|
|
|
 Re: أمسية الروائى (حبيب نورة) .. ملخص + صور . (Re: مركز الخاتم عدلان)
|
حبيب نورة :-
السلام عليكم , ومساء الخير عليكم .
انا سعيد جداً بالحضور الكريم والاستضافة الاكتر من رايعة من مركز الخاتم عدلان , برحب بيكم كتير واتمنى انى اكون خفيف ليكم .
انا مسخوط وشقى جدا بالقلم , لكن لما اتكلم ما بكون كده , كان مفروض اكون يا كاتب يا امام جامع مافى خيار تالت , وانا اخترتا الكتابة لانها قادرة انها تطلع المجرم الجواى , مجرم بموصفات ما بتدخله الحراسة .
فى رواية (منغولى) بعتقد انو الازمة الحقيقية هى ازمة شخوص وما ازمة كتابة , وانا مهموم بالشخوص , قبل ما اكتب الرواية دى كان عندى صديق فى (القاهرة) وقلتا ليهو انا اليومين ديل بعانى جدا ومحتاج لشخصية اكتب عنها وبطريقة بتخصنى انا .
فى جخنون من جخانين (القاهرة) لقيت طفل منغولى بيتسول عن طريق بيع المناديل , لاعتقاد يخصه كان عندو فينى ثقة كبيرة جدا وكان بيلم الغلة كلها ويختها لى فى التربيزة وانا احسبها ليهو وبتطلع يا 180 يا 190 جنيه , واحيانا كنتا بتدين منه يعنى باخد منه 10 جنيه تانى يوم برجعها ليهو 15 جنيه , لفت نظرى انه ذكى جدا وحاضر البديهة بطريقة ما بتتوفر للاشخاص الاسوياء , فقررتا انى اتناول شخصية الطفل المنغولى .
الاهتمام فى دول العالم التالت والسودان على وجه الخصوص نجد عدم الاهتمام المجتمعى بالمنغوليين واكتشاف الجانب المبدع فيهم .
فى الرواية شعرتا انى قدرتا ادى صورة قريبة للطفل المنغولى , ما اهملتا الجانب الطبى والعلمى , والجانب الادبى بعد داك قدر انو يقوى الصورة ويوصلها بطريقة افضل .
الطفل المنغولى ممتاز جدا فى الوظائف الاساسية للجسم , الضعف بيكون فى قدرته على الاستجابة والتخاطب مع الاشخاص السويين , الطفل المنغولى بيأتى عادة لامهات اتجاوزن الـ 35 سنة والتعميم طبعا مخل لانو ثبت انو فى امهات دون الـ 30 انجبن اطفال منغوليين .
الشخصية المحورية فى الرواية هى شخصية (جدو) فى بيئة ريفية وهى نفس البيئة النشأت فيها , وكان عندنا كذا حالة وانا حاولت انى استلهم شوية من هنا ومن هنا عشان اعمل البنيان الدرامى للرواية .
انا نشأت ولقيت امامى طفل اسمه (مجاهد) ولاحظت انو كان عندو قدرة عمل اشياء خارقة ما كانت بتتوفر لينا , والكـلـب الملازم لـ (جدو) فى الرواية انا جبتو من الواقع , وان ما بزعم انو الرواية دى هى سيرة ذاتية او كلها من الواقع لكن مرات بيحصل تطابق بين الواقع والخيال .
حاولتا فى الرواية الاستفادة من مكون البيئة لانو البيئات الريفية هى الاقل اهتماما بالاطفال من النوع ده , من الشخصيات الشبيهة بحالتى فى الرواية هى شخصية (صلاح) , (صلاح) ده جاى من اوروبا معمد بعلم وتنظير كتير وكان الراوى مبهور بشخصيته , وحصلت النقلة فى حياة الراوى الكان مولع بالقصص البوليسية من نوع (ادهم صبرى) و (الشياطين الـ 13) , حصلت النقلة واكتشف انو الطلع بيهو من (صلاح) لا يفضى لشيء ومجرد فراغ , بعد داك بدات كتاكيت الاسئلة تصوص فى مخيلة الراوى وبدأ يكتشف العالم من حوله وينظر للاشياء بمنظور جاد .
