|
|
 إشـتـهـيـت أهـلـي ... إهـداء لـود الـمـشـرّف و rummana ...
|
إشتهيت ساعة العِصيّر
شبورة نزلت فوق
فِريعات السُنُط
ريحة الدُعاش
ممزوجة بي ريحة البرم
وريحة المُرآح
حبوبة تحلِب في الغنم
ندهت جميع أهل الصلآح
مطراً يخدّر أرضنا
مطراً يحيّن ضرعنا
القِبلي يشلع في السحاب
ودُكناً بُعاد صِبحن قُرآب
والوادي خدّر
زي تقول ما كان يبآب
نُوارو فتّق في الغصون
لمّ الفراش
الزِيّفة والمطر الدُعاش
طراها زول من اهلو غاب
رفعت إيديها اضرّعت
للمولى يرجع للصِحاب
نزلت دُموعا علي الخدود
سآلت مع مجرى الشلوخ
يا ربي تِنحلّ الصِعاب
ويعودو للبلد البُعاد
إشتهيت
شهقة صباحات الفريق
وضو الشمس
ينسج وِشاحات يوم جديد
وناعس الخدآر
الفوقو نام قطر الندى
صحاهو نسام البحر
الهابي من تلآ الصعيد
مرقن تخايات في السما
نُصّت نهار
كايسات يضارن للشمِش
يوماً مولّع نار وحآر
لكنو كان يوماً سعيّد
والدِنيا عيد
عيدية واطفالاً سُغار
الفرحة في عيونهم تلُوّح
وناساً كُبآر
الهيبة فوقهم والوقار
إشتهيت
قيفة البحر
مويتو المنقِعة سلسبيل
وبحرنا في واديهو نِيّل
جُرُوفنا والليل الطويل
والقمرا بينات النخيل
القعدة فوق صافي الرمال
السمحة والزمن الجميل
كلآم دُقاق وعبير جروف
خدر العِشِق وندى الحروف
والدنيا ليل
كل الوجود رآخي السمع
حتي الخدآر بفوقنا مال
يِصنّت النضم الدُقاق
لمتين اعود للسمحة
ما طال الفُرآق؟
طال الفُرآق
والغربة ما بتصير وطن
طال الفُرآق
وشوق السنين في الجوف سكن
ومهما السِنين إتراكمن
وقِسى الزمن
الغربة ما ممكن تكون
لزول وطن
والغربة ما ممكن
تكون لزول سكن
.
.
.
ود المدير...
|
|
 
|
|
|
|
|
|
|
 Re: إشـتـهـيـت أهـلـي ... إهـداء لـود الـمـشـرّف و rummana ... (Re: نجوان)
|
نجوان سلامات..
موافقاك مية في المية.. أنا ما عارفة الفكرة كانت شنو في الدزاين بتاع البرج لكن من باب حسن الظن بنقول أكيد في حكمة فايتة علينا...!
اعتقد الصورة لشخص اسمه ضياء (حسب الامضاء في الصورة التالية) وهو فنان شديد أنا شفت بعض صوره .. الحقيقة اتحداني بيه أحد معارفي لاني قلت ليه مافي سوداني بيعرف يصور..!!
ومن هذا البوست نقول ليه شكرا على كل الجمال...
| |
|
|
|
|
|
|
|
|
|
Re: إشـتـهـيـت أهـلـي ... إهـداء لـود الـمـشـرّف و rummana ... (Re: معاوية المدير)
|
وفجأة ..
البوردي خدّر
زي تقول ما كان يبآب ..
هسع الواحد يعمل شنو يا عملات رمانة ..
الا بوستيك ده جانى فى ضيقة لا يعلمها زول ..
يعنى وقع لى جرح يا معاوية ..
وشفت التصاوير السمحه فوق ..
ذكرتنى بالبترقش نادية فوق صدر الجرائد ..
وكمان رمانة جابت "عقد الجلاد"
وعقد الجلاد ديل "غنايين زمنا"..
