|
|
 ...انت للضُرُس عرديب..
|
سنة 1995 كنت اعمل عند شركة كندية فى فانكوفر على الساحل الغربى من كندا....
الشركة تقدم خدمات منزلية ....ذهبت يوما الى احدى المنازل .
استقبلتنى صاحبة المنزل وهى من اصول صينية بحميمية غير عادية كانها
فوجئت بقدومى
وبدات انزل فى الكرور بتاع الشكل .......
بدانا اتناول اطراف الحديث مع صاحبة المنزل .....
فاجاتنى بسؤال لم اتوقعه اطلاقا ....
سالتنى لماذا انتو السود سنونكم بيضاء؟
راسى بدا يودى ويجيب والسيدة تنظر الى بتشوق فى انتظار الاجابة ,,,,,
ببلادة غريبة لم اعهدها فى نفسى اجبت لاننا لاناكل حلاوة كتير,,,
السر وراء هذه الاجابة المذهلة اننى عند تلقى السؤال لم اكن افكر
كثير فى السنون .....بل كنت افكر فى من يقف وراء السنون ,,,,
الضرس ....
|
|
  
|
|
|
|
|
|
|
|
Re: ...انت للضُرُس عرديب.. (Re: النصرى أمين)
|
لا تستطيع الكلمات ان ترسم التعابير التى ظهرت فى وجه
هذه السيدة عند سماع اجابتى على سؤالها الذى ظلت تنتظر
الاجابة عليه لسنوات طويلة حتى تحقق املها بظهور رجل اسود
على عتبات بيتها...... رجل اسود ...بيض سنونه ..
| |
|
|
|
|
|
|
|
|
|
Re: ...انت للضُرُس عرديب.. (Re: النصرى أمين)
|
النصري سلامات
الغريبة في الويكند الفات لقيت في القروسري العرديب ظاتو مكتوب عليهو (West Indian Tamrind).
ما صدقت طوالي شلت منو كيسين و هاك يا عصير عرديب لمدة اسبوع.
دحين قلت لي كمان للضروس علاج حأمشي اجيب كيسين تاني و ابقيهو حلاوة حربة
| |
|
|
|
|
|
|
|
|
|
Re: ...انت للضُرُس عرديب.. (Re: Mahjob Abdalla)
|
مهجوب يا هبييب
العرديب براهو والتمرهندى براهو ...
لكن اظنهم ولاد عم ......
انا سبقتك فى حكاية ال West Indian Tamrind
اشتريتو فى رمضان واخر مزة بالليل ...حاجة جميلة جدا لكنه
ناشف شوية وما بشبه التمرهندى بتاع بلدنا ......
اهلنا زمان اكتشفو العرديب علاج للضرس
اللاحقين من اهلنا لم يسيرو فى نفس الدرب
وعملوه عصير للكيف والمزاج
| |
|
|
|
|
|
|
|
|
|
Re: ...انت للضُرُس عرديب.. (Re: Mahjob Abdalla)
|
النصري..حبابك يا صديقي
قاعد اشتريهو مرات كده من السوبر استور..اها الحيكومة مرة سألتني: العرديب ده قاعد تجيبو من وين؟..و بحسن نية قلت ليها السوبر استور..و عينك ما تشوف الإ النور..!!
انعدم تماما..عارف ليه؟..
لأنو برضك عندو علاقة بصحة الشعر كمان..و الله اعلم..
و لكن الأخطر شديد زيت اللالوب..!
كبر
| |
|
|
|
|
|
|
|
|
|
Re: ...انت للضُرُس عرديب.. (Re: Kabar)
|
| Quote: و لكن الأخطر شديد زيت اللالوب..! |
ود ابا
اليومين شايف البورد بقي كلو اعشاب
شايف في زول تاني برضو و باين عليهو من اندنا هنا قايم بالضريسة
اها ورينا خطورة اللالوب شنو عشان ما يتلخبط لينا الاختصاص
| |
|
|
|
|
|
|
|
|
|
Re: ...انت للضُرُس عرديب.. (Re: Mahjob Abdalla)
|
سلامات النصرى ...
فعلاً ال TAMARIND أو ال TAMARINDO
باللاتينى ليس هو العرديب , العرديب
حامض , أما تمر الهندى موجود بكثره بمناطق ال WEST INDIANS
و ال CARIBBEAN LATINOS .......
عبدالماجد
| |
|
|
|
|
|
|
|
|
|
Re: ...انت للضُرُس عرديب.. (Re: النصرى أمين)
|
هسع يا النصري انت متأكد ان العرديب بيعالج آلام الضرس والأسنان؟ واذا كنت عاوزة اشتري العرديب ده هنا في امريكا نقول شنو اسمه بالانجليزي؟ وفي ياتو نوع من الدكاكين بنلقى فاكهة السودان .. وهل فعلا الأشجار البنتج العرديب موجودة في غرب السودان بكثرة؟ وكمان مرة واحدة ادينا فكرة عن فوائد تانية للعرديب؟
معليش كترت ليك الأسئلة؟
والله يديك العافية
| |
|
|
|
|
|
|
|
|
|
Re: ...انت للضُرُس عرديب.. (Re: اميرة السيد)
|
| Quote: واذا كنت عاوزة اشتري العرديب ده هنا في امريكا نقول شنو اسمه بالانجليزي؟ |
غايتو قطع شك يا اميرة انا اشتريتو الويكند الفات في تورنتو (يا هو ظاتو العرديب بتاع غرب السودان)
مكتوب ليهو:
West Indian tamrind
From No Frills grocery in toronto
| |
|
|
|
|
|
|
|
|
|
Re: ...انت للضُرُس عرديب.. (Re: النصرى أمين)
|
سلام عبدالماجد
الاسم tamarind قريب جدا للاسم العربى تمرهند ولكن حسم منطق
محجوب انه هو نفسه العرديب ..وده بخلينى ارجع للمربع الاول البديت
منه ... هل هو تمرهند حسب الاسم الرسمى او هو عرديب ....
وهل عصير التمرهند قريب من عصير العرديب ....
على كل دى حاجة جانبية ظهرت فى البوست (بسبب مهجوب)
موضوع البوست لسه ما جينا ليهو .....
الضرس
العرديب
الطب القديم
وعبدالرحمن النجومى
| |
|
|
|
|
|
|
|
|
|
Re: ...انت للضُرُس عرديب.. (Re: النصرى أمين)
|
سلام اميرة
غايتو اسئلتك دى لو جابو د عبدالله الطيب ما يقدر يجاوب عليها .....
كل محلات سوبر استور ونوفريلز وزيهيرز تبيع التمرهندى ده..هو بصراحة ممتع لكن
messy لان حبوبه السوداء كتيرة جدا....
قبل كم يوم كنت اردد لاغنية تراثية للفنان محمود على الحاج وهو واحد
من فنانى المفضلين ....
الاغنية تحكى عن البطل عبدالرحمن النجومى الذى استشهد فى 1889 (حسب مواقع الانترنت)
معنى ذلك ان الاغنية غالبا اتكتبت فى تلك الفترة ديك (اكثر من 120 عاما)
الشعر طبعا تصوير للحالة البعيشها الانسان (او المجتمع)
توقفت كثيرا فى المقطع الذى يقول """"اسمك فى الرجال عمسيب وانت للضرس عرديب""""
مع اننى لم افهم ماذا يقصد بعمسيب الا اننى توقفت عند حكاية الضرس دى .....
هل نفهم ان العرديب كان علاج لالام الضرس ؟ اذا كان الامر كذلك لماذا توقف الناس عن
ذلك....
حقيقة ...قعدت افكر ....ما الذى جعل الشاعر يمتدح البطل النجومى واصفا له كالعرديب
للضرس .... ربما كان يستعمله الناس كحشوة لملء الفراغ .. او كمطهر ...ان هناك شئ
جعل الشاعر لا يتردد عن وصف النجومى بالعرديب ,,,,
ماهو
| |
|
|
|
|
|
|
|
|
|
Re: ...انت للضُرُس عرديب.. (Re: النصرى أمين)
|
اميرة..حبابك يا صديقة
نحاول نجاوب على بعض اسئلتك..
العرديب:
ناس علم النبات قاعدين يسموهو:
Tamarindus Indica L
و ياهو الإسم القالوا اخونا محجوب (تمرهندي)..و ده الإسم التجاري..
و الموجود في الأسواق هنا في نورث امريكا هو الثمرة..و ثمرة العرديب تتميز بطعم حامض (احيانا مخلوط بطعم عسل شوية)..!
اهلنا في السودان ، خصوصا غرب كردفان (دي من تجربتنا المعاشة) يستخدمون العرديب لأغراض طبيه منها معالجة تسمم الطعام (عصير عرديب ممكن يحسم المسالة بالضربة القاضية)..و يستخدم لأوجاع الضرس..و من التجربة يدق/يطحن صفق العرديب (نظام معجون)..و يوضع في الضرس البيوجع..و الألم بيزول..
هناك شجرة اخرى و تستخدم في علاج التسوس (اسنان)..و اهلنا قاعدين يسموها العفينة/العفين..و ناس علم النبات بيسموها..
Acacia nubica Benth
و دي ممكن تقلي صفقها و تجعل دخان الصفق في فم المريض..او ممكن تمضغ اللحاء..و بيتم علاج السوس..
بالنسبة للداكين هنا (كندا).. سوبر استور..و كل الدكاكين الصينية..و الإسم ياهو الكتبو اخونا محجوب..
نعم اشجار العرديب تكثر في غرب السودان..كردفان و دارفور..خصوصا الأجزاء الجنوبية..و هناك في الثقافات المحلية هناك اسطورة رائجة ان الجن يسكن شجر العرديب و يبني فيها بيوته..و الممارسة هناك كل من عبر تحت شجرة عرديب يقول (بسم الله الرحمن الرحيم..و اعوذ بالله من الشيطان الرجيم)..وهذا لا يحدث عند المرور تحت الأشجار الأخرى..حاجة تانية.. الناس هناك لا تجلس في ظل شجرة العرديب الإ اذا كانت مضطرة..و في ايام الشهادة السودانية كان استاذنا لمادة الأحياء .. الأستاذ سلطان محمد سلطان.. قدم تفسير علمي لحكاية ندرة الجلوس أو النوم تحت شجرة العرديب.. لأن الشجرة تطلق نسبة عاليه من غاز ثاني اكسيد الكربون..و يصعب استنشاقه لمدة طويلة و يؤدي للإختناق..وربما الموت..و عند حدوث مثل هذه الحال الأسطورة الشعبية تفسرها بان الجن هو من قتل الإنسان..اضافة لذلك.. مافي زول في مناطق المسيرية (ضواحي لقاوة و الفولة).. ممكن يعبر تحت شجرة عرديب في لحظة المغيب..ناهيك عن الليل..و هنا اتفق كثيرا ما تفسير استاذنا سلطان الله يطراهو بالخير..!
هناك نبات طفيلي.. اسمه المحلي (ام عنبة)..و يوجد في اشجار كثيرة في مناطق غرب كردفان..و يندر في شجرة العرديب..و ناس الطب الشعبي..خصوصا الفكي.. يستخدمه لأمور معينة..(مافي طريقة نشرحها هنا)..
جامعة الخرطوم.. خصوصا كليات العلوم ، الصيدلة ، الزراعة..عندها بحوث كثيرة للغاية عن الأشجار الطبية في السودان ..و اجرت مسوحات لكل مناطق السودان..و هناك دراسة خاصة بمثل تلك الأشجار عن منطقة غرب كردفان..و نشرت 2009..لو لقيت الرابط بتاع المجلة ح ارفقو هنا..
الخلاصة العرديب يستخدم لعلاج التسمم بالطعام و ايضا لعلاج وجع الضرس..
كبر
| |
|
|
|
|
|
|
|
|
|
Re: ...انت للضُرُس عرديب.. (Re: Kabar)
|
محجوب.. حبابك يا صديقي..
الهجليج..
ناس علم النبات قاعدين يسموهو:
Balanites aegyptica
في غرب كردفان عندنا ليهو استخدامات كتيرة:
اللحاء: صابون غسيل للهدوم..
الصفق: ممكن تعمل منو عصير لعلاج الملاريا..
الثمرة: فيها ثلاث طبقات:
الخارجية: مثل بتاعة العرديب..و اسمها ام كمكمه..و هي مفيدة..
الوسطى: و حبوباتنا بعملنا منها حاجة اسمها السرنوية (قريبة من القمردين)..
الثالثة: الحبة و تسمى الفصاء..و حينما تفلقها تجد فيها جوهر الثمرة..و قاعدين نسميهو (ام كرناكة)..و هذه يعمل منها زيت اطيب من زيت الزيتون..
الهجليج يستخدم لعلاج امراض الكلي..و اوجاع المثانة..
اما الزيت..مافي طريقة نحكي عنو هنا..
بالنسبة لموضوع الضريسة.. صحيح..و لكن الشجرة المعروفة في غرب كردفان ، شجرة نادرة اسمها ام سروج..
ناس علم النبات قاعدين يسموها:
Prosopis Africana
و تستخدم لمعالجة العجز الجنسي..
كبر
| |
|
|
|
|
|
|
|
|
|
Re: ...انت للضُرُس عرديب.. (Re: Kabar)
|
الأصدقاء.. عبد الماجد و النصري.. حبابكم
العرديب و التمر هندي .. اقرباء..و من نفس المجموعة..وفعلا يا عبد الماجد العرديب حامض..
استخدام اسم التمر هندي.. يتخيل لي تجاري اكثر من علمي..
و ما عندك مشكلة يا النصري لو لقينا طريقة نديك شوال دليب كامل..و شفتو تقريبا في واحد من اسواق الصينين في ساوث ويست..!
اها بعد شوية يجوا يقولوا لينا الدليب جوز هندي..!!!
كتر خيرك يا النصري..
كبر
| |
|
|
|
|
|
|
|
|
|
Re: ...انت للضُرُس عرديب.. (Re: مصطفى عبيد)
|
أسـتاذنا كـبر
سـلام لك ولأسـتاذنا النـصرى
Quote: و هناك في الثقافات المحلية هناك اسطورة رائجة ان الجن يسكن شجر العرديب و يبني فيها بيوته..و الممارسة هناك كل من عبر تحت شجرة عرديب يقول (بسم الله الرحمن الرحيم..و اعوذ بالله من الشيطان الرجيم)
|
فى مـناطق كثيرة فى السوادان الأوسـط تـشـير الأساطير إلى أن الـجـن يـسـكـن شـجـرة اللالوب ويـتحاشى السـدر. وأذكـر أنـه فى مـدرسة العزبة الأولية باالخرطوم بحرى جوار سينما حلفايا كان هـناك بئر وجواره شـجـرة لالـوب لـم أرى أضـخـم مـنها فى حياتى. وكان يـقال أنه كان يـسـكنها جـنى يـسـمى أبو كدوس. وكان أمام المدرسة ميدان كنا نلعب فيه الكرة ونحن أطفال وإذا ماوقـعت الكورة داخل أسـوار المدرسة لا يجرو أحـد على إحضارها خاصة بعد العصر وقرب المغرب ونـنـتـظـر حتى صباح اليوم التالى.
أعتـقد أن العرديب يستعمل أيـضا فى صناعة الحـلو مـر. ويـمشـق به الجسم فى حالة الحـمى، ويـسـتعمل لايـقاف النزيف.
شـكرا لكما عـلى تحفـيز الـذاكـرة لإجـترار ذكريات أجمل أيام العـمر، ولكما الـود
| |
|
|
|
|
|
|
|
|
|
Re: ...انت للضُرُس عرديب.. (Re: Rawia)
|
يا سلام يا كبر
والله انت موسوعة علمية ماشة برجلين ...
الكويس انت بتربط المعلومة من مصادرها الموثقة بواقعك المعاش و مجتمعك الحولك وتجاربك
الشخصية مما يجعل عملية اقناع القارى زى شراب الموية ...
لغاية دلوقت انا كلما القى حذاء مقلوب (حتى لو كان جديد لنج) اقوم باستعداله
ليس من باب النظافة لكن خوفا من ابليس ,,,,, كذلك اتجنب الاكل من حلة الطعام
عشان ما تقوم كتاحة يوم العرس (مع انو الباب ده قفلناهو)
انا برضو قريت ان شجرة الحراز كندية الاصل وصلت السودان عن طريق احد المستكشفين
وفى موسم الخريف (فى السودان) تتساقط اوراقها كما لو انها هنا فى كندا ,,,,
فى حاجة واحدة فى ردودك الدسمة دى ناقصة ...شنو الحاجات والاستخدامات (السرية)
للعرديب التى تجنبت الخوض فيها ... العلم مافيهو عيب .... قول العارفو....
| |
|
|
|
|
|
|
|
|
|
Re: ...انت للضُرُس عرديب.. (Re: النصرى أمين)
|
سلام مصطفى عبيد
سعيد جدا بمداخلتك التى جلبت بعد جديد للبوست ....
راجعت القصيدة عدة مرات على امل ان اصل (كمستمع) للمعنى الحقيقى
الذى قصده الشاعر (اظن ان القصيدة كتبتها امراة)
بصراحة لم اصل لنتيجة نهائية فالمعنى قد يكون فى اى من الضدين وان كنت اميل
لللمعنى الذى ذكره كبر مدعما بالتجارب الشخصية... العرديب غير معروف بقساوة
الطعم مثل الحنظل او القرض ..هو ليس نبات مؤذى او كريه حتى يشبه الشاعر كعدو
للضرس ومؤلم له ....
ازكر ونحن اطفال ..عند رجوعنا من المدرسة الاولية كنا نمر باحدى الشوارع بها منزل
به شجرة تمرهندى ..كانت ثمار تلك الشجرة تتدلى فوق سور الحائط ..كنا نتسلق الحيطة
وننال من التمرهندى ما ننال ونستمتع به وبحلاوة (ومرارة) طعمه ......
الشئ التانى ..حتى لو افترضنا انه العرديب حامض جدا جدا...الضرس قد يكون اخر
من يتاذى منه ..فالضرس لا يعض ...
قد يكون المعنى كما ذكرت لكنى بصراحة اميل للمعنى الذى يقول ان العرديب هو علاج
وليس عدو للضرس ..
على المستوى الشخصى ..اشتريت العرديب (او التمرهندى) فى رمضان واكلت كل الصندوق
مع اننى اعانى من مشكلة واحدة فقط فى اسنانى ..احد الضروس به جفوة سوداء احد الاخصائين
قال لى انى احتاج لعملية ..... مع ذلك اكلت علبة العرديب بدون اى ضيق
| |
|
|
|
|
|
|
|
|
|
Re: ...انت للضُرُس عرديب.. (Re: Kabar)
|
صديقي النصري..حبابك
الفضل يرجع للحبوبات يا النصري..و قد اكون من الناس السعيدين جدا كانت لي علاقة متميزة مع حبوباتي..و عرفت منهن كتير للغاية..
اشك في مسألة ان الحراز شجدرة كندية..و في بعض البيئات السودانية الناس بتخلط بين الحراز و السنط..!
فعلا شجرة الحراز.. في الصيف (الجاف الحار) بتكون مخضرة بصورة جميلة..و في الخريف يتساقط صفقها..
من الإستخدمات الطبية لشجرة الحراز.. تستخدم في علاج سم العقرب..!
اما بالنسبة للنبات الطفيلي في شجرة العرديب..عندي عمي فكي ..و حكي لي عنو كتير جدا..و اشترط على شرط عجيب جدا.. قال لي المعارف دي ممكن تحكي عنها.. بشرط أن تأخد الطريقة التيجانية.. اما اذا لم تأخذها فهي لك وحدك..و للأسف يا النصرى لم اتمكن من التعميد في الطريقة التيجانية..لأسباب خاصة بي..ده سبب..
السبب التاني..لازلت في مرحلة البحث عن التأكيد العلمي للإستخدام..و لكن بالمثيولوجيا الشعبية.. شفتو أو شفت حاجات قريبة منو..(و ما بتنفع معك..صدقني)..!
في حاجة تانية.. يجي يحكي ليك عنها اخونا الحبيب محجوب..و ه ي شجيرة صغيرة..و في عرب السودان اسمها (عرق بنــدا)..!
ياخي حيكومتنا هنا.. بتزعل مرات لمن نحكي عن تجربتنا في الخلا.. فتقوم تحكي للبنيات.. حكوة واحدة قاعدين نسمع فيها عشرة سنة..و هي تجربتها لمن مشت من الخرطوم لضواحي الدلنج..و فزعت مع بنات الحلة للدليب..!
حاجة غريبة يا النصري.. ياخ الدليب ده كائن رومانسي بشكل.. لا يتساقط الإ في ضوء قمر مكتمل الإستدارة..!!!!
كتر خيرك يا النصري..و ياهو فتحت لينا سكة ونسة.. عشمنا تنفع الناس..!
كبر
| |
|
|
|
|
|
|
|
|
|
Re: ...انت للضُرُس عرديب.. (Re: النصرى أمين)
|
طبعا يا كبر اكيد عندكم هناك ابوالعفين او Skunk
عارف ليه شكله مميز؟؟ ليه منظره لا يساعده على الاختباء ؟
السبب انه عنده مخزون محدود جدا جدا من السائل النتن الذى يرشه عند الدفاع عن نفسه....
بسبب شكله المميز لا يحتاج ان يستخدم مخزونه الاستراتيجى(القيم) لان الجميع يعرفون من هو ويتجنبونه.....
حكمة ..
| |
|
|
|
|
|
|
|
|
|
Re: ...انت للضُرُس عرديب.. (Re: النصرى أمين)
|
الفضول داير يكتلنى فى موضوع الفكى وشجيرات ام عنبة وعدم وجودها فى اشجار العرديب
لدرجة قوقلت الكلمة ولم اطلع بشئ ...
يا محجوب لو بتقدر ما تقول لينا الاعشاب دى مالها ....
| |
|
|
|
|
|
|
|
|
|
Re: ...انت للضُرُس عرديب.. (Re: النصرى أمين)
|
فوق
خسارة ان يكون بوست وبهذه الدسامة ويطلع عليه فقط
بضع مئات من القراء
يا ريتنى لو اتخذت عنوان اكثر اثارة
على كل لن اتركه يذهب الى قاع المنبر قبل ان
يصل المطلعين عليه الالف وزيادة
| |
|
|
|
|
|
|
|
|
|
Re: ...انت للضُرُس عرديب.. (Re: النصرى أمين)
|
والله يا كبر كنا نتمنى لو أخذت الطريقة التجانية .. يعني كنا سمعنا منك الكثير من هذه المعلومات الثرة التي تتحفنا بها وانا ابتديت اعمل طباعة لهذه المذكرات كي احفظها في فائل المعلومات.. وبعدين ممكن برضه تنفذ وصية جدك وتأخذ الطريقة التجانية عشان تكلمنا براحتك عن ما تخزنه من معلومات عن هذه الأشجار( الهجليج والالوب والعرديب..) وفوائدها التي لا يعرف الناس عنها كثيرا .. وانا متأكدة لو ان الأشجار دي سمعوا بها علماء امريكا والمانيا كانوا صنعوا منها الأعاجيب ..
ومرة أخر ىالشكر والتقدير لشخصكم الكريم.. وواصل..
ويا النصري موضوعك مفيد جدا جدا ولازم تنقله لينا للفترة القادمة في آخر الشهر
والله يديكم العافية
| |
|
|
|
|
|
|
|
|
|
Re: ...انت للضُرُس عرديب.. (Re: munswor almophtah)
|
صديقي النصري.. حبابك
كتر خيرك على الإطراء و الثقة..ولا تحزن يا صديقي لقلة رواد هذا الخيط..و مؤكد الناس ح تجي شوية شوية..ممكن نستمر نجادعك هنا..و صدقني يمكن تجمع ليك داتا كويسة عن الشجر السوداني و علاقات الإنسان بيهو و الأساطير حوله..و صدقني هي معرفة لا تتيسر باخوي و اخوك..و زمان كنت زعلان شديد من نظام التعليم السوداني .. ياخي يدرسونا شجرة في ساسكتشوان (كندا)..و نحن في ام طرقا عراض..و شجر البيئة من حولك تعاين ليهو و يعاين ليك..!!
اجمل مافي الأمر..و هو اشد ما يحزنني ايضا.. أن كل الأشجار في كردفان مثلا هي اشجار طبيعية..يعني مافي زول دق حجر دغش عشان يزرعها و يرعاها..شفتو الخير كتير كيف؟.. الحروب اثرت على الأوضاع.. اضافة لسلوك الإنسان الجائر..ياخي كلما الناس تجيب سيرة الزحف الصحراوي و تناقص الغطاء النباتي ، الواحد بيشعر بحسرة كبيرة خلاص.. العين بصيرة و اليد قصيرة..
الظربان (ابوالعفين):
اهلنا في غرب كردفان ، قاعدين يسموهو (الدُربان)..و هم عندهم نطق عجيب لحرف (الذاء و الظاء)..و بيحولوها لحرف (الدال/الضاد) .. ظربان يقولوا ليك (دربان).. ذباب يقولوا ليك (ضبان)..و هكذا..
الظربان معروف في مناطق غرب كردفان..و حوله اساطير عجيبة..مثلا..هذا الحيوان ، و في فترة التخاصب..
Mating times
بيكون الذكر تابع الأنثي..و بتكون ماشة في نص الحشائش..و أي عشبة تهبش الإنثي بيقوم عمك بيقطعها.. فتلاحظ طرق مفتوحة نص الحشائش بصورة هندسية اظرط من شوارع كالقري..!!..و بسهولة ممكن تعرف ابو الشباب مر من هنا.. و لو جينا نتكلم بكلام ناس البندر.. فهو حيوان غيور..ياخي القشة لو هبشت انثاه بينتهي منها..!
الأسطورة التانية..البشر بيقاتل الظربان بطريقة عجيبة..و هو حيوان شرس..و في زمن التخاصب لو شافك بيهاجمك..و عشان تقاتل ليك ظربان لازم تكون قاعد على الأرض..!!!.. عارف ليه؟..لأن الظربان متخصص يقطع العرقوب..و قرضة واحدة بيوديك في ستين داهية..عشان كده لازم تكون قاعد و تضاربو..!!
الأسطورة الثالثة..اهلنا بيعتقدوا جزما (و من تجربة) أن الحديد (سكين/حربة) ما بتجرح الظربان..يعني أي بقاري لو سألتو بكل بساطة بيقول ليك الحديد ما بياكل الدربان..عشان كده بيستخدم العصى فقط في قتل الظربان..!!
فكرة الظربان و الحديد.. اهلنا عندهم ليها تفسير.. ان الظربان يأكل شجرة معينة اسمها (كاودا/مش بتاعة تحالف كاودا..!!)..لاحظ ان الظربان نباتي و لاحم في نفس الوكت..!
في شجرة (كاودا) الظربان متخصص في الجذور (العروق)..و بالتجربة.. الإنسان هناك قام اكل عرق الكاودا..و منها اكتشف فكرة حجاب الحديد لو كنت يا صديقي من الناس التي تؤمن بحكاية الحجبات..!!!
الحيوانات هناك يا النصري..و من تجربة معاشة.. عندها طرق عديدة للدفاع عن نفسها.. الظربان بالرائحة الكريهة..هناك حيوان اسمو أم قرفة ..و هذا يبكي بصوت اشبه بصوت الطفل (عندنا مثل بيقول فلان دموعو قريب زي دموع ام قرفة).. نوع معين من الورل..بينفخ البطن و يحدث صوت اشبه بصوت الكير..النعام بيدفن الراس في الرمال (ما داير يشوف الكاتل)..ابنضلاف..و يتخيل لي اسمو..
Ants eater
بيدخل راسو في الحفرة و بيخلي ليك الضنب بره..و ممكن يلموا عشرين نفر و يجر الضنب و ما يقدروا يمرقوهو من الحفرة..!!!
اما حيوان ابوشوك.. فده عندو شوك كبير و بيفكوا زي الصواريخ..و نخلي فرصة للشباب يشرحوا ليك كيف تصطاد ابو شوك.. بالمناسبة عندو لحمة اسكت ساكت خليها..و بقارة بتحلف بجملة ايمانها انو ابوشوك ده خروف النبي صلي الله عليه و سلم..!
و دمت..
كبر
| |
|
|
|
|
|
|
|
|
|
Re: ...انت للضُرُس عرديب.. (Re: Faisal Fadhlallah)
|
يا اميرة انا مقتنع ان البوست لازم يمشى للدورة الجديدة لكن البقنع
القراء شنو ....لسه الاطلاع ضعيف ..الكثيرين لا يعرفون قيمة المادة
البكتب فيها كبر دى ...
...
توقفت فى كل كلمة وجملة واعدت قراءة المداخلات فلاشئ يجذبنن مثل الاساطير
التى ترتبط بمعايش الانسان ....
لكن الجملة دى خلعتنى عديل
Quote: و بالتجربة.. الإنسان هناك قام اكل عرق الكاودا..و منها اكتشف فكرة حجاب الحديد
لو كنت يا صديقي من الناس التي تؤمن بحكاية الحجبات..!!! |
اما غيرة ابوالعفين دى فدى رسالة ماجستير منتظرها البعدها
| |
|
|
|
|
|
|
|
|
|
Re: ...انت للضُرُس عرديب.. (Re: النصرى أمين)
|
| Quote: يا محجوب لو بتقدر ما تقول لينا الاعشاب دى مالها .... |
انت عارف يا النصري لما كنا اولي جامعة ماخدين كورس بوتاني و فيهو اخدنا ذي 2000 اسم شجرة او زهرة
هسي جاء الزول بتاع القانون ده طلع متذكرهم جت تاني لو الواحد جاء حيقول شنو بحالو بدون وضوء
_____________________
مرة هنا بدرس في كلاس بتاع ناس كميبوتر انط واحد بروزا ماتيور و انت من افريقيا يا اخي لما تمشي المرة الجاية جيب معاك اعشاب للموضوع داك و الكلام قدام الخواجات.
التفت ليهو كده و قلت ليهو انت لسة صغير بتحتاج ليها في شنو؟
يبدو انو البرزا عندو اكثر من واحده
| |
|
|
|
|
|
|
|
|
|
Re: ...انت للضُرُس عرديب.. (Re: Mahjob Abdalla)
|
يا النصري انا كنت ابتديت بحث متكامل عن الشخصيات السودانية الشهيرة التي اثرت في المجتمع السوداني سواء كان سلبا ام ايجابا وفي مجالات عدة.. والمصادر شحيحة جدا .. ولكن بعد المعلومات الثرة والوفيرة لكبر عن تاريخ هذه الأشجار السودانية وفوائدها والأساطير التي تحاك حولها فربما اغير موضوع البحث عن هذه الأشجار..
والقراء كلهم مقتنعين بأهمية هذا البوست وثرائه
بس انت ما عليك إلا تنقل البوست للمرحلة القادمة
والله يديك العافية
| |
|
|
|
|
|
|
|
|
|
Re: ...انت للضُرُس عرديب.. (Re: اميرة السيد)
|
بالله يا محجوب انت بتاع زراعة ؟ ..الزول فعلا جهجه باكاتكم كلها .....
يا اميرة اتخايل لى ده قرار سليم جدا ... بالمرة حاولى اجمع لى
معلومات عن شجيرة اسمها الحوحوبا ..... لثمرة هذه الشجرة زيت غالى جدا جدا قد يصل سعر الرطل
لسبعين دولار ...
اشتريته قبل سنوات لاحد قرائبنا فى الخليج يعمل فى تجارة الزيوت ال exotic
يقال عن الزيت انو لو كبيتو على يدك لنزل من الجانب التانى ..يعنى لو فتحت يدك
بصورة افقية سكبت الزيت عليها لنزل من تحتها وكان اليد مصفى ,,,
شجرة الحوحوبا تقوم فى المناخ الصحراوى او شبه الصحراوى والمزرعة التى اشتريت منها الزيت
فى ولاية اريزونا ,,,,,
انا متاكد الشجرة دى موجودة فى السودان لكن الناس ما جايبة خبرها ,,,حتى لو لم
تكن موجودة فبنات عماتها موجودات ,,,,,,
ايضا فترة من الفترات سعيت لزيت اخر اسمه زيت الحشيش وهو واضح من الاسم من اين يستخرج,,,,,,
| |
|
|
|
|
|
|
|
|
|
Re: ...انت للضُرُس عرديب.. (Re: النصرى أمين)
|
شجرة الحوحوبا يا النصري بسموها الشاميين وناس الحجاز شجرة الجوجوبا ( بالجيم) وناس مصر والسودان بسموها الحوحوبا ( بالحاء) وتكنى بالشجرة الذهبية لأنها زيتها عبارة عن ذهب سائل ومن أغلى الزيوت ف يالعالم .. بل ان الجالون من زيت الحوحوبا اغلى من البنزين بعشرة مرات.. والشجرة تتواجد بكثرة في المناطق الصحراوية ويستخدم زيتها في مجالات الطب والتجميل والأدوية وهي ليست لها دوهون وصحية جدا وأحسن من زيت الكانولا لن المعروف ان زيت الكانولا طبيا احسن من زيت الزيتون.. يعني ممكن تشرب زيت الكانولا زي الموية وما تعمل حاجة بل الأطباء والاختصاصيين بيقولوا ان الزيت مفيد صحي ومفيد لصحة القلب كمان ومريح للمعدة.. اما زيت الحوحوبا فمفيد من نواحي كثيرة جدا وكذلك اقتصاديا وهذه الشجرة تكثر في امريكا في الولايات التي تكثر فيها الصحاري زي ولاية اريزونا.. واكيد ان هذه الشجرة كثيرة في الشمالية ولكن الناس ما جايبين خبرها لأن الشجرة ممكن تقوم براها بدون ان تسقيها بالماء لأنها اساسا شجرة صحراوية لا تحتاج لكثرة المياه و لا تحتاج للري.. واذا ان مشيت الشمالية ووجدت هذه الأشجار احرص على ان تسورها وتهتم بيها وفي سنة واحدة حتكون مليونير
والله يديك العافية
| |
|
|
|
|
|
|
|
|
|
Re: ...انت للضُرُس عرديب.. (Re: 3mk-Tango)
|
اهلا وسهلا بالعم تنقو
انا زاتى البوست متابعه حرف حرف لكن شايف كبر لبت ليهو كم يوم....
كدى اقزقز بيكم لغاية رجوعه ...
قبل سنوات حاولت تسويق زيت حب البركة (احيانا يسمونه زيت الحبة السوداء) هنا فى كندا
بديت اتنقل بين المحلات المتخصصة فى بيع الزيوت ال essential ....
دخلت واحد من اكبر المحلات فى المدينة وسالت عن المدير (او صاحب العمل) اشرو على امراة
كندية بيضاء قالو انها صاحبة المحل... عرضت عليها الزيت قالت لى انها سمعت به ولكن ليس
لديها معلومات كاملة عنه ... نادت على احد العاملين ..بدا لى وكانه من شرق اوربا.. سالته عن
الزيت ....قال لها انهم يسمونه god oil
هذه الاجابة المفاجئة كفتنى شر تقمص شخصية مندوب المبيعات الذى لا اجيده ....
لم تكتمل الصفقة بسبب شروطهم شبه التعجيزية فى التعبئة
| |
|
|
|
|
|
|
|
|
|
Re: ...انت للضُرُس عرديب.. (Re: النصرى أمين)
|
معلوماتك صحيحة مائة فى المائة يا اميرة ....
لاسف الشديد انا كنت زى تمر الفكى شايله ومشتهى
الزيت كان عندى لكننى لم استطع تفحصه لانه كل قارورة بالشئ الفلانى .....
اما الشئ الحيرنى فهو العنبر فلا هو صخور ولا هو نبات..استطعت بعد مجهود شاق
الحصول عليه من تركيا .... وقد كان مطابق للمواصفات تماما ,,,,
| |
|
|
|
|
|
|
|
|
|
Re: ...انت للضُرُس عرديب.. (Re: اميرة السيد)
|
| Quote: ياخ الدليب ده كائن رومانسي بشكل.. لا يتساقط الإ في ضوء قمر مكتمل الإستدارة..!!!! |
ياسلاااااام بوست ممتع ومفيد جدا تسلم يا النصرى.....
يا كبر بالغتة عديييل كدا فى المعلومات عن الاشجار وسكانها ....
بس حبوبتى زمان لما نعمل لينا خدمة ولا حاجة ما تعجبه بتقول لينا أمشى يا ضل الدليب البرمى بعيد ...... ياخى لخبطوا لى نافوخى دا انت وحبوبتى واحد يشكر الدليب والتانى يهجوه ....بالمناسبة قضيت جزء من طفولتى بغرب السودان لعمل الوالد بمستشفى زالنجى وكتم .... وكمان زرتة جبل مرة وصورة القضيم يكسب الجبل اللون البرتقالى مازالت عالقة بذهنى ولاايمحوها غبار السنين ........
بوست لوما عنوانو كان طار وما ركة.....
| |
|
|
|
|
|
|
|
|
|
Re: ...انت للضُرُس عرديب.. (Re: اميرة السيد)
|
أخـوانا النصرى وكـبر
كـتر خيركم على المـعلومات القيمة
لـو سـمحتوا لى عندى مجموعة من الملاحظات حـأحاول إنـزالها كلما سـمح لى الوقت
أولا كلام أخـونا النصرىQuote: الاسم tamarind قريب جدا للاسم العربى تمرهند ولكن حسم منطق
محجوب انه هو نفسه العرديب ..وده بخلينى ارجع للمربع الاول البديت
منه ... هل هو تمرهند حسب الاسم الرسمى او هو عرديب ....
وهل عصير التمرهند قريب من عصير العرديب ....
|
تمر الهند هوالإسم "العربى" للعرديب كما عرفه العرب أيام تجارة البهارات من الهند وجزر الهند الشرقية. وكان أولا يطلق عـلى النوع الحلو من العرديب وهـو من نفس فصيلة العـرديب الحامض والدى كان يكثر إستعماله فى علاج الجروح ولدغات الحشرات وإضطرابات المعدة وتـقرح اللثة ولكـن أكثر إسـتعمالاته كانت فى الطهو ويـسـتعمل كبديل لدبس الرمان ليعطى الطعام لمسة حمضية كملح الليمون، وأيضا كمشـروب قاطع للعـطش، ويستعمل أيضا فى تركيبة الحلو مر وفى زاد المسافرين كمستحـلب للعاب فى الحر القائظ والمناطق الجافة كالصحراوية.
أما التـمر هـندى عـندنا فى السـودان فكان يطلق عـلى ثـمـرة تـشـبه العرديب ولكنها خضراء القشرة كالفاصوليا وتحتوى بدل اللحمة البنية فى العرديب عـلى جـزء أسـفنجى أبيض اللون ويحمر كلما نضج ويحيط ببدور سوداء طرية بعض الشـىء وينفصل عنها بسهولة وله مداق حلو ولكنه بلا أبـعاد أو نكهة (أشبه بطعم داخل قشـرة المـوز). وكنا نشترية طازجا طريا إما من سـوق الخضار أو الحاجات اللاتى كن يبعـن الفول أو نجمعة من حول حديقة البلدية أو مستشفى بـحـرى أو شـمبات عـلى أطراف غابة التمر أبونا أو المسـكيـت وأيضا فى غابة الشـجـرة (شجرة غردون أو ماحى (محو) بيه). وأشجار التـمر هـندى الكثيفة بمدرسة العزبة 2 خلف نادى التحـرير فى الخرطوم بحرى كنت قد زرعتها وأنا فى السنة الثانية بالمدرسة بعد غـرس البدور فى جدول المياه السائلة من المـزيرة
ولـى عـودة
| |
|
|
|
|
|
|
|
|
|
Re: ...انت للضُرُس عرديب.. (Re: عبدالرحمن إبراهيم محمد)
|
ما تقرط علي كدا يا نصري
انتظر عمك كبر جاييك بي مزيد من المفيداكيد
معلومات زي دي دايره ليها بوست مريح زي دا
عشان كبر يجي ويلقانا منتظرين
وعلي فكره يا النصري انت طلعت من الموضوع البديت بيهو البوست
نحن صاحيين تعال تم الباقي
| |
|
|
|
|
|
|
|
|
|
Re: ...انت للضُرُس عرديب.. (Re: Kabar)
|
الصديقات و الأصدقاء هنا.. حبابكم جميعا..
معليش الوكت عندنا ممحوق ، و الزمن كتلنا بالفســّالة..!
تحية لصديقنا و استاذنا البروف عبد الرحمن ابراهيم..ياخي قعادك معانا هنا حاجة مو ساهلة تب..
حباب صديقي عمك تنقو..و لغاية امبارح يا صديقي كل ما اشوف لي رهاب حبشي ولا حبشية.. ارتري ولا ارترية..و اشيل امرق في غنية (الشوكة) بحثا عن ترجمة..!
كتر خيرك يا خالد..و بسبب تلك الأغنية التي نشرتها قبال سنين في المنتديات السودانية.. مسكنا الدرب.. اثيوبيا.. جيبوتي.. صومال.. مالي.. توجو.. انغولا..جابون.. زمبابوي..موريتانيا.. ياخي لغاية جمهورية الصحراء الغربية.. بقينا نساكك في المزيكا زي الزول المشرك لود ابرك..!
كتر خيرك على حسن الظن..و التحية لأخونا النصري.. الذي هيأ لنا هذا البراح..بالجد حكاوي لذيذة..!
كبر
| |
|
|
|
|
|
|
|
|
|
Re: ...انت للضُرُس عرديب.. (Re: Kabar)
|
نجاة سيد احمد..حبابك يا صديقة..
كتر خيرك على المطايبة..
دايرة الجد ولا الجنبو يا نجاة؟..كلام حبوبتك و كلامي متسق..و ظني كلام حبوبتك ما وقع ليك كويس..!!
طبعا كتير من ثقافة البندر الشعبية عندها محمول ثقافي سالب عن الدليب..يعني زول كضاب يقول ليك اب دليبة..فكيت كضبة يقول ليك رميت دليبة..راسك كبير معفص يقول ليك عامل راسك زي الدليبة.. راسك قوي ما بتسمع الكلام .. برضك يقولوا ليك عامل راسك القوي زي الدليبة..!!
و لكن..!
الحبوبة يا نجاة كائن جميل للغاية (بالمناسبة انا زول تربية حبوبات ، و ما نلته من معرفة من مدرسة الحبوبة ، قرابة العشرين سنة تعليم نظامي لا يسوي ربعها..!!)..و ما بتزعل من احفادها و حفيداتها..و كلامها دايما حكم.. يعني ممكن الأم او الوالد يقول للطفل/ة كلمة حارة و يكون قاصد في لحظة غضب عابرة.. لكن الحبوبة ابدا ما بتعمل كده..!
في ثقافتنا المحلية في كردفان (طبعا هي ثقافة اقاليم سودانية كتيرة )..الضل بيرمز للخير و الجود..و لمن يقولوا ليك ضلك رامي بعيد.. معناتو خيرك مغطي على مناطق بعيدة حولك..!!
شجرة الدليب شغالة بالفكرة دي..و هي نحيفة و طويلة القامة (لو الناس شفاتها كويس ح تشبه بيها القوام بدلا عن شجرة البان..!!)..و قمتها كثيفة الفروع (بالمناسبة الدليب و النخيل و الدوم اولاد خالات لزم ، يعني فصائل متقاربة)..و بترمي ضل كثيف و بعيد..!
يعني حبوبة ، لمن تقول ليك بكل فصاحة (امشي يا ضل الدليب البرمي بعيد)..فهذا هو المعني.. يعني خيرك رامي بعيد..!!
اضافة للضل البعيد (لو اتفقتي معانا انو بيرمز للخير) ثمرة الدليب تتميز بنكهة طيبة و نفاذة..تلات حاجات بتجيب زمني في الفواكه (نظام نكهة و كده) الدليب..و الأنناس..و الزنجبيل ( يا محجوب الحق..ضريسة شنو يا عم..!!)..
كتر خيرك يا صديقة..
كبر
| |
|
|
|
|
|
|
|
|
|
Re: ...انت للضُرُس عرديب.. (Re: Kabar)
|
شجرة العـرْد ، بعض من اساطيرها:
ايام هجمة هجليج (نيسان/ابريل 2012).. قام صديقنا محمد سليمان (الزغاوي الذي احببت على قول صديقتنا تراجي).. جاب تسجيل لواحد من اهلنا المسيرية بيقول (الحكومة عـــرّدتْ)..و قام بعض الأصدقاء فتح بوست يسأل من هذه العبارة العجيبة..و هي تعني جرت/هربت/فزت..والوصف منها معراد أو تعريدة..!
الفعل هو (عرّد) بتشديد حرف الرأء.. و نفس الكلمة و بهيئتها تلك لو استبدلت تشكيل الحروف ، كاستبدال التشديد في حرف الراء بتسكين في نفس الحرف ..بيديك اسم شجرة كثيرة الإنتشار في الريف الكردفاني..و هي شجرة العرْد..و الناس هناك بتسخدم فيها التصغير و بتكون عريداية..!
في المورث الشعبي ..بيكون بعض الأصدقاء سمعوا بمثل بيقول (الصبي جراب عــرْد)..و الصبي عندنا بتعني الشاب العاجباهو روحو..شيال التقيلة.. مقنع الكاشفات (مع اني ضد الفكرة دي..ياخي نحن وصلنا مرحلة البنات بقنا بيشتغلنا و عندهن قوة اقتصادية تقنع/تغطي مليون كاشف..!)..و الجراب..اشبه بالحقيبة اليدوية (هاند باك)..و بيصنع من جلد الحيوان (بقر..جمال.. غنم..الخ)..لكن العلاقة بين التلاتة مفردات (بشر..مخلف حيوان..شجر) عقليا ما بتكون..لكن الناس وظفتها و عملت منها دلالة (طبعا ماح نشرح المثل)..!
و لأن الكلام هنا عن الفوائد الطبية لأشجارنا السودانية.. فبنقول..
شجرة العـرْد..و ناس علم النبات قاعدين يسموها..
Albizzia amara
تستخدم كثيرا في علاج امراض البشرة..مثلا في الورم.. أو في علاج مرض الجرب.. أو أي حاجة بتسبب للبشرة اكلان و جروح..و برضك تستخدم في علاج مرض اليرقان..و اهلنا هناك قاعدين يسموهو اب صوفار..(لأن لون العيون بيكون اصفر و البشرة برضك..)..
اما الأسطورة..و نتمنى ناس العلوم و الطب يكونوا قريبين.. يشرحوا لينا المفاهيم..و يفكروا معانا..في السودان هناك مرض بيشكل ورم في منطقة حساسة من الرجل ..و في ثقافتنا قاعدين يسموهو (القــُولنج)..و ناس البندر قاعدين يسموهو ( الكــُوكا)..(معليش لا حياء في العلم يا اهلنا)..!
في مناطق البقارة.. لمن زول يكون عندو المرض ده.. بيقوم الشفع الصغار بيضايقوه بطريقة عجيبة..في شجرة الضرا.. دايما (في الليل) الناس بتكون مولعة ليها نار كبيرة (تقابة)..و بتكون قاعدة حولها.. اها بيقوموا الشفع بيقطعوا فروع من شجرة العــرْد..و بيمدوها عشان تشويها في اللهب (زي حكاية المارشميلو في نورث امريكا)..اها اول ما الغصن الصغير يبدأ يحرق بفعل اللهب بيقوم الزول العيان بيتضايق شديد..و بيحاول يتضاير..و اذا استمرت الحكاية كتير.. بعد شوية بتسمع صوت (صادر من الحتة العجيبة ديك) اشبه بصوت الكير..و بيعلو الصوت تدريجيا..!!!.. عشان كده أي زول عندو المرض ده دايما بيكون حساس..و اول ما يشوف الشفع جابوا فروع العـرْد بيقوم يتخارج من الحتة..!!!
الفكرة الممكن نشتغل عليها.. معروف ان العـرْد يستخدم في علاج بعض الأورام..فهل دخان العرد عندو علاقة بالورم ده؟..بمعني هل ممكن يشكل تهيج؟.. (طبعا اي علاج بيدأ باثر سلبي و بعد داك بيكون ايجابي..و ده شغل عندو علاقة بتفاعلات كيمياء جسم الإنسان..مقاومة ثم استسلام..ثم علاج..)..!!
و يا محجوب يا صديقي.. قالوك نحن الزراعة لقيناها عشان ناباها..!!
زي ما بيقولوا اهلنا ما بتدي حريف يا عم..انا امتحنت في قسم الأحياء..و كنت مصر احكي للدنيا دي عن شجرة سامة اهلنا قاعدين يسموها (ام بريجنقو).. يعني يكون عندك مراح بقر فيهو الف راس.. لو اكلت الشجرة دي تاني يوم بتكون على الحديدة زينا كده (ياخي اسلحة دمار شامل عدييل)..و عرفت انو استاذنا المرحوم بروفسور غبوش ترتور الضاي كتب بحث عنها..وبعض الأخيار قال لي ما تحنبك ساكت.. الشدر راقد زي الهم في القلب..و اكيد ح تلقى ليك شدرة توريها للدنيا.. و البوكسنح خذلنا يا عم..ولا نحن الخذلناهو ما عارف..و من ديك و عيك.. ركبنا شارع الهوا (و ده اظرط من التونسية)..!!!!!
عندي قصيدة رايحة مني اسمها ( الشدر قربني منك..).. لو لقيتها ح ابراكم بيها زي الترتيب..!
و نشوفكم في شجرة تانية كن لقينا لينا فرقة..
دمتم جميعا..
كبر
| |
|
|
|
|
|
|
|
|
|
Re: ...انت للضُرُس عرديب.. (Re: Kabar)
|
Quote: يعني حبوبة ، لمن تقول ليك بكل فصاحة (امشي يا ضل الدليب البرمي بعيد)..فهذا هو المعني.. يعني خيرك رامي بعيد..!!
|
الموسوعة كبر مشكور للرد الشافى الكافى ،،
بس لكن حبوبة بتقول الكلام دا لما تكون زعلانة من اى واحد مننا ماعارفة ..
كنت فاهمة شجرة الدليب جاحدة ، مثلا لوكانت داخل منزل ضلها بمشى للجيران ... والكلام دا بتقال للزول البخدم الغير وما بعمل حاجة لاهلوا..
تسلم ،، متابعين ومستمتعين بالسرد والمعلومات القيمة.
| |
|
|
|
|
|
|
|
|
|
Re: ...انت للضُرُس عرديب.. (Re: Nagat Sid Ahmed Elshiekh)
|
استاذنا الفاضل عبدالرحمن ابراهيم
مداخلتك الدسمة هذه ارجعتنى سنوات و سنوات للماضى ....
الان لا تستطيع الديباجة على tamarind ان تخدعنى ,,,,الذى نشتريه اليوم
من البقالات الكندية هو عرديب وليس تمرهندى كما هو مكتوب على صندوق التعبئة,,,,
انا اشتريته على اساس انه تمرهندى (حسب الديباجة) الا ان زوجتى قالت لى هذا ليس بتمرهندى (كذلك اكد محجوب وكبر)
فالتمرهند كما وصفته يشبه الفاصوليا وذو لحمه بيضاء قليلة الاثارة.... كنا ناكله وهو نى من الاشجار
التى تنتشر فى جميع شوارع امدرمان ....
هذا ال tamarind (او العرديب) به مرارة حلوة المذاق ....
باختصار الفرق بين الاتنين الاول active والثانى inactive
==========
يانجاه القضيم ده فايل اتمسح من ملفات زاكرتى منذ وانا صغير ...الان حصل recovery للملف
الان امنيتى ان احصل على دليبة معسلة وكوم بتاع قضيم
| |
|
|
|
|
|
|
|
|
|
Re: ...انت للضُرُس عرديب.. (Re: النصرى أمين)
|
أسـتاذنا الـكـريم الـنصـرى
لـك الشـكـر عـلى إتـاحة هذه الـفـرصة الـمفـيدة المـمـتعـة.
وأسـمح لى أن أقـول لأخـينا كـبر:
ســلام وكتر والله خيرك كثير
Quote: تحية لصديقنا و استاذنا البروف عبد الرحمن ابراهيم..ياخي قعادك معانا هنا حاجة مو ساهلة تب..
|
أهـا أنا جـيت وإتـحـكـرت عـشـان أولا أنا مـسـتـمتـع جـدا بمعـلوماتـكم دى. وثانيا لأنه عـندى كلام كتـير دايـر أقـوله.
فأنـتـظـر مـنى مـداخـلات مـن الـعـيار الـثـقـيـل، بإذن الله!
| |
|
|
|
|
|
|
|
|
|
Re: ...انت للضُرُس عرديب.. (Re: عبدالرحمن إبراهيم محمد)
|
الموسوعتين الاستاذين كبر وعبد الرحمن
نتابع حروفكما حرفا بحرف ونستزيد من علمكما الغزير في مجال انواع الأشجار.. فلا تتوقفا ولكن الخوف كل الخوف ان النصري سوف ينسى ان ينقل هذا البوست الهام للفترة الثانية ويضيع في متاهات الأرشيف و لا نستطيع الوصول اليه.. وخاصة واننا لم نطبع كل هذه الدرر بعد..
والله يديكم العافية
| |
|
|
|
|
|
|
|
|
|
Re: ...انت للضُرُس عرديب.. (Re: عبدالرحمن إبراهيم محمد)
|
| Quote: فـزيت الكانـولا من أخـطر مايمكن أن يـسـتعمل الإنسـان. فـهـو مـسـتخلص من نـبتة شـديدة السـمية تـسـمى بالريبسـيد RAPESEED. كانت تـسـتـعمل فى أوربا بواسطة المزارعين لإجـهاض المـواشى حينما يـعم القحط وتـنخفض نسبة الأعلاف والمـراعى. ويستعمل المخفف مـنها مع الزيت العطرى للخشب الوردى لإجهاض النساء. |
,,,,,,,,,,,,,,,,,,,,,,
الاستاذ الفاضل عبد الرحمن
شكرا على هذه المعلومات القيمة والمفيدة
تراهو نحن كنا مغشوشين ساكت وبناكل في زيت الكانولا وندور عليه في الدكاكين ... والحمد لله القرينا كلامك وإلا كنا ماشين في طريق الهلاك
ويا النصري اقرأ الكلام ده كويس لأن الاستاذ عبد الرحمن بيقول الزيت ده يتم تسويقه في كندا واسمه منبثق من اسم كندا واويل..بعد كده نشوف زيت الزيتون بوين.. ولكن ما سمعنا بزيت اسمه زيت العنب.. وهل فعلا متواجد في السوق؟؟
والله يديكم العافية والصحة
| |
|
|
|
|
|
|
|
|
|
Re: ...انت للضُرُس عرديب.. (Re: اميرة السيد)
|
يا سلام استاذنا الفاضل عبدالرحمن
والله العظيم دى معلومة كان ممكن يغيبوها منى المجرمين ديل لسنين وسنين
كل مرة امشى السوبرمات واخم فى زيت الكانولا ..مرة بالجوالين ومرة بالصفائح
وفرحان بالرخصة فى السعر والاسم التجارى الجذاب ....
مشيت قوقلت الزيت ..فى واحدة من الصفحات لقيت الشكلة عجاجها فوق بين
المغيبين امثالى والناس الناقشة مكر الراسمالية المتحالفة مع المؤسسات العلمية
الوصلة هنا
http://chowhound.chow.com/topics/361304
اطرف حاجة انو البذرة الاصلية اسمها rape (بمعنى اغتصاب) ..جماعة السوق غيروها .......
الزيت فى نظرى هو ملك التحوير الجينى ... او معنى اخر من الفسيخ شربات....
الناس ديل لو عندهم شجرة نيم ممكن تدخلوها المعمل ويطلعو منها زيت ويسوقوهو على انه افضل
زيت فى الدنيا ....
فى زيت اكتشفه بالصدفة قبل حوالى سنة ..التفاصيل فى االمداخلة التانية (لضيق الوقت)
| |
|
|
|
|
|
|
|
|
|
Re: ...انت للضُرُس عرديب.. (Re: اميرة السيد)
|
الأخت الكـريمة اميرة السيد
لك التحايا والشـكر
زيت بـذور العنب من أحـسن الزيوت وهـو مـخفض للكلسترول والدهون الثلاثية. وبه كميات طيبة مـن الفيتامين A وC و E والأوميقا 3 و 6 و9 وعدد آخر من مضادات الأكسدة. وممتاز جدا فى الطهى والتحمير لأن تحمله للنار حوالى ثلاثة أو أربع مرات ضعف الزيوت العادية (426 درجة). ولانه لا رائحة ولا لون له (يعنى دهبى فاتح جدا وشفاف) يـضاف إلى الروائح الزيتية الغالية كالصندلية مثلا لتخفيفها أو غشها. وهـو مفيد جدا للبشرة والشعر ومرض السكرى وواقى من السرطانات والشيخوخة.
ويسـمى Grape Seed Oil وأحـسن مكان أنا لـقيته فى Trader Joe's لأن فى كل البقالات المتخصصة والعـربية يباع بضعف أو ثلاثة أضعاف سـعـر Trader Joe's
وطبعا تـريدر جوز Trader Joe's شركة متاجر بقالة من كاليفورنيا ولها فروع فى أغلب المدن الأميريكية وعندها كم فرع فى نيويورك ومنتجاتهم جيدة جدا ورخيصة مقارنة بالأستوب أند شوب أو السـيف واى.
وفى مرة قادمة بإذن الله سـأسـتفيض فى شـرح الفوائد الصحية والعملية لزيت العنب
وللجميع أطيب المنى
| |
|
|
|
|
|
|
|
|
|
Re: ...انت للضُرُس عرديب.. (Re: عبدالرحمن إبراهيم محمد)
|
النصري أخوي
وضيوفه الأكارم ...
في مثل هذه البوستات تطيب القراءة بأدب ...
لكن معلومة ذكرها الأستاذ كبر ... وقفت عندها ...
يقول أن الثعابين لا تأكل اللحم ...!!! ... إما أنه لا يقصد الثعابين التي نعرفها ...
أو أنني لم أفهم ما يرمي إليه ... فالثعابين تأكل الجراد والضفادع .. بل وحتى الطيور في أوكارها ...
أذكر في نهاية السبيعينات كنا بملكال حيث كان والدي يعمل معلماً بمعهد التربية ملكال ... وكان منزلنا محاطاً بالأعشاب الغزيرة من كل الاتجاهات
وجدنا ثعباناً يلتهم ضفدعة .. وكنا وقتها صغار السن فنادينا بعض طلاب المعهد فقتلوه ... وتركوا بقية الضفدعة في مكانها ... فحضر آخر شبيه له تماماً
وأخذ يلتهم في ما تبقي من الضفدعة ... فجاء الطلاب ثاينة وقتلوه ... وعندنا في الإرث أن الثعبان إذا ما قتل .. تأتي أنثاه لتنتقم له .. أو العكس ...
ولأن والدي قد درس بمعهد التربية الدلنج .. وعمل بأنحاء متفرقة من كردفان كنا في بعضها مرافقين له . فإن ذاكرتنا تختزن الكثير من القصص والحكايا
عن الأشجار والحيوانات ..
| |
|
|
|
|
|
|
|
|
|
Re: ...انت للضُرُس عرديب.. (Re: عبد الباقي الجيلي)
|
أخوى النصرى سلام
Quote:
الزيت فى نظرى هو ملك التحوير الجينى ... او معنى اخر من الفسيخ شربات....
الناس ديل لو عندهم شجرة نيم ممكن تدخلوها المعمل ويطلعو منها زيت ويسوقوهو على انه افضل
زيت فى الدنيا ....
|
وأنت قالـولك ماسووهـا؟
ياخ زيت النيم دا واحد من أغـلى الزيوت ويـسـتعمل لعلاج الـقروح والجروح الـمـزمنة والإلتهابات الجلدية وأمـراض الجلد المستعصية والأمراض الفطرية وهـو فعال جدا فى إستئصال قـمل الجـرب من تحت الجلد. ويـستعمل أيضا فى تركيبات طرد الديدان من الإمعاء وفى شامبوهات الشعر لمنع التسـاقط وفى أدهنة تـنعيم البشرة، وفى علاج تقرحات الجلد ويستعمل فى صناعة المبيدات الحشرية الطبيعية.
ولك التـحايا
| |
|
|
|
|
|
|
|
|
|
Re: ...انت للضُرُس عرديب.. (Re: عبدالرحمن إبراهيم محمد)
|
شكرا ليك مرة ثانية استاذنا عبد الرحمن على معلوماتك عن زيت العنب.. ووجدت ان متاجر تريدار جونز ما كثيرة في نيويورك وفي كونيتيكات ولكن الحمد لله وجدت ان هناك متجر بهذا الاسم في مدينة قريبة من المدينة التي اسكن بها واسمها داريين Darien وكذلك ثلاث متاجر في مدينة نيويورك.. وسوف نحاول نزوره في عطلة نهاية الأسبوع لعل وعسى نجد مثل هذا الزيت المفيد.. ومنكم نستفيد.. وبدون هذا المنبر الاسفيري العظيم لم نكن لنعلم بهذه المعلومات القيمة عن فوائد الأشجار في جميع المجالات... وجزاكم الله خير الجزاء .. والدعاء موصول لصاحب الحوش والمنبر الاسفيري البديع الذي اتاح لنا مثل هذا التواصل الاجتماعي الفريد ..
والله يديكم العافية
| |
|
|
|
|
|
|
|
|
|
Re: ...انت للضُرُس عرديب.. (Re: اميرة السيد)
|
برلمونا فى معهد الكليات عبدالباقى .
كيفك ؟؟ قرات لك عدة مداخلات دسمة فى احدى البوستات الدينية
حاجة تمام ,,,,
اظن كبر يقصد هناك فرق بين الثعبان والاصلة....
الثعبان هو ماوصفته انت ..ياكل صغار الحيوانات من فيران وضفادع
اما الاصله فغذاءها الرئسى الماعز والغزلان وبقية الmammals
والله اعلم
| |
|
|
|
|
|
|
|
|
|
Re: ...انت للضُرُس عرديب.. (Re: النصرى أمين)
|
استاذنا عبدالرحمن
قبل فترة كنت بتجول فى داون تاون كالقرى ودخلت الحى الصينى (chinatown) ... من الفضول
دخلت محل بتاع اعشاب .....ياالله ....حاجة تحير الدماغ ...الناس ديل لم يتركو شجرة او عشب
ديل لم يتركو سمكة او طيرة او اى شئ الا ووجدو استخدام مفيد له ....
نحن على العكس ...يادوب الحاجات الطاغية فى العادات والتراث التى لم تندثر ....
بعد مائة عام حكاوى كبر عن حبوباته وفهمهم للبيئة الحولهم واستفادتهم منها كله حينتهى
ويضيع ,,,,,, ده طبعا الا افترضنا انو البيئة دى لم تتدمر وتنمحى من وجه الارض بسبب سوء
الاستخدام .....
الطريف ...امس .....هنا فى كندا كان يوم الشجرة ......
-----
هناك زيت بهاتى بيهو منذ سنوات وحاولت تسويقه للشرق الاوسط الا انهم لا يتحمسون
للجديد ..... الزيت اسمه تامانو tamanu وهو ثمرة شجرة عملاقة كالنيم تنتشر فى جذر المحيط الهادى..
للحصول على الزيت يجب وضع الثمرة تحت اشعة الشمس لعدة اسابيع حتى يتحول لونها للاحمر الداكن ..
الزيت عجيب فعلا ... وينفع مع بشرتنا السمراء وشمسنا اللاهبة
| |
|
|
|
|
|
|
|
|
|
Re: ...انت للضُرُس عرديب.. (Re: النصرى أمين)
|
استاذنا الفاضل عبدالرحمن
تحدثت اليوم بالتلفون مع الاخ العزيز جدا عادل سالم وهو يبلغك تحاياه
من قطر .....عادل كان يعمل معك فى دار النشر فى بداية الثمانينات...
يقول انك قد لا تزكره ولكن لاينسى ابدا تلك الايام فى جامعة الخرطوم وانت مدير لدار النشر..
وعدنى بالمشاركة فى البوست
| |
|
|
|
|
|
|
|
|
|
Re: ...انت للضُرُس عرديب.. (Re: النصرى أمين)
|
النصرى أخـوى
كتـر الله ألف خـيرك.
Quote: استاذنا الفاضل عبدالرحمن
تحدثت اليوم بالتلفون مع الاخ العزيز جدا عادل سالم وهو يبلغك تحاياه
من قطر .....عادل كان يعمل معك فى دار النشر فى بداية الثمانينات...
يقول انك قد لا تزكره ولكن لاينسى ابدا تلك الايام فى جامعة الخرطوم وانت مدير لدار النشر.. |
ياخـى الفترة ديك كانت من أهم فترات حـياتى العملية والفكرية والوطنية فائدة وعطاءا
وأنا أذكر الناس فردا فردا من قسم التحرير وقسم التوزيع والبيع والمطبعة ودار الكتب.
فللأخ عـادل سالم تحيتى وتقديرى.
وكـنت قد بدأت فى سـرد ذكرياتى من يوم عينت مديرا للقسم التجارى إلى حين تعينى
مديرا تنفيذا للدار والتى أعدها من أهم الإنجازات فى تاريخ السودان والتى دمرت مع
مادمر من مرتكزات النهضة والفكر.
وتجد بدايات ذلك الخيط فى هذه المداخلة ومابعدهـا:
Re: بوسطن تكرم البروفيسور عبدالرحمن إبراهيم...Photo
ولك مودتى وشـكرى إلى حـين عودة إلى الكثير مما كتبت وكتب عـزيزنا كبر.
| |
|
|
|
|
|
|
|
|
|
Re: ...انت للضُرُس عرديب.. (Re: عبدالرحمن إبراهيم محمد)
|
وين انتو يا جماعة.. وفتشت البوست ده كم مرة وما لقيته.. وحتى اتذكرتكم في بوست الصوفية واشرت ليكم بالاسم.. وتراني انا ما كضبت لمن قلت نحن بنتلقى الثقافة وهذا العلم الغزيز عن الأشجار وانواعها والأساطير التي حولها من موسوعات علمية..ولكم التحية والتقدير أعزائي النصري وبروف عبد الرحمن والموسوعة كبر.. وما زلنا نطمع في المزيدوالجديد.. وانا كمان جاياكم بجديد عن شجرة احتمال ما تكون سمعتوا بيها..
والله يدكم العافية
| |
|
|
|
|
|
|
|
|
|
Re: ...انت للضُرُس عرديب.. (Re: اميرة السيد)
|
أخـوى النصـرى سـلام
ويـن الحـى بيك وبى خينا كبر؟
إنت قلت:
Quote: اما الشئ الحيرنى فهو العنبر فلا هو صخور ولا هو نبات..استطعت بعد مجهود شاق
الحصول عليه من تركيا .... وقد كان مطابق للمواصفات تماما ,,,, |
ياصديقى العـنبر وفى رواية بعض أهـل اليمن والصومال والسودان تقلب النون ميما(ميم) فيقولون عـمبر ويسـمى به الرجال والنسـاء. وفى إعتقادى أن المقصد فى أصله لـنوعـين مـن المشـار إليه، ناجم عن الخلط بينهما..
فالعـنبر يـنـقـسـم إلى قـسـمين كلاهما أغلى مـن الذهب واحـد أصله حـيتانى أى من حـيتان البحـر وثانـيهما مـن الأشـجار ويسمى بالكهرمان. فالكهرمان فى أصله عـصارة صـمغية-لبانية تـحـجرت مع مرور الزمان حتى صارت أحـجارا كريمة وقد تجد فى داخلها بعض الحشرات التى غلفتها العصارات قبل التـحـجـر. وذلك مصدر معلوماتى غنى للباحثين فى عـلوم التاريخ السحيق. هـل تـذكر فيلم جـيراسـيك بارك حيث حصل على دى إن آيه الحيوانات المنقـرضة من الدماء التى إمتصتها منهم بعوضة قـبل تـحـجـرها داخل الكهرمان!
ويستعمل العـمبر أو الكهرمان فى تـزيين صولجانات وتيجان الملوك وقلائد الأغنياء من النساء وحليهـن كأحجار كـريمة. ويـسـتـعمل الكهرمان كذلك فى عمل الطلاسم والسحر ويـعتبر ذا قوة خارقة. ويـذاب بمحاليل عطرية معينة لإسـتعماله فى صناعة العطور كمثبت فعال ويستعمل أيضا فى التراكيب العلاجـية العشبية والمحفزات الجنسية للرجال والنساء.
وأكثر الأماكن التى يتواجد فيها هى المناجم والمحاجـر وشـواطئ البحار والمحيطات التى تتجمع فيها كنتيجة لحمل الأمواج لها وغسلها من مـتحجرات أشجار ماقبل التاريخ. ومـن هـنا يـنشـأ الخطأ فى الخلط بين العمبر الكهرمانى والعنبر الـحيتاتى. إذ كلاهـما تـحمله الأمـواج ولـكن الـفـرق أن الـعمـبر الكهرمانى ثـقيل فلا يطفو على سـطح الماء أو الأمواج كالعببر الحـيتانى الذى تقل كثافته عـن الماء فـيطفو عـلى السطح دائما. لذا فإن الصيادين الذين يجمعونه من الشواطئ يـظنون أن كلاهما العـنبر الحيتانى. والفـارق البسيط بـينهما بخلاف الكثافة هـو شـفافية العمبر الكهرمانى كالزجاج ولونه البرتقالى الذى يضرب إلى البنى الفاتح ومن هنا إسـتعمله الأوربيون للإشارة للون العنبرى.
أما العنبر الحيتانى فهو موضوعنا القادم بإذن الله وبـعـدها نـحمل على صديقنا كبر لحمله عـلى صـديـقى متجنيا.
مـع أطيب الود للجـميـع
| |
|
|
|
|
|
|
|
|
|
Re: ...انت للضُرُس عرديب.. (Re: عبدالرحمن إبراهيم محمد)
|
اهلا استاذنا عبدالرحمن
| Quote: ويـذاب بمحاليل عطرية معينة لإسـتعماله فى صناعة العطور كمثبت فعال |
وده بالظبط الغرض من شراءه...الغريبة بعد ان اكملنا الصفقة وتم الاتفاق مع المنتج التركى
على الشحن وارسال القروش (طلبت منه REFERENCE هنا فى كندا واتصلت بيهم لاتاكد من انه تاجر
حقيقى ...المهم بعد ده كله سالتهم انتو بتستعملو العنبر ده شنو ...لمن بدو يشرحو فقدت الحماس
للمعرفة واكتفيت باكمال البيعة ,,,,, الخلاصة انهم بستعملو فى صناعة العطور (الغالية منها)
| |
|
|
|
|
|
|
|
|
|
Re: ...انت للضُرُس عرديب.. (Re: النصرى أمين)
|
| Quote: يانجاه القضيم ده فايل اتمسح من ملفات زاكرتى منذ وانا صغير ...الان حصل recovery للملف |
تصدق يا النصري انا كنت في السودان قبل 8 اشهر تقريبا و طبعا عند الرجوع كنت محمل بمجموعة من الاكياس التي بها ما بها. و عندما وصلت مع الدوشة ديك اغلب الاكياس وجدت طريقها الي المخزن ما عدا كيس الكركدي و القنقوليس.
قبل كم يوم دخلت المخزن (اذا افلس التاجر راجع دفاتره) افتش في الاكياس. انقر ما لقيت كيس قضيم كبير قاعد.
قمت قلت انتو الرمضان قرب و لا لسه. بيني و بينك ما حأنتظر رمضان.
| |
|
|
|
|
|
|
|
|
|
Re: ...انت للضُرُس عرديب.. (Re: yaser mostafa)
|
غايتو يا مهجوب عندى طلب لكن خايفك تكون متخلف تكنلوجيا
ممكن تصور لى القضيم ده؟
صور مختلفة وبزوايا مختلفة ويا ريت لو كان التصوير فى الشمس....
بعد داك ارفع الصور هنا .....
لو الحكاية معقدة شديد شوف واحد من الصبيان فى الحلة يعملا
وتكون عملت فينى معروف شديد....
يحكو عن الفنان الراحل يسن عبدالقادر ان الطبيب منعه من اللحوم
قالو كلو يوم يجيبها فى الغدا ويقول لاولاده اكل دي ..اكل دييييييك
انا دلوقت حاتماطق اون لاين مع القضيم...
احكى ليك حاجة تانية
قبل فترة زوجتى كانت فى مكان فيهو اشجار تفاح وقامت بقطف مجموعة منو
كان صغير الحجم تقريبا فى حجم الليمون الكبار ...المهم قعد فى العربية
فترة طويلة احتمال اكتر من اسبوعين ......
يوم جيت اسوق العربية لقيت الكيس بتاع التفاح ...قضمت واحدة منه
والله العظيم جانى طعم خلانى ازازى ....ليس طعم تفاح على الاطلاق
غايتو اقرب للنبق النى او حتى القضيم
طعم غريب لكنه لذيذ لذة مبالغة فيها
ناوى السنة الجاية افتش لى شجرة تفاح واعيد التجربة والزكريات
| |
|
|
|
|
|
|
|
|
|
Re: ...انت للضُرُس عرديب.. (Re: النصرى أمين)
|
اهلا وسهلا ياسر مصطفى
عيد مبارك وكل عام وانت بخير
هذه البوست سيزين مكتبتى كواحد من افضل بوستاتى
الفضل يرجع لجميع المتداخلين خاصة استاذنا عبدالرحمن واخونا كبر
والاخ محجوب وبقية العقد الفريد
| |
|
|
|
|
|
|
|
|
|
Re: ...انت للضُرُس عرديب.. (Re: النصرى أمين)
|
أخى النصرى آسف لعدم إيـفائى بوعدى لكثرة المشغوليات والإلتزامات.
وها أنا أعود لأكمل مابدأت وفى ذهنى أيضا ردى الواجب للأخ العارف كنز الثقافة-الحضارية كبر.
قلت فى مداخلتى السابقة أن العنبر ينقسم إلى نوعين رئيسيين العنبر الكهرمانى والذى يتم بتحجر المواد الصمغية فى العصارات النباتيـة. أما النوع الثانى فهو العنبر الحيتانى. وهـو موضوعنا هـنا.
والعنبر الحيتانى ينقسم إلى ثلاث أنواع تـزداد قيمة كل واحد منها بتواجده وطريقة جمعه وكلها مصدرها الحوت العنبرى. وتختلف ألوانه بإختلاف البحـر أو المحيط الذى يجمع منه، فيكون منه ماهو أصفر أو أزرق أو رمادى أو أسود، أو أبيض وهنا يجب الحذر من الأبيض إذ أن زبد البحر يباع على أنه عنبر ومنه ضرر أذا أبتلع بعكس العنبر الذى سنرى فوائده الجمة. فزبد البحر مادة جيرية تشبه الطرور فى هشاشتها وغالبا ماتتساوى قطعها فى الحجم والشكل بخلاف العنبر الذى يجئ فى كل الاشكال والألوان وقوة وحدة أو ضعف رائحته. وهناك أيضا العنبر المغشوش بتسييح الشمع واللبان وخلطه بالجير وإضافة قليل من العنبر والألوان.
والنوع الأول من العنبر وهو أقلها قيمة، وإن كان سـعره يفوق سـعر الذهب فى بعض الحالات، يوجد إما على أطراف الشواطئ أو طافيا على سطح الأمواج. وهـو كالنوعين الآخرين مصدره نوع معين من الحيتان تمتاز بكبر الرأس، مما يقود إلى الإعتقاد أن مصدر العنبر هو مخاط الحوت المتراكم فى جيوبه الأنفية. وهـذا فهم خاطئ.
فمصدر العنبر هو إمعاء الحوت أو كبده. ويسود الإعتقاد أن الحوت يفرز إنزيمات وهرمونات هضمية أو مناعية لتحييد أو تغليف المواد الضارة التى تدخل إمعاءه ثم يقذف بها فى البحر كإستفراغ يتم تكوره ثم تصلبه نتيجة دورانه مع الأمواج ويجف بفعل الحرارة أو الهواء.
أما النوع الثانى فهو الذى يـسـتخـلص من إمعاء الحوت بعد صـيده. وأما النوع الثالث الذى يضرب لونه إلى الرمادية الممزوجة باللون البنى الفاتح (العنبر الأشهب) فيقال أنه يـسـتخلص من كبد الحوت حـيث يتجمع فى شـكل حصاوى كبدية تحتوى على إنزيمات وهرمونات فائقة النجاعة. وهو أغلى وأندر الأنواع الثلاثة. وهـو أفضلها فى العلاجات.
ويشتمل العنبر على الدهون الثنائية والدهون الفسفورية والأحماض الأمينية أوميقا 3 والليثيثين البحرى والآسـتاكسانثن أو الكاروتين المشبع بالأوكسجين وهو الذى يمنح سمك السالمون لونة البرتقالى الضارب إلى الحمرة والكاروتين ليس مضادا للتأكسد فقط ولكنه يتحول إلى الفايتامين ألف الضرورى الذى يحتاجه الجسم يوميا كمضاد للتأكسد وتقوية المناعة ومقاومة الجراثيم وتقوية البصر والقلب ويحمى من الجلطات وانواع من السرطانات. ويحتوى العنبرعلى مغذيات نباتية
ويدخل العنبر فى صناعة العطور الغالية كمثبت للروائح. أما قيمته الحقيقية فهى فى إستعماله فى عدد من تقاليد الطب الطبيعى أو الشعبى فى الهند والصين وأفريقيا واليونان. فيتم حل العنبر فى دهن الورد ودهن الياسمين الصافيين وخلاصة الصندل ومركبات نباتية أخرى، لا يعرفها إلا عدد قليل جدا من المتخصصين الذين يرثونها أبا عند جد. وبعد تجهيز الخلطة يتم إذابة مقدار غمسة رأس عود كبريت فى الشاى أو القهوة. ويستعمل العنبر فى منع الـتأكسد وعلاج الأمراض الجلدية المستعصية وضغط الدم والضعف أو الهزال أو البرود الجنسى، وفى تنشيط العقل والذاكرة لذا يستعمل فى علاج الخرف، ويستعمل أيضا فى علاج أمراض الرطوبة والسرطان والقلب والدورة الدموية والفالج الذى ينجم عن الشلل المصاحب للجلطة الدموية.
وقد شـهدت والدى، الحاج إبراهيم محمد عبدالرحمن الشهير بالبربرى، عليه رحمة الله يعالج بالعنبر حالات مستعصية من الفالج عجز الطب عن علاجها. وفى إعـتقادى الآن أن نجاح العنبر فى علاج الجلطة وأعراضها ونتائجها إنما هو ناجم من إحتوائه على الدهون الثنائية والدهون الفسفورية والأحماض الأمينية والأوميقا 3 والليثيثين البحرى والآسـتاكسانثن أو الكاروتين المشبع بالأوكسجين التى يستخلصها الحوت من زيوت الكريل والتى تعتبر الغذاء المفضل للحيتان. والكريل حشرات بحرية تشبه الجمبرى ولكن لايتحاوز طولها السنتيميتر إلى السنتمترين، وزيتها من أغلى مصادر الأوميقا 3 والزيوت الإحماض الأمينية الأخرى.
وإلى ردى على الأخ الحبيب كبر.
| |
|
|
|
|
|
|
|
|
|
Re: ...انت للضُرُس عرديب.. (Re: عبدالرحمن إبراهيم محمد)
|
عزيزى الفاضل بروف عبدالرحمن
اول حاجه معذره لتاخر الرد فالايام الاخيره كانت عامره بالاحداث وان شاء الله
متفائلين 2013 يكون عام خير وبركه {غايتو ربنا يستر فقد وضعنا كل البيض فى سله واحده}
أظن العنبر الذى قمت بشرائه من تركيا قبل سنوات عديده اظن انه عنبر صخرى وليس من النوع الذى يستخرج من الحوت
السبب وراء الاعتقاد ده ان منطقه تركيا غير معروف عنها مناطق تعيش بها الحيتان ايضا اظن اثناء مفاوضات الشراء تم زكر ان
العنبر نتيجه لعمليه استغرقت الاف السنين...
وخوفا من الاحتيال طلبت من البائع ان يمدنى ب reference هنا فى كندا حتى اتاكد من مصداقية البائع وبعد ان تم ذلك قمنا بالشراء .اظن ان قيمه 3 كيلوجرام حوالى تلات اربع الف دولار وقد انبسط المشترين من العنبر غاية الانبساط و كرروا الشراء عدة مرات بعدما فطونى طبعا....
ياريت كبر يمر من هنا ويتحفنا بما عنده من عجائب
| |
|
|
|
|
|
|
احدث المقالات بسودانيزاونلاين اليوم
| |
Mahjob Abdalla
Kabar
مصطفى عبيد
عبدالرحمن إبراهيم محمد
Rawia
munswor almophtah
Nagat Sid Ahmed Elshiekh
عبد الباقي الجيلي
فيس بوك
تويتر
انستقرام
يوتيوب
بنتيريست