ما عندي خبرة في الإخراج التلفزيوني وخصوصاً للحفلات العامة ..لكن ملاحظ لي حاجة غريبة جداً متعلقة بي تصوير الحفلات العامة المنقولة في التلفزيون ويا ريت لو في متخصصين يفتوني في هل القصة دي صاح ولا لأ.. آل حاكم ومن فترة ليست بالقصيرة إستنوا سنة بتاعت تسويق حفلات ليالي دبي عبر قناة النيل الأزرق..الفكرة حلوة ..البهجة والطرب ولملمة السودانيين و وزع الفرحة والإفادة والإستفادة سواء مادياً أو معنوياً أو من خلال التسويق والإعلان .. لكن الملاحظ إنو آل حاكم بيتعاملوا مع هكذا حفلات بي تصوير قريب لي تصوير الأعراس ..يعني ببساطة شديييدة وانت بتحضر في ليالي دبي بيجيك إحساس إنو في عريس وعروس قاعدين في الكوشة بي الجمبة كده وعااادي ممكن تقوم تبارك ليهم .. المصورين بيعتمدوا على تفتيش البنات في المقام الأول ..ومش أي بنات لالالا البنات البيفتكر المصور من وجهة نظرو إنها بت سمحة أو نضييفة أو إتكسسر فيها لمجرد جبجبة أو هزة كتف أو لبس عدسة لاصقة .. معدل إظهار البنات الموجودات في الحفلة بي صورة فردية مقابل الأولاد الموجودين في الحفلة بيكون بي نسبة 9 إلى واحد ..يعني يجيب ليك 9 بنات ثم فجأة كده يتذكر الأولاد يقوم يجيب واحد ..الإختيار نفسه للبنات بيتم بي معايير غريبة فيها نوع من الإبتزال انا بشوف ..يعني بيختارو بنات بي طريقة مخجلة وفيها نوع من التمييز وغالباً بيتعلق بي العرفة ..دايماً بيجيني إحساس إنو بيتم التركيز على بنات تربطهم معرفة بي المصور أو المخرج أو القائم على أمر الحفلة..أو بيتم إختيار بنات بيعتقد المصور إنهم ظاهرة شاذة سواء في اللبس أو التسريحة أو المكياج .. وده كلللو كوم وظاهرة الرسم والحنة في اليدين دي كوم تاني!!! زمان الحاجة دي كانت مؤشر لي إنو الزولة دي متزوجة ..أسة بقت علامة ومؤشر لي إنو ده بتفتش للعرس !! وكل المصورين تركيزهم على البنات الراسمات !! غايتو يا ناس دبي بالجد كده عايز أعرف المرا البتحنن هناك دي منو ؟ الزولة دي بتكون يوم حفلة ليالي دبي دي أقلللل شي طلعت ليها بي 300 الف درهم اللهم لا حسد!! بعدين يا آل حاكم تصويركم بي الطريقة دي بيجيب كفاوي ومشاكل مع أهل المغترب أو المغتربة ..يعني أسة زي أهل منتصر حبة صحبي ود الموردة ده لو طلع ما بيرسل لي أهلو مصاريف ولا كسوة العيد وشابكم انا مفلس وما ادونا رواتب أها بعد النقييز والهجييج والرقييص الشوفتو بيهو امبارح ده ممكن عااادي يرفعوا سماعة التلفون ويقولوا ليهو يا منتصر عاد ترسل لينا كييفن وانت قروشك كلها مكملا لينا في انصاف مدني وعقد الجلاد!!!! منتصر هييين كعب منتصرات البيكون عندها خطييبا ولا الجكس بتاعا اليوم داك ضرب ليها وقالت ليهو ماشين بكا ناس حبوبتي فمعليش ما بقدر الاقيك ويقووم يجي يلاقيها ليك حاتاااهو قرض ..!! أعتقد إنو قصة النقل التلفزيوني للحفلات العامة يحتاج لي شغل مؤسس ومهني أكتر من الشغل حق الاعراس ده وما ادراك ما الزووم إن و الزووم أووت والعدسات اللاصقة وكشكشة الدهب والرموش الصناعية والمييج الما خمج !!!
تخريمة : تاني يا موصلي قول لي حمزة سليمان من أعظم 20 مغني !!! إن شاء الله تكون سمعتو امبارح في دخلتو الصغمبروتيية في أغنية حاجة آمنة أتصبري!!
