|
|
 ود اللمين زول بتاع قروش ومادي جداً
|
اهو قلنا نجرب العناوين (النابحة)كما يقول صديقي غازي.
بإختصار شديد جداً ود اللمين دا شغال فنان، عارفين شنو يعنى (شغّال) يعنى دا شغلوا في الدنيا دي
طيب كل المنظرين وعلى رأسهم المعز بخيت اليجئ واحد هنا يقول لينا لو نقصوا ليهو مرتبوا ولا لو ما أدوهو ليهو حيعمل شنو؟
وكل الناس الكتبت في الموضوع دا، لو جو ناس الشغل بتاعهم وقالوا ليهم اشتغلوا مجاناً ولا بي نص الاجر حيعملو شنو
|
|
 
|
|
|
|
|
|
|
|
Re: ود اللمين زول بتاع قروش ومادي جداً (Re: تبارك شيخ الدين جبريل)
|
تحية طيبة للجميع
يا صاحب البوست اوافقك الرآى تماما
و يا دكتور معز لم اتوقعها منك و انت من ظلمت هنا من قبل بقلم الاستاذ شوقى بدرى و لم تكن حينها عضو
فكيف بالله عليك تشنع بالفنان محمد الامين هكذا فى الصحف البحرينية !!! كيف بالله عليك ؟ !!
تفاصيل النقود صدمتنى جدا ان تنشر من قبلك
لود الامين التحية بقدر ما امتنعنا
ابدا ما عيب تطالب بحقك كامل ، العيب انو يجوك ناس و يكونو عايزنك تغنى ليهم بالعشم و ما يكونو واضحين معاك
شكرا ود الامين ، شكرا الباشكاتب ، شكرا صاحب البوست
| |
|
|
|
|
|
|
|
|
|
Re: ود اللمين زول بتاع قروش ومادي جداً (Re: elhilayla)
|
الحليلة
عارف نحنا قاعدين نتعامل مع الفنانين ديل كأنوا مفروض يجاملونا في كل شئ، ولمن يطلبوا حقهم نقعد نجقلب.
هسه موضوع ناس النيل الازرق دا ما وقع لي، ديل ناس تلفزيون ويجب إنهم يكونوا محترفين هل عندهم عقد مكتوب ويحفظ للتفلزيون حقوقو وللفنان حقوقو ولا يا هو شغل جربندي ساكت، غايتو لو عندهم حق والفنان خرق الاتفاق فدا موضوع ساكت، لكن لو الموضوع ونسة واتفاق شفاهي فما في سبب بيخلينا نصدق طرف ونكذب طرفز
وبالمناسبة البوست دا ابداً ما دفاع عن محمد الأمين، البوست دا دفاع عن حقل العمل وحق الأجر على العمل بالصورة التى يراها مقدم العممل
| |
|
|
|
|
|
|
|
|
|
Re: ود اللمين زول بتاع قروش ومادي جداً (Re: الصادق اسماعيل)
|
يا الصادق تعرف كتير من السودانيين لا تزال عالقة باذهانهم الصفة التي كانت تطلق على الفنانين في بدايات القرن الماضي
و ما شايفنهم غير صعاليك. انا عندي اخوان اتنين كانو بيغنوا و يطلعوا حفلات ، اكتر حاجة كانت بتزهجم انو اي زول داير
يملحهم، العندو مناسبة و الطالعين رحلة ..الخ عايز الواحد فيهم يجي يغني و ما يدفع و لا مليم.
| |
|
|
|
|
|
|
|
|
Re: ود اللمين زول بتاع قروش ومادي جداً (Re: الصادق اسماعيل)
|
صادق اسماعيل
قريت عنوانك النابح دة .. و بسرعة إتلببت عصاتي و استعدلت سكين ضراعي و جيتك داخل
.. ما اتوقعتك تمشي في نفس خط (الدهماء) الذين تمتلئ (فلاشاتهم) و (هاردسكاتهم) بالإغاني المسروقة
بغير وجه حق .. و دون حياء يتحدثون عن الاخلاق و الحقوق..
و الحمدلله صدقت توقعاتي..
ما يحدث الآن يؤكد أننا مجتمع قطيعي تختلط فيه المفاهيم من أدنانا إلى أدنانا (إذ لا عليَاً) لدينا..
