|
|
 في سبيل الزوجة الثانية وجهه يحترق بحامض الاسيد - غايتو يا ناس السعودي
|
اولا تعريف:
ماهو حامض الاسيد: تشتق منه موية النار التي تستعمل في بطاريات السيارات وحامض الاسيد يعتبر مركز اكثر من موية النار وهو حامض يذيب اللحوم ويجعلها مياه جاريه وهو من المواد الخطره والمحرم استعمالها. لو كشحتو في زول ببقي هيكل عظمي.
خارج الموضوع من الجرائم المشهورة بالسعودية:
مشكله حصلت بين باكستان في السعودية وكان الخلاف حول المال الذي دائما يفرق بين الاخوان المتهم حضر ليلا للمجني عليه وبعد النقاش الحاد والاشتباك بالايادي المجني عليه ضرب المتهم تدخل بعض المعارف وتم فض الاشتباك ذهب المتهم واحضر حامض الاسيد ودلقه علي وجه المجني عليه كانت حادثه مشهوره حيث تحول المجني عليه الي هيكل عظمي.
نواصـــــــــــــــــــــــــــــــــــــل
|
|
 
|
|
|
|
|
|
|
|
Re: في سبيل الزوجة الثانية وجهه يحترق بحامض الاسيد - غايتو يا ناس السع (Re: Abureesh)
|
دائما بيوت الاعراس والبكاء بتلم وهنالك الونسة الجانبيه التي تتفقد احوال الاهل والاصدقاء وفي بعضها علي قولة النسوان تلقي القطيعه . ومن الاسئلة التقليديه لبداية الونسه ((يا فلان انت مالك ضعفته كده ... أو سمنته ..أو شكلك اتغير وبقيت شين ....الخ)) وإن كان هنالك فعلا تغيير واضح في الشكل من اثار حادث او مرض يصبح هذا الشخص ونسة التجمع ، لاحظت علي احد الاصدقاء تغيرات في شكل وجهه لدرجة أن العمامه لم تستر شكل التغيرات بل هنالك تسريبات لجزء من التشويه بالوجه خرجت من نطاق لف العمه علي الوجه وبدأ الحوار.
يا زول كفارة شنو الحصل ليك بالله افتح وشك .... يا سلاااام ياخ انت كان ممكن تروح فيها الحصل شنو ؟؟؟؟
بدأ صديقنا في روايته مع العروس الجديده !!!!!!!!!! والله يا ابو الشباب ربنا اراد . ربك رب الخير في جماعه انا بمشي ليهم طوالي صداقه بيني وبينهم ناس اولاد قبائل ، يوم لمحته ليك بت عندهم الجن ركبني زولة ماشاءالله تقول بت حور لونا كيف كيف ما تعرف تقول اصفر لا تقول اسمر لا تقول خمري المهم لون ربنا جعل فيهو ايات جمال الالوان (( كسره خارج الموضوع الراجل صاحبالرواية مولانا ودقنو لي صرتو)).
نرجع لي للحكاية من راويها: الشعر بالله تقول الديسه كثيف ماشاءالله زي سواد الليل مديها مع وشها مسحه من الجمال ملائكيه اما باقي الوصف ... اعوذ بالله ، استغفر الله من الشيطان الرجيم ، افضل يا شيخنا الواحد اسكت ما اجيب ليهو سيئات بي حكاية الجسم والطول والتقاسيم نقيف هنا لانو الموضوع بجر .........
اها من شوفتها قلته الانسانه دي فوله مقسومه وبعيده مني ربنا سبحانه وتعالي هداني ليها دي زوجتي التانية ذاااااااااااااااااااااااااتا. كشكرته الجماعه ببداية ونسة عن تعدد الزوجات ((وَإِنْ خِفْتُمْ أَلَّا تُقْسِطُوا فِي الْيَتَامَى فَانْكِحُوا مَا طَابَ لَكُمْ مِنَ النِّسَاءِ مَثْنَى وَثُلَاثَ وَرُبَاعَ)) الموضوع اخذ وقت من النقاش حتي دخلنا في حكاية الزول البخاف من زوجتو امتد لي هظار معاي وفجأة رميتها ليهم ..... اقول ليكم يا جماعه شوفو الرجالة انا عاوز بتكم فلانه رايكم شنو؟؟؟؟
لقيت موافقه مبدئيه. قلته في قلبي البت صغيره امشي اظبط نفسي واجيها.
