كتب الكاتب الفاتح جبرا المتوفرة بمعرض الدوحة
|
|
 يغلبني حزني عليك الليلة يا حميد
|
واوجعي عليك حد العمر
واحزني عليك الماتلحق ليهو حد
واشوقي ليك ولكل الدروب الايام المنتديات الضحكات المشاوىر الاحلام الجمعتنا ياصديق
وووووووووب علي وعلي كل الحروف والنجمات والنخلات والنساء الفارعات الساكنات قصايدك وحرفك ووجدانك واحلامك بباكر
وووووووووب علي يانورة ويا السرة ويا امونة ويا امي وياسلوى ويا رقية
ووب علي الدروب والمدن والصحاري والفرقان والفقارة
ووووب علي وعليك يا قدال وياوطن ويا اشعار
يالضو ويا حمتو ويا عم عبد الرحيم
اااااخ تعبت من الحزن ومن كمسدة الغباين ومن جوف هردتو الاهات
حميد كفاك موت
حميد كفاك غميد
مابشبهك الرقاد يا خي
|
|
 
|
|
|
|
|
|
|
|
Re: يغلبني حزني عليك الليلة يا حميد (Re: امال حسين)
|
امال سلاماً حزيناً
حزنى على حميد حزنان
حزن عام و حزن خاص
اما حزنى العام فهو نصيبى من ما اصاب اهل السودان جملة..
وحزنى الخاص فقد كان حميد صديقى وصنو روحى
مواضع كثيرة وقفنا عندها طويلاً نضحك اظنها تخرج لى لسانها تضحك على..
حميد يا امال خرج من الدنيا كما جاء اليها
لا يملك داراً ولا عقاراً
لا ثاغية ولا راغية...
حكى لى احد المقربين ان حميد عندما توفى لم يعثروا فى جيبه ولا على . جنيه واحد
كان قد اتصل على ابن اخته قبل تحركه من نورى وقال له انا جاى الخرطوم وما عندى قرش واحد
تتلقانى فى الخرطوم تدينى خمسين الف اعصرها لى محمد كرم الله قالو عيان
وتوصلنى قاعة الصداقة احضر تدشين كتاب السر عثمان الطيب..
ما وصل حميد الخرطوم ولم يقابل محمد كرم الله ولحق المبدع محمد كرم الله بحميد
هذا هو حميد الذى اعرف..
اتصلنا عليه قبل وفاته بايام انا وزميل المنبر محمد عبد الجليل
نستشيره ونحن فى لجنة دعم علاج الشامخ محجوب شريف
قال لى صديق انا ما عندى قروش لكن عندى سبعمية كتاب فى جدة
اتصلو على فلان كان باع الكتب شيلو القروش كبوهم فى الكشف وهو الذى لا يملك قرش احمر
سبعمائة كتاب يا مفترى؟
قلت له نحن لو اتصلنا عشان قروش كان اتصلنا على صلاح ادريس
نحن اتصلنا نشورك ايضاً ضحكنا وقفلت السماعة
هذا هو حميد الذى اعرف..
امال.. آن وقت ان نقرأ حميد ان اردنا ان نحى ذكراه
فمثل حميد لا يموت..
اقرأوه فى كل وقت وفى كل مكان
هذا الذى قال:
سعر الطيارة الفى الجو الترمى قنابل بوبو
وصاج الدبابة الكررو كم يبنى بلادك يا الضو..
وقال:
لو وقفوا الحرب الحرام ال الله زاتو هو لاعنة
كان البلاد انطامنت كان الف خزان انبنى
وقال:
اخير كراكة تفتح حفير تضاير الركام
ام الدبابة البتكشح سعير الموت الزؤوام
لو استمعنا لحديثه لكفانا شر مؤتمرات واتفاقيات كثيرة
ولوفرنا ملايين مهدرة ووقت طويل ...
لكن لم نستبين النصح ولا ضحى الغد
انسان مثل هذا حقيق بالقرأة والتدقق والتحقق
ابل الله تربة صديقى الانسان حميد
بقدر ما احب اهله وشعبه وبقدر ما احبه اهله شعبه
امال يوم الخميس 4 اكتوبر يقيم اتحاد ابناء مروى بالدمام السعودية حفل تأبين
للمقيم حميد سوف انزل الفعاليات بعد ان تقام هنا ان شاء الله،،،
| |
|
|
|
|
|
|
|
|
Re: يغلبني حزني عليك الليلة يا حميد (Re: صديق الموج)
|
الاخوة الكرام ....
حميد حزن مقيم وفقد فوق العادة ...
كلما توارد لخاطري بيت شعر او قصيدة او مقولة تتساقط دموعي واشعر اننا نحتاجه كثيرا للعديد من المواقف ولكن يد المنون اسرع
ما اشعر به اكبر من كل حروفي التي عهدتها واشعر كلما كان معتادا من كلمات لا يشبه حميد لانه غير عادي
اشعر بالعجز في حزني ..حسرة تغمرني ..ومرارة تطفو على قلبي ...حتى انني استغفر الله لان افكار كثيرة تراودني وامنيات لن اطولها ...