كل من أنزل حباله البالية ليغرف من بئر هذا الموضوع ..دلائه مثقوبة .. و البعض بلا دلو واحد .. و لكنه يريد أن يغرف مع الغارفين..
أحدهم قال:" مفروض ود اللمين كان ياخد مصوري قناة النيل الازرق على الجنب و يكلمهم بدل التشهير بهم في المايك"
و نفس الشخص نقول له مقالك المؤسس على القيل و القال و الذي نشرته على اكثر من موقع على الانترنت كان الاجدر ان
تناصح به ابو اللمين .. باعمال نفس المنطق..
و قبلا ودي
| |
|
|
|
|
|
|
|
|
 Re: ود اللمين زول بتاع قروش ومادي جداً (Re: ابوعبيدة النعمان)
|
Quote: صادق اسماعيل
قريت عنوانك النابح دة .. و بسرعة إتلببت عصاتي و استعدلت سكين ضراعي و جيتك داخل |
وانا كنت وراء ابو عبيدة ود عمي النعمان ده لكن طابالي مفراكة ,, والله صحي
إنا للــــــــــــه ياخوانا ,, الدنيا قاااااااااايمة وقاعدة في ود الأمين ويا حليلو راقد عيان في بيتو الله يشفيهو
وقفوا النقة دي شوية وربنا يشفيه بركة جاه النبي
الأخ الصدق كتر خيرك يا خوي واكتفي بنقل مداخلتي في بوست الأخ محمود مصطفى ادناه ....
******
سلام وتحية للجميع ,,,,
الإخوة,,,,
صاحب البوست
دكتور معز
وكل الأحباب متفقين ام مختلفين عن ما حدث على حسب الروايات المذكورة اعلاه
وأقول روايات حتى وإن كانت على لسان شاهد عيان ، لكن الخلاصة الطرف واحد ، ايضا الحجة السودانية هي سيدة الموقف هنا
بالسوداني الدارجي اقول للجميع بكل صراحة , نحن دائما نتكلم بمنطق الهاشمية ,, يعني بصريح العبارة أكثر
دايرين نعمل زي حكاية ناس فلان المشوا يخطبوا بت فلان وفجعتن كده حلف جارهم التاسع عشر إنه يعقدوا في ليلهم ده
لا بهمو فترة الخطوبة والتفاهم ولا بعرف العقد المفاجيء ده ممكن يلوم اهل العروسين نسبة لأنه ما بكونوا عزموا كل الناس القراب
النجيضة للحظة دي ورغم إني زي وزي كل القرآء والمعجبين بفن محمد الأمين ما سمعنا وجهة نظره كاملة رغم ما ذكره الأستاذ الشاعر بشرى الله يديه العافية
بقولها بالفم الملان للحظة ما شفت سبب واحد يلوم الأستاذ ويشيلوا كل الشينة الإتبرع بيها بعض الإخوة المتداخلين
والأسباب مختصرة في الآتي :
كتير من الأسباب اللف حوالينها الناس هي المادة !! يقول ليك الأستاذ بحب القروش ؟؟؟
عليكم الله وبصراحة منو الفاتح عيادته ببلاش ومنو البدرس ببلاش ومنو الفاتح ليه دكان بدين الناس مثلا ؟؟؟
الراجل ده ياهو مصدر رزقه ومع حال البلد الوصل لخط الفقر وما عارفين ظروفه شنو ؟ ورغم سنه برضو لايمنو إنه بحب القروش ؟
يعني العالم دي دايرة الفنان ده يسهر ويلحن ويطرب حد الثمالة وببلوشي مثلا ؟؟؟ لمتين المجاملات المخجلة دي؟؟
كلنااا نحمد الله ما بنبقى برا القرش ودي غريزة في البني آدم منذ الأزل ..
اهلنا الكبار تعاملهم مع الأصغر منهم فيه حدة كبيرة وده بعامل السن ..
هل إنت بتبشع بوالدك مثلا لو رفع صوتو ولا احرجك قدام صاحبك الضيف ؟؟ ولا حتى جاركم كبير السن ولا ابو صاحبك ؟؟؟
اكييييد ما بكون داير يحرجك ، وأكيد في سبب قوي خلاه يتصرف كده واكيييد بنحترم كبيرنا وبنوقره وبنلقى ليه العذر
حتى لو في ملامة وعتاب بتكون بي طريقة مافيها تشهير ولا تجريح كما ذكر استاذ بشرى .. تجريح لمشاعر محبي الفنان وفنه العتيق المعتق
خاصة رجل في قامة مبدعنا ود الأمين..
