قال لي ربنا سبحانه و تعالي أكرمني بي جوكر قفل لي الورق

Quote: يحى قباني سلام وتحية ياخ ات تومي عديل

(عدل بواسطة يحي قباني on 09-18-2012, 07:52 PM)

Quote: لا العب الكوتشينة رغم (جينات ) متابعتها والتي ورثناها من الوالد - ربنا يرحمه - فهو كان معروف ( مرة بالشطارة والمهارة ومرة بالحظ لدرجة ان تمت تسميته بالخواجة نيكولا) وسبق ان تم منعه دخول بعض النوادي في داخل وخارج السودان .. ولكني لا احبها ولا العبها ورغم ذلك قصتك جذبتني من العنوان . تذكرت انني قبل يومن كنت اتسامر مع صديق فذكرني بكلمة دكتورنا وشيخنا على المك - له الرحمة- في تكريم الراحل عبدالله الطيب بقاعة الصداقة والتي ذكر فيها طرفة مهندس الري المصري وارجوزته الشهيرة في شأن الكونكان (أبي اربعة عشر) والتي ختمها بقوله : والاصل في الكونكان ان لا تنزلا وجوّز النزول إذ لا املا. صديقك هذا مثل صديق لنا يبدأ اي شئ ببسم الله الرحمن الرحيم ولك ان تتخيل الاشياء التي يبداءها من كوتشينة و.... و......... لك الود اسامة

(عدل بواسطة يحي قباني on 09-18-2012, 02:14 PM)

Quote: قوم قوم يا زول ...ده دو ما فكاهو ...دايرو يفك لي ولدى ... !!!

Quote: ود الجسير يا يحيى اخوي قافل على كرت صعب خلاص عشرة هارط واصلو جارو دا غير دو تريس ما بديهو حاجة عشرة هارط كمان ؟ .... حرم كان اعرج بيهن عشرتين لمن تنتهي ما اديها ليهو اها بقى علنا اجر الكرت واقول يا فكي زنبار قداد الهبوب تديني عشرة هارط يافكي زنبار عشرة هارط فجأة كدا جرا الجوكر رفعوا لي فووووووق وعاين ليهو فكي زنبار شخصيا

Quote: هههههههههههههههههههههههههههه مبالغة والله يا يحي الكتشينه نكاتها كتيرها انشاء الله نتذكر لينا حاجه ونرجع لبوستيك اللذيذ مودتى

Quote: تستاهل علشان ما مطعمينها في ذمتك في حريق بلعبوا الساعة اتنين صباحا ما مطعم عشان كدا تلقى التربيزة فيها خليفة وامام جامع ومقرئ ياخي ارمي ليهو جوكر يفتح بيهو خسران شنو بالعكس يمكن تكسب ليك دعائين تلاتة وبعديها تصلوا الشفع والوتر حليل الرياض أيام عنتر والأمريكاني والخطيب وأبو علي وأبو رزقة وأبو حنفي وخزرج وطيب الأسما وفطاحلة الحريق المقرب إلى الغنا (أو الفلس)

Quote: سلامات يا يحيي و مرحب بيك نقلا من اجواء سهر الكوتشينة لسهر تانى قالوا عندنا قريباً لينا كان بتاع سكر .. بيستنى متييييييييين العشاء يأذن عشان "يختفوا" ويلم البرش ويجى على كرسيهو ويجر قزازتو وقبل ما يكب كاسو بيقول بأعلى صوت " اللهم لا كفر و لافسوق و لاعصيان" ويبدأ....

Quote: العزيز باشمهندس يحيى قبانى القصص كثيره عن حكاوى الكونكان..وقطعا هو رجس من عمل الشيطان واليك هذه.. فى نادى قوة دفاع السودان بالمورده كان عددا من ضباط قوة دفاع السودان بالمعاش يلعبون الكونكان ..كونكان 14..وكانوا يجلسون تباعا بالرتب العسكريه.. ويجرون ..وبقيت ورقتين ..ووضع الباقين اوراقهم على الطاوله امامهم....وجر واحد وجدع البايظ..واصبحت...ت الورقه الاخيره...وجرها اللاعب الاخير وكان كرت الفتوح وكان عسكريا اعلى رتبه.. \فصرخ فالباقين الذين وضعوا اوراقهم امامهم....بذلك النداء العسكرى...كما...كنت.. ورفعوا الاوراق..

