|
|
 أول عهدى بأعياد الميلاد!!
|
عيد الميلاد كلمة غائبة عن قاموس طبقتنا حتى عهد قريب..
وطبقتنا هى الطبقة الكائنة فى إحدى منحنيات العقل الباطن للمجتمع السودانى..
لاتخرج لوعى هذا المجتمع إلا فى حالة النوم أو التنويم..
ولاتظهر إلا فى شكل كوابيس لاتقل عن كابوس أن يرى الطيب مصطفى أنه مسجى على الأرض على وجهه وأن باقان أموم ذابحه فى حملة عسكرية يقودها عرمان والحلو وعقار..
ولكننا نعرف عيد الميلاد كمولد أو حولية..
فالمولد الوحيد الذى نعرفه هو المولد النبوى الشريف
ونعرف حولية السيد على الميرغنى
واعترف بأننى أصبت بنشوة غامرة حين أبطأ القطار قصاد حلتنا ورأيت يد السيد محمد عثمان الميرغنى خارج القطار يقبلها من استطاع اللحاق بذاك الشباك المنير, والى عهد قريب عندما تدعوا النسوة لبعضهن بمسك شباك النبى أتخيله شباك فى قمرة قطار يسير ببطء!
لم نكن حقيقة نحسب فى سجل المواليد..
ففى ذلك الزمن لم تتدرب بت الباشكاتب على حرفة الولادة ولم تستلم شنطتها..
ومراسم استلام شنطة الداية أمر لو تعلمون عظيم, على ذلك الزمان يحتفل به وربما يذبح له عمبلوك..
هذه الطبقة الكائنة فى عقل المجتمع الباطن تعرف التفريق جيدا بين ما يذاع فى الراديو وما يبث فى التلفزيون وبين الواقع, لذا كانت أعياد الميلاد ومايصاحبها من كيك وشمع وغناء كانت ضمن مايذاع ويبث فى "التمسيليات"..
لا أدرى من أين جاءت تلك القدرة بين رسم خط واضح بين القول والفعل والواقع والدراما,
ولكن ما أعيه أننا كنا نستحم على هوانا وحسب نشاط أخواتنا البنات فى ورود البئر , واعى كيف كان الرجال بيدهم معالجة البئر عندما "تقط" واعلم أن البئر لها عيون تبكى فرحا عندما تنعكس وجوه الغلابا على صفحة مائها.
وجانا الرادى
وسمعنا بموية المواسير جاية
وجات موية المواسير من المدينة تمشى مسافة 5 كيلومترات
وقال الرادى بينكم والموية تانى صنبور يدار باليد المجردة..
وقلنا تانى يا الحمام جاك بلا
ومن وقتها قفلنا البير بفعل ضابط الصحة واصبحنا لانستحم إلا بعد أن يفرغ سكان المدينة وعلية القرية من حوجتهم للماء..
ومن يوما كضبناك يا الرادى واحتمال برضك تكون مظلوم زينا ولكننا تعلمنا أن نرى ماظهر لنا..
خليك من الهترشة أعلاه
ودعنى أريح قلبك بأننى قد تشرفت بمقابلة حكيم باشا مستشفى الخرطوم شخصيا بعد 9 سنوات من ميلادى, وأبهرنى حين عرف عيد ميلادى, وأفرحنى أكثر بأن ربط اﻹحتفال بعيد ميلادى باحتفال الوطن باستقلاله..
ورغم انبهارى بالحكيم باشا, ساورنى شيئ من الريبة فيه..
وكدت أتهمه بأنه أحد أعضاء مؤتمر الخريجين..
فكيف له أن يعرف عمرى وهو جالس على كرسيه وفى 5 دقائق فقط؟
أيكون له فراسة الأزهرى والمحجوب؟
لقد تعودت أن أخى الذى يكبر أمى بسنوات يبذل مجهودا فى معرفة سن الخرفان فيفتح خشم كل واحد على حدة ثم يحسب أسنانه وبعدها يعلن عن عمره..
ما طمأننى أنه مثقف سودانى يجلس على كرسى وثير, وقد علمونا أن المثقف يعرف مايختلج بداخلك دون أن تبديه, ويعرف مايصلح لك ومايضرك أكثر منك..
