|
|
 في الشأن الرياضي .. المريخ .. الهلال ..
|
في الشأن الرياضي
السلام عليكم ورحمة الله،
يا صفوة ويا أسياد وسيدي وسيدك الله.
البوست ده غرضو يفك المغصة بس. زيدو وعيدو فيهو زي الترتيب. بس بعد تنتهي من مداخلتك امشي وانت صافي القلب وصافي النية عشان الحال ما بتعدل إلا من الحتة دي زاتا. حتة انو الناس تتعامل مع الكورة على اساس انها كورة وبس لا حرب لا ضرب لا يحزنون.. مع انو يحزنون دي في منها كتير خلاص ..
لما صبري كتب مطر الحزن عاود هطل وقعد يموسق ويجعر قربت اجي ناطي ليهو بي
تقرع بالقمر وتزرع بالنجوم ..
لكن الزمن دوار آبدووووووم
باختصار الناس فاكنها في نفسم ساكت ..
الحقيقة الساطعة إنو الأندية السودانية متأخرة كثيراً على رصيفتها الإفريقية في الكثير من التصنيفات بسبب ضعف الاداء في الادوار الختامية (16-8-4-2) ...
صحيح أن المريخ هو الفريق السوداني الوحيد الذي تحصل على كأس خارجي وحيد (كاس مانديلا) ولكنه متأخر في التصنيف القاري الكلي على الهلال. وصحيح أيضاً انو سبق للمريخ أن تقدم الهلال في التصنيف بفعل اعتماد مجموع نقاط خمس سنوات الذي اعتمد في تحديد اسبقية المجموعات خلال مشاركتهما معاً في مجموعة واحدة في المرة السابقة (لعلها المرة الاولى) .. وصحيح أيضاً أن الهلال يخرج للأسف من القائمة عند التصنيف عبر الحصول على الكأسات وهو نوع من التصنيف معتمد عند بعض المهتمين. وهذا الأمر يسبب للهلالاب ضغط نفسي لا مبرر له بالمرة. واعتقد ان للهلال ما يفخر به. وللمعلومية فإن الهلال متقدم في التصنيف حتى على الوداد المغربي الذي انتزع منه الكأس عام 1992.
الطريف انو موضوع تقدم المريخ في التصنيف الحديث لخمس سنوات جاب في وقتو كلام كتير أظهر أن هناك جهل لا يستهان به بالإعلام الرياضي، حتى أن بعض "الصحفيين" اتهم الاتحاد الإفريقي بالانحياز للمريخ - " والله صحي" . وأن المريخ لعب في الأمر مع اداريي الاتحاد. !!!! لكن موضوع الاعلام الرياضي داير ليهو بوست لحالو وبنجيهو كان الله حيانا لي قدام.
المريخ مصاب بالكثير من الزهو بفعل مانديلا. وعشان كدا ممكن الناس توافق إنو في " لعنة " على سبيل المزاح طبعاً (بوست اشرف الحلبي). وللأسف الاعلام المريخي بيستغل الموضوع ده لأبعد حدود للرد على الاعلام الهلالي.
لكن دي ما المشكلة الاساسية في موضوع الاخفاق الرياضي .. المشكلة الاساسية هو مجموع سلوكنا نحنا كلاعبين وإدارة ومشجعين تجاه الأمر ده. ويبدو لي الحل بيبدأ من الحتة دي.
كرة القدم – أو الرياضة بوجه عام - الآن صناعة حديثة للغاية وحسابات دقيقة وعمل دءوب وشاق.
ممكن الزول يبدأ بنفسه ويتخلص في الأول من التزمت المقيت لفريقه والكره البلــيد حد الضرر بالفريق الخصم. لأسباب كتيرة نقول منها الاتي:
- عشان التونسي أو التونسية البقولوا ليك بوجه مستفز ومستغرب إنتو كمان بتعرفوا تعلبوا كورة؟ ما بيفرقوا بينك وبين الهلالابي. إنت سوداني وغلبك فريق تونسي فلستوب.