08-22-2012, 05:24 PM
ناذر محمد الخليفة ناذر محمد الخليفة
تاريخ التسجيل: 01-28-2005
مجموع المشاركات: 29251
ابو النيييز .. إيدو مبارك أليينا ألييكم كل سنة تيييبيين تيبييين .. الكارثة يا ناذر إنهم بشتنوها بشتنة السنين بي التسريحة العجييبة اللي أدت سمية حسن إحساس إنها بت عشرينية العمر!!
08-22-2012, 05:31 PM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
Quote: المصورين بيعتمدوا على تفتيش البنات في المقام الأول
فعلا وتكرار لقطة يشكل ممل جدا يعني ممكن تكون لقطة مكررة في الاغنية اكثر من 5مرات لشخصية واحدة .. وهرجل في نقل من لقطة الي لقطة وتركيز يشكل ملحوظ علي اشخاص معينين .. بمعنا عدم احترافية في التصوير واغلب القطات بها فوكس واهتزاز وزم اين ما عند معنا ..
السيد مبارك حاكم شخص يحب الابداع .. فانتمنا ان ينظر الي هذه الملاحظات حتي يكتمل ايداعها ..
مودتي ...
08-22-2012, 05:51 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
ود البشرى يا محمد: ياخ كل سنة طيب واسنة دي على كييف كيفك ..
Quote: براك تحرف البوست عن هدفه ولا شنو ما عارف البقولوها ديك
هيعاد وهي شن التخريمة ؟ما ياهو جنس الإنحراف ده
والله يا ود البشرى حضرت الحلقة امبارح وبعدها طلعت بي أكتر من موضوع كنت عايز أكتب فيهو لكن تاني قلت اختهم كللهم في صحن واحد .. المحاور كانت ترتكز على آل حاكم بداية .. ثم عقد الجلاد ثانياً وهي ترد على المشككين في تواجدها وإستمرارها بذات الرونق في عدم وجود عثمان النو .. وثالثاً الدخلة بتاعت حمزة سليمان خصوصاً وإنو انا مراهن على ضياع هوية صوت حمزة ..والحالة تغنى مع ناس خبرهم في أغنية خبر دروبها ودهاليزها وخباياها ..
08-22-2012, 06:07 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
Quote: فعلا وتكرار لقطة يشكل ممل جدا يعني ممكن تكون لقطة مكررة في الاغنية اكثر من 5مرات لشخصية واحدة ..
عارف وبعد ده كلللو مصوريننا خوافين وجبناء بي صورة عجيييبة ..الواحد فيهم يصوور ويدو في قلبو وخااايف من اللقطات المفاجئة وجاااهز لي إنو يشرد منها ..يعني في لقطات بتكون عفوية وحلوة لكن تلقاهم بيتجارو منها خوفاً من النقة ..يعني عاادي ممكن وانت بتصوور ممكن بت تقوم تغمز مش؟ أو ولد يقوم ينعس اثناء اللقطة فماف مانع تقوم تزح منو الكاميرا بي الخلعة دي ..خلي التصوير ياخد رااحتو ..
08-23-2012, 07:50 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
Quote: ثقافة التصوير السائدة في التلفزيونات هي ثقافة تصوير الوشوش فما عارف الفهم شنو؟
يعنى مفروض يصوروا وين مثلا ؟؟ الرجول ؟
ــــــــــــــــــــــــــــــــــــ دى الطريقة بتاعت التصوير البضمنوا بيها مليون عمر فاروغ يحضروا الحلقة ... يعنى انت قايل اولاد حاكم غبيانين ولا غبيانين !! وانت داير ناس حاكم يغطوا كمان على كذب المغتربن ؟؟ ما بقدروا والله صعبتها دى .. ود البشرى ! البوست دا كلوووو الغرض منو التخريمة دى انت قايل شنو ؟ بس لكن عمر ما عاد عمر ....
