|
|
 في رثاء محمود ... (بشارة وتذكرة وعنوان)
|
الابيات التالية كتبها الاخ / قيس الصديق نهار يوم وفاة الراحل محمود عبد العزيز ..
اللهم ارحم محمودا وانزله منزلا طيبا والهم محبيه الصبر وحسن العزاء ...
وكان صوت الولد طالع ..
بشارة وتذكرة وعنوان
وكان يا حوته ليل مغناك
جراحو وضحكتك سيان
وكان خوف الوجع منك
تنشف ريقنا بالأحزان
وترحل ليه قبل تنسج
خيوط الفكرة يا انسان
....
جرحك النديان وناشف
في كيانا وما بنقولو
غيمك السافر بعيد
كنا منتظرين هطولو
زفة اوجاعك مراسم
والحزن دقت طبولو
يعني مليتنا ومشيت
نصاب عميرك تم حولو
....
لي وين رحيلك في زمان
ليلو اطول من نهارو
والغياب يا حوته كيفن
نحن نستحمل ودارو
حوته شقيش المسير
نيلنا كيف غير مسارو
طيف غناويك اللطاف
تاني كيفن اجترارو
....
سويتا احزانك بحر
فارد مدى الايام شراع
غردت بي صوتك صهيل
والاغنيات ضي الشعاع
تيربت في الخاطر شجون
بالحسرة والخوف والضياع
لكن نسيت قبل الرحيل
يا حوته ليه .. لحن الوداع ؟
|
|
 
|
|
|
|
عمر صديق
فيس بوك
تويتر
انستقرام
يوتيوب
بنتيريست