|
|
 ونسة خميس : عن الطيارة الضهاب الوقعت فوق راس بيت الادبخانة !!!
|
اول شئ نوهط ليكم الخبر زى ما هو عشان ما يجى واحد ملقوف يقول لى المصدر و البنبر ويبوظ لينا ونستنا دى وخاصة ونسة الخميس دى لازم تكون بمزاج عارفين ليه .... لانو ده الخميس وزمان كنا بنقول الخميس حفلة ورقيص وغناء للمطاميس وبرضو كانوا بيقولو ظبط خميسك ولو تبيع قميصك ... ده كله ياتى فى اطار الدلع ليوم الخميس وكل يغنى على ليلاه ....سقطت على سطح دورة مياه
12-06-2012 05:04 PM
الخرطوم: هاجر سليمان
سقطت طائرة عسكرية بدون طيار فى الثالثة من ظهر أمس على سطح دورة مياه قرب مجمع الرحمة الطبي بالثورة الحارة (17)، وأبلغت مصادر موثوقة (السوداني) أن الطائرة طولها نحو المترين وعرضها (54) سم سقطت على سطح المبنى دون خسائر فى الأرواح أو الممتلكات.
وقالت المصادر إن الطائرة صناعة سودانية ومصنوعة من مواد غير قابلة للاشتعال ولا تحمل أي متفجرات، وغادرت قاعدة وادي سيدنا العسكرية وكانت في مهمة تدريبية لمهندسين عن كيفية تشغيلها، وحدث خطأ في الكنترول أدى الى سقوطها دون حدوث أي خسائر.
وأكد شهود عيان من سكان المنطقة لـ(السوداني) مشاهدتهم للطائرة وهي تسقط على سطح المبنى وأفاد شاهد عيان فضل حجب اسمه أنه وأثناء سيره فى الطريق متوجهاً الى منزله عقب انتهاء الدوام شاهد جسما صغيرا أشبه بالطائرة وهي تتهادي وعندما اقتربت من الأرض وسقطت تأكد له أنها طائرة ، ما أثار الذعر وسط المارة الذين توقعوا دوي انفجارها وهو ما لم يحدث، وأضاف شاهد العيان أنهم وعند اقترابهم من المبنى واستطلاعهم تأكد لهم أنها طائرة بدون طيار تتبع للقوات المسلحة السودانية.
كشفت مصادر عليمة فى تصريح لـ (السودانى) أن الطائرة بلا طيار تتبع لاستخبارات المنطقة العسكرية كرري وعقب سقوطها بمدة زمنية بسيطة وصلت الى الموقع قوة من الاستخبارات على متن عربة لاندكروزر وقاموا بحمل الطائرة ووضعوها على العربة وغادروا
السوداني
|
|
 
|
|
|
|
|
|
|
|
Re: ونسة خميس : عن الطيارة الضهاب الوقعت فوق راس بيت الادبخانة !!! (Re: عادل عبدالعزيز عبد الرحيم)
|
قمت رخيت ليك اضانى وانا راقد فى السرير فى الحوش والملايه تهبب فرطق فرطق من كترة الهواء وسمعت ليك ولاد الحلة بره قاعدين تحت العمود ... عمود شنو يا زول قول بسم الله اقصد قاعدين على سطح الكارلو بتاع حمدين المقرش جنب حيطة الجالوص قام زردية قال ليهم انتو يا شباب الهواء بتاع حوته فى مدنى ده شنو ماعندى شمارو واحديكب لينا الشمار ده
عمورى : يا زول انت فى شمار حوته ولا شمار الطيارة الوقعت فى الثورة وجهجهت الجماعة هناك
زرديه : عليك الله ما تجيب لينا الاخبار السياسية دى وتقول لى فيها 28 شهيد والسواق مات والمضيفة تلبت بى الشباك والدرامات البايخة دى ... خلينا فى حوته .
عمورى :يا زول انت جنيت شنو هسع القال ليك فيها شهداء منو هى يخربها اسم نفر واحد ما فيها ماشة امفكو ساى قاليك طيارة بدون طيار
زرادية :امك اوعى تقول لى الاسرائليين تانى جونا بيحاى المرة دى فى ام درمان اللنبى ده ما قال لقى ليهم حل وحوط البلد منهم خلاص تانى الجابهم لينا شنو ؟
سكسك : انت يا زردية الليلة مكبر البابور وله شنو يا زول هسسع الجاب سيرة اسرائيل منو الطيارة دى سودانية ياخ
زردية : هسسع عليك الله المكبر البابور منو انا ولا انت سودانيين شنو البسو ليهم طيارة لكن والله اتذكرت قلتى لى وقعت وين ياعمورى ؟؟؟
عمورى: وقعت فى راس البيت بتاع الادبخانة بتاعة المستوصف قال ليك !