مشكلتي الوحيده ما الدقن زي ما انت شايف دقني وجيهه مشكلتي السنون كبار ولونها اصفر تشبه سنون الجمل كبر السنون خليهو معالجتو صعبه قلتا اشوف اللون لو لقيت معالجة ، مشيت لي مستوصف اسنان للتنظيف بعد الكشف الدكتور قال لي التنظيف بي 500 ريال لااااااااا حولااااااااااا المشكله قالو بعد شهرين تلاته السنون بترجع لي الحالة القديمه قلته والله دي ميزانيه حكيت الموضوع لي لصاحبي استعين باجابة او وصفة لتنظيف الاسنان رخيصه لانو العرس بعدين مصاريفو بتكون كثيرة تصدقو قال لي شنو!!! اقع الاسيد يا زول لو عملتو خفيف بشيل الاصفرار نهائي بعدين اشتري ليك حاجة بي خمسة و ل عشرة ريال الباقي ادفقو بعد تخلص لانو خطر. تصدقو بالله يضع سرو في اضعف خلقو الاسيد بتاع الحمامات انضف وإجلي السنون. مشيت اشتريتو وفي وقت ميت المدام ما تشوفني خشيت الحمام برااااااااااااحه طلعته فتيل الاسيد وكبيت منو في الفرشه ... بالله الفرشه اكلا ليك في ثانية خلاها زي ملاح التقليه السايل في نص الصينيه . قلته يا ولد البتاع ده تقيل خففو بي مويه وكبو في غطاية الفتيل ودخل طرف اسنانك كتجربه . لا اله الا الله محمد رسول الله وقت مديت طرف اسناني ورفعته الشفه الفوق بداية ما شعرته بي حاجة قلته اغرق لي تحت بالله ما اشم ليك الي ريحة الصوف طالعه من الشنب وريحة الشية طالعه من الجزء العلوي للشفه والسخانه انطلقت في جسمي قلته نبرد الحكاية بي شوية موية كشحته مويه في خشمي بالله انطلقت فيني نار جهنم تاري المويه بتزيد احتراق الاسيد ... سال جزء كبير علي دقني واتكشح من الرش علي الوجه جزء ، المهم ربك رب الخير الشلوطه وقفت قلته أعاين للمرايه اشوف حالي بالله لقيت ليك الشنب نصو ضاع والشفه العليا فقدت جزء كبير من اللحمه والوش اتبرقع والخايف منو بقي خلقتي اصبحت تشبه الجمل اعوذ بالله من غضب الله أهو زي ما شايف انت وباقي الاسيد طار في اليد لونا برص . دخلت براحه اوضة النوم وغتيت وشي من المدام ودخلته البطانيه قلتا ربنا اصبحا عشان امشي الدكتور اصلو باقي ثلاثة ساعات من الصباح . تاني يوم مشيت الدكتور شرحته ليهو الموضوع بالله الدكتور طار من الكرسي لي فوق نوع الدكاتره المصريين اللئيمين اول كلمة قالا لي ...دي جناية يا بيه لازم الشرطه ده انت كنت متخاصم مع المدام وهي دفقت فيك اسيد لازم اتصل بالشرطه .......
قعدته مع الدكتور في حاو .. وتر ... وجنس جرسه بالله ما باقي لي غير امسك كراعو وبيني وبينك مع الخوفه بكون مسكتها ...يا ود الناس والله انا العملته كده وبعدين انا انسان راشد وعاقل ما شايف الدقن دي معقول اكذب عليك.
ارد الدكتور .. فين الدقن يا بيه الظاهر المدام قاصده الدقن ما دام بتحلف بيها كثير.
يا دكتور والله العظيم ثلاثة انا كنت بفتش للسماحة عشان اشيل الاصفرار في سنوني وربك لطف جابا كده.
الدكتور يردد.... قال دقن ده يا ابن النيل انت شنبك نصو طار بعدين سماحة ايه يا بيه ده انت لو بدلو وجهك بي واحد تاني مش حا تكون سمح ..قال سماحه ، انت تعرف عشان ترجع لي حالتك القديمه مستحيل. اولا الشفه السفلي عايزه ترقيع بعملية تجميل بمبلغ وقدرو اما الشنب خلاس راح فيها الحامض اكل البصيلات قال سماحه وزواج عالم ما تحمد ربها.