08-23-2012, 08:52 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
غايتو ذكرتيني مرة صاحبنا معانا هنا في الرياض بعدين ايام الكاميرات الفيديو السوني الصغيرة دي طالعة موضة كان في عروس جايبنها طرد وهو كان عندو الكايرا دي اها طبعا العروس جو عادوا ليها عرس هنا ..وكانت لابسة بلدي ..اها صاحبنا ده صوور ليك العرس ده منننن إلىى ونظام الود محترف ومركز ليك مع العريس ومع العروس بس..أنقري ما طلع بيصوور في واحدة هي ما العروس ؟ لحدددي ما الشريط إنتهى العروس الجدجد ما ظهرت وزولنا طلع ضارب برة التختة ..لأ ونظاام الود بيتفلسف وبيعمل مونتاج وبيجييب ليك البت دي مع الراجل مرة في قلب ومرة في صحن حنة
08-23-2012, 09:52 AM
دينا خالد دينا خالد
تاريخ التسجيل: 06-26-2006
مجموع المشاركات: 8736
ـــــــــــــــــــــــــــــــ خيالك طلع واسع شوية اوسسع مما يجب فى قصة العروس الطرد لكن برافو على صاحبك ... هى ما العروس عرفناها .. لكن البودبها تتلصق فى العريس كدا شنو؟ عشان يفتكروها العروس اما اذا هو قايل العروس بعرفوها بالحللا فدا شكلو ما عرس ولا حضر افراح افراح !
08-23-2012, 10:03 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
يا دينا ياخ بالغتي والله ..دي دعوة جمييلة جداً قاعد أقولا للزول عشان أخليهو يملا الحاجة العايزا بي مزاجو وأكسر قاعدة التمنيات بتاع التحدييد التقليدي داك ناس السنة الجاية عروس والسنة الجاية دكتورة والسنة الجاية في الحج ..وعشان أكسر القاعدة بقول لي الزول السنة دي ما السنة الجاية .. بعدين يا قريبتك صاحبي صوور العرس ده في 2002 يعني الوقت داك النيل الأزرق زااتا في تلتلة خلييك من افراح افراح ..وهو فعلاً وقتها ما كان عرررس ..
تخريمة : بي مناسبة أفراح أفراح دي عندنا قريبتنا مغتربين ..راجلا مشى السودان إجازة إسبوع عشان يتابع ويتم إجراءات حقت بدايات بناء ..أها انتي عارفة جرجرت المقاولين الموضوع دخل ليهو في شهر ..اها قريبتي دي بقت كللل خميس القاها ليك متابعة افراح افراح قالت لي يا عمر ده مااا بنا ..الراجل ده عندي إحساس قوي يجيبوهو في واحدة من الحلقات دي..
08-23-2012, 11:42 AM
عمر عبد الخالق سعيد عمر عبد الخالق سعيد
تاريخ التسجيل: 08-14-2005
مجموع المشاركات: 2235
قام الأخ / عمر الفاروق عبد الله الشيخ المتواجد بسلطنة عمان بوستاً بعنوان ( عينيك فيها علم الطب) .. صراحة الموضوع أعجبني لكني خلطت بينه وبينك بسربعتي المعروفه ... (سمحه التقله) ... وقمت بكتابة التالي هناك أنقله إليك هنا :
Quote: عمر الفاروق ....الرجل الظريف خفيف الظل والروح ...
أولا كل عام وأنت والأسرة الكريمة وجميع من حولك ومن تحب بألف خير ....
حقيقة لم يحالفني الحظ وألتقيك في أي تجمع حضرته لبورداب الرياض رغم أنه تجمعنا مدينة واحده .. وأظن ذلك راجع لسوء حظي يا عمر ...ورعم ذلك تجدني حريص على متابعة كل بوستاتك سيما وأنه يجمعنا حب الهلال العظيم ... هذا غير بوستاتك في المواضيع الأخرى .... وذلك لخفة الروح التي تلازم أسلوبك .. أضف إلى ذلك أنا شخصياً ما شايف فيك زول بيسعى للمعارك الكلامية كما يحاول أن يفعل البعض ... ما علينا يا عمر خلينا في كوة العيون هذي التي قمت بفتحها ....
أنا صراحة ولا أظن ذلك إستثناءاً تؤثرني العيون الجميلة وتنقلني لدنياوات من البهاء والدهشة الجميلة .... وغايتو أخطر عيون مرت علي طوال حياتي رأيتها في ثغرنا الباسم بورسودان وأيام الدراسة الثانوية .. تخيل !!!! .. ومنذ ذلك الزمن لا يزال تأثيرها السحري ينتابني كلما أتذكرها .... زوله يا عمر أخوي ببساطه كده أتحدى أرجل الفوارس أن يستطيع إعادة النظر لعينيها مرة أخرى بعد البريق والألق الذي يشع منها فيجعل كل الخلايا الكامنه في سويداء الأحساس ترقص من البهجة والفرح والانتشاء ... وكأنما الشاعر الجاهلي صاحب أجمل بيت شعر في وصف العيون كما يقول النقاد قد نظر إليها حين قال :
(إن العيون التي في طرفها حور قتلننا ثم لم يحيين قتلانا .... يصرعن ذا اللب حتى لا حراك به وهن أضعف خلق الله إنسانا ...)
