عودنا تلفزيون السودان على الدراما من الجيران منذ زمن بعيد واى جيران؟ هم المصريين ومسلسلاتهم وافلامهم ومسرحياتهم فقط ومؤخراً سوريا وبعض دول الخليج والدراما التركية المدبلجة او الصينيه اتجاه واحد وجار واحد فقط اين دراما بقية الجيران؟
01-06-2013, 09:09 PM
محمد زكريا محمد زكريا
تاريخ التسجيل: 09-01-2009
مجموع المشاركات: 4909
عثرت على هذا المقطع فى الفيسبوك اترككم لتشاهدوا هذا المقطع من التلفزيون التشادى لداراما كوميديا وقارنوا لماذا لا يعرض تلفزيوننا مثل هذه الدراما؟ مع المقطع تظهر مقاطع اخرى يمكنكم مشاهدتها وهى رغم شح وبساطة الامكانيات الظاهرة من حيث الكاميرا الواحده(زاوية واحدة) الا انك تحس ان هنالك ابداع واضح من الممثلين والمخرج وحتى الاضاءة
اما فى المقطع التالى فقد قفزت فى ذهنى اهميه اريحية الحرية الشخصيه فى المظهر والملبس لدى الممثل حرية الفنان هل قطع التشاديين خطوات للامام بينما تتراجع فى السودان؟ خصوصاً بالنسبة للمرأة؟ مع ملاحظة نفس الحرية فى الدراما المصرية وغيرهما من ناحية المظهر والملبس
قلت نكتفى بى دراما الجيران التانيين بى دراما تشاد بس على الاقل ديل بشبهونا فى حاجات كتيرة, ولا مو كدى؟ اما دراما جيراننا ناس افريقيا الوسطى وزائير ويوغندا وكينيا واثيوبيا واريترريا ولا حتى ليبيا ما بنعرف عنها شىء نقول لانه ديل ما بشبهونا, طيب يعنى خلاااااااااااص الصينيين بقو يشبهونا
Quote: قاعد اتفرج يا مورغان جاييك بالمهلة عامك سعيد وايامك اعياد
حبيبنا والله انت, ابداً ما بتخيب الظن مورغان فريمان الخطير والبلوز ميوزيك فى حضرتك يطيب الجلوس اتخيله جلوس فى بنبر وتخلف الارجل ويتربع اليد اليسرى مرتكزة عليها اليد اليمنى فى زاوايه قائمة تسمى زاوية التصنقر والتحكر كطفلة تتابع مسرحية عرائس ويتسند الحنك على كفها مغطية جانب من الجهة اليسرى للخدين تعبيرا عن متابعة باهتمام وتشوق واندهاش من التمتع
اها راجينك نحن كمان وكل عام انت وذويك ب 1000 خير
01-09-2013, 10:22 AM
محمد زكريا محمد زكريا
تاريخ التسجيل: 09-01-2009
مجموع المشاركات: 4909
ما شفته للارتريين إلا فلم أو أتنين بالكتير _ ممكن لقلة الانتاج أو عدم متابعة مني _ مسلسل Hiwet هويت ;الكم واربعين حلقة بتصور أنو علامة في درامتهم التلفزيونية الناس عندهم تابعوا وانفعلوا بيهوا شديد لانوا قدم دراما إجتماعية أتناولت كتير من الامور المعاشة في مجتمعهم _ لو رجعت البوست حارفع منو كم مشهد _ والعجبني فيهوا أنو أتعرض لقيم المجتمعات دي بصورته الحقيقية لانو بعضنا عندوا إنطباع أنوا المجتمعات دي ما عندها محتوي قيمي قوي .... وقدم صورة لحياة المجتمع و تفشي القيم المادية والانحرافات الاخلاقية والعلاقات داخل الاسرة لما يكون رب الاسرة رجل منحرف كل وقتوا لاعمالوا ولنزواتوا الخاصة والمشاكل البتتسبب فيها نوع الحياة الزي دي ومواجهة زوجتو واسرتوا ليهوا ....... وبالجد كل الناس الظهروا في العمل ده أجادوا ادوارهم بصورة ما عادية خلت أرتريا كلها زعلانه من تصرفات دانيل البّعلق ( الصعلوك ) ومتعاطفة مع مرتوا وعيالوا
يمكن الشداني للمتابعة أكتر هويت كان مترجم للعربية حاليا بعرضوا في مسلسل ناطق بالتجري بس الترجمة تجرنجة
والقصة بتدور في إطار تاريخي زمن الاستعمار .... مع أني ما متابعوا بنفس القدر التابعت بيهوا هويت لكين المسلسل مميز جدا التصوير والديكور والمشاهد والقطارات البخارية ياخي كلها بتصور الفترة التاريخية الدارت فيها الاحداث بصورة تكاد تلمس فيها الزمن القديم بكل تفاصيلوا ....................جمالياتوا أنو بقرب الواحد من ثقافة شعوب موجودة في شرق السودان بكل تفاصيل الثقافة دي ....................... ويمكن العمل السوداني اليتيم الاتناول حياة شعوب الشرق دي كان فلم جاد الله جبارة ( تاجوج ) ........