وأتيناك ياجامعة الخرطوم
وبفضل بركاتنا تحقق لأول مرة حلم لائحة التمثيل النسبى وفازت باﻹتحاد كما عجزت عن تحقيق برنامجها ولم تنجح فى تغيير دستور الحر المباشر..
ولكننا فى تلك الفترة تحقق لنا مشاهدة بنات الأحفاد مع بنات جامعة الخرطوم يلعبون كرة طائرة فى ميدان داخلية فلسطين للبنين..
وكذلك استمتعنا بمظاهرة مارس منزوعة الفتاوى وتبادلنا مع بنات الداخلية كل هتافات المكاواة بما فى ذلك تبادل قاذفات الموز من جانبنا وقاذفات الصابون من جانبهن وشيعنا نعش اﻹمتحانات..
ومشينا ليك يا الجميلة ومستحيلة ودا كان إسم جامعة الخرطوم فى الفرع واحيانا يحلو لنا كمثقفين فى كلية الطب أن نحتكره, وكان اسم الفرع حينها فى جامعة الخرطوم الحنينة السكرة..
والعبد لله واصل ككابوس من العقل الباطن المجتمعى جلافته فى كافتيريا الطب..
فكنا نكتب ونتكتل مطلقين على أنفسنا المستقلين الأحرار..
والمستقلين الآخرون يطلقوا علينا الوصوليين..
وقد كنا حقيقة أصوليين "كمثقفين" حافظنا على إرث الزعيم الأزهرى والزعيم المحجوب فكانوا سلفنا الوصولى بجدارة حين مسك أحدهما بجلباب الميرغنى والآخر بجلباب المهدى..
وكنا نتمثلهم بشراهة عندما نمسك كل شيئ من طرفيه ونرفعه كما أمسكا العلم من طرفيه ورفعاه نيابة عن أمة السودان العظيمة, فمن غيرنا يلد زعيمين يمسكان بالشيئ من تلابيبه حتى يبين استقلاله؟
وقد كونا قائمة من الوصوليين أو الأصوليين أو المستقلين الأحرار كما يحلو لك عزيزى..
وكان رأس القائمة البروف معز عمر بخيت مستهدفين كراسى رابطة طلاب الطب..
ومن النجوم الذين يشكلون سماء عنوان هذا البوست الدكتور أحمد سيد أحمد ابن وزير التجارة فى الحكومة اﻹنتقالية برئاسة الجزولى دفع الله..
شفتوا الهنا الأنا فيهو؟
بعد ما كنت فرحان بالبنطلون والقميص و كنت من الذين عندما رأوا لوح التلج يعوم فى حلة الموية فى السفرة فى البركس قالوا: أحححح من كد وجد, بقيت مع أولاد الكبارات فى لستة واحدة!!
المهم ياعمك
اﻹنتخابات انتهت واخدنا صايمة أمام لستة مؤتمر الطلاب المستقلين..
وتمشى الأيام وتجى
وتجينا يا أحمد السيد وتعزمنا عيد ميلادك فى الرياض..
ونقرر نمشى
أنا شخصيا متوجس خيفة ولكن يحملنى الفضول
وكان معى من الذين عزموا على الذهاب
عجب الدور من كادوقلى
أسامة من أبوعشر
عمر من حى الموظفين مدنى
وعبد العال من أمدرمان
والعبد لله من ضواحى شندى
طبعا كنت شادى حيلى بوجود ود مدنى وود امدرمان فى الناس الماشين من لستتنا بتاعة الوصوليين..
الكلام دا فى النصف الأول من التمانينات من القرن العشرين..
أنا عندى بنطلون كردورويت أسود وقميص أحمر مشتريهم من الجماعة الببيعوا فى البكاسى لقيتم بالصدفة قدام الجامع الكبير فى الخرطوم وعندى فتيل ريحة ون مان شو..
لبست واتجبجبت بالفتيل داك ونزلت للجماعة أعلاه..
ركبنا تكسى عشان مانتوس خ فى المواصلات وعشان المكوة ماتتكسر..
