ايام زمان ياحليلة ريدة زمان وكان لقاء المحبوب حنان كان زمان الناس موده وكان كلام الريد حنان كان حديث الحب مناجاة وكان لقاء المحبوب امان وكان حلم غنوة وحكاية وكان امل اخضروكان زمان وكان اهلنا بيقولوا كان الحب حلال ماكان حرام كان نضيف عيف وطاهر وكان لفيفو بي الكلام كان غناوه ادب محنة ومجلس الحب في انتظام وكان شعاراهل المحبة اذا طروا المحبوب سلام كانت امدرمان حكاية آه كان غناء امدرمان محنا كان زمان شاديها شادي وكان زمن زاهر وغنا بحروف وكلمات ورقة وفي نغيم الحان وقلنا كان كرومة وكان سرور وكان حديث وكان سيده ونفيس حنان اهلنا وداك زمن ياحليلوعاد مابيحيي مين تاني البعيدو العمر ساقو ومشابو والزمن ضيع جديدو وين حبايبو وين مريد و وين حبيب كنا بنحبو وكنا ليهو آه...
12-04-2012, 09:36 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
Quote: وداك زمن ياحليلوعاد مابيحيي مين تاني البعيدو العمر ساقو ومشابو والزمن ضيع جديدو وين حبايبو وين مريد و وين حبيب كنا بنحبو وكنا ليهو آه...
يا حليلو، عبارة مليئة بالحسرة والشوق والحنان لزمانٍ قد مضى وعمر قد سُرق في غمرة اللهو والشباب المشحون بدفقات الحُب والهيام. الزمن الذي يتحسر عليه الشاعر كان زمن لم تحظى فيه المرأة بقدرٍ وآفٍ من التعليم، وكانت حبيسة الخدور لا يراها الرجل إلا خلسةً وهي خارجة لمناسبة من المناسبات أو لقضاء بعض الضروريات، كتلك التي تفاجأت برؤية الشاعر لها، فانسحبت بسرعة لتخفي نفسها من عين الغريب الذي كان قد رأها لمحة، فقال مُتسائلاً: حاول يخفي نفسو هل يُخفى القمر في سماهو ؟؟ واجاب بالنفي: طبعاً وابداً لا. شفناهو شفناهو.
12-04-2012, 09:47 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
لم يقف العالم عند حد. بل ظلّ يتطور ويتقدم، وبتطوره ظلّت المرأة تتحرر حتي ولجت حقل التعليم، وتغيرت نظرة الرجل إليها حيث أنها لم تعد تلك الخريدة خبيئة الخدر بل نهضت لتسير مع الرجل في طريق العلم وتحصيل المعرفة. تغيرت لغة التواصل بين المحبين من النظرة الخاطفة للنظرة المتمعنة نوعاً ما، وصارت لغة التخاطب وتبادل آيات الغرام تتم عبر كتابة الخطابات وتقديم الهدايا. غالباً ما كانت هذه الهدايا تكون عبارة عن مناديل في تلك الحقبة التي نحن بصدد الحديث عنها حيث تغنى شعرائنا للمناديل وأثرها في إثراء حياة المحبين.
12-04-2012, 09:55 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
في نقلة سريعة ظهرت الصور لتشارك جنباً إلي جنب مع المناديل في التعبير عما تجيش به نفوس المحبين من لهب الغرام. ظهرت الأستديوهات، وأصبح هنالك تبادل للصور، وكانت الصورة هي الملآذ والأنيس الذي يخلد للنوم تحت الوسادة يشارك المحبوب لذيذ الأحلآم ويصبّح أجمل الصباحات. أخذت الصور حيز في غنانا السوداني في فترة من الفترات جنباً إلي جنب مع المناديل والجوابات، فإلي مدآخل البوست...
12-04-2012, 11:47 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
المنديل رسل لي ..رسل لي هدية لطيفة خلت قلبي يحن ويميل حرير أبيض مشغول بي قطيفة صورة قلب وسهم نحيل انت جميل والجابك لي ملاك وجميل يا منديل ..يا منديل هدية من ايدك مقبولة معناها اني على بالك ونعيد الأيام الأولى نتأمل حسنك وجمالك انت جميل والجابك لي ملاك و جميل يا منديل ..يا منديل لما اسافر يوادع ويشاور يشاور يوادع ...بالمنديل لما اعاتبو يداري دموعو بالمنديل لما أغازلو يداري الفرحة ..الفرحة ..الفرحة بالمنديل...