واهي الأسباب جاتكم حسب المحادثة الدارت بين جار استاذنا ود الأمين واستاذ بشرى الفاضل
إنه حس بي حرج ومهانة لي فرقته إنه ما عوملت بي إحترام !!! وحتى المبلغ سلم لهم بي طريقة لا ترضي اي إنسان
( الناس كلها عرفت فرقة ود الأمين أدوها 200 دولار بسسسس لكل عازف يا كافي البلا وحايد المحن ويا رخصة مبدعينا وبرة بلدهم وفضيحتهم !!!! )
فما ممكن نقول إنه إستكتر عليهم المبلغ وهو مستلم 15 ألف !!!! وهي زاتها ما كتيرة ال 15 ألف دي,, ياما فنانيين بتعاقدوا في بلدهم جوة بي اضعاف المبلغ ده,,
اصلا ما مبلوعة والله يا دكتور معز وإنت الشاعر المرهف المفروض تقدر الأشياء قبل الإندفاع في الكتابة
عامل السن ليه اثر , استاذ ود الأمين اثبت وبدون ما يثبت اثبتت لنا الأمثلة تهاون قناة النيل الأزرق رغم حجمها الإعلامي تهاونت في عملها واعتمدت على طريقة ( امسك لي واقطع ليك)
وشغل النفير والجربندية ,,,
وين العقود ؟ في مثل هذه المواقف؟ لمتين نحن عشوائيين ومرتجلين حتى في إمورنا المهمة ؟ وبرة البلد ؟؟؟
حكاية صوروا ولا اتفقوا مع الفنان وبعدين نجي نتفاهم في السودان ! دي بالجد مخجلة وكبوة كبيرة في حق القناة !!!!
طيب إنت ليه ترسل ليك طاقم ناقص كاميرات لتصوير حفل وقبل ما تتفق مع الفنان واللجنة المنظمة ؟؟؟ لو الفنان قال لا لو اديتوني تراب القروش ما داير ,!
اها القروش الدفعتوها تذاكر دي حصل ليها شنو ؟ مش دي برضو خسارة ؟؟
الشيء التاني قناة كبيرة ترسل طاقم ناقص معدات دي ما سمعت بيها إلا في السودان !!!!
الشيء المهم الحاجات العددتها يا دكتور معز إنه قامت بيها مملكة البحرين في حق قامة زي محمد الأمين زي الفندق 5 نجوم وسيارة وتذاكر درجة اولى و و ... الخ
ده حقوووووو واكتر من كده كمان , نحن ليه دائما بنمتن على مبدعينا وبنحاول نظهرهم بمظهر إنه الناس ادتهم اكتر من حقهم ؟؟
لاحظ لي اي فنان عربي ولا مذيع ولا مقدم برنامج ، شوفوا كيف بتشرط وبتتعامل معاه الجهات المنظمة بحذر كبير جدا ..
كونه الأستاذ محمد الأمين يجي وتكرموا الجالية ولا الجهة المنظمة ـ بشوف ده واجب وحق هو بستحقوا بجدارة ’ يعني ما كتيرة عليهو
والحاجات دي متفق عليها مسبقا مقابل زيارة الأستاذ ومشاركته وسفره وتعبه وإسمو الكبير ,,
بستحق التكريم بجدارة لأنه شكل وجدان الشعب السوداني واثرى الساحة الفنية وما زال بجميل فنه وإحساسه العالي وعبقريته التي لا ينكرها إلا مكابر
في الختام ارجو ان نتقبل النقد بدون تشدد وان لا نخلط بين الصراحة والوضوح والحق الواجب ,وبين المجاملات وشغل الإهمال من جهات مسؤولة
وان لا نقلل من قيمة مبدعينا ونكون قاعدين في طرف العنقريب ليهم بالمرصاد اي حركة نشب لا فوق
وعلى الأقل نعمل بالمثل انا وأخي على إبن عمي وانا وإبن عمي على الغريب,,
حتى لو شفتو استاذ ود الأمين إتلوم ما تظهره لومو للأغراب يا دكتور , خاصة البحرينية الكانت شاركتك القطيعة في رجل بقامة ود الأمين ومن بلدك
كانت تشيلك هاشمية المقال الكتبت بيه ده وتدافع عنو بغيرة وتلقى ليه العذر ولو لحين
متاوقة
نحن لي هسه بندخل شغل ده في ده وطاقية ده بنغطي بيها داك
وبنوسط المعلم لي الجزار والنجار لي سيد الدكان وكل زول ما فاهم الحاصل شنو ؟
فقط بنحب نحرج الطرف التاني ونفرض عليهو اشياء دون مراعاة لأي ظروف ولا دايرين نفهم الحاصل شنو ؟ بس همنا المصلحة الوقتية!!
