|
|
|
 Re: أين الخطأ فى كلمات هذه الأغنية؟ (Re: Balla Musa)
|
وبهذه المناسبة يكون مرجعنا عبد الله ودشورانى وفى مرابيع ود شورانى توجد اﻹجابة:
دعاش برق الصنراع الفي السحابة يلاوي
جاب لي رايحة مــــــن اللي هواي بتداوي
كان ما الحب صعب مــــــن الكبار وبلاوي
مافيش داعي بعد الشيب أكـــــون لها راوي
نجم النترة في شفق الحمارات غــــــزَّ
وين الشارفة لي برَّاق سحــــــابو الرزَّ
جنيبة الفارس الفوق المشمــــِّش هـــــزَّ
فرقها مُر ْ ودَّر من لساني اللـــــــــــــذة
ظميا نين ووابل الطرفة فوقنا يهطــِّل
من الخلا َّ كل عملنا صــــــــــار متبطــِّل
سيد حد الصِبا اللي عنــــاه ما بنبطــِّل
رايو معاهو يشفـــي ألمنا وللا يكتــــِّل
الجبهة أم ســـواري سحابا بيَّت مالي
برقو الرفَّ ذكــَّرني الوضيبا مخالي
فريدة ْ عصـرها وملكة دهرنا الحالي
لونا جواهــــــر الدر المزيــَّن وغالي
برق الخــــيرسان الفي السحابه بشلـــِّع
أسهر نومي زيف رهبو البيبدي مقلـــِّع
السبب المـــــــــــحرِّك نار قلوبنا تولــِّع
سمحاً لحَّ دوف جـــملي المشيهو تِدِلــــِّع
برق الصـَرفة شال تحت السحابة وختَّ
ذكـَّرني أب مرادة ً لـــــــــي أبت تتغتَّ
ظبي البي (قـَفـُـرْ مبـَّاي) سلولِن شــــتَّ
دكتور عِلـّتي اللي غــــــــــيرو مابتنفتَّ
هوا نفس العِواء الـــــبرَّاقو رعدو يصيـِّح
ذكـَّرني البيقدل وفــــــي مشيهو بميـــــِّح
يشوف رايو الفَتَق ْ جرحي اللكان مقيــِّح
يَحلِم وللا يكتـُل مـــــــــرة واحدة يريــِّح
في آخر السماك ود عينـــــــــي زاد لجليجو
ولى هوا الشِتا وعَقـَبو الخــــــريف بعريجو
فاقد لعبة المريود وحـــــــــــــــــــالي لهيجو
جرحو الفي الضمير غلـَب الطبيب هـُلــَّيجو
_____________________________
مرابيع ودشورانى منقولة من sudanelite.com كاتبها العضو خالد الخضر نستميحه عذرا ونشكره.
| |
  
|
|
|
|
|
|
|
 Re: أين الخطأ فى كلمات هذه الأغنية؟ (Re: Izzeldin B. Eltayeb)
|
شكرا يا عزالدين
فعلا
أولا مامفروض يقول الشولة لأنها عينة شتاء وباردة ومافيها مطر فى السودان إلا على سواحل البحر الأحمر..
وثانيا المفروض يختار عينة من عين الخريف الحددها ود شورانى فى رباعياته أعلاه..
وثالثا المفروض يختار الطرفة عشان فى السودان بسموها الطرفة البكاية, والزول دا ظاهر أنه بتنخج زى ودجبرين..
تحياتى ياضنين الكتابة
| |
|
|
|
|
|
|
|
|
|
Re: أين الخطأ فى كلمات هذه الأغنية؟ (Re: Balla Musa)
|
وهنا ودشورانى بقول:*
صقط الشولة نفَّ وســـــاق وكيـَّر فـُوفو
ذكـَّر قلبي أُنس الروبتو غـــــامقة كتوفو
الحامينا دون الحــــــــــــي عملنا نشوفو
أدعج وريقو عسلاً صافـي حالي رشوفو
* نفس المصدر أعلاه
| |
|
|
|
|
|
|
|
|
|
Re: أين الخطأ فى كلمات هذه الأغنية؟ (Re: Balla Musa)
|
شاعر الأغنية هو صالح عبد السيد (أبوصلاح)
الأغنية فى أكثر من مصدر تحمل نفس الكلمات:
مختارك يحاكى الشولة دمعو الهميل..
وبتتبع هذا الخطأ يمكن استنباط مكان ونشأة أبوصلاح وثقافته وارتباطه بالريف السودانى وشعرائه
خصوصا شعراء البطانة ومعرفتهم الحاذقة بالعين (كسر العين وفتح الياء) فى فصول السنة الأربعة.
إذ أن هذا الخطأ يلغى جمال تشبيهه تماما!
*طبعا هذا الخطأ لايسحب من رصيد أبوصلاح الثر الغنى شيئا..
| |
|
|
|
|
|
|
|
|
 Re: أين الخطأ فى كلمات هذه الأغنية؟ (Re: Balla Musa)
|
د. بله سلام
قبال نصل الشولة الطرفه والسارى والخيرصان
فى خطأ فى النص الوارد فى التسجيل:
المكتوب : تتملك محاسنك روحى جيل بعد جيل
الصحيح: اتمنت محاسنك روحى جيل بعد جيل
وجاييك بالمهلة لباقى النضم،،،
| |
|
|
|
|
|
|
|
|
|
Re: أين الخطأ فى كلمات هذه الأغنية؟ (Re: صديق الموج)
|
مرحب يا صديق
هذا هو النص لمن يريد مناقشته من الزملاء, طبعا انت أنا واثق أنك حافظو..
Quote: خلي العيش حرام مادام اري الموت يحل
مابين الرميش فوق لي الطريف الكحيل
هـزاز صدرو ميل فـدع الخصر النحيل
بالرجـاج يقـالع شـبه المهر الوحيل
النوم مـني فـرّ وقـلبي نـاوي الرحيل
مـن غير المنام طيف الخيال مستحيل
والاني اشتياقي وقـلبي اصبـح وجـيل
تتمـلك محاسنك روحي جيل بعد جيل
والاك الجمال يرفـع لـي قـدرك يجـل
يتمني الهلال ينصاغ لي قـديمك حجل
بنخوض الرماح لو كـان تـزيد او تقل
ونخاف مـن ضـمير الاهيف المنفـقل
بنقـابل المدافـع بالثـبات والعـقـل
ونهاب سيف عيونو اللمعو يبرق صقيل
يالمنـّك معـار تكحيل شويدن الخـميل
علمت الغصون مع النسيـم كيف تميل
مخـتارك يحـاكي الشولة دمعو الهميل
والتـختارو لي لاشـك جـميل ياجميل |
أما فى مداخلتك ماهو الصحيح تتملك أم اتمنت..