في الاخر من متابعة لاعمال الجيران في شرق أفريقيا ( تلفزيون / سينما ) ما تقدر تقول المسألة إمكانيات إطلاقا لانو الناس ديل إمكانياتهم متواضعة لكين بعتمدوا على الموهبة والإبداع تمثيل واخراج وسناريو ملان و دي الحاجات الفي الاخر بتدي الناس أعمال بالجد تستحق المتابعة ........
تحياتي
01-10-2013, 12:03 PM
محمد زكريا محمد زكريا
تاريخ التسجيل: 09-01-2009
مجموع المشاركات: 4909
المقطع الأول مضحك وشايف الأداء فيهو تلقائية جميلة ...
الكلام يمكن شوية ما واضح ...بسبب انخفاض الصوت ...واختلاف اللهجة ..
غايتو أبو سفروق ...رقد موية تب ..هههه
تسلم ...ومعاك انتظر راي أهل المسرح و الدراما والمتخصصين ...والسني فنان وما بيقصر في الحتة دي ...
سلان اخ ابراهيم ما اعجبنى فى المقطع فعلاً هو تلقائية الممثلين وادائهم فى التمثيل ولو لاحظت الحرفيه فى انهم لا ينظرون لعدسة الكاميرا مما يدل على انهم متمكنين من التمثيل وده شىء غالباً ما يكون متوفراً فقط لفنانى المسرح من دون غيرهم من ممثلى التلفزيون والسينما حيث هنا يمكن صناعة الممثل حسب الامكانيات والمعدات من حوله
لاحظ ايضاً الجراءة فى اداء دور الشخص (الرخيان) وهذه من الادوار الممكن تكون تابو عندنا ولا يرضى ان يقوم بها ممثل سودانى حسب نظرة المجتمع للشخصية الوجودية ذات نفسها الله يرحم الفنان القدير الفاضل سعيد حيث كان المسرح السودانى لا تسوره القيود ولا تقيده المفاهيم الدخيلة
دراما الجيران من تشاد تستحق الوقوف عندها ولو ركزت شويه على اللهجة واللغه ح تلقاها عربى واضح زى لامن كنّا اول مره نسمع اللهجات الشاميه او الخليجيه وما نفهمها لكن نظل نبحلق ونتابع الى النهاية يعنى شوية شويه لو عرضوا علينا مسلسلات تشاديه برضوح تتفهم اللهجة وهى اصلاً قريبه من لهجات اهلنا فى غرب السودان
شكراً على المداخله وفى انتظار كل المهتمين
01-10-2013, 12:33 PM
Elmosley Elmosley
تاريخ التسجيل: 03-14-2002
مجموع المشاركات: 34683
Quote: محمد ذكريا تحية طيبة ,,, انا متابع لاعمال الجيران ومعليش حاخدك شرق أفريقيا لانو ما متابع لتلفزيون او سينما في غرب أفريقيا ............