من الشخصيات البحبها فى الرواية شخصية (كرار) وهو شيخ عرب , عندنا فى مجتمعنا فى (السروراب) شخصية شبيهة زول اسمه (مجدد) وهو شيخ عرب وسكرجى من السكرجية المحترمين جدا وشخصية (كرار) استلهمتها من (مجدد) , والشخصية الحقيقية مرة صادف ولده فى نفس المجلس وقام قال ليهو يا ولدى يا تتفضنلى يا اتفضلك وفى النهاية الولد البار اذعن لمشيئة الاب وترك الخمر لغير رجعة .
انا حريص جدا فى اى شغل بشتغله انو تكون فى مفاجاة فى النهاية , بعد ما مشت الرواية المطبعة حصلت اشكاليات بسبب معرض (القاهرة) وانو فى كتب مفروض تحصل المعرض قمتا سحبت النص من المطبعة , ولما قمتا بالمراجعة شعرتا انو النهاية ما فيها مفاجاة , وفى جلسة فى قهوة فتحتا النص فى الكمبيوتر وبدايت اقرأ الفصل الاخير وجاتنى فكرة مجنونة , وبعتبر انو اجمل مافى الرواية هى القفلة بتاعتها .
| |
 
|
|
|
|
|
|
|
|
Re: أمسية الروائى (حبيب نورة) .. ملخص + صور . (Re: مركز الخاتم عدلان)
|
| Quote: الفصل الاخير وجاتنى فكرة مجنونة , وبعتبر انو اجمل مافى الرواية هى القفلة بتاعتها . |
أجمل الأفكار إبداعا هي تلك التي تأتي دون سابق إستئذان!.
تغطية بديعة وسرد رائع لخطوط الرواية في كبسولة
خالص التهاني القلبية لحبيب السمحة وسمرية.
والشكر موصول لمركز الخاتم عدلان على الإستضافة.
محبتي
| |
|
|
|
|
|
|
|
|
Re: أمسية الروائى (حبيب نورة) .. ملخص + صور . (Re: إبراهيم عبد الحليم)
|
أستاذة نهلة محكر :-
رواية (منغولى) وصل بيها حبيب نورة للنضج الكتابى الحقيقى , (الحب من طرف ثالث) كانت اللغة فيها عالية لكن موضوعها انا اعتبرتو عادى , (منغولى) الشغل الحرفى فيها ظهر بشكل رائع لـ (ياسين) , وفى الرواية دى بيقول لينا اننا نحنا المنغوليين مش (جدو) .
(ياسين سليمان) صاخب جدا لكن فى الورق , وهو ما بيتكلم مع اى زول البشكل البيكتب بيهو .
***
أستاذ عمر الحاج :-
شهادتى فى حبيب نورة مجروحة , هو صديق عزيز , وحبيب نورة ما كاتب مقيم فى (القاهرة) لكن (القاهرة) مقيمة فيهو .
مرة هو كتب عن (الحمار) وانا من الجزيرة واعتقد انو كتب عنها بطريقة مميزة للغاية , فى (منغولى) قدم لمحة عن تاريخ المرض ودى نقلة نوعية لكاتب داير يكتب عن شخص .
(ماركيز) قال انو هو قرأ اى كتاب , فى الفيزياء وتاريخ صناعة العجلة الخ وبعد كده كتب رواياته , والشاب (ياسين) ماشى فى السكة دى , ودى سمات الروائيين الكبار .
****
أستاذ محمد عبدالنبى :-
اتحصلتا على الرواية زى الساعة 8 مساء , تانى يوم الساعة 4 كنتا انتهيت منها .
رواية مدهشة , واللحظة بتاعت موت الشاب فى قرية (السوروراب) والنقلة بتاعت السرد عن منغولى (القاهرة) بعدها مباشرة , دى حرفية عالية .
الرواية بداية جيدة ومن اجمل الاعمال الصادفتنى فى الفترة الاخيرة .