آه يا عمر أخوي ... فتك بعافيه .. أنت وجميع قراءك الأعزاء .... وكل عام وأنتم بخير ... وابكوا بس !!!!
مع خالص أمنياتي أن التقيك قريباً .. وخالص ودي وتقديري ؛؛؛؛
طبعاً أنا كده أحلق خارج السرب لأني بصراحه ما عندي علاقه بآل حاكم لتصوير الأعراس ولا بتسريحة سمية حسن البشتنتها بشتنة السواد كما تقول .. بس جيت أرش شوية التلج البي فوق ديك ... وأتخارج يا عمك ....
مع خالص ودي وتقديري ؛؛؛؛
08-23-2012, 03:43 PM
دينا خالد دينا خالد
تاريخ التسجيل: 06-26-2006
مجموع المشاركات: 8736
أبو عميير: والله ايام يا زمان .. كيفنك يا حبوووب.. آل حاكم جوووة الجك وهم المفروض بيرتبو لي هكذا حفلات وسمعت كم مرة آل حاكم مستضافين في النيل الأزرق وعبرو عن فكرتهم وتعاونهم مع قناة النيل الأزرق.. ما أعتقد طاقم التصوير والإخراج من طاقم النيل الأزرق وما أعتقد إنو آل حاكم عندهم وسيلة إبداعية ممكن يقتحموا بيها الوسط الإعلامي إلا بما يتماشى والسوق .. غايتو لو في حركة وحيييدة عاجباهم فهي قصة الأغنية القادمة وزمنها بي الدقايق.. :) يا عمر كشافات النيل الأزرق دي من شدة ما بتهجم العروس لمممن في عروس منهم قالت للمزيعة وأتمنى لي كلللل الما متزوجات بيت مال وعيال
08-23-2012, 04:55 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
إدرييييس..درررسو..دراريييسو أو كما تقول المسرحية :) عيدك مبارك ياخ وكل حاجاتك كما تحب وتشتهي .. طبعاً أول حاجة كونك ما تلاقيني دي نعمة كبيرة جداً حباك بيها الله وإنت الكسبان والله ..شغلتنا اموالنا وأهلونا من تجمعات الشباب لكن ما مشكلة يا مان خليها كده للظروف ممكن عااادي نتلاقا في جوردانو وإنت تتبضع لإحدى الإجازات....وزي ما قال المهترش جكسا وهو أحد مهترشي جامعة السودان سألناهو يا جكسا حضرت كورة البرازيل وهولندا في كأس العالم أمبارح؟؟؟ قال لينا لالالا ما حضرتها لكن ما مشكلة بيعيدوها بكرة في سينما سينما
08-23-2012, 05:00 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
عمر الفاروق سلام كل عام وانت بالف خير ... في ناس كتار البرنامج المفضل ليهم افراح افراح حاجة تحير زمان في السودان يا عمر كان في حاجة اسمها الحفل العام وكان الجمهور السوداني بحضروا زي البحضر ليهو كونسرت كل الناس قاعدة في كراسيها الا عدد قليل وبكون جمهور الحفلة شاميهم ببشروا للفنان ... انتهت الاغنية الناس صفقت والشباب صفروا ويطلبوا الاغاني بصوت عالي ده بحصل لزيدان ود الامين عركي ثنائي العاصمة وحتى عقد الجلاد لمن بدت ما كان عندها اغاني بتهجج الجمهور هسه جمهور عقد الجلاد كلو برقص ... وفي حاجة تانية اسمها الحفلة الخاصة ودي زمان كان الزول البجيها ضهب بقيف بعيد يتفرج بس والهجيج لاهل العرس واصدقائهم ... والله هسه ما تعرف المضهب من اخو العريس ... معليش للكلام الكتير ده العيد الفات كان في سهرة زي دي لطه سليمان تبع ال حاكم ديل بالجد المفروض يكون في جرتق في اخر السهرة
08-23-2012, 06:30 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
