|
كتب الكاتب الفاتح جبرا المتوفرة بمعرض الدوحة
|
|
 Re: الاستاذ ابكر آدم اسماعيل ضيفا على منبر السودان كاليفورنيا video (Re: HAYDER GASIM)
|
Quote: شكرا ... شكرا .... شكرا ... أخي الكريم ... محمد عثمان.
قضيت ساعتين وأكثر أستمع لما أوردت هنا. وأعجبت أيما إعجاب
بالقدرات العالية ل د. أبكر آدم في توصيف علمي وإجتماعي وتاريخي
جيد لقضية الهوية.
إستفدت كثيرا من شروحاته وتفاصيله, بل ومن { جرأة } حربه على
أمدرمان وسنار ... ولم يستوقف مجرى تعاطفي معه غير إشتماله للغابة
والصحراء ... في سياق التواطؤ مع المشروع الإسلاموعروبي.
فخشيت أن يتحول إعجابي بما كتب, إلى { هرولة } غير أستسيقها.
في كل الأحوال ... هنا مادة جيدة للإطلاع ... وحوار مؤجج للمنطق |
شكرا الأخ حيدر قاسم
لا شك أن الاستاذ ابكر آدم ومن خلال مساهماته القيمة في موضوع اشكال ألهوية في السودان
سوف يفتح المجال لحوار بناء من كل المهتمين بهذه القضية الهامة .
| |
 
|
|
|
|
|
|
|
|
Re: الاستاذ ابكر آدم اسماعيل ضيفا على منبر السودان كاليفورنيا video (Re: محمد علي عثمان)
|
لمزيد من الإطلاع و الفائدة العامة.. هنا تفريغ نصي للمادة المسجلة..و قد انتهيت من الفيديو الأول..و سوف اواصل بقية الفيديوهات..لاحقا..
التحية لصديقي ابكر ادم اسماعيل..و التحية لناس منبر السودان الوطني الديموقراطي كالفورنيا..و تحية خصوصية للصديقة مقدمة الندوة (الإسم ما ظاهر تب)..و تحية لأستاذنا و صديقنا اسامة الخواض..
التفريغ:
ندوة ابكر ادم اسماعيل: جدلية المركز و الهامش و اٍشكال الهــُويـّة في السودان
الجمعة 28ستبمبر 2012
تفريع النص المسجل:
منبر السودان الوطني الديموقراطي كاليفورنيا..
مقدمة الندوة: .. مهمة جدا استعصت علينا منذ عصو ر التأريخ الأولى ، و هي الهوية السودانية: من نحن ؟ و ما هو التعريف الذي سنتوافق عليه في المستقبل بعد اسقاط النظام ..ليشملنا جميعنا كسودانيين؟ .. نحن سعيدين جدا بوجودك بيننا يا دكتور و في الحقيقة يشرفنا انك تكون معنا في هذا المكان ، المهم جدا بنستمع اليك ، و لتعلم ان الذي سوف تقوله سوف ينتشرعلى كل بقاع العالم من خلال اليوتوب.. صوت..و ده مما يزيد من عمق المسالة.. انها تصل رسالتك او الحديث الذي سنتوافق عليه جميعا في هذه المناسبة الى كل الأخوة السودانيين و غير السودانيين ، و كل من يهمه امرنا في موضوع الهوية .. اهلا بيك و سهلا..و يشرفني جدا أن اعطى الفرصة للأخ اسامة الخواض..ليقول بعض الكلمات عنك معرفا بشخصك الكريم..اهلا بك الأستاذ الخواض معك الفرصة..
