أنا شخصياً تعبت، ما عشان هي اسئلة محرجة ، لا لسة ما وصلنا المرحلة دي لكن كتيرة ، اكتر من طاقة اي بني آدم علي الاحتمال خصوصاً اذا كانوا عندك اكتر من واحد، مرات تجاوب بأريحية ومرات تتجاهل الأسئلة ومرات تجاوب: عشان انا قلت كدة بس ، وبرضو ما بحلك. بحاول اتفادي دائما إجابة (أنا ما عارف) ولا عشان (مافي قروش) ولا اي حاجة سالبة ممكن تتخيل انها بتأثر علي اعتزاز الأطفال بنفسهم أو باسرتهم. لكن اظن حتي لو جاوبت اجابات زي دي برضو ما بحل.
مرات الواحد يحاول يلقي تفسير للأسئلة ومبررات (عشرين سؤال في الدقيقة) ، دي شنو الاسئلة الطفولية دي والساذجة و############ة دي، بعد شوية تستدرك انهم هم فعلاً اطفال ولازم يسالوك اسئلة زي دي ، اكيد ما حايسالو عن علم الفلك ، لكن ما قدرت افهم انو طبيعة الاسئلة دي شنو بالضبط ، هل بتديهم معرفة حقيقية ولا هل هي محاولة فتح باب حوار معاك ولا هل هل لفت انتباه ولا قصتها شنو ...
اليوم هو واحد من الايام الفيهو اجابات بأريحية، يسالني واحد منهم عن المطر جايي من وين ، وحاولت اشرح فكرة الموية البتتبخر من الشمس وتمشي السماء لكن قبل اصل السماء اضطريت اجاوب لي زي عشرين سؤال منها المس وحرارة الشمس التبخر والتكثف واكيد اكيد اضطريت اجاري تفسيراتهم واتبناها بدل التفسير العلمي المتخيل اني حاعلمهم ليهو زي انو الموية زعلت من الشمس وطلعت فوق لي مع اخوانها ومشوا لي ابوهم وامهم واشتكو ليهم الشمس وبعدين غشوا الشمس ولمن مشت جوا نازلين مطر لكن تاني الشمس بتجي تطردهم ... وفي النهاية الحل الوحيد انو اصل البيت واغير الموضوع ... في النهاية اتضح اني انا الطلعت بي معرفة جديدة
ياريت واحد يفهمنا الحاصل شنو
11-13-2012, 01:09 PM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
لا ما تحاول يا جعفرنا خاصة مع الجيل الجديد جيل الأندرويد و الآيفون و الإكس بوكس دا اليومداك أم حتوت قالت حتوت شال تلفونها و نزّل ابليكيشن السكاي بي و عايز يعمل أكاونت وبسال فيها اكتب هنا شنو و هنا شنو في عمرو انا كنت التلفزيون إلاّ يشغلّوه لينا!!
وكمان الأطفال بتأثروا بي بعض ويقلّدوا بعض عادي نفس السؤال تتسألوا تلاتة مرات ورا بعض و تجاوب نفس الجواب تلاتة مرات برضو و ألذ شي ناس "لأ" و " ما عارف" ما بتتقبل كإجابات نهائي
11-13-2012, 01:12 PM
omer osman omer osman
تاريخ التسجيل: 06-09-2007
مجموع المشاركات: 15218
Quote: و ألذ شي ناس "لأ" و " ما عارف" ما بتتقبل كإجابات نهائي
الله يطمنك يا باشمهندس يعني نجاوب اجوبتنا ساي بدون تنظير كتير
التكنولوجيا مشكلة حقيقية خصوصا اذا كان الطفل زي حسن ، علي استعداد يكون قاعد 15 ساعة متواصلة علي الكمبيوتر او بلاي ستيشن ، لحد ما يؤثر في قدرتخ علي التركيز ، وطبعا اكيد عامل فيهو بيل قيتس وانا ومرات يطلعنا ليك ما بنعرف اي حاجة ولا بنفهم اي حاجة ولا عمرنا شفنا كمبيوتر ، انا هين ما ادعيت اني درست كمبيوتر لكن امه استاذة كمبيوتر في الجامعة لكن مع حسن (ما بتفهم اي حاجة).