Quote: الغريبة في الاديان السماوية التانية - اليهودية و المسيحية - يحظر فيها على اتباعها الحليفة خصوصا لدى اليهود إذ لا يحلف اليهودي مطلقا ، و كذلك هم لا يدخلون اسم الرب في حدثيهم العادي بدون سبب قوي. انا ما عارف العادة دي جات للمسلمين من وين، في الكورة يقول ليك ربنا نصرنا مع انو الفريق التاني مسلمين برضو و يحلفوا في الفارغة و المليانة و زي ما حكيت يا قباني اهو حتى في الكوتشينة بتلصقوا في ربنا بالاوانطة فعلا عادة سخيفة و غاية في الغباء. اما بخصوص الكوتشينة فخلني النسعلك "مطعم" دي شنو؟

Quote: واحد أخونا صرف الماهية مشى للشباب يلعب حريق خسر الماهية جاتوا سكتة قلبية ودتو التوج الشباب اتحيروا منو اليكلم أهلو جروا بكرة واحد أخونا حظو شين جرا تسعة وآس بقت عليهو لبس عمتو واتوكل مشى لبيت المرحوم مهموم ما عارف يكلم أهله كيف خبت الباب فتحت ليهو مرت المرحوم قاليها راجلك مشى بيت ناس فلان لعب حريق بالماهية خسرا المرة قالت ليهو انعل ابوه دايما مضيعنا انشا الله ربنا يفتكروا ما دايره اشوف وشوا تاني أخينا ابتسم وقبل ماشي من ورا ضهروا قال ليها احمدي ربك استجاب لدعوتك

(عدل بواسطة يحي قباني on 09-19-2012, 01:11 AM)

Quote: مرحب تانى يا صاحب هشام تحياتك تصل ان شاءالله اوكمان ممكن ترسل ليهو بالماسنجر ..بكتب هنا بإسم هشام المجمر.. ومرحب بيك فى بيت المزاد زمان وهسه وبكرة

Quote: ذهبت للمدينة المنورة بغرض الزيارة وانكربت على الحرم عشان احصل صلاة العصر دخلت الحرم والصلاة انتهت وقفت اتلفت في ساحة الحرم الشريف عشان القى لي ناس اصلي معاهم جماعة بعد شوية جو تلاتة باكستانيين ومصري وبعدهم جا اخونا سوداني عندو دقن وطوالي استلم الامامة واقام الصلاة وقال استو ... استوينا ... الله اكبر وبعد شوية توافد علينا المصلين وعملوا تلاتة اربعة صفوف اها زولنا ركعتو كدي وات يا الكشتينة فررررررررررررررر في السراميك ومع هواء المدينة داك فجاة اشوف ليك بت الديناري جنبي عفصتها جاني طاير دو الشيرية الخفيف داك قلبتو على ضهرو جاني طاير آس اللسود اتقول ساكي ليهو شايب يا زول الكشتينة جوز جديدة عملت عمائل مع السراميك والهواء تحوص يمين تشوف سبعة الهارت تحوص شمال تشوف الجوكر وجنبو بلي الديناري اتقول داير اخاوي بيهو وبقينا نقع ونقوم مع امامنا ولافي زول عارفو صلى بينا كم من كسوفو وخسوفنا والسلام عليكم كيف .... وشو ما حصل التقرقوة حقتو وعديل علي البقيع .... غايتو شعرة جلدنا ######ت زي ال###### كما قال الترابي ما عرفنا نعمل شنو خلينا الكشتينة مشتتة كرت مقلوب وكرتين عدال وشتتنا على البقيع امكن نحصلوا هناك نشوفو كياشتو دي

Quote: اما بخصوص الكوتشينة فخلني النسعلك "مطعم" دي شنو؟

Quote: قلت ليهو ربنا اكرمك بي جوكر؟؟؟؟ والله ربنا كريم و طبعا معروف انه في الويك إند ربنا بيتفرغ للبلية... يديك انت سبعة هارت و يخليك قافل جوزي ثري ... ويخلي الناس البتموت في السودان و سوريا ... والناس الواقفة في الكعبة و يتفرغ ليك انت ؟!!!

Quote: اخي الفاضل جلال ... اراك اخذت كل شئ بمعناه التقريري ... رغم انو البوست بوست ونسة و فرفشة و كلام حبوبات ... لا ادري كم من العمر تبلغ انت ... ولكني عشت في زمن كان كل شي علي السجية ... وخالي تماما من التعقيد ... الشي الاخر اراك انهلت علي بالمواعظ وكانني جاهل ... و لغيت كل معرفتي و ثقافتي و تعليمي ... وهذا شئ مدهش ... عموما جزاك الله خيراً يا أخي وصلت الفكرة ...