اسامة الخواض :و شكرا يا استاذة..مرحب بالصديق و الكاتب و الروائي المعروف ، و ايضا الشاعر و يمكن بعض الناس ما بيعرفوا هذه المسألة..مسالة الشاعر..و هو روائي معروف ..الدكتور ابكر ادم اسماعيل..وهو انتقل من الطب الى الكتابة..طيب انا ما ح اطول .. بس..اتفاقنا مع دكتور ابكر في انو هو يدينا زي تلخيص لي ورقتو المهمة .. هي اصبحت واحدة من الأوراق المركزية في تعريف العلاقة بين المركز و الهامش..و هي ورقة اتكتبت في القاهرة في ديسمبر 1999..و هو ح يدينا تلخيص للنقاط الأساسية في الورقة..و ح يدينا وجهة نظرو..بعد مرور اكتر..حوالي اطناشرا عاما..من كتابتو لهذه الورقة.. هو.. ماهو تقيمو لنقاط القوة الفيها الموجودة؟ ..نقاط الضعف؟..هل هو عمل بعض التعديلات فيها ؟..و هل.. على الطرد (كلمة غير واضحة).. سؤال الواقع السياسي..واقع الصراع السياسي.. (ماذا) تسير قضية العلاقة بين المركز و الهامش..كما طرحا من خلال السناريوهات اللي هو طرحا في اخر الورقة؟..مرة اخرى بنرحب بالدكتور..و ليتفضل..
ابكر ادم :..كويس..اول حاجة شكرا الأخوان جميعا..و مساء الخير طبعا.. للناس القاعدين في الجزء الغربي للكرة الأرضية..غربي شرقي ، هي طبعا حسب الحاجات النحن قاعدين فيها..و صباح الخير للناس الإمكن زينا كده.. دوبك قاموا مصحصحين..و بعدين شكرا كمان للتكنولوجيا الأتاحت لينا الفرصة انو نقوم نتواصل بشكل زي ده.. اذا حصل أي انقطاع ولا حاجة ، الناس ينبهوني.. عشان انا ما قادر اعرف التفاصيل بتاعة المسألة دي..
ندخل في المسألة ..بتاعة قضية الهــُويـّة في السودان ..و حقيقة طبعا زي ما قال اخونا اسامة الخواض..انا كتبت ..جدلية المركز و الهامش في اٍشكال الهــُويـّة في السودان.. في سنة 99 و اتنشرت من الوكت داك..و بقت واحدة من الأوراق الممكن تكون اساسية في الجدل الدائر حول قضية الهـُويـّة في السودان..لكن انا عايز ازيل نوع من الإلتباس الحصل.. ربما بدون قصد..بسبب العنوان بتاع الورقة..لأنو الدراسة الأساسية بتاعتي..اللهي فيها الكتاب البسموهو الناس ..جدلية المركز و الهامش..هو اصلا ما كان عن الهـُويـّة .. هو كان عن.. الوضعية التأريخية للدولة السودانية.. و اسمو (جدلية المركز و الهامش: قرأءة جديدة في دفاتر الصراع السوداني)..
و قضية الهــُويـّة باعتبارا انها هي قضية جزئية من ضمن القضايا الأخرى البتتناولا الدراسات والأبحاث و الهموم الكنا نحنا كنا مشغولين بيها.. يمكن الورقة طويلة..هسع ، حسب ما هي قدامي من عشرين صفحة بتاعة فلسكاب..و ببقي من الصعب انو تلخيصا كما هي يعني في العشرين دقيقة دي.. لكن..عادة ، كما بقى .. هو معروف انو..في تقديم الأوراق انو الزول بيقدم افكار عامة.. و بعد ذلك يمكن للناس انهم يتداولوا..و في تفاصيل قد تأتي.. يعني..مساحة لإستيعاب النقاط الممكن يكون الزول فات فيها .. بعدين الأهمية بتاع نقطة من اخرى دي..بتخضع طبعا للتقديرات بتاعة الشخص ..للظرف الناس فيهو..و كده..الخ..!
انا عايز اتكلم.. الموضوع ده ممكن الـّخصو في امكن اربعة او خمسة نقاط أساسية.. انو..واحد في سؤال اساسي لمن الناس يجوا دايرين يتكلموا في أي قضية..هل هي القضية بتاعة الهــُويّة دي.. هي قضية حقيقية؟..و هل سؤالا ده سؤال حقيقي ، ولا ..سؤال زائد؟.. تم صنعو بواسطة المثقفين.. او هو ان سؤال ايدولوجي.. نوع من الرفاه الفكري..و كده يعني..
نمرة اتنين..ياتو هــُويـّة الأنحنا بنتكلم عنها..؟..ماهي الهـُويـّة محل النزاع؟..