أولا ورد بالتواتر غناءا وكتابة تتملك
وفى رأيى تتملك أقوى من اتمنت خصوصا الأمر يختص بالروح
فخير أن تتملك محاسن المحبوب روح العاشق على أن تتمنى روح العاشق محاسن المحبوب.
شكرا يابحر
| |
|
|
|
|
|
|
|
|
|
Re: أين الخطأ فى كلمات هذه الأغنية؟ (Re: Balla Musa)
|
Quote:
أما فى مداخلتك ماهو الصحيح تتملك أم اتمنت..
أولا ورد بالتواتر غناءا وكتابة تتملك
وفى رأيى تتملك أقوى من اتمنت خصوصا الأمر يختص بالروح
فخير أن تتملك محاسن المحبوب روح العاشق على أن تتمنى روح العاشق محاسن المحبوب.
شكرا يابحر |
الخطأ الشايع الذى جعل الناس تغلب تتملك هو ماذكرت لان روحى هنا ليس المقصود بها
روح الشاعر، ولكن روحى مثل قولهم عيونى وحبيبى وقطعة من كبدى او صغيرى او اوه بيبى
فالشاعر يقصد يا بت كبدى اتمنت مثل جمالك كل الاجيال ، جيلاً اثر جيل،،،
| |
|
|
|
|
|
|
|
|
 Re: أين الخطأ فى كلمات هذه الأغنية؟ (Re: صديق الموج)
|
والله ياصديق أنا عارفك ضليع فى الحقيبة لكن كلامك دا تب ماوقع لى وما أقنعنى..
ليس من ناحية ماهو الصحيح ولكن من ناحية المعنى القوى للبيت..
وعندى ظن أنك لم تنظر للبيت بتجرد من انحياز للحقيبة واعلم أنها معشوقتك..
فى نفس الوقت أنا ماناقد أدبى ويبدو أننا محتاجين لحجاز يكون عندو عكاز معرفة حاذقة بشعر الحقيبة ونقدها..
المطمنى شايف الفرجونى بيقول تتملك..
وانت طبعا تعرف مكانة الفرجونى فى هذا المجال.
كدى خلينا نضع نقطة ونبدأ سطر جديد فى موضوع (يحاكى الشولة دمعو الهميل)..
تسلم ياموج
| |
|
|
|
|
|
|
|
|
|
Re: أين الخطأ فى كلمات هذه الأغنية؟ (Re: Balla Musa)
|
بله ماشين على الشوله لكن كدى النشرح ليك دى تانى
لو ان الشاعر قال : تتملك محاسنك روحى سنه بعد سنة لقلنا ان الضمير راجع لروحه
ولكانت روايتك قوية وصحيحة 100%
و لو سلمنا جدلاً انها تتملك مجاسنك روحى فكيف يستقيم المعنى جيلاً بعد جيل
عليه تكون اتمنت محاسنك روحى جيل بعد جيل هى الصواب وتكون روحى هنا
للتدليل للملهمة الفريدة التى تتمنى الاجيال محاسنها على نحو ما ذكرنا، وايضاً انا
مثلك منتظر فلا احد يملك كل وجوه الحقيقة وكذلك الحقيبة،،
| |
|
|
|
|
|
|
|
|
|
Re: أين الخطأ فى كلمات هذه الأغنية؟ (Re: صديق الموج)
|
Quote: لو ان الشاعر قال : تتملك محاسنك روحى سنه بعد سنة لقلنا ان الضمير راجع لروحه
ولكانت روايتك قوية وصحيحة 100%
و لو سلمنا جدلاً انها تتملك مجاسنك روحى فكيف يستقيم المعنى جيلاً بعد جيل
عليه تكون اتمنت محاسنك روحى جيل بعد جيل هى الصواب وتكون روحى هنا
للتدليل للملهمة الفريدة التى تتمنى الاجيال محاسنها على نحو ما ذكرنا، وايضاً انا
مثلك منتظر فلا احد يملك كل وجوه الحقيقة وكذلك الحقيبة،، |
Quote: و لو سلمنا جدلاً انها تتملك مجاسنك روحى فكيف يستقيم المعنى جيلاً بعد جيل
|
حقاً لا يفتى في أمر الحقيبة وصديق الموج في المنبر
لو روحو تملكت ( فعلاً ) ليه كايس الشراكة من الأجيال الأخرى ( جيل بعد جيل ) ؟؟
أنا غايتو كلام صديق دا أقنعني تماماً
___________
تحياتنا وسلامات يا أحباب
| |
|
|
|
|
|
|
|
|
|
Re: أين الخطأ فى كلمات هذه الأغنية؟ (Re: محمد عبد الماجد الصايم)
|
سلام ياعاطف
والله كلام صديق دا أنا مامقتنع بيه..
فالجيل هنا ليس بمعنى أناس آخرين بقدر ماهو بمعنى عدد من السنين تساوى جيل..
وانا شايف تملك أبلغ من تمنت..
وضاح يا ابنى عليك بصديق الموج ودكتور أحمد القرشى ودكتور أحمد طراوة فى هذا المجال..
محمد يا صايم
خليك قريب لحدى مانجى للشولة!
| |
|
|
|
|
|
|
|
|
|
Re: أين الخطأ فى كلمات هذه الأغنية؟ (Re: khaleel)
|
Quote: هياااا وضاح .. الظاهر عليكـ شهادة عربية!!
_
ما تلاوز .. كلنا في الهوا سوا
|
ههههههههههههههههه
لا والله ما شهاده عربية .... انت برااااك ياخوى .. لو الهواء خاص بالشهاده
ولو الهواء خاص بعدم المعرفة .. برضو اظنك برااااك 
| |
|
|
|
|
|
|
|
|
|
Re: أين الخطأ فى كلمات هذه الأغنية؟ (Re: وضاح عبدالرحمن جابر)
|
| Quote: وضاح يا ابنى عليك بصديق الموج ودكتور أحمد القرشى ودكتور أحمد طراوة فى هذا المجال.. |
سلام يا دكتور .. الظاهر غشاك الاسم .!!.. ما ابنك عمريا .. يا قدرك يا اصغر بى شوية
هههههههههههههههههههههههههههههههههههههه
عن نفسي معظم الكلمات عارفها .. لكن حبيت انو نوسع النقاش فيها شوية ... وانت عارف انو المنبر بقروهو ناس كتار .. واكيد من مراحل عمرية مختلفة وثقافية مختلفة
والان كتير من كلمات اغاني الحقيبه اصبحت غير متداولة .. لا فى الشعر ولا فى الحياة اليومية ... ناهيك عن أنها فى وقتها أيضا هى كلمات وثقافة بقعة جغرافية محدوده قد تكون غير معروفه للآخرين (من خارجها)
تحياتي
| |
|
|
|
|
|
|
|
|
|
Re: أين الخطأ فى كلمات هذه الأغنية؟ (Re: Balla Musa)
|
وجهة نظرك سليمة ياوضاح
بس أنا الحقيقة فتحت البوست مستغربا فى الشولة المذكورة مع البكا والنخجى وهى عينة صقط..
