|
|
 تم أخذ أطفالي في ركشة بس ربنا ستر .. يا مغتربين أعملوا حسابكم
|
السلام عليكم ورحمة الله وبركاته
نزلت عائلتي إجازة للسودان قبل أسابيع، ورغم أني أشيل وأحذر في أم العيال، وأقول لها: أن السودان لم يعد هو السودان الذي نعرفه، وأن البلد أصبح فيها الخطف والاغتصاب والقتل و و و ، وأقول لها أن تنتبه للأولاد، وأن تلقنهم ألا يركبوا مع أحد غريب وألا يخرجوا بمفردهم وألا يمشوا مع إنسان لا يعرفونه، ورغم أن أم العيال قامت بذلك واتبهت له، إلا أن الحذر لا ينجي من القدر، والغفلة قد تحدث في لحظة، ويقع ما يحذره الإنسان.
الأولاد مع أمهم في بيت جدهم، والباب مغلق بترباس كبير، ولعبهم ولهوهم في الحوش حدادي مدادي، وأولادي فيهم من الجرأة والتقحم لأي موقف الشيء الكثير، خرجت خالتهم أمامهم لعزاء في الحي، وأغلق الباب وراءها بالترباس، وفي لحظة غفل أهل البيت، قام أولادي بتفليس الباب من خلال الترابيس السفلية، وفتحوهو وانطلقوا في لحظة للشارع ( الكبير 5.5 سنوات والصغير 4 سنوات )، في لحظة كانوا وصلوا طرف الشارع وشايفين خالتهم من بعيد، لقوا ليهم ركشة واقفة طوالي بدون تفاهم نطوا فيها وقالوا لصاحب الركشة: شفت البت الماشة ديك .. دي خالتو أمشي وراها وودينا ليها، بتاع الركشة ما كضب ور ور ور دور ركشتو ومشى وراء خالتهم التي أوشكت على الدخول لبيت العزاء.
وفي لحظات كان وصلها، وهي ذاتا اتوهمت تسمع ليك الركشة بي وراها ور ور ور والأولاد بقولوا لبتاع الركشة: قف هنا .. قف هنا .. ( قايلنو فلم كرتون وللا شنو ما عارف )، وفجأة تتلفت تلقى أولاد أختها في وشها .. كانت خلعة كبيرة طبعا ليها ولأمهم ولناس البيت الانطلقوا يفتشوا فيهم لأنهم كانوا قد ابتعدوا في الركشة.
سائق الركشة طلع من الحلة وبعرف أهل البيت والحمد لله أولا، وسائق الركشة طلع ود حلال والحمد لله ثانيا لأنه ما يكفي أن يكون من الحلة، وطلع إنو ساقهم عشان يفسحهم!! مع أنو التصرف خاطئ منه - مفروض كان يرجعهم البيت - لكن برضو بقول الحمد لله إنو وقعوا فيهو ما وقعوا في زول تاني.
بقيت أحمد الله وأحوقل وأقول:
- يا ربي لو ما كان بتاع الركشة ده بعرفهم كان يحصل شنو؟!
- يا ربي لو ما كان بتاع الركشة دي ود حلال وفيهو خير، لو كان زول مجرم وللا صاحب غرض الكان ممكن يحصل شنو؟
- يا ربي الأولاد ديل راكبين في الركشة براهم بي ورا لو كان - لا قدر الله - حصل حادث، الكان بحصل شنو؟
و.. و.. و... أسئلة كتيييييرة بس في النهاية حمدت الله تعالى على إنعامه وحفظه للعيال، والأهل جابوا طلبلة طوالي وبقى الباب مقفول ليها، ولو لزم الأمر نجيب واحد من ناس الهدف ^___^.
ما أريد أن أقوله للمغتربين وأخصهم بالذكر:
لأنو أولاد المغتربين لمن ينزلوا إجازة ما بعرفوا يتصرفوا مع كم الحرية الكبيرة البلقوهو في السودان، وهي وإن كانت حرية مقيدة في كثير من الأحيان إلا أن فيه جانب خطورة، الشافع الجاي من بلد الغربة ما بعرف يتصرف في كثير من المواقف عكس الشافع القاعد في السودان، بكون مفتح وعارف وفاهم كويس يعني شنو ركشة ويعني شنو يركب مع غريب أو يمشي مع زول ما بعرفه.