وصلنا البيت وطبعا يدينا فاضيااات
أنا شخصيا ماعندى علم أنو الناس بتجيب هدايا فى عيد الميلاد
وكويس ماكنت عارف لأنى كان حا اشترى من نفس البكسى داك بنطلون أو قميص وانتو عارفين الفيهن.
وقفنا فى الباب ندق فى الجرس
وطبعا الباب فاتح ومافى زول بدق جرس
المهم ربك رب الخير يجى عمك سيد أحمد بالصدفة من بره يلاقينا
وطبعا عرفنا داقسين
رحب بينا ترحاب يشد الحيل ويجعل الواحد يعشم فى ذبيحة ووليمة..
دخلنا قابلنا أحمد
سلم علينا وبسرعة قال اسبريد اسبريد بالأفرنجى
دخلنا لقينا الترابيز مختلطة
والونسة باللغات الأجنبية
أدناها اﻹنجليزى وبأكسنت أصلى بلادو
يعنى كلمة نلقطا وكلمة نجليها..
لقينا نفسنا نحنا بربطة المعلم قاعدين مع بعض وكل واحد حركاتو تقول للتانى ضارينى..
طبعا عجب الدور وأسامة أنا ما مستغرب فيهم
لكن خفت لما لقيت عمر وعبد العال بتصرصروا وخجلانين زينا..
المهم نتحكحك فى بعض ونزحزح لحدى مالقينا نفسنا دخلنا جوة الصالون الفيهو الدى جى
وفى الداخل أدينا ضهرنا للناس..
ود أبوعشر طلع ناصح وقف ودمدنى قدامو وعامل زى بتونس معاه وهو مقابل الساحة الفسيحة بعاين فى الناس البترقص جوز جوز..
طبعا العبد لله جاتو صورة حفلة فى حلتنا لما واحد من شندى المدينة وقف قدام بت من بنات حلتنا وبدا يرقص معاها, وجا داخل عم فضل وعينك ماتشوف إلا الكبع..
وحينها قربت أقول للجماعة أوع يكون فضل معزوم فى عيد الميلاد دا..
المهم ياسادة لم نشاهد شيئا فى عيد الميلاد لأننا كنا مغشى علينا من الخجل, ولكننا فى اليوم الثانى فى الكلية خصوصا مع أبناء طبقتنا وكمثقفين سودانيين قلنا الكثير عن مافعلناه من بطولات فى تلك الحفل جعلت كل بنات الحفل يتركن كيساتهن وينبهرن بنا!!
ودار الزمن وجيناك يا أمريكا
وطبعا عندهم عادة فى الشغل العلاقات العامة ترسل ليك كرت تهنئة بعيد ميلادك وموقعين فيه كل ناس المكتب..
وحتى اليوم كلما يأتى يوم واحد واحد وافتح البريد والقى ظرف من ناس شغلنا أتوجس
من هذا الكرت حتى أفتحه ثم أرميه فى السلة..
فى إحدى الأيام دخلت فى نقاش مع زميلة فى الشغل أمريكية عن اﻹحتفال بعيد الميلاد.
وذلك لأنها لاحظت مرات أنسى أن أقول ليها كل سنة وانتى طيبة
وكمان لاحظت فى مرة عندما قالت لى هابى بيرث ديى انخلعت ثم استدركت عيد ميلادى..
فسألتنى إن كنت لاأحتفل بعيد الميلاد
فطبعا العبد لله "كمثقف" سودانى وكوطنى "غيور" على وطنه ماممكن يقول ليها ماعارف عيد ميلادو, أو أن وطنه لايهتم بتاريخ بعض المواليد..
يعنى عيب تقلل من شأن وطنك قدام الأجانب..
فقلت ليها أنا شخصيا عندى فلسفة فى الموضوع دا
وصراحة بستغرب من الناس البحتفلوا بعيد ميلادهم
فعاينت لى
وطبعا أنا بطريقة المثقف السودانى مفهم ليك الزولة دى أننى فيلسوف كبير
ومثقف خطير
فقلت ليها ببساطة كدا كيف الواحد يحتفل بانتقاص عمره؟
وطبعا الأمريكان بياخدوك قدر عقلك ( مرة اتكلمت انجليزى مخرمج مع واحد ومافهمنى قام قال لى طبعا انتو بتتكلموا انجليزى على الطريقة البريطانية ودى أحسن من طريقتنا)
فقالت لى ياسلام تصدق أصلا مافكرت فى الموضوع بالصورة المنطقية دى!
