|
|
 طــيب ...!
|
ها نحن
مرة أخري إثنينينا (كثيران الله في برسيمه) نعاين وننظر ونمشي ـ نمشي في الدروب . تتناقلنا الخطاوي خطوة إثر أخري ـ وأخري إثر أخري وها نحن نمشي .
قالت جارة لنا :
العجيبة السنة دي ما فرحنا بنجاح الوليدات ـ من وين بس نجيب الرسوم ـ كل ما نجحوا الوليدات همومنا بتزيد ـ قبيل بنديهم سندوتشات الفطور في ايدهم هسي عايزين حق الفطور وحق المواصلات . (هكذا تحدثت جارتنا)
تمضي الخطاوي حاملةً منا الترنحات ونحن نمضي عادي يعني نمضي ....!
قال الناس :
تعبنا ـ وليس بعد التعب شكوي ـ قالت الأسعار كلاماً آخر ـ قالت الأسواق كلامات وكلامات ـ حرروا منا الأسعار وبقينا علي ذات القيود والخيل تجقلب والشكر لصانعي الفقر والأزمات .
ما بين ليلة وضحاها إرتفعت الأسعار ـ شككت أنا في بتاع الدكان إذ كيف له أن يتنبأ بسعر السكر قبيل أن يعلن وزير مالية البلاد سياساته التقشفية ؟ شككت أنا حتي خيل لي أنه مخبر يرتدي جلباب تاجر لا أكثر ولا أقل ـ والجزار مخبر وبتاع الغاز مخبر والكمساري مخبر وبتاع البتاع مخبر ووو أنا لا زلت (في البعد أنادي يا بلادي يا بلادي يا بلادي يااااااااااااابلادي) .
تظاهرت الشوارع ـ خرجت البلاد من أجواء مشاريع خراتيمهما الحضارية خرجت هكذا عنوة (كدة وإقتدار) من أجواء الإستنكاح ـ خرجت الشوارع بحثاً عن بلاد آمنة ـ بلاد مطمئنة ـ بلاد بينها وبين شعبها لا تسع مفردات الأرض شرحها ـ خرجت يازول الشوارع من طرف ـ أمبدة ـ زقلونا ـ الحاج يوسف ـ الثورة ـ الديم ـ التعايشة ـ العباسية ـ الطلاب ـ الجامعات ـ البمبان ـ رجال الشرطة ـ ها زول جاطت الشغلة وأنا ..... (لا زلت في البعد أنادي يابلادي يا بلادي ياااااااااااااا بلادي) .
تغير كل شئ في لمح البصر ـ كل شئ تبدل ـ أنا نفسي لم أعد أنا ـ غضبي كذلك لم يعد هو ـ المسائل كلها تلخبطت حتي ـ حتي بلغ ومن شدة هواننا أيها الناس : أن صار ربطة الجرجير بتلاتالاف . أي والله جرجير الله والرسول بتلاتالاف ونحن نعاين أما الطماطم فبلا شك لا يسع الباندويث لذكره . والمغني يغني (هييي مقدرة راجل المرا حلو حلاة ) .
والعلة يا سادتي ليست في السياسات التقشفية (فنحن شعب متقشف) بطبعنا والحمد لله . متقشف للدرجة التي ماعرفنا فيها للتقشف رأساً من كراع ـ متقشفين بالنية يعني ـ متقشفين لله والرسول ـ متقشفين جنس تقشف أسكت خلوه ساي . غير أنو الشغلة ما تقشف ـ الموضوع في كون أننا ناس ساي ـ ناس تحاصرهم الأوجاع والأزمات والأوهام ثم ...ثم يطالبوننا بالتقشف فتأمل ...!؟ .
مطالبنا وغاية أماني الأمنيات منا متقشفة ـ كأن نحلم مثلاً بالخبز والسلام والحرية وتلك مطالب قامت لأجلها الثورات منذ عصور خلت لو كنتم تعلمون . وأنا خجلٌ خجلٌ كوني أردد الآن شعارات الثورة الفرنسية في عهودها الغابرة خجلٌ كوني أبحث عن مأوي في (هذي الساعة من شهوات الليل ) في بلد كان من شأنه أن يسع أجسادنا قبل أن يحتضن إحتضار أمانينا وأحلامنا .
وأنا
إستغفر الله العظيم
ويا الخرطوم
إذا نامت عليكي
هموم
عيون الحق
ما بتنوم
_____
|
|
  
|
|
|
|
|
|
|
|
Re: طــيب ...! (Re: خضر حسين خليل)
|
وينك و وين ايامك
يا الدسيت جواي احلامك
--
| Quote: قالت الأسعار كلاماً آخر |
تتذكر ست الكوارع بشوربة العدس الكانت بي 3 جنيه !!