للأسف كثير من أولاد المغتربين وخاصة في العمر أقل من العاشرة بكونوا عايشين في عالم خيالي بسبب أفلام الكرتون والألعاب الاليكترونية، وده بجعل كثير من تصرفاتهم فيها شيء من الدقسة والسذاجة، رغم إني أولادي ماسح منهم الام بي سي 3 وسبيس تون عشان الآكشن والعنف الفيها، و 90 % مشاهداتهم لقنوات المجد للأطفال وتوم وجيري بس، وللأسف برضو برامج الكرتون العربية بقت تقدم قدر من الآكشن عشان تجاري البرامج الغربية، وتأثر الأولاد بيها بيكون كبير وعدم تفرقتهم بين الواقع والخيال وتعاملهم مع الحياة كأنها ( فلم كرتون ) المسألة دي محتاجة معالجة خاصة.
|
|
  
|
|
|
|
|
|
|
 Re: تم أخذ أطفالي في ركشة بس ربنا ستر .. يا مغتربين أعملوا حسابكم (Re: محمد جلال عبدالله)
|
الأخ / محمد
مع التحية
حرصنا الشديد في الغربة على الأولاد يجعل معظم المغتربين حريصين على أولادهم حتى في الوطن (بلد الأمان) ولكن لا أتفق مع الحرص الزائد ( الشفقة الزائدة) نحو الأطفال أثناء إجازتهم في السودان ، كفاهم حبساً داخل الشقق ، يجب أن ينطلق الأطفال في بلدهم دون خوف أو توجس من الوالدين ، كمغترب حريص على أبنائي في الغربة أسألهم أتابعهم أحسابهم اراقبهم أحرص عليهم من الشارع ومن الناس ، ولكن سبحان الله عندما أحضر للسودان تنزل بي سكينة وطمأنينة كبيرة ، حتى أكاد لا أراهم يعض الأيام ، اليوم في منزل خالهم وغد عند خالتهم ، فيجب علينا أن نترك لهم مساحة من الحرية ليكسبوا الشجاعة والتعامل مع الناس خاصة في الوطن .
حفظ الله أطفالك وأطفالنا جميعاً .
| |
|
|
|
|
|
|
|
|
|
Re: تم أخذ أطفالي في ركشة بس ربنا ستر .. يا مغتربين أعملوا حسابكم (Re: محمد جلال عبدالله)
|
أخي الكريم الطيب مصطفى
مرحبا بك وبمرورك الجميل
| Quote: لا أدري ما الحكمة من تحذير أولاد المغتربين تحديداً شنو؟ |
ذكرت السبب في ثنايا الموضوع:
Quote: ما أريد أن أقوله للمغتربين وأخصهم بالذكر:
لأنو أولاد المغتربين لمن ينزلوا إجازة ما بعرفوا يتصرفوا مع كم الحرية الكبيرة البلقوهو في السودان، وهي وإن كانت حرية مقيدة في كثير من الأحيان إلا أن فيه جانب خطورة، الشافع الجاي من بلد الغربة ما بعرف يتصرف في كثير من المواقف عكس الشافع القاعد في السودان، بكون مفتح وعارف وفاهم كويس يعني شنو ركشة ويعني شنو يركب مع غريب أو يمشي مع زول ما بعرفه.
|
من باب الإشفاق على عيالنا لا أكثر
التحذير عام لكن أطفال المغتربين فيهم دقسة
ويتعاملوا مع كثير من المواقف لأول مرة
| |
|
|
|
|
|
|
|
|
|
Re: تم أخذ أطفالي في ركشة بس ربنا ستر .. يا مغتربين أعملوا حسابكم (Re: محمد جلال عبدالله)
|
ألأخ/محمد جلال السلام عليكم..وألف حمداً لله على سلامة أولادك..والشفقة الزايدة دى بتأثر سلباً على ألأولاد..
Quote: - يا ربي لو ما كان بتاع الركشة ده بعرفهم كان يحصل شنو؟!
|
ما كان حايحصل أى حاجة والحمدالله الناس هناك متكافلة رغم وجود الناس الشريرين وزى ما قال ألأخ/ولياب يجب أن نعطيهم مساحة لكى يتصرفوا كيف..طبعاً مازى أعمار أولادك ديل..شوف أنتوا ممقفلين عليهم كيف أول مالقوا فرقه عملوا شنو؟؟
فى كثير من ألأشياء السالبة فى تربية أولادنا..تقديرى وإحترامى للجميع.
| |
|
|
|
|
|
|
|
|
|
Re: تم أخذ أطفالي في ركشة بس ربنا ستر .. يا مغتربين أعملوا حسابكم (Re: ismeil abbas)
|
تحياتي اخي محمد ؛
احكي ليكم قصة احمد ولدي ...