Quote: سلام صاحب البوست و زواره هاكم ده من أصحابنا في السعودية. الجماعة عندهم واحد متعود يلكزوه عشان يَجٌر خمسين. ها فيوم من الايام ساهروا شديد يوم الخميس وواصلوا لصباح الجمعة. و بعد ذلك أخذوا إستراحة لصلاة الجمعة. فأخينا جاتو نُعَاس أثناء الخطبة، و كان بحلم بأنه قَافِل، ففجأه لكزهُ جارو في المسجد و أخينا ما صدق و قام جَرَ خمسييييين، لحدِي ما الإمام قطع و المصلين إلتفتوا لكنهم ما فهموا شئ غير أصحابوا غلبهم الضحك. خايتوا أخينا قالوا ترك اللعب نهائيا

(عدل بواسطة يحي قباني on 09-22-2012, 07:55 AM)
(عدل بواسطة يحي قباني on 09-22-2012, 07:57 AM)

Quote: سلام يحيى قباني ومرحب بيك في الفضاء الرحب ياخ بوستيك منقة بس د سيف ده ما تعصر عليهو شديد يا سيف العرقي البكري ده زي القهوة البكرية يعني A one بمناسبة العرقي دي ... قاليك مرة ست العرقي حاجة في الطواف لقوها ليك زباينها في البلد مسكوها من يدها وقالو ليها امسكي الكعبة دي واحلفي تاني ما تزيديهو موية مرة كنا بنلعب حريق وزي عشرة كدة بكونوا حارسين القيم برة يعني لو حرقت داير ليك ساعتين عشان تلعب تاني ... اها يا عمك انا كنت مزنوق زنقة عدوك ( 28) وفجاة لقيت لي غطا وقعد اغني بريتم عجيب وحافظت وحافظت وحافظت وجدعت دو جروني خمسين والله الخلعة الدخلت فيني لحد اسي ما مرقت وماسكنا لي لحدي الان رغم مرور اكتر من 15 سنة .....حافظت وحافظت في الويست مرة لعبت مع جماعة وفيهم واحد عامل شفت سقتو لتربيزة تانية سيكوهو وهو عندو 3 اسات جاتو نفسيات ... من ديك ليوم الليلة ما برفع عينو علي

Quote: الله لا جاب الزعل, فقط ظروف العمل لا تسمح بالدخول للإنترنت كثيرا اعتقد با يحي انك دفعة قاسم أخوي في الهندسة

Quote: انا دخلت الجامعة سنة 1978 ... قريت معمار

Quote: ود قباني بوست متعة والله كان ربنا هون بجيكم تاني

Quote: فضل المولى علي عباس ابن عمي لزم اكيد بتعرفو تحياتي واصل المتعة والامتاع وونسة الكشتينة لذيذة كنا بنسافر سفر من ابو قوتة للقطينة كل يوم خميس الجماعة قالوا نص مقابر القطينة من غباين الكشتينة ياخي ديل قالوا الواحد لمن اكبر واعمى بخلي ود بتو اسوقو النادي عشان اتابع الكونكان جدع شنو ؟ ود بتو اقول ليهو جدع بلي ...... دي ساعة بلي يا كيشة هههههههه زمان نحن البلي دا مابنفكوا الا ننزل بدامة ..... هههههههه

Quote: تخريمة : يا قبانى طالما درست الهندسة قسم المعمار هل تتذكر زميلكم من أبناء قرى إسمو عزالدين محمد الامين وكان مغترب فى السعودية دى ورجع قبل كم سنه وكانت شركته هى التى أشرفت على بناء مسجد السقاى البتلاب فى العام 2007م .الاخ عزالدين كان دفعتنا فى الجيلى الثانوية ودخل المعمار فى1978م أعتقد دفعتك أو وراك بسنه وبرضو معاهو أسامه عبدالجبار .

(عدل بواسطة يحي قباني on 09-25-2012, 00:22 AM)

Quote: هاااااا ... صاحبنا الفي الرياض أخد ليهو جغمة من كاسو ... وقام كده مسح شعر راسو لي ورا واخد رجعة في كرسيهو و بابتسامة عريييضة ... قال لي ... " بالله شوف السودان ده كانت مشاكلة بسيطة و محلولة كيف " ....