نفس العدس
نفس الضلافين
بقت بي 7 جنيه
| |
|
|
|
|
|
|
|
|
|
Re: طــيب ...! (Re: حسبو عكاشة)
|
والله صدق الشاعر يا حسبو حينما قال :
شر الكوارع ما يضحك
هو بلاهي عدس الوابل ده بي اعلانو المسكول ده بعمل كم ؟
جاطت يافقر ياخ
ــــــ
بيني وبينكم انتو في نعمة الناس بي هنا بقوا ماعندهم نفس للكوارع متقشفين ياعمك ياخ
| |
|
|
|
|
|
|
|
|
|
Re: طــيب ...! (Re: خضر حسين خليل)
|
| Quote: مطالبنا وغاية أماني الأمنيات منا متقشفة ـ كأن نحلم مثلاً بالخبز والسلام والحرية وتلك مطالب قامت لأجلها الثورات منذ عصور خلت لو كنتم تعلمون . وأنا خجلٌ خجلٌ كوني أردد الآن شعارات الثورة الفرنسية في عهودها الغابرة خجلٌ كوني أبحث عن مأوي في (هذي الساعة من شهوات الليل ) في بلد كان من شأنه أن يسع أجسادنا قبل أن يحتضن إحتضار أمانينا وأحلامنا |
خضر ازيك ومشتاقين !
خبز وسلام وحريات - ما شايف زودتها شوية في برنامج الحد الادني للتقشف !
| |
|
|
|
|
|
|
|
|
 Re: طــيب ...! (Re: هيثم طه)
|
| Quote: تظاهرت الشوارع ـ خرجت البلاد من أجواء مشاريع خراتيمهما الحضارية خرجت هكذا عنوة (كدة وإقتدار) من أجواء الإستنكاح ـ خرجت الشوارع بحثاً عن بلاد آمنة ـ بلاد مطمئنة ـ بلاد بينها وبين شعبها لا تسع مفردات الأرض شرحها ـ خرجت يازول الشوارع من طرف ـ أمبدة ـ زقلونا ـ الحاج يوسف ـ الثورة ـ الديم ـ التعايشة ـ العباسية ـ الطلاب ـ الجامعات ـ البمبان ـ رجال الشرطة ـ ها زول جاطت الشغلة وأنا ..... (لا زلت في البعد أنادي يابلادي يا بلادي ياااااااااااااا بلادي) . |
| |
|
|
|
|
|
|
|
|
|
Re: طــيب ...! (Re: حمزاوي)
|
يا خضر الأسعار قتلت ذوي الدخل العالي فكيف يكون الحال مع ذو الدخل المحدود وذلك الذي يكاد لا يوجد؟
ليهم حق يشيلوا هم قراية أطفالهم..
وهم اكلهم ولبسهم ومواصلاتهم..
واساسا هم نسوا تماماحاجة إسمها علاج!
ونقول شنو بس؟!
ربنا ينتقم منهم في كل لحظة ينقهر فيها إنسان وتبكي فيها أم لأن خاطر ابنائها مكسور..
ويموت فيها الاب عجزا وقهرا!
اللهم آمين!
| |
|
|
|
|
|
|
|
|
|
Re: طــيب ...! (Re: Muna Khugali)
|
سلام يا خضر
الله معاكم ياخ
أولادي سافروا السودان قبل 20 يوم
أمس اتصلت عليهم كالعادة حسيت أنو البنت (5 سنوات) مضايقة شوية
قلتها ليها مالك زهجانة السودان دا حلو ياخ
قالت لي لا السودان قليل أدب ما فيهو حاجة
قلت ليها شكرا شعبي وقفلت
| |
|
|
|
|
|
|
|
|
|
Re: طــيب ...! (Re: حمد عبد الغفار عمر)
|
(السودان ايران كازخستان باكستان افغنستان تركمستان اي دولة ينتهي اسمها بي " ان " دي مفروض يضربونها بي قنابل ذرية ويقومو ناس من جديد) مقولة مشهودة لاحد المعارف الرائعين
ياصديق..
عما قريب
الهمبريب
يفتح شبابيك الحبيب
والحال يطيب
يا محمد أحمد تستجم
والبيت يتم
تفرح فرح
تحلم حلم
كم تطمئن
حقك إجيك لا فيهو شك
| |
|
|
|
|
|
|
|
|
 Re: طــيب ...! (Re: Muna Khugali)
|
طيب
مالنا لا نتوفى
أو نموت
وندع لهم هذه الحياة
بصمتا كدة
يا تبقى حرامي وملعون
وابن ستين .......
يا تزح يا اخي
هكذا تخبرنا الحياة التي اعتلى المذموم
أعلى سنامها
شوية كدا والغلبان يطرشق
ويحقق للمتخم المراد
سلام يا أخضر
خضر الله روحك أبداً بلمعتها
| |
|
|
|
|
|
|
|
|
|
Re: طــيب ...! (Re: مريم بنت الحسين)
|
آ ناس
إزيكم ومعليش للتأخير والله
سودانيز دي بقينا نخشها بالكروب ـ يعني عشان تخش سودانيز الا تتوضأ وتصلي ركعتين
وتشحد الله إنو يسهلها في وشك ـ بجيكم بكل تأكيد .