وكم كانت المسافة جميلة ما بين البركس وكازينو النيل الأزرق و .. عقد الجلاد
مافى حاجة كانت تعكر تلك المسافة الا "حظر تجول ذلك الزمان" ..
وكان شديدا لا كحظر تجول هذه الايام الغير معلن ..
يا حليلو هو ذاتو بتلك السيرة التى التى لا يعكر صفوها الا هو ..
فحراس البركس كانو بيتجاوز عن طيب عشق ال late بتاع البنات ..
ونرجع ندندن بالغنا للصباح ..
"لانك عندى كل الخير, وجيهك فرحة الدنيا" ..
وكان من شان بعض المرهفين ال "نخجى" نص الليل ..
والحمدلله الذى عافانا من ذلك وابتلاهم ..
بيد انى -كنت- لا اخلو من شعر ..
اقرأه الآن واحسبه ما بطال ..
توقف ذاك الزمان عند زمانه ..
واحسبنى توقفت هناك كذلك ..
بذات تلك الاحلام بى وطن حدادى مدادى ..
وبى انسان سودانى عظيم الشان و فاهم وواعى ومشرف جدا..
يا الله يا معاوية !!..
كما وشفت صورة الترابلة الفوق يا صديقى ..
صورة جميلة جدا و.. إنسانية
هل توجد صور ما انسانية ؟؟!
لا أعلم ولكن ..
هذا ما قفز لخاطرى ..
على أن أعود للقصيدة الفوق لاحقا ..
كتر خيرك عليها ..
فكما أسلفت, وقعت لى فى جرح
محمد الحسن حيدر ..
| |
|
|
|
|
|
|
|
|
Re: إشـتـهـيـت أهـلـي ... إهـداء لـود الـمـشـرّف و rummana ... (Re: معاوية المدير)
|
ود المدير:
سوما قالت...
إشتهيت عيشة الغبش
إشتهيت طُقطُق مطيراتنا الدُغش
من غير سلام فوق البرش
والشوق يتاوق من بعيد
غالبو الصبر
كرْوَشْ ترابنا على الجروف
دربا حنين خاتي الخدش
اشتهيت ريحة الفريق
ملخوخة بي شيتا كُتر
دوكة وملاح
مع فكة الريق الصباح
قهوة وعرق
والقلوة بتناغم البكر
اشتهيت مرقة بهيماتنا الفجر
لاحقه المراح
ديك الصباح
كبر وصاح
خابر الذكر
اشتهيت لمة عيال
عند الكنار جنب الترع
زفة مطامير المطر
اشتهيت مرقة بناتنا على البحر
سايقات نسيمات العصر
لافحات طرح
طمح الصدر
اشتهيت لمة كبارنا بلا وعد
والشورة فال عند الخدر
اشتهيت يا يمة ريحة هدمك الملتوق
ودهنك المعتوق
كركارو حر
كورتك ممسحة بالودك
بتناغم الديس البجر
قرضك معتق زى بخور
فصين لبان تيمان ضكر
ريحة مسيرتك جرْتَقَة
معجونه بى طين الصبر
غُرة جبينك يمة باقيالي ضي
في غربة الخوف والكدر
اشتهيت عيشةَ الناس الغبش
شاي الدغش
لبن الزريبة بلا عرش
زادى الحنين الفي الحكر
اشتهيت طبْعاً عدم في كل بلود
عدمانه يالزايلة ام قدود
حارياها عند اهلي الغبش
خاتية البطر
---
ست الكسرة..
| |
|
|
|
|
|
|
|
|
|
Re: إشـتـهـيـت أهـلـي ... إهـداء لـود الـمـشـرّف و rummana ... (Re: محمد حيدر المشرف)
|
Quote:
هسع الواحد يعمل شنو يا عملات رمانة ..
الا بوستيك ده جانى فى ضيقة لا يعلمها زول ..
يعنى وقع لى جرح يا معاوية ..
وشفت التصاوير السمحه فوق ..
ذكرتنى بالبترقش نادية فوق صدر الجرائد ..