منديل سيد خليفة هدية جميلة تركت المحبوب يذوب تحنان ووله. منديل حرير أبيض مطرز بقطيفة ومرسوم فوقه قلب مخترقه سهم دليل علي أن الحبيبة سكنت شغاف القلب، وأنها تبادله أسمى آيات الغرام. وبرضو هو كمان عبر عن ريدتو بإهداء منديل للمحبوبة تمسح به الدموع رغم العتاب الجاف، وفي نفس الوقت تداري فرحتها بالمنديل خجلة من المغازلة الظريفة. عند الفراق والسفر تشاور بالمنديل معلنةً أنه سيظل رمز للتواصل وحفظ العهد. الموسيقى فيها تويست مبالغة.
أمانة ما اتبشتنت يا المنديل في زمنا دا. والله صحي...
12-04-2012, 12:13 PM
عبدالله ود البوش عبدالله ود البوش
تاريخ التسجيل: 08-12-2009
مجموع المشاركات: 6700
مازلت يا ود المدير احتفظ بأول جواب من المحبوبة مازلت ما زلت ولن انفك وايضا كذلك الصورة ود المدير شكيتك على الله . . ايميل .................. عفنا بالغبا .............. وهو ذاتو مسيييييييييييخ لاليه طعم ولاريحة وين من الملاحظات البجبنبات وشكرا ساعي البريد
12-04-2012, 12:57 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
Quote: مازلت يا ود المدير احتفظ بأول جواب من المحبوبة مازلت ما زلت ولن انفك وايضا كذلك الصورة ود المدير شكيتك على الله . . ايميل .................. عفنا بالغبا .............. وهو ذاتو مسيييييييييييخ لاليه طعم ولاريحة وين من الملاحظات البجبنبات وشكرا ساعي البريد
اما الجواب، فحكايتو حكاية يا ود البوش. آخر الحصص ونحن رايحين علي المواصلآت، وهي تضم الكتاب الذي وضعت في نُصّه الجواب إلي صدرها، والواحد مننا يكشّف ليها. فجأة ترشك بنظرة سريعة وتتوارى خجلاً. وكوم من النشاشيب يرميك من قوس وآحدة، ويا النبي نوح. تروح البيت وتفضل مِتفّن فوق جمر الغرآم منتظر الرد، ويا جمر ما يزيدك لهيب إلآ التأخير. تعال شوف جوآب كمال ترباس، والجقلبة والأوهام. قال ايه!!! زعلآنة واللآ شنو الحصل !!!؟ زعلانة ولا شنو الحصل
رسلتا ليك أجمل خطاب لـ لليلة ردك ما وصل زعلانة ولا شنو الحصل شهرين مضت تالت الشهور روٌح خلاص عددو اكتمل أنا في رجاك ما جاني رد رابع الشهور ما محتمل أنا عندي ظن ساعي البريد شما العبير عجبو الكلام نايم عمل شاف الحروف مليانة ريد خلاني أحمل ليك زعل زعلانة ولا شنو الحصل أجمل هدية من البلد قولة سلام من الأهل تنزل تهب مثل الدعاش زي كان جفاف والفيث نزل وضحت ليك حال الغريب كيفن بعاني من الهمل شرحتا ليك كيفن هجير الوحدة قاسي وكم يحن لي نسمة من دار الأهل زعلانة ولا شنو الحصل ؟؟؟!!!
يا ود البوش رابع الشهور ما مُحتمل يا اخ. تأخير الرد بيخلي الوآحد مغبي، والطرطشة بتحصل زي ما واضح في الغنوة. ساعي البريد لا إيدو لا كراعو درعو سبب التأخير في رقبتو. يا اخي إيميل شنو !؟ دا يصلك قبل أن يرتدّ إليك طرفك. مسيخ جنس مساخة. اللذة في الإنتظار والبهدلة، وتلآعب الظنون بالمشاعر. ما أجمل قولة السلآم من الأهل ونحن قد عصفت بنا رياح الغربة العاتية، وما أجمل أخبار المحبوبة عندما يحمل لك أخبارها رسم اناملها، تنزل تهِب مِتل الدعاش، فتنعش النفوس التي قد أجدبت فيها أودية الحُب.