وربكم يرفع قدم البلد ولا قدااااااام
مودتي لكم جميعاً
| |
|
|
|
|
|
|
|
|
|
Re: طــيب ...! (Re: خضر حسين خليل)
|
وجدان ازيك ياااخ
بالله طلعنا اخوان في هم البامبرز ؟؟
أخوان حقيقة بالجد بالجد مش قالوا ان المصائب يجمعنا المصابينا ؟؟
أها من الليلة نسمي خوتنا خوة البامبرز والله صحي
ياخدر مالك ياااخ؟؟
الغريبة السوق مافيهو بامبي تصدق؟؟
قالوا البامبي ده بجيبوهوا من البرازيل بالدورار والدورار بقى حاااار ومابندار
يعني هسي اتخيل لو مرتك بعد عمر طويل يعني اتوحمت بي بامبي الا ترسلها بعثة البرازيل ,,, تحرث ماشاء الله لها من بامبي ثم تؤوب بالسلامة ,,, شفت البلد دي سمحة كيف ,,, لو داير بامبي ساكت بتفسحك
بعدين جرجير مين والناس نايمين ؟؟؟
المرة قالت دايرة جرجير لي شعرها ؟؟ شعر شنو عليك الله يااااخ ,,, والله سيرة الجرجير اليومين ديل تجيب الطلاق في البيوت فشنو ؟؟ أختاها الله واحد ما تقوم تطلق نفسك وتبقي خدرين أي واحد ماسك زاوية وبجعر براهوا
ـــــــــــــــــــــــــــــــــــــــــــــــــــــــــ
تصدق مشتاق ليك يا خدر ؟؟
| |
|
|
|
|
|
|
|
|
|
Re: طــيب ...! (Re: محمد الطيب يوسف)
|
لاحولة من قولة
ولا ديسك من النمل
دى كانت دعوة صديقتنا نجوى النو
غايتو ما عندى غير التضامن مع كل الحاصل ليكم
والحاصل بى
انا شوق وحنين
واخوة فى النيم
او كما قال الطيب شعراوى قدس الله سره
يا محمد الطيب يوسف
ازيك انتهز هذه الفرصة واتجدع فى هذا البوست
على ذكر الاخوة فى البامبرز
كنت فى يوم قاعدة تحت شجرة المسرح
والكلام جاب الكلام
قمت قلت للطيب شعراوى
ـ عندى صديقة طبيبة وبتعمل فى ابحاث فى شجرة النيم واحسن حاجة لازالة التسوس والتهاب اللثة النيم او هكذا قالت صديقتى
فى اللحظة ديك والتو "جا صديقنا صباح النعمة سراج النور شايل ليهو فرع نيم وبتسوك
الطيب شعراوى ما كضب وناداه
ـ تعال سلم على اختك فى السواك
وسواك وسواى بى جارو سبت افكارى نظراتك
يا خدر ياخ ازيك زاتو
وبتتسهل "مش زمان قالو فى الاثر ـ الستة سنين الحالكة فى تاريخك ما بتتجدد؟"
قامت الستة سنين اتجددت واتجددت تانى وتانى اتجددت "يعنى بقيت متجددة طوالى
ولمن تكمل التجديد بتاعها بتقع براها
صدقنى جد
وامكن هسى واقعة ونحنا ما شايفنها
او تكون صولجان سليمان عليه السلام ....؟
دايرة ليها زول يلكزها
الكزوا يرحمكم اللله
ياخدر ود امى وحات الله شدة ما قرفانة ما لقيت لى حاجة تفك عنى قرفى غير المحل دا
شكرا على اتاحة الفرصة ، ونشكر الاذاعة على استضافتها لنا
بالجد العالم بقى "سروالى جدا " هكذا كان احد المدرسين ينادى المدرسة السريالية
فخلينا من حكاية الثورة دى وفكروا معانا فيما بعد الثورة لانه الثورة لسة ما نجضت
صدقنى جد
لمن تنجض عليك امان الله لافى "تجديد بنفع ولا غيرو بشفع "
مش فى حاجة اسمها الحتم التاريخى والاجتماعى ؟
حيحصل
اقعد عافية ود امى
| |
|
|
|
|
|
|
|
|
|
Re: طــيب ...! (Re: بخاري عثمان الامين)
|
وهو هكذا عندما يتجلي ... تجده جميلا معبرا عن الجميع
في زيارتي الاخيرة للسودان تأكد لي بانو سوء الحال يغني عن السؤال
يمين الواحد خجلان من نفسوا.......!!!!!
شكرا ياخضرنا وخضر الله كيبوردك
| |
|
|
|
|
|
|
| |
خضر حسين خليل
حسبو عكاشة
هيثم طه
Amani Al Ajab
خالد العبيد
محمد عبد الماجد الصايم
Muna Khugali
حمد عبد الغفار عمر
بله محمد الفاضل
وجدان جمال
مريم بنت الحسين
سلمى الشيخ سلامة
بخاري عثمان الامين
haroon diyab
محمد مصطفي مجذوب
فيس بوك
تويتر
انستقرام
يوتيوب
بنتيريست