زرادية : يقهقه اليا ويصفق بيديه الاثنتين ثم يطفق يضرب بكفه اليمين على غخذه اليمين ويضع يده اليسرى على وجهه وهو يضارى دموعه وهو يضحك
سكسك : انت يا زول الله ما ليك ولا شنو مالك اتقديت ضحك كده هسسع الموضوع ده فيه حاجة بتضجك كده
زرادية: والله ياشباب كنت بتخيل فى الزول القاعد جوه الادبخانة موقفه شنو لمن وقعت الطياره فوق الادبخانه من فوق ياخ ده يتخيل لى كان عنده امساك يكون اسهل عديل كده وكان عنده اسهال يكون امسك عديل كده ويكون جاه معاها سؤ هضم زاتو والله مسكين ياخ
عمورى : واحد صاحبى كوز قاليك الطيارة دى اصلا ما وقعت الطيارة دى كانت مزتوقة ساى وكايسة ليها ادبخانه ومشت على جيهة السوق ولقت الدخول هناك بقروش عشان كده كانت كايسة ليها لمحل ملح تفكها فيهو وتزوغ وقامو الجماعة شبكوها ليك وقعت وقعت والله غايتو ناس المعارضة ديل كايسين للحكومة دى ساى بس كايسين ليهم اى حاجة ولو طيارة عايزة تقضى حاجة عشان يقعدو يشمرو فى الحكومة
سكسك: واحد صاحبى كان حاضر الحادثة والله قاليك الجماعة لمن شافو الطيارة دى بتهوى من فوق كده الكتب قيام والرقد فى الواطة والقعد يتشهد والقعد يكتب فى الوصية ياخ قاليك واحدعمك عمره 75 سنة سبق ليك الشباب فى الجرى على اليمين عمك ده لمن قال كده وفتح كاكى ماجرى زيه وقال ليك واحد جارى من الثورة لمن مرقها فى امبده السبيل ومقفل اضنيهو خايف من الانفجار والله جنس محن وجنس ضحك
زرادية : لكن هى ليه وقعت فى الادبخانة
عمورى :عشان هى ######ة
سكسك : يا زول هوى ما تجيب لينا الهوى ود ناس الرضية دا فى التصنيع الحربى واضانو خفيفة تقول حصان بس
عمورى : انا دايرو يسمع زاتو ياخ هم يجازفو بيقروشنا ويصنعو ليهم طيارة لعب تقع فى ام درمان ومال دايرين يحاربو بيها كيف
سكسك : يا خ دى ما بيحاربو بيها دى بتجسسو بيها
زرادية : اه اه عشان كده انا عرفت ليه القوات المسلحة ضربت قوات التجانى سيى وقايلنوا قوات العدل والمساواة تكون لطيارة الضهاب دى شمشرت ليهم الخبر ده بالقلبه وكده ...
سكسك : ياخ والله الليلة انتو ما ناويين تجيبوها البر ... قلنا ليكم ودالرضية ده بيودينا هناك مع قوش وود ابراهيم
عمورى : والله اول مرة اعرف انك رجاف كده يا سكسك ياخ !!!
سكسك : يا زول انا ما رجاف لكن على رزقى خواف والمثل بيقول ليك المابخاف الله خاف منو
زرادية : يا جماعة عليكم الله خلونا من النقة الما جايبه همها دى وورونا الليله عاشىة الفلاتية كيف ؟؟
سكسك : كلو واحد يطلع 10 الف انقلش بوكيت يعنى ونمشى نشوف لينا عشوة مدنكلة كده سمك ولا شية ...
زرادية : يا زول انت ما ك نصيح على الطلاق 30 الفك دى نص كيلو لحمة نى نى نى ساكت ما تجيبو ليك وينو بصله وينو زيته وينو باقى حاجاتها وينو عيشها وينو البيبسى ياخ انت مسطح ساكت
يتبع على قول طلحة
| |
|
|
|
|
|
|
|
|
|
Re: ونسة خميس : عن الطيارة الضهاب الوقعت فوق راس بيت الادبخانة !!! (Re: عادل عبدالعزيز عبد الرحيم)
|
| Quote: وقالت المصادر إن الطائرة صناعة سودانية ومصنوعة من مواد غير قابلة للاشتعال ولا تحمل أي متفجرات، وغادرت قاعدة وادي سيدنا العسكرية وكانت في مهمة تدريبية لمهندسين عن كيفية تشغيلها، وحدث خطأ في الكنترول أدى الى سقوطها دون حدوث أي خسائر. |
يبدو لي يا عادل ,وبين صحيان ونائم سمعت عن خبر سقوط طيار حربي سوداني بدون طائرة فوق شجرة لالوب !!
وماعارف الطيار دا كان في مهمة رسمية ولا بمارس في هواية خاصة...كلما في الامر ان السلطات الإسرائيلية نفت ان تكون ضالعة في مخطط إسقاط الطيار بدون طائرة((((00))))
والله أعلم.
تسلم يا زول.
| |
|
|
|
|
|
| |
عادل عبدالعزيز عبد الرحيم
فيس بوك
تويتر
انستقرام
يوتيوب
بنتيريست