ود الجمام .. كل سنة طيييب اخوي ... كدي عليك الله وعشان أأكد ليك كلامك ده شوف آل حاكم عاس الآبري بي الحلو مر كيف!! حفلة يكون الفنانين فيها عقد الجلاد وإنصاف مدني وعمار السنوسي!!!!!! قدرت تفهم حاجة ؟؟؟ قدرت تلقى ليك رابط بين الجمهور الممكن يكون متواجد في حفلة زي دي؟؟ قدرت تفهم كييف عقلية الحفلات عندنا ووصلت ياتو مرحلة ؟؟ زمان كان في نوعية فنانين في الحفلات الخيرية بيسأل في منو تاني معاهو في الحفلة عشان يشوف التوافقية ونسبية الجمهور .. اسة ممكن عااااادي تلقى ليك حفلة خيرية فئة التذاكر 10 الف جنيه ويحيه الفنانون محمد الأمين وعلوية بابور مع مفاجأة الحفل الأستاذ الربـــع .. والغريبة في كل حفلات آل حاكم لااازم يجيبو لقطة فيها مبارك حاكم (إسمو كده تقريباً) وهو بيصفق او بيرقص مع شافعة .. زكرني خلاتنا زمااان الله يديها العافية لو عايزة تظهر في أيي شرييط فيديو حق عرس بتتناول ليها أقرب شافع وتعمل فيها بترقص معاهو وتوووشك بتاعين الكاميرات يتوجهوا ليك عليها
08-28-2012, 06:37 AM
نعمات حمود نعمات حمود
تاريخ التسجيل: 07-14-2008
مجموع المشاركات: 2521
مبارك ال حاكم (ال دي ماعارفاها من وين السودان واللا مكان تاني )رجل طيب (جدا )وبسيط ...وبحب الاعلام بطريقة غريبة جدا ولكنه ليس بالاعلامي ...الاكاديمي ....اول ما التقيته كان في اول عمل له اعلاميا وهو مؤتمر صحفي كما اسماه ليلتها حضره الكثيرين من قبيلة الاعلام المرئي وكان لتدشين شريط يخص الاستاذة سمية حسن ...كان مؤتمرا منظما تماما ولكن مفرغ تماما من المحتوى ...لم ارض ليلتها عن مشواري واحسست بالخواء ..مما قدم وسمية القامة الفنية التى لا يمكن تجاوزها كانت على غير العادة لم افهم من كان وراء ذلك اغنيتين وفيديو كليب باهت لايشبه تاريخها حتى من ظهر معها كانوا من الاصدقاء المغربين لي ضحكت من بعض المشاهد ورجعت مع حسرتي .. كنت افكر في الرجل وهذه القدرات لو وظفت لشي اخر ..الرجل اكرمنا بلا مقابل ولكن ذهبت غير راضية وتمنيت ان اتي بالمستنيرين في المجال ليستغلوا هذا المورد ... ...مبارك رجل طيب وينفذ كل من يشير اليه براي وخاصة في اراء من يعتقد انهم اصحاب فكر ولذلك يضل كثيرا ... حفلات ليالي دبي او قرية البوم دي حساباتها شي اخر ... للعلم ليس هناك مختص في التصوير بين هؤلاء ولا ممنتجين كلها مواهب او كما يزعمون ... تعرف يا فاروق في حكاية الصور دي وظهور البنسوان او البنات ..فعلا ظاهرة مزعجة وقد حكى لي احدهم بان التلفونات تزعجة قبل وبعد الحفلة (لازم تجيبني لازم تظهرني )وتاتي المجاملة وقد شاهدت احدهم غاضبة على مبارك بانه لم يصورها لانو (قاصدها )وكان بعتذر بطريقة غريبة ).... هذه الحفلات كلفتنا الكثير واصبحت هاجس الكثيرين والسبب الظهور التلفزيوني واصبح الهم كيف تجد حق التذكرة وكيف الفستان والعدسات والكوفير وغيرو عشان تظهر وبمجرد ما تجيك فرصة الكاميرا تحاول تبتسم وتجبجب عشان تجبر بتاع التصوير يجيبك اعلانا للبهجة ...رغم ما تعانية الجالية ...وبعدين في قيمة تذاكر تفوق 500جنية وتخلص قبل شهر من اعلان الحفلة ... ورايك شنو في الرقيص وخاصة للمسئولين في الصفوف الامامية انصاف مدني المغنية في اخر حفلاتها كانت مخنوقة بالرقيص ولكنها لم تجد الفرصة الكافية هذه الحفلات اظهر الجالية بصورة مزيفة في الكثير الذي لايمت الى حال الجالية بالامارات ولي عودة ...
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عمر الفاروق
ناذر محمد الخليفة
محمد البشرى الخضر
دينا خالد
عمر عبد الخالق سعيد
إدريس محمد إبراهيم
معتصم ود الجمام
نعمات حمود
فيس بوك
تويتر
انستقرام
يوتيوب
بنتيريست