اليوم علق الاستاذ علي انو حسن ما بركز معاهو في الرياضيات ، وحسب معرفتي انو اصلاً حسن متجاوز مستوي التدريس عندهم بمراحل كبيرة ، لكن في النهايو وصلت لانو الموضوع عندو علاقة بناس بلاي ستيشن وام بي سي ثري واليوتيوب، فقررت اوقت اي حاجة مرئية في البيت لفترة عشان نشوف تأثيرها بس طبعا ده كلو تنظير مني ما عارف ماشي في ياتو اتجاه والله المستعان ..
جواب تلاتة مرات ،،، ها هاها تفاؤل شديد انا كل يوم سبت بسألوني نفس السؤال : انت لي يا بابا مدارس مدارس مدارس مدارس ... كتير كدة ليهم سنة كاملة
الله المستعان
11-13-2012, 06:55 PM
رشا سالم رشا سالم
تاريخ التسجيل: 08-24-2006
مجموع المشاركات: 2605
يا جعفر حمدلله على السلامة..مختفي ليك زمن. ألذ سؤال سألني ليهو جمال ولدي عن أصحابه الانجليز في المدرسة قال لي يا ماما هم عيونهم لونها اخضر...طيب بشوفوا الشجرة لونها شنو ؟ دا يقولوا ليهو شنو ؟
11-13-2012, 07:15 PM
Gafar Bashir Gafar Bashir
تاريخ التسجيل: 05-02-2005
مجموع المشاركات: 7220
Quote: بعدين لو جاوبت على نفس السؤال إجابة مختلفة في المرة التانية يقول ليك انت المرة الفاتت ما قلت كده هههههههه
Quote: اهي دي البتجيب كثافتي يا جنابو
سلامات يا جنابو
اااااااااخ ياخي ده مش فقع مرارة زي ما قال ود البشري ، لكن بتجيني حالة ما بعرف اسميها شنو، انا عندي ولد اصلاً ما مركز في اي حاجة بس سابح في ملكوت الله ، وعندي بت مركزة لدرجة تكرهك ابو التركيز ذاتو ، اها دي من النوع البسالك زي السؤال ده ، ولو قلت ليهم خلاص انا غيرت رايي تاني يقول ليك ... لكن انت قلت كدة قبيلك ... طيب خلاص انا غلطاااااان وندماااااااااان وسافي التراب .... البغيظك انهم مرات بضحكوا عليك كأنهم عارفين هم بعملوا في شنو بالضبط يعني بجيبوا في كثافتك ...
غيبة اظنها اطول مما اتخيل لانو بحاول اتذكر الدكتورة دي متين اتزوجت زاتو ما قادر اجمعها ليك، اظنو الكبر ولا الاولاد ما خلوا في الزول ذاكرة ... هسي طبعاً بحاول اخت نفسي في مكانك اشوف كنت بجاوب شنو ... اظنهم بشوفو لونها بمبي ... اتخيلي في موقف زي دا لو حاولت اوقل اي كلام منطقي يا اما اتعقدت المواضيع او جرجر ليهو عشرين سؤال تاني ...
يوم جا حسن من الروضة وانا متعود بالليل لما ارقد احاول اسمع ليهو وارجع معاهو شفاهة الحاجات الادوها ليهو خصوصا الحساب والدين، فمرة من المرات بعد سمعت ليهو سورتين سألني سؤال قال لي يا بابا سمع لي سورة حسوني ، قلت ليهو كيف يعني سورة حسوني قال ايوة سورة حسوني قلت ليهو يا حسن مافي حاجة اسمها سورة حسوني قال لي طيب خلاص سمع لي سورة كوتة (لقب اخته ليدا زي ما سماهو هو بنفسه في ايام الجهل) قلت ليهو يا حسن مافي حاجة اسمها سورة كوتة .. قال لي طيب يا بابا لي في سورة أبلة كوثر ومافي سورة حسوني ...
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
محمد البشرى الخضر
omer osman
رشا سالم
فيس بوك
تويتر
انستقرام
يوتيوب
بنتيريست