نمرة تلاتة..طيب..اذا حتى سلمنا بهذه المسالة و قلنا انو في اشكال..بتاع هـُويـّة في السودان ، ليه يعني ..مثلا.. الناس الأخرين ما قاعدين يتنازعوا في المسالة دي؟..في كتير من الدول الأخرى المحيطة بينا.. مافي زول.. هسع الليلة في اثيوبيا قاعد يعمل مشكلة اسمها الهــُويـّة الأثيوبية..ولا في زول في يوغندا قاعد يتكلم القصة دي..ولا حتى في مصر القريبة ولا ليبيا ولا أي حتة..حتى ناس تشاد.زيعني..قد يكون عندهم..لكن مافي حد قاعد يعمل..مشكلة اسمها الهــُويـّة.. اشمعنا نحن في السودان..عاملين الجوطة دي كلها حول القصة بتاعة الهــُويـّة دي....
بعد داك.. اذا كانت هي قضية حقيقية..أو حتى قضية زائفة..بالضرورة انو نشأة أي قضية..و انتقالا لحيز الضرورة بتاعة النقاش والهموم الأساسية..بيكون المسالة دي عندها تأريخ..و التاريخ ده بشكل وصفي ممكن يوضح لينا متى نشأت كقضية حقيقية أو قضية مزيفة..وكيف تطورت..و لماذا؟..
انا اجي للسؤال الأساسي.. او السؤال الأول حول قضية الهوية..في السودان.. هل هو سؤال حقيقي ولا سؤال زائف؟..بالنسبة لي انا.. بفتكر انو سؤال الهـُويـّة ده سؤال حقيقي في السودان..و من خلال الدراسات الأنا عملتها أنو..المسالة دي طبعا.. مربوطة بنمط المجتمع الأنحنا بنعيش فيهو و اتخلقت فيهو الأزمة..انو عندما نشأت الدولة الحديثة في السودان ، و بدأت تتطور.. نشأت في مجتمعات..يمكن وصفها وفقا لمنظور الإقتصاد السياسي.. بأنها مجتمعات سابقة للرأسمالية..و البسموها..الــ
Pre-Capitalist Societies
و المجتمعات السابقة للرأسمالية ، هي ..علاقات القرابة بتلعب دور مهم جدا في علاقات السلطة و الثروة..و دي اهم شئ فيها.. المساءل بتاعة قوانين الملكية..تقسيم العمل..استخراج الفوائض..و توزيعها..وبعد داك المساءل بتاعة الترتيبات.. الممكن نسميها سياسية تداخلية.. بتاعة منو يكون رئيس و منو يكون تابع..و الكلام ده في المجتمعات السابقة للرأسمالية..المسألة بتاعة الهوية دي مسالة مهمة جدا.. التعريف بتاع الشخص..و مسالة انتماؤه..دي مسالة مهمة جدا جدا..و بالتالي بتدخل في العملية بتاعة حيازة السلطة و الثروة..كعامل اساسي ، ان لم تكن العامل الأكثر اهمية في هذه القصة..
طيب ، لمن نخش في المسألة بتاعة التعريفات .. طبعا في تعريفات كتيرة جدا للمسألة بتاعة الهــُويـّة..الناس عادة ، مسألة الهـُويـّة دي بيعزوها لي قصة الإنتماء..بيقولوا ليك الهــُويـّة هي اٍنتماء..!
نعم ، لكن الإنتماء هو جزء من الفكرة بتاعة الهــُويــّة..باعتبار انو..الهوية مش فقط انتماء ..
As such
يعني كده بس ، و خلاص يعني..
الهــوية..عندها.. يعني اذا جينا دايرين نعرفا..عشان تكون حاجة مفهومة.. هذا الإنتماء عندو شروط..عشان تكون هـوية ما فيها اشكالية..
