|
|
 تبكيك عيون الدم..حُزن واشياء اخري وانت في ضفتك الاخري يا حوته.....
|
1
الحزن يفرد اشرعته علي سماء ملبده بغيوم الرحيل القمئيه,لم تجف امطار الفراق وعواصف الفقد علي اولئك الراحلين في ملكوت التواري والسائرين في صراط الاختفاء الابدي,وما زلت دموع المحبين ترهق كاهل خدود العذاري وتبلل شوارب الرجال,الحزن يسشتري فينا كسرطان ينهش خلايا الروح ويستعصي علي العلاج,والوطن تتسع زنازينه وتضيق هوامش حريته وتصغر دائرة الافراح فيه, وطنٌ اضحي حائطا لمبكي كبير تزرف فيها اهات الالم ودموع القهر ونواح العذابات ,وارتال المهاجرين تطرق موانئ الرحيل وتيمم وجهها شطر تلك الاماني الملفوفه علي اكياس(السعوط)واعقاب السيجاير وكاسات العرقي في محاولة يائسه للغياب.الغياب كلمه مرادفه للحزن وموازيه للبكاء,مازال القهر فينا طازجا كطعم مالح ودموع بمذاق العلقم ورائحة الموت ,وبعض ممارسات سطرتها قوانين النظام الذي قيل عنه عام,ومنفستوهات قيل عنها مشروعٍ حضاري احتضرت علي جنباته رغبات المبدعين وماتت علي جدرانه امنيات شعب,محمود لم يرحل الان كما أشيع هو باقي في افئدة عاشقيه ومتمدد في جنة ابداعه التي بناها بموهبه عصيه علي التكرار وصبر فاق تحمل روحه الشفيفه وجسده النحيل,ولكنه رحل حين شنقته ذات الدوله وهي تلهب ظهره بسياط حقدها القمئ................................
_____________________________
2
تبكيك عيون الدم
يافراق جحافل الهم
ياالمحمود ومااااااك مذموم
يامدوزن شجون الغم
يا الشارخ صوتك فينا
افراح
وطارد فينا احزان
وضاخي جوه قلوبنا شريان دم
تبكيك مداين الشوق
تنعيك حمايم القوق
وتلطم صدورن عذراي الحي
يا المحمود ومااك مذموم
تنعيك كل المدائن
تبكيك كل الغبائن
وتزفك طيبتك للجنان
يادراج عواصف الغم
أبكن يابنات
وقولن حي,وحي حي أوب
واتنخجو يا جنيات
وقولو حي وحي حي حي
ما انسكر مرق غُنانا ومات
تبكيك عيون الدم
يا فراق جحافل الهم
يا المحمود وماك مذموم
يا دراج عواصف الغم
_____________________
3
محمود ما دايرعزاكم،ولا محتاج لي دموع تماسيحكم،محمود الجلدتو بي قانون نظاكم، وطاردتو في سجنوكم،ولما اختار انو انحاز لي الغلابه والغبش والشماشه والمهمشين مارستو عليه ابتزازكم وتهديدكم، وذلتيهو حي،محمود بتعزيه جموع الشعب ده الطلعت من غير تحريض او دعوات او اغراءات،طلعو بالآلاف المؤلفة الماقدرتو تحشدوها لي مسيراتكم الوهميه والتجاريه بي اسم الدين،محمود بتعزي جماهيرو وتنعي الكتل البشريه الادافعت للمزاد والمطار وطيرو النوم من عيونكم،محمود بتنعيه وتبكيه بنات الشعب ده الذلتوهن بي قانون نظامكم وقهرتوهن زيو،وببكوهو شباب البلد دي الشردتوهم وخليتوهم عطاله بي فسادكم وجشعكم ومحسوبيتكم،محمود بنعوهو الشماسه الكان بقالدهم في تواضع ما بتعرفيهو انتو ويفرحم ويغني ليهم،وبذرفو عليه الدموع ذوي الاحتياجات الخاصه الكان بغني ليهم وادعمن لما أنتو رفعتو يدكم منهم وكان بتفرجخ معاهم في واطات الله دي وانتو راكبين فارهاتكم،محمود بنبكي نحنا في المنافي والشتات بي دموع الدم بعد حرمتونا منو وطفشتونا،بتعرفوشنو أنتو لي محمود اللي بعد مات جايين تتلصقو عليهو.
|
|
 
|
|
|
|
فاروق عثمان
طارق جبريل
فيس بوك
تويتر
انستقرام
يوتيوب
بنتيريست