غايتو منتظر الموج يشوف لينا ليها تخريجة..
تسلم ياوضاح..
غايتو انت مسئول من عمرك لكن وضاح دا نحنا سمعنا بيه فى حلتنا سنة 1995م
| |
|
|
|
|
|
|
|
|
|
Re: أين الخطأ فى كلمات هذه الأغنية؟ (Re: Balla Musa)
|
Quote: والاني اشتياقي وقـلبي اصبـح وجـيل
تتمـلك محاسنك روحي جيل بعد جيل
والاك الجمال يرفـع لـي قـدرك يجـل
يتمني الهلال ينصاغ لي قـديمك حجل |
لحدي ما يجوا الفطاحلة
أعتقد أن رواية الأستاذ صديق أضعف
لأنه جملته ما فيها فاعل، ولو مستتر بتقدير (هن) يكون ما راجع لشيء
(اتمنت محاسنك (الحسان) ـ (يا) روحى ـ جيل بعد جيل)
فلو جاز حذف يا النداء، فماذا أنت فاعل بالفاعل
تملك المحاسن للروح يدعمه ما قبله، من موالاة الأشواق (أشواق الروح) ووجل القلب
أشواق الروح كما في (تتوق الروح لشوفاتن ** وتفرح حين موافاتن)
ويدعمه قول الشاعر ذاته في قصيدة (شوف العين قالت ده لا لا) حين قال
ريدتك سُكْن الجوف حلالها ** والأعضا امتزجت خلالها (حلالا، خلالا)
فسكن الجوف دلالة تملك الروح
أما الأجيال فأظنه يقصد مراحل عمره من شبابه إلى كهولته
أي حتى لو كبر فلن يزهد بحكم السن
| |
|
|
|
|
|
|
|
|
|
Re: أين الخطأ فى كلمات هذه الأغنية؟ (Re: Izzeldin B. Eltayeb)
|
كنت بين شد وجذب حسمه الأخ عزالدين فله الشكر
إذ كنت أفكر في إنزال مداخلة أسميتها ( مراجعة )
مراجعة إقتضتها تذكري للنقطة البالغة الأهمية التي ذكرها بذهاء كبير عزالدين وهى ( غياب الفاعل ) في البيت كما حاول شرحه صديق الموج Quote: لحدي ما يجوا الفطاحلة
أعتقد أن رواية الأستاذ صديق أضعف
لأنه جملته ما فيها فاعل، ولو مستتر بتقدير (هن) يكون ما راجع لشيء
(اتمنت محاسنك (الحسان) ـ (يا) روحى ـ جيل بعد جيل)
فلو جاز حذف يا النداء، فماذا أنت فاعل بالفاعل |
لذلك تكون ( مراجعتي ) كالتالي
أنا من أنصار ( إتمنت ) لتقرأ
إتمنت محاسنك روحي جيل بعد جيل
خلافاً لما ذكر حبيبنا ود الموج
أقول بأن ( روحي ) المذكورة هنا هى روح الشاعر وهى الفاعل للجملة
وكى نزيل معضلة ( جيل بعد جيل ) التي إستشكلت على حبيبنا الموج
أقول أن الشاعر ربما كان يؤمن بأن ( روح ) الإنسان إذا خرجت منه بسبب الموت فإنها تحل في جسد شخص آخر من ( جيل ) آخر
لذلك فإن ( روح ) الشاعر المتنقلة عبر ( الأجيال ) ظلت في حالة ( تمنى ) لمحاسن المحبوبة
ولذلك أيضاً إستخدم الشاعر - بحصافة - الفعل الماضي ( إتمنت ) ولم يستخدم الفعل المضارع ( تتمنى ) وذلك ليدلل على أن الـ فيرشن الحالية من الروح ليست الأولى إنما أول ( روح ) تمنت محاسن المحبوبة كانت في المااااااضي وهو - المحب الحالي - إمتداد لهذا
هنا أصبغ الشاعر على ( تمنيه ) صفة السرمدية وذاك لعمري منتهى البلاغة
| |
|
|
|
|
|
|
|
|
|
Re: أين الخطأ فى كلمات هذه الأغنية؟ (Re: Izzeldin B. Eltayeb)
|
رايكم شنو في التخريجة دي
بتوقع اللوم على الفنانيين وبتخارج الشاعر
ودليلها لومهم الكثير الأصلو ما بتغسّل
مختارك يحاكي الشــلاّل دمعو الهميل
فتحولت الشلاّل إلى الشولة بفعل الحفظ السماعي
الشلال >الشولال > الشولا
خاصة وأن الطرفة وإن كانت بكاّية فهي موسمية
ما بتجي مع زول والاه اشتياقو .. وكمان من جيل لي جيل
| |
|
|
|
|
|
|
|
|
|
Re: أين الخطأ فى كلمات هذه الأغنية؟ (Re: عاطف عمر)
|
مرحب عز الدين مرة تانية
وترحيب بالفنان محمود مصطفى محمود
ويامحمود تجدنى فى شوق لسماع الأغنية من بادى
يا عاطف
بالنسبة للكلمة (اتمنت) ثبتت عند أبوداود وحفيد أبوصلاح رغم أن الفرجونى ماساهل وقال تتملك
وانا مازلت أرى أن التملك أبلغ من المنى..
بالنسبة للمشكلة موضوع البوست حتى الآن ثابتة عند كل المغنيين ومنتظرين بادى ليحسمها..
ياعز الدين مع إنى عارفك قلت الكلام كمخارجة للشاعر لكن الطرفة وقعها أظرف ومعناها أبلغ فهى بكاء السماء للأرض
وتتسق مع وصف الشاعر لنفسه بالفروسية والعزة والرفعة (السماء) مع الإنكسار للمحبوب فى الأبيات السابقة. إضافة الى ذلك الشلال والبحر اعتاد الأدباء والشعراء ربطه بالدم..
واعتادوا فى المقابل ربط البكاء بالمطر..
ياعاطف
حفيد أبو صلاح جاب ليه غلطة تانية من إضافاتو
راجينا الهلاك بجرعة من سلسبيل
فأول مرة ترتبط سلسبيل بالهلاك..
فما عارف دى إضافة منه أم جزء من الأغنية أهمله الفنانون خصوصا الأبيات بها خلل فى الوزن.
| |
|
|
|
|
|
|
|
|
|
Re: أين الخطأ فى كلمات هذه الأغنية؟ (Re: Balla Musa)
|
Quote: المطمنى شايف الفرجونى بيقول تتملك..
