|
|
 قرار الوزير
|
تم اصدار قرار وزاري بتكريمه نسبة لخدماته الجليله بالوزارة اذ افني زهرة شبابه في خدمة الدولة.
عاين في المرايا لشعر الراس وتجاعيد الوجه كما له ارتجافه خفيفه في يده وهو يحمل المرايه تنهد اااااه يا حليل زمن الشباب بالله الواحد زمان اول ما اتعين كان شباب اضرب الحيطه ارميها حسي الحيطه بقينا نتكل فيها زي الغنمايه العجوز من وجع الركب وامراض العصر اهو الحمد لله اخيرا افتكرونا بالتكريم لمجهوداتنا الدوله بخيرها مادام فيها ناس زي سعادة الوزير الله اطول في عمرو.ا
لبلد اتغيرت زمان تشتغل وتموت في طربيزتك واحد اجيب خبرك مافي. .....
صحي من النوم الصباح بدري دخل الحمام ....
يا وليه المويه دي مندفعه كثيره كده ليه ناس الهيئه ديل جنوا المواسير دي ما بتبوظ علينا باندفاع المويه...
طلع من الحمام عاين في السرير ...
ياسلام الملابس جاهزه لبس البنطلون والقميص والجزمه البنيه لها زكريات معه هي بتاعت المناسبات ...
الوليه دي ماشاءالله عليها اليوم صحت بدري جابت ليهوا عصير من الصباح وصينيه فيها الشاي مع البسكويت .
خرج من منزله .
هو ما عارف المصحي المدام في الوقت ده والاهتمام !!
الوليه دي تكون جنت؟؟؟؟
كل يوم طالع من البيت الصباح اتزاوغ من موية البلاعات وال###### في الحي زي لاعب الكوره
الغريبه الحي ده بقي نضيف كده ليه.. ركب الحافله ... الله من الريحه الجميله سواق الحافله شايل في يدو معطر كل عشره دقائق اعطر الحافله الظاهر الناس دي كلها اليوم محتفله معاهو بالتكريم...
فعلا الدنيا اتغيرت كانت المقاعد الأمامية فاضيه، اراد ان يجلس : قال له رئيس اللجنه .. الكراسي القدام لسعادة الوزير وناس الوزارة . اراد ان يجلس في الصف الثاني -عفواً.. الصف ده للمدير العام والمسئولين في المصلحه. -طيب مافي زول حسي.....
اذكر ان المسئولين بالمصلحه بجو متاخرين .... طيب خلاص نقعد في الصف الثالث.... رئيس اللجنه الصف ده لرؤساء الاقسام ... والرابع للجنة التنظيم والاشراف . ولحظة جلوسه في ركن صيوان الاحتفالات بدأت الوفود تحضر ومعها موكب سعادة الوزير انشغل الجميع باستقباله. بدأت كلمات الاحتفال ترحيبا بسعادة الوزير ثم تلتها كلمة رئيس اللجنه ثم كلمة المدير العام واخيرا سعادة الوزير....
لقد غفي في نومه وصحي علي التصفيق المدوي الهائل..
إفتكر ان دوره قد حان فلمح الوزير يترجل من المنصه ...
وبعدها تم الاعلان عن اسمه للتكريم هرع مسرعا الي المنصه ووقف خلف المذيع لحين الانتهاء من توزيع الهدايا المغلفه لسعادة الوزير ووفد الوزاره .......
وبعد الانتهاء تم منحه شهادة تقدير....
وتوجهت الوفود لتناول وجبة الغذاء طوي الجريده ونظر الي زميلته في المكتب موجها لها السؤال : رايك شنو في القصه دي اجابته : قصه ممله ومأساويه.
|
|
 
|
|
|
|
عباس الدسيس
فيس بوك
تويتر
انستقرام
يوتيوب
بنتيريست