناس ما قامت جارية
نواصل .........................!!!!!!!!!!!!!!!!!!!!!!
طبعا الجا ماشي ده مندوب المحلية ... مافي زول بيجري منو .. عاوز فلوس أو يشوف الإيصال السابق بشرط يكون له صلاحية ممتدة
حاجة التومة : ياختي !!! ده ما جرو منو ليه
حاجة نفيسة: ما بعرف لكن يمكن ده بتاع المحلية
حاجة التومة: غيروهو ولا غير نفسو
حاجة نفيسة: ههههه لا يمكن عمل تبديل
حاجة التومة: طيب لمي حاجاتك دي وأقعدي ساي أنحنا ما دافعين
حاجة نفيسة : صدقت أها نلم حاجاتي
بعد شوية
مندوب المحلية: هو يا حاجة وين الإيصال بتاعك ولا نشيل الحاجات
حاجة التومة: وين الحاجات العاوز تشيلها دي
حاجة نفيسة: إيصال شنو !!!! هو البقعد في الشارع ساي محتاج إيصال
المندوب: القفة الجنبك دي شنو
حاجة التومة: شايفني قاعدة أبيع هسي .... حاجات حقتي ... إشتريتها داير تدفعني عليها
حاجة نفيسة: هي يا جماعة شوفو جنس النصايب دي
المندوب : يا عسكري .........
قبل ما يتم كلامو رد عليهو واحد متابع يا ولدي إنت عاوز فلوس وخلاص ولا شنو
المندوب : يا حاج أمسك لسانك عليك وما تدخل في موضوع ما بيخصك
الشيخ الكبير: حسبي الله عليك يا هو ده إحترام الكبير
نط واحد شاب قوي الشكيمة
قال إنت بتكم عمك ده كده ، علي الطلاق ما تفارق المكان ده إلا أكسرك وخلي البوليس يحميك مني ، مش السجن ده أساسا بنوهو عشان الزينا ديل
واحد تاني قام: هوي أحسن ليك تمشي ومعاك العسكري ده ، كمان جابت ليها قلت أدب مع الكبار !!!!!!!!
الراجل العجوز: حليلك يا أم درمان وحليل ناسك ، غابت ألوانك وغابت أنفاسك
هوي ... إنتا ولد منو في أم درمان دي
المندوب يتجه منسحبا
الراجل العجوز: لا حول ولا قوة إلا باللله
حاجة التومة وحاجة نفيسة كانو غادروا المكان من بدري وشال الشيلة غيرهم
| |
|
|
|
|
|
|
|
|
|
Re: عمق إحساسك في كشـكــــــــــــرتــــــــــك (Re: الطيب عثمان يوسف)
|
أخي الطيب عثمان
أقدر لك حضورك ونقدك البناء ، لكن أحببت أم أوضح أنه لا توجد أدوات إنتقال بالقارئ إنما هي مشاهدات مختلفة من مواقع مختلفة .
هناك عدد من المواقع التي يمكن تناولها
الشارع
الخدمة المدنية
الحياة الطلابية
المطعم (محل فول وكوارع ، مطعم راقي)
السوق بأنواعه
السوق الشعبي
حوش الجامعة
هي قفزات للمشاهدة وحوارات من واقع الحياة من وجهت نظري التي قد تختلف مع وجهات نظر أخرى
عموما أشكرك أخي وآمل أن أكون قد أقنعتك بفكرتي
| |
|
|
|
|
|
|
|
|
 Re: عمق إحساسك في كشـكــــــــــــرتــــــــــك (Re: الصادق عز الدين)
|
حاجة التومة نوت وقالت شارع النيل الجديد لازم نمشيهو الليلة لكن حاجة نفيسة معترضة وفي الأخير وافقت
وصلو شارع النيل الصباح وقدام الفندق الكبير فرشو حاجاتهم وقعدوا
حاجة نفيسة: إنتي الشارع ده ما فيهو ستات شاي ليه
حاجة التومة: قاعدات ياختي بس لي قدام شوية عند معدية توتي
حاجة نفيسة: ههههههه إنتي والله ما جايبة خبر قولي عند كبري توتي
حاجة التومة: كبري شنو هو شوارع توتي دي بتمشي ليها عربية ، أنا ما عارفة الكبري ده فايدتو شنو ؟
وأثناء الونسة جا ولد وبيت ماشين وقعدوا
الولد: يا حاجة عندك ختم (جمع خاتم)
حاجة التومة: يا هن ديل شوف البعجبك
الولد: يا سمر شوفي الختم ديل ، شوف الحلو ياتو فيهم
سمر: الله حلوات شوف ده كيف مقاسي
الولد : طيب خليني أنا ألبسو ليكي
حاجة التومة: يعني تلبسو ليها عشان شنو ؟ خطيبها إنتا ؟
الولد: حاجة زي كده يا حاجة
حاجة التومة: دي ما فيها زي كده يا رسمي بالباب يا ده لعب ببنات الناس... هوي يا بت ده شنو
سمر: بنحب بعض يا خالتو وإن شاء الله بعد ما نتخرج من الجامعة بنتزوج
حاجة التومة يعني شنو الكلام ده
الولد: يعني نظام حجز وكده
حاجة نفيسة: عجب يا زمن
المهم الولد لبس سمر الخاتم وسمر لبستو خاتم ومشو شوية جو أرعة ماشين عاينو ومشو ، وبعد شوية مجموعة تانية ماشة ووقفو عند حاجة نفيسة
البنت: تامر تعال شوف الختم والعقود ديل ... الله حلوات
تامر: الله جميلة خلاص ، بكم يا خالة
ريم: حسون تعال عاين شوف الغوايش دي كيف
حسون: غوايش شنو عليك الله
ريم : لا أنا عاوزة غويشة ناقص لي الفين
حاجة التومة: هوي يا جنيات إنتو جايين من وين
البنت: نحنا طلبة في الجامعة
حاجة نفيسة: الساعة كم هسي ، عشرة ما جات كيفن طالعين من الجامعة
تامر: نشم شوية هوا يا خالة
حاجة التومة: تشمو هوا ولا عاوزين تجكسوا
ريم وهي ضاحكة: يا خالة بتعرفي الجكيس ههههههههههههههه
حسون: ههههههه يا خالة انحنا وقت المذاكرة بنذاكر وقت الترويح بنريح
حاجة نفيسة: يعني هسي ما في محاضرات:
تامر: في لكن برضو إن لنفسك عليك حقا
حاجة التومة: طيب تسوقوا معاكم بنات الناس كده
حسون: يا خالة أنحنا برضو أولاد ناس وما قاعدين نعمل في حاجة غلط
حاجة نفيسة: طيب الخاتم الغويشة اللبستهم ليها ديل معناهم شنو
تامر: أنحنا ما شين هسي نحتفل بزواج حسون من البت دي
حاجة التومة : سجمي كده بتتزوجي بدون أهل وياتو مأذون ده البعمل ليكم كده
تامر: يا خالة مافي مأذون ده زواج عرفي عشان ما نعمل حرام
حاجة التومة وحاجة نفيسة بحلقوا وإتشهدوا وإتحسبنوا في وقت واحد !!!!!!!!!!!!!!!!!!!!!
| |
|
|
|
|
|
|
| |
نعمات حمود
عبدالكريم أحمد الامين
الطيب عثمان يوسف
عمر عبد الخالق سعيد
فيس بوك
تويتر
انستقرام
يوتيوب
بنتيريست