كتب الكاتب الفاتح جبرا المتوفرة بمعرض الدوحة
|
|
 كلو إلا رأس النيفة ...!
|
لكي تعيش في هذه البلاد تحتاج لحرفنة شديدة ـ حرفنة في كل شئ هو ما تحتاجه
يعني مثلاً عشان الكمساري ما يحنكك ويديك باقيك (لبان ماربيلا) من المفترض تكون شايل في جيبك فكة حديد
وحديد يلاقي حديد ينبرش (الطرور ويفضل الصندي) أو كما تقول الشفاهة السودانية .
الليلة شوف عيني الكمساري رجع لي زول باقيهو ومعاه حبتين لبان ماربيلا
القصة دي طبعاً كانت مدخل لشكلة صباحية عظيمة
إذ إنو الراكب حلف بالذي نفس محمد بيده إنو ما يشيل لبان ماربيلا وعايز حقوا كاش
حق الله بق الله الناس إتدخلت وجوا بتوعين المرور في نص الزحمة والكواريك
وقطعوا السواق ايصال (حزام) والأمور جاطت خالص خالص
والكمساري يحنس في الراكب
والراكب يحلف مايشيل
ونحنا نحنس
والسواق يلعن أبو اليوم الخلاه يسوق في الخط ده
عادي يعني هكذا الأمور بتمشي في السودان
في العادة وغالباً ما يباصر السودانيين المواضيع العظيمة بإمورٍ أعظم منها
لكن بي صراحة الناس ديل بالغوا مع النيفة وفي مقولة أخري بالغوا مع (الباسم)
فقبل فترة ليست بالطويلة وحتي بعد إعلان الدولة سياساتها التقشفية
كان بمقدور الواحد شراء رأس نيفة بمبلغ وقدره تلاتاشر جنيه
ونص النيفة بستة ونص
نص النيفة بستة ونص
نص النيفة بستة ونص
هكذا كانت مكرفونات المطاعم تعلن
يتراقص الناس وكل في فلك النيفة يسبحون ... واحدين يشيلو نص وواحدين يشتروا نيفة ونص
اليوم وبمحض الصدفة وقفت أمام بائع النيفة
قابلني بفتورٍ لم أعهده فيه
حق الله بق الله قلت ليهو ياخ عايز لي نص نيفة
أجابني بنهرة : يعني عايز كم طلب ولا طلبين
حمدت الله في سري ثم أجبت : عايز نص ياخ ثم أضفت : إنت ما متذكرني ولا شنو ؟
أجابني : مافي حاجة إسمها نص
النيفة بقت طلبات
قول عايز كم طلب نديك ليهو
في الحقيقة أنا إندهشت في قصة النيفة البقت طلبات دي
ثم ياخوانا هو راس الخروف كلو قدر شنو لامين تقسموه طلبات
أجابني بحزم يا ابن الحلال أها عايز كم طلب
للمفارقة في زول جاء بعدي طلب راس نيفة كامل وبرضو أبوا يبيعوا ليها
وشبكوه ذات الأسئلة الموغلة في التفاصيل
ثم
ثم
إكتشفت إنو إرتفاع الدولار ساهم في إنو رأس النيفة يبقي معدوم وبالتالي من هنا ولي قدام مافي زول
يحلم ليهو براس نيفة .... ياخوانا مافي حاجة اسمها راس نيفة
في طلبات
بتفهموا يعني شنو طلبات
ـــــــــــــــ
طلب النيفة بي سبعة جنيه
طلب النيفة لا يري بالعين المجردي
يرضيك كده ياريس
|
|
  
|
|
|
|
|
|
|
|
Re: كلو إلا رأس النيفة ...! (Re: خضر حسين خليل)
|
قرابة الشهرين او يزيد و انا أرقُب حمار ابو الدهب, فقد أصبح نهيقه أقرب الى مواء الكدايس بل في احسن الاحوال اشبه بصوت صفير الازيار الفارغة في نهارات الصيف القائظ كما هذه الايام, بحثت في سبب روحان حس حمار ابوالدهب فلم اجد غير غلاء الاسعار الذي ضرب حاضر البلاد و ريفها إلا قلة قليلة ما زالو يرفلون (بين روتانا لي أمواج) , فالبرسيم أصبح غاية لن يبلغها ابو الدهب و امثاله من ملح الارض بعد الان فهاذي البلاد أضحت مفتوحة على كافة الإحتمالات افضلها هو ان يدق الدولار 10 جنيهات فقط, تمر الايام لأجد نفسي قبل ايام معدودة مع صديقي محمد مجدد و نحن بالقرب من حديقة القرشي و الشمس تلهب رؤوسنا كأنها لم تطلع على رؤوس من قبل لم نجد ما يقلنا من مرقدنا ذاك سوى ركشة لاحت من على البعد كسراب بقيعه , صاح مجدد بكل ما أوتي من قوة حبال صوتيه لايقاف الركشة و لكن لم تفلح مساعيه في اخراج صوته فقد بُح صوته ببح فاثرت انا الصمت حتى لا أصاب ايضا بداء حمار ابوالدهب .