وهكذا كنا ولا نزال يا حبايب نحمل الوطن وسمعة المثقف السودانى فى قلوبنا.
ويذكرنى ذاك بتعريف جرير عندما سؤل عن أشعر العرب
أتى بالسائل الى بيتهم
وكان هنالك شيخ يحلب معزاة فى فمه والحليب يسيل على لحيته
وكان والد الشاعر
فقال له:
أشعر الشعراء بمن يفاخر بهذا الشيخ!!
|
|
  
|
|
|
|
|
|
|
 Re: أول عهدى بأعياد الميلاد!! (Re: Balla Musa)
|
Quote: ولكننا نعرف عيد الميلاد كمولد أو حولية..
فالمولد الوحيد الذى نعرفه هو المولد النبوى الشريف
ونعرف حولية السيد على الميرغنى
واعترف بأننى أصبت بنشوة غامرة حين أبطأ القطار قصاد حلتنا ورأيت يد السيد محمد عثمان الميرغنى خارج القطار يقبلها من استطاع اللحاق بذاك الشباك المنير, والى عهد قريب عندما تدعوا النسوة لبعضهن بمسك شباك النبى أتخيله شباك فى قمرة قطار يسير ببطء! |
دي كتابة جميلة
| |
|
|
|
|
|
|
|
|
|
Re: أول عهدى بأعياد الميلاد!! (Re: Balla Musa)
|
أبوحتوت ياسمح
طبعا مداخلتك أعلاه لم أقتبسها ولكنى كبشرتها بغرض بروزتها
بعد الترجمة عشان أدى منها نسخة للخواجية زميلتى المحكى عنها أعلاه..
واحتمال أضيفها لسيرتى الذاتية..
ياخى هذا البوست برعاية البروف أمين محمد سليمان
فرسالة خاصة منه أعادتنى للكتابة!!
| |
|
|
|
|
|
|
|
|
|
Re: أول عهدى بأعياد الميلاد!! (Re: Balla Musa)
|
Quote: وسجل إعتراف:
منكم تعلمنا نكتب
فشكرا لوجوكم فى هذه الدار. |
النصيحة: زي كتابتك دي منك وليك .. وكتابة جميلة زي دي بي (كرتين) ما بتجيني :)
________________________________________
ويا ود البشري أنا بس قلتا كتابة جميلة
لانو هي بالضبط كدا .. ومستوفي الجمال ما بزيدو الكلام
| |
|
|
|
|
|
|
|
|
|
Re: أول عهدى بأعياد الميلاد!! (Re: Balla Musa)
|
دكتور بلة
تحياتى ياخى
امانة ماك حكاى
صدقنى كأننى ارى بعض الصور مجسدة أمامى وخصوصا حفلة العرس بحلتكم والسكة حديد وكافتريا الطب والتمثيل النسبى وميدان السلة وداخلية فلسطين وطبعا هى داخليتنا فى تلك السنة والمباراة الشهيرة والمظاهرة البعدها وجكسا فى خط ستة والمارسية والهناى والهناى الجدعونا بيهم ديل بالغت فيهم عديل يادكتور وعليك اللة كتر من ذى الحكى دا.
| |
|
|
|
|
|
|
|
|
|
Re: أول عهدى بأعياد الميلاد!! (Re: خالد عبد الله محمود)
|
يامحمد أحمد سعيد
ياخى والله ليك وحشة انت والود الاسمو عادل على
ياعمك من فارقتو انتو شركة اﻹطارات الدولية أنا ماشى حفيان من العواطف كلها..
ياسلام يا محمد احمد
عليك الله شفت جامعة الخرطوم كانت حلوة كيف؟
تلمنى انا من ريفى شندى مع أحمد سيد احمد ود وزير التجارة من نواحى رياض الخير السودانى!!
بعدين الحكاية ماكانت مباراة سلة
عشان المراقبين جيدا قالوا شافوا بنات الأحفاد عندما يتأودن لالتقاط الكرة وصدها يظهرن وكأنهن يلبسن جكسا قاب خطين من المرمى..