ويظل حميد باقيا في كل واقع نعيشه ونتجرع مراراته ....
ويظل حزننا ....الهم يا رحمن ارحمه بقدر محبتنا له
| |
|
|
|
|
|
|
|
|
|
Re: يغلبني حزني عليك الليلة يا حميد (Re: بله محمد الفاضل)
|
Quote: واوجعي عليك حد العمر
واحزني عليك الماتلحق ليهو حد |
ياويح قلبى على صاحب الروايع
ياويح قلبى على حميد الانسان والفنان
.....
تنهدات: الكلام لحميد
الحجر الاسود ماهو البروة
وماها مكاوى الكعبة تجيها
حين يتكرفس توت التقوى
والمشروع الدينى الخالص
مامحتاج لدراسة جدوة
كل من قال يارب من قبله
رد الخال دايما ايوة
وسلام على صاحبة النافذة
| |
|
|
|
|
|
|
|
|
|
Re: يغلبني حزني عليك الليلة يا حميد (Re: عبدالمجيد الكونت)
|
أزهري محمد علي يرثي حميد :
جرح الوطن ختالنا خط
مامنو نطط
وحميد ختالنا خط مامنو نط
الليلي ياموت يا حيا
خاتي البختار الوسط خاتي البختار الوسط
يافطون
فطن حميد فطمنا غنانا
لاطاطينا لاسبنا الخيول تاطانا
قدمناه امام لاضلا لا ضلانا
ماهاب السجون مافزه من سيطانا
وكت الكور حما ثابت ركز لبطانا
لكن البلاد باعت ايادى بطانا
عالجه بالرحيل مدت وراه لسانا
جربه بالعويل قلبت حديثه رطانا
حنسه بالهديل رخت الحبيبه اضانا
ذى كل الطيور دايما تحن لوطانا
ماضاق الوطن بس كبرت الزنزانا
ويادى البلاد الكل ماطايبتها
فتحت على جرحك جرح
الكل مانقطلها الكلمات عسل
نزلت على خاطرك ملح
لاتاكت ابوابها الانيقه ورحبت
لاليله بجيتك فرح
يادى البلاد
وين نحن هسى فى ياتو ليل
فى يات صباح
كل الشوارع تشتبه فيك
وتشابه بعضها
كل البيوت الواقفه طولها
تستبيح فى عرضها
وانا روحى تشتاق لبلاد
كان طينى من طين ارضها
ديك البلاد اللابتفوت فيك وكت
لايوم بتترك فرضها
يوماتى واصله بالحنين
يوماتى هى الفى النوم
تجيلك برضها
اشتقت ليها الشوق غلب
اشتقته انزع همى
فى عتبات بيوتها الواسعه
وانزع فى ضل عصاريها التعب
غنيتا بادب المديح
سمت غناى قلة ادب
ومشيت وراها ضريح ضريح
فتشت فى كل القبب
دقشت وراء الرزق الشحيح
ما اغنى مالها وماكسب
شغلوها بالنبى والمسيح
واتقاسموها رتب رتب
فى كل حته حصار حصار
فى كل فجه لهب لهب
صمدت امام وابل الرصاص
سقطت امام وابل الخطب
حنيت عليها من الضهب
حنيت على زحمة خطاها
التايه بين رحمه وغضب
حنيت على دمى المشتت
فيها بين زنجى وعرب
حنيتا ياخى بلا سبب
ما دى البلاد الا جلبتها
للمدائن الصاخبه مقطوعة رحم
ولاتركتها فى الفيافى الشاحبه
مجهولة نسب
ولا رفعتها فى الرماح
ولامرقتها للمنافى
الواسعه تزروها الرياح
انا كنت كل ماالليل يفلل بندها
ياصابره حى ياصابره حى
ياصاااابره حى على الفلاح
ياصاااابره حى على الفلاح
ياصابره حى على الليالى
الفاتحه لوش الصباح
ياصابره حى على المدائن
الفاضله والقول المباح
لو كنت اقدر انزعك
من مخالب الخوف وجلجلة السلاح
ماكنت تانى رجعت ليك
خاوى اليدين دامى الخطى
ومكسور جناح
ولاكان نسيتك فى الزحام
تتعاطى مر الزكريات الفاجعه
والخدر الحرام
يادى البلاد الكل ماطايبتها
طاب ليها فى النفق المقام
زوجتها الحلم الجميل
خطبت خفافيش الضلام
وغنيته ما شاء الهديل
رطنت بما شاء الامام
راوضتنى وروضت كل الحواس
وهدهدت فى صحوى
شهوات المنام
ياطفله ابلغ من غناى
واجله عن كل الكلام
فرت ضفايرها ضفتين
والرمش تعريشة غمام
والثغر شخبين من حليب
والصدر برجين للحمام
جلست فما ابهى الجلوس
وقامت فما اسمى القيام
دخلت على الناس المسره
ومرقت على الارض السلام
وياصابره مادام الاسف
اسف على صبرك معاى
اسف على صبرك على
اسف على صبر السنين المره
عام من بعد عام
واسف اذا طال الشتات
فى الغربه او عزا المرام
واسف اذا طرف المدن
فراها اجنحة الخيام
ونزرتي عمرك للنزوح
للجوع واسلمت الطعام
واسف على هذا الكلام
اسف على هذا الكلام
| |
|
|
|
|
|
|
|
|
|
Re: يغلبني حزني عليك الليلة يا حميد (Re: إدريس محمد إبراهيم)
|
امال يا حبيبة
قبل كم يوم مشينا في مظاهرة .. انا وحميد وماريا
واقفين نهتف .. كنا قريبين من من عساكر شاهرين السلاح
ماريا غافلتنا .. وطلعت في ضهر عربية لونها ابيض واقفة على الرضيف
حميد اتلفت بسرعة .. نزل ماريا من العربية وبيصرخ :
ابقي تحت ما شايفة ديل
يا امال ... قدر فتشت وحنست الدموع ما قدرت ابكي حميد
على العموم.. حميد ما بيموت
رقم موبايل حميد
09922284374
اخر مرة ضربت ليه قبل مابيسلم علي قال لي
استراليا دي بمشوها بي وين ؟!!