---
راس نيفة ولا راس لانوف يا معلم !!
الشغلة جابت ليها روحان اصوات , و كل واحد يخلي بالو من لقاليقو
| |
|
|
|
|
|
|
|
|
|
Re: كلو إلا رأس النيفة ...! (Re: حسبو عكاشة)
|
اما بخصوص الكوارع فسلني أُخبرك مثل خبير
زي ما قلت ليك قبل كدا ست الطوارع في الزلط اول ايام موجة غلاء الاسعار مشينا عليها و قالت الطلب بقى بي خمسة جنيه بعد ما كان ب 3 جنيه فقط لا غير
قلنا ليها ليه كدا بس
قالت العدس سعرو زاد
أجي يااااا العدس الزاد
العدس يزيد و الكوارع تدق السما !!
اكتشفنا مؤخرا انو الشوربة حقت عدس مع بعض الضلافين
بمناسبة الضلافين : بتاع ركشة جا لي عمتك بتاعة الكوارع قال ليها بالله عايز لي (كدارات) ظابطة
| |
|
|
|
|
|
|
|
|
|
Re: كلو إلا رأس النيفة ...! (Re: مرتضى احمد عبد القادر)
|
ياجماعة الشيوعيون ديل ناس لذاذ
مفروض يمسكوهم الحكم
اللحمة ترقد هبطرش
ادونا طلب كدارين..انت عارف ياخليل
انا خايف يوم تجى تلقاهم بقى بالشم
طلب شم ولا شمة ما بعرف
وانت لازم تكون معاك فكة,,عشان تدفع على الرنة
والله مهزلة,,اسى نحن هنا ننزل نص سواكنى,,خروف سودانى
نوزعوا اكياس وتختو فى التلاجة,لليوم الاسود وكل السنون فى السعودية بيض
,وبعد دا الولية تقول ليك فترنا من اكل البيت,,عاوزين كودو او ماك
احد الاخوة نزل اجازة ستة اشهر ايام جوز الحمام 3 فرد,,اخر السوق فى ابقوتة
اللحمة كيلو بقروش واتين مجان,,صاحبنا اشترى 10 كيلوا ووزعهم فى اكياس
وختاهم فى الفريزر,,خالتو زوجها جزار بضبح يوميا,ويوم داك فى كورة
المرة عندها مشروع اسكريم,,كانت بتستخدم تلاجة زولنا دا عند الحوجة
لقتها مليانة لحم,,بقت تشيل وترمى فيها,,انت قايلنا بكرة ما بنضبح
على الطلاق ياخليل الخالة حاليا طلب نيفا ما لاقياه الله اقطع الانقاذ
هووووى انا ما شيوعى لكن دا الحاصل
| |
|
|
|
|
|
|
|
|
|
Re: كلو إلا رأس النيفة ...! (Re: abuguta)
|
يا خضر
كنت وصديق منتصف الليل عوض نحتفي
ايما احتفاء بمشوار للسوق الشعبي ام درمان
بغرض كبدة الابل والغرض مرض ذي ما أنت عارف
وكنا نلاحظ أن طلب الكبدة آخذ في نقصان العدد مع تصغير
باين لكل قطعة وفي يوم علق عوض لصاحب المطعم ( عوض
ساخر جداً ) : أسمع ياخي أنا اديك اقتراح ، انت الكبدة دي بعد كده اخلطها
بدل كل يوم مصغرها كده ...
| |
|
|
|
|
|
|
| |
خضر حسين خليل
حسبو عكاشة
Yassir Tayfour
مرتضى احمد عبد القادر
abuguta
بخاري عثمان الامين
فيس بوك
تويتر
انستقرام
يوتيوب
بنتيريست