نمرة واحد..في فرد..و في جماعة..و في دولة..أي مستوى من المستويات دي..عندو شروطو..اذا كان الفرد..داير.زبنقول انو هويتو بينتمى للجماعة المعينة..و الكلام ده في السودان ، افتكر انو.. بالوضوح بمكان.. لدرجة اهميتو انو حتى بيشلخوك في وشك عشان الحاجة دي تكون واضحة يعني..تكون صديق ولا عدو.. اخ ولا اخر..الخ..من الحاجات..و المسألة دي واضحة في السودان ، حتى بالنسبة للناس البسطاء جدا.. لكن..لمن نجي نحنا.. نحاول نفكرن الموضوع ده ، نخطو في اطارو العلمي ..لابد انو نذكر انو مسالة الهـوية دي مربوطة بي شروطها.. عشان تكون عادية زي الهوية الحبشية..المصرية..و غيرها.. ما تكون فيها اشكالية زي بتاعة السودان دي..
اول حاجة.. اساس انتماء الفرد أو مجموعة من الأفراد لمجموعة معينة من الناس..
الشرط التاني..اعتراف المجموعة المــُنتمى اليها بهذا الإحساس بالإنتماء..ده ، بندخل في القيمة الرمزية باعتبار انو الإعتراف هو البيدي القيمة الرمزية للفكرة بتاعة الهوية..
لكن في شرط اخر ، و ثالث .. هو ان يعترف الأخرون ( أو الطرف التالت خارج الجهة المنتمية و الجهة المـُنتمى اليها) بهذا الإنتماء..يعني نحنا لو دايرين نقول انو و الله فلان العلاني.. انا ابكر ادم اسماعيل ده ، بجاوي..أنتمى الى جماعة البجا..عشان يكون الكلام ده متسق مع بعضو و ما يكون فيهو اشكالية و ما يكون فيهو جدل..لازم يكون ، اول حاجة انو انا عندي احساس بان وان بنتمي للبجا..الشئ التاني : لابد انو الجماعة المسماة بالبجا تكون معترفي بي باعتباري أنا جزء منها..و مش كده و بس ، لابد انو الأخرين عندما ينظروا للبجا و ينظروا لي انا ، بيصنفوني ضمن البجا..و الإ اذا اختل أي شرط من هذه الشروط ، بتبقى هناك اشكالية..
طيب ، الأهمية بتاعة المسألة دي..ليه يعني الناس..ما طيب ا ي زول يقوم يشوف ليهو محلة ينتمى ليها و ما يشتغل بكلام الناس الأخرين ..لأ.. المسالة ما كذلك..المسألة مهمة للغاية ، لأنو على الأقل في هذه المجتمعات على الأقل.. الأنا بصنفها .. الأنا بسميها..
Pre-Capitalist Societies
و المجتمعات السابقة للرأسمالية ، المسألة دي ..بتاعة التعريف .. أو الهوية بتاعة الإنسان..الـــ
Identity
دي البتحدد اشياء مهمة جدا في حياتك..يعني الليلة انتا لو مشيت جبال النوبة ، ممكن تعرف المسالة دي ببساطة.. لو انت بتنتمي للقبيلة المعينة..بتنتمي للجبل المعين..الحولو الـــ
Sign
المعين .. في الحدود بتاعة الهناي ده.. ممكن تجي و تقطع ليك حطب و تبني ليك بيت في أي محل انتا عاوزو..
لكن لمجرد انك انتا جاي من قبيلة اخرى..او جماعة خارج المنطقة.. اول حاجة الموضوع ده فيهو تعقيدات كتيرة جدا جدا..لابد تمشي للشيخ و يصدق ليك..و يجيب ، ما عارف ، مجموعة من الناس و همن..ذاتم..يعني في اجراءات كتيرة جدا..بتحصل في المسألة دي..دي مسالة عادية..يعني مسالة انت الشخص.زتبني ليك بيت ولا ما تبني..ولا البيت ده يكون وين..ولا ما وين..ولا تعمل ليك زرع..
القصة دي كلها مرتبطة بالفهم بتاع قصة الهــُويـّة..
