|
|
 صيوان عزاي مدقوق علي بيت العرس
|
محمود الجيلي الشاعر الرائع ومقدم يرنامج ريحة البن الراقي ... كتب هذا النص الباكي ... استمتعوا به ....
وأبكو يس !!!!....
صيوان عزاي مدقوق علي بيت العرس
إستغفر الله العظيم من البكا و من النخيج
إستغفر الله العظيم من السكاليب و الضجيج
قشيت دموعي من الحروف..
بقّت مسامي الحُرة نار
يا الله لو قتلوا القصيدة على الحلوق
مين في الخلوق غيري البيجيب لي دم قصيدتي الميتة تار
و الله شينة و تب علي
وسّخ هدومي البيضا عار
قاعد بلملم في البشيلو الفاتحة و الشاي و الشمس مكشوحة في نص النهار
ناسي القصيدة و دمها
ناسي الحبيبة الما نست.. همي البتجعلو همها
ناسي القريبة الما قست.. دائما حروفي تضمها
ناسي القصيدة و من زمان
ياني الأبوها و أمها
و نسيتا و الليلة الفراش .. كيف إني بكرة ألمها؟؟
أنا عندي تار
أنا لسه قاعد في البكا؟؟
شايف حزن ناس الفريق زي الكضب
حزنم عليك قرقر بعد أكل الغدا و حكى قصتين
لاك السياسة و إنتكى
حزنم كضب
لا فيهم البيعرف صبابة ولا غرام .. لا فيهم الساهر معاك و ما تعب
لا فيهم العشق التراب لا فيهم الزول البيحب
ما بعرفوك
ما حسوا كيف تمرق قصيدة من العدم.. تمرق من الأضلع نسيج.. تمرق من الأفكار فهم
ما حسوا كيف تمرق قصيدة من العدم.. تمرق حنان إنسان..و حس فنان وصوت نمة و نغم
تمرق جنين يصرخ من الشقى و الألم
ما فيهم أصلا زول عرف طعم القصيدة و حرقتا
ما فيهم أصلا زول عرف لون القصيدة و رقتا
ما عرفو إنو البسمة و النسمة التساسق في الجروف
في الدنيا أصلا حقتا
ما عرفوا إنو قصيدتي حافظا الحلة
و الشفع بنات الفزعة
و اللالوبة و المهيوبة
و المعدولة و المقلوبة
و المليانة و المشروبة
و المكروهة و المحبوبة
و الطاحونة و القطية
و السلوكة و الطورية
و الدلوكة و الصبحية
و الكنداكة و الصقرية
و الطمباري و الجراري
و الحدادي و المدادي
و المنكورة و المشكورة
و الطبشيرة و السبورة
ما عرفوا القصيدة الصورة
...................................
أستغفر الله العظيم
أنا يا قصيدة غلبني تب
يا ربي أبكيك و أنتهي
و أنسى الشدائد و سِكتا
و أرجع و أقول
عارف لو الوضع إنقلب
أصلا محال تنساني هي
صوتا بيطول ما كان في راجلا سَكتا
بتكون معاي لو معاي
و بكون حضورا و سرحتا
بتكون حكاياتي و غناي
و بكون عيونا و نظرتا
بتكون زهور عمري و صباي
و بكون عبيرا و نشوتا
بتكون مع الأيام خطاي
و بكون معاها على الطريق
إيقاع مشيها و خطوتا..
يا حليلا قتلوها الكلاب.. قبال تكمل ضحكتا
أنا عندي تار
يا خوفي أرجع مني فوت
أنا ياتو يوم خليت قصائدي وراي تموت؟
أنا عندي تار
بمرق براي
لكن بسد عين الشمس
لازم أرجع كبريائي و دمي حار
و أمنع حروفي من الحبس
بمرق براي
ما عاوز يكون آخر جزاي
صيوان عزاي مدقوق علي بيت العرس
|
|
 
|
|
|
|
|
|
|
 Re: صيوان عزاي مدقوق علي بيت العرس (Re: إدريس محمد إبراهيم)
|
محمود الجيلي صلاح الدين
من شعراء مدينة طابت الشيخ عبد المحمود
تخرج من كلية الهندسه والتكنولوجيا جامعة الجزيره.
ويعمل حاليا في وظيفة مهندس V-SAT
واحد من أميز الشعراء الشباب الذين ظهروا في الفترة الأخيرة..
يتميز شعره بالنكهة الفريدة في المصطلحات... ولديه نغمة جميلة وحنينة في الإلقاء...
أتابع ما يكتب دائما عن طريق قروبه في الفيسبوك:
https://www.facebook.com/groups/mahmoud.poems/
شكرا إدريس على هذا الجمال... فهو يستحقه...
| |
|
|
|
|
|
|
|
|
|
Re: صيوان عزاي مدقوق علي بيت العرس (Re: هايل زين)
|
Quote: محمود الجيلي صلاح الدين
من شعراء مدينة طابت الشيخ عبد المحمود
تخرج من كلية الهندسه والتكنولوجيا جامعة الجزيره.
ويعمل حاليا في وظيفة مهندس V-SAT
واحد من أميز الشعراء الشباب الذين ظهروا في الفترة الأخيرة..
يتميز شعره بالنكهة الفريدة في المصطلحات... ولديه نغمة جميلة وحنينة في الإلقاء...
أتابع ما يكتب دائما عن طريق قروبه في الفيسبوك:
https://www.facebook.com/groups/mahmoud.poems/
شكرا إدريس على هذا الجمال... فهو يستحقه... |
شكراً على الإضافه الثره يا هايل... وكل عام وأنتم بألف خير ؛؛؛؛
مع خالص ودي وتقديري ؛؛؛؛
| |
|
|
|
|
|
|
|
|
|
Re: صيوان عزاي مدقوق علي بيت العرس (Re: إدريس محمد إبراهيم)
|
Quote: تابعت الفقرة دي تحديدا
وشعرت بانو الزول الرائع لم يستطع تكملة القصيدة
اتاريهو معاهو حق
شاعر شاب مبدع
عيدك مبارك ادريس |
شكراً أستاذ علي الكرار .. في الحقيقة برنامج ريحة البن من أمتع البرامج الرمضامية .. شحصياً تجدني حريص كل الحرص على متابعته ... والشعراء مبدعون بحق
كل عام وأنتم بألف خير ؛؛؛
| |
|
|
|
|
|
|
| |
إدريس محمد إبراهيم
HAMZA SULIMAN
علي الكرار هاشم
فيس بوك
تويتر
انستقرام
يوتيوب
بنتيريست