Quote: يا سلام بوست ممتع وجميل

Quote: الف مرحب بيك يا هندسة وشرفت المنبر وتشكر على البوست الجميل , هاك دى , عندنا واحد مرضان عديل بالكنكان وفوق كده لعاب جدا فى مرة من المرات الاسكور بتاعو سبعتاشر ومقرب ينزل قام فك دو دينارى للزول الجنبو الزول فتح بدو الدينارى صاحبنا شتت الكوتشينة واتخارج مشى بيتهم , ما قدر ينوم وبدأ يفكر فى انو كان عندو بايظ تانى ممكن يجدعو , حوالى الساعة اربعة صباحا قرر يمشى للزول الجراهو وفعلا مشى للراجل وخبط الباب صاحبو تأكد انو ده بتاع اللبن بس الليلة بدر شوية , اخذ جك اللبن وفتح الباب فوجد صديقه أمام الباب سأله يا زول ان شاء الله خير مالك , رد عليه لا خير ما فى حاجة بس ياخ انت قبيل فتحت بكرت انا رميتو ليك , رد عليه صديقه بقوله نعم متذكر الكرت كان دو دينارى , فسأله صاحبنا المجرور قائلا طيب ياخ انا لو كنت رميت ليك أربعة الدينارى كانت بتفتح ليك الورق , رد عليه أيوة أربعة الدينارى ذاتها فتوح , أخونا المجرور قال لصديقه ياخ والله أنا يا دوب ارتحت وكده ممكن أمشى انوم , شفت المرضة دى كيف .

Quote: سلامات يا دفعة ,,, والله بوست روعة والله يا فباني صاحبك ده تحفه ,,,, زمان كل مشكلة وليها حل . خصوصا بعد العشاء كل مشاكل السودان بتتحل في قعدة . حليل الزمن الجميل .

Quote: والله يا فيصل ما طالبنى حليفة فى اللحظة العايز أقفل (وأمشى أنوم لمحتك فى تربيزة الكوشتينة !!!) قلت فيصل البجيبو فى محل (المرضانيين شنو ؟؟) فقلت أقرأ مداخلتك فوجدتها (شحمانه ومليانه وأخذت ضحكتى !! على زولك الممكون وصابر !!!) . زى قصة الحكم الجا العيلفون يحكم مباراة المريخ والموردة لأول مره يدخل العيلفون !!!قابلوهو مشجعين المريخ من الساعة 12 ظهر يهتفوا (التحكيم فاشل يا حكم يا خائن يا مرتشى !!!) قال لى بتاع التكسى نزلنى للناس ديل بتاع التكسى قدر ما حنسو قال ليهو يا أخى ديل أهلى وأنا بعرفم متلقين حجج ساكت !!أصّر ينزل ومشى عليهم قال ليهم يا جماعة أنا أول مره أشوف العيلفون دى ولا بعرف المريخ ولا الموردة ديل شنو ؟؟ قالوا ليهو أول مره تجى هنا ؟؟ قال ليهم آآآآآآى أول مره !!! قالو ليهو برضو خاين ومرتشى كمان !!!

Quote: يا قبة هاك دى , عندنا جماعة معارفنا يعشقون الملعونة كما يسمونها , لديهم منزل فى امتداد الخرطوم بالنهار اللعب للهواة وبالليل للمنقطنها ودى مطعمة , كان احد أفراد هذه الشلة يمر على صديقه بعربته ويأخذه الى ذلك المنزل ويدوروا الحريق , فى احدى المرات كان صاحب العربية مزنوق ومأمل نزول ولو اتقبض فوق بحرق وكان يجلس على يساره صاحبه الذى يحضره معه كل يوم بعربته , وكان لدى ذلك الصاحب شايب شيرية كحله صاحب العربية بطرف عينه وشايب الشيرية لا رابط بينه وبين بقية الورق يعنى بايظ لكن الزول أبى يفكو كلو كلو ولو فكاه كان بنزل صاحب العربية , المهم الزول مسك الشايب بل فى بعض الأحيان كان يكسر حتى لا يرمى الشايب , استمر اللعب الى أن تم قبض صاحب العربية بهبابة كاملة وخرج من اللعب , عند المغادرة توجه صاحب العربية مسرعا الى عربته فتح الباب ودور وأمن الأبواب جاء صاحبه من هناك وأراد أن يركب فوجد الباب مقفول قال لصاحب العربية ياخ ما تفتح الباب رد عليه قائلا أفتح الباب يا علق وأردفها أركب شايب الشيرية خلى يوصلك , يا قبة أظن العربية كانت داتسون 140 y