- عشان السعودي أو الخليجي البصر يقرب من " سيارتك" – حلوة سيارتك دي – لما يكسر ليك المراية عشان يكاويك بعد يغلب الهلال أو المريخ أو الاهلي الخرطومي لا قدر الله ما بيفرق برضو. وبعديها يوزن قطرتو ويشتت وهو يقهقه ملء سمع زوجتك وأولادك المعاك في "العربية".
- عشان المكنة بتاعة سادومبا ما جدو محمد احمد أو الحضري ما جدو عثمان دقنه دي ما بتشيل التيم سوداني حتى لو لعبو فيهو تسعة أجانب. خليهم عشرة ذاتو المافي شنو؟
- عشان المذيع المصري البيسمي هزيمة الهلال للأهلي المصري ثلاثة صفر بهينك انت المريخابي قبل الهلالابي. هو شايف انو ده من رابع المستحيلات ... ليه مستحيل ياخي ؟
- وقبل ده كلو عشان المريخابي أو الهلالابي ده ياهو أخوك وولدك وبتك البياكلو معال الفول والسخينة ديل زاتم.
يا أخي الكلام ده ما صاح .. هسع عليك النبي فيها شنو لو الدافي سجل للهلال السنة الفاتت؟ هسع جاي يسجل للهلال المشكلة شنو؟
ياخي الاداريين ديل زاتم ما يفكروا تفكير ايجابي ومفيد للبلد كلها وللطرفين. نلعب أربعة فرق وفي الكونفيدرالية وواحد ما يصل النهائي؟
ياخي هاكم النجيضة هسع قولو ليهم أدونا يوسف محمد وشيلو وارقو.. فيها شنو يعني؟ الحضري ما بنبدلو بجمعة لانو انتو قلتو جمعة احسن من الحضري ونحنا طبعا ما دايرين نضركم.
شيلو بلة جابر ورجعوا لينا علاء الدين (كويسة افتكر دي عشان الاتنين حردانين وعشان رجوع علاء الدين ببرد دم المريخاب شوية وذهاب بلة للهلال بخليهم يرحموا اكرم وبلة من موضوع الرقيص).
العبوا مباريات مشتركة وشكو الفريقين مباراة عندنا وتانية عندكم. هيثم مصطفي بي جاي وفيصل العجب بي هناك.. ليما ده خلوه لابس أحمر عليكم الله ... نحنا ما صدقنا نلقى لاعب يذكرنا أيام المريخ زمان.
بي مناسبة ليما ده يا جمال الوالي ويا مجلس المريخ ريكاردو ده أحسن زول. ولو صحافة المريخ كلها قالت ليكم غير كده سدو دي بي طينة ودي بي عجينة.. والبنبزو ليكم في ريكاردو ديل بجيبم ليكم فيديو صورة وصوت بيقولوا انو ريكاردو مدرب شاطر.. وبي صراحة المريخ قدر العندو قدما في الكورة النهائية والجزء الخاص بالتوفيق ما تم.. والتحكيم الإفريقي في الاربعة مباريات مية المية هلال ومريخ .. ويا فيصل سيحة انت ناسك تشكرم وناس الاتحاد الإفريقي تفكها فيهم. هسع بالمنطق ده زاتو ما ناس مالي والكنغو ممكن يقولوا التحكيم المصري والجزائري ذبحنا... المشكلة شنو؟
نجيب سيرة البحر مرة تانية: هسع ياخي ناس يغلبوا ليك الصفاقسي التونسي والوداد البيضاوي وانت تجي داير تاخدا بالباردة كدة... لأ وكمان داير تدقّس بالكورة في خط مافي وبعد ما تمسكا بي يدك اليمين تخت يدك الشمال في راس المهاجم نظام معليش يا كابتن وكده؟؟؟
آآآآآآآآآآآآآآآآآآآآآآآآه ... يا وجـــــــــــــــــــــــــــــــــــــــــــع ..
...
|
|
 
|
|
|
|
فيس بوك
تويتر
انستقرام
يوتيوب
بنتيريست