ثم قال :
رقيي كيف ؟
-------------------
عليك الله يا امال رسلي لي رقم موبايلك في الخاص
ضروري
| |
|
|
|
|
|
|
|
|
|
Re: يغلبني حزني عليك الليلة يا حميد (Re: نجلاء سيد أحمد)
|
آخر المطاف
والموت بيشرق
نسمة
في كف الصَبا
الموت بيسر ق
بسمة
من شال الصِبا
وتوب الزفاف
النخلة
ترباية العباد
بجلاله
تتحول رماد
ورمادا
يتحول سماد
وسمادا يدخل
كم بلاد
وديانه تخضر
والبطاح
...
دا حميد يا امال
حميد النسمة البتهب ساعة الغيظ وتمسح وجوهنا ترطبا
| |
|
|
|
|
|
|
|
|
|
Re: يغلبني حزني عليك الليلة يا حميد (Re: امال حسين)
|
عارف يا امال
ما متذكر امس والا قبيل وانا راجع من الشغل في نص كبري الخرطوم
فجأة خطر لي حميد
وقلت في نفسي
الخمس سنوات الاخيرة انتقل الى الدار الاخرة عدد كبير من المبدعين وفي مجلات شتي
ما فيهم واحد حرقني قدر حميد
ربنا يرحمو
| |
|
|
|
|
|
|
|
|
|
Re: يغلبني حزني عليك الليلة يا حميد (Re: امال حسين)
|
الاستاذه امال لكى التحيه
وانت تعانين فداحة الالم والحزن فى فقد
الامه السودانية حميد فقد توقف بفقده
شلال كان يروى نفوسنا الظامئه دوما
لشعره الصادق فالله نسأل ان يتغمده برحمته
ويلهمنا وإياكم الصبر فى فقده إذ هو جرح
لا يندمل.
مثــــــلنـــا وكغــــــــيرنــــا
أنجبـــتهم رحــم الوطــن الكبــــير
فتعـــلقوا بعشقه حتى تواروا
فــى التراب . .
وتقاســموا شـــرف العـــطاء
لروضـه شغـفاً وتســابقوا
وجداً فى حبــه ولكم طالوا السحاب
سكبوا الحنين لنيله ولأرضه
وجباله .. ولكل من سكن الرحاب
كــم أوقـدوا شموعـاً
فى الليـــالى الحالكات وعطروا
دنيا الورى فناً رقيقاً راقياً خلاب ..
عذراً للرحيل الأليم مبكراً
إذ أتى الفصل الأخير ياأيها الوردى
من غــــــير ميعـــــــاد !!!
والحزن يترع فيضه
عم السواد ربوعنا وربيعنا قد عاد
بكل ألوان الفجيعة والحداد
ياويحــه عــام الرمــــاد
عــام الرحيـــل المـــــر
للأعــــــلام والأقـــــلام
وبعض أخيـــار الأنـــــام
حميد .. يا دفقــاً خريفياً
دوماً حضورك إزدحام
وفقدك ياوجعاً خرافيــاً
فينا وفى خاصرة الكـــــــلام
فالأعين يقطر دمعها صبحاً
وتبكيـــك الليــــالى المقفرات
اذا حل الظـــــلام ..
فقد خبأ وهـج الحقيقة
عن رحى الجسد الممزق
وجهــه واللثـــــام ..
وطن الجراحات العميــقة
والمرارات الأليمة والسقام
لعمرى لايرتقى السمع
للفــن بعـــــدكم
إذ أضحت السوح ثكلى
دونكـــم مجدبةً حطام..
أحمد عامر
| |
|
|
|
|
|
|
| |
امال حسين
صديق الموج
نعمات حمود
بله محمد الفاضل
بدر الدين الأمير
إدريس محمد إبراهيم
خالد العبيد
نجلاء سيد أحمد
سلمى الشيخ سلامة
بخاري عثمان الامين
وليد محمد المبارك
أحمد عامر أريا
فيس بوك
تويتر
انستقرام
يوتيوب
بنتيريست