|
|
 الوصيّة ..
|
.
بوصيك
شان تبقى عشرة
على العيون
الشافتك
وضارتك
وإختارتك
قطعت معاك عهد الولف
تمشي وتلف
وتلملم الدمع المشتت في الدرب
حدّ النزف
وأحضانا شايلة من الخريف
صباح جديد
ضواً يغتي من الصقيع
والشمس تفتح صديرها
علي الصباح
للشوق تزف
بوصيك
وسع أياديك للفرح
ضم السحاب
خلي المطر يدفا في حضنك
يسيح
يملا الشوارع بالرزاز
حبات ندى
يغسل سموم أهل الوجيع
يضغط علي كتف الألم
يمسح حريق حمّى الجبين
يضحك عزِف
صوت الكمان يرقص يهز
بشَّر عرض
ودوبيت يلف
تاني ويلف
تاني ويلف
وقع التعب
نفض الشرا وترتر
وقف
بوصيك
شان تبقى عشرة
علي زغاريد الأهل
لما تسمع
طلقة في جوف الفريق
دخان زناد غطّى القطن
صوت طفلتك الفي حشاي
إتضارى من خوف الجهال
تحت العناقريب إنكفوا
لا حيلة لا دعوة سماح
يا الله هوي
يا الله هوووي
حبوبة من فجاً بعيد
صوتها الحديد
الله لي
يا الله لي
زمن السكوت
صوت المنادي علي السحور:
"يا راجل .. قوم إتطهر
شيل البندق
أطلع للشارع وإترجل
سجل معركتك في الدفتر
شان الدفتر أصبح عفنان
مليان ديدان
سموهم عسكر"
بوصيك
أحلق دقنك
أرمي الشنطة المليانة ورق
أحمر بالدم
أسود بالغم
أخضر علقم
أبيض بالسم
بالسم الهاري
ورم
ياخ ما تتلم
أو خجلة تجيك تديك الكف
يمكن تنعم بالذوق .. وتحس
ساكت من عمرك كم
عشرة وعشرين
ساكت لي متين
بوصيك أصحى
أملا القلم الحبر الأبيض
ألحق
سجل معركتك في الدفتر
شان الدفتر أصبح عفنان
مليان ديدان
سموهم عسكر
|
|
  
|
|
|
|
عبير خيرى
rani
بله محمد الفاضل
الزنجي
فيس بوك
تويتر
انستقرام
يوتيوب
بنتيريست