|
|
|
 Re: مسمار جحا السوداني (Re: درديري كباشي)
|
اجيكم لمسمار جحا بطل القصة .. احد اصدقاؤنا الاسرية قرر ان يتخذ قرارا هو واسرته كمعظم السودانيين هنا وهو تسفير اسرته واغلاق البيت والتحول الى سكن العزاب .. وكان هذا الصديق مكنى بابو علي عادة اهل هذا البلد ونسبة الى ابنه البكر .. سفر ابو علي اسرته وباع كل اثاث بيته وسلم الشقه لاصحابها ورحل الى بيت العزاب ... غير انه بعد يوم او يومين اتصل علي ابو علي ودار بيننا الحوار التالي
| |
 
|
|
|
|
|
|
|
|
Re: مسمار جحا السوداني (Re: درديري كباشي)
|
انا : الو منو معاي
ابو علي : اهلا كيفك يا ابو احمد كيف احمد واخوانه وام احمد
انا : اهلا اهلا ابو علي شيخ العزابة اها عملت كيف بعد سفر الاولاد
ابو علي : الحمد لله يا ابو حمد وان كان الحياة بقت مسيخة وجافة لكن ماشي بس ما اطول عليك يا ابو احمد عندي طلب صغير كدا ..
انا : اتفضل يا ابو احمد انت تامر امر قول .
ابو علي : زي ما انت عارف انا بعت العفش كله الا التلاجة زي ما عارف هي امريكية اصلية تمنتاشر بوصة ماركة كلفنيتر ... انا لو بعتها يمكن ما اقدر اشتري زيها تاني وهي عزيزة علي ... اها انا احتفظت بيها .. لكن لقيت هنا العزاية معزبنها شديد اليوم كله يفتحوا ويقفلوا فيها تقول حمام ....
انا مشجعا له في المواصلة بعد ان اثارني الفضول : ايوا واصل يا ابو علي
ابو علي : اها انا قلت اجيبها عندكم تحفظوها في المطبخ وتشغلوها منها تحافظوا عليها ومنها تفيدكم ..
قلت : طيب ابو علي نحن ليه نشغلها ما نسيبها مقفولة ونحن تلاجتنا مكفيه الحمد لله ..
قال: لا ما انت ما عارف انه التلاجة المستعمله لو سبتها من غير تشغيل حا تتعفن وتبوظ فهي لازم تظل شغالة ..
قلت : ما مشكله يا ابو علي هاتها معاك ..
| |
|
|
|
|
|
|
|
|
|
Re: مسمار جحا السوداني (Re: درديري كباشي)
|
وفعلا شاورت ام احمد وضايرنا مكان في المطبخ لاستقبال التلاجة الضيفه ... وفعلا قلنا يمكن توسع علينا شوية وخصوصا رمضان على الابواب .. ولكن انا شلت هم اذا كنت انا ما قادر املا تلاجة واحدة في الشهر الان اصبحت انا راجل التلاجتين ودي مصيبة لوحدها ... لكن انا ما بحرج صاحبي ابو علي وكله يهون في سبيل الصداقة ..
الى ان اعود لباقي التلاجة وتعرفوا انه انا بسببها كرهت التلاجات بل حتى الحروف التي تكون اسمها
| |
|
|
|
|
|
|
|
|
|
Re: مسمار جحا السوداني (Re: درديري كباشي)
|
انا نقلت لابوعلي ترحيبنا بثلاجته وانها راح تشرفنا وتنورنا عفوا اقصد تبردنا .وفعلا بالعصر رن جرس الباب وجاء احمد ليقول لي انه ابو علي بالباب ومعه حماله من البنقال يحملوا ثلاجة .. و انا خرجت مرحبا به ..
هلا هلا ابو علي اتفضلوا انت والتلاجة البيت بيتكم ....
ابو علي : قول لام احمد تتضاير عشان نحن حا ندخل المطبخ مباشرة ... يلا يا رجال اتفضلوا دخلوا التلاجة .. يا ابو احمد تعال ورينا مكان تلاجتنا وين ..
وفعلنا دخلنا جميعا اتجاه المطبخ اول ما عرضت لابي علي مكان تلاجته احتج بشدة
ابو علي قائلا : لا لا لا يا ابو احمد المكان دا كاتم ما بينفع مع تلاجتي لازم يكون مكان فيه تهويه عارف لانه دي تلاجة امريكية ما متعودة على الحر .