****
أستاذ نظام الدين :-
فى تدشين رواية (الحب من طرف ثالث) ذكر المؤلف ان شخصية منغولى كانت موجودة فى رواية (الحب من طرف ثالث) وقال انو شعر انها اكبر من الرواية ومن الممكن انها تكون رواية قائمة بذاتها .
****
أستاذة وفاء احمد :-
عايزة اتكلم عن شكل الكتاب والغلاف والتصميم الخارجى , جذبنى جدا التصميم لكن كان عندى سؤال منو هو ياسين سليمان ؟ , فى الكتاب مافى السيرة الذاتية لا فى البداية لا النهاية فى صفحات الرواية .
فى موضوع التشابه فى الرواية بين (عرفة) و (ازدهار) , وبين (جدو) والمنغولى بتاع (القاهرة) , و(صلاح) البيشبه انصاف مثقفين كتيرين موجودين عندنا , المثقف العندو محمول فكرى لكن ما قادر يتواصل مع قريته واهله .
****
حبيب نورة :-
(الحب من طرف ثالث) كانت بالنسبة لى البداية , وكانت سبب لانتقالى من (السعودية) للـ (القاهرة) .
بحس انو النصوص القصيرة ما ممكن تديك قراية واضحة وتخلى القارئ يقول انو الكاتب ده متمكن , والكتابة الرواية بتظهر امكانياتك كلها .
(الحب من طرف ثالث) حسيت انو فيها استعراض بتاع كتابة بخلق صور جميلة ومفردات انيقة , واول سهم نقدى اتوجه للرواية دى كان من الكاتب نفسه .
(منغولى) بالنسبة لى كانت مشروع , كان فى روايات سبقتها , لكنها كانت مشروع حياتى , وكان لازم اقدم قضية الطفل المنغولى بصورة ترسخ فى ذهن القارىء وفى نفس الوقت تعالج مشكلة .
شخصية المنغولى كانت فعلاً موجودة فى (الحب من طرف ثالث) لكن شعرتا انو الافضل انها تكون فى رواية منفصلة , انا كنتا بعطى بلا حدود فى الانترنت لكن اول ما اطبع لى كتاب بقيت ادس الكتابات السمحة على جنب لانها هى الكتابات البتجيب القروش .
هسع عندى شغل بتاع رواية البطلة فيهو (كديسة) والبشر ادوارهم ثانوية وتكاد لا تحس بوجودهم .
تأثير (مصر) علي , انا بعتبرها انها ملهمة جدا , واعتقد انى قدرتا اكتب عن (السودان) بشكل جيد لما كنتا فى (مصر) , تاثير الحياة فى (السعودية) بالنسبة لى كان ملل وما بتقدر تتواصل مع الأخر وتصيبك بلادة حتى على مستوى علاقاتك الاجتماعية .
(مصر) مجتمع قادر انو يفجر فيك طاقات كبيرة جدا وده ظهر فى كتاباتى اللاحقة عن (السودان) , (مصر) ما غربة وانتا فى كل شارع فيها بتلقى بين كل سودانى وسودانى , سودانى .
اعتقد اننا لسه ما عندنا القدرة اننا نطرح كل الاسئلة العندنا عبر الورق , المناخ ما مساعد , وعشان كده بتلقى انو الكتابات الجرئية متركزة عبر شبكة الانترنت .
اتعاون معاى فى تصميم الكتاب الصديق (ابراهيم محمد صالح) , وانا ممكن اتعرف على مؤلفين من خلال اغلفة الكتب بتاعتم او من خلال العنوان .
ما بعتقد انى عندى سيرة ذاتية عشان اقدمها هسع , وانا ما عندى غير كتاب او كتابين وعشان يكون عندى سيرة ذاتية مفترض يكون عندى انتاج وفير وانا لسه بتلمس طريقى .
| |
|
|
|
|
|
|
| |
مركز الخاتم عدلان
الفاتح ميرغني
Abdlaziz Eisa
إبراهيم عبد الحليم
صابر فضل المولي
فيس بوك
تويتر
انستقرام
يوتيوب
بنتيريست