طيب ، اذا كان السؤال ده سؤال حقيقي .. في السودان ، ماهي الهـُويـّة محل النزاع؟..عشان لأنو في اٍلتباسات كتيرة جدا ، قاعدة تحصل في الموضوع ده..و طبعا..أي مفهوم يكون مسار للصراع ، بالضرورة تكون في مسالة بتاعة الإلتباسات..لأنو الإلتباس اصلا في مصلحة الجماعات المسيطرة على السلطة و الثروة ..والخ.. لأنو عندها امتيازات رمزية ما عايزة الناس يكتشفوها عشان ، عشان اذا لو اكتشفوها ح يقوموا ينازعوها فيما تعتقد انه..ليس محل .. ما عايرزاهو يكون محل نزاع..و قبالو..عادة بيخلقوا محلة..يعني شكل من اشكالات الإلتباس..عشان لإستمرار الأيدولوجيا البتبرر للمسألة بتاعة حيازة السلطة و الثروة..و الخ.. و بتبرر الإمتيازات على المستوى المادي من خلال مساءل الثروة أو الإمتيازات المعنوية باعتبار فكرة الزيادة..وو..الخ..
الهــوية ممكن نقسمها ببساطة لــ: هوية فردية.. في بعض الناس يقولوا ليك..انا فلاني العلاني..و اعتقد انني كذلك ، و ما محتاج لجهة اخرى انها عشان تقول لي انتم نو..
نعم ..ده شكل أو مستوى من مستويات الهوية..لكن ده ما محل النزاع: انت منو يعني؟..
في مستوى تاني..من الهوية: هو الهوية الجمعية الخاصة.. أو هوية الجماعة الممكن نسميها اثنية ثقافية.. لو سألت أي زول في السودان..السؤال في السودان انتا من وين ده ما مقصود بيهو المكان طبعا ، افتكر انو أي زول عارف الكلام ده..بيقصدوهو بيهو انك انت بتنتمي لياتو جماعة اٍثنية أو ياتو قبيلة..او كده يعني.. ح يقول ليك ياخي انا نوبة..انا فور.. انا بجا.. انا شنابلة.. انا شفري .. انا هواري.. انا جعلي ..انا شايقي.. انا سكوت..محسي.. الخ..الخ..
و هذه معروفة ،و ايضا هي ليست محل نزاع..لأنو اساسا: المحسي محسي..و الشايقي شايقي..و النوباوي نوباوي..و الفوراي فوراوي..و مافي زول ح يجي ينازع حد في هذه القضية يعني..
لكن في مستوى اخر ، هو مستوى بتاع هــُويـّة الدولة..اللهوا.. الشعب الموجود في الدولة السودان: هل شعب السودان ده ، شعب عربي كريم زي ما قال اخونا كشــه.. ولا شعب سوداني كريم زي ما قال على عبد اللطيف؟..
غالبية الأوراق البتأرخ لمسالة الهوية.. بتأرخ لنشوء المسألة دي في الوكت داك..اللهو النزاع الحاصل بين سليمان كشه و على عبد اللطيف..كشه طبعا بيفتكر انو..ياخي شعب عربي كريم..و على عبد اللطيف بيشوف انو شعب سوداني كريم..
الفرق.. نحنا دايرين نقول انو نحنا المستوى البنتكلم عنو..و نعتبرو انو اشكالي .. ليس مسألة الفرد.. لأنو الفرد ممكن يترك السودان ده كلو كلو..و يمشي ينتمى الى اي مكان و يطلع ليهو جنسية في أي دولة اخرى و ينسب نفسو لمكان اخر دون ان تكون هناك اشكالية في الموضوع ده..و حتى لو كانت ، هي ما بتعنينا نحن.. لأنو الفرد مادام انو اختار يعمل الحاجة دي.. ولا حتى في اشكالية كبيرة في المسألة بتاعة الجمعية (الجماعية) الخاصة..او الجزئية المتعلقة بالجماعة الإثنية أو القبيلة..بتاعة الفرد باعتبار انها شخصية اعتبارية ضمن شخصيات اعتبارية اخرى ضمن حيز اسمو دولة السودان أو شعب السودان البتكون من الكيانات المتنوعة دي..و بالتالي انا /نحن..بأفتكر انو ده المحل بتاع الإشكالية و ده المحل بتاع النزاع..
ليه في اشكالية في السودان؟..يعني ليه نحن.زمثلا.. موضوع الهوية ده خالقين بيهو كل الكلام الكتير ده..مقابل دولة قريبة مننا زي مصر مثلا..ما بتلقى ناس بيتكلموا في القصة دي..