ناس القناة ديل مرسلين ليهم سفير لزومو شنو عشان يحرجوا الأستاذ؟ وهم عندهم سوابق معاه ؟ ما يخلوا شغلهم نجيض من البداية ؟؟؟
والسفير زاتو لزومو شنو يقلل من مكانته الدبلوماسية ويقبل تحشروه في حاجات ما معروفة عواقبها شنو ؟
استاذ ود الأمين عداه العيب إنت طالب بي حقو وعداه العيب إن خت النقط في الحروف , وإن لقن قناة درس لن تنساه عشان يكون عبرة للغير
الأخ الأستاذ محمود مصطفى صاحب البوست
اعتب عليك في إسم البوست ,, (( الحتة الفيها الحديده عديـــــــــل)) كتيرة والله منك وعهدناك رجل فنان
والراجل مبدع بحق وكبير قامة وسنا,, الإحترام واجب يابا
الشكر للجميع مرة اخرى
اعتذر بشدة على الإطالة
وتأكدوا يا حبايب إختلاف الرأي لا يفسد للود قضية ...
سلام يا الحبان
| |
|
|
|
|
|
|
|
|
|
Re: ود اللمين زول بتاع قروش ومادي جداً (Re: Osman Musa)
|
هو ود اللمين فنان ساااكت كدي عشان يقاطعوه
لو كانوا بقاطعوا الهواء والتنفس خليهم يقاطعوه
ود الأمين زكيزة من ركائز الفن السوداني الحديث ومدرسة فنية قائمة بذاتها
رقم لم ولن يتجاوزه أي انسان مهما كان
يملكـ ملايين المعجبين .. وما محتاج لكم مائه يقاطعوه ..
سلام يا لصادق والزوار الكــرام ..
| |
|
|
|
|
|
|
|
|
|
Re: ود اللمين زول بتاع قروش ومادي جداً (Re: ياسر التجاني)
|
محمد الامين احمد
د. معز رمي الكلام بغرض ما جميل
محمد الامين مشى بإتفاق مع المهرجان (لأنو ود اللمين) في المقام الأول مشى لأنو ناس الجالية هناك اتوسطو ليهو، تانياً إذارة المهرجان عليها وراس فوق رجليها توفر ليهو اٌامة في فندق على الأقل خمسة نجوم وتوفر ليهو الترحيل وتديهو مبلغ اكبر من الخمسة عشر الف دولار.
معز داير يقشر بالموضوع دا كانوا هو الدفع القروش دي، يا زول دا شغل الفنان وهو يقيم فنو بالطريقة البتعجبو والمعايز يمشي يشوف ليهو (حسن جالون*).
________________________________
* حسن جالون فنان مغمور يقلد الفنانين وصوته لا بأس به كان يقتنص الفرص في حال تغيب الفنان الأصلي لا سبب طارئ ليحل محله بالفيها النصيب
| |
|
|
|
|
|
|
|
|
|
Re: ود اللمين زول بتاع قروش ومادي جداً (Re: الصادق اسماعيل)
|
سيف النصر
طبعاً قصة الملح دي السودانيين يحبوها ليك زي عيونهم، والعجب البيكون صاحب الفنان بدل ما يدافع عن حقوق الفنان المادية يقول ليك أنا بجيبوا ليكم مجاناً بس حق العازفين.