ياخى الزول دا الاسمو عادل "غريش" انا مقصر معاه شديد لكن عارفو قلبو حنييين, لو جدعتو بى الو سلم عليه شديد.
| |
|
|
|
|
|
|
|
|
|
Re: أول عهدى بأعياد الميلاد!! (Re: Balla Musa)
|
Quote: أنا عندى بنطلون كردورويت أسود وقميص أحمر مشتريهم من الجماعة الببيعوا فى البكاسى لقيتم بالصدفة قدام الجامع الكبير فى الخرطوم وعندى فتيل ريحة ون مان شو..
لبست واتجبجبت بالفتيل داك ونزلت للجماعة أعلاه..
ركبنا تكسى عشان مانتوس خ فى المواصلات وعشان المكوة ماتتكسر..
وصلنا البيت وطبعا يدينا فاضيااات
أنا شخصيا ماعندى علم أنو الناس بتجيب هدايا فى عيد الميلاد
وكويس ماكنت عارف لأنى كان حا اشترى من نفس البكسى داك بنطلون أو قميص وانتو عارفين الفيهن |
ليس أجمل وأقرب للقلب من التصوير الصادق للواقع بتفاصيله الصغيرة
يا دكتور scott ... زمن ياخي والله من الروايع دي .. شكراً يا بلة .
| |
|
|
|
|
|
|
|
|
 Reمظاهرة مارس في الجامعة (Re: عبد المنعم سيد احمد)
|
من مغربية بدرية رسلنا البت (تاتا ) لانه حركتها خفيفة
تمشي تتطقس تشوف لينا الاولاد بيعملوا في شنو وتتنصت خطتهم شنو
وهنا لملمنا شوالات الفحم المليانة بتاعة الدكان وتكلناها على الحيطة عشان نطلع بيها
لملمنا برضو تياب الصلاة كلها وإتلفلفنا واتقنعنا بيها كوييييس
كانت أخطر حاجة إنك تتكشف ويعرفوك انت منو
وطلعنا في الحيطة
ود البركس مابدورو
ضاربو الفلس مابدورو
ماكل العدس مابدورو
وكانت أيام
| |
|
|
|
|
|
|
|
|
|
Re: أول عهدى بأعياد الميلاد!! (Re: Rawia)
|
عبد الله الحبيب يا السكر البراون
كيفك يا أحد نجومنا فى البالتوك
ياخى تتذكر سوق عكاظ العملناه للموناليزا لحدى أمدرمانية الله يرحمها نهرتنا وقالت قولتها الشهيرة:
خلاص الروم قفلت وكل قرد يطلع شدرتو!!
تحياتى ياجميل والسلام لكل أحباب البالتوك
| |
|
|
|
|
|
|
|
|
|
Re: أول عهدى بأعياد الميلاد!! (Re: عبدالوهاب علي الحاج)
|
ونحنا سمعنا الظيطة
السلام يغشاك ياراوية
أوع كمان تكونى من سلاح المدفعية داك؟
مظاهرة مارس كانت ابتكار جميل لتنفيس التوتر والقلق الذى يسبق اﻹمتحانات
وكانت خط فاصل بين الخمر والأمر والنشاط اﻹجتماعى والنشاط الأكاديمى
بعدها تكتظ المكتبة المين وبقية المكتبات والقاعات بالطلاب وتخلو الشوارع إلا من بعض العشاق والمشوكشين..
وبعد مظاهرة مارس يصبح التواجد فى الكافتيريات والنشاط لغرض البريكات وفى هذه الفترة يزيد الطلب على القهوة للذين ينتوون "التفيل"( يصبحوا أفيالا)..
راوية شكرا لك بعدد ذبذبات الأصوات التى قالت: لا لامتحان اﻹنسان لأخيه اﻹنسان!!
| |
|
|
|
|
|
|
| |
Balla Musa
aydaroos
محمد البشرى الخضر
Mohammed Ahmed Saeed
خالد عبد الله محمود
Abd Alla Elhabib
عبد المنعم سيد احمد
Rawia
عبدالوهاب علي الحاج
فيس بوك
تويتر
انستقرام
يوتيوب
بنتيريست