حسب الورقة بتاعتي ، الورقة بتاعتي طبعا بعد دراسة طويلة و كلام كتير و مقدمات : بتقول انو..الإشكالية بتاعة ازمة الهوية في السودان دي.. انو حصل عملية..بتاعة اختزال لهوية الدولة في هوية جماعة اثنية ثقافية محددة ، موجودة في جزء محدد من السودان ..و الإختزال ده ، بالتأكيد..صاحبو.. عملية بتاعة جدلية بتاعة تعميم.. في اللحظة الحصل فيها اختزال هوية الدولة السودانية و هوية الشعب السوداني في هوية الجماعة الإثنية الثقافية المعينة دي ، تم تعميم هوية الجماعة الإثنية الثقافية الجزئية دي على الكل ، و ده السبب بتاع الإشكالية.. اللهي.. هذه الجماعة الإثنية الثقافية..هي الكيان الإثني الثقافي البنسميهو (اسلاموعروبي) و ده وصف مرتبط بالتركيبة بتاع الجماعة الإثنية الثقافية البنسميها ( الإسلامو عرب ديل)..و اسلام و عرب ديل.. ما مقصود بيها الإسلام ولا العرب ، باعتبار انو دي تركيبة ذات طابع تأريخي حدثت ..و انها هي عبارة عن اختراع اجتماعي..لأسباب متعلقة بتطور علاقات السلطة و الثروة في الفضاء الذي يسمى بالسودان..اللهو يعني..
Social Construct
بينتموا ليهو الناس..لأنهم عندهم مصالح ايدولوجية..(تشويش على هذه الجزئية)..
لكن لأنها هي اشكالية..عشان كده قامت ظهرت المساءل المتعلقة بالنزاع الحاصل هسع..بتاع الهويات الموجود في السودان..
طيب ، الكلام ده..كلو ببقى كلام نظري ساكت.. قد يأتي شخص يقول ليك انت ما قاعد تستند على ..آي صاح.. يعني الشخص المطلع على تأريخ السودان قد لا يجد اشكالية في الموضوع ده.. لكن الشخص الغير مطلع على تأريخ السودان ، بكون محتاج لوقائع تاريخية متعلقة بنشأة و تطور المسألة المتعلقة بي سؤال الهوية ده..اشمعنا انو الإصرار على انو السودان ده يحولوه لدولة اسلامية عربية..و التخلص من المكونات بتاعتو الأخرى..و المحاولة بتاعة اعادة انتاج المسالة.. (انقطع التسجيل)..
كبر
| |
|
|
|
|
|
|
|
|
Re: الاستاذ ابكر آدم اسماعيل ضيفا على منبر السودان كاليفورنيا video (Re: مرتضي عبد الجليل)
|
Quote: -------------------------------------
أبكر ادم إسماعيل يا محمد علي عثمان ابدع النص دا عندما كان الهوس الكيزاني في اشد درجاتو وكان المهوسون يساقون لمحارق ما كان يسمي (صيف العبور ) .ابكر من اوعي المفكريين السودانيين بقضية الهامش وإرهاصات وعيو بتتجلي في قصايدو.
التحية لابكر أينما حل وشكرا ليك محمد علي عثمان
|
شكرا الأخ مرتضى عبد الجليل
السودان بمكوناته الثقافية وإختلاف شعوبه كان ولا زال مشروع دولة عظيمة في افريقىا والعالم .السودان رغم اغتصابه بعصابة الفكر الأحادي لكن يمكن هزيمتها ومشروعهم الحضاري الزائف وذلك بوحدة قوى التغيير المدنية والمسلحة واستعادة الديموقراطية وبناء سودان جديد يعترف بتعدد الثقافات وأن المواطنة والسوداناوية هي الأساس لا الدين ولا العرق ولا الجهة. و يفتح المجال للجميع
ليعبروا عن فنونهم وثقافاتهم بالوان الطيف الجميل. سودان فيه تنمية وصحة وتعليم للجميع.
| |
|
|
|
|
|
|
| |
محمد علي عثمان
HAYDER GASIM
Kabar
فيس بوك
تويتر
انستقرام
يوتيوب
بنتيريست