كنا في اجازة في السودان وبننزل في الجزيرة (كاب الجداد) طبعا هنا ما مهتم في انو مشي وين وطلع وين
وعادي يجي المغرب ساعة النوم بس الحلة كلها بتعرفو ..
اها قلنا نمشي ناخد لينا اسبوع في بيتنا في الخرطوم (الجريف غرب/الشيطة)
جينا الصباح بدري ونزلنا شنطنا ؛تنضيف البيت وامهم مشغولة في الترتيب ؛وانا طلعت الخرطوم لبعض مشاغلي
إتا يا احمد افتح باب الحوش ويلا قال ماشي كاب الجداد لناس حبوبة وجدو (الله يرحمو)
امسك الدرب لحدي ما وصل لفة شركة جياد بطريق مدني؛
طبعا امو وخالتو قعدو يجقلبو ؛بس الحاجة الكويسة في الجريف واهلنا الجرافة عموما تمشي الجامع وطوالي المكرفونات تشتغل
خرج الطفل فلان الفلاني واوصافه كذا كذا؛
طبعا انا جيت راجع من الخرطوم لقيت كل الجوامع شغالة (الكلام ده الساعة 11صباحا) ماسكة احمد بشير كذا كذا
وخالتو الله يديها العافية مشت شرطة الفردوس الجنب اخر محطة الجديد وكلمتهم وما قصروا تب طلعت اربعة دوريات بالاضافة لي كم موتر مباحث
ده غير الجرافة طلعوا بي ركشاتهم ؛واخوانا الحبش برضو طلعوا معانا نفير بحث؛
النقيب بتاع الشرطة جاب دورية وخلاها تتمركز قدام بيتنا ؛وشغال باللاسلكي مع الدوريات التانية اها لقيتو الولد!!!
لسع ياسعادتك...
اصلا ما خفت لاني متاكد ح نلقي احمد
المهم علي قولت تبارك...
في لفة شركة جياد بطريق مدني ؛مواطن لقي احمد وسالو ياود اتا ود منو ؟انا ولد فلا ن وماشي كاب الجداد
كاب الجداد دي وين؟ماعارف!!!فيها ناس جدو وحبوبة
الراجل طوالي جيب احمد شرطة الفردوس
انا برضو كنت لافي الجريف بكراع ك لب ؛لكن ما اتخيلت احمد يفكر يمشي الحلة!!!
ناس الشرطة:الو السلام عليكم ....
وعليكم السلام
إتا بشير احمد...
نعم ياهو زاتو ....لقينا احمد ونحنا قدام البيت ....إتا وين هسع...؟
دقايق جاييكم ...
جيت البيت لقيت الجريف كلها قدام البيت ..اربعة دوريات شرطة ..ومواتر
وعربات ناس اهلنا ...وناس كاب الجداد زاتهم لقيتهم وصلو ...
واحمد ولا هماهو .. العساكر جابو ليهو جبس وعصير وياكل كانو ما حصل شئ.
حمدنا ربنا انو لقيناهو ..وجيبنا الحلاوة والموية والعصاير ...
بعديها قلت لي احمد وامو يلا تمشو مع الناس الجو من الكاب وتكملوا اجازتكم في الجزيرة ويادار ما دخلك شر.
___________
والله الناس دي بتكتب كلام كتير كيف ما عارف..!!!الكتابة متعبة شديد.