12-04-2012, 01:05 PM
عبدالله ود البوش عبدالله ود البوش
تاريخ التسجيل: 08-12-2009
مجموع المشاركات: 6700
شتان والله شتان ود المدير طلعت جنا مدن طلعت جنا بندر يا ولد ----------------------------------------- وسيلتنا للمدارس كانت حمير ياااااااااااااااااااااااه كنت احبها وتحب دحيشتها دحيشي ههههههههههههههههههههههههههههههههههههههههههههههههههههه . . ولحظة تسليم الجواب يا ود المدير دا موضوع طويل ناس البنادر ديل اقوموا استضحكونا رغم اننا مستعمكنهن عديل كدي
12-04-2012, 12:42 PM
ماجدة عوض خوجلى ماجدة عوض خوجلى
تاريخ التسجيل: 12-25-2006
مجموع المشاركات: 7279
ناس زمان ديل ماناس براهم... مابشبهو لاناس الزمن ده ولا حتى منديلو البقت ورق ... للسلام والتحية ومعاها كمان متابعة... البوست ده ماشى يجيب ليك ... فريق الليل.. ناس بيوت البكا ...هههههه حضر مناديلك وانتظرم ...مناديل الورق طبعا... تسلم يارب ....
ما أجمل مرورك أختي ماجدة وجميل الذكريات عابق في المكان. تطيب لك العافية يا ماجدة. ياسلآم يا ماجدة، تظل الصور عوالم مجهولة نصابح بيها اليوم فتتفجر كلّ أيامنا أعياد. قطعاً الصورة أجمل هدية لا تشبع النفس من مطالعتها ويشاركها القلب الخفقان. أما إذا وعد بها المحبوب ولم يوفى فما أصعب الإنتظار، وما امرّ العتاب عندما يُفقد الأمل. رحم الله العملآق وردي. تعالي نشوف الصورة. اغنية : الصورة
توعدنا وتبخل بالصورة يا غنوتنا يا بهجتنا ويا مرسى عيونا المبهورة ما نحن بطبعنا ناس طيبين غلطاتك عندنا مغفورة
يا نسمة في عز الصيف هبت يا روح الروح يا آمالا إن جيت تطلبنا بضي العين مابنقدر نحن نقول لا لا العين مابتعلا على الحاجب علي سيّد الروح مابتعالا لو نحن بكينا على الصورة سامح دمعتنا المعذورة ما نحن بطبعنا ناس طيبين غلطاتك عندنا مغفورة
يا روعة سحر الأسطورة يا سمحتنا الما بنطولة لو نحن مقامك ماقدرو أعذارك عندنا مقبولة
بنحبك نحن وما قادرين أبدا عن حبك نتخلا نتخلا عن الوجه البشبه ضي القمرا الناعس طلا كل الآمال الل يخليك ويحرسك من عين الناس الله
يا روعة سحر الأُسطورة...
ما أجمل الوعد وأعذب جراحات المطل، فهي من الحبيبة بطعم الشهد. توعدنا وتبخل بالصورة، رغم إنّك تعلم أننا ابداً عن حبك لن ولم نتخلى. ها نحن نزرف الدمع السخين، ونقسم لك بحبنا لك إننا سنغفر لك جميع غلطاتك، فنحن فوق إننا محبين أهل طيّبة. لا وقت للكتمان قول الكلمة الحلوة الفي قلبك خلينا نصابح بيها أيامنا التي ستصير كلها أعياد بسماعها، واعلم أننا طوع بنانك. حتي لو جيت تطلبنا بضي عيوننا لن نرفض رغم إنك بخلت علينا بالصورة. يا نسمة في عِز الصيف هبّت تنعش الروح التي عقدت عليك الأمل، لو نحن بكينا لضنك علينا بالصورة نرجو أن تسامح دمعتنا المعذورة يا روعة سحر الأُسطورة.
مودتي...