وانت طبعا تعرف مكانة الفرجونى فى هذا المجال. |
بله يا حبيب سلام
اول شى محمود لم يذكر البيت مثار الجدل ابداً، ولا الفرجونى تعرض له
ومع اعترافنا ان الفرجونى بحر لجب فى الحقيبه الا انه فى هذا التسجيل
لم يكن حافظ للاغنية فقد جاء باكثر من خطأ، ويظهر انه لم يرددها منذ
زمن لاجل ذلك نسى مفرداتها حيث قال:
هزاز صدرو ميل فدع الخصر النحيل بالرجاج يقالع زى شبه المهر الوحيل
اول شى فى عجز البيت الاول زاد كلمة(زى)
وفى المربع الاخر قال:
بنقابل الرماح لو كان تزيد او تقل
ونهاب من الضمير الاهيف المنعقل
ونقابل المدافع بالثبات والعقل
ونهاب سيف عيون ملمع يبرق صقل
وفى هذا المربع قال بنقابل الرماح والصحيح بنخوض الرماح
واورد الاهيف المنعقل والصحيح الاهيف المنفقل
وفى البيت الاخير ايضا قال :ونهاب سيف عيون ملمع يبرق صقل
وهنا يوجد خطأ
والصحيخ ونهاب سيف عيونه اللمعه يبرق صقيل
او كما اوردتها انت مكتوبه ..
فلا ادرى من اين اتيت بان الفرجونى يقول تتملك؟
عليه رواية ابوداؤد و محمد بدوى ابو صلاح صحيحه
وانا لم اسمع تتملك هذه ابداً الا منك الان ولا اعرف اى فنان
يردد تتملك فلو كان هنالك من يرددها تتملك اتونا بها لنسمع
فانا سمعتها بصوت مرغنى المامون واحمد حسن جمعه، ومبارك
حسن بركات وبادى وابوداؤود والطيب مدثر ومجذوب اونسه ومحمد
بدوى واخرون وكلهم ينطقونها واتمنت...
اما بخصوص ذكر ابو صلاح للشولة مع انها فى السودان من عيين الشتاء وليس
من عيين الخريف ربما لان فى مصر المطر شتوى، فالفلاحين يعدون الشولة من
عيين الخريف وليس من عيين الشتاء و لان ابو صلاح جذوره من هناك ربما
سمعها من اسرته او اهله والله اعلم..
وعلى ذكر الشولة للفائدة نذكر عيين الفصول المختلفة..
عيين الخريف:
الضراع 12يوليو
النترة 26يوليو
الطرفة 9أغسطس
الجبهة 23 أغسطس
الخيرصان 4سبتمبر
الصرفة 17سبتمبر
العِواء 30سبتمبر
السمّاك 13 أكتوبر
وقالوا الخيرصان سلطان الخريف
عينة الضراع مطرها ليس كتير ولكن لو نجح فالمزارعين بزرعون فيه
النتره مطر كتير ولكن بنتر فيها الجراد والحشرات وبعض افات الزراعه الاخرى..
الطرفه مطر ما شديد بس بصب زمن طويل عشان كدا بسموها الطرفة البكايه
الجبهة وهذه عينة مطرها تقيل او غزير
بعدها بأتى الخيرسان وهذه عينه مطرها ليس بالغزير
ثم عريج وهذه اوان قلبة الخريف وتاني بمطر شديد تصحبه صواعق رعدية..
بعده الصرفة و هذه مطرها خفيف ومتفرق
بعد ذلك العوا والسماك وهذه اخر ايام الخريف يامطر أمسك كفاك ويابحر صد وراك
وهذه ما يطلق عليها اهل المدينة الشكشاكة وهى نهاية الخريف..
اما عيين الشتاء كالاتى:
(السِماك) و(الغفر) و(الزبنان) و(الإكليل) و(القلب) و (الشولة) و(النعايم).
و عيين الربيع هي:
(البُلدة) و(سعد ذابح) و(سعد السعود) و(سعد الأخبياء) و(سعد بُلع) و(الفرق المقدم) و(الفرق المؤخر).
و عيين الصيف هي:
(الحوت) و(النطح) و(البِطين) و(التِريا) و(الدبران) و(الهكعة) و(النكعة).
| |
|
|
|
|
|
|
|
|
|
Re: أين الخطأ فى كلمات هذه الأغنية؟ (Re: صديق الموج)
|
سلام ياصديق
نعم اقتنعت بأن البيت (اتمنت محاسنك روحى جيل بعد جيل) بعد أن استمعت إليها من أبوداؤد..
ونعم مختلف معك فى شرحك للبيت ومتفق تماما مع عز الدين
فالروح تنسب للشاعر ولا تنسب للمحبوب
ونعم أعطى نفسى الحق أن أقول
محاسن المحبوب تتملك روح الشاعر أقوى وأبلغ من روح الشاعر تتمنى محاسن المحبوب.
بالنسبة للشولة لم تختلف معنا, فأنا قد ذكرت أننا يمكن أن نعين مكان نشأة الشاعر من هذا الخطأ غير المقصود..
وذكرت لو الشاعر من الذين عاشوا على ضفاف البحر الأحمر يحق له أن يعتبر الشولة فصلا ممطرا..
أو كما ذكرت أنت لو عاش فى الإسكندرية وليس كل مصر..
أما هذه العين وتقسيماتها وأسماؤها فاعتقد غير جازما أنها سودانية بحتة يحفظها شعراء البطانة عن ظهر قلب..
أحب أن أضيف أن شعراء البطانة تحس فى شعرهم وكأنما عندهم خادم روحانى أو سفلى..
فقد يأتون بتشبيهات وأوصاف لم يعايشوها ولا تجانب الصواب!
| |
|
|
|
|
|
|
|
|
|
Re: أين الخطأ فى كلمات هذه الأغنية؟ (Re: Balla Musa)
|
سلامات محمود وعساك طيب
يعني منّها وجاي ممكن أستخدم ناس "نستولوجيا" وديل عادي
د.بلة شكلو "اتمنت" بقى مافي مفر منها، واستاذنا صديق كان واثق وجازم
وبالإضافة لمصادركم المتعددة ولمراجعة الباشمهندس عاطف بانه روح فاعل
لقيت ليكم دليل تاني ما كنت شايفو ساعة انحيازي لقول الشاعر "تتملك"
والاني اشتياقي وقـلبي اصبـح وجـيل *** اتمنت محاسنك روحي جيل بعد جيل
والاك الجمال يرفـع لـي قـدرك يجـل *** يتمنى الهلال ينصاغ لي قـديمك حجل
والاني > والاك ... اتمنت > تتمنى
أما حكاية الشولة دي ففعلاً تخريج "الشولال" ده ما زابط وبعيد
ويا دكتور كلامك في الطرفة والشلال سمح بالحيل
ولو حكاية الإسكندرية دي ما هي السبب
ممكن يكون السبب البحر الأحمر لكن بالجهة التانية الشرقية
لأنه العين والمنازل دي نفسها أو مع اختلاف بسيط عند العرب والسعوديين الآن
وتكون وردت في الشعر العربي حكاية الشولة دي
وتأثر شعراء الحقيبة بالشعر العربي وخاصة الجاهلي والأندلسي واضح
زي ما في "الصبا النجدي" .. من نجد بالحجاز: ألا يا صبا نجد متى هجت من نجد ....