ربك رب الخير فكاني من الدكتور المصري بعد شاف حالتي تحنن اداني مرهم بي 300 ريال لمعالجة الجروح فقط .... حكاية والله غريبه ابينا ننظف بي 500 ريال اشترينا مرهم بي 300 ريال. توكلت ومشيت علي البيت.............
بالله العظيم المدام من شافتني كشت لي غادي ، وقالت بسم الله الرحمن الرحيم يا ابو فلان مالك انت برصته اعوذ بالله من الشيطان الرجيم المرض الجاك جديد ده شنو لا لا لا لا لا طلبتك بي النبي ما تقرب علي الاولاد من هنا والدكتور امكن تعاديهم ........... هي ما عارفه انا الدكتور عايز اوديني الشرطه. اها بقيت اباصر في القديمه ما تطير مني حكمت ربنا نفتش لي جديده القديمه بقت في حصبيص ومباصره.
| |
|
|
|
|
|
|
|
|
|
Re: في سبيل الزوجة الثانية وجهه يحترق بحامض الاسيد - غايتو يا ناس السع (Re: عمار عبدالله عبدالرحمن)
|
| Quote: سعيد ان في قلم زيك طل على سودانيزاون لاين |
فعلاً سرد جميل و من نوع السهل الممتنع.
حامض الكبريتيك بيتفاعل مع الأسنان (كالسيوم) و بينتج كبريتات الكالسيوم، طبعاً في حالة إنو يكون مخفف شديد (موية النار) يكون التفاعل سطحي و بالتالي يختفي إصفرار اللون.
شاهدت في السودان الاولاد البشتغلو في محلات البنشر بتسوكو بيهو (أي و الله)، بيجيبو موية نار يخففوها شديد و بعدين بيعملو ذي زولنا دا بكبو منها في الفرشاة و يتسوكو بيها.
طبعاً الخطورة تأتي من تأثر الأسنان و تصبح ضعيفة و هشه غير تأثير الحامض (المخفف) علي اللثة.
طبعاً نتيجتو في نظافة الإسنان فورية و رخيص جداً عشان كده الشباب ديل بيستخدموهو. طبعاً بكثرة الإستخدام يلاحظ صغر حجم السن لذوبان جزء منها في التفاعل.
أفضل طريقة لنظافة الأسنان من الإصفرار هو الألتراسونيك (Ultrasonic ).
* غير مختص و هي معلومات صحيحة قابلة للخطأ.
| |
|
|
|
|
|
|
|
|
|
Re: في سبيل الزوجة الثانية وجهه يحترق بحامض الاسيد - غايتو يا ناس السع (Re: مرتضي عبد الجليل)
|
| Quote: فعلاً سرد جميل و من نوع السهل الممتنع. |
شكرا ليك حبيبنا الطيب علي المتابعه والثناء
الطيب ذكرتني حكاية الاولاد بتاعين البنشر وابداعاتهم في انتاج البدائل
كنا ساكنيين عذابة في منطقة العذبة بحري وكانت هذه المنطقة واعتقد حتي الان فيها كمية باعوضة رهيبة لو عندك ناموسيه ما تسلم منها الباعوضة تفتح لاختها الناموسية عشان تخش ليك تقش وشك منها بالله تقول ملان شرا عدار الصباح تقوم تلقي جسمك زي العندك جدري لا نفع معاها فازلين لا زيت سمسم لا دخان طلح كنت بحكي المعاناه لي جماعه ساكنيين العذبه في سوقها شغالين في البناشر ومكنيكيه وصفو لي زيت الراجع بتاع العربات تدهن بيهو يديك ورجليك وشك وتنوم بدون ناموسيه الباعوضه تاني ما تحوم عليك وقد كان شوفتا علبة مليتها زيت راجع عليك امان الله الباعوضة تاني ما سمعت بيها سمع
| |
|
|
|
|
|
|
| |
عباس الدسيس
Abureesh
عمار عبدالله عبدالرحمن
عمر موسي منجي
فيس بوك
تويتر
انستقرام
يوتيوب
بنتيريست