12-04-2012, 03:07 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
Quote: شتان والله شتان ود المدير طلعت جنا مدن طلعت جنا بندر يا ولد ----------------------------------------- وسيلتنا للمدارس كانت حمير ياااااااااااااااااااااااه كنت احبها وتحب دحيشتها دحيشي ههههههههههههههههههههههههههههههههههههههههههههههههههههه . . ولحظة تسليم الجواب يا ود المدير دا موضوع طويل ناس البنادر ديل اقوموا استضحكونا رغم اننا مستعمكنهن عديل كدي
هههههههههههههههههههه،
هوي يا ود البوش. أنا البندر ماني بعيد مِنو، قرايتي كولها قريتا فيهو. عِلآ ما بنقدر نمشي المدرسة بالحمير عشان المسافة جبدة لآ قدآم، كان ركبنا الحمير ماشيّن، وجايين من المدرسة بيسولنا سلكة. الوحيد اللكان بيجي المدرسة بمارسيدس حنكول ود عبد النبي، نعمنو كان عندو كُفُرآتاً مانعات.
كدي بنجي لحكاية لحظة تسليم الجوابات دي كان الكريم هوّن...
12-05-2012, 02:57 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
Quote: يا سلام عليك يا سلام يااااااخ انا كان عندي كرتونة جوابات زمن جميل ياااااااااخ وخصوصا الجوابات الملونة في داخلية مدرسة عطبرة كنت بنتظر البوستة بفارق الصبر واشواق اخبار الحبيبة يااااخ انت الليلة تورت نفسنا واردد اغني ليك وانا ديلك بقدر خيوط مناديلك وماتنسي نفس الشاعر الله يدي العافية قال مناديلك خيوطها الحمرة ماصدفة متين تضحك سما الخرطوم حبيبتنا ومتين تصفا وفي الطير المهاجر تلقي الحبيبة بتشتغل مناديل حرير لحبيب بعيد كن بخير وتقبل مروري والشوق لكل الاعزاء
باسط المكي يا أعزّ الناس، سلآم وتحايا. هي تسهر الليالي كي تشتغل منديل حرير لحبيب بعيد ويراودها الأمل، وهو يُودع رسالته الطير و يستحلفه بالله قبل أن يروي ظمـأه من وعثاء السفر أن يمر علي بيت الحبيبة ليبثها أشواقه الدفينة. تعال يا باسط نشوف الجابري، وأغرب رسائل من الحبيب يعاتب متهماً الطرف الآخر بأنه قد نسى الحُب المتبادل، وكيف كان وقعها علي الحبيب الذي تمنى أن تكون نهاية حياته لو فكر في غيرها. من طرف الحبيب جات أغرب رسائل يحكي عتابو فيها وقال ناسنوا قايل
ياما قال حكاوي ما خطرت ببالي قال في كل كلمة إني جفيت وسالي لو في كل لحظة لو تعلم بحالي ما ناسيك والله ذكراك شاغله بالي لو أناسك إنت اكون غدار وخنت أسأل عني غيري واحكم في مصيري ياما تشوف دلايل
ياما قال كلام ما لي دخل بيه إني بروح لغيرو بهوى وبصطفيه إن شاء الله حياتي تفنى لو فكرت فيه لالا والف لالا ده حبك عشت ليه بدل أشواق ومحنه ترسل لي مظنة كلام يجرح شعوري وما يريح ضميري من زول عنه سائل. يا سلآم الجواب لم يخلو من عتاب ملئ بالظنون والهواجس، أتعب ضمير الطرف الآخر وإعتدى علي مشاعره. تلقى الجواب بلهفة، ولكن المفاجاءة أن وجده ملئ بالعتاب، ويحمل بين طياته الظنون. الرد فيه نفي للظنون وطلب إستشفاع باللجوء للأصدقاء لتقصي الحقيقة وهي حفظ العهد، ورسوخ المحبة في دواخل النفس...
12-05-2012, 10:45 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
أحياناً يحصل ما يعكّر الجو الصافي بين الأحبة، وتدوّر العكنيبة، ومنهم من يكون مسامح لأبعد حد حتي يصف قلبه بأنه ما بيعرف يعادي. لكن لا جدوى من ذلك، فالطرف الآخر مُصِر علي الفراق. ما هو مصير الصور والجوابات والهدايا في هذه الحالة؟؟؟
الإجابة عند الفنان عبد العظيم حركة: العُرف المُتبع في حالة الفرآق هو رد البضاعة إلي أهلها، فيتبادل الطرفين إستلآم الجوابات والهدايا, والصور. حاجة كدا زي تبادُل الأسرى. كان هذا العُرف من ادبيات العشق والغرآم في تلك الحِقبة...