وكمان رمانة جابت "عقد الجلاد"
وعقد الجلاد ديل "غنايين زمنا"..
وكم كانت المسافة جميلة ما بين البركس وكازينو النيل الأزرق و .. عقد الجلاد
مافى حاجة كانت تعكر تلك المسافة الا "حظر تجول ذلك الزمان" ..
وكان شديدا لا كحظر تجول هذه الايام الغير معلن ..
يا حليلو هو ذاتو بتلك السيرة التى التى لا يعكر صفوها الا هو ..
فحراس البركس كانو بيتجاوز عن طيب عشق ال late بتاع البنات ..
ونرجع ندندن بالغنا للصباح ..
"لانك عندى كل الخير, وجيهك فرحة الدنيا" ..
وكان من شان بعض المرهفين ال "نخجى" نص الليل ..
والحمدلله الذى عافانا من ذلك وابتلاهم ..
بيد انى -كنت- لا اخلو من شعر ..
اقرأه الآن واحسبه ما بطال ..
توقف ذاك الزمان عند زمانه ..
واحسبنى توقفت هناك كذلك ..
بذات تلك الاحلام بى وطن حدادى مدادى ..
وبى انسان سودانى عظيم الشان و فاهم وواعى ومشرف جدا..
يا الله يا معاوية !!..
كما وشفت صورة الترابلة الفوق يا صديقى ..
صورة جميلة جدا و.. إنسانية
هل توجد صور ما انسانية ؟؟!
لا أعلم ولكن ..
هذا ما قفز لخاطرى ..
على أن أعود للقصيدة الفوق لاحقا ..
كتر خيرك عليها ..
فكما أسلفت, وقعت لى فى جرح |
الجرايد والسمحة البترقش فوقهن، ورائحة الجرايد يا ود المشرف
في الزمن دآك عطراً فايت خُمر الفوق اردافها مجدّع. يا قول
ود بادي. الغُنى كان سمح وحتي الحرمان كان ليهو طعم، وإستطاع
السودانيون أن يصنعو من فسيخو شربات. قالو، وآحد من المتشردين
كان نايم جنب كُشُك في سعد قشرة، أها لمو فيهو ناس حظر التجول
شلآليت بالبوتات. الراجل قام مخلوع!!! قال ليهم، مالكم في شنو؟؟؟
وآحد قال ليهو، إنت ما عارف البلد دي فيها حظر تجول ؟؟؟ المتشرد
بكل بساطة فال ليهو، هسّع المتجول منو ؟؟؟
بس التجاوز كان لآزم يحصل، عشان بنوّت بلدنا ليهِن حُسن
يأمُر، وأمره حتي العساكر يطيعوهو وبخضوع كمان.
من منآ كان لا يخلو من النخجي في ذلك الزمان؟؟؟،
وهل نستطيع إن كنا أردنا ؟؟؟
أهلنا طيبين وسمحين. الشوق للبلد بحالآ،
والشوق للترابلآ أهلي...
| |
|
|
|
|
|
|
|
|
|
Re: إشـتـهـيـت أهـلـي ... إهـداء لـود الـمـشـرّف و rummana ... (Re: معاوية المدير)
|
Quote: سلامات يا نديدي ومشتاقين كتييييير
حلات النضمي عندك يعلم الله و شوقتنا
للاهل وريحة الدعاش يا معاوية ربنا
يوعدنا ويحقق امنيتنا القديمة يا اخوي .
وسمعنا صوتك يا حبيب
مودتي |
نديدي، السيف.
خبرك، وخبر وِليدآتك ؟؟؟
يا زول إنت الشُغُل الجديد دا كان داير يمسكك
مِننا كدي ادِمسو.
والله الشوق بحور ما ليها حد ما ليها قيف،
كدي بشوف لي فرقة أناضمك.
تشكر يا صديق...
| |
|
|
|
|
|
|
| |
معاوية المدير
rummana
نجوان
حافظ انقابو
وضاحة
محمد حيدر المشرف
سيف الدولة كامل
فيس بوك
تويتر
انستقرام
يوتيوب
بنتيريست