الصبا النجدي *** زارني وحرّك وجدي *** متى يا عين بتهجدي
لو كان يا عيني تشوفي ربيبة المجدِ ** هللي واستبشري، شكراً لله اسجدي
لكن هذا محال، في الطيف لن تجدي ** أملك أضحى معلق ما بين سهيل وجدي
(لكن ده ما حيرني قدر أخت ود حبوبة لما قالت:
"هزيت البلد من اليمن للشام ** سيفك ال للفقر قلاّم ")
معقول التأثر قدر ده، والله دي يلموا ليك فيها خالد كودي ومحمد إي سليمان .. الله معاها .. ههههه
| |
|
|
|
|
|
|
|
|
|
Re: أين الخطأ فى كلمات هذه الأغنية؟ (Re: Izzeldin B. Eltayeb)
|
Quote: (لكن ده ما حيرني قدر أخت ود حبوبة لما قالت:
"هزيت البلد من اليمن للشام ** سيفك ال للفقر قلاّم ") |
عز الدين يا غواص حبابك الف
والله من شدة ما كيفتنى بتحليلك الجميل ده قررت تانى اغالطك
بى سبب ودون سبب ، ههههههههههه تسلم يازول يا شفيف..
اها امسك طبعاً قصيدة بتريد اللطام ينسبها كثير من الناس لرقية
بت امام شقيقة ود حبوبة علماً بان القصيدة لبت مسيمس، اما
قصيدة رقية بت امام لاخيها فهى قصيدة الواعى ما بوصو من
امس الضحى تورى ابزنود ساقو يا مقنع ولياته.
ايضاً يردد البعض البيت كما زكرت: هزيت البلد من اليمن للشام
ولكن كما حدثنى بعض العارفين فى التراث ان بت مسيمس قالت:
هزيت البلد واليمن والشام سيفك للفقر قلام
باعتبار ان الثلاثة دول كانت ترزح تحت الاستعمار البريطانى
السودان و اليمن و سوريا ..وان هذا الخبر زلزل المستعمر وانتشر
حتى فى كل المستعمرات ..
اها يا عز الدين بتحليلك الرائع نتمنى ان يكون ده مبحث نقاش
اخر وكتر خير د. بله فقد فتح موضوع يمكن ان تنداح منه الف
دائرة ودائرة فشكراً جزيلاً للجميع ويبقى الؤد،،،
| |
|
|
|
|
|
|
|
|
|
Re: أين الخطأ فى كلمات هذه الأغنية؟ (Re: صديق الموج)
|
الاخ العزيز / بله موسى
والمتداخلين الكرام
سلامات وكل سنة والجميع بخير
لقد لفت نظري إلى هذا البوست الأخ عاطف عمر...
وأحب أن اؤكد إن نص الأبيات المختلف عليها هي كالأتي كما ورد في
ديوان ابوصلاحفي طبعته الأولى في صفحة 2 وكذلك في ديوان ابوصلاح الطبعة الثانية سنة 1999صفحة 3
وآلاني إشتياقي وقلبي أصبح وجيل ... وإتمنت محاسنك روحي جيل بعد جيل
وآلاكي الجمال يرفع لقدرك يجل ... وإتمنى الهلال ينصاغ لقديمك حجل
*******
يا المنك معار تكحيل شويدن الخميل ... علمتي الغصون مع النسيم كيف تميل
مختارك يحاكي الشوله دمعه الهميل ... والتختاره لي لا شك جميل يا جميل
ولقد شُرحت في الطبعة الثانية كلمة الشوله بأنها المطر المتواصل البطئ أما البروفيسور عون الشريف قاسم فلقد قال بان الشولة هي منزل من منازل الشتاء يكثر فيه البرد ، والشولة عند العرب من نجوم الشتاء ويكون فيها البرد قارسا وتكثر فيها الأمطار الليلية ، والأمطار الشتوية من سمات مناخ الجزيرة العربية ومصر ودول البحر الابيض المتوسط والذي كنا نحفظ مناخه في المرحلة الابتدائية ( حار جاف صيفا ... دافئ ممطر شتاءا) ، وأبوصلاح والده مصري كان من مجموعة الكتبة والمحاسبين المصريين الذين وفدوا الى السودان وأقاموا فيه أبان الحكم التركي المصري (من تاريخ الغناء والموسيقى في السودان للكاتب معاوية حسن يس )، ولقد جاء والده الى السودان يحمل معه ثقافته المصرية ولقد تأثر بها ابوصلاح الذي عاش في البيئة السودانية كما تأثر بالثقافة التركية والانجليزية ، واستعمال كلمات غير سودانية في اغنية الحقيبة شائع مثلما قال سيد عبدالعزيز ( مسو نوركم شوفوا الجبينها صباح) ومسو كلمة تركية وغيرها من المفردات التي لا يتسع المجال لذكرها ، بل ابوصلاح يشبه ملهمته بظباء رامة ورامة منطقة بالسعودية ،و شعراء الحقيبة استدعوا واستصحبوا الملوك والأمراء العرب في شعرهم وكذلك المدن والتاريخ ،وذلك نتيجة لقراءتهم للأدب العربي وتأثرهم بالثقافة العربية بل بالثقافة الغربية ايضا كما نلحظ ذلك في اغنية سيد عبدالعزيز سيدة وجمالها فريد حينما قال ( خلقوها زي ماتريد) وماتريد ملكة جمال انجليزية وأغنية العبادي جيبولي بس قلبي الودر في قوله ( الحفله كانت حاجه بون) وبون كلمة فرنسية تعني جيد جدا او ممتاز ، ومن هنا يمكن أن نقول أبو صلاح استعمل كلمة الشوله بمعناها المصري او العربي والذي اكتسبه من ثقافة والده المصري الجنسية .