قلت : التلاجة ما متعودة على الحر ومال هي وظيفتها ايه هي اصلا .. ؟؟؟؟
| |
|
|
|
|
|
|
|
|
|
Re: مسمار جحا السوداني (Re: درديري كباشي)
|
قال ابو على : ما لازم تكون المكنة معرضة للتهوية
قلت : طيب انت بنفسك اختار المحل المناسب
قال : لازم تبادل المواقع يعني تخلو تلاجتكم لجوة وتلاجتي انا لبرة ..
قلت . ليه ونحن تلاجتنا صناعة محلية ؟؟؟ ما هي سامسونق وماركة عالمية ومعروفة ..
قال : ياخي دي صناعة كورية والكوريين ديل ناس بعيد عنك بياكلو الكلاب ..
قلت : وبدأ دمي يغلي غيظاا ... والكلاب الدخلها شنو في موضوع التلاجات ؟؟
قال : اقصد انهم ناس متعودين على الحر ، لحم ال###### مو حار ما تشوف ال###### طول النهار مطلع لسانه عشان اللحم مسخن عليه ..
قلت : شوف هنا يا ابو علي ما تجننا معاك فضي المطبخ دا كله وخت تلاجتك في المحل اليعجبك وخلصنا من الموضوع دا .
وفعلا اصر ابو علي انه يحشر ثلاجتنا الكورية للداخل ويخلي تلاجته الامريكية بنت الاصول هي في الواجهة مقابلة للباب .. رغما انه ام احمد كادت تنفجر بالغيظ من ابو علي بعد ما سمعت كلامه الا انه انا اشرت لها بالصمت حتى نعدي هذا اليوم على خير .
| |
|
|
|
|
|
|
|
|
|
Re: مسمار جحا السوداني (Re: درديري كباشي)
|
ابو علي بعد ان وضع تلاجته وحاسب الحمالين وقف يتامل في تلاجته كانه عريس ينظر الى عروسه في ليلة زفافهما وختمها بعبارات الاعجاب ( هييع دي التلاجات ولا بلاش شوفها ما نورت لكم مطبخكم بيتكم ذاته زادته قيمه تقول لي صام صونق ولا فطر نحن مالنا.)
اما أم احمد لم تعد تملك نفسها من الغيظ وردت قائلة : هوي يا راجل انت السلطك علينا شنو مالا تلاجتنا شكينا ليك منها ؟؟؟؟ . بعد مباصرة سكت ام احمد وادخلتها في غرفتها وخرجنا انا وابو علي ناحية الصالون وهو يملي علي الوصايا العشرة للحفاظ على التلاجات .. وكيف انه تلاجته ظلت تشتغل ثلاث سنوات دون ان تحتاج لصيانة .. والى خطوات المحافظة على التلاجات تتبع التالي ( اتهري انا لوحدي لازم تشتركوا معي )
| |
|
|
|
|
|
|
|
|
|
Re: مسمار جحا السوداني (Re: درديري كباشي)
|
عدنا للوصايا :
ونحن ذاهبون ناحية الصالون ابو علي نادى باعلى صوته : الشاي يا ام احمد .. ( الظاهر عليه الراجل ناسبنا بحكاية التلاجة دي وبقى البساط احمدي فعلا) .... طبعا ام احمد بكل غيظ راحت ناحية المطبخ تصلح الشاي .. وانا شمتان منها تستاهل لانه هو زوج صاحبتها وفرضت علي صداقته فرض وهو القالت عليه يضحك لدمي انا الخفيف .. اليوم اثبت لها انه دمه اتقل من زيت الجربوكس ..
وفي الصالون بدا ابو علي يعلمني كيف اعتني بصحة التلاجة وهو بالطبع يقصد تلاجته هو
قال : اولا التلاجة لا يجب ان تترك فاضية لازم تملاها بالخيرات . يعني لابد من الخضر والفواكه لانه بتحافظ على القدرة التبريدية للتلاجة بدل هي ما تنفخ في الفاضي .. يعني تلاجتي دي لازم يكون فيها خضار وفواكه ماتكون بطنها فاضية .