نفسي اعرف صحبان حيدر بورسودان كانو بيقولوا شنو (بأجيبكم ليكم مجاناً بس تدوهو حق الاورغن )
| |
|
|
|
|
|
|
|
|
|
Re: ود اللمين زول بتاع قروش ومادي جداً (Re: الصادق اسماعيل)
|
| Quote: الأخ الصدق كتر خيرك يا خوي واكتفي بنقل مداخلتي في بوست الأخ محمود مصطفى ادناه |
شاعرتنا اسماء التى بضواحي السلطنة والخوير داخل وري والبرياني والدال الصغير
يا زول كتر خيري شنو؟ هو هسه لو ما (..) لكن خليهو ساكت، زول بيطالب بي أجرو ببشعوا بيهو كده؟
وربنا يشفي الاستاذ محمد الامين
| |
|
|
|
|
|
|
|
|
|
Re: ود اللمين زول بتاع قروش ومادي جداً (Re: جدو)
|
Quote: والله يا أخ الصادق أنا حزين جدا علي
بهتان وشيل حال وكمان المطالبة بمقاطعة فنان الأمة . ليه ؟
حرام . والله العظيم حرام . زول في ال 80 وعندو أولاد وعامل عمليات في لندن . وبتعالج علي حسابو و برضو بغني .
الله معاك يا حبيب الشعب . |
والمصيبة لمن تجي من زول زي المعز عامل فيها مثقف وما قادر يفهم اهم حقوق الإنسان في حقه في العمل ونيل الأجر على ذلك
كيفك يا عثمان
والله من الغيظ كتبت الرد اول بعد داك قلتا اسلم عليك
| |
|
|
|
|
|
|
|
|
|
Re: ود اللمين زول بتاع قروش ومادي جداً (Re: الصادق اسماعيل)
|
الصادق حبابك
والله الحاصل ده محيرني جداً ، دكتور المعز أكن له احتراما خاصا وايضا الاستاذ محمد الأمين تربطني به علاقة صداقة قوية وكنت واحد ممن شاركوا معه
في أعماله الموسيقية أيام السودان الجميل كعازف موسيقي
ولننتظر للقاء الصحفي للأستاذ محمد الأمين وإن شاء الله شدة وتزول ، ومالو لو اختلفنا وصلحنا غلطنا ؟
وعلى حسب توقعاتي ستكون المشكلة مسألة عدم توفير المناخ المناسب لتقديم العمل الموسيقي وليست الماديات ، وليس لي علم بخلفيات الخلاف مع قناة النيل الازرق
ولك و العزيزة دكتورة إنعام الود
| |
|
|
|
|
|
|
|
|
|
Re: ود اللمين زول بتاع قروش ومادي جداً (Re: خالد الرزيقي)
|
ألأخ/الصادق السلام عليكم.
كلامك فيه كثير من الصح....ود اللمين فنان ودى شغلانيته وبسترزق منها..لكن الفنان بيختلف من الناس العاديين فى تعامله..وبعدين طباع الناس بتختلف
ولا أتفق مع الذين شنوا هجوماً عليه لأن فى ذلك قساوة أكبر من الحدث.
ونحن ألأن نرى من طرف واحد ولم نسمع الطرف ألأخر......أما مع تصرف مع قناة النيل ألأزرق فأ عتقد لو كان هناك عقد مبرم لا يستطيع محمد ألأمين فض العقد بهذه السهولة.يعنى هناك فى حتة مجوبكه وده حال كثير من تصرفات بنى جلدتنا الطيب.
إحترامى للجميع.
| |
|
|
|
|
|
|
|
|
|
Re: ود اللمين زول بتاع قروش ومادي جداً (Re: عبدالرحمن عزّاز)
|
ود اللمين او ابو اللمين
قامه فنيه سامقه استظل بها هذا الشعب لخمسين عاما وشلال ابداعي ارتوت منه الاجيال جيلا بعد جيل.فنان شكل وجدان هذا الشعب ونسج ابداعه في ذاكرته الجمعيه وحرك فيه قيم الشجو حينا والشجن حينا
والفرح حينا والثوره حينا,محمد الامين قيمه وقامه كاهرامات هذه البلاد ونيلها الجاري لن ينالها تجريح او اساءه,فهو محصن بفنه وابداعه ومهاب بمعجبيه الذين يسدون عين الشمس
كما ونوعا,محمد الامين الذي نلجأ اليه حين يتكدر المزاج ويضيق الخلق فيريح اعصابنا ويدوزن مزاجنا تماما كدوزنته لريشته التي حيرت المشرق والمغرب ولم تجد منا نحن ابناء جلدته الا
تشهيرا و(كشفا لحاله).محمد الامين الذي يبكيك ويضحكك ويجعلك محلقا في عوالم من الجذب اللذيذ وانت تستمع الي لحن من الحانه,تلك الالحان التي اخذت منه خمسينا عاما تجويدا وابداع,
محمد الامين الذي لو غني الملحمه فقط لكفته ولنصبته ملكا متوجا علي قلوب هذا الشعب فما بالك بصاحب تتعلم من الايام وزاد الشجون واربعه سنين ومسيحيه ,وما ممكن تسافر وغيرها من الالحان
التي لو قالها او انتجها اي مطرب اخر لقامت بلاده ولم تقعد تمجيدا ولنصبو له التماثيل واطلقو عليه الالقاب مثني وثلاث,ولكن لاننا شعب لا يعرف كيف يحتفئ بقاماته ويسوقها نصبنا لها المشانق
واطلقنا عليه عبارات لا تطلق علي رجرجة ودهماء الامم.