العزيز عبدالناصر الخطيب بعد التحية والسلام عليك
ياخ انت اعطيت البوست شحنة من المواد الفنية الغنية واثريت البوست بما لا يعطينى مجالاً كى اقول الكثير انفراطاً من الدهشة وتحديداً كده انت تميت لى الناقصة لانه انا فعلاً ما عندى ادنى فكرة عن دراما الجيران من الشرق واعتقد وانا اقول هذا الكلام بانها اسكاندل والله وايما فضيحة لنا جميعاً يعنى ننط البحر ونتفرج فى طاش ما طاش ونخلى اهلنا وجيراننا اللى حتى مافى حيطة بيناتنا, ياخ السودانيين متزاوجيين مع الاثيوبيين والارتريين اكتر من مع السعوديين تقول لى طاش ما طاش معقول كل هذا الابداع عند اقرب الناس لينا جيرة واهل وحتى انه هنالك اوجه شبه كثيرة بيننا من حيث التداخلات الثقافية والفنية واللغوية والاثنيه الخ......والله فضيحة كبرى
مداخلاتك الاتنين ديل شحمانات وبراى ما بقدر عليهم يا ريت ناس السنى واهل الدراما يلحقونى لكن برضى ح اجيك راجع وعليك الله ما تمشى بعيد وهل من مزيد لو سمحت ظروفك يا امير؟
Quote: محمد زكريا ياحبيب ما العلاقة بين الفن والحرية ---------- سوف تتطور دول كثيرة حولنا في الابداع وسنظل نحن محلك سر الى آن يقضي الله آمرا كان مفعولا
استاذنا والاخ الاكبر يوسف الموصلى (ابوهديل) كل سنة وانت طيب وان شاءالله دايماً بخير وصحة وعافية
ياخ انت لخصت الموضوع كلف فى السؤال او الجملة القيمة ذات المعنى الكبير دى نعم هى الحرية اولاً ومن ثم سيكون كل شيء بديع وجميل غداً سيبزق الفجر بأذنه تعالى مهما طال الظلام
كن بخير يا فنان يا انسان
01-10-2013, 04:16 PM
عبد الناصر الخطيب عبد الناصر الخطيب
تاريخ التسجيل: 10-25-2005
مجموع المشاركات: 5180
ومدام سمحته لي نتكلم شوية عن سينما شرق أفريقيا الكلام لازم يبدأ بالعم هيلي جيرما
زمان لما شفته ( تيزا ) للمخرج العجوز هيلي جيرما ... بالجد أستغربته لكلاموا (( السينما الإثيوبية لم تولد بعد )) لانو حاليا العجوز ده العالم كلو تابع ليهوا sankofa (( سانكوفا )) ....
ما شفته فلموا الأخير الاتناول فيهوا الرق والعبودية في أفريقيا بس فهمته كلاموا الزمان لانو اتصورته العم هيلي جيرما ده خلاص وصل قمتوا في ( تيزا ) لكين الايام أثبتت انو الزول ده كان عوز يقول أنو أي محطة حيقدمه هو قادر يقدم محطة أفضل منها المرة الجاية
وزمان لما تابعته أبابا دسلنجة كمغنية مميزة ولما شفتها كممثلة في ( بريد مسكرام ) Sekaramu Posta كان في بالى حتجي كاى نجمة غناء بتجرب حظها في فلم خفيف بس لاكان الفلم خفيف ولا كانت مجرد مغنية بتؤدي دور بسيط كانت نجمة بحق في قصة بتشدك من بداياته لنهايته
الفيديوأغنية Nuro واعجابي بالفنانة ابابا لانها قدمت اعمال غنائية حملت المضامين والقيم الحقيقية للإثيوبين ده غير انها فعلا صوت مميز
اكيد حارجع ليك بنماذج لاعمال سينمائية أتناولت مواضيع محلية بتهم مجتمعهم ولقت متابعة واهتمام من الجيران كسينما افريقية بقت تفدم اعمال بالمسات إخراجية وجيل من الممثلين الشباب الأجادوا ادورهم واصبحوا علامات في سينما عريقة لانوا أول افلامهم الروائية كانت في الاربعينات .
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
محمد زكريا
محمد سنى دفع الله
ibrahim fadlalla
Elmosley
فيس بوك
تويتر
انستقرام
يوتيوب
بنتيريست