أما كلمة (أتمنت )فالفنان كرومه عند تسجيله للأغنية في الإسطوانات تغنى بها كما وردت في الديوان وكذلك ميرغني المامون وأحمد حسن جمعه تغنوا بها عند تسجيلها للإذاعة كما وردت في الديوان، وأيضا سجلها لبعض البرامج الإذاعية الفنان بادي محمد الطيب ومبارك حسن بركات بنفس النص الوارد في الديوان ، ولم يغير الفنان ابراهيم الكاشف من نص الاغنية عندما سجلها لإذاعة ركن السودان بمصر بمرافقة اوركسترا مصرية ، وأجدني متفقا مع الأستاذ صديق الموج في شرحه للبيت حيث شعراء الحقيبة يستعملون كلمة روحي للحبيبه حيث قال الشاعر عبدالرحمن الريح ( ياروحي أنصفني) وابوصلاح في بعض الأحيان يبدل في الكلمات حتي يستقيم الوزن دون مراعاة لقواعد اللغة العربية مثلما قال في اغنية من قليبو الجافي ( النسيم يتردد عامل استمحان ) ويقصد باستمحان كلمة امتحان والشيخ محمد ود الرضي اجبرته القافية والوزن الشعري على تبديل حروف بعض كلمات اغانيه مثلما قال في اغنية من الأسكلا وحلا ( يا قلبي الطفش وفشا الما اليتو ينكفشا ) اي ينكشفا .
ولكم الشكر الجزيل
| |
|
|
|
|
|
|
|
|
|
Re: أين الخطأ فى كلمات هذه الأغنية؟ (Re: Ahmed al Qurashi)
|
| Quote: اغنية سيد عبدالعزيز سيدة وجمالها فريد حينما قال ( خلقوها زي ماتريد) وماتريد ملكة جمال انجليزية |
ماتريد ليست ملكة جمال إنجليزية بل هى زوجة ملك اسبانى شهيرة...
سيد عبدالعزيز حين كتب (خلقوها زى ماتريد ) شأن شعراء جيله لعب بالمفردة على سبيل التورية (معنى ظاهر قريب ومعنى خفى بعيد ) ومفردة ماتريد هنا تقرأ بلاغيا ( كما تحب او تشاء) ببمعنى ان الملهمة تم خلقها كما تتمنى وتريد وهنا مكمن عبقرية شعراء الحقيبة فى ترك الحبل على الغارب للتأويل عبر سحر اللغة
| |
|
|
|
|
|
|
|
|
|
Re: أين الخطأ فى كلمات هذه الأغنية؟ (Re: احمد الامين احمد)
|
Quote:
ماتريد ليست ملكة جمال إنجليزية بل هى زوجة ملك اسبانى شهيرة...
سيد عبدالعزيز حين كتب (خلقوها زى ماتريد ) شأن شعراء جيله لعب بالمفردة على سبيل التورية (معنى ظاهر قريب ومعنى خفى بعيد ) ومفردة ماتريد هنا تقرأ بلاغيا ( كما تحب او تشاء) ببمعنى ان الملهمة تم خلقها كما تتمنى وتريد وهنا مكمن عبقرية شعراء الحقيبة فى ترك الحبل على الغارب للتأويل عبر سحر اللغة |
الأخ العزيز / أحمد الأمين أحمد
سلامات
وكل سنة وإنت طيب
لم أقرأ كثيرا عن زوجات الملوك الأسبان أو ملكات الجمال البريطانيات ،ولا أعرف عنهم الكثير ولكنها معلومة أستقيتها صدفة من بعض المهتمين بالحقيبة وأصدقاء الشاعر سيد عبدالعزيز ومنهم الشاعر الراحل قاسم عثمان بريمة والذي جلست معه كثيرا وأخذت منه الكثير من قصص أغاني الحقيبة وهو من المعاصرين لشعرائها، وكذلك الاستاذ النور عثمان حميدة أمد الله في ايامه وهو من اصدقاء الشاعر سيد عبد العزيز والذي عاش معهم فترة طويلة في مدينة الأبيض ، وأيضا العم عوض مكي عوض أطال الله عمره وهو من سكان حي المسالمة وصديق للشاعر سيد عبدالعزيز , ولقد أستمعت الى الفنان الراحل بادي محمد الطيب يقول أنها ملكة جمال بريطانية ،وكثيرا ما تداولنا معاني كلمات هذه الاغنية في منتدياتنا بدار الغناء الشعبي بامدرمان في بداية التسعينات بحضور الفنان بادي وعلي مصطفى وحسن الامين وجباره محمد النعيم وغيرهم من المهتمين باغاني الحقيبة ،ولم يقل أحد منهم أن سيد قد أفصح لهم وقال ان ماتريد زوجة ملك اسباني ، لكني استمعت منهم انها ملكة جمال بريطانية والبعض قال ملكة جمال إغريقية ، ولم نكن نختلف او ندقق في من هي (ماتريد ) ولكنها معلومة يذكرها البعض عرضا قد نقف عندها او لا نقف لانها ليست بالشئ المهم . ولكن بعد المعلومة التي ذكرها شخصك الكريم يمكننا أن ندقق عن من هي ماتريد ,وهل تلك الملكة التي ذكرتها هي ما يقصدها الشاعر سيد عبدالعزيز ، ذلك يتطلب مزيد من البحث والتوثيق والمصادر. وماتريد ليست مريا حتى نختلف فيها كثيرا .
هؤلاء الذين ذكرتهم عزيزي احمد اخذت منهم الكثير من قصص ومناسبات أغاني الحقيبة يمكن ان يكون بعضها خطأ وبعضها صواب ولكني سأرويها كما سمعتها عنهم بكل صدق وأمانة وأقول وجهة نظري بكل شفافية اذا كانت لا تتفق معهم بعد التحقق من المعلومات .
عزيزي احمد
لم اتعب نفسي في البحث عن من هي (ماتريد) او عن اسماء زوجات الملوك الاسبان في بداية القرن الماضي ، إحتمال أن تكون ملكة جمال بريطانية او زوجة ملك أسباني أو إمراة إغريقية كما يقول البعض أو غيرها ولكن ما يهم انها كانت إمرأة جميلة وفاتنة لذلك شبه الشاعر سيد عبدالعزيز محبوبته بها، وأحب أن اقول ان هؤلاء الشعراء كانوا اصحاب ثقافة عالية وقراءة واطلاع إنعكست في شعرهم ، ودائما اخي أحمد الشعراء لا يفسرون قصائدهم او معانيها الا نادرا وما زال الجدل قائما حتى الان من هي زهرة روما التي تغنى لها خليل فرح أو جنسية مريا لصلاح احمد ابراهيم .