انه ود الامين وكفي
| |
|
|
|
|
|
|
|
|
|
Re: ود اللمين زول بتاع قروش ومادي جداً (Re: ismeil abbas)
|
الصادق سلامات وان شاء الله طيب
| Quote: طيب كل المنظرين وعلى رأسهم المعز بخيت اليجئ واحد هنا يقول لينا لو نقصوا ليهو مرتبوا ولا لو ما أدوهو ليهو حيعمل شنو؟ |
يا الصادق بروف المعز دخلو شنو بالسلوك الفج والمتكرر بتاع الفنان ود الامين !!
انا ما عارف لكن ملاحظ كتيرين خلو سقطات ودالامين ومسكوا في مقال بروف المعز ؟
تعقيبا لكلامك المقتبس -وحسب الافادات المشكلة مافي حق الحفل او ود الامين احرج الناس عشان ما ادوهو قروش -
وحتي موضوع قناة النيل الازرق -حسب معرفتي- هو اتفق مع ناس القناة علي التصوير ثم مناقشة حقوق البث لاحقا في السودان
يعني التأخير من الحفل ساعتين ما كان عندو علاقة بحقوق الحفل و كلامو في المايك عن القناة بالطريقة الفجة ديك -عموما انا شخصيا بعتبرو
سلوك متكرر في حفلات ود الامين
والكلام عن فنان قامة و غيرو مافي اختلاف - لكن عشان فنان قامة وغني لاكتوبر الزول ما يحترم المواعيد !!
كيف يعني !!؟؟
انا شخصيا تجربتي مع ود الامين عدد مقدر من المرات يجي المسرح 10 ونص ويغني ليهو غنيتين -
والزول يلعن السودان ويمشي تاني الحفلة - نعمل شنو دا العندنا وديل قاماتنا وديل الشكلّو وجدانا
ومافاهم واحد يحتج انو ودالامين جا متأخر و زعل من تاخير الفنان وعدم احترامو لزمن الناس والتطاول وممارسة الاحراج باستمراء -يقوم التاني
ينزل غنية جميلة ليهو -شنو علاقة الموضوعين !
ياخي شايف من حق اي زول يعبر عن زعلو واستنكارو علي ود الامين او غيرو
وفيها شنو لو المعز او اي واحد تاني كتب مقال نقدي لود الامين بيعبر عن استياؤو من تصرفات ودالامين المتكررة والفجة -قد لا نتفق مع طريقة
النقد للزول - لكن هل القامات فوق النقد --
يا الصادق ياخي ودالامين دا حبيبنا وروحنا و هبة الله للشعب السوداني ! وما نقدرو نعيش بدونو زاتو !!
لكن نعمل شنو للمغصة المصاحبة للمتعة معاهو !!
تحياتي
| |
|
|
|
|
|
|
| |
الصادق اسماعيل
elhilayla
تبارك شيخ الدين جبريل
محمد الامين احمد
سيف النصر محي الدين
بشير أحمد
Khalid Kodi
Yassir Tayfour
ابوعبيدة النعمان
اسماء الجنيد
Osman Musa
الرفاعي عبدالعاطي حجر
جدو
ترهاقا
خالد الرزيقي
ismeil abbas
عبدالرحمن عزّاز
فاروق عثمان
هيثم طه
فيس بوك
تويتر
انستقرام
يوتيوب
بنتيريست