12-05-2012, 12:06 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
فارِق العُمربينهما، وباعث في مكان ما من النفس حرّك صاحبته كي تهديه منديل، فهل كان حُباً يا تُري ؟؟؟
أوتذكرين صغيرتى أو ربما لا تذكرين الخمسة الأعوام قد مرت ، ومازال الحنين الشوق والأحلام ،ما زالت تؤرق ، والسنين هل كان حباً يا تُرى أم كان وهم الواهمين؟ هل كان حباً لاهياً أم كان شيئاً كاليقين هل كنت تعنين الذى لى تدعين ما زلت أذكر خصلةً عربيدةً فوق الجبين ما زلت أقرأُ فى السطور فأستبين البعض أو لا أستبين والعطر والأنسام تغمرنى بفيض الياسمين منديلك المنقوش جانبه أوتذكرين .. أوتذكرين ما كان قصدى أن أبوح وربما قد تصفحين. ؟؟؟؟؟؟؟؟؟؟؟؟؟؟؟؟ منديل تعلقت صاحبته من هو يكبرها سناً، فهنالك تفاعُلآت تجذب طرف للطرف الآخر، فتنطمس معالم فارق السِن في منبع الحُب فيكون. حيرة وتسائُلآت، وتردد ثُمّ فراق، وذكريات في بؤرة النفس تجعل القلب يخفق، فتمتد الأيادي إلي دفتر الرسائل فيكتب صاحب الرسالة إلي تلك الصغيرة التي سلبت فؤاده متسائلاً: الخمسة الأعوام قد مرت ، ومازال الحنين الشوق والأحلام ،ما زالت تؤرق ، والسنين هل كان حباً يا تُرى أم كان وهم الواهمين؟
أخبريني، هل كان حباً لاهياً أم كان شيئاً كاليقين هل كنت تعنين الذى لى تدعين
خصلة شعر تعربد فوق الجبين، وتوهان في خضم جمال فتان، وسرآب في تلآفيف الذاكرة يجعل الذكريات تختلط بعضها البعض في داخل النفس حتي تقف عند المنديل الذي كان بدآية الللقاء، فهل تذكرينه ؟؟؟ معذرةً إن كنت بوحت في لحظة ضعف. لم أكن أقصد البوح لكن يقيني في أنك أهل للصفح دفعني إلي ذلك.
معذرة...
12-06-2012, 02:42 AM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
Quote: بغنيلك واناديلك بقدر خيوط مناديلك واحبك قدر ايه ما كفاية ولما اغيب بوصيلك ولما اعود من الغربة قبال ناس بيتنا بمشيلك وكم تزعل معاي والشوق يعزبني وامشيلك واعديلك وامشيلك واغنيلك بقدر خيوط مناديلك ************************ احبك قدر ايه ما كفاية فتش تلقى اسمك وين ورسمك وين وانك وين جوة القلب وجوة العين ولسة عز الليل يصحيني ويبكيني ويخليني ************************* اغنيلك وبناديلك بقدر خيوط مناديلك
عز الليل يصحيني ويبكيني واغنيلك بقدر حروف مناديلك. الليالي اليوم أصبحت صاخبة معربدة، وشوارع المدينة ملئ بمناديل الورق وصور الجرايد والمجلآت التي لا تخلو من إثارة مثيرة للغثيان. العزاء في الأشواق عندما تظهر المحبوبة الزعل لزوم الدل والدلآل، ونقول ماشي. كلو يهون في سبيل ريدة عفيفة. اغنيلك بقدر حروف مناديلك حتي صار الغُنا معلق فوق جدران الزمن لتتداوله أجيال رسائلها وصورها تصل بأسرع من لمح البصر، وهداياهم يصعب علينا فك طلآسمها، فهل قلوبهم تخفق مثل قلوبنا ؟؟؟
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
معاوية المدير
عبدالله ود البوش
ماجدة عوض خوجلى
باسط المكي
فيس بوك
تويتر
انستقرام
يوتيوب
بنتيريست