| |
|
|
|
|
|
|
|
|
|
Re: تم أخذ أطفالي في ركشة بس ربنا ستر .. يا مغتربين أعملوا حسابكم (Re: mekki)
|
الاخ محمد جلال
السم عليكم ورحمة الله
كلمات الاخ سيف مشكور علي بساطتها Quote: والله بتاع الركشة بالغ 5 سنين واربعة سنين كيف يركبهم واسمع كلامهم
|
فعلا تدعو الانسان للتفكير مليون مرة وقد بلغ بي الضيق فعلا مبلغا من من قرآة البوست لا سيما لعدم شكي من صدق الواقعة ونبل الهدف من نشرها في رأئي ان الله سبحانه وتعالي قدر ولطف وهو امر لا يستقيم التعامل معه بطيبة اهل السودان
اولا : كيف سمح سائق رقشة او اي وسيلة مواصلات اخري له ذره من العقل يتحرك باطفال في هذه السن؟ ولماذا (ليفسحهم) ؟ علم الله واسع
ثانيا: كيف لم يصيبك انت ووالدتهم رعب ورعب كبير جدا من ركوب الاطفال بهذه السن لرقشة علي ما فيها من خطورة ولا تتوفر فيها ابجديات السلامة لكبار السن ناهيك عن اطفال بهذه السن ؟
معذرة اخي محمد جلال في رأئي ان تعاملتك مع الامر إن كان كل ما فعلته هو تقبل الامر ببساطة علي اساس ان سائق الرقشة من اهل الحي وكما نعرف جميعا إن كثيرا من سائقي الرقشات من الاجانب ومن الصبية المراهقين وجلهم لم يتلق تدريبا في القيادة او السلامة لم يكن سليما مائة في المائة . كان ومازال عليك ان تعرف انه (من مأمنه يؤتي الحذر) اي ان المصائب لا تقع علي الانسان في الغالب الاعم إلا من الذين يأتمنهم ومن المعارف ووذوي القربي الذين تفتح لهم البيوت والقلوب علي مصارعها فإذا سبحانه وتعالي قال يَا أَيُّهَا الَّذِينَ آمَنُوا إِنَّ مِنْ أَزْوَاجِكُمْ وَأَوْلَادِكُمْ عَدُوًّا لَّكُمْ فَاحْذَرُوهُمْ .... فما بالك (باهل الحي .. او الاقرباء )
ؤابعا: كان يجب عليك يا رجل مادام الاطفال ما شاء الله عليهم بهذه (الشقاوة) شأنهم شأن الاطفال في اعمارهم ان تفكر في كيفية تؤمن بها اطفالك وسلامتهم اكثر فعاليه من موضوع ترباس بمقدور من هم في سن الخامسة (تفليسه)
نسأل الله ان يحفظهم قرة لعينيك ولعيني والدتهم ومشكور انت للفت الانتباه لهذا الموضوع الحيوي الهام واتمني ان يتجاوب الاخوة والاخوات المطلعين عليه من المحاذير التي قد ينلق اليها الناس علي ما آل اليه الحال في السودان والحمد لله الذي لا يحمد علي مكروة سواه.
ولك ودي
| |
|
|
|
|
|
|
|
|
 Re: تم أخذ أطفالي في ركشة بس ربنا ستر .. يا مغتربين أعملوا حسابكم (Re: mekki)
|
| Quote: تم أخذ أطفالي في ركشة بس ربنا ستر .. يا مغتربين أعملوا حسابكم |
انتو اي زول بجي بكتب ساااكت .. في بورد وطن من لا وطن له دا ..؟
حسع دي العلاقة بين كلامك الكاتبو في العنوان والكلام الكاتبو جوه هنــا شنو..؟
وعلاقة اولاد المغتربين بي اولادك شنـو.. ما ياهو السودان مليان شفع مغتربين لي عين امــو .. وكلهم اشقياء وكلهم عكاليت ..
الما قادار افهموا انك بتقول شفعك ركبو مع بتاع الركشة بي محض ارادتم ... وجاي شاني حملة علي بتاع الركشـة المسكين ,,
بتاع الركشـة المسكين دا اتصرف بي طبعو .. وودا ليك اولادك ديل لي خالتم واللا هي حبوبتم واللا عمتم ما عارف .. لو كان نفس الشخص الكتبت عنو في العنوان دا .. حسع شفعك لا قدر الله كان .. في عداد ما كتبت عنهم في عنوانك العايز تستعرض بيهو مهاراتك بتاعت الاكشـن فينـا .. لانو اي حد يقرا العنوان دا ح يجي داخل علشان يشوف الشفع ديل الحصل عليهم شـنو ؟؟!!
والغايظني اكتر البشبكوك السودان .. والله الخلقني .. وشنو وشنـو ..؟
..
بورض بقى مقرف بشكل عجيب خلاص ..
| |
|
|
|
|
|
|
| |
محمد جلال عبدالله
saif massad ali
محمد هاشم ابوزيد
ولياب
ismeil abbas
بشير أحمد
mekki
محمد مصطفي مجذوب
tmbis
فيس بوك
تويتر
انستقرام
يوتيوب
بنتيريست