لك كل الود والتقدير
| |
|
|
|
|
|
|
|
|
|
Re: أين الخطأ فى كلمات هذه الأغنية؟ (Re: احمد الامين احمد)
|
الشلاقة تطير
بعد إكتمال حضور الفطاحلة ود الموج وود القرشي
لا يبقى أمامي إلا لملمة ( درابي ) والإتجاه لمساطب المتفرجين
سوف نقيم حضوراً ومتابعة
ورفعاً للبوست كل حين
خاصة وسيدنا بكري قدس الله سره قد ( شحتر ) الصفحة ومحقها محاق السواد
________________
د. أحمد يا عزيز
لو شفت لينا بالمرة شرح ( جيل بعد جيل ) الواردة في البيت
إتمنت محاسنك روحي جيل بعد جيل
تكون تميت لينا الشغلانية
| |
|
|
|
|
|
|
|
|
|
Re: أين الخطأ فى كلمات هذه الأغنية؟ (Re: عاطف عمر)
|
تحياتى لكل المتداخلين
دكتور أحمد القرشى
أستاذ أحمد الأمين أحمد
يظل كما قال أستاذ أحمد السؤال قائما وهو أين الخطأ؟
والخطأ يصبح خطأ عندما ننظر له من قاعدة محددة وهى عين الخريف..
فثبت أن الشولة ليست من عين الخريف
ولانستطيع أن نقول أن أبوصلاح أجبره وزن البيت ليفرض عليه الشولة
لأن البيت يمكن يكون موزونا هكذا:
مختارك يحاكى الطرفه دمعو الهميل
دكتور أحمد ذكرت أن كثير من شعراء الحقيبة أجبرتهم القافية
يهمنى هنا كلمة أجبرتهم..
فالشعراء عموما وشعراؤنا فى البطانة يعتبرون ذلك ضعفا فى الشعر..
تجد ذلك فى أغنية زمانك والهوى اوانك
يختم الشاعر بيت بعينانك, ودى مامستقيمة لافى اللغة العربية ولا فى العامية السودانية .
طبعا رغم كل هذا الكلام تظل الحقيبة حبيبتى الأولى فى الغناء السودانى هذا
لو ألبسها كرومة الرحط والقرباب أو ألبسها عاصم البنا بنطلون جينز اسكنى..
| |
|
|
|
|
|
|
|
|
|
Re: أين الخطأ فى كلمات هذه الأغنية؟ (Re: Balla Musa)
|
Quote: د. أحمد يا عزيز
لو شفت لينا بالمرة شرح ( جيل بعد جيل ) الواردة في البيت
إتمنت محاسنك روحي جيل بعد جيل
تكون تميت لينا الشغلانية |
الأخ العزيز / عاطف عمر
سلامات
شعراء الحقيبة يستعملون كلمة جيل كثيرا حيث قال الشاعر عمر البنا في أغنية نعيم الدنيا..
ليك حق في صدودك و تيهك و تدليلك
ليك حق تهجرني ... و يكتر تعليلك
ما دام حسنك فردي ... وعلى جيلك
تمتاز بالعفه المانعني أجيلك
وكذلك قال في أغنية يا خلاصة حسن الغانيات في ام در...
يا غالي قدر على كل الجيل حسنك يندر
ظلموك لو شبهوا نور محيك بالبدر
اوقارنوا بسمة فاهك بليلة القدر
و الشاعر إدريس جماع فقد جمع كلمة جيل في أغنية صوت من وراء القضبان قائلا ...
خطوبٌ لو جهرتُ بها لضاقت
بها صورُ البيانِ وضاق شعري
جهرتُ ببعضها فأضاف بثّي
بها ألماً إلى آلام غيري
كأني أسمع الأجيالَ بعدي
وفي حَنَقٍ تُردّد هولَ أمري
اما أبو صلاح فيقصد أن الأجيال المتعاقبة تتمنى محاسن ملهمته ،
وكلمة روحي أدخلها في وسط الأغنية للوزن الشعري والتأكيد ،
لان الضمير الذي يرجع لها أضافه في كلمة إتمنى ولكن بنطق عامي لا يتقيد بقواعد اللغة
ولك كل الود
| |
|
|
|
|
|
|
|
|
|
Re: أين الخطأ فى كلمات هذه الأغنية؟ (Re: Ahmed al Qurashi)
|
شكراً أخي صديق على تصحيح المعلومة بشأن الشاعرتين
لكن رواية "هزيت البلد واليمن والشام سيفك للفقر قلام"
دي ياها الشـلال الثاني ذاتو
أولاً وزنها عايز مد كثير عشان يلفق
ثانياً نظرت في الوكيبيديا فلقيت إنه حركة ودحبوبة واعدامه كان في 1908م
وفي الوقت ذاته وقبله لسنوات وبعده لسنوات كانت سوريا واليمن تحت الخلافة العثمانية إلا ميناء عدن
أما أفريقيا فمن أعلاها لي أدناها مستعمرة انجليزية في شريط يمر عبر السودان
ثالثاً بادي غناها زي ما هي، وزول واحد غنى الرواية دي مافي
فالزولة دي قطع شك عايشة بي "روح واحدة في جسدين" رغم البين
بالمناسبة شاعر "منقو قل لا عاش من يفصلنا" ده منو
لاحظت معاي إنو قال "نحن روحان حللنا بدنـا"، يعني عكس الفوق تماما
ده تنبوء بالإنفصال ده هسع ولا دعوة للوحدة، يعني توأم سيامي حلّو شنو غير الإنفصال
إن شاء الله بعد شوية الناس تنسى قصيدة الزول ده ويغنوا
أجسامنا ليه جسمين *** وروحنا واحدة وكيف اتقسّمت قسمين
| |
|
|
|
|
|
|
|
|
|
Re: أين الخطأ فى كلمات هذه الأغنية؟ (Re: Izzeldin B. Eltayeb)
|
تحياتي د. أحمد القرشي والأستاذ أحمد الأمين
شرحك يا د. أحمد أعادنا لنقطة الفاعل المجهجه، فلو كان النص كما كتبته أنت
وآلاني إشتياقي وقلبي أصبح وجيل ... وإتمنت محاسنك روحي جيل بعد جيل
فلو الفاعل "جيل" كما في شرحك لجيل بعد جيل، كان قال "وايتمنى" ومافي داعي لتاء التأنيث
ولو التاء مثبتة وهي متعلقة بروحي اللي هي فاعل التمني، تكون ما شرحت جيل بعد جيل
أها داير أجيك لـ "سيده وجمالها فريد ** خلقوها زي ما تريد"، تعرف دي بتدعم إنه أبوصلاح جاب الشولة
دي من شرق البحر الأحمر وإنه شعراء الحقيبة متأثرين بالعرب وليس الغرب
أعتقد إنه كلام الأستاذ أحمد أمين اقرب وأنه قصد الشاعر سيد عبدالعزيز ما تريد أي ما تشاء
وفي قرائن بتؤكد ففي صدر البيت يقول أن "جمالها فريد" أي ما ليهو مثيل
فكيف يكون المثيل طوالي في العجز، وده في مطلع القصيدة طوالي
وتاني بيكررها وبيقول "يا من جمالها فريد" ده للتأكيد
يعني ما ليها مثيل لكن هي زي ملكة وين كده .. ما ممكن
إذن من أين أتت قصة ملكة اسبانيا أو ملكة الجمال دي
وكيف يعرفها الشاعر سيد عبد العزيز بس وباقي الناس لي زمنا ده يختلفوا فيها ومافي زول عارفها
وخاصة الجماعة اللي ذكرت إنهم عاصروه وهو توفي قريب في منتصف السبعينات على ما أعتقد
هل هو خوف من "المعهديين" إنهم يزندقوا، وهل كان لشعراء الحقيبة عبدالحي يوسف ـهم
كدي عاين البيت التاني ده من قصيدة حسان بن ثابت
وأحسن منك لم ترَ قطُّ عيني *** وأجمل منك لم تلدِ النساءُ
خلقتَ مبرأً من كلّ عيبٍ *** كأنّك قد خُلقتَ كما تشاءُ
لاحظ أن شاعر هذه القصيدة هو حسان شاعر الرسول صلى الله عليه وسلم
فالفرق بين بيت حسان وبيت أبي صلاح إذن هو في حذف أداة التشبيه "تشبيه تمثيل"
ودي أصلاً ما بيناتنا قاعدين يحذفوها طوالي وحذفها صحيح
أها إذن
إنه لو البيت لي حسان أو ما ليه، ولو فيه كفر ولا ما فيه
أبوصلاح أخذ المعنى بحذافيره، وسودنه
طيب ليه طلعت قصة الملكة ماتريد دي، عشان ما يقولوا
أبوصلاح "أخذ" المعنى من شاعر قديم ، وشنو يعني ما يقولوا ليهم
هل غادر الشعراء من متردمِ
| |
|
|
|
|
|
|
|
|
|
Re: أين الخطأ فى كلمات هذه الأغنية؟ (Re: عاطف عمر)
|
يا هندسة ما في مساطب ملح
لازم ندفر معاهم الجماعة ديل عشان يطلعوا الدرر
أنا خايف د. بلة يكون خلى "الشولة" وعمل نقطة بوست جديد
و"أنا أنا في التمني" الفوق ده غايتو ما مقتنع بـي
"روحي" زائدة كمان معاها "أجيال" ناقصة
طيب ما يبدلها بيها أو بمعناها مما يحفظ الوزن
واتمنت محاسنك أجيال جيل بعد جيل
أو كده
عدم التقيد باللغة شذوذ القاعدة عندهم ويعد عيباً
وما ممكن تاخذ بيه في تفسير المعاني
يعني ممكن تلقاه زي ما قال د. بلة في
"هاروت سحره مأخوذ من سحر عينانك" بدل عينينك
ودي الممكن ـ لو الشاعر ما لاوى إنه صاح ـ يقولوا عليها
خطأ إعراب ولغة لكن جمال المعنى غطى على خطأ المبنى
ويمشوها ليه لأنه شاعر كبير
| |
|
|
|
|
|
|
|
|
|
Re: أين الخطأ فى كلمات هذه الأغنية؟ (Re: صلاح النصري)
|
عز الدين
هنا فى المقتبس من كلامك:
| Quote: "هاروت سحره مأخوذ من سحر عينانك" بدل عينينك |
الخطأ مافى النحو مجرورة أو مرفوعة
الخطأ فى أننا لانقول عينانك أو عينينك بل نقول عيناك أو عينيك وهذا يستوى فى الفصحى والعامية.
أخونا صلاح النصرى
مرحب بيك والبوست نور
كلامك:
| Quote: تنهمل وتنهمر دموعه من الوجد والهيام حتي وأن أدعي أنه شولة لا تمطر |
لايستقيم مع البيت نفسه فالبيت يتحدث عن تشبيه (يحاكى) الشولة دمعو الهميل..
بعدين الجغرافيا والتاريخ مهمة جدا فى بناء الشعر لأنها تؤثر على ثقافة الشاعر وذخيرته اللغوية..
على بن الجهم عندما كان بدويا قال:
أنت كالك لب فى الوفاء بالعهد وكالتيس فى مقارعة الخطوب
ولما استقر فى الرصافة فى بغداد وتمدن وتحضر قال:
عيون المها بين الرصافة والجسر جلبن الهوى من حيث أدرى ولاأدرى
أنظر الى تأثير المكان عند شعراء الأندلس مقارنة بشعراء الشام أو الجزيرة العربية..
ودشورانى مثلا فى البادية وصف بعيره:
جملى وركى ماضاغط عليه ولاح
سرعو خفيفه من الطير نقاصو جناح
وعندما جاء المدينة وشاف التاكسى قال متذكرا جمله:
التكسى البلف بى شارع الاسمنتى
هرعى المتلو يامخلوفتى منو ازمنتى
والأمثلة كثيرة.
تسلم يا الحبيب وخليك قريب البوست بوست ونسة دقاقة
وبركة الجابك وجاب عز الدين وكل الضنينين بالكتابة.
| |
|
|
|
|
|
|
|
|
|
Re: أين الخطأ فى كلمات هذه الأغنية؟ (Re: Balla Musa)
|
هووووووى اللية دى جابت ليها تماسيح كبااااااااااااااااااااار
طوبة ما مريحه الموضوع داير ليه برش عديل عشان الزول كان
تعب منه جناح الصنقير فى الرقدة يزيد فالبرش بكون اريح متكأ
النصرى وعز الدين وعاطف سوا سواتكم امانه مى سمحه بلحيل
لا احد يملك كل الحقيبة كما قلنا وإنا معكم لدافرون
سلمتم ودكتور القرشى وصاحب البوست،،،
| |
|
|
|
|
|
|
|
|
|
Re: أين الخطأ فى كلمات هذه الأغنية؟ (Re: صلاح النصري)
|
الحتة دي في زول هبشا؟
Quote: ونهاب سيف عيونو اللمعو يبرق صقيل
|
معقول ابو صلاح بي جلالة قدرو يقول كدي يا دكتور بله؟؟؟
قبل هذا البيت مباشرة كان الشاعر يتحدث عن مجموعة صفات
لذلك الصحيح كما سمعته ويتماشي مع ما قبله من ابيات كالتالي:
ونهاب سيف عيون إن لمعو يبرق سهيل..
هنالك كذلك بعض الاخطاء الاخري التي لاحظتها علي عجل وسأعود حتما
| |
|
|
|
|
|
|
| |
Balla Musa
محمد عبد الماجد الصايم
Izzeldin B. Eltayeb
صديق الموج
عاطف عمر
وضاح عبدالرحمن جابر
khaleel
Mahmoud Mustafa Mahmoud
Ahmed al Qurashi
احمد الامين احمد
صلاح النصري
nazar hussien
فيس بوك
تويتر
انستقرام
يوتيوب
بنتيريست