قلت : شنو هو الحكاية يا ابو علي هو انت ممسكنا تلاجة ولا بقرة ؟؟؟ وانا ما عندي قدرة املا تلاجة واحدة لمدة شهر حا املا تلاجتين كيف ؟؟؟
قال : انت ما مضطر تملا الاثنين لكن لازم تعدل بيناتهم ؟؟؟
| |
|
|
|
|
|
|
|
|
|
Re: مسمار جحا السوداني (Re: درديري كباشي)
|
قلت : يا راجل انت عاوز تجنني اعدل هو انا اتزوجتها ما انت جبتها لي براك ؟؟
في هذه الاثناء دخلت ام احمد وعيونها محمرة يبدو انها سمعت جزء من الحديث لانها وضعت الصينية بعنف وحدجتني بنظرة شريرة ( تعرفوا تقولوا حدجتني حدجتني عشرة مرات ) المهم انا خفت انه ام احمد تكون فهمت شئ خطا لانه نظراتها ما بتطمئن .... ابو علي ما اكترث للموضوع وواصل في الوصايا قائلا : يا ابو احمد انا اقصد بتعدل يعني لو جبت كرتونة طماطم تخت نص هنا ونص هنا و لو جبت بطيخة تقسمها نصين تخت نص هنا ونص هنا .. اها لحمة برضو تقسمها ... يعني نفس مشترياتك العادية بس تقسمها بالتساوي ..
قلت شوف هنا يا ابو علي : انا حكاية العدل بتاعتك دي ما دخلت لي في مخي وانا تلاجتك دي غير الموية ما عندي ليها حاجة .. فكرت انه الرجل رح يزعل ويخارجنا من تلاجته دي ..
| |
|
|
|
|
|
|
|
|
|
Re: مسمار جحا السوداني (Re: درديري كباشي)
|
قال ابو علي : خلاص طيب ما عندك مشكلة انا خضار تلاجتي ولحمتي بتولاهم براي ..
قلت : دا كلام شنو كمان يا ابوعلي عاوز تصرف علي في بيتي كمان ؟؟
قال : اصرف شنو انت فهمتني غلط ... انا قصدي انه كل يومين بجي بخت لحمة او خضار في تلاجتي بعد يومين اجي اشيلهم واجيب غيرهم وهكذا ..
قلت : تقصد يعني مسمار جحا
قال : كيف يعني مسمار حجا ما فهمت قصدك ؟؟؟ (يبدو انه ماسمع بحكاية مسمار جحا دي كمان)
| |
|
|
|
|
|
|
|
|
|
Re: مسمار جحا السوداني (Re: درديري كباشي)
|
رجعنا
راح ابو علي كما ذكرنا ووقفت ام احمد في راسي تهيجها الهواجس وكلام ابو علي الذي يجنن بلد .. وانا بيني وبين نفسي عذرتها لانه ماممكن شخص يتحدث عن عدل بين انثين وقسمة الخضار واللحوم بالتساوي ويكون يتحدث عن ثلاجات الا المجنون ابو علي ... لذلك هي قبلت كلامي على مضض بعد ان شعرت اني بدات اتهيج .. ولكن انا بين مغمض ومفتح لاحظتها تبحث في جيوبي وتشم في قمصاني كعادة النساء عندما تساورهن الشكوك . المهم انا طنشت وحاولت انام وفعلا نمت .. غير انه صحوت بعد ساعتين مفزوعا بعد ان رن تلفوني لااكتشف انه هو ابو علي مره اخرى ..
همست في نفسي متعوذا من هذا الشيطان الجديد الذي تلبسنا وام احمد بعد حكاية العدل بين التلاجات هذه لم تدخل في دماغها ولازالت تظن ان في الامر زوجة اخرى وبطريقة آلية خطفت مني الجوال وانا رغم انه حركة خطف جوالي اثارت جنوني الا اني ارتحت لانها اراحتني من الرد على ابو علي ..واصبحت مستمعا فقط لحوارها مع ابو علي زوج صديقتها العزيزة ( لاحظوا بدات اتنكر لصداقته من اول يوم استضفنا فيه ثلاجته ).
| |
|
|
|
|
|
|
|
|
|
Re: مسمار جحا السوداني (Re: درديري كباشي)
|
- الو اهلا يا ابو علي كيف امسيت
- الثلاجة كويسة شغالة ما عندها عوجة
- لا لسع ما ختينا فيها حاجة
- ما عندنا لحمة وخضار
- انت جايي هسع جايب معاك لحمة وخضار ؟؟؟ لكن نحن ما محتاجين .
- انت جايبهم لنفسك عاوز تحفظهم في ثلاجتك خلاص اتفضل تعال في اي وقت ..
انتهت المكالمة وحاولت ام احمد تتفادى نظراتي المحمره بعد ما شعرت انه الدم كاد يغلي في دماغي ... وقلت ليها بعد ساعتين فقط يرجع ابو علي لكابوس الثلاجة من جديد على الاقل ما يبيت الموضوع لبكره .. وفعلا بعد نص ساعة رن جرس الباب ووصل ابو علي محملا باللحوم والخضروات ...
حيانا فعلا متجها ناحية المطبخ مباشرة بعد ان وجد ام احمد تجلس معنا في الصالون مما دل على ان المدخل امنا .. وفعلا دخل ابو علي ناحية المطبخ ورص خضرواته ولحمته في ثلاجته في بيتي ... وانا تملكني الغضب تماما وقررت انه اقوم واطرده هو وثلاجته الى الشارع ,, لولا ان مسكت فيني ام احمد مترجية مني الا احرجها مع صديقاتها وان اتحمل قدر الامكان .. وفعلا حاولت اتحمل وانا انفاسي بين صعود وهبوط... وجاءنا ابو علي في الصالون بعد ان افرغ حمولته في المطبخ ..
قال : مساء الخير يا ابو احمد كيف امسيت ..
انا لم ارد السلام وهاجمته مباشرة في حضور ام احمد
قلت : شوف هنا يا ابو علي حكاية تخلي تلاجتك عندي في بيتي وكل يوم طالع ونازل بكيس خضار الكلام دا ما منطقي ولا يرضي اي احد شوف هنا ومن الاخر عشان ما نخسر بعض .. ارجوك الان امشي جيب سيارة بوكس وخذ تلاجتك بلحمها وخضارها بسرعة قبل ما نخسر بعض وانا ارجوك ودي اخر مرة اكلمك فيها بلهجة مهذبة .
ام احمد انهدشت من لهجتي وجحظت عيناها وكذلك ابو علي .. وبعد صمت استمره لفترة الى ان نطق ابو علي قائلا.
| |
|
|
|
|
|
|
|
|
|
Re: مسمار جحا السوداني (Re: درديري كباشي)
|
حقيقة يا ابو احمد الظاهر انا زودتها شوية وفعلا حكاية الخضار دي ما كانت فكرة صحيحة وانا حا اخذ الخضار واللحمة ثاني بس عندي رجا واحد لكن فقط الثلاجة خلوها عندكم شغلوها بمزاجكم لاني فعلا ما عاوز اخسرها وانا ابصم بالعشرة انه ما اضايقكم واسال منها الا اولادي يرجعوا للغربة مرة ثانية .
- قلت قومي يام احمد فضي الخضار واللحمة الجابهم ابو علي من ثلاجته ورجعيهم له في الكيس .
وفعلا استلم ابو احمد اكياسه وخرج وانا حتى لم اودعه ناحية الباب وكان ممكن اقول لكم انه القصة انتهت لولا انه الثلاجة لازالت تقبع في عقر داري كالمس الشيطاني واذا هذا يعني انه لازال للقصة بقية .
| |
|
|
|
|
|
|
|
|
|
Re: مسمار جحا السوداني (Re: درديري كباشي)
|
ام احمد بعد ان خرج ابو علي جاءتني منكسرة وقالت انها حاسة بعقدة الذنب .
قلت ذنب في شنو نحن ما عملنا له شئ كل الطلبناه منه انه ياخذ ثلاجته او يتركها مثلها مثل اي الة صماء موجودة في بيتنا ..
قالت : انا ما شاعرة بالذنب تجاه ابو علي بل تجاهك انت ؟؟
قلت تجاهي انا ؟؟ كيف اول مره اسمع هذه النغمة ..
قالت : انت ومنذ ان تعرفت انا بمحاسن زوجة ابو علي في استراحة قبل اربعة سنوات وتصادقنا انا كنت بفرض عليك توصلنا وتتونس مع ابو علي زوجها .. وانت اتاريك كنت مهري هري من ابو علي وكل ما تشتكي وتحاول تتهرب من المشوار انا اصر واغضب .. وانت تتنازل وتروح وتجلس بالساعات مع ابو علي . وانا محاسن نكون نضحك ونستمتع بالونسة والعيال مستمتعين مع بعض وانت جالس تنتظرنا مع ابو علي وانت الوحيد متعزب .
| |
|
|
|
|
|
|
|
|
|
Re: مسمار جحا السوداني (Re: مأمون)
|
قلت : شوفي هنا يا ام احمد ابوعلي هو ليس شخص سئ لهذه الدرجة بحيث انه ممكن يشكل موجة عذاب لاي شخص ... لكن ابوعلي له ناسه واصحابه متشابهين في الطباع ولا يطيقون فراق بعض .. انت عندما تفرضيني عليه او تفرضيه هو علي هنا يكون ثلاثة اطراف متضرره اولهم ابو علي نفسه لاني متاكد انه هو ايضا لا يطيقني بنفس القدر .. وزي ماذكرت يمكن يكون شايف انه دمي اثقل من دمه ... والطرف الثاني هم اصدقاء ابو علي لانهم يكونوا منتظرينه وانا اكون حاجزه منهم ومنتظرك انت .. والطرف الثالث هو انا شخضيا ... رغما انه هذه العلاقة كما ذكرت متضرر منها ثلاثة اطراف الا انه لا يوجد اي طرف له مصلحة فيها ... يعني انت مثلا تخافي على مشاعر صديقتك لو عرفت انه انا وزوجها لا نطيق بعض . لكن في ذات الوقت هي لن تتضرر لو ذهب ابو علي لمكان اصدقائه الذين يرتاح لهم وكذلك انا .
اذا ليس بالضرورة ان تصادقي انت زوجات اصدقائي كما انه ليس بالضروره ان اصادق انا ازواج اصدقاؤك ... فالصداقه هذه فطرة انسانية ربنا خلقها في الانسان ولم يربطها بالدم والعرق كما في والقرابة حتى تكون شئ تلقائي ينتج من تآلف النفوس والارواح .. وانا متاكد انه قصة الثلاجة هذه لو حدثت بين ابو علي واحد اصدقائه المقربين ربما كان استمتع بها الطرفان .. رغما عن انه انا وانت ولو قلبناه من كل النواحي لن نكتشف هذا الجانب الممتع .
| |
|
|
|
|
|
|
|
|
|
Re: مسمار جحا السوداني (Re: مأمون)
|
Quote: سلام
غايتو يا الدرديري.. يحلّكم الحلّ بلة
تعرف المشكلة لو التلاجة دي باظت أو اتعرضت لأي عطل..
لأنه أبو علي ح يقلب ليكم المطبخ لورشة |
تكون كارثة عديل يا عوض دا لو ما اشتكانا
منور يا عوض يا عريق
| |
|
|
|
|
|
|
|
|
|
Re: مسمار جحا السوداني (Re: درديري كباشي)
|
اقتنعنت ام احمد بهذا المنطق واعتذرت عن اتهامي زورا وبهتانا بزواج ابنة ابو علي التي لم يتجاوز عمرها الستة عشر عاما . وقلت لها هو في حد عاقل يناسب ابو علي اذا كان هو في خلال ساعتين لقبولنا ثلاجته في بيتنا كاد يخرب بيتنا .. وفعلا ضحكت وذهبت تركتني اكمل نومي الذي قطعه ابو علي عدة مرات مره بالتلفون ومرة بجرس الباب .
بعدها مكث ابو علي اكثر من اسبوع لم يسال ويتصل يسال عن ست الحسن والثلج الانسة كلفونيترغير مره واحدة اتصل تلفون مدعيا بانه يسال عن اولادي ..
| |
|
|
|
|
|
|
|
|
|
Re: مسمار جحا السوداني (Re: درديري كباشي)
|
قال : كيفك يا اب احمد والاولاد عاملين كيف ..
قلت له : الحمد لله شغالة ( تش) .
بعد ذلك ارتبك هو وندمت انا لاني (قهمته ) وتمتم عفوا انا ما سالت عن الثلاجة .. وقلت وانا كمان بعتذر لانه لنا اربعة سنوات بنعرف بعض ما حصل اتصلت سالتني من اولادي وكيف انت اولادك عاملين بعد العودة للسودان انشاء الله اندمجوا في المجتمع.
قال : شكرا يا ابو احمد كله شئ تمام بس الملاريا عزبتهم .. واستدرك قائلا .. مش راح نتلاقى يوم الجمعة القادمة في الاستراحة لان اخونا الطاهر عامل كرامة لوالده بعد العملية قلت فعلا عزمني وراح نتلاقى ما في شك ..
| |
|
|
|
|
|
|
|
|
|
Re: مسمار جحا السوداني (Re: باسط المكي)
|
سلام يا باسط أيها الصديق
كلما تفرقنا في صحراء الانترنت
عدنا لنلتقي من جديد
كأبطال الفلم الهندي
سعيدانا بوجودك هنا
وانشاء الله آخر محطات التوهان الاسفيري
| |
|
|
|
|
|
|
|
|
|
Re: مسمار جحا السوداني (Re: درديري كباشي)
|
واكيد التقينا في الاستراحة واجتمعنا في سفرة واحدة انا وابو علي بصراحة هوالذي جاء حيث اجلس .. كما ذكرت انه الرجل وجد ان هنالك شئ يربطنا ببعض اشبه بالنسب ... خلونا نسميه النسب الالكتروني ... انا جلست طيلة الدعوة متوترا اتمنى الا يجيب احد سيرة الثلاجات او حتى الحرارة.. ولكن وقع المحظور فعلا .الى ان نعود
| |
|
|
|
|
|
|
|
|
|
Re: مسمار جحا السوداني (Re: درديري كباشي)
|
عدنا
طبعا كما ذكرت اجتمعنا في الاستراحة اولا اوصف لكم المشهد لغير المغتربين . عندنا هنا في الرياض عندما يقيم احدنا مناسبة او دعوة لانه الشقق ضيقة ومافي امكانية نصب صيوان في الشارع كما هو الحال في السودان.. لكن نضطر نؤجر ما يعرف بالاستراحات وهي عبارة عن حوش كبير به قاعات او صوالين ونجيلة وملعب كرة طائرة غالبا .وهي تكاد تكون وسيلة الترفيه الوحيدة.زللاطفال وكذلك الكبار رغما عن انها لاتختلف كثيرا عن حيشاننا بالسودان .
في الاستراحة عادة يجلس الناس في شكل حلقات وعادة ينتمي الانسان للشلة الاقرب له رغما عن معرفته بباقي الناس .. لذلك كما ذكرت الحلقة التي كنت اجلس معهم شاهدنا ابو علي . او ابو ثلاجة للذين حضروا متاخرين جاء وجلس حيث اجلس لانه باحساسه الالكتروني شعر ان هنالك صلة قرابة ما او نسب يربطني به .. انا رحبت به وسط الشلة متوجسا ومعرفا له للذين لايعرفونه من قبل ..
| |
|
|
|
|
|
|
|
|
|
Re: مسمار جحا السوداني (Re: درديري كباشي)
|
وكان تعريفي لابوعلي بالحضور كما هو معهود :
اخونا ابو علي يا شباب .. الاخ عماد الاخ عثمان دكتور موسى مهندس اسماعيل استاذ خالد ... وهكذا ..
وكما ذكرت اصبحت خائف الا يفتح اي احد موضوع متعلق بالجو الحار او الاجهزة الالكترونية ... لذلك كنت دائما اختار عنوانين الحوار .. مره العراق ومرة انتخابات ايران ومرة الرئيس اوباما .. وكل ما خلص موضوع سارعت بوضع العنوان الجديد ... الا ان مرة قاطعني دكتور موسى قائلا ... ملاحظين يا اخوان انه جو الرياض سخن مره واحدة يقال انه درجة الحرارة وصلت خمسين ...
في هذه اللحظة وبحركة لا ارادية نظرت ناحية ابو علي ووجدته فعلا بدا يتململ وكانه استلم ما يك الميكرفون لانه موضوع الحرارة بدا يسخن فعلا وهو حتما سيقود للمكيفات والثلاجات ... ووقع المحظور الذي توجسته فعلا .
| |
|
|
|
|
|
|
|
|
|
Re: مسمار جحا السوداني (Re: درديري كباشي)
|
بعد كلام د موسى عقب مهندس اسماعيل قائلا : يا زول المكيفات دي اتجرست ياخي تلاجتنا ليها ثلاثة يوم ماقادرة تعمل تلج .
عماد : اصله شنو تلاجتكم صناعتها شنو..
اسماعيل : حاتكون شنو ما كوري ....
وهنا استلم ابو علي المايك ( هو والقون هو القون ..... قون شنو كمان يا ابحمد خلاص فكت منك؟؟)
ابوعلي: ما قلت ليك يا ابحمد كوري شنو البيقدر على حر الرياض التلاجات يا امريكي يا بلاش . وبالذات كرفونيتر ...... ياخي انا عندي ثلاجة كلفونيتر اشتريتها جديدة لنج قبل ثلاثة سنوات مقاس تمنتاشر بوصة.... ياخي دي لو قفلتها يومين فصلت منها الكهرباء تحتفظ بالتلج ...
عشان كدا لامن سفرت العيال وبعت العفش هي ابيت ابيعها هي ابدا ورغما عن الاسعار العالية الاتعرضت علي . اخر حاجة مسكتها اخوي اب احمد شغالة عندهم في البيت ... قلت اخير ابر بيها صديقنا اباحمد وعياله بدل ما تقعد مقفولة خسارة .... ياخي دي كان لكن الجو يسخن خالص والمكيفات يطير ليها كنا نفتح باب الثلاجة ونتكله بكرسي ونشغلها تكييف مركزي ... هيع الامريكان ديل طلعوا القمر معقول تقلبهم حرارة الرياض ..
اها يا اب احمد ما تكمل ليهم باقي الحكاية .
| |
|
|
|
|
|
|
|
|
|
Re: مسمار جحا السوداني (Re: درديري كباشي)
|
Quote:
Osama Mohamed Elhassan
ياخ الزول دا شلتو حالو !! |
سلام يا عثمان من منصات الفيسبوك .. نشكرك حسك الراقي
أكيد نحن ما شلنا حال ابو علي .. ببساطة لانه اصلا لايوجد أبو علي .. ولا توجد ثلاجة .. هي قصة خيالية تعكس جزء من واقع المغتربين .. وما حورته الظروف من علاقات .. أصبحت مميزة ولا تشبه مثيلاتها في باقي المجتمع السوداني ... ولو حدثت واقعيا أكيد لم نكن سنرويها ..
هي القصة تشبه الواقعية لانها عبارة عن قصاصات من الواقع جمعت مع بعض لتصنع قصه ..
مثل ما يجمع واحد عدة قصاصات وجمل من عدة صحف ويجمعها مع بعض ليشكل منها قصة ..
هذا كل ما في الامر
| |
|
|
|
|
|
|
|
|
|
Re: مسمار جحا السوداني (Re: درديري كباشي)
|
انا طبعا اتخرصت واتبكمت وكنت طيلة سرد ابو علي اتململ واطحن في صوابعي طحن .. وعندما حول لي ابو علي المايك لم اجد ما اقوله لانه هو اصلا لم يترك لي شئ واخرها حكاية التلاجة تشتغل تكييف مركزي هذه اعتقد انه السيد كلفونيتر نفسه ما كان مكتشف هذه الميزة في ثلاجاته هذا لو كان اسم بني ادم .
الشخص الاخر الذي كان يزيد من توتري هو صديقنا عماد ... وهو من النوع المهزار ( كاواي يحب يكتشف الاشياء التي تغيظك ويبدا يضغط عليها حتى( يجيب كسافتك) كما يقول ناس الجيش) كنت انظر لعماد بطرف عيني واجده يتبسم بخبث لانه لاحظ توتري من حديث ثلاجة ابو علي ..
| |
|
|
|
|
|
|
|
|
|
Re: مسمار جحا السوداني (Re: درديري كباشي)
|
بعد ما خلص ابو علي حاولت انا اغير الموضوع وقلت : يا اخوان انتو مش بكره في هلال مريخ اها الاخبار شنو .
لكن عماد اللعين بكل دهاء وخبث عرف مقصدي وعقب ..
عماد: كدي خلونا من هلال مريخ قلت لي يا ابو علي ثلاجة كلفونيتر دي وكيلها منو في السعودية لانه انا قررت استقدم اسرتي وباثث في الشقة ..
همست في سري الله يلعنك ياعماد انا عارف دي فرصتك .
ابوعلي كاد الا يصدق : ابشر يالعريس كلفونيتر دي وكيلها الجفالي لمن تبقى عليها تعال انا بمشي معاك لانهم بيعرفوني جدا ووكلفونيتر ما في منها تقليد او تجاري وهي كلها اصلي,,,,,,,,ووووووووووووووالخ استمر حديث الثلاجة ساعة اخرى مع ابتسامات صفراء من عماد الخبيث ومع غثياني انا وكرهي لكل انواع الثلاجات حتى الكورية منها آكلة الكلاب .
| |
|
|
|
|
|
|
|
|
|
Re: مسمار جحا السوداني (Re: درديري كباشي)
|
واستمر هذا التحالف الشيطاني بين عماد وابو علي .. عماد بخباثته وابوعلي بعشقه المحموم لثلاجته.. وبدليل كلما طرح احدنا اي موضوع اخر اعادنا عماد الى الثلاجة من جديد.. انا فكرت اولا كيف اضرب هذا التحالف .. اولا من ناحية عماد اكيد مافي طريقه لانه خبيث ويفهمها هي طايرة ... اذا انا ممكن اوقف هذا المد الفريزري عن طريق ابو علي ؟؟ اخيرا وجدتها .
| |
|
|
|
|
|
|
|
|
|
Re: مسمار جحا السوداني (Re: درديري كباشي)
|
ا اخوان عماد وابو علي انا عندي اقتراح جميل يتعلق بموضوع الثلاجة نفسها ... طبعا الكل التفت ناحيتي مستغربين بعد ان شاهدوا نضالي المستميت لايقاف هذا الحوار السمج والذي لم يستمتع به سوى عماد وابو علي .. لدرجة اني اعتقدت ابو علي اصبح يتنفس الفريون بدلا عن الاوكسجين ..والتفت الي ابو علي مركزا ومبتسما ظانا باني عشقت معه ثلاجته الكلفونيتر ..
قلت : ياعماد مادام انت عريس جديد ومحتاج لثلاجة ما في داعي تشتري ثلاجة جديدة .. تعال خذ من عندنا ثلاجة ابو علي اصلا هي زايدة ومضيقة علينا المطبخ ونحن ما محتاجين لها ؟؟؟ وعندما يحضر ابو علي اولاده مره ثانية تكون انت دبرت مبلغ لثلاجة جديدة تشتريها وتعطي ابو علي ثلاجته .
هنا التفت الجميع ناحية ابو علي ليروا ردة فعله ... ابو علي في الاول جحظت عيناه لهذه المفاجاه لان ثلاجته عند شخص يحتاجها سيكون الوضع مختلف جدا ربما لن يستطيع استعادتها ..
لذلك اول شئ استخرج جواله وادعى الانشغال بالتلفون ..
.. الو حمد ما تتحركوا انتظروني قلت لكم اتعشى واجي بس .
| |
|
|
|
|
|
|
|
|
|
Re: مسمار جحا السوداني (Re: درديري كباشي)
|
د. موسى : اها ريك شنو يا ابو علي في اقتراح اب احمد ..
ابو علي : الو منو معاي عثمان في راس الدولاب بتاعي تلقى المسجل اخذوا معاك للهندي كومار قولو بياكل الشرائط صلحوا لينا .
اسماعيل: فكرة جميلة يا ابو علي عماد عريس جديد وما عندو اطفال وبيحافظ ليك على الثلاجة ..
ابوعلي : انتو يا اخوان قولوتوا قبل شويه بكره في هلال مريخ الساعة كم ؟؟
قلت : يا ابو علي انت ما عندك علاقة بالكورة انت كاس العالم ما حضرت فيه اي مباراه .. كدي خلينا في موضوع الثلاجة زي ما كان عماد بيقول .
في هذه اللحظة لم يستطيع عماد وباقي الاخوة كتم الضحك وانفجروا ضاحكين .. غير انه ابو علي وضع جواله في اذنه .. الو الو يا عثمان انا جاييك في الطريق لم يابه لنداءاتنا من خلفه ..
ابو علي العشا العشا يا ابو علي
ونام ابو علي من غير عشا
اول قرصة من ثلاجته الكلفونيتر تاني خليه يجيب سيرتها.
قال امريكي قال
| |
|
|
|
|
|
|
|
|
|
Re: مسمار جحا السوداني (Re: درديري كباشي)
|
| Quote: راييع جد يا درديري ،، زغتا من الراكوبة قايل مابنلحقك هنا ؟؟ والله لو دخلتا في تلاجة أبوعلي نطلعك !!! خليك عاقل وارجع الراكوبة وسيب الزوغان دا |
يا سلام يا دكتور عباس
يا اخوانا حد يساعدنا يجيب معانا الزول دا هنا
وعلى فكرة الراكوبة لاتزال في قلبي انا في اجازة اختيارية ( متعود عليها والاخوان كذلك ... ما تحمليش هم) تحت شعار غيب وتعال
وراكبوتنا تستحق الشكر في الخريف وفي كل المواسم
تحايا للربع
او كما يقولون
| |
|
|
|
|
|
|
| |
محمد البشرى الخضر
سليمان القرشي
مأمون
باسط المكي
فيس بوك
تويتر
